Juan 17

Ang Talagsaon nga Pagpataliwala nga Pag-ampo sa Manluluwas

Imahe

Jesus has his eyes closed in prayer, the back of the disciples heads are in the foreground. Outtakes include a view of just the disciples in prayer and just Jesus in a green field with his head bowed in prayer.

Si Jesukristo mihalad sa Iyang Talagsaon nga Pagpataliwala nga Pag-ampo (nagpasabot nga Iyang gihangyo ang Langitnong Amahan alang sa Iyang mga Apostoles ug sa tanan nga mituo Kaniya) sa hapit na ang pag-antos alang sa atong mga sala. Isip usa ka bahin sa Iyang pag-ampo, si Jesus miingon nga ang pagkaila sa Amahan ug sa Anak mao ang pagkaangkon og kinabuhing dayon (tan-awa sa Juan 17:3). Kini nga leksiyon mag-awhag kaninyo sa pagkaila sa Langitnong Amahan ug kang Jesukristo sa mas personal nga paagi sa inyong kinabuhi.

Paggamit sa pisara. Ang epektibo nga pagamit sa pisara atol sa leksiyon makaandam sa mga estudyante sa pagkat-on. Makadapit usab kini og makahuluganong partisipasyon, ilabi na gikan niadtong kinsa nagkat-on pinaagi sa pagtan-aw. Puwede ninyong gamiton ang pisara sa pag-outline sa labing importante nga mga punto o mga baroganan sa leksiyon, pag-diagram sa usa ka doktrina o hitabo, pagpakita og mga mapa, pagdrowing og mga butang nga gihulagway diha sa mga kasulatan, paghimo og mga flowchart, o pagbuhat og uban nga mga kalihokan nga mopalambo sa pagkat-on.

Pagpangandam sa estudyante: Dapita ang mga estudyante sa pagbasa sa 3 Nephi 19:16, 26–33 ug pagpamalandong unsay pagbati kon makadungog sa Manluluwas nga nag-ampo ngadto sa Langitnong Amahan alang kanila.

Posible nga mga Kalihokan sa Pagkat-on

Pagkaila sa Langitnong Amahan ug ni Jesukristo sa personal nga paagi

Aron makatabang sa pagmugna og dugang nga pagkahiusa sa klase, ikonsiderar ang pag-adjust sa mosunod nga kalihokan. Imbis ipangutana ang unang duha ka pangutana bahin sa usa ka tawo sa kasaysayan, i-assign ang matag estudyante ngadto sa usa ka kapares nga tingali wala kaayo nila mailhi. Dapita sila nga maghunahuna og usa o duha ka butang nga ilang nahibal-an mahitungod nianang tawhana. Dayon hatagi sila’g duha ka minutos aron makigsulti sa ilang kapares nga hatagan og yano nga mga instruksiyon aron “mas mailhan pa gayod nila og gamay.” Human sa duha ka minutos, dapita ang mga estudyante sa paghisgot sa kalainan tali sa pag-ila sa mga butang mahitungod sa usa katawo ug sa aktuwal nga pagkaila kanila.

Paghunahuna og usa ka importante nga tawo sa kasaysayan sa inyong nasod.

Unsa man ang pipila ka butang nga inyong nailhan mahitungod nianang tawhana?
Unsaon ninyo sa paghulagway sa mga kalainan tali sa inyong kahibalo mahitungod sa tawo sa kasaysayan ug kon unsa kasuod ang inyong pagkaila sa suod nga sakop sa pamilya?

Karon paggahin og panahon aron marekord sa inyong journal unsay inyong gibati mahitugod sa inyong nahibaloan sa Langitnong Amahan ug kang Jesukrsito. Gibase ba lamang kini sa mga kamatuoran nga inyong nahibaw-an mahitungod Kanila, o kini nahimong mas personal pa kay sa niana? Sa unsang paagi kaha makapanalangin sa inyong kinabuhi ang inyong pagkaila Kanila sa mas personal nga lebel?

Si Jesus nag-ampo alang sa Iyang mga disipulo

Pagkagabii sa wala pa ang Iyang pag-antos sa Getsemani, pagbudhi, ug Paglansang sa Krus, ang Manluluwas naghalad og kusog nga sagradong pag-ampo nga nailhan isip ang talagsaon nga Pagpataliwala nga Pag-ampo. Siya nag-ampo sa Langitnong Amahan aron mohangyo alang sa Iyang mga disipulo, lakip ang Iyang mga sumusunod nga nagpuyo sa atong panahon (tan-awa ang Juan 17:20). Sulayi sa paghanduraw kon unsa kaha ang pagbati sa mga Apostoles nga makadungog kang Jesus nga nag-ampo alang kanila nianang sagrado nga kagabhion.

Kon ang mga estudyante gidapit sa pagbuhat sa pagpangandam sa estudyante, ikonsiderar ang paghangyo kanila nga mopaambit sa ilang mga panabot.

Unsa man ang atong makat-onan mahitungod sa Manluluwas gikan sa Iyang pag-ampo alang sa Iyang mga disipulo ug sa tanan nga mosunod Kaniya sa wala pa ang Iyang pag-antos didto sa Getsemani ug pagdakop?

Basaha ang Juan 17:1–3 , nga mangita sa mga panalangin nga giampo ni Jesukrsito nga madawat sa Iyang mga disipulo.

Unsa ang gitinguha ni Jesukristo alang sa Iyang mga disipulo?

Ang mga hugpong sa pulong nga “kinabuhing dayon” ug “mahangturong kinabuhi” ( sa mga bersikulo 2–3) kanunay nga masaypan sa pagsabot isip yanong pagpakabuhi hangtod sa kahangtoran. Ang Manluluwas nag-ampo nga kita makadawat og mas labaw pa niana. Ang “kinabuhing dayon” mao “ang kalidad sa kinabuhi nga gipuy-an sa atong Mahangturon nga Amahan. … Ang kinabuhing dayon, o kahimayaan, mao ang pagpuyo sa presensya sa Dios ug magpadayon isip mga pamilya (tan-awa sa Doktrina ug Mga Pakigsaad 131:1–4)” (Mga Hilisgotan sa Ebanghelyo, “Kinabuhing Dayon,” topics.ChurchofJesusChrist.org). Ikonsiderar ang pagrekord niini nga kahulogan diha sa inyong mga kasulatan duol sa bersikulo 3 .

Sumala sa bersikulo 3 , unsay usa ka butang nga gikinahanglan aron makadawat sa kinabuhing dayon?

Usa ka kamatuoran nga atong makat-onan gikan sa pag-ampo sa Manluluwas mao nga aron makadawat og kinabuhing dayon, kinahanglan kitang makaila sa Langitnong Amahan ug ni Jesukristo.

Ngano kaha nga kita kinahangan man nga makaila gayod sa Langitnong Amahan ug ni Jesukristo aron makadawat sa kinabuhing dayon?

Si Elder Michael John U. Teh sa Seventy mipasabot sa importansya sa pagkaila sa Manluluwas:

Imahe
Official Portrait of Elder Michael John U. Teh. Photographed in 2015. Background replaced in March 2017.

Kinahanglan natong ilhon nga ang pagkaila sa Manluluwas mao ang labing importante nga tinguhaon sa atong kinabuhi. Kinahanglan nga kini ang mag-una sa bisan unsa pa nga mga butang.

(Michael John U. Teh, “Atong Personal nga Manluluwas,” Liahona, Mayo 2021, 99)

Ngano kaha nga ang pag-ila sa Manluluwas maoy labing importanteng tinguhaon sa atong kinabuhi?
Unsa’y makapalisod sa paghimong prayoridad sa atong pag-ila sa Manluluwas labaw sa ubang mga tinguha sa inyong kinabuhi?

Pamalandongi sa makadiyot kon unsa kasuod ang inyong relasyon sa usa ka miyembro sa pamilya o higala nga napalambo. Unsay inyong gihimo aron mas makaila kanila? Aduna bay mahinungdanong mga kasinatian nga nakatabang ninyo aron mailhan sila pag-ayo? Unsa kadugayon nga kining relasyon milambo?

Unsaon ninyo sa paggamit kini nga mga buhat nga nakatabang ninyo sa pagpalambo og suod nga relasyon sa usa ka sakop sa pamilya o higala ngadto sa pag-ila sa Langitnong Amahan ug ni Jesukristo?

Alang sa dugang nga mga ideya kon unsaon pag-ila sa Langitnong Amahan ug si Jesukristo, ikonsiderar ang pagpaambit og mga pamahayag gikan sa “Komentaryo ug Background nga Impormasyon” nga seksiyon.

Ikonsiderar ang pagdapit og mga estudyante nga motubag sa mosunod nga mga pangutana sa gagmayng grupo aron mas daghang estudyante ang makapaambit.

Unsa nga mga kasinatian ang inyong nasinati nga nakatabang ninyo sa pag-ila sa Langitnong Amahan ug kang Jesukristo? Unsa ang inyong nakat-onan pinaagi niini nga mga kasinatian?

Pagkaila sa Manluluwas pinaagi sa Iyang pag-ampo

Aron matugotan ang mga estudyante nga makatuon sa tibuok nga kapitulo kay sa mga gisugyot lamang nga mga bersikulo diha sa mosunod nga parapo, ikonsiderar ang pag-assign og mga seksiyon sa kapitulo ngadto sa lainlaing mga estudyante, dayon awhagon sila nga mopaambit sa ilang nakat-onan sa klase.

Usa ka paagi aron makaila sa Manluluwas mao ang Iyang mga pag-ampo. Paggahin og pipila ka minutos aron mas makat-on kinsa ang Manluluwas pinaagi sa pagtuon kon unsa ang Iyang giampo diha sa Juan 17 . Pipila sa mga tudling nga lagmit ninyong pilion nga ipokus anaa sa Juan 17:4–11, 20–26 .

Unsa ang inyong nakat-onan mahitungod sa relasyon ni Jesukristo sa Iyang Amahan gikan niini nga pag-ampo?
Unsa nga mga panalangin ang gitinguha ni Jesukristo alang kanato?
Ngano man kaha nga Siya mag-ampo alang kaninyo aron makadawat niining piho nga mga panalangin?
Unsa ang inyong nakat-onan mahitungod kang Jesukristo ug sa Langitnong Amahan nga nakatabang ninyo nga kamo gustong mas makaila pa Kanila?

Hunahunaa kon unsa kaha ang pagbati nga mahimong suod kaayo sa Langitnong Amahan ug sa Manluluwas nga ang inyong relasyon mahulagway isip usa nga kauban Nila. Unsa kaha ang inyong pagbati? Usa kaha kamaayo ang inyong kinabuhi? Ang Langitnong Amahan ug si Jesukristo nahigugma kaayo kaninyo ug nagtinguha nga ikauban kamo. Si Jesukristo nag-ampo sa Langitnong Amahan aron matabangan kamo nga makabaton og suod nga relasyon ngadto Kanila. Ibutang sa hunahuna nga ang ingon niana nga relasyon mogahin og panahon ug paningkamot aron molambo, sa tibuok niini nga kinabuhi ug ngadto sa sunod.

Irekord sa inyong journal sa pagtuon unsa ang andam ninyong buhaton aron mas makaila sa Langitnong Amahan ug ni Jesukristo. Ilakip kon unsaon ninyo sa pagkahibalo nga ang inyong relasyon Kanila nagkalig-on ug giunsa ninyo sa pagtuo nga ang maong relasyon mopanalangin sa inyong kinabuhi.

Komentaryo ug Background nga Impormasyon

Unsay atong mabuhat aron mas makaila sa Langitnong Amahan ug ni Jesukristo?

Si Presidente Henry B. Eyring sa Unang Kapangulohan mitudlo:

Imahe
Official Portrait of President Henry B. Eyring taken March 2018.

Kon gusto ninyo nga magpabiling suod ngadto sa usa ka tawo kinsa gimahal ninyo, apan kinsa nabulag gikan kaninyo, mahibalo kamo unsaon sa pagbuhat niini. Mangita kamo og paagi nga ika-istorya sila, maminaw kamo kanila, ug makadiskobre kamo og mga paagi sa pagbuhat sa mga butang alang sa usag usa. Kon mas kanunay kana nga mahitabo, mas magpadayon kini og dugay, mahimong mas halawom ang kalig-on sa pagbati. Kon dako ang panahon nga molabay nga walay panag-istorya, pagpaminaw, ug pagbuhat, ang bugkos magkahuyang.

Ang Dios hingpit ug makagagahom sa tanan, ug kamo ug ako mga mortal. Apan siya ang atong Amahan, siya nahigugma kanato, ug siya nagtanyag og samang oportunidad sa pagpaduol ngadto kaniya sama sa usa ka mahigugmaon nga higala. Ug inyo kining buhaton sa susamang paagi: pagsulti, pagpaminaw, ug pagbuhat.

(Henry B. Eyring, “To Draw Closer to God,”Ensign, May 1991, 66)

Si Elder C. Scott Grow sa Seventy mipasabot:

Imahe
Official Portrait of Elder C. Scott Grow. Photographed March 2017.

Akong batan-ong mga higala, makasugod kita sa pag-ila sa Dios pinaagi sa pag-ampo. …

… Samtang magtuon kamo sa kasulatan matag adlaw, mag-inusara ug uban sa inyong pamilya, makakat-on kamo sa pag-ila sa tingog sa Espiritu ug makaila sa Dios. …

Samtang magtinguha kita sa pagbuhat sa kabubut-on sa Dios pinaagi sa matinud-anong pagserbisyo Kaniya ug sa atong isigkatawo, atong mabati ang Iyang pag-aprubar ug makaila gay[o]d Kaniya.

Ang Manluluwas misulti kanato nga ang labing maayong paagi sa pag-ila sa Dios mao ang pagkahimong sama Kaniya. Mitudlo Siya: “Busa, unsa nga matang sa mga tawo kamo mahisama? Sa pagkatinuod Ako moingon nganha kaninyo, gani sama nga Ako mao” [ 3 Nephi 27:27 ].

Ang katak[o]s mahinungdanon aron mahimong sama Kaniya. …

Ang Dios nakaila kaninyo ug nagdapit kaninyo nga makaila Kaniya. Pag-ampo ngadto sa Amahan, pagtuon sa mga kasulatan, paningkamot sa pagbuhat sa kabubut-on sa Dios, paningkamot nga mahisama sa Manluluwas, ug pagsunod sa matar[o]ng nga mga tigtudlo. Samtang inyong buhaton, kamo makaila sa Dios ug ni Jesukristo, ug kamo makapanunod sa kinabuhing dayon.

(C. Scott Grow, “Ug ang Kinabuhing Dayon Mao Kini,” Liahona, Mayo 2017, 121–24)

Dugang nga mga Kalihokan sa Pagkat-on

Pagdrowing nga Kalihokan—pagkahimong usa

Ikonsiderar ang pagdapit og usa ka estudyante nga mopakita sa mosunod nga kalihokan ngadto sa pisara samtang ang ubang mga estudyante magkompleto niini sa ilang journal sa pagtuon.

Dapita ang mga estudyante sa paghimo og dayagram pinaagi sa pagsulat sa ilang ngalan dapit sa ubos sa wala nga kilid, ang ngalan sa higala sa ubos duol sa tunga, ang ngalan sa sakop sa pamilya dapit sa ubos nga tuong bahin, ug ang Langitnong Amahan ug Jesukristo dapit sa ibabaw duol sa tunga.

Sunod, hangyoa ang mga estuydante sa pagbadlis og tul-id nga inya gikan sa ilang ngalan ngadto kang Jesukristo, dayon gikan sa matag lain nga ngalan ngadto kang Jesukristo.

Dapita sila sa paghunahuna nga ang kada tawo diha sa pahina nagpaingon ngadto kang Jesukristo subay sa mga linya nga gibadlis sa estudyange. Unsay nahitabo sa distansiya sa tunga-tunga niining mga tawo samtang ang matag usa magkaduol ngadto sa Manluluwas?

Hangyoa ang mga estudyante nga basahon ang Juan 17:18–26 , nga mangita kon unsay natural nga mahitabo sa relasyon tali sa mga disipulo ni Jesukristo samtang ang matag tawo mas nagkahisama sa Manluluwas.

Paggamit sa kinatubuk-ang komperensya aron mapalawom ang atong pagsabot sa kasulatan

Hatagi ang matag estudyante og kopya sa pakigpulong ni Elder David A. Bednar nga giulohan og, “Kon Nakaila Pa Kamo Kanako” (Liahona, Nob. 2016, 102–5). Hatagi ang mga estudyante og panahon sa pagtuon ug pagpangita og dugang nga mga rason nga kita kinahanglan nga makaila sa Manluluwas, ug usab sa mga butang nga atong mabuhat aron mas makaila Kaniya.