Juan 14:1–6, 15:1–11

“Ako ang Daan, at ang Katotohanan, at ang Buhay”

Sa Kanyang huling gabi kasama ang Kanyang mga disipulo, itinuro ni Jesucristo sa kanila ang tungkol sa Kanyang banal na katangian at misyon. Itinuro Niya na Siya ang daan pabalik sa Ama sa Langit, at inihambing Niya ang kaugnayan ng Kanyang mga disipulo sa Kanya sa mga sanga sa puno ng ubas. Ang lesson na ito ay makatutulong sa iyo na pagnilayan ang iyong kaugnayan kay Jesucristo at kung paano mo Siya masusunod at kung paano mo matatanggap ang Kanyang lakas at suporta.

Pagtulong sa mga estudyante na magturo. Kapag binigyan ang mga estudyante ng mga pagkakataong ituro ang ebanghelyo sa iba, napapalakas ang kanilang sariling kaalaman at patotoo. Maghanap ng mga pagkakataon na maanyayahan ang mga estudyante na turuan ang isa’t isa sa mga paraang pormal at di-pormal.

Paghahanda ng estudyante: Sabihin sa mga estudyante na maghanap o kumuha ng larawan ng daanan o ng puno ng ubas o punong may mga sanga. Sabihin sa mga estudyante na mag-isip ng mga paraan kung paano ipinapaalala sa kanila ng kanilang larawan si Jesucristo, at dalhin ang kanilang larawan sa klase.

Mga Posibleng Aktibidad sa Pag-aaral

Isaalang-alang ang mga sumusunod na opsiyon upang simulan ang lesson:

• Ipabahagi sa mga estudyante ang mga larawang kinuha nila bilang bahagi ng paghahanda ng estudyante.

• Gumawa ng daanan patungo sa silid-aralan na kailangang sundan ng mga estudyante.

• Magpakita ng sanga sa mga estudyante bilang object lesson. Talakayin ang kaugnayan ng sanga sa puno o puno ng ubas na pinanggalingan nito, at itanong kung ano ang mangyayari ngayong hindi na nakakabit ang sanga sa puno o puno ng ubas.

• Magbahagi ng personal na karanasan na nauugnay sa lesson.

• Ipakita ang mga larawan sa lesson na ito tungkol sa daanan o puno ng ubas.

Talakayin sa mga estudyante kung paano nakatutulong ang daanan at kung paano nakatatanggap ng lakas ang isang sanga mula sa puno ng ubas. Maaari mong itanong sa mga estudyante kung paano natutulad si Jesucristo sa isang daanan o puno ng ubas.

Layunin ng ilan sa mga huling turo ng Tagapagligtas sa Kanyang mga disipulo na tulungan silang maunawaan ang kanilang kaugnayan at pag-asa sa Kanya. Inihambing ng Tagapagligtas ang Kanyang sarili sa isang daanan, pati na rin sa isang puno ng ubas o punong may mga sanga. Pag-isipan sandali ang mga aspekto sa buhay mo kung saan maaaring kailangan mo ng tulong. Marahil ay nadarama mo na kailangan mo ng tulong habang nagsisikap kang makabalik sa Ama sa Langit. Maaari mong madama na kailangan mo ng higit na lakas upang harapin ang mga hamon sa iyong buhay. Habang pinag-aaralan mo ang mga turo ng Tagapagligtas, alamin kung ano ang natututuhan mo tungkol sa Kanya at kung paano Ka Niya matutulungan.

Pag-isipan ang mga pangangailangan at kakayahan ng mga estudyante kapag nagpapasiya kung paano iaangkop ang nilalaman ng lesson na ito. Maaaring makatulong sa mga estudyante ang pagkakaroon ng oras upang personal na pag-aralan at pagnilayan ang isa o ang lahat ng sumusunod na opsiyon sa pag-aaral.

Maaari ring makatulong na bigyan ang mga estudyante ng pagkakataong ibahagi ang kanilang mga ideya at patotoo sa isa’t isa. Magagawa ito sa iba’t ibang paraan. Maaaring sabihin sa mga estudyante bago magklase na maghandang magturo ng isang bahagi ng lesson na ito. Ang isa pang opsiyon ay mag-assign, o papiliin ang mga estudyante ng isa sa mga sumusunod na opsiyon sa pag-aaral at sabihin sa mga estudyante na maghandang turuan ang isa pang kaklase o ang buong klase.

Maaaring gamitin ng mga estudyante ang sumusunod na handout sa pag-aaral at paghahandang magturo.

Si Jesucristo “ang daan, at ang katotohanan, at ang buhay” ( Juan 14:6)

Basahin ang Juan 14:1–6 , at alamin kung paano ipinangako ng Tagapagligtas na tutulungan ang mga sumusunod sa Kanya.

• Anong mga katotohanan ang itinuro ng Tagapagligtas sa mga talatang ito?

• Ano ang itinawag ng Tagapagligtas sa Kanyang sarili sa talata 6 ?

• Ano ang itinuturo sa iyo ng bawat isa sa mga titulong ito tungkol kay Jesucristo at sa iyong kaugnayan sa Kanya?

Kung gumawa ka ng listahan ng iba’t ibang titulo at ginagampanan ni Jesucristo sa nakaraang lesson, maaari mong idagdag dito ang natuklasan mo sa Juan 14 .

Mapapalawak ng Aklat ni Mormon ang iyong pag-unawa sa pinag-aaralan mo sa Bagong Tipan. Basahin ang Mosias 3:17 , at isipin kung paano tayo tinutulungan ng talatang ito na mas maunawaan ang Juan 14:6 .

Itinuro ni Pangulong Dieter F. Uchtdorf, na noon ay kabilang sa Unang Panguluhan:

Nais ng Diyos na mahanap ninyo ang daan pabalik sa Kanya, at ang Tagapagligtas ang daan [tingnan sa Juan 14:6 ]. Nais ng Diyos na makilala ninyo ang Kanyang Anak na si Jesucristo, at maranasan ang malaking kapayapaan at kagalakang nagmumula sa pagtahak sa landas ng banal na pagkadisipulo.

(Dieter F. Uchtdorf, “Pagtanggap ng Patotoo sa Liwanag at Katotohanan,” Ensign o Liahona, Nob. 2014, 21)

• Kailan mo naranasan, o kailan naranasan ng isang taong kilala mo ang ganap na kapayapaan at kagalakang nagmumula sa pagsunod kay Jesucristo?

• Sa anong mga paraan natin masusundan ang Tagapagligtas pabalik sa Ama sa Langit?

• Paano natin masasabi kung nasa tamang landas tayo?

Si Jesucristo ang “puno ng ubas” ( Juan 15:5)

Gumamit si Jesucristo ng paghahambing sa pagtuturo sa Kanyang mga disipulo tungkol sa kanilang kaugnayan sa Kanya. Basahin ang Juan 15:1–11 , at alamin ang paghahambing na ito.

Kung gumawa ka ng listahan ng iba’t ibang titulo at ginagampanan ni Jesucristo sa nakaraang lesson, maaari mong idagdag dito ang natuklasan mo sa Juan 15 .

• Ano sa palagay mo ang itinuturo ni Jesucristo sa paghahambing na ito?

• Anong mga katotohanan ang matututuhan mo mula sa paghahambing na ito tungkol sa ating kaugnayan kay Jesucristo?

Ipinaliwanag ni Elder Jeffrey R. Holland ng Korum ng Labindalawang Apostol na ang paanyaya ng Tagapagligtas na manatili sa Kanya ay isang paanyaya sa atin na “manatili … manatili magpakailanman” (“Manatili sa Akin,” Ensign o Liahona, Mayo 2004, 32). Ipinaliwanag ni Elder Holland kung bakit napakahalaga para sa atin na tanggapin ang paanyaya ng Tagapagligtas na manatili sa Kanya.

Sinabi ni Jesus, “Sapagkat kung kayo’y hiwalay sa akin ay wala kayong magagawa” [ Juan 15:5 ]. Ako ay nagpapatotoo na iyan ay katotohanan ng Diyos. [Si Cristo] ang lahat-lahat sa atin at dapat tayong “manatili” sa Kanya nang palagian, matatag, matibay, magpakailanman. Para sumibol at pagpalain ng bunga ng ebanghelyo ang ating buhay, dapat tayong matatag na mabigkis sa Kanya, na Tagapagligtas nating lahat, at dito sa Kanyang Simbahan, na nagtataglay ng Kanyang banal na pangalan. Siya ang punong tunay na pinagmumulan ng ating lakas at tanging pinanggagalingan ng buhay na walang hanggan. Sa Kanya hindi lang tayo makakatiis kundi mananaig tayo at magtatagumpay sa banal na layuning ito na hindi bibigo sa atin.

(Jeffrey R. Holland, “Manatili sa Akin,” Ensign o Liahona, Mayo 2004, 32)

Matutulungan ka ng Aklat ni Mormon na mapalawak ang iyong pag-unawa sa pinag-aaralan mo sa Bagong Tipan. Basahin ang Alma 26:12 at isipin kung paano ito nauugnay sa Juan 15:1–11 .

• Ano ang ilan sa mga bunga (mga resulta o pagpapala) na nakita mo sa iyong buhay habang sinisikap mong manatili kay Jesucristo?

• Ano ang ilang bagay na gagawin mo na makatutulong sa iyo na manatili kay Jesucristo?

Kung tinuruan ng mga estudyante ang isa’t isa, sabihin sa kanila na ibahagi sa klase ang mga katotohanang natukoy nila, ang natutuhan nila mula sa kanilang mga kaklase, at ang kanilang patotoo tungkol kay Jesucristo. Purihin ang mga estudyante sa kanilang pagtuturo, at hikayatin silang ibahagi sa kanilang pamilya ang itinuro at natutuhan nila.

Bigyan ang mga estudyante ng oras na pagnilayan ang nadama nila tungkol sa kung paano sila matutulungan ng Tagapagligtas sa kanilang mga kasalukuyang pangangailangan at kalagayan. Maaari kang magpatotoo tungkol sa Tagapagligtas o magbahagi ng personal na karanasan.

Komentaryo at Pinagmulang Impormasyon

Ano ang ibig sabihin ng maraming tahanan sa bahay ng Ama sa Langit?

Itinuro ni Propetang Joseph Smith (1805–44):

“[Ang pahayag na] “Sa bahay ng aking Ama ay maraming tahanan” [ Juan 14:2 ] … ay dapat gawing—“Sa kaharian ng aking Ama ay maraming kaharian,” upang kayo ay maging mga tagapagmana ng Diyos at mga kasamang tagapagmana ko. … May mga mansiyon para sa mga yaong sumusunod sa batas na selestiyal, at may iba pang mga mansiyon para sa mga yaong lumalabag sa batas, bawat tao sa kanyang sariling kaayusan.

(Mga Turo ng mga Pangulo ng Simbahan: Joseph Smith[2007], 255)

Mga Karagdagang Aktibidad sa Pag-aaral

Magdrowing

Naipahahayag ng ilang estudyante ang kanilang sarili sa pamamagitan ng sining. Maaari mong anyayahan ang mga estudyante na magdrowing ng isang larawan na kumakatawan sa natutuhan nila tungkol kay Jesucristo mula sa Juan 14:1–6 o Juan 15:1–11 . Kung tuturuan ng mga estudyante ang isa’t isa, maaaring maging bahagi ng kanilang lesson ang drowing na ito.

Juan 14:6 . “Ako ang daan, ang katotohanan, at ang buhay”

Sabihin sa mga estudyante na ipaliwanag kung paanong si Jesucristo “ang daan,” “ang katotohanan,” o “ang buhay.” Maaari silang makahanap ng mga cross-reference na nagpapaliwanag sa mga ginagampanang ito. Maaari ring magbahagi ang mga estudyante ng mga karanasan tungkol sa pagtupad ni Jesucristo sa mga ginagampanang ito sa kanilang mga buhay.

Bilangin ang salitang manatili

Tulungan ang mga estudyante na makita kung paano nagbibigay-diin sa isang mahalagang mensahe ang madalas na pag-uulit ng mga salita o parirala sa isang scripture block. Ang salitang manatili ay ginamit nang maraming beses sa Juan 15:4–10 . Sabihin sa mga estudyante na bilangin kung ilang beses lumabas ang salitang ito, na markahan o isulat ang salitang ito sa kanilang mga banal na kasulatan, at pag-isipan kung ano ang ipinararating nito sa pamamagitan ng madalas na pag-uulit nito.

Juan 15:10 . “Kung tinutupad ninyo ang aking mga utos, ay mananatili kayo sa aking pag-ibig”

Magdrowing ng puno ng ubas sa pisara, at sabihin sa mga estudyante na magdrowing ng mga sanga na nakakabit sa puno ng ubas upang kumatawan sa kanilang sarili. Sabihin sa mga estudyante na maglista ng mga utos sa pisara sa paligid ng puno ng ubas. Talakayin kung paano nakatutulong sa atin ang pagsunod sa mga utos upang manatili sa pagmamahal ng Tagapagligtas at manatiling nakakabit sa puno ng ubas.