Seminelí
Sione 1

Sione 1

Vakai Fakalūkufuá

Naʻe hiki ʻe he ʻAposetolo ko Sioné ʻene Kosipelí ʻaki e taumuʻa ke tokoniʻi e kāingalotu ʻo e Siasí pea mo e māmaní ke nau tui ko Sīsū ʻa e Kalaisí (vakai, Sione 20:30–31). Naʻe akoʻi ʻe Sione naʻe mavahe ʻa Sīsū Kalaisi mei Hono ʻapi fakalangí ke hāʻele mai ki he māmaní ko e Huhuʻi ʻo e faʻahinga kotoa ʻo e tangatá. ʻOku ʻi he Kosipeli ʻa Sioné ha ngaahi talanoa lahi ʻo ha kau tangata mo ha kau fafine ne nau maʻu ha fakamoʻoni ko Sīsū ʻa e Kalaisí, ko e Mīsaia kuo talaʻofa maí. ʻE lava foki ʻe hono lau ʻi he faʻa lotu mo fakakaukauloto ki he ngaahi fakamatala ko iá ʻo tataki ʻa e kau laukonga ʻo onopōní ke nau haʻu kiate Ia.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Sione 1:1–5

Taumuʻa ʻo e lēsoní: ʻE tokoni ʻa e lēsoni ko ʻení ke ongoʻi houngaʻia lahi ange ʻa e kau akó ʻi he tuʻunga naʻe ʻi ai ʻa Sīsū Kalaisi kimuʻa ʻi Hono ʻaloʻi fakamatelié pea mo e ʻofa naʻá Ne fakahaaʻi maʻatautolú ʻaki hono fakahoko Hono misiona ʻi he māmaní.

  • Teuteu ʻa e tokotaha akó: Fakaafeʻi e kau akó ke fakalaulauloto ki he meʻa ʻoku nau ʻilo fekauʻaki mo Sīsū Kalaisi kimuʻa peá Ne hāʻele mai ki he māmaní.

  • Ko ha Meʻa: Fakakaukau ke ʻomi ki he kalasí ha foʻi pulu ʻoku fakaʻaongaʻi ʻi ha sipoti manakoa pe fakaʻaliʻali ha fakatātā ʻo ha foʻi pulu ʻoku maʻu ʻi he lēsoní.

  • Vitiō: Teuteu ke fakaʻaliʻali ki he kau akó ʻa e “Ko e ʻAloʻí” (taimi 2:30 ki he 5:31), ʻoku maʻu ʻi he ChurchofJesusChrist.org.

Fokotuʻu ki hono akoʻi ʻo e konifelenisi fakavitioó: Fakakaukau ke tomuʻa faʻu ia ʻi ha polokalama spreadsheet pe word-processing ko e saati ʻo Sīsū ʻi he maama fakalaumālié pea mo e moʻui ʻa Sīsū ʻi he māmaní. Lolotonga e lēsoní, fakaʻaliʻali e sātí ʻaki hono vahevahe hoʻo screen. ʻE lava ke fakafonu ʻeni ʻe he kau akó lolotonga e kalasí ʻi heʻenau vahevahe ʻenau ngaahi fakakaukaú.

Sione 1

Taumuʻa ʻo e lēsoní: ʻE tokoni ʻa e lēsoni ko ʻení ke ʻilo lelei lahi ange ʻe he kau akó ʻa Sīsū Kalaisi ʻaki hono ʻiloʻi mo ako fekauʻaki mo ha niʻihi ʻo Hono ngaahi huafa fakanofó mo e ngaahi fatongiá.

  • Teuteu ʻa e tokotaha akó: Fakaafeʻi e kau akó ke kole ki he ngaahi kaungāmeʻá mo e kau mēmipa ʻo e fāmilí ke nau vahevahe pe ko e fē ʻa e ngaahi huafa fakanofo pe ngaahi fatongia ʻo Sīsū Kalaisi ʻoku mahuʻingamālie taha kiate kinautolú pea ko e hā hono ʻuhingá.

  • Fokotuʻu ki hono akoʻi ʻo e konifelenisi fakavitioó: ʻI he fakaʻosinga ʻo e lēsoní, fakakaukau ke fakaʻaongaʻi ha konga ʻo e lokí ʻi hoʻo polokalama konifelenisi fakavitioó ke fakaʻatā e kau akó ke nau akoʻi ha hoa fekauʻaki mo Sīsū Kalaisi ʻo fakaʻaongaʻi ha taha ʻo Hono ngaahi huafa fakanofó pe ngaahi fatongiá.

Sione 1:35–51

Taumuʻa ʻo e lēsoní: ʻE tokoni ʻa e lēsoni ko ʻení ke tali lelei ange ʻe he kau akó ʻa e fakaafe ʻa e Fakamoʻuí ke “haʻu ʻo mamata” ʻiate kinautolu pē (vakai, Sione 1:39).

  • Teuteu ʻa e tokotaha akó: Fakaafeʻi e kau akó ke nau fakakaukau ki ha aʻusia naʻá ne tokoniʻi kinautolu ke mahino lelei ange ko hai ʻa Sīsū Kalaisi. Naʻe hoko fēfē ‘a e aʻusia ko ʻení?

Ko Hono Maʻu ʻo e ʻIlo Fakalaumālié, Konga 2

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau ako ke vakaiʻi ʻa e ngaahi palopalemá ʻaki ha fakakaukau ʻoku taʻengatá kae lava ke nau sio lelei ange kiate kinautolu.

  • Teuteu ʻa e tokotaha akó:Fakaafeʻi e kau akó ke nau fakakaukau ki ha faingataʻa pe fehuʻi ʻoku nau maʻu pe, kapau ʻoku kaunga ki ai, ke nau fakakaukau ki he fehuʻi ne nau fili ke ngāue ʻi he tui ʻi he lēsoní “Ko Hono Maʻu ʻo e ʻIlo Fakalaumālié, Konga 1.”

  • Fokotuʻu ki hono akoʻi ʻo e konifelenisi fakavitioó: Fakakaukau ke faʻu ha polokalama slide ke vahevahe ʻi hoʻo screen ʻa e ngaahi fakamatala ʻe ʻaonga meia Palesiteni Nalesoní pea mo e konga ki he “Ngaahi Fakamatala Fakamahino mo e Puipuituʻá.”

Fakafuofuaʻi Hoʻo Akó 1

Taumuʻa ʻo e lēsoní: ʻE ʻoange ʻe he lēsoni ko ʻení ki he kau akó ha faingamālie ke nau vakaiʻi ai ʻenau ngaahi taumuʻá, akó, mo ʻenau tupulaki fakatāutahá. ʻOku kau ʻi he ngaahi ola pau ʻo e kalasí ʻa hono vakaiʻi ʻe he kau akó kinautolu ʻi heʻenau malava ke ako e folofolá mo fakaʻaongaʻi e folofola ʻa e ʻEikí ki heʻenau moʻuí, ke maʻu ha fakahā fakatāutaha mei he Laumālie Māʻoniʻoní, pea ke fakamatalaʻi ha niʻihi ʻo e ngaahi fatongia ʻo Sīsū Kalaisí.

  • Teuteu ʻa e tokotaha akó: Fakaafeʻi e kau akó ke nau fakakaukau ki he founga kuo hoko ai ʻenau ako folofolá mo teuteu ke vahevahe ʻa e ngaahi fakakaukau kuo nau maʻú pe ngaahi founga ne toki fakalakalaka ai ʻenau akó.

  • Ngaahi Naunaú: Kapau ʻoku maʻu, teuteuʻi e ngaahi naunau fakaʻātí ki he lahi taha ʻe ala lavá ke lava e kau akó ʻo fakakakato e ngaahi ʻekitivitī ki he siví ʻo fakatatau mo e meʻa ʻoku nau fie maʻú.

  • Fokotuʻu ki hono akoʻi ʻo e konifelenisi fakavitioó: ʻI he taimi ʻoku vahevahe ai ʻe he kau akó ʻenau ngaahi meʻa naʻa nau faʻú mo e kalasí, tuku ke nau vahevahe ʻenau screen ke lava honau kaungāakó ʻo sio lelei ange ki heʻenau ngaahi meʻa naʻa nau faʻú .

Paaki