Luke 2:40–52

Naʻe “Tupu ʻa [Sīsū], pea Mālohi ʻi he Laumālié”

Jesus teaching in the temple as a young boy.

ʻI he kei talavou ʻa e Fakamoʻuí, naʻá Ne akoʻi ʻa e ongoongoleleí ʻi he mālohi lahi, pea naʻa mo e kau akonaki ʻi he temipalé “naʻa nau ofo ʻi Heʻene potó mo ʻEne tali ʻa e fehuʻí” (Luke 2:47). ʻOku fakataumuʻa ʻa e lēsoni ko ʻení ke fakamālohia hoʻo holi ke hangē ko Sīsū Kalaisí ʻaki hoʻo fekumi ke fakatupulaki fakaʻatamai, fakatuʻasino, fakalaumālie, mo fakasōsiale. Te ke maʻu foki ha faingamālie ke vakaiʻi hoʻo ngaahi taumuʻa lolotongá ʻi he Fakalakalaka Fakatāutahá: Tohi Fakahinohino ʻa e Toʻu Tupú (2019) pe faʻu ha ngaahi taumuʻa foʻou.

Tokanga taha ki he aʻusia ʻa e kau akó. ʻOku ako ʻa e kau akó ʻi heʻenau longomoʻui ʻi he founga hono fakahoko ‘o e akó pea mo hono moʻui ʻaki ʻa e ongoongoleleí. Lolotonga e akoʻí, tokanga taha ki he meʻa kuo pau ke aʻusia mo fakahoko ʻe he tokotaha akó ke fakaafeʻi ai ʻa e fakahā fakatāutahá mo fakaloloto ʻa e uluí. ʻI he fakatupulaki ʻe he kau akó ʻenau ʻiló mo moʻui fakatatau ki aí, te nau ului lahi ange ai ki he Fakamoʻuí mo ʻEne ongoongoleleí.

Teuteu ʻa e tokotaha akó: Fakaafeʻi e kau akó ke nau toe vakaiʻi e ngaahi taumuʻa kuo nau fokotuʻu ko ha konga ʻo e polokalama ki he Fānaú mo e Toʻu Tupú. Kole ange ke nau fakakaukau ki he founga ʻoku tokoniʻi ai kinautolu ʻe he ngaahi taumuʻa ko ʻení ke nau hoko ʻo hangē ko Sīsū Kalaisí. Kapau ʻe malava, ʻai ke nau ʻomi ha tatau ʻo e Fakalakalaka Fakatāutahá: Tohi Fakahinohino ʻa e Toʻu Tupú ki he kalasí.

Ngaahi ʻEkitivitī Ako ʻOku Ala Fakahokó

Naʻe tupu mo fakalakalaka ʻa Sīsū ʻi Heʻene kei talavoú

Fakaʻaliʻali e ngaahi fakatātā ko ʻení pea ʻoange ha miniti ʻe taha pe ua ki he kau akó ke nau ako ki ai. Kapau ʻoku ʻikai ke maʻu ʻa e ngaahi fakatātā ko ʻení, kole ki he kau akó ke nau fakakaukauloto kia Sīsū ʻi Heʻene kei tupu haké.

Ako ʻa e ngaahi fakatātā ko ʻeni ʻo e Fakamoʻuí ʻi Heʻene kei talavoú. Fakakaukau ki he ngaahi fokotuʻu ‘oku ‘omai ‘e he ngaahi fakaikiiki ʻi he ngaahi fakatātā takitaha ko ʻení fekauʻaki mo Sīsuú.

Jesus Christ depicted as a young boy in the carpenter shop of Joseph. Joseph is standing behind the young Christ. Christ is reading the scriptures from a scroll resting on a table. There are wood shavings on the table.

Christ as a youth learning carpentry skills in a carpenter’s shop. Joseph, the husband of Mary, is watching him.

Jesus Christ depicted as a child with his mother Mary. Christ is kneeling beside Mary and resting His clasped hands on Mary’s lap. Mary has her head bowed as she and the young Christ pray. There is an oil lamp burning on a table next to the mother and son.

Jesus Christ at age twelve in the temple at Jerusalem during the Feast of the Passover. A group of learned Jewish doctors are gathered around Christ. The doctors are expressing astonishment at the wisdom and understanding of the young Christ. (Luke 2:41-50)

Fakalotolahiʻi e kau akó ke nau tauhi ʻa e ʻapasia ki he Fakamoʻuí ʻi heʻenau tali ʻa e fehuʻi ko ʻení. Ko ha fehuʻi ʻe taha ‘e malava ke peheni, “Ko e hā te ke fie ʻilo fekauʻaki mo e Fakamoʻuí ʻi Heʻene kei talavoú?”

ʻE tokoniʻi fēfē nai koe ʻi hoʻo kei ʻi he toʻu tupú ʻi hoʻo ʻilo ʻa e tuʻunga naʻe ʻi ai ʻa Sīsū ʻi Heʻene kei talavoú?

ʻOku tau maʻu ʻa e kiʻi fakamatala fakaikiiki siʻisiʻi pē fekauʻaki mo e kei talavou ʻa Sīsuú, ka ʻe lava ke hoko ʻa e ngaahi meʻá ni naʻe lekōtí ko ha tāpuaki mo ha fakahinohino maʻongoʻonga kiate kimoutolu ʻi hoʻomou feinga ke tupulaki mo fakalakalaká. ʻI hoʻo ako fekauʻaki mo e kei talavou ʻa e Fakamoʻuí, kumi ha ngaahi moʻoni ʻe lava ʻo tokoni atu ke ke ʻiloʻi ʻa e ngaahi tafaʻaki ʻoku totonu ke ke tokanga taha ki aí ʻi hoʻo feinga ke hoko ʻo hangē ko ʻetau Tamai Hēvaní mo Sīsū Kalaisí.

Lau ʻa e Luke 2:40–52 mo e Liliu ʻa Siosefa Sāmita-Mātiu 3:24–26 (ʻi he Bible appendix), ʻo kumi e ngaahi fakaikiiki fekauʻaki mo e tuʻunga naʻe ʻi ai ʻa e Fakamoʻuí ʻi Heʻene kei talavoú. Mahalo te ke fie fakaʻilongaʻi ʻa e meʻa ʻokú ke maʻú.

Te ke lava foki ʻo mamata ʻi he “Young Jesus Teaches in the Temple” (2:30), ʻoku maʻu ʻi he ChurchofJesusChrist.org.

2:25

Fakatokangaʻi ange ʻoku ʻuhinga ʻa e kupuʻi lea “fakaʻau ke mālohi ʻi he laumālié” ( Luke 2:40 ; vakai foki, Liliu ʻa Siosefa Sāmita, Mātiu 3:24 [ʻi he Fakahinohino ki he Ngaahi Folofolá]) ki he tupulaki pe fakalakalaka ʻa Sīsū ʻi he mālohi fakalaumālié. Mahalo ʻe tokoni ke ke ʻiloʻi ʻo fakatatau ki he Liliu ʻa Siosefa Sāmita ʻo e Luke 2:46 (ʻi he Luke 2:46, futinouti c), naʻe ʻikai fanongo ʻa e talavou ko Sīsuú ki he kau toketaá, pe kau sikalaipe, mo fai ange ha ngaahi fehuʻi, ka “naʻa nau fanongo kiate ia, mo fai ʻa e ngaahi fehuʻi kiate ia.”

Ko e hā ʻoku akoʻi atu ʻe he fakamatala ko ʻení fekauʻaki mo e tuʻunga naʻe ʻi ai ʻa Sīsū ʻi Heʻene kei talavoú?
Ko e hā ʻoku akoʻi atu ʻe he veesi 52 fekauʻaki mo e founga naʻe tupu hake mo tupulaki ai ʻa Sīsū ʻi Heʻene kei talavoú?

Mei he Luke 2:52 ʻoku tau ako ai ke muimui ki he sīpinga ʻa Sīsū Kalaisí ʻi heʻetau fakalakalaka fakaʻatamai, fakatuʻasino, fakalaumālie, mo fakasōsialé.

Hiki ʻi he palakipoé pe fakaʻaliʻali ʻa e ngaahi foʻi lea ko ʻení: Fakaʻatamai, Fakatuʻasino, Fakalaumālie, mo Fakasōsiale. Hili ia pea fakahoko ange ʻa e ngaahi fehuʻi ko ʻení:

Ko e hā ha ngaahi sīpinga ʻe niʻihi mei he folofolá naʻe fakahaaʻi ai ʻe Sīsū Kalaisi ʻEne ngaahi meʻa ʻoku malavá ʻi he ngaahi tafaʻaki ko ʻeni ʻe faá?
Ko e hā ha ngaahi ʻuhinga te ke fie muimui ai ki he sīpinga ʻa e Fakamoʻuí ʻi he ngaahi tafaʻaki ko ʻeni ʻe fā ʻo e moʻuí?

ʻOku faʻu ʻa e konga ko ʻeni ʻo e lēsoní ke tokoni ki he kau akó ke nau fakaʻaongaʻi ʻa e Fakalakalaka Fakatāutahá: Tohi Fakahinohino ʻa e Toʻu Tupú ke fokotuʻu ha ngaahi taumuʻa. ʻAi ke ke ongoʻingofua e ngaahi fiemaʻu ʻa e kau ako ʻoku ʻikai ke nau manako pe maheni mo e tohi fakahinohino ko ʻení. ʻE lava ke hoko ʻa e kau ako kuo nau ʻosi kamata ngāueʻi ʻenau ngaahi taumuʻa fakalakalaká ko ha maʻuʻanga tokoni lelei ʻi he fealēleaʻakí.

Fakakaukau ke ʻave ha pōpoaki ki he ngaahi mātuʻá mo e kau taki ʻo e Siasí ke talaange kiate kinautolu naʻe aleaʻi ʻe he kau akó ʻa e ngaahi taumuʻa ko ʻení ʻi he seminelí. ʻE tokoni ʻeni ki he mātuʻá mo e kau takí ke nau vakaiʻi e toʻu tupú.

Kuo fakatukupaaʻi ʻe he kau palōfitá ʻa e toʻu tupu ʻo e Siasí ke nau muimui ki he sīpinga ʻa e Fakamoʻuí ʻoku hā ʻi he Luke 2:52, pea kuo fakafeʻiloaki ʻe he kau taki ʻo e Siasí ʻa e Fakalakalaka Fakatāutahá: Tohi Fakahinohino ʻa e Toʻu Tupú ke tokoni atu kiate koe.

Mamata ki he vitiō “You Are Here to Discover Who You Are” (“ʻOkú ke ʻi Hení ke ʻIloʻi Pe Ko Hai Koe”) (2:59) pea kumi ha ngaahi founga te ke lava ai ʻo muimui ki he sīpinga ʻa e Fakamoʻuí ʻi hoʻo fokotuʻu e ngaahi taumuʻá ko ha konga ʻo e polokalama ʻa e Fānaú mo e Toʻu Tupú. ʻOku maʻu ʻa e vitiō ko ʻení ʻi he ChurchofJesusChrist.org.

2:53

Fakatatau mo e tokolahi ʻo e kalasí, ‘e lava ke vahevahe ʻa e kau akó ki ha kulupu ʻe fā ke aleaʻi e taha ʻo e ngaahi tafaʻaki ʻe fā ʻo e fakalakalaká. Poupouʻi e kau akó ke nau lukuluku fakakaukau ʻi ha ngaahi founga kehekehe ʻe lava ke nau tupulaki mo fakalakalaka ai ʻi he ngaahi tafaʻaki ko ʻení mo e ngaahi taumuʻa kehekehe te nau lava ʻo fokotuʻú. ʻI he ʻosi ʻa e fealēleaʻakí, fakaafeʻi e mēmipa ‘e taha mei he kulupu takitaha ke ne vahevahe ʻenau ngaahi fakakaukaú.

Ko e vīsone ʻo e Fakalakalaka Fakatāutahá: Tohi Fakahinohino ʻa e Toʻu Tupú “ke fakamālohia hoʻo tui kia Sīsū Kalaisí mo tokoniʻi koe mo ho fāmilí ke mou fakalakalaka ʻi he hala ʻo e fuakavá ʻi hoʻomou fehangahangai mo e ngaahi faingataʻa ʻo e moʻuí” (“Ko e Hā ʻa e Fānau mo e Toʻu Tupu?” ChurchofJesusChrist.org). Tānaki atu ki he tatau kuo paaki ʻo e tohi fakahinohino ko ʻení, ʻoku ala maʻu atu mo ha tatau fakaʻilekitulōnika. Te ke lava ʻo maʻu ʻa e tatau fakaʻilekitulōniká ʻi he ngaahi polokalama Gospel Library mo e Gospel Living.

ʻI hoʻo muimui ki he sīpinga ʻa e Fakamoʻuí, te ke toe lava foki ʻo tupulaki ʻi ha founga potupotutatau ʻi he ngaahi tafaʻaki ko ʻeni ʻe fā ʻo hoʻo moʻuí: fakalaumālie, fakasōsiale, fakatuʻasino, mo fakaʻatamai. Kumi ki he fakahinohino ‘a e Laumālie Māʻoniʻoní ‘i hoʻo fokotuʻu hoʻo ngaahi taumuʻá. Fakafanongo ki he ngaahi ueʻi fakalaumālie te nau lava ʻo tokoniʻi koe ke ke ʻiloʻi ʻa e feituʻu ʻoku finangalo ʻa e ʻEikí ke Ne tokoniʻi ai koe ke ke tokanga taha ‘i hoʻo fakalakalaka ke hoko ʻo hangē ko Iá. Te ke lava ʻo maʻu ha ngaahi fakakaukau ʻi he ngaahi uepisaiti ko ʻení:

Ko e peesi “Maʻá e Toʻu Tupú” ʻi he uepisaiti Fānaú mo e Toʻu Tupú

Ko e polokalama Gospel Living Inspiration feed

ʻI hoʻo tatau ʻo e Fakalakalaka Fakatāutahá: Tohi Fakahinohino ʻa e Toʻu Tupú, fakakaukau ke fokotuʻu ha ngaahi taumuʻa ʻi he ngaahi tafaʻaki ko ʻeni ʻe fā ʻo hoʻo moʻuí. Kapau kuó ke kamata ngāue ki hoʻo ngaahi taumuʻá, fakafuofuaʻi e tuʻunga ʻokú ke ʻi aí pea fai ha ngaahi liliu ʻo ka fie maʻu. Aleaʻi hoʻo ngaahi taumuʻá mo hoʻo mātuʻá mo e kau taki ʻo e Siasí mei he taimi ki he taimi. Te ke lava foki ʻo vahevahe hoʻo ngaahi taumuʻá mo ha faʻahinga aʻusia pē ʻo ngāue ʻaki ‘a e #StrivetoBe.

ʻE tokoniʻi koe ʻe Sīsū Kalaisi ʻi hoʻo fokotuʻu ha ngaahi taumuʻá mo feinga ke hoko ʻo hangē ko Iá. Kuó Ne talaʻofa mai ko e taimi te ke haʻu ai kiate Ia pea ngaue ʻi he loto fakatōkilalo ʻi he tuí, te Ne “liliu ʻa e ngaahi meʻa vaivaí ko e mālohi” ( ʻEta 12:27). .

Fakaafeʻi e kau ako kuo nau maʻu ha ngaahi aʻusia lelei lolotonga ‘enau ngāueʻi ʻenau ngaahi taumuʻá ke vahevahe ʻenau ngaahi aʻusiá. Poupouʻi e kau akó ke vahevahe ʻenau ngaahi aʻusiá ʻo ngāue ʻaki ‘a e #StrivetoBe.Kapau ʻoku ʻikai ke lolotonga kau ha taha ʻo e kau akó ʻi he polokalamá ni, fakakaukau ke fakaafeʻi ha taki ʻo e toʻu tupú ki he kalasí ke ne fai ha tataki mo ha fakahinohino.Fili ha niʻihi pe kotoa ʻo e ngaahi fehuʻi ko ʻení ke tali ʻe he kau akó ʻi heʻenau tohinoa akó pea aleaʻi mo e kalasí kapau ʻoku kei ‘i ai ha taimi.

Ko e hā ha meʻa te ke fie fakalakalaka ai ʻi he tafaʻaki ko ʻeni hoʻo moʻuí? Ko e hā hono ʻuhingá?
Ko e hā ha ngaahi founga ʻe lava ai ‘e he tupulaki ʻi he tafaʻaki ko ‘ení ʻo tokoniʻi koe ke ke hoko ai ʻo hangē ko e Fakamoʻuí?
Ko e hā ha ngaahi faingataʻa ‘e malava ke ke fehangahangai mo ia?
Te ke fekumi fēfē nai ki he tokoni mo e tataki ʻa e Tamai Hēvaní?

Fakamatala Fakamahino mo e Puipuituʻá

‘Ekitivitī Tokoni Fakaakó

ʻE lava ke maʻu ʻa Sīsū ʻi he temipalé

Fakaʻaliʻali ha fakatātā ʻo Sīsū ʻokú Ne faiako ʻi he temipalé pea mo ha fakatātā ʻo e temipale ofi taha kiate koé.Hangē pē ko hono ʻilo ʻe Mele mo Siosefa ʻa Sīsū ʻi he temipalé, te tau lava foki ʻo fekumi kiate Ia ʻi he temipalé. Fakakaukau ke vahevahe ʻa e ngaahi fakamatala ko ʻení mo aleaʻi e ngaahi founga te tau lava ai ʻo kumi ‘o ‘ilo ʻa e Fakamoʻuí ʻi he temipalé:

Ko e temipalé ko e fale ia ʻo e ʻEikí. ʻOku fakahinohino kitautolu ʻe he meʻa kotoa ʻi he temipalé ki hotau Fakamoʻui ko Sīsū Kalaisí.

(David A. Bednar, “Mateuteu ke Maʻu ʻa e Meʻa ʻAonga Kotoa Pē,” Ensign pe Liahona, Mē 2019, 103)

Ko e temipalé ko Hono fale, pea ʻoku totonu ke mahuʻinga taha Ia ʻi heʻetau fakakaukaú mo hotau lotó—ʻa e tokāteline fakaʻeiʻeiki ʻo Kalaisi ʻokú ne nofoʻia ʻetau moʻuí ʻo hangē pē ko ʻene nofoʻia e ngaahi ouau fakatemipalé—mei he taimi ʻoku tau lau ai e tohitongi ʻi he matapā ʻi muʻá ki he momeniti fakaʻosi ʻoku tau ʻi loto ai he falé. ʻI he kotoa ʻo e ngaahi meʻa fakaofo ʻoku tau aʻusiá, ʻoku fie maʻu ke tau fakatokangaʻi, ʻo laka ange ʻi ha toe meʻa, ʻa e ʻuhinga ʻo e ʻi he temipalé ʻa Sīsuú.

(Jeffrey R. Holland, “Ko e Pōpoakí, ʻUhingá, mo e Kakai Tokolahí,” Ensign pe Liahona, Nōvema 2019, 7)