Mātiu 2; Luke 2

Vakai Fakalūkufuá

Naʻe fononga ʻa Siosefa mo Mele ki Pētelihema, ʻa ia naʻe ʻaloʻi ai ʻa Sīsuú. Naʻe fakahā ʻe ha ʻāngelo hono ʻaloʻi ʻo e Fakamoʻuí ki he kau tauhisipi ofi ki Pētelihemá (vakai, Luke 2:9–12). Naʻe omi ʻa e kau tauhi sipí ʻo “ʻilo ʻa Mele, mo Siosefa, pea mo e tamá ʻoku tokoto ʻi he ʻaiʻanga-kai ʻo e manú” (Luke 2:16) pea nau ʻalu atu “ʻo fakamālō mo fakafetaʻi ki he ʻOtuá” (Luke 2:20). Naʻe tataki atu ʻa Simione, ʻAna, mo e Kau Tangata Poto mei he hahaké ke nau mamata mo fiefia ʻi honau Fakamoʻuí. Naʻe tataki ʻa Siosefa ʻe he fakahā ki he founga ke fakahaofi ai ʻa e kiʻi tamasiʻi ko Sīsuú mei he tuʻutuʻuni ʻa Hēlota ke tāmateʻi ʻa e fānau ʻi Pētelihemá.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Luke 2:1–14

Taumuʻa ʻo e lēsoní: ʻE tokoni ʻa e lēsoni ko ʻení ke fakamahino ki he kau akó ʻa e fatongia ʻo Sīsū Kalaisi ko e Fakamoʻui ʻo e māmaní.

• Teuteu ʻa e tokotaha akó: Kapau ʻe lava, fakaafeʻi e kau akó ke nau mamata ʻi he “ʻUhinga ʻOku Tau Fie Maʻu ai ha Fakamoʻuí—Ko ha Pōpoaki Faka-Kilisimasi fekauʻaki mo Hotau Fakamoʻui ko Sīsū Kalaisí” (2:15), ʻoku maʻu ʻi he ChurchofJesusChrist.org. Fakaafeʻi kinautolu ke nau fakakaukau ki he ʻuhinga ʻoku nau fie maʻu ai ha Fakamoʻui lolotonga ‘enau mamatá.

• Meʻa: Ko ha kiʻi seti siʻisiʻi ʻo e ʻAloʻí pe ko ha fakatātā ʻo e ʻAloʻí

• Ngaahi fokotuʻu ki he akoʻí ʻo fakafou ‘i he konifelenisi fakavitioó: Fakakaukau ke fakaafeʻi e kau akó ke nau vahevahe ʻi he fetalanoaʻakí ha taha ʻo e ngaahi potufolofola ne nau ako ko e ngaahi potufolofola fakafekauʻaki ki he Luke 2:10–12.

Fakataukei Fakatokāteliné: Luke 2:10–12

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e fakamoʻoni fakafolofola mo e kupuʻi lea mahuʻinga ʻi he Luke 2:10–12 , fakamatalaʻi ʻa e tokāteliné, pea akoako fakahoko ʻa e ngaahi tefitoʻi moʻoni ki hono maʻu ʻo e ʻilo fakalaumālié.

• Teuteu ʻa e tokotaha akó: Fakaafeʻi e kau akó ke kamata ako maʻuloto e fakamoʻoni fakafolofola mo e kupuʻi lea mahuʻinga ki he Luke 2:10–12 : “He kuo ʻaloʻi kiate kimoutolu ʻi he ʻahó ni, ʻi he kolo ʻo Tēvitá, ʻa e Fakamoʻuí, ʻa ia ko Kalaisi ko e ʻEikí.”

• Meʻa ke fakaʻaliʻali atú: Ko ha fakatātā ʻo e ʻaloʻi ʻo e Fakamoʻuí

• Nāunau maʻá e kau akó: Ko ha tatau ʻo e “Ko e Kalaisi Moʻuí: Ko e Fakamoʻoni ʻa e Kau ʻAposetoló” mo ha himi

• Fokotuʻu ki he ako ʻo fakafou ‘i he konifelenisi fakavitioó: Fakakaukau ke fakaʻaongaʻi ʻa e fanga kiʻi lokí ke vahe fakakulupu ki ai ʻa e kau akó ʻi heʻenau aleaʻi ha tefitoʻi moʻoni ʻe taha pe lahi ange ki hono maʻu ʻo e ʻilo fakalaumālié.

Luke 2:1–39; Mātiú 2:1–12

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau holi ke fekumi mo fiefia ʻi heʻenau fakamoʻoni kia Sīsū Kalaisí.

• Teuteu ʻa e tokotaha akó: Fakaafeʻi e kau akó ke nau fakalaulauloto ki he ngaahi fehuʻi ko ʻení: Ko e hā e mālohi hoʻo ongoʻi te ke lava ʻo fakamoʻoniʻi ʻa Sīsū Kalaisí? Te ke fakamālohia fēfē nai hoʻo fakamoʻoni ki he Fakamoʻuí?

• Vitiō: “ʻIlo ʻe he Kau Tauhisipí Hono ʻAloʻi ʻo Kalaisí” (2:50)

• Vitiō: “Ko e Fekumi ʻa e Kau Tangata Potó kia Sīsuú” (taimi 2:58 ki he 4:37)

Mātiu 2:11–23

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau ʻiloʻi ha ngaahi founga ʻe lava ke fetuʻutaki ai ʻa e ʻEikí mo kinautolu.

• Teuteu ʻa e tokotaha akó: Kole ki he kau akó ke nau tokanga ki he founga ʻoku feinga ai ‘a e ʻEikí ke fetuʻutaki mo kinautolú, kau ai e fakahā mo e ueʻi fakalaumālie mei he Laumālie Māʻoniʻoní. Poupouʻi e kau akó ke nau fakatokangaʻi ʻa e ngaahi fetuʻutaki ko ʻení.

Luke 2:40–52

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke fakamālohia ʻenau holi ke hangē ko Sīsū Kalaisí ʻaki ʻenau feinga ke fakatupulaki fakaʻatamai, fakatuʻasino, fakalaumālie, mo fakasōsiale.

• Teuteu ʻa e tokotaha akó: Fakaafeʻi e kau akó ke nau toe vakaiʻi e ngaahi taumuʻa kuo nau fokotuʻu ko ha konga ʻo e polokalama Fānaú mo e Toʻu Tupú. Kole ange ke nau fakakaukau ki he founga ʻoku tokoniʻi ai kinautolu ʻe he ngaahi taumuʻa ko ʻení ke nau hoko ʻo hangē ange ko Sīsū Kalaisí. Kapau ʻe lava, ʻai ke nau ʻomi ha tatau ʻo e Fakalakalaka Fakatāutahá: Tohi Fakahinohino ʻa e Toʻu Tupú ki he kalasí.

• Teuteu ke fakaʻaliʻali: Ngaahi ʻīmisi ʻo e Fakamoʻuí ʻi Heʻene kei talavoú. Ngaahi uepisaiti ʻoku nau fakamatalaʻi ʻa e polokalama Fānaú mo e Toʻu Tupú.

• Vitiō: “Ko e Talavou ko Sīsuú ʻOkú Ne Faiako ʻi he Temipalé” (2:30)

• Vitiō: “ʻOkú Ke ʻi Hení ke ʻIlo Pe Ko Hai Koe” (2:59)

• Naunau maʻá e kau akó: Ko ha tatau ʻo e Fakalakalaka Fakatāutahá: Tohi Fakahinohino ʻa e Toʻu Tupú maʻá e kau ako ʻoku ʻikai ke ʻi ai haʻanau tohí

• Fokotuʻu ki he ako ʻo fakafou ‘i he konifelenisi fakavitioó: Ke tokoni ki he kau akó ke nau fakakaukau ki he ngaahi taumuʻa ki he polokalama Fānaú mo e Toʻu Tupú, fakakaukau ke vahevahe hoʻo fakamatala ʻi hoʻo komipiutá ke fakaʻaliʻali e kakano ʻo e ngaahi uepisaiti ʻoku hiki atu ʻi he lēsoní.