Juan 21:1–17

“Pakan-a ang Akong Karnero”

The resurrected Jesus Christ with His arms around the shoulder of the apostle Peter. Christ points to a large number of fish lying on the beach as He speaks to Peter. Two other men and a ship sit on the beach in thebackground.

Ang nabanhaw nga Ginoo mitungha sa Iyang mga disipulo samtang sila nangisda didto sa Dagat sa Tiberias (Galilea). Didto sa baybayon, si Jesus nakigsalo sa pagkaon ubankanila ug midapit ni Pedro sa pagpakita sa iyang gugma alang Kaniya pinaagi sa pagpakaon sa Iyang mga karnero. Kini nga leksiyon mahimong makatabang ninyo aron mapakita ang inyong gugma alang sa Manluluwas diha sa inyong pagpaningkamot sa pagpangalagad sa uban sama sa Iyang gibuhat.

Pagpangandam sa estudyante: Awhaga ang mga estudyante sa pagbasa sa Juan 21:15–17 sa ilang panimalay kauban sa mga miyembro sa pamilya o mga higala ug sa paghisgot unsa ang buot ipasabot sa pagpakaon sa karnero sa Dios.

Posible nga mga Kalihokan sa Pagkat-on

“Gihigugma mo ba ako labaw pa niini?” ( Juan 21:15)

Sa usa ka piraso sa papel o sa inyong journal sa pagtuon, paglista og daghang mga butang nga inyong gibuhat gahapon gikan sa inyong pagmata hangtod sa inyong pagkatulog.

Sunod, i-ekis ang bisan unsa sa inyong lista nga nakapokus lamang sa imoha ug sa imong mga panginahanglan. Lingini ang bisan unsang mga kalihokan nga napokus sa pagtabang sa uban. Paggahin og minuto aron pagpamalandong kon giunsa ninyo paggamit ang inyong oras ug unsang mga kausaban ang inyong buhaton aron mas anaay dakong panahon alang sa pagtabang sa uban. Sa inyong pagtuon sa Juan 21 , paghunahuna mahitungod kon unsaon ninyo pagpangalagad sa uban sama sa gibuhat sa Manluluwas.

Ang Juan 21 nagrekord og asoy ni Pedro ug sa unom ka lain pang mga tinun-an kinsa nangisda ngadto sa Dagat sa Tiberias (Galilea) human sa Pagkabanhaw ni Jesukristo. Basaha ang Juan 21:1–13 , ug mangita giunsa sa Manluluwas pagpangalagad sa Iyang mga disipulo.

Unsa ang gibuhat ni Jesus aron mapakita ang Iyang gugma ug kabalaka alang sa mga disipulo?

Basaha ang Juan 21:15–17 , nga mangita unsa ang gipangutana sa Ginoo kang Pedro.

Sa dihang nangutana si Jesus kang Pedro, “Gihigugma mo ba ako labaw pa niini?” unsa sa inyong hunahuna ang gipasabot sa pulong nga niini?

Si Elder Jeffrey R. Holland sa Korum sa Napulog duha ka Apostoles misugyot nga si Jesus nagpasabot sa sakayan, sa pukot, ug naglut-od nga 153 ka isda—kana mao, ang ilang karaang paagi sa panginabuhi sa wala pa ang ilang tawag sa pagpangalagad (tan-awa ang “Ang Unang Dakong Sugo,” Liahona, Nob. 2012, 84).

Unsa nga kamatuoran ang atong makat-onan gikan sa mga hangyo sa Manluluwas diha sa Juan 21:15–17?

Ang mga estudyante mahimong moila og nagkalainlaing mga kamatuoran, lakip kining usa: Mapakita nato ang atong gugma alang sa Manluluwas pinaagi sa pagpakaon sa Iyang karnero.

Unsa kaha ang gipasabot sa Ginoo sa dihang gisultihan Niya si Pedro nga pakan-on ang Iyang mga nati ug karnero?

Mahimong makatabang ang pagpahinumdom sa mga estudyante nga ang paghulip sa ilang ngalan diha sa mga kasulatan mahimong makatabang kanila nga ma-personalize ang ilang pagtuon sa kasulatan ug ipasusama ang mga kasulatan sa ilang kaugalingong mga kinabuhi.

Basaha ang Juan 21:15–17 pag-usab, ug ihulip ang inyong ngalan ngadto sa ngalan ni Simeon Pedro.

Ikonsiderar ang pagpakita sa mosunod nga duha ka mga pangutana ug tugoti ang mga estudyante nga pamalandongan kini sa hilom. O awhaga ang mga estudyante sa pagtubag niini diha sa ilang mga journal sa pagtuon. Paghatag og kahigayonan sa mga estudyante sa pagpadayag sa ilang gugma alang sa Manluluwas pinaagi sa pag-awhag og pipila aron mopaambit sa ilang mga tubag sa ikaduhang pangutana.

Kon si Jesus mangutana ninyo sa sama nga pangutana nga Iyang gipangutana kang Pedro, unsa kaha ang ipasabot Niya sa “niini” diha sa inyong kinabuhi?
Unsang mga rason ang anaa kaninyo aron higugmaon si Jesukristo labaw sa tanan?

Pagpakaon sa karnero sa Ginoo

Awhaga ang mga estudyante sa pagpaambit unsa ang ilang gihisgotan isip kabahin sa ilang pagpangandam. Ikonsiderar ang paglista sa pisara samtang naghunahuna ang mga estudyante og lahi nga mga paagi sa pagpakaon sa karnero sa Manluluwas.

Unsa ang pipila sa lahi nga mga paagi sa pagpakaon sa karnero sa Ginoo ug pagpangalagad sa uban?

Sa inyong pagpadayon sa inyong pagtuon, paghunahuna mahitungod kon si kinsa ang gusto sa Manluluwas nga inyong alagaran.

Mipakita si Jesus og pailob og gugma ngadto sa tanan nga moduol Kaniya nga nangita og kahupayan sa ilang pisikal, emosyonal o espirituhanon nga mga kakulangan ug kinsa mibati nga nawad-an sa kadasig ug linupigan.

Aron pagsunod sa ehemplo sa Manluluwas, kada usa kanato kinahanglan gayod nga magpakabana ug pangitaon ang karnero nga nag-atubang sa sama nga mga kahimtang ug tabangan sila ug dasigon sila aron mopadayon sa panaw paingon sa kinabuhing dayon.

Kini nga panginahanglanon karon sama ra ka mahinungdanon o tingali mas labaw pa ka mahinungdanon kaysa dihang nangalagad pa ang Manululuwas dinhi sa yuta.

(Ulisses Soares, “Pakan-a ang Akong Karnero,” Liahona, Nob. 2005, 98)

Paghunahuna og panahon sa dihang adunay mitabang ug nangalagad kaninyo sama sa gibuhat sa Manluluwas o sa dihang gisulayan ninyo pag-alagad ang usa ka tawo sama sa Iyang gibuhat.

Sa unsang paagi nga kining kasinatian nakaapekto ninyo?

Ang kalihokan nga giulohan og “Pagpaambit sa ebanghelyo” diha sa “Dugang nga mga Kalihokan sa Pagkat-on” nga seksiyon mahimong magamit niining bahin sa leksiyon.

Ang nabanhaw nga Ginoo naghatag og dugang nga mga instruksiyon sa Iyang Apostoles. Basaha ang Mateo 28:19–20 ug Marcos 16:15 , nga mangita og laing paagi nga ang Manluluwas nagsulti kanila aron mangalagad sa uban.

Ngano kaha nga ang pagpaambit sa ebanghelyo usa ka importanteng paagi sa pagpakaon sa karnero sa Manluluwas?
Unsa ang inyong gibati mahitungod sa pagpaambit sa ebanghelyo ngadto sa uban?

Pipila sa mga estudyante lagmit mahadlok mopaambit sa ebanghelyo sa uban. Tabangi ang mga estudyante nga masabtan nga normal lang nga mobati niini. Ipakita ang empatiya pinaagi sa pagpakita nga nakasabot kamo sa ilang gibati. Ang mosunod nga pamahayag gikan ni Elder Uchtdorf mahimo usab nga makatabang.

Basaha ang mosunod nga pamahayag ni Elder Dieter F. Uchtdorf sa Korum sa Napulog Duha ka Apostoles.

Wala ko mohangyo nga mobarog mo sa dalan dala ang megaphone ug mosinggit sa mga bersikulo sa Basahon ni Mormon. Ang akong gihangyo mao nga kanunay mong mangita og mga kahigayonan sa paghisgot bahin sa inyong pagtuo sa natural ug normal nga pakig-istorya sa mga tawo—sa personal ingon man sa online. …

Adunay daghang normal ug natural nga pamaagi sa pagbuhat niini, gikan sa inadlaw nga mga buhat sa pagkamabination ngadto sa personal nga pagpamatuod diha sa YouTube, Facebook, Instagram, o Twitter ngadto sa yano nga pagpakigsulti sa mga tawo nga inyong mahimamat. …

Sa bisan unsang paagi nga natural o normal para ninyo, ipaambit sa mga tawo ngano nga si Jesukristo ug ang Iyang Simbahan importante para ninyo.

(Dieter F. Uchtdorf, “Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 17)

Unsa ang pipila sa natural nga mga paagi nga kamo makapaambit sa ebanghelyo?

Ikonsiderar ang pag-awhag sa mga estudyante sa pagbisita sa Churchof J esus C hrist.org/share alang sa mga ideya sa mga paagi aron mapaambit ang ebanghelyo. Ang mga estudyante mahimo usab mopaambit sa ilang mga kasinatian diha sa pagpaambit sa ebanghelyo ngadto sa uban.

Pangitaa ang giya sa Espiritu Santo sa inyong pagpamalandong hain sa karnero sa Manluluwas ang mahimo ninyong alagaran. Mahimo kamong maghunahuna og mga silingan, mga higala, mga tawo nga na-assign kaninyo nga alagaran, mga klasmeyt, mga kaila sa trabaho, o mga miyembro sa pamilya. Ikonsiderar usab ang mga tawo nga inyong mahimamat kinsa mag-inusarang maglingkod o magkinahanglan og tabang.

Hain sa mga anak sa Langitnong Amahan ang nagkinahanglan ninyo karon?
Unsaon paggamit sa Maluluwas kaninyo aron matabangan sila nga makab-ot ang ilang mga gikinahanglan?
Sa unsang paagi ninyo mapakita ang inyong gugma sa Langitnong Amahan ug kang Jesukristo sa dihang mipili kamo nga moalagad sa uban?
Sa unsang paagi ang pagpakaon sa Ilang karnero makatabang kaninyo nga mahimong mas susama Kanila?

Hatagi ang mga estudyante og oras aron mainampoong ikonsiderar ang mga pangutana sa ibabaw, ug pag-awhag og mga estudyante nga andam mopaambit og pipila sa ilang mga ideya.

Komentaryo ug Background nga Impormasyon

Unsaon nato pagpakita sa Ginoo nga gihigugma nato Siya?

Ang propeta sa Basahon ni Mormon nga si Hari Benjamin nagtudlo nga sa dihang kita nangalagad sa usag usa, kita sa tinuod nag-alagad sa Dios (tan-awa sa Mosiah 2:17). Si Presidente Thomas S. Monson (1927–2018) nagdeklarar:

Sa reyalidad, dili nimo mahigugma ang Ginoo hangtod moserbisyo ka Kaniya pinaagi sa pagserbisyo sa Iyang katawhan.

(Thomas S. Monson, “Great Expectations” [debosyonal sa Brigham Young University, Ene. 11, 2009], 6, speeches.byu.edu)

Juan 21:15–17 . Unsa ang kamahinugdanon sa gibalikbalik nga panudlo sa Manluluwas nga pakan-on ang Iyang mga nati ug karnero?

Si Presidente Russell M. Nelson mipaambit niining mga panabot gikan sa karaang Gresyanhon nga teksto sa Juan 21 :

Sa [ Juan 21:15 ], ang pulong nga pakan-a nagagikan sa Gresyanhon nga pulong nga bosko, nga nagpasabot og “alimahon o pasibsibon.” Ang pulong nga nating karnero nagagikan sa pinagamay nga termino sa arnion, nga nagpasabot og “gamay nga karnero.” …

Sa [ Juan 21:16 ],ang pulong nga pakan-a nagagikan sa lahi nga termino, poimaino, nga nagpasabot nga “pagbantay sa karnero, pag-atiman, o pag-amuma.” Ang pulong nga karnero nagagikan sa termino nga probaton, nga nangahulugan og “hingkod nga mga karnero.” …

Sa [ Juan 21:17 ], ang pulong nga pakan-a gikan na usab sa Gresyanhon nga bosko, nagpasabot sa pagpakaon. Ang pulong nga karnero gihubad na usab gikan sa Gresyanhon nga pulong nga probaton, nagpasabot sa hamtong nga mga karnero.

Kining tulo ka bersikulo, nga daw susama kaayo sa pinulongan nga Iningles, sa tinud-anay naglakip og tulo ka managlahi nga mga mensahe sa Gresyanhon:

Ang gagmay nga mga nati nga karnero kinahanglang amumahon aron motubo;

Ang karnero kinahanglan nga atimanon;

Ang karnero kinahanglan nga alimahon.

(Russell M. Nelson, “Shepherds, Lambs, and Home Teachers,” Ensign, Ago. 1994, 16)

Unsaon nako sa pagpakaon sa Iyang mga karnero?

Adunay dili maihap nga mga paagi aron makatabang ug makaalagad sa uban diha sa gugma ug pagkamaayo. Pananglitan, si Sister Michelle D. Craig, Unang Magtatambag sa Kinatibuk-ang Kapangulohan sa Young Women, nag-ampo nga makahibalo unsa pay iyang mabuhat aron matabangan ang mga anak sa Dios. Nadawat niya kaniadto ang usa ka pag-aghat sa dili pagtan-aw sa iyang telepono samtang naghulat sa mga linya. Basaha ang giasoy sa ubos.

6:30

Pagkasunod buntag, naghulat ko diha sa taas nga linya sa tindahan. Gikuha nako ang akong telepono ug dayon nahinumdom sa impresyon nga akong nadawat. Gihipos nako ang akong telepono ug mitan-aw sa palibot. Akong nakita ang hamtong nga lalaki nga nag-una nako sa linya. Ang iyang cart walay sulod gawas sa pipila ka mga lata sa pagkaon sa iring. Gibati nako ang pagduha-duha apan misulti og inantigo gayod sama sa, “Akong nakita nga ikaw adunay iring.” Siya miingon nga adunay umaabot nga unos, ug siya dili gusto nga maabtan nga walay pagkaon sa iring. Nag-istorya kami og kadiyot, ug dayon milingi siya nako ug miingon, “Kahibalo ka, wala akoy gisultihan niini, apan karon mao ang akong adlaw nga natawhan.” Natandog ang akong kasingkasing. Nanghinaot ako kaniya og malipayong adlaw nga natawhan ug mihalad og hilom nga pag-ampo sa pasalamat nga wala ko magtan-aw sa akong telepono ug milabay ang oportunidad nga tinud-anay nga makakita ug makakonektar sa laing tawo kinsa nagkinahanglan niini.

(Michelle D. Craig, “Mata aron sa Pagtan-aw,” Liahona, Nob. 2020, 16)

Dugang nga mga Kalihokan sa Pagkat-on

Pagpaambit sa ebanghelyo

Ikonsiderar ang pagbasa sa Mateo 28:19–20 kauban ang mga estudyante ug dayon pangutan-on sila sa mosunod nga mga pangutana:

Sumala sa bersikulo 20, unsay gisaad sa Manluluwas nga ihatag sa Iyang mga Apostoles?
Sa unsang paagi nga ang Ginoo “magauban kaninyo,” o mitabang kaninyo, sa inyong mga paningkamot sa pagpakigbahin sa ebanghelyo?
Sa unsang paagi nga ang paghinumdom niini nga saad makapadasig kaninyo aron magpadayon sa pagpangita og mga kahigayonan sa pagpaambit sa ebanghelyo ngadto sa uban?