Sukda ang Inyong Nakat-onan 6

Mateo 26–28; Marcos 14–16; Lucas 22–24; Juan 13–21

Kini nga leksiyon gituyo aron matabangan kamo sa pagtimbang-timbang sa mga tumong nga inyong gitakda ug sa personal nga pag-uswag nga inyong nasinati sa panahon sa inyong pagtuon sa Bag-ong Tugon.

Gamita ang lain-laing mga pamaagi sa pagtudlo. Ang mga estudyante kasagaran nga mas moapil kong ang mga magtutudlo naggamit og lainlain nga pamaagi sa pagtudlo. Pagkahimong andam mosulay og bag-ong mga pamaagi ug pag-andam sa paghimo og mga pakig-angay sa panahon sa leksiyon kon ang mga estudyante mawad-an og interes o kon ang usa ka kalihokan murag dili makatabang sa mga estudyante nga matuman ang gitinguha nga mga resulta.

Pagpangandam sa estudyante: Awhaga ang mga estudyante sa pagpamalandong sa ilang kasinatian sa pagtuon sa unang katungang bahin sa Bag-ong Tugon ug sa pagpangalagad ni Jesukristo. Dasiga ang mga estudyante sa pag-abot nga andam uban sa ilang nakat-onan o nabati gikan sa upat ka mga Ebanghelyo (Mateo, Marcos, Lucas, ug Juan) nga mahinungdanon alang kanila.

Posible nga mga Kalihokan sa Pagkat-on

Kini nga leksiyon gituyo aron matabangan ang mga estudyante sa pagtimbang-timbang sa mga tumong nga ilang gitakda, sa ilang abilidad sa pagpasabot sa mga pagtulon-an sa Bag-ong Tugon, o kon sa unsang paagi nausab ang ilang mga kinaiya, mga tinguha, ug abilidad sa pagsunod sa ebanghelyo. Ang pagtuon sa klase bahin sa Mateo 26–28; Marcos 14–16; Lucas 22–24; Juan 13–21 tingali naghatag og gibug-aton sa mga kamatuoran gawas niadtong anaa sa mosunod nga mga kalihokan. Kon mao, ang mga kalihokan mahimong ipahiangay nga ilakip kadto nga mga kamatuoran.

Higugmaa ang Dios sa tibuok ninyong kasingkasing

Kon ang mga estudyante adunay kahigayonan sa pagpamalandong sa ilang paghigugma alang sa Dios samtang sila nagtuon sa Mateo 22 ug Juan 14:15 , kini nga pagbansay mahimong makatabang sa mga estudyante sa pagsukod giunsa nila pagpadako ug pagpalambo sa ilang paghigugma sa Dios.

Pagdrowing og kasingkasing diha sa pisara. Pag-awhag og andam nga estudyante nga mopaambit og usa ka butang nga iyang nakat-onan o nabati mahitungod kang Jesukristo nga nakapalambo sa iyang paghigugma alang Kaniya. Dasiga ang unang estudyante nga mopili og ikaduhang estudyante nga mopaambit og unsa pay iyang ganahan mahitungod sa Manluluwas. Ipadayon ang kini nga kalihokan sa mga estudyante nga mopili og dugang nga mga estudyante hangtod ang tanang estudyante adunay kahigayonan sa pagpaambit. Ilista ang mga tubag sa estudyante mahitungod sa ilang gugma alang kang Jesukristo sa sulod o sa palibot sa kasingkasing diha sa pisara.

Ang mga estudyante mahimong magkinahanglan og panahon sa paghunahuna mahitungod sa ilang mga tubag sa mosunod nga mga pangutana. Awhaga ang mga estudyante sa pagsulat sa ilang mga tubag, ug dayon dapita ang andam nga mga estudyante nga mopaambit.

• Sa unsang paagi nga ang pagkat-on og dugang mahitungod sa gugma sa Langitnong Amahan ug ni Jesukristo alang kaninyo nakapadasig ninyo sa pagsulay og paghigugma Kanila nga mas labaw pa?

• Sa unsang paagi nga ang inyong pagsabot sa Ilang gugma alang kaninyo nakatabang sa pagpalambo sa inyong gugma alang sa ubang tawo?

Hinumdomi nga ang Manluluwas nagtudlo nga makapakita kita og paghigugma Kaniya pinaagi sa paghupot sa mga sugo (tan-awa sa Juan 14:15). Si Jesukristo naghatag og hingpit nga ehemplo sa pagpakita og gugma ngadto sa Langitnong Amahan pinaagi sa pagsunod sa tanang mga sugo (tan-awa sa Juan 14:31).

Sa dihang nagtuon kamo sa Juan 14:15 , lagmit inyong nasulat sa inyong journal ang mahitungod sa inyong mga tinguha sa paghupot sa mga sugo ug sa inyong mga motibo, o inyong mga rason, sa pagbuhat sa ingon. Kon mao, rebyoa ang inyong nasulat.

Hatagi og panahon ang mga estudyante sa pagpamalandong sa mosunod nga mga pangutana. Mahimo nga dili kini angay nga awhagon ang mga estudyante nga mopaambit og pihong mga tubag. Hinoon, mahimong awhagon ang mga estudyante sa pagpaambit og kinatibuk-ang mga ideya nga may kalabotan sa mga pangutana.

• Unsa ang inyong nabati mahitungod sa inyong mga tinguha karon ug mga motibo sa paghupot sa mga sugo aron mapakita ang inyong paghigugma alang sa Langitnong Amahan ug kang Jesukristo? Itandi ang inyong mga tinguha og mga motibo karon kaysa kon asa kamo niadtong sa sayo nga bahin sa tuig.

• Unsang mga kausaban ang inyong namatikdan sa inyong paghigugma sa Langitnong Amahan ug kang Jesukristo sa dihang inyong gitun-an ang Bag-ong Tugon? Kon nakamatikod mo og bisan unsang kausaban, unsa kaha ang nagdala niining maong mga kausaban?

• Aduna bay bisan unsang dugang nga mga kausaban nga inyong nabati nga kinahanglan ninyong buhaton aron mapakita o mapalambo ang inyong paghigugma sa Langitnong Amahan ug kang Jesukristo?

Ang Pag-ula ni Jesukristo: Unsa kaha ang inyong kinabuhi kon wala kini?

Ang tumong niini nga kalihokan mao ang paghatag sa mga estudyante og higayon sa pagtimbang-timbang sa ilang pagsabot ug panginahanglan sa Pag-ula ni Jesukristo.

Ikonsiderar ang pagpakita sa usa ka hulagway sama sa mosunod samtang ang mga estudyante mamalandong sa ilang mga tubag. Ang paggamit og mga hulagway sa klase mahimong makatabang sa mga estudyante nga mapokus ang ilang mga hunahuna.

Paghunahuna og unsa ang inyong nakat-onan mahitungod sa pag-ula nga sakripisyo ni Jesukristo gikan sa Bag-ong Tugon. Pamalandong sa makadiyot unsa ang kahulugan ni Jesukristo ug sa Iyang pag-ula nga sakripisyo nganha kaninyo sa personal. Ikonsiderar kon unsa ang inyong kinabuhi kon wala kini.

Karon nga nakagahin na kamo og higayon sa pagpamalandong, irekord ang pipila sa inyong mga hunahuna pinaagi sa pagtubag sa mosunod nga mga pangutana. Ilakip ang mahinungdanon nga mga detalye sa inyong mga tubag, ug ilakip ang mga tudling sa kasulatan nga nakaapekto ninyo mahitungod sa sakripisyo ni Jesukristo.

• Sa unsang paagi nga ang inyong kinabuhi malahi kon ang Manluluwas wala pa unta nag-antos alang kaninyo didto sa Getsemani ug namatay alang kaninyo didto sa krus sa Kalbaryo?

• Sa unsang paagi nga ang inyong kinabuhi malahi kon si Jesukristo wala makabuntog sa kamatayon pinaagi sa Iyang mahimayaong Pagkabanhaw?

• Unsa kaha ang mahitabo sa plano sa kaluwasan sa Langitnong Amahan kon wala ang pag-ula nga sakripisyo ni Jesukristo?

Human sa igo nga panahon, dapita ang andam nga mga estudyante sa pagpaambit sa ilang mga tubag sa mga pangutana sa taas. Ang mosunod nga pamahayag ni Presidente Ballard mahimong ipaambit aron matabangan ang mga estudyante nga makasabot sa ilang panginahanglan sa Pag-ula sa Manluluwas.

Si Presidente M. Russell Ballard, Akting nga Presidente sa Korum sa Napulog Duha ka Apostoles, mitudlo:

Salamat na lang, si Jesukristo maisugong mituman niini nga sakripisyo sa karaang Jerusalem. … Si Jesus andam nga nag-antos aron kitang tanan makaangkon sa oportunidad nga mahugasan aron malimpyo—pinaagi sa pagbaton og hugot nga pagtuo diha Kaniya, paghinulsol sa atong mga sala, pagpabunyag pinaagi sa tukmang awtoridad sa pagkapari, pagdawat sa makapalimpyo nga gasa sa Espiritu Santo pinaagi sa kompirmasyon, ug pagdawat sa tanang gikinahanglang mga ordinansa. Kon wala ang Pag-ula sa Ginoo, walay usa niini nga mga panalangin ang maanaa kanato, ug dili kita mahimong takos ug andam nga mobalik sa pagpuyo sa presensiya sa Dios.

(M. Russell Ballard, “Ang Pag-ula ug ang Bili sa usa Ka Kalag,” Liahona, Mayo 2004, 85)

Pagpaambit sa maayong balita ni Jesukristo

Ang mosunod nga kalihokan gidisenyo aron matabangan ang mga estudyante sa pagrebyo ug pag-summarize sa ilang kasinatian diha sa pagtuon sa upat ka Ebanghelyo.

Karon nga kamo nakapamalandong na sa ka importansiya sa pag-ula nga sakripisyo ni Jesukristo, basaha ang mosunod nga pamahayag ni Presidente Russell M. Nelson.

Ang pulong ebanghelyo nagpasabot nga “maayong balita.” Ang maayong balita mao ang Ginoong Jesukristo ug ang Iyang mensahe sa kaluwasan. Si Jesus miila sa ebanghelyo nga maglakip sa Iyang misyon ug sa Iyang pangalagad dinhi sa mortalidad.

(Russell M. Nelson, “Ang Tigulang nga mga Misyonaryo ug ang Ebanghelyo,” Liahona, Nob. 2004, 81)

Mahimong adunay susama nga ehemplo sa mga post nga gihimo sa Gospel Living nga app nga mahimong ipakita sa mga estudyante aron matabangan sila nga makasugod og buhat sa ilang kaugalingon.

Unsa nga maayong balita ang gusto ninyong ipaambit sa uban mahitungod kang Jesukristo ug sa Iyang balaanon nga misyon? Handurawa nga ang Simbahan naglunsad og usa ka kampanya sa social media aron pagpakaylap og pagkasayod mahitungod sa kinabuhi ug mga pagtulon-an ni Jesukristo nga narekord diha sa upat ka Ebanghelyo. Ang Simbahan naghangyo og mga post sa social media alang sa maong kampanya.

Pagsulat og mubo nga post nga nagpasabot sa inyong maayong balita mahitungod kang Jesukristo. Paghunahuna mahitungod sa usa ka butang nga inyong nakat-onan gikan sa mga Ebanghelyo (Mateo, Marcos, Lucas, ug Juan) nga espesyal alang kaninyo ug nga nakatabang ninyo nga makabati nga mas duol kang Jesukristo. Pananglitan, mahimo ninyong pilion ang usa ka butang nga gitudlo ni Jesus, usa ka milagro nga Iyang gibuhat, usa ka sambingay, usa ka sugilanon kon giunsa Niya pakighalubilo sa uban, usa ka hiyas nga Iyang gipanig-ingnan, o usa ka bahin sa Iyang pag-ula nga sakripisyo, kamatayon, ug Pagkabanhaw. Kon mibati kamo nga komportable, mahimo ninyong i-post ang inyong maayong balita sa social media o ipaambit kini sa laing tawo. Ilakip ang mosunod nga mga detalye diha sa inyong post:

• Paghimo og usa ka ulohan o titulo alang sa inyong post.

• Ipasabot giunsa sa maayong balita sa Manluluwas pagkamahinungdanon nganha kaninyo ug nakatabang kaninyo nga mabati nga mas duol Kaniya.

• Ilakip ang pihong tudling sa kasulatan gikan sa mga Ebanghelyo (Mateo, Marcos, Lucas, o Juan).

• Ilakip ang inyong pagpamatuod ug giunsa niining maayong balita pagkahimong makabenepisyo sa uban.

Ikonsiderar ang pag-awhag og pipila ka andam nga mga estudyante sa pagpaambit sa ilang mga post uban sa klase.