Lucas 24:1–10, 36–48

Ang Pagkabanhaw ni Jesukristo

Human sa paglubong sa Manluluwas, ang mga matinud-anon nga disipulo nagdala og mga pahumot ngadto sa lubnganan. Inay nga makit-an ang patay nga lawas sa Manluluwas, ilang nakaplagan ang usa ka walay sulod nga lubnganan. Ang mga anghel mipahibalo nga ang Ginoo nabanhaw. Sa pagkagabii niana, sa dihang ang mga disipulo nagtigom, Siya mitungha ug gipakita kanila ang Iyang nabanhaw nga lawas. Kini nga leksiyon mahimong makatabang ninyo sa pagpataas sa inyong pagsabot sa Pagkabanhaw sa Manluluwas ug giunsa niini pag apekto sa inyong kinabuhi.

Paggamit og mga litrato. Ang mga litrato makatabang sa mga estudyante sa paghanduraw, pagtuki, ug pagsabot sa mga kasulatan, ilabi na kon ang mga litrato gigamit sa pagdasig og panaghisgot. Kon gamiton ang usa ka litrato, siguroha nga kini nagdugang og kalig-on sa katuyoan sa leksiyon ug dili makapahuyang niini.

Pagpangandam sa estudyante: Awhaga ang mga estudyante sa pagpamalandong ug ikonsedera ang paglista unsa ang ilang nahibaloan mahitungod sa pagkabanhaw ug nganong ang Pagkabanhaw sa Manluluwas imporante kanila sa personal.

Posible nga mga Kalihokan sa Pagkat-on

Ang Pagkabanhaw ni Jesukristo

Susiha ang hulagway sa walay sulod nga lubnganan ni Jesukristo nga anaa makita sa ulohan niini nga leksiyon, ug pamalandongi ang imong mga tubag sa mosunod nga mga pangutana.

• Unsay buot ipasabot niini nga litrato alang kaninyo?

Pamalandongi unsa ang imong nahibaloan mahitungod sa Pagkabanhaw ug ang epekto niini sa inyong kinabuhi pinaagi sa pagtubag sa mosunod nga mga pangutana diha sa inyong journal sa pagtuon. Aduna kay kahigayonan sa pagbalik niining mga pangutana sa kataposan sa inyong pagtuon karon.

Ikonsiderar ang pagpakita sa mosunod nga mga pangutana aron sa pagtubag sa mga estudyante. Ang mga estudyante modangop niining samang mga pangutana human nila mapamalandongan ang ilang mga kasinatian niini nga leksiyon diha sa ilang mas taas nga pagsabot. Busa, lagmit ganahan sila motubag niini diha sa ilang mga journal sa pagtuon.

• Unsa ang inyong nahibaloan mahitungod sa pagkabanhaw?

• Sa unsang paagi nga ang inyong kahibalo ug mga pagtuo mahitungod sa Pagkabanhaw sa Manluluwas makaapekto kaninyo sa personal?

Kon ang mga estudyante misalmot sa pagpangandam sa estudyante, dapita sila nga modangop ug mopaambit niana nga kasayoran niining bahina (kon sila komportable).

Human si Jesukristo boluntaryong mihatag sa Iyang kinabuhi sa krus, ang Iyang lawas gikuha ug giputos og limpyo nga telang lino ug gibutang sa usa ka lubnganan. Agi og pagsunod sa Igpapahulay, si Maria Magdalena ug pipila sa lain pang matinuoron nga mga babaye mibalik sa lubnganan sayo sa buntag (tan-awa sa Lucas 24:10 ; Juan 20:11–18).

Basaha ang Lucas 24:1–12 , nga mangita unsa ang ilang nakaplagan ug nakat-onan samtang anaa sa lubnganan sa Manluluwas.

• Unsa kaha ang gihunahuna ug gibati sa mga disipulo human sa unsay ilang nakita ug nadungog?

Pgkahuman niini nga kasinatian, si Jesukristo mitungha ngadto sa duha ka disipulo didto sa dalan sa Emmaus (tan-awa sa Lucas 24:13–32). Mibalik sila sa Jerusalem aron ipaambit ang ilang kasinatian ngadto sa Apostoles (tan-awa sa Lucas 24:33–35).

Sa sunod nga leksiyon, ang mga estudyante magtuon og daghan pang mga istorya sa indibidwal nga mga saksi sa Pagkabanhaw ni Jesukrsito. Niini nga leksiyon, kon ang mga estudyante makabenepisyo gikan sa pagtuon sa mas detalyadong istorya sa pagtungha ni Jesus sa Emmaus sa Lucas 24:13–35 , ikonsiderar ang paggamit sa dugang nga kalihokan sa pagkat-on sa “Dalan paingon sa Emmaus” gikan sa leksiyon sa “Mateo 28; Lucas 24; Juan 20.”

Basaha ang Lucas 24:36–48 , nga mangita kon unsa ang nahitabo sa dihang ang mga disipulo ni Jesus naghisgot sa mga pagtungha sa nabanhaw nga Manluluwas.

Lucas 24:36–39Ang usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra ninyo kining makit-an. Makat-onan ninyo ang daghan pa mahitungod niining tudling sa doktrinal nga kahanas sa sunod nga leksiyon.

• Unsa ang nagpasulabi alang kanimo niining mga tudling gikan sa mga pulong sa Manluluwas ngadto sa Iyang mga disipulo?

Mahimong makatabang ang pagpangutana og dugang nga mga pangutana sama niining mosunod: Ngano kaha ang Manluluwas moawhag man kanila sa pagtaw-aw Kaniya ug paghikap Kaniya sa wala pa Niya gipaambit ang Iyang mensahe ngadto kanila? Unsa kaha ang gibati o nakat-onan sa Iyang mga disipulo gikan niini nga kasinatian?

• Ngano kaha ang pipila sa unang mga pulong sa Manluluwas nga gisulti ngadto kanila kay “Ang kalinaw maanaa kaninyo”? ( Lucas 24:36).

• Unsa ang inyong nakat-onan gikan niining mga bersikulo mahitungod kon si kinsa ang Manluluwas ug unsa ang Iyang gusto nga masabtan sa Iyang mga disipulo?

Pagpalambo sa inyong pagsabot sa Pagkabanhaw sa Manluluwas

Usa ka kamatuoran nga atong makat-onan gikan niining mga bersikulo mao nga si Jesukristo adunay nabanhaw nga lawas nga unod ug bukog.

• Unsay buot ipasabot nga nabanhaw?

Kon ang mga estudyante nanginahanglan og tabang sa pagpasabot unsa ang mahimong mabanhaw, ang kahulugan sa ubos mahimong ipaambit.

Pagkabanhaw, “ang pagkahiusa sa espiritu nga lawas ngadto sa yutan-ong lawas sa unod ug mga bukog human sa kamatayon,” gihimong posible alang sa matag usa kanato tungod ni Jesukristo (Giya ngadto sa mga Kasulatan, “ Pagkabanhaw ,” scriptures.ChurchofJesusChrist.org). Tungod sa Iyang Pag-ula ug Pagkabanhaw, gihimong posible sa Manluluwas alang sa matag usa kanato nga magpuyo kauban ug mahisama Kaniya.

Pamalandong sa bisan unsang mga pangutana ninyo mahitungod sa Pagkabanhaw sa Manluluwas ug ang kahulugan niini sa inyong kinabuhi. Pipila sa mga pangutana nga lagmit anaa kaninyo mahitungod sa doktrina sa Pagkabanhaw sa Manluluwas kay nalista sa ubos. Ikonsiderar ang paglita niini nga mga pangutana sa inyong journal sa pagtuon.

• Unsay kalabotan nga si Jesukristo adunay lawas nga unod ug bukog?

• Unsa kaimportante ang Pagkabanhaw sa Manluluwas dinhi sa akong kinabuhi?

Tabangi ang mga estudyante nga masabtan ang bili sa pagkat-on sa pagpangutana pinaagi sa pagfollow-up og mga pangutana sama sa “Sa unsang paagi nga ang pagsabot sa tubag niana makaapekto kanimo?” “Sa unsang paagi nga ang paggahin og panahon sa pagpamalandong ug pagsulat og mga pangutana makaapekto sa inyong pagtuon?” ug “Sa unsang paagi nga ang pagpangutana niini makaimpluwensiya sa inyong relasyon kang Jesukristo?”

Dasiga ang mga estudyante nga magmamugnaon sa ilang pamaagi niining mga pangutanaha. Usa ka paagi lagmit ang pag-awhag sa mga estudyante sa paghunahuna og sulat sa ilang mga pangutana ingon og naghimo og pasulit nga mahimong ibaylo sa uban aron makakita og mga tubag.

Usa ka paagi sa pagpangita og mga tubag sa atong mga pangutana mao ang pagsiksik unsa ang gitudlo sa mga propeta ug apostoles sa Ginoo. Sa ubos makita ang pipila ka panudlo ni Elder D. Todd Christofferson sa Korum sa Napulog Duha ka Apostoles. Samtang inyong tun-an kini nga mga pulong, pangitaa ang mga tubag sa uban ninyong mga pangutana. Mahimo usab kamong magsiksik og bisan unsang dugang nga mga pulong gikan sa mga sa giordinahang sulugoon sa Ginoo nga mahimong makatabang kaninyo.

Hunahunaa sa makadiyot ang kamahinungdanon sa Pagkabanhaw sa pagsulbad gay[o]d sa tinuod nga pagkatawo ni Jesus sa Nazaret ug sa dagkong pilosopikanhong panagbangi ug mga pangutana sa kinabuhi. Kon si Jesus tinuod gay[o]d nga nabanhaw, mosunod dayon niini nga Siya usa ka balaanong binuhat. Walay mortal nga tawo nga dunay gah[o]m sa iyang kaugalingon nga mabuhi og balik human mamatay. Tungod kay Siya nabanhaw, si Jesus dili mahimong usa lang ka panday, magtutudlo, rabbi, o propeta. Tungod kay Siya nabanhaw, si Jesus usa gay[o]d ka Dios, gani ang Bugtong Anak sa Amahan.

Busa, unsay Iyang gitudlo tinuod; ang Dios dili magbakak.

Busa, Siya ang Tiglalang sa yuta, sama sa Iyang gisulti.

Busa, ang langit ug ang impyerno tinuod, sama sa Iyang gitudlo.

Busa, dunay usa ka kalib[o]tan sa mga espiritu, nga Iyang gibisita human sa Iyang kamatayon.

Busa, moanhi Siya pag-usab, sama sa giingon sa mga anghel, ug “mohari dinhi sa yuta” [ Mga Artikulo sa Hugot nga Pagtuo 1:10 ].

Busa, dunay pagkabanhaw ug katap[o]sang paghukom alang sa tanan.

( D. Todd Christofferson, “Ang Pagkabanhaw ni Jesukristo,” Liahona Mayo 2014, 113)

• Unsa ang inyong idugang sa inyong mga tubag sa mga pangutana sa ulohan niini nga leksiyon?

• Unsaon ninyo pagpasabot unsa ang pagkabanhaw ngadto sa dili sinati niini nga pagtulon-an?

• Unsaon nga ang pagsabot sa Pagkabanhaw sa Manluluwas makaapekto sa inyong pagpasalamat ug pagmahal kang Jesukristo?

Mahimong tugotan ang kadtong mga komportable nga mopaambit sa pagpahayag unsa ang ilang nakat-onan o nabati sa ilang pagtuon, ug taposa sa pagpamatuod sa Pagkabanhaw sa Manluluwas ug ang epekto niini sa atong mga kinabuhi karon.

Komentaryo ug Background nga Impormasyon

Nganong importante man ang Pagkabanhaw ni Jesukristo ngari kanako?

Sa iyang pakigpulong “Unsa ang Nabuhat sa Manluluwas alang Kanato?” Si Presidente Dallin H. Oaks sa Unang Kapangulohan nagtudlo sa unsang paagi nga ang Pagkabanhaw sa Manluluwas nakaapekto sa matag usa kanato (Liahona, Mayo 2021, 75–77).

Dugang nga Kalihokan sa Pagkat-on

Mga pagtulon-an sa Basahon ni Mormon

Mahimong padak-an ang mahinungdanong papel sa Basahon ni Mormon sa pagdugang sa atong pagsabot sa pagkabanhaw. Dapita ang mga estudyante sa pagsiksik og pakisayran sama sa Mosiah 15:19–20 ; Mosiah 16:7–9 ; Alma 11:40–44 ; ug Mormon 9:13 , nga mangita sa unsay ilang nakat-onan bahin sa pagkabanhaw. Ikonsiderar nga tugotan ang mga estudyante sa pagpaambit sa unsay ilang nakaplagan, nga ipatigbabaw unsa unta ang wala nato nahibaloan kon wala pa ang gasa sa Basahon ni Mormon.