យ៉ូហាន ២

ព្រះយេស៊ូវបានប្រែទឹកទៅជាស្រាទំពាំងបាយជូរ

Jesus talking to Mary at a wedding feast.

ព្រះយេស៊ូវបានប្រែទឹកទៅជាស្រាទំពាំងបាយជូរក្នុងពិធីមង្គលការមួយ នៅក្នុងអព្ភូតហេតុដែលបានកត់ត្រាទុកជាលើកដំបូង ដែលទ្រង់បានធ្វើក្នុងអំឡុងការងារបម្រើនៅលើផែនដីរបស់ទ្រង់ ។ មេរៀននេះមានគោលបំណងជួយអ្នក ឲ្យបង្កើនសេចក្ដីជំនឿរបស់អ្នកលើព្រះយេស៊ូវគ្រីស្ទ នៅពេលអ្នកសិក្សាអព្ភូតហេតុនេះ ហើយរកឃើញសេចក្តីពិតអំពីព្រះចេស្ដា និងបុគ្គលិកលក្ខណៈរបស់ព្រះអង្គសង្គ្រោះ ។

ការសួរសំណួរដើម្បីជួយសិស្សឲ្យយល់ពីបទគម្ពីរ ។ សំណួរដែលជួយសិស្សឲ្យវិភាគបទគម្ពីរ អាចជួយពួកគេឲ្យយល់កាន់តែច្បាស់អំពីសេចក្ដីពិត ដែលត្រូវបានបង្រៀន ។ សូមរកមើលឱកាសដើម្បីសួរសំណួរ ដែលនឹងជួយសិស្សឲ្យគិតដិតដល់អំពីពាក្យ ឬឃ្លាសំខាន់ៗ ហើយពិចារណាថា តើវគ្គបទគម្ពីរដែលបានផ្តល់ឲ្យនេះទាក់ទងនឹងពួកគេយ៉ាងដូចម្តេច ។

ការរៀបចំរបស់សិស្ស ៖ សូមអញ្ជើញសិស្សឲ្យស្រមៃថា ពួកគេត្រូវបានស្នើសុំឲ្យឡើងនិយាយនៅក្នុងការប្រជុំសាក្រាម៉ង់ អំពីព្រះចេស្ដានៃព្រះយេស៊ូវគ្រីស្ទ ។ សូមឲ្យពួកគេមករៀន ដោយបានរៀបចំខ្លួនដើម្បីចែករំលែកដំណើររឿងព្រះគម្ពីរមួយ ឬពីរ ដែលពួកគេអាចប្រើដើម្បីបង្ហាញពីព្រះចេស្ដារបស់ទ្រង់ ។

សកម្មភាពរៀនសូត្រដែលអាចមាន

តើអ្នកទុកចិត្តលើនរណា ?

សូមពិចារណាយកអ្វីមួយ ដែលមានរសជាតិឆ្ងាញ់មកកាន់ថ្នាក់រៀន ហើយជូនដល់សិស្សដែលស្ម័គ្រចិត្តបរិភោគ មុនពេលដឹងថា តើវាជាម្ហូបអ្វី ។ សូមជ្រើសរើសអ្នកស្ម័គ្រចិត្តម្នាក់ ។ មុនពេលបង្ហាញម្ហូបនោះដល់សិស្ស សូមសួរថា ហេតុអ្វីបានជាគាត់ទុកចិត្តលើអ្នកគ្រប់គ្រាន់ ដើម្បីទទួលយកវា មុនពេលដឹងថាវាជាអ្វីនោះ ។

• តើវាអាចទៅរួចដែរឬទេ ដែលយើងទុកចិត្តនរណាម្នាក់ខ្លាំង រហូតដល់តាំងចិត្តធ្វើអ្វីៗ ដែលពួកគេអាចស្នើសុំឲ្យអ្នកធ្វើនោះ ?

• តើអ្នកត្រូវដឹងអ្វីខ្លះ អំពីបុគ្គលដែលមានឆន្ទៈធ្វើការតាំងចិត្តបែបនោះ ?

សូមសញ្ជឹងគិតមួយភ្លែត ប្រសិនបើអ្នកមានអារម្មណ៍ថា អ្នកស្គាល់ព្រះអង្គសង្គ្រោះបានល្មមគ្រប់គ្រាន់ ដើម្បីនឹងទុកចិត្តលើទ្រង់ ចំពោះអ្វីក៏ដោយដែលទ្រង់សុំពីអ្នក ។ នៅពេលអ្នកសិក្សា យ៉ូហាន ២ សូមរកមើលភស្ដុតាងនៃព្រះចេស្ដា និងបុគ្គលិកលក្ខណៈរបស់ទ្រង់ ដែលអាចបង្កើនការជឿទុកចិត្តរបស់អ្នកទៅលើទ្រង់ និងឆន្ទៈរបស់អ្នកដើម្បីធ្វើតាមអ្វីដែលទ្រង់សុំពីអ្នកនោះ ។

អព្ភូតហេតុដែលបានកត់ត្រាជាលើកដំបូងអំពីការងារបម្រើរបស់ព្រះយេស៊ូវ

អព្ភូតហេតុដែលបានកត់ត្រាទុកជាលើកដំបូង អំឡុងការងារបម្រើនៅលើផែនដីរបស់ព្រះអង្គសង្គ្រោះមាននៅក្នុង យ៉ូហាន ២ ។ មុនពេលអ្នកសិក្សាពីដំណើររឿងនេះ វាអាចមានគុណប្រយោជន៍ដើម្បីដឹងថា ស្រាច្រើនតែមានគុណភាពកាន់តែប្រសើរឡើង នៅពេលទុកវាឲ្យបានយូរ ហើយការអស់ស្រានឹងនាំឲ្យមានការអាម៉ាស់ដល់ម្ចាស់ពិធីមង្គលការ ។

សូមពិចារណាមើលវីដេអូ « Jesus Turns Water into Wine » ( ២:២៦ ) ដែលមាននៅលើគេហទំព័រ ChurchofJesusChrist.org មុនពេលអានដំណើររឿងនេះនៅក្នុងព្រះគម្ពីរ ។

សូមអាន យ៉ូហាន ២:១–១១ យឺតៗ និងប្រកបដោយការរិះគិត ហើយពិចារណាគូសចំណាំអ្វីដែលអ្នកចាប់អារម្មណ៍ ។ នៅពេលអ្នកសិក្សា អ្នកអាចពិចារណាពីចម្លើយចំពោះសំណួរដូចតទៅនេះ ៖ តើអ្នកគិតថា ម៉ារាដឹងអ្វីខ្លះអំពីបុត្ររបស់នាង ? តើអ្នកគិតថា អ្នកបម្រើបានដឹងអ្វីខ្លះអំពីព្រះយេស៊ូវ ?

សូមពិចារណាអញ្ជើញសិស្សឲ្យអាន យ៉ូហាន ២:១–១១ ជាក្រុមតូចៗ ។ សូមលើកទឹកចិត្តឲ្យពួកគេផ្អាកជាញឹកញាប់ ដើម្បីពិភាក្សាជាមួយក្រុមរបស់ពួកគេអំពីសេចក្តីពិត ដែលពួកគេដឹងអំពីព្រះយេស៊ូវគ្រីស្ទ ។

បន្ទាប់ពីទុកពេលគ្រប់គ្រាន់ហើយនោះ សូមអញ្ជើញសិស្សឲ្យចែករំលែកការយល់ដឹងរបស់ពួកគេជាមួយនឹងសិស្សក្នុងថ្នាក់ ។

• តើសេចក្ដីពិតអ្វីខ្លះ ដែលអ្នកបានរៀនអំពីព្រះចេស្ដារបស់ព្រះអង្គសង្គ្រោះ និងអំពីបុគ្គលិកលក្ខណៈរបស់ទ្រង់ ?

• តើអ្នកអាចគិតពីកាលៈទេសៈ ដែលការដឹងពីសេចក្ដីពិតទាំងនេះអាចជួយនរណាម្នាក់នៅសព្វថ្ងៃនេះបានដែរឬទេ ?

• តើវាបានផ្ដល់ពរជ័យដល់ជីវិតរបស់អ្នកយ៉ាងដូចម្តេច ពេលដឹងពីសេចក្តីពិតទាំងនេះអំពីព្រះយេស៊ូវគ្រីស្ទ ?

សូមកំណត់ថា តើសេចក្ដីពិតដែលបានរកឃើញនេះណាខ្លះ នឹងមានគុណប្រយោជន៍ខ្លាំងបំផុត ដើម្បីឲ្យសិស្សចំណាយពេលសិក្សាបន្ថែម ។ សកម្មភាពរៀនសូត្រខាងក្រោមនេះផ្តោតតែលើសេចក្ដីពិតសំខាន់មួយ ដែលសិស្សអាចរកឃើញពីវគ្គបទគម្ពីរនេះប៉ុណ្ណោះ ។

« ការអ្វីដែលលោកប្រាប់ឲ្យធ្វើ នោះត្រូវធ្វើចុះ »

ដូចក្នុងករណីជាច្រើននៅក្នុងព្រះគម្ពីរសញ្ញាថ្មី នោះការបកប្រែដោយ យ៉ូសែប ស៊្មីធ នៃ យ៉ូហាន ២:៤ ជួយយើងឲ្យមានការយល់ដឹងបន្ថែមអំពីព្រះអង្គសង្គ្រោះ ។ គម្ពីរចែងថា « មាតាអើយ តើការនោះអំពល់អ្វីដល់យើង ពេលវេលាខ្ញុំមិនទាន់មកដល់នៅឡើយ » ( នៅក្នុង យ៉ូហាន ២:៤ ) ។

• តើការណ៍នេះបង្រៀនអ្នកអ្វីខ្លះ អំពីទំនាក់ទំនងរបស់ព្រះអង្គសង្គ្រោះជាមួយនឹងមាតារបស់ទ្រង់ ?

សូមពិចារណាគូសចំណាំអ្វី ដែលម៉ារាបាននិយាយទៅកាន់អ្នកបម្រើ ដូចបានកត់ត្រានៅក្នុង ខទី ៥ ។

• តើការណែនាំរបស់ម៉ារាទៅពួកអ្នកបម្រើបង្រៀនយើងអ្វីខ្លះ អំពីសេចក្តីជំនឿរបស់នាងលើព្រះយេស៊ូវ ?

អែលឌើរ អិល វិតនី ក្លេតុន នៃពួកចិតសិបនាក់បានពន្យល់រឿងខ្លះ ដែលម៉ារាបានដឹងអំពីព្រះយេស៊ូវ ដែលបានពង្រឹងសេចក្តីជំនឿរបស់នាងលើទ្រង់ ។អ្នកគួរតែមើលវីដេអូ « Whatsoever He Saith unto You, Do It » ( ដែលមាននៅលើគេហទំព័រ ChurchofJesusChrist.org ) ចាប់ពីលេខកូដម៉ោង ១:៤០ ដល់ ២:២៩ ឬអានសេចក្តីថ្លែងការណ៍ខាងក្រោមនេះ ។

Official Portrait of Elder L. Whitney Clayton. Photographed March 2017.

[ ម៉ារា ] បានដឹងច្រើនអំពី [ ព្រះយេស៊ូវគ្រីស្ទ ] ជាងអ្នកណាៗទាំងអស់នៅលើផែនដីនេះ ។ នាងបានដឹងពីសេចក្ដីពិតនៃការប្រសូតដ៏អស្ចារ្យរបស់ទ្រង់ ។ នាងបានដឹងថា ទ្រង់គ្មានបាប ហើយថាទ្រង់ « ពុំមានព្រះបន្ទូលដូចមនុស្សដទៃឡើយ ហើយទ្រង់ក៏ពុំត្រូវបង្រៀនឡើយ ដ្បិតទ្រង់មិនត្រូវការឲ្យមនុស្សណាម្នាក់បង្រៀនទ្រង់ឡើយ » [ ការបកប្រែដោយ យ៉ូសែប ស៊្មីធ ម៉ាថាយ ៣:២៥ ( នៅក្នុងឧបសម្ព័ន្ធការបកប្រែដោយ យ៉ូសែប ស្ម៊ីធ ) ] ។ ម៉ារាបានដឹងពីសមត្ថភាពដ៏វិសេសវិសាលរបស់ទ្រង់ដើម្បីដោះស្រាយបញ្ហា រួមបញ្ចូលទាំងការប្រទានស្រាសម្រាប់មង្គលការមួយផងដែរ ។ នាងមានទំនុកចិត្តយ៉ាងរឹងមាំលើទ្រង់ និងព្រះចេស្ដាដ៏ទេវភាពរបស់ទ្រង់ ។ ការណែនាំសាមញ្ញចំៗរបស់នាងទៅកាន់ពួកអ្នកបម្រើគ្មានការព្រមព្រៀង គ្មានគុណសម្បត្តិ និងគ្មានដែនកំណត់ទេថា « ការអ្វីដែលលោកប្រាប់ឲ្យធ្វើ នោះត្រូវធ្វើចុះ » ។

( អិល វីតនី ក្លេតុន « Whatsoever He Saith unto You, Do It » Ensign ឬ Liahona ខែ ឧសភា ឆ្នាំ ២០១៧ ទំព័រ ៩៧ )

• តើម៉ារាបានដឹងអ្វីខ្លះ អំពីព្រះយេស៊ូវដែលមានសារៈសំខាន់ ដែលយើងត្រូវដឹងអំពីទ្រង់ដែរ ?

សូមស្រមៃថា អ្នកជាអ្នកបម្រើម្នាក់ ដែលបានឮសេចក្ដីណែនាំទាំងឡាយរបស់ម៉ារា ។ សូមអាន យ៉ូហាន ២:៦–៨ ម្ដងទៀត ដោយរកមើលអ្វីដែលព្រះយេស៊ូវបានបង្គាប់ឲ្យអ្នកបម្រើធ្វើ ។ មុនពេលអាន វាអាចមានគុណប្រយោជន៍ដើម្បីដឹងថា « ពាងថ្មទាំងនេះមិនមែនប្រើដើម្បីដាក់ទឹកផឹកនោះទេ ប៉ុន្ដែប្រើសម្រាប់លាងសម្អាតតាមទំនៀម » ( អិល វីតនី ក្លេតុន « Whatsoever He Saith unto You, Do It » ទំព័រ ៩៧ ) ។

• តើអ្នកប្រហែលជាបានគិត ឬមានអារម្មណ៍យ៉ាងណាដែរ នៅពេលអ្នកយកពែងទៅជូនម្ចាស់ពិធីនោះ ?

• តើមានការណែនាំណាខ្លះ ដែលព្រះយេស៊ូវគ្រីស្ទបានប្រទាននៅថ្ងៃនេះ ដែលតម្រូវឲ្យអ្នកទុកចិត្តលើទ្រង់ដើម្បីគោរពតាម ?

សូមពិចារណាពីរបៀបជួយសិស្សឲ្យបង្កើនសមត្ថភាពរបស់ពួកគេ ដើម្បីទុកចិត្តលើព្រះយេស៊ូវគ្រីស្ទ និងធ្វើអ្វីដែលទ្រង់សុំឲ្យពួកគេធ្វើ ។ ឧទាហរណ៍ សូមអញ្ជើញសិស្សឲ្យចែករំលែកបទពិសោធន៍ ដែលពួកគេបានគោរពតាមព្រះបន្ទូលរបស់ព្រះអង្គសង្គ្រោះ ចែករំលែកដំណើររឿងមួយពីសុន្ទរកថាសន្និសីទទូទៅ ឬបំពេញសកម្មភាពដូចខាងក្រោម ។

នៅក្នុងការបកប្រែដោយ យ៉ូសែប ស្ម៊ីធ យ៉ូហាន ២:១១ យើងមិនត្រឹមតែដឹងថា អព្ភូតហេតុនេះបានបង្ហាញពីសិរីល្អរបស់ព្រះអង្គសង្គ្រោះប៉ុណ្ណោះទេ ប៉ុន្ដែថែមទាំងដឹងថា « សេចក្ដីជំនឿរបស់ពួកសិស្សទ្រង់ទៅលើទ្រង់បានរឹងមាំឡើង » ទៀតផង ។ អព្ភូតហេតុមិនធ្វើឲ្យមនុស្សប្រែចិត្តជឿនោះទេ ប៉ុន្តែអ្នកដែលមានសេចក្ដីជំនឿលើព្រះយេស៊ូវគ្រីស្ទ បានពង្រឹងសេចក្ដីជំនឿរបស់ពួកគេតាមរយៈអព្ភូតហេតុទាំងនោះ ។

សូមចំណាយពេលពីរបីនាទីដើម្បីស្វែងរក និងរៀនពីអ្នកដទៃនៅក្នុងព្រះគម្ពីរដែល ដូចជាម៉ារាដែរ មានសេចក្ដីជំនឿដ៏ខ្លាំងលើព្រះយេស៊ូវគ្រីស្ទ ។ សូមរកមើលមូលហេតុ ដែលពួកគេម្នាក់ៗបានជ្រើសរើសដើម្បីទុកចិត្តលើ និងធ្វើតាមអ្វីដែលព្រះយេស៊ូវបានមានបន្ទូល ។ គំរូនានារួមមាន នីហ្វៃ ( នីហ្វៃទី២ ៤:៣៤–៣៥ ) យ៉ាកុប ( យ៉ាកុប ៤:១០ ) និងបងប្រុសរបស់យ៉ារេឌ ( អេធើរ ៣:៩–១២ ) ។

សូមពិចារណាផ្តល់ពេលវេលាឲ្យសិស្សសរសេរការយល់ដឹងនានា នៅក្នុងសៀវភៅកំណត់ហេតុការសិក្សារបស់ពួកគេ ។ សំណួរខាងក្រោមនេះអាចណែនាំពួកគេបាន នៅពេលពួកគេសរសេរ ។ នៅពេលសិស្សសរសេរចប់ហើយ សូមពិចារណាអញ្ជើញអ្នកស្ម័គ្រចិត្តឲ្យឡើងចែករំលែកផ្នែកខ្លះនៃអ្វី ដែលពួកគេបានសរសេរ ។

• តើអ្នកដឹងអ្វីខ្លះអំពីព្រះយេស៊ូវគ្រីស្ទ ដែលបំផុសគំនិតអ្នកឲ្យស្ដាប់បង្គាប់តាម « ការអ្វីដែលលោកប្រាប់ឲ្យធ្វើ នោះត្រូវធ្វើចុះ » ? ( យ៉ូហាន ២:៥ ) ។

• ហេតុអ្វីមនុស្សម្នាក់អាចទុកចិត្តលើព្រះយេស៊ូវគ្រីស្ទបាន ទោះបីអ្វីដែលទ្រង់មានបន្ទូលពួកគេមិនយល់ក៏ដោយ ?

• តើអ្នកអាចធ្វើអ្វីខ្លះ ដើម្បីស្គាល់ព្រះយេស៊ូវគ្រីស្ទបានកាន់តែច្បាស់ ដើម្បីឲ្យសេចក្ដីជំនឿរបស់អ្នកលើទ្រង់កើនឡើង ?

វិចារណកថា និង ព័ត៌មានសាច់រឿង

តើការផឹកស្រាខុសនឹងបទបញ្ញត្តិនៅសម័យព្រះគម្ពីរប៊ីបដែរឬទេ ?

មានសេចក្ដីយោងជាច្រើននៅក្នុងព្រះគម្ពីរប៊ីប ដែលយោងទៅអំពើអាក្រក់នៃភាពប្រមឹក និងគ្រឿងស្រវឹងខ្លាំង ( ឧទាហរណ៍ សូមមើល សុភាសិត ២៣:២០–២១ ; អេសាយ ៥:១១–១២ ; អេភេសូរ ៥:១៨ ) ។ ខគម្ពីរទាំងនេះមិនបានហាមប្រាមជាក់លាក់អំពីការប្រើគ្រឿងស្រវឹងទេ ប៉ុន្តែវាថ្កោលទោសលើការបណ្តែតបណ្តាយហួសប្រមាណ និងភាពប្រមឹក ។ នៅជំនាន់របស់យើង ព្រះអម្ចាស់បានបើកសម្ដែងពាក្យសម្ដីនៃប្រាជ្ញាវាងវៃ ដែលហាមឃាត់នូវការទទួលទានភេសជ្ជៈដែលមានជាតិអាល់កុល [ សូមមើល គោលលទ្ធិ និង សេចក្តីសញ្ញា ៨៩:៤–៧ ] ។ យើងគួរចៀសវាងធ្វើការវិនិច្ឆ័យមនុស្សនៅសម័យកាន់កាប់ត្រួតត្រាមុនៗ ដោយបទបញ្ញត្តិដែលព្រះអម្ចាស់បានប្រទានដល់យើងនៅសម័យយើងសព្វថ្ងៃនេះ ។

( សៀវភៅសិក្សាព្រះគម្ពីរសញ្ញាថ្មីសម្រាប់សិស្ស [ ឆ្នាំ ២០១៨ ] នៅលើគេហទំព័រ ChurchofJesusChrist.org )

ហេតុអ្វីព្រះយេស៊ូវហៅម្ដាយរបស់ទ្រង់ថា « មាតាអើយ » ?

អែលឌើរ ជេមស៍ អ៊ី ថាលម៉េហ្គ ( ឆ្នាំ ១៨៦២–១៩៣៣ ) ក្នុងកូរ៉ុមនៃពួកសាវកដប់ពីរនាក់បានពន្យល់ ៖

Portrait of James E. Talmage.

ពាក្យ « មាតា » ជានាមដែលបានលើកឡើង ដោយកូនប្រុសទៅកាន់ម្ដាយខ្លួន កាលអ្នកស្ដាប់ទៅដូចមិនទំនង ប៉ុន្តែធាតុពិតពាក្យនេះប្រើក្នុងន័យបង្ហាញការគោរព ។ … នៅទិដ្ឋភាពចុងបញ្ចប់ដ៏គួរឲ្យភ័យខ្លាចនៃបទពិសោធន៍នៃជីវិតរមែងស្លាប់របស់ទ្រង់ កាលព្រះគ្រីស្ទត្រូវបានគេឆ្គាងនៅលើឈើឆ្កាង ដោយរងការឈឺចាប់ដ៏ខ្លោចផ្សា នោះទ្រង់បានមើលទៅមាតាទ្រង់ ម៉ារា ដែលកំពុងទួញយំ ហើយបានបង្គាប់ឲ្យសាវកសំណព្វ យ៉ូហានឲ្យមើលថែគាត់ ដោយមានបន្ទូល ៖ « មាតាអើយ នុ៎ះន៏ កូនរបស់មាតា » ។ [ យ៉ូហាន ១៩:២៦ ] ។ តើអាចគិតឃើញដែរទេថា នៅក្នុងគ្រាដ៏អស្ចារ្យនេះ កង្វល់របស់ព្រះអម្ចាស់យើងចំពោះមាតា ពេលសេចក្ដីស្លាប់ហៀបនឹងមកបំបែកទ្រង់ចេញពីមាតាទ្រង់ គឺគ្មានអាម្មណ៍អ្វីក្រៅពីការគោរព ភាពទន់ភ្លន់ និងសេចក្ដីស្រឡាញ់នោះ ?

( ជេមស៍ អ៊ី ថាលម៉េហ្គ Jesus the Christ[ ឆ្នាំ ១៩១៦ ] ទំព័រ ១៤៤–៤៥ ) ។

យ៉ូហាន ២:៦ ។

តើ ២ ឬ ៣ អម្រែកគឺជាអ្វី ?

២ ឬ ៣ អម្រែកទឹកមានចំណុះប្រហែលប្រាំបួនហ្គាឡុងអាមេរិក ( ៣៤ លីត្រ ) ដូច្នេះពាងទាំង ៦ អាចដាក់ទឹកបានចន្លោះពី ១០០ ទៅ ១៦០ ហ្គាឡុង ( ប្រហែល ៣៨០ និង ៦០០ លីត្រ ) ។

យ៉ូហាន ២:៥ ។

ហេតុអ្វីវាសំខាន់ដើម្បីធ្វើ « ការអ្វីដែល [ ព្រះមានបន្ទូល ] ឲ្យធ្វើ នោះត្រូវធ្វើចុះ » ?

អែលឌើរ អិល វីតនី ក្លេតុន នៃពួកចិតសិបនាក់បានបង្រៀន ៖

Official Portrait of Elder L. Whitney Clayton. Photographed March 2017.

ពេលយើងសម្រេចចិត្តធ្វើអ្វីដែល « [ ព្រះ ] ប្រាប់ឲ្យយើងធ្វើ » នោះយើងតាំងចិត្តដោយស្មោះសរ ដើម្បីធ្វើឲ្យឥរិយាបថរបស់យើងរាល់ថ្ងៃស្របតាមព្រះទ័យរបស់ព្រះ ។ ទង្វើនៃសេចក្ដីជំនឿដ៏សាមញ្ញាបែបនេះ ដូចជាការសិក្សាព្រះគម្ពីរប្រចាំថ្ងៃ ការតមអាហារជាទៀងទាត់ និងការអធិស្ឋានដោយចិត្តស្មោះសរ ធ្វើឲ្យសមត្ថភាពយើងខាងវិញ្ញាណកាន់តែស៊ីជម្រៅ ដើម្បីបំពេញតាមតម្រូវការនៃជីវិតរមែងស្លាប់ ។ ពេលខ្លះ ទម្លាប់នៃជំនឿដ៏សាមញ្ញដឹកនាំទៅរកលទ្ធផលដ៏អស្ចារ្យ ។ វាប្រែសេចក្ដីជំនឿយើងពីគ្រាប់ពូជមួយទៅជាអំណាចដ៏មានថាមពលសម្រាប់សេចក្ដីល្អនៅក្នុងជីវិតយើង ។ …

… ពេលយើងទុកចិត្ត ហើយដើរតាមទ្រង់ នោះជីវិតយើងនឹងផ្លាស់ប្តូរ ដូចជាទឹកដែលបានប្រែទៅជាស្រាដូច្នោះដែរ ។ យើងក្លាយជាមនុស្សដ៏ប្រពៃលើសពីសមត្ថភាព ដែលយើងអាចធ្វើបានទៅទៀត ។ សូមទុកចិត្តលើព្រះអម្ចាស់ និង « ការអ្វីដែលលោកប្រាប់ឲ្យធ្វើ នោះត្រូវធ្វើចុះ » ។

( អិល វីតនី ក្លេតុន « Whatsoever He Saith unto You, Do It » Ensign ឬ Liahona ខែ ឧសភា ឆ្នាំ ២០១៧ ទំព័រ ៩៧–៩៩ )

សកម្មភាពរៀនសូត្របន្ថែម

ព្រះយេស៊ូវគ្រីស្ទអាចផ្លាស់ប្តូរខ្ញុំបាន

ពេលប្រែទឹកទៅជាស្រា នោះព្រះយេស៊ូវបានធ្វើអព្ភូតហេតុមួយ ។ ទ្រង់អាចធ្វើអព្ភូតហេតុស្រដៀងគ្នានេះនៅក្នុងជីវិតរបស់យើងផ្ទាល់បាន ដោយផ្លាស់ប្តូរយើងពីខ្លួនយើងទៅជានរណា ដែលយើងអាចប្រែក្លាយទៅជា ។ សូមពិចារណាអញ្ជើញសិស្សឲ្យមើលពីរបៀប ដែលជីវិតផ្ទាល់ខ្លួនរបស់ពួកគេ អាចស្រដៀងនឹងទឹកនៅក្នុងអព្ភូតហេតុនេះ ។ វាអាចមានគុណប្រយោជន៍ ដើម្បីឲ្យសិស្សគិតអំពីប្រភេទពាងទឹក ដែលត្រូវបានប្រើសម្រាប់អព្ភូតហេតុ ក៏ដូចជាអ្វីដែលអ្នកបម្រើបានធ្វើដើម្បីជួយនាំមកនូវអព្ភូតហេតុនោះ ។ សូមជួយសិស្សឲ្យរក្សាការផ្តោតអារម្មណ៍របស់ពួកគេលើព្រះអង្គសង្គ្រោះ ហើយយល់ថា ដោយសារទ្រង់មានអំណាចលើអ្វីៗទាំងអស់ នោះទ្រង់អាចនាំមកនូវការផ្លាស់ប្តូរដ៏អព្ភូតហេតុមកក្នុងជីវិតរបស់យើងបាន ។