យ៉ូហាន ៣:១៤–១៧
« ដ្បិតព្រះទ្រង់ស្រឡាញ់មនុស្សលោកដល់ម្ល៉េះ »
ដូចបានកត់ត្រានៅក្នុង យ៉ូហាន ៣ ព្រះយេស៊ូវបានបង្រៀននីកូដេមអំពីពលិកម្មដ៏ធួនរបស់ទ្រង់ នៅពេលទ្រង់មានបន្ទូលថា « នោះកូនមនុស្សនឹងត្រូវ [ បាន ] គេលើកលោកឡើងយ៉ាងនោះដែរ ដើម្បីឲ្យអ្នកណាដែលជឿដល់កូនមនុស្សនោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ » ( យ៉ូហាន ៣:១៤–១៥ ) ។ ប្រធាន រ័សុល អិម ណិលសុន បានបង្រៀនថា « នៅពេលយើងវិនិយោគពេលវេលាក្នុងការរៀនសូត្រអំពីព្រះអង្គសង្គ្រោះ និងពលិកម្មដ៏ធួនរបស់ទ្រង់ នោះយើងខិតចូលទៅធាតុគន្លឹះ [ មួយ ] ទៀត ដើម្បីទទួលបានព្រះចេស្ដារបស់ទ្រង់ ៖ គឺយើងជ្រើសរើសដើម្បីមានជំនឿទៅលើទ្រង់ ហើយធ្វើតាមទ្រង់ » ( «Drawing the Power of Jesus Christ into Our Lives,” Ensign or Liahona ខែ ឧសភា ឆ្នាំ ២០១៧ ទំព័រ ៤០ ) ។ មេរៀននេះនឹងផ្តល់ឱកាសឲ្យអ្នកពង្រឹងសេចក្តីជំនឿរបស់អ្នកលើព្រះយេស៊ូវគ្រីស្ទ នៅពេលអ្នករៀនសូត្របន្ថែមទៀតអំពីដង្វាយធួនរបស់ទ្រង់ ។
ដង្វាយធួនរបស់ព្រះយេស៊ូវគ្រីស្ទ ។ ប្រធាន រ័សុល អិម ណិលសុន បានបង្រៀន ៖ « វាពុំពេញលេញខាងគោលលទ្ធិទេ ដែលនិយាយអំពីពលិកម្មដ៏ធួនរបស់ព្រះអម្ចាស់តែឃ្លាកាត់ ដូចជា ‹ ដង្វាយធួន › ឬ ‹ អំណាចនៃដង្វាយធួនដែលអាចធ្វើទៅបាន › ឬ ‹ ការអនុវត្តដង្វាយធួន › ឬ ‹ ការត្រូវបានពង្រឹងដោយដង្វាយធួន › នោះ ។ …« គ្មានតួអង្គឥតរូបណាដែលហៅថា ‹ ដង្វាយធួន › ដែលយើងអាចហៅរកការជួយ ការព្យាបាល ការអភ័យទោស ឬអំណាចបាននោះទេ ។ … ពលិកម្មដ៏ធួនរបស់ព្រះអង្គសង្គ្រោះ—ជាទង្វើដ៏សំខាន់នៃប្រវត្តិសាស្ត្រមនុស្សលោក—ត្រូវបានយល់ និងកោតសរសើរខ្លាំងបំផុត នៅពេលយើងភ្ជាប់វាទៅនឹងទ្រង់យ៉ាងច្បាស់លាស់ » ( « Drawing the Power of Jesus Christ into Our Lives » Ensign ឬ Liahona ខែ ឧសភា ឆ្នាំ ២០១៧ ទំព័រ ៤០ ) ។
ការរៀបចំរបស់សិស្ស ៖ សូមអញ្ជើញសិស្សឲ្យស្វែងរកវគ្គបទគម្ពីរ ឬសេចក្ដីថ្លែងការណ៍មួយពីសន្និសីទទូទៅ ដែលបង្រៀនពួកគេអំពីអ្វីមួយ ដែលមានអត្ថន័យអំពីដង្វាយធួននៃព្រះយេស៊ូវគ្រីស្ទ ។
សកម្មភាពរៀនសូត្រដែលអាចមាន
តើដង្វាយធួនរបស់ព្រះយេស៊ូវគ្រីស្ទគឺជាអ្វី ?
សូមពិចារណាដាក់បង្ហាញរូបភាពដូចខាងក្រោមរបស់ព្រះអង្គសង្គ្រោះ និងសេចក្តីថ្លែងការណ៍មិនពេញលេញខាងក្រោមនេះ ។ សូមអញ្ជើញសិស្សឲ្យបំពេញសេចក្តីថ្លែងការណ៍នៅក្នុងសៀវភៅកំណត់ហេតុការសិក្សារបស់ពួកគេក៏បាន ឬពិភាក្សាជាមួយដៃគូអំពីរបៀប ដែលពួកគេអាចបំពេញសេចក្តីថ្លែងការណ៍នីមួយៗក៏បាន ។ បន្ទាប់មក សូមទុកពេលឲ្យសិស្សដែលមានឆន្ទៈចង់ចែកចាយ ឡើងចែករំលែកសេចក្តីថ្លែងការណ៍ដែលបានបំពេញរួចហើយរបស់ពួកគេទៅកាន់សិស្សក្នុងថ្នាក់ ។
សូមមើលទៅរូបភាពរបស់ព្រះយេស៊ូវនៅសួនច្បារគែតសេម៉ានី និងនៅលើឈើឆ្កាង ហើយគិតអំពីអ្វីដែលអ្នកដឹង អំពីដង្វាយធួនរបស់ព្រះយេស៊ូវគ្រីស្ទ ។
សូមបំពេញសេចក្តីថ្លែងការណ៍ខាងក្រោមនៅក្នុងសៀវភៅកំណត់ហេតុការសិក្សារបស់អ្នក ។
-
ព្រះវរបិតាសួគ៌បានបញ្ជូនព្រះយេស៊ូវគ្រីស្ទមកកាន់ផែនដីនេះ ដើម្បីធួនជំនួសយើង ដើម្បី …
-
រឿងមួយចំនួនដែលព្រះយេស៊ូវបានដកពិសោធន៍នៅក្នុងសួនច្បារគែតសេម៉ានី រួមមាន …
-
ព្រះយេស៊ូវបានសុគតនៅលើឈើឆ្កាង ពីព្រោះ …
-
ប្រសិនបើព្រះយេស៊ូវមិនបានរងទុក្ខនៅសួនច្បារគែតសេម៉ានី និងសុគតនៅលើឈើឆ្កាងទេ នោះ …
នៅក្នុងមេរៀននេះ អ្នកនឹងរៀនបន្ថែមទៀតអំពីដង្វាយធួនរបស់ព្រះយេស៊ូវគ្រីស្ទ និងសេចក្ដីស្រឡាញ់ដែលព្រះវរបិតាសួគ៌បានបង្ហាញ នៅពេលដែលទ្រង់បានបញ្ជូនព្រះរាជបុត្រារបស់ទ្រង់មកកាន់ពិភពលោកនេះ ។ នៅពេលអ្នកសិក្សា សូមយកចិត្តទុកដាក់លើការបំផុសគំនិតនៃព្រះវិញ្ញាណបរិសុទ្ធ ដែលអាចជួយអ្នកឲ្យដឹងគុណជាងមុន ចំពោះពលិកម្មរបស់ព្រះយេស៊ូវគ្រីស្ទសម្រាប់អ្នក និងបង្កើនសេចក្ដីជំនឿរបស់អ្នកទៅលើទ្រង់ ។
សូមពិចារណាផ្តល់សំណៅចែកដូចខាងក្រោមដល់សិស្ស ហើយទុកពេលឲ្យពួកគេធ្វើការដោយស្ងាត់ស្ងៀមដោយខ្លួនឯងនៅក្នុងឯកសារនេះ ។ សូមពិចារណាចាក់ភ្លេងទំនុកតម្កើងហ៊ឹមៗចោល ដើម្បីជួយសិស្សឲ្យផ្តោតអារម្មណ៍លើខ្លឹមសារខាងវិញ្ញាណ ដែលពួកគេកំពុងសិក្សានេះ ។
ដង្វាយធួនរបស់ព្រះអង្គសង្គ្រោះ
វគ្គបទគម្ពីរ និងសេចក្តីថ្លែងការណ៍ខាងក្រោមនេះបង្រៀនអំពីដង្វាយធួនរបស់ព្រះយេស៊ូវគ្រីស្ទ ។ សូមចំណាយពេល ១០ ទៅ ១៥ នាទីអានប្រភពទាំងនេះដោយយកចិត្តទុកដាក់ ( ឬប្រភពផ្សេងទៀតអំពីដង្វាយធួនរបស់ព្រះអង្គសង្គ្រោះ ដែលអ្នកចាប់អារម្មណ៍ចង់រៀនសូត្រ ឬដែលអ្នកបានរកឃើញមុនមេរៀននេះ ) ។ ពេលអ្នកអាន សូមគិតអំពីរបៀបដែលប្រភពទាំងនេះនីមួយៗ ជួយអ្នកឲ្យយល់កាន់តែច្បាស់អំពីអ្វីដែលព្រះវរបិតាសួគ៌ និងព្រះយេស៊ូវគ្រីស្ទបានធ្វើសម្រាប់អ្នក និងមូលហេតុនៃការធ្វើដូច្នោះ ។
អែលឌើរ ថាត អរ ខាលីស្ទើរ នៃពួកចិតសិបនាក់បានបង្រៀន ៖
ដូច្នេះតើដង្វាយធួនរបស់ព្រះយេស៊ូវគ្រីស្ទគឺជាអ្វី ? ក្នុងន័យមួយ វាគឺជាបណ្ដុំព្រឹត្តិការណ៍ដ៏ទេវភាពដែលបានចាប់ផ្ដើមនៅក្នុងសួនច្បារគែតសេម៉ានី បានបន្តនៅលើឈើឆ្កាង ហើយបានបញ្ចប់ជាមួយនឹងការមានព្រះជន្មរស់ឡើងវិញរបស់ព្រះអង្គសង្គ្រោះចេញពីផ្នូរ ។ វាត្រូវបានជំរុញចិត្តដោយសេចក្ដីស្រឡាញ់ដែលយើងម្នាក់ៗពុំអាចយល់បាន ។ វាតម្រូវឲ្យមានអង្គដែលគ្មានអំពើបាប ដែលមានព្រះចេស្ដាជានិរន្តរលើធាតុទាំងឡាយ—សូម្បីតែសេចក្ដីស្លាប់ ជាអង្គដែលមានសមត្ថភាពគ្មានដែនកំណត់ដើម្បីរងទុក្ខនូវលទ្ធផលនៃរាល់អំពើបាប និងជំងឺរបស់យើង ហើយជាអង្គដែលយាងចុះក្រោមគ្រប់ទាំងអស់ [ សូមមើល គោលលទ្ធិ និង សេចក្ដីសញ្ញា ៨៨:៦ ] ។ នេះគឺជាបេសកកម្មរបស់ព្រះយេស៊ូវគ្រីស្ទ—នេះគឺជាដង្វាយធួនរបស់ទ្រង់ ។
ចុះតើគោលបំណងរបស់វាគឺជាអ្វី ? វាគឺដើម្បីធ្វើឲ្យយើងអាចត្រឡប់ទៅវត្តមានរបស់ព្រះវិញ ប្រែក្លាយកាន់តែដូចជាទ្រង់ ហើយមានអំណរដ៏ពេញលេញមួយ ។ ការណ៍នេះអាចសម្រេចបានតាមរយៈការយកឈ្នះលើឧបសគ្គបួនយ៉ាង ៖
១. សេចក្ដីស្លាប់ខាងរាងកាយ
២. សេចក្ដីស្លាប់ខាងវិញ្ញាណ ដែលកើតមានដោយសារអ័ដាម និងដោយសារអំពើបាបរបស់យើង
៣. ទុក្ខវេទនា និងជំងឺរបស់យើង
៤. ភាពទន់ខ្សោយ និងភាពពុំល្អឥតខ្ចោះរបស់យើង
( ថាត អរ ខាលីស្ទើរ « The Atonement of Jesus Christ » Ensign ឬ Liahona ខែ ឧសភា ឆ្នាំ ២០១៩ ទំព័រ ៨៥ )
-
តើអ្នកមានអារម្មណ៍ ឬការយល់ដឹងអ្វីខ្លះ នៅពេលអ្នកសិក្សាអំពីព្រះយេស៊ូវគ្រីស្ទ និងដង្វាយធួនរបស់ទ្រង់ ?
បន្ទាប់ពីសិស្សបានបញ្ចប់កិច្ចការនៅលើសំណៅចែកហើយ សូមពិចារណាអញ្ជើញពួកគេឲ្យចែករំលែកចម្លើយរបស់ពួកគេ ចំពោះសំណួរចុងក្រោយនេះជាមួយសិស្សក្នុងថ្នាក់ ឬជាក្រុមតូចៗ ។ វាក៏អាចមានអត្ថប្រយោជន៍ផងដែរ ក្នុងការផ្តល់ឱកាសឲ្យសិស្សសួរសំណួរ ដែលពួកគេអាចមាន នៅពេលពួកគេបានសិក្សាចំណុចនានានៅលើសំណៅចែកនេះ ។
តើសេចក្តីស្រឡាញ់របស់ព្រះវរបិតាត្រូវបានបង្ហាញយ៉ាងដូចម្តេច ពេលទ្រង់បញ្ជូនព្រះរាជបុត្រារបស់ទ្រង់នោះ ?
សេចក្តីពិតមួយដែលព្រះអង្គសង្គ្រោះបានសង្កត់ធ្ងន់ នៅពេលទ្រង់បានបង្រៀននីកូដេមអំពីដង្វាយធួនរបស់ទ្រង់ ( សូមមើល យ៉ូហាន ៣:១៤–១៧ ) គឺថា ព្រះវរបិតាសួគ៌ស្រឡាញ់បុត្រាបុត្រីរបស់ទ្រង់ខ្លាំងណាស់ រហូតដល់ទ្រង់បានបញ្ជូនព្រះរាជបុត្រាបង្កើតតែមួយរបស់ទ្រង់ឲ្យមកធួននឹងអំពើបាបជំនួសយើង ។
ប្រធាន ដាល្លិន អេក អូក នៃគណៈប្រធានទីមួយបានបង្រៀនអំពីរបៀបដែលសេចក្តីស្រឡាញ់របស់ព្រះវរបិតាសួគ៌ត្រូវបានបង្ហាញតាមរយៈដង្វាយធួនរបស់ព្រះអង្គសង្គ្រោះ ៖
មិនមានភស្ដុតាងណាអស្ចារ្យជាងការប្រកាសដោយសាវកយ៉ូហានអំពីអំណាច និងភាពល្អឥតខ្ចោះនៃសេចក្ដីស្រឡាញ់ដ៏និរន្ដររបស់ព្រះឡើយ ៖ « ដ្បិតព្រះទ្រង់ស្រឡាញ់មនុស្សលោកដល់ម៉្លេះ បានជាទ្រង់ប្រទានព្រះរាជបុត្រាទ្រង់តែ១ » ( យ៉ូហាន ៣:១៦ ) ។ សាវកមួយរូបទៀតបានសរសេរថា ព្រះ « មិនបានសំចៃទុកនូវព្រះរាជបុត្រាទ្រង់បង្កើត គឺបានបញ្ជូនទៅជំនួសយើងរាល់គ្នា » ( រ៉ូម ៨:៣២ ) ។ សូមគិតមើលចុះថា តើព្រះវរបិតាសួគ៌របស់យើងឈឺចាប់ក្នុងព្រះទ័យខ្លាំងប៉ុណ្ណា ដែលបានបញ្ជូនព្រះរាជបុត្រាតែមួយរបស់ទ្រង់ឲ្យមកស៊ូទ្រាំនឹងការរងទុក្ខដែលពុំអាចយល់បាន សម្រាប់អំពើបាបរបស់យើងនោះ ។ នោះគឺភស្តុតាងដ៏អស្ចារ្យបំផុតនៃសេចក្ដីស្រឡាញ់របស់ទ្រង់ចំពោះពួកយើងម្នាក់ៗ !
( ដាល្លិន អេក អូក « Love and Law » Ensign ឬ Liahona ខែ វិច្ឆិកា ឆ្នាំ ២០០៩ ទំព័រ ២៦ )
-
តើអ្នកបានរៀនអ្វីខ្លះចេញពីសេចក្ដីថ្លែងការណ៍នេះ ?
សូមមើលវីដេអូ « For God So Loved the World » ( ៤:៤៨ ) ដែលមាននៅលើគេហទំព័រ ChurchofJesusChrist.org ហើយរកមើលរបៀបដែលព្រះយេស៊ូវគ្រីស្ទ និងព្រះវរបិតាសួគ៌បានបង្ហាញសេចក្តីស្រឡាញ់ ។
សូមពិចារណាផ្តល់ពេលវេលាឲ្យសិស្សកត់ត្រាគំនិត ឬទីបន្ទាល់របស់ពួកគេអំពីព្រះយេស៊ូវគ្រីស្ទ នៅក្នុងកំណត់ហេតុការសិក្សារបស់ពួកគេ ។ បន្ទាប់ពីពួកគេបានសរសេរចប់ហើយ នោះអ្នកស្ម័គ្រចិត្តពីរបីនាក់អាចឡើងចែកចាយជាមួយសិស្សក្នុងថ្នាក់នូវអ្វីដែលពួកគេបានសរសេរ ។
វិចារណកថា និង ព័ត៌មានសាច់រឿង
តើខ្ញុំអាចទទួលបានអំណាច ដែលព្រះយេស៊ូវគ្រីស្ទប្រទានដល់ខ្ញុំតាមរយៈដង្វាយធួនរបស់ទ្រង់យ៉ាងដូចម្តេច ?
ប្រធាន រ័សុល អិម ណិលសុន បានបង្រៀនដូចខាងក្រោមនេះ អំពីការអញ្ជើញឲ្យមានព្រះចេស្ដារបស់ព្រះយេស៊ូវគ្រីស្ទនៅក្នុងជីវិតរបស់យើង ៖
ក្នុងនាមជាពួកបរិសុទ្ធថ្ងៃចុងក្រោយ យើងសំដៅបេសកកម្មរបស់ទ្រង់ថាជាដង្វាយធួនរបស់ព្រះយេស៊ូវគ្រីស្ទ ដែលបានធ្វើឲ្យការរស់ឡើងវិញក្លាយជាការពិតចំពោះមនុស្សទាំងអស់ ហើយបានធ្វើឲ្យមានជីវិតដ៏នៅអស់កល្បជានិច្ចចំពោះអស់អ្នកដែលប្រែចិត្តពីអំពើបាបរបស់ពួកគេ ហើយទទួលយក និងរក្សាពិធីបរិសុទ្ធ និងសេចក្ដីសញ្ញាសំខាន់ៗទាំងឡាយ ។ …
… សេចក្តីសញ្ញារបស់យើងចងភ្ជាប់យើងទៅនឹងទ្រង់ ហើយប្រទានដល់យើងនូវព្រះចេស្ដារបស់ព្រះ ។ ក្នុងនាមជាសិស្សស្មោះត្រង់ យើងប្រែចិត្ត ហើយដើរតាមទ្រង់ចូលទៅក្នុងទឹកនៃពិធីបុណ្យជ្រមុជទឹក ។ យើងដើរតាមផ្លូវនៃសេចក្ដីសញ្ញាដើម្បីទទួលបានពិធីបរិសុទ្ធសំខាន់ៗដទៃទៀត ។ …
បុរសស្ត្រីដែលរក្សាសេចក្ដីសញ្ញា ព្យាយាមរកវិធីដើម្បីរក្សាខ្លួនពួកគេពុំឲ្យប្រឡាក់ស្នាមពីលោកិយ ដើម្បីកុំឲ្យមានអ្វីមករារាំងពួកគេពីការទទួលបានព្រះចេស្ដារបស់ព្រះអង្គសង្គ្រោះ ។
( រ័សុល អិម ណិលសុន « Drawing the Power of Jesus Christ into Our Lives » Ensign ឬ Liahona ខែ ឧសភា ឆ្នាំ ២០១៧ ទំព័រ ៤០, ៤១ )
តើខ្ញុំអាចដឹងបានយ៉ាងដូចម្តេច ប្រសិនបើព្រះយេស៊ូវគ្រីស្ទ និងព្រះចេស្ដារបស់ទ្រង់កំពុងដំណើរការក្នុងជីវិតខ្ញុំនោះ ?
ប្រធាន ហិនរី ប៊ី អាវរិង នៃគណៈប្រធានទីមួយបានបង្រៀន ៖
« ប្រសិនបើអ្នកទទួលអារម្មណ៍ពីឥទ្ធិពលនៃព្រះវិញ្ញាណបរិសុទ្ធសព្វថ្ងៃនេះ អ្នកអាចយកវាធ្វើជាភស្ដុតាងថា ដង្វាយធួន [ របស់ព្រះយេស៊ូវគ្រីស្ទ ] កំពុងដំណើរការនៅក្នុងជីវិតរបស់អ្នកហើយ ។ ដោយសារហេតុផលនោះ និងអ្វីផ្សេងទៀតជាច្រើន អ្នកអាចធ្វើឲ្យខ្លួនអ្នកស្ថិតនៅក្នុងកន្លែង និងកិច្ចការដែលអញ្ជើញការបំផុសគំនិតពីព្រះវិញ្ញាណបរិសុទ្ធ ។
( ហិនរី ប៊ី អាវរិង « Gifts of the Spirit for Hard Times » Ensign ខែ មិថុនា ឆ្នាំ ២០០៧ ទំព័រ ២៣ )
តើខ្ញុំអាចរៀនបន្ថែមទៀតអំពីដង្វាយធួនរបស់ព្រះយេស៊ូវគ្រីស្ទនៅឯណា ?
សូមពិចារណាធ្វើឲ្យការយល់ដឹងរបស់អ្នកកាន់តែស៊ីជម្រៅអំពីព្រះអង្គសង្គ្រោះ និងដង្វាយធួនរបស់ទ្រង់ ដោយការរកមើលពាក្យ « ធ្វើឲ្យធួន, ដង្វាយធួន » នៅក្នុងសេចក្ដីណែនាំដល់បទគម្ពីរទាំងឡាយ ( នៅលើគេហទំព័រ scriptures.ChurchofJesusChrist.org ) ។ ជំនួយការសិក្សាព្រះគម្ពីរទាំងនេះមាននូវការយល់ដឹងដ៏មានតម្លៃ បទគម្ពីរ សុន្ទរកថា វីដេអូ និងធនធានផ្សេងទៀត ដែលបង្រៀនអំពីដង្វាយធួនរបស់ព្រះអង្គសង្គ្រោះ ។
សកម្មភាពរៀនសូត្របន្ថែម
រៀបចំមេរៀនអ្នកផ្សព្វផ្សាយសាសនាមួយ
សូមអញ្ជើញសិស្សឲ្យស្រមៃថា ពួកគេគឺជាអ្នកផ្សព្វផ្សាយសាសនា ហើយចាំបាច់ត្រូវរៀបចំខ្លួន ដើម្បីបង្រៀននរណាម្នាក់អំពីព្រះយេស៊ូវគ្រីស្ទ និងដង្វាយធួនរបស់ទ្រង់ ។ សូមអញ្ជើញសិស្សឲ្យសិក្សាផ្នែកដែលមានចំណងជើងថា « ដង្វាយធួនរបស់ព្រះយេស៊ូវគ្រីស្ទ » នៅលើទំព័រ ៥១–៥២ នៃ ប្រកាសដំណឹងល្អរបស់យើង ៖ មគ្គុទេសក៍ចំពោះការបម្រើជាអ្នកផ្សព្វផ្សាយសាសនា ( ឆ្នាំ ២០១៩ ) ។ សូមអញ្ជើញសិស្សឲ្យរៀបចំគម្រោងមេរៀនសម្រាប់រយៈពេលពី ៥ ទៅ ១០ នាទី ដោយផ្អែកលើអ្វីដែលពួកគេបានរៀនពីធនធាននោះ ។បន្ទាប់ពីសិស្សបានបញ្ចប់ការរៀបចំគម្រោងមេរៀនរបស់ពួកគេរួចហើយ សូមពិចារណាបំបែកសិស្សក្នុងថ្នាក់ និងអញ្ជើញសិស្សឲ្យប្តូរវេនបង្រៀនមេរៀនរបស់ពួកគេទៅកាន់ដៃគូ ឬក្រុមតូចមួយ ។ ជាជម្រើស អ្នកស្ម័គ្រចិត្តពីរបីនាក់អាចចែករំលែកមេរៀនរបស់ពួកគេជាមួយសិស្សក្នុងថ្នាក់បាន ។
តើសេចក្ដីជំនឿរបស់ខ្ញុំលើព្រះយេស៊ូវគ្រីស្ទ អាចអនុញ្ញាតឲ្យទ្រង់មានឥទ្ធិពលមកលើជីវិតរបស់ខ្ញុំយ៉ាងដូចម្តេច ?
សូមអញ្ជើញសិស្សឲ្យធ្វើកូនសៀវភៅមួយ ដែលរៀបរៀបឡើងដើម្បីជួយមនុស្ស ឲ្យយល់ពីសារៈសំខាន់នៃដង្វាយធួនរបស់ព្រះយេស៊ូវគ្រីស្ទ ។ សូមពិចារណាអញ្ជើញសិស្សឲ្យសិក្សា « The Atonement and the Journey of Mortality » ដោយ អែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់ ( Ensign ខែ មេសា ឆ្នាំ ២០១២ ទំព័រ ៤០–៤៧ ) ដើម្បីជួយពួកគេឲ្យរៀបចំខ្លួនសម្រាប់សកម្មភាពនេះ ។ សិស្សអាចប្រើមាតិកាពីអត្ថបទរបស់អែលឌើរ បែដណា ដើម្បីធ្វើជាចំណងជើង និងខ្លឹមសារសម្រាប់កូនសៀវភៅរបស់ពួកគេ ។
ព្រះយេស៊ូវគ្រីស្ទអាចព្យាបាលអស់អ្នកដែលសម្លឹងមើលទៅទ្រង់
សូមពិចារណាដាក់បង្ហាញរូបភាពខាងក្រោមនេះសម្រាប់សកម្មភាពរៀនសូត្រនេះ ។
ដូចបានកត់ត្រានៅក្នុង យ៉ូហាន ៣:១៤–១៦ ព្រះយេស៊ូវគ្រីស្ទបានប្រៀបធៀបការឆ្កាងដែលជិតមកដល់របស់ទ្រង់ ទៅនឹងពេលដែលម៉ូសេបានលើកពស់លង្ហិនឡើងនៅទីរហោស្ថាន ។ សូមអញ្ជើញសិស្សឲ្យសិក្សា យ៉ូហាន ៣:១៤–១៦ , នីហ្វៃទី១ ១៧:៤០–៤១ និង អាលម៉ា ៣៣:១៨–២២ ដោយស្វែងរករបៀបដែលព្រឹត្តិការណ៍នេះនៅសម័យលោកម៉ូសេ ទាក់ទងនឹងការឆ្កាង និងដង្វាយធួនរបស់ព្រះយេស៊ូវគ្រីស្ទ ។