យ៉ូហាន ៤ ផ្នែកទី ១
ស្ត្រីនៅមាត់អណ្តូងទឹក
នៅតាមផ្លូវដែលទ្រង់យាងទៅស្រុកកាលីឡេ ព្រះយេស៊ូវបានបង្រៀនស្ដ្រីសាសន៍សាម៉ារីម្នាក់នៅមាត់អណ្ដូងទឹកមួយអំពី « ទឹករស់ » ដែលទ្រង់ប្រទាន ។ នាងបានដឹងដោយខ្លួនឯងថា ព្រះយេស៊ូវគឺជាព្រះគ្រីស្ទ ។ មេរៀននេះមានគោលបំណងជួយអ្នកឲ្យស្គាល់ពីតម្រូវការរបស់អ្នកដើម្បីមានព្រះអង្គសង្គ្រោះ និងទទួលអារម្មណ៍ពីសេចក្តីស្រឡាញ់របស់ទ្រង់ចំពោះអ្នក ។
សូមសួរសំណួរតាមដាន ។ ការសួរសំណួរតាមដានអនុញ្ញាតឲ្យសិស្សបង្ហាញពីអ្វីដែលពួកគេបានរៀន ធ្វើឲ្យការយល់ដឹងរបស់ពួកគេអំពីសេចក្ដីពិតនៃដំណឹងល្អកាន់តែស៊ីជម្រៅ ហើយគិតអំពីរបៀបដែលសេចក្ដីពិតទាំងនោះទាក់ទងនឹងជីវិតរបស់ពួកគេ ។ សូមប្រយ័ត្នកុំប្រញាប់អានបញ្ចប់បញ្ជីសំណួរតាមដានដ៏វែងនេះឡើយ ។ ជាធម្មតា វាប្រសើរជាងដើម្បីសួរពីរបីសំណួរ ហើយឲ្យពេលសិស្សឆ្លើយតបដោយបានគិតពិចារណានោះ ។
ការរៀបចំរបស់សិស្ស ៖ សូមដឹកនាំសិស្សទៅកាន់សកម្មភាពនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ សម្រាប់ យ៉ូហាន ២–៤ ដែលអញ្ជើញពួកគេឲ្យស្វែងរករបស់របរប្រើប្រាស់ប្រចាំថ្ងៃនៅក្នុងផ្ទះ ដែលអាចត្រូវបានប្រើដើម្បីបង្រៀនសេចក្ដីពិតខាងវិញ្ញាណ ។ សូមអញ្ជើញសិស្សឲ្យយករបស់របរដែលពួកគេរកឃើញទៅកាន់ថ្នាក់រៀន បើអាចធ្វើបាន ហើយរៀបចំពន្យល់ពីសេចក្ដីពិតខាងវិញ្ញាណ ដែលអាចត្រូវបានបង្រៀនដោយការប្រើរបស់របរទាំងនោះ ។
សកម្មភាពរៀនសូត្រដែលអាចមាន
ការរៀនសូត្រអំពីព្រះយេស៊ូវគ្រីស្ទ
ប្រសិនបើសិស្សបានយករបស់របរពីសកម្មភាពរៀបចំរបស់សិស្ស នោះសូមពិចារណាអញ្ជើញពួកគេឲ្យចែករំលែក មុនពេលពិនិត្យមើលរូបភាពទាំងឡាយខាងក្រោម ។
នៅក្នុងការសិក្សាព្រះគម្ពីររបស់អ្នក អ្នកប្រហែលជាបានដឹងហើយថា ជារឿយៗព្រះអង្គសង្រ្គោះបានបង្រៀនសេចក្ដីពិតខាងវិញ្ញាណ ដោយប្រើបទពិសោធន៍ និងវត្ថុដែលមនុស្សធ្លាប់ស្គាល់ ។ សូមពិនិត្យមើលរូបភាពខាងក្រោម ហើយពិចារណាអំពីសេចក្ដីពិតខាងវិញ្ញាណ ដែលយើងអាចរៀនសូត្រអំពីព្រះអង្គសង្គ្រោះ តាមរយៈការប្រៀបធៀបទឹកទៅនឹងទ្រង់ ។
-
តើអ្នកគិតថា ទឹកអាចទាក់ទងនឹងព្រះយេស៊ូវគ្រីស្ទយ៉ាងដូចម្ដេច ហើយទឹកបង្រៀនអ្នកអ្វីខ្លះអំពីព្រះយេស៊ូវគ្រីស្ទ ?
បើចាំបាច់ សូមពិចារណាសួរសិស្សនូវសំណួរ ដែលអាចជួយពួកគេឲ្យធ្វើការប្រៀបធៀបរវាងទឹក និងព្រះយេស៊ូវគ្រីស្ទដូចជាសំណួរ « ហេតុអ្វីបានជាទាំងទឹក និងព្រះយេស៊ូវគ្រីស្ទមានសារៈសំខាន់ ? » « តើយើងត្រូវការទឹក និងព្រះយេស៊ូវគ្រីស្ទញឹកញាប់ប៉ុណ្ណា ? » « តើអ្វីដែលអ្នកធ្លាប់ស្រេកជាងគេបំផុត ? តើនៅពេលណាជាពេលដែលអ្នកត្រូវការព្រះយេស៊ូវគ្រីស្ទខ្លាំងបំផុត ? »
សូមសញ្ជឹងគិតពីសំណួរខាងក្រោមនេះ ដើម្បីពិចារណាពីតម្រូវការរបស់អ្នកដើម្បីមានព្រះយេស៊ូវគ្រីស្ទ ។
-
តើអ្នកមានអារម្មណ៍ថាត្រូវការព្រះយេស៊ូវគ្រីស្ទខ្លាំងដូចជាអ្នកត្រូវការទឹកក្នុងជីវិតអ្នក ឬត្រូវការព្រះយេស៊ូវគ្រីស្ទខ្លាំងជាងត្រូវការទឹក ? ហេតុអ្វីត្រូវការ ឬហេតុអ្វីមិនត្រូវការ ?
នៅក្នុងមេរៀននេះ អ្នកនឹងសិក្សាពីដំណើររឿងមួយ ដែលព្រះអង្គសង្គ្រោះបានជួយស្ត្រីម្នាក់ឲ្យយល់ថា តម្រូវការខាងវិញ្ញាណរបស់នាងដើម្បីមានព្រះអង្គសង្គ្រោះ គឺធំជាងតម្រូវការខាងរាងកាយរបស់នាងដើម្បីមានទឹក ដែលនាងបានមកយកទៅទៀត ។ នៅពេលអ្នកសិក្សា សូមយកចិត្តទុកដាក់លើការបំផុសគំនិតពីព្រះវិញ្ញាណ ដែលជួយអ្នកឲ្យស្គាល់ពីតម្រូវការរបស់អ្នកដើម្បីមានព្រះអង្គសង្គ្រោះ និងព្រះហឫទ័យរបស់ទ្រង់ ដែលចង់ឲ្យអ្នកទទួលបានពរជ័យ ដែលមានតែព្រះអង្គប៉ុណ្ណោះដែលអាចប្រទានឲ្យបាន ។
ស្ត្រីនៅមាត់អណ្ដូងទឹក
ពេលកំពុងធ្វើដំណើរពីស្រុកយូដាទៅស្រុកកាលីឡេ ព្រះយេស៊ូវបានឆ្លងកាត់ស្រុកសាម៉ារី ( សូមមើល យ៉ូហាន ៤:៣–៤ ) ។ ប្រសិនបើអ្នកមានសិទ្ធិចូលប្រើការបោះពុម្ពផ្សាយព្រះគម្ពីរប៊ីបស្ដេចជេមស៍របស់ពួកបរិសុទ្ធថ្ងៃចុងក្រោយ នោះវាអាចមានគុណប្រយោជន៍ដើម្បីរកមើលទីតាំងទាំងនេះដោយប្រើផែនទី ទី១ « ផែនទីខាងភូមិសាស្ត្ររូបនិយមអំពីដែនដីបរិសុទ្ធ » នៅក្នុងផ្នែកផែនទីអំពីព្រះគម្ពីរប៊ីប នៅក្នុងព្រះគម្ពីររបស់អ្នក ។
នៅជំនាន់របស់ព្រះអង្គសង្រ្គោះ ពួកសាសន៍យូដាដែលធ្វើដំណើររវាងស្រុកយូដា និងស្រុកកាលីឡេច្រើនតែធ្វើដំណើរផ្លូវឆ្ងាយ ដើម្បីចៀសវាងឆ្លងកាត់ស្រុកសាម៉ារី ដោយសារតែការស្អប់ដែលកើតមានរវាងពួកសាសន៍យូដា និងពួកសាសន៍សាម៉ារី ។ ព្រះយេស៊ូវទំនងជានឿយហត់ និងស្រេកទឹកពេលទ្រង់ធ្វើដំណើរ កាលទ្រង់គង់នៅអណ្តូងមួយនៅពេលថ្ងៃក្តៅ ( សូមមើល យ៉ូហាន ៤:៦ ) ។ នៅពេលដែលទ្រង់គង់នៅទីនោះ មានស្ត្រីសាសន៍សាម៉ារីម្នាក់ក៏បានមកដងទឹកដែរ ។
សូមពិចារណាបង្ហាញរូបភាពស្ត្រីនៅមាត់អណ្តូងទឹកនៅដើមមេរៀន ។ សិស្សប្រហែលជាបានសិក្សាពីដំណើររឿងនេះរួចហើយ ដែលជាផ្នែកមួយនៃការសិក្សាដំណឹងល្អរបស់ពួកគេសម្រាប់ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ សូមផ្តល់ឱកាសឲ្យពួកគេចែករំលែកអ្វីដែលពួកគេបានរៀន មុននឹងបង្រៀនមាតិកាដូចខាងក្រោម ។
សូមសិក្សាការបង្រៀនរបស់ព្រះយេស៊ូវទៅកាន់ស្ត្រីសាសន៍សាម៉ារីនៅក្នុង យ៉ូហាន ៤:៥–១៤ ដោយរកមើលអ្វីដែលអ្នកបានរៀនអំពីព្រះអង្គសង្គ្រោះ ។ អ្នកក៏អាចចង់មើលវីដេអូ « Jesus Teaches a Samaritan Woman » ដែលមាននៅលើគេហទំព័រ ChurchofJesusChrist.org ចាប់ពីលេខកូដលេខ ០:០០ រហូតដល់លេខកូដម៉ោង ២:០១ អំឡុងពេលផ្ទៀងតាមនៅក្នុងព្រះគម្ពីររបស់អ្នកផងដែរ ។
-
តើអ្នកនឹងពិពណ៌នាពីរបៀបដែលស្ត្រីរូបនោះបានប្រព្រឹត្តចំពោះព្រះអង្គសង្គ្រោះនៅក្នុងខគម្ពីរទាំងនេះយ៉ាងដូចម្ដេច ? តើអ្នកគិតថា ហេតុអ្វីបានជានាងប្រព្រឹត្តតាមរបៀបនេះទៅវិញ ?
-
តើអ្នកគិតថា ព្រះយេស៊ូវកំពុងតែបង្រៀនអ្វី នៅពេលដែលទ្រង់មានបន្ទូលថា ទ្រង់អាចប្រទានទឹករស់ដល់ស្ត្រីរូបនេះ ?
បើចាំបាច់ សូមពន្យល់ថា ទឹករស់តំណាងឲ្យព្រះយេស៊ូវគ្រីស្ទ និងដំណឹងល្អរបស់ទ្រង់ ។ ប្រធានបទទឹករស់នឹងត្រូវបានស្វែងយល់កាន់តែស៊ីជម្រៅនៅក្នុងមេរៀនបន្ទាប់ ។
សូមអាន យ៉ូហាន ៤:១៥–២៦ ដោយស្វែងរកសេចក្តីស្រឡាញ់ និងសេចក្តីមេត្តាដែលព្រះយេស៊ូវបានបង្ហាញចំពោះស្ត្រីរូបនេះ នៅពេលដែលការប្រាស្រ័យទាក់ទងរបស់ទ្រង់ និងនាងបានបន្ត ។ សូមគិតអំពីរបៀបដែលការបង្រៀនរបស់ព្រះអង្គសង្គ្រោះទាក់ទងនឹងអ្នក ។ អ្នកក៏អាចចង់មើលវីដេអូ « Jesus Teaches a Samaritan Woman » ពីលេខកូដម៉ោង ២:០២ ដល់ ៤:១១ ផងដែរ អំឡុងពេលផ្ទៀងតាមនៅក្នុងព្រះគម្ពីររបស់អ្នក ។
-
តើអ្នកគិតថា ព្រះអង្គសង្គ្រោះបានជួយស្ត្រីនោះឲ្យដឹងថា នាងត្រូវការទឹករស់ដែលទ្រង់បានប្រទានឲ្យនោះដោយរបៀបណា ?
វាអាចមានគុណប្រយោជន៍ក្នុងការចង្អុលបង្ហាញថា ព្រះអង្គសង្គ្រោះបានជ្រាបពីអំពើបាបរបស់ស្ត្រីរូបនេះ ប៉ុន្តែមិនបានមើលងាយនាងដោយសារតែអំពើបាបទាំងនោះទេ ។ ទ្រង់ក៏បានជួយនាងឲ្យយល់ពីលក្ខណៈពិតនៃការថ្វាយបង្គំ ហើយថាអ្នកទាំងអស់ណាដែលថ្វាយបង្គំព្រះដោយវិញ្ញាណ និងសេចក្តីពិតត្រូវបានទទួលយកដោយទ្រង់ មិនថាពួកគេមានពូជសាសន៍ ឬវប្បធម៌ណាក៏ដោយ ។
-
តើអ្នកអាចរៀនអ្វីខ្លះ មកពីព្រះទ័យរបស់ព្រះអង្គសង្គ្រោះដែលចង់ជួយដល់ស្ត្រីម្នាក់នេះ ទោះបីនាងមានភាពមិនល្អឥតខ្ចោះក៏ដោយ ?
-
តើដំណើររឿងនេះជួយយើងឲ្យយល់ពីទឹកព្រះទ័យរបស់ព្រះអង្គសង្គ្រោះចំពោះយើងម្នាក់ៗយ៉ាងដូចម្តេច—ទោះបីជាយើងផ្ទាល់មិនល្អឥតខ្ចោះក្ដី ?
សូមអាន យ៉ូហាន ៤:២៨–៣០ ដោយស្វែងរករបៀបដែលស្ត្រីសាសន៍សាម៉ារីបានឆ្លើយតប បន្ទាប់ពីព្រះយេស៊ូវបានមានបន្ទូលទៅនាងថា ទ្រង់ជាព្រះមែស៊ី ។សូមប្រៀបធៀបអ្វីដែលអ្នកទើបតែបានអាន ជាមួយនឹងរបៀបដែលស្ត្រីរូបនេះបានឆ្លើយតបដំបូងចំពោះព្រះយេស៊ូវ នៅពេលទ្រង់ និងនាងបានចាប់ផ្តើមការសន្ទនានោះ ។
-
តើអ្នកគិតយ៉ាងណា អំពីការប្រាស្រ័យទាក់ទងរបស់នាងជាមួយព្រះយេស៊ូវ ដែលបានបណ្តាលឲ្យនាងផ្លាស់ប្តូរ ?
-
តើព្រះយេស៊ូវគ្រីស្ទបានផ្លាស់ប្តូរ ឬមានឥទ្ធិពលលើរបៀបដែលអ្នកគិតយ៉ាងដូចម្តេច ?
-
តើអ្នកអាចជ្រើសយកជម្រើសអ្វីខ្លះនៅថ្ងៃនេះ ដើម្បីជួយអ្នកឲ្យខិតចូលទៅកាន់តែជិតព្រះយេស៊ូវគ្រីស្ទ ?
អែលឌើរ រ៉ូប៊ើត ស៊ី ហ្គេ នៃគណៈប្រធានពួកចិតសិបនាក់ បានចែករំលែកពីសេចក្ដីពិតមួយចំនួនដែលយើងអាចរៀនពីដំណើររឿងនេះបាន ។ អ្នកអាចចង់មើលវីដេអូ « Taking upon Ourselves the Name of Jesus Christ » ពីលេខកូដម៉ោង ៧:៤១ ដល់ ៩:២៣ ។ វីដេអូនេះអាចរកឃើញនៅលើគេហទំព័រ ChurchofJesusChrist.org ។
ខគម្ពីរមួយដែលខ្ញុំពេញចិត្តគឺ យ៉ូហាន ៤:៤ ដែលចែងថា « ហើយទ្រង់ត្រូវតែយាងកាត់ស្រុកសាម៉ារី » ។
ហេតុអ្វីខ្ញុំចូលចិត្តខគម្ពីរនេះ ? ដោយសារព្រះយេស៊ូវពុំ ត្រូវ យាងកាត់ស្រុកសាម៉ារីឡើយ ។ ពួកសាសន៍យូដានៅជំនាន់ទ្រង់ស្អប់សាសន៍សាម៉ារីណាស់ ហើយបានធ្វើដំណើរវាងចេញពីស្រុកសាម៉ារី ។ ប៉ុន្តែព្រះយេស៊ូវបានរើសទៅទីនោះវិញដើម្បីប្រកាសដល់ពិភពលោកទាំងមូលជាលើកដំបូងថា ទ្រង់គឺជាព្រះមែស៊ីដែលបានសន្យាថានឹងយាងមក ។ សម្រាប់សារលិខិតនេះ ទ្រង់ពុំគ្រាន់តែរើសយកក្រុមមនុស្សដែលគេបោះបង់ចោលប៉ុណ្ណោះទេ តែជាតែស្ត្រីម្នាក់ផងដែរ—ហើយពុំមែនគ្រាន់តែជាស្ត្រីធម្មតាទេ តែជាស្ត្រីដែលរស់នៅក្នុងអំពើបាបផង—នៅគ្រានោះមនុស្សបានចាត់ទុកស្ត្រីថា តូចទាបបំផុត ។ ខ្ញុំជឿថា ព្រះយេស៊ូវបានធ្វើបែបនេះ ដើម្បីឲ្យពួកយើងម្នាក់ៗអាចយល់ជានិច្ចថា សេចក្ដីស្រឡាញ់របស់ទ្រង់គឺធំជាងសេចក្តីខ្លាច របួស ការញៀន មន្ទិលសង្ស័យ ការល្បួង អំពើបាប គ្រួសារបែកបាក់ ការបាក់ទឹកចិត្ត និងការថប់បារម្ភរបស់យើង ជំងឺរាំរ៉ៃ ភាពក្រីក្រ ការរំលោភបំពាន អស់សង្ឃឹម និងភាពឯកោរបស់យើង ។ ទ្រង់សព្វព្រះទ័យឲ្យមនុស្សទាំងអស់ដឹងថា គ្មានអ្វី ហើយគ្មាននរណាម្នាក់ដែលទ្រង់ពុំអាចព្យាបាល និងរំដោះឲ្យទៅកាន់អំណរដ៏អស់កល្បជានិច្ចឡើយ ។
ព្រះគុណរបស់ទ្រង់គឺមានល្មមគ្រប់គ្រាន់ ។ ទ្រង់តែអង្គឯងបានយាងចុះមកក្រោមអ្វីៗទាំងអស់ ។ អំណាចនៃដង្វាយធួនរបស់ទ្រង់គឺជាអំណាចដើម្បីយកឈ្នះលើបន្ទុកនានានៅក្នុងជីវិតយើង ។ សារលិខិតអំពីស្ត្រីនៅឯអណ្តូងទឹកគឺថា ទ្រង់ជ្រាបពីស្ថានភាពនៃជីវិតយើង ហើយថា យើងអាចដើរជាមួយទ្រង់ជានិច្ច មិនថាយើងឈរនៅកន្លែងណានោះទេ ។ ទៅកាន់ស្ត្រីនោះ និងពួកយើងម្នាក់ៗ ទ្រង់មានបន្ទូលថា « អ្នកណាដែលផឹកទឹកខ្ញុំឲ្យ នោះនឹងមិនស្រេកទៀតឡើយ ទឹកដែលខ្ញុំឲ្យ [ នឹងត្រឡប់ ] ជារន្ធទឹកនៅក្នុងអ្នកនោះដែលផុសឡើងដល់ទៅបានជីវិតដ៏នៅអស់កល្បជានិច្ច » [ យ៉ូហាន ៤:១៤ ] ។
( រ៉ូប៊ើត ស៊ី ហ្គេ « Taking upon Ourselves the Name of Jesus Christ » Ensign ឬ Liahona ខែ វិច្ឆិកា ឆ្នាំ ២០១៨ ទំព័រ ៩៩ )
សូមពិចារណាអញ្ជើញសិស្សឲ្យឆ្លើយសំណួរខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ។ វាអាចមានអត្ថប្រយោជន៍ក្នុងការពិភាក្សាអំពីចម្លើយរបស់សិស្សជាមួយសិស្សក្នុងថ្នាក់ នៅពេលពួកគេឆ្លើយសំណួររួចហើយ ។
-
តើអ្នកបានរៀន ឬទទួលអារម្មណ៍អ្វីខ្លះអំពីព្រះយេស៊ូវគ្រីស្ទនៅក្នុងមេរៀននេះ ?
-
តើសកម្មភាពអ្វីខ្លះដែលអ្នកទទួលអារម្មណ៍បំផុសឲ្យធ្វើ កាលអ្នកបានសិក្សាថ្ងៃនេះ ?
វិចារណកថា និង ព័ត៌មានសាច់រឿង
យ៉ូហាន ៤:៤
។; ហេតុអ្វីវាសំខាន់ដែលព្រះយេស៊ូវត្រូវធ្វើដំណើរឆ្លងកាត់ស្រុកសាម៉ារី ?
ជាទូទៅ ពួកសាសន៍យូដាធ្វើដំណើរវាងស្រុកសាម៉ារី ជាជាងធ្វើដំណើរឆ្លងកាត់ស្រុកនោះ ដោយសារភាពជាសត្រូវដែលមានរវាងសាសន៍យូដា និងសាសន៍សាម៉ារី ។ ភាពស្អប់ខ្ពើមដ៏ខ្លាំងបានកើតឡើងរវាងពួកសាសន៍យូដា និងសាសន៍សាម៉ារី « ពីព្រោះពួកសាសន៍សាម៉ារីបានក្បត់សាសនាពីសាសនារបស់ពួកសាសន៍អ៊ីស្រាអែល » ( សេចក្ដីណែនាំដល់បទគម្ពីរទាំងឡាយ « សាម៉ារី » នៅលើគេហទំព័រ scriptures.ChurchofJesusChrist.org ) ។ ទោះយ៉ាងណា យ៉ូហានបានកត់សម្គាល់ថា ព្រះយេស៊ូវគ្រីស្ទ « ត្រូវតែយាងកាត់ស្រុកសាម៉ារី » ( យ៉ូហាន ៤:៤ ) ដោយគូសបញ្ជាក់យ៉ាងច្បាស់ពីព្រះរាជបំណងរបស់ព្រះអង្គសង្គ្រោះចំពោះកិច្ចការ ដែលទ្រង់នឹងធ្វើនៅទីនោះ ។
យ៉ូហាន ៤:២៤
។; តើព្រះទ្រង់ជាវិញ្ញាណឬ ?
មនុស្សមួយចំនួនអាចនឹងភាន់ច្រឡំដោយសេចក្ដីថ្លែងរបស់ព្រះយេស៊ូវនៅក្នុង យ៉ូហាន ៤:២៤ ថាព្រះគឺជាវិញ្ញាណ ។ ការបកប្រែដោយ យ៉ូសែប ស៊្មីធ នៃខគម្ពីរនេះផ្តល់នូវការបញ្ជាក់ដ៏សំខាន់មួយ ៖ « ចំពោះ [ អ្នកជឿពិត ] ព្រះបានសន្យាថានឹងប្រទានព្រះវិញ្ញាណរបស់ទ្រង់ » ( ការបកប្រែដោយ យ៉ូសែប ស៊្មីធ យ៉ូហាន ៤:២៦ [ នៅក្នុង យ៉ូហាន ៤:២៤ ] ) ។ វិវរណៈសម័យទំនើបក៏បង្រៀនផងដែរថា ព្រះមានព្រះកាយជាសាច់ និងឆ្អឹង ( សូមមើល គោលលទ្ធិ និង សេចក្ដីសញ្ញា ១៣០:២២–២៣ ; សូមមើលផងដែរ លោកុប្បត្តិ ៥:១–៣ ; ហេព្រើរ ១:១–៣) ។
តើការប្រាស្រ័យទាក់ទងរបស់នាងជាមួយនឹងព្រះយេស៊ូវគ្រីស្ទមានឥទ្ធិពលយ៉ាងណា ទៅលើស្ត្រីនៅឯអណ្តូងនោះ ?
ប្រធាន បូនី អេច ខ័រឌុន ប្រធានយុវនារីទូទៅបានបង្រៀន ៖
ព្រះគ្រីស្ទមានព្រះទ័យអាណិតអាសូរចំពោះ [ ស្ត្រីនៅមាត់អណ្តូង ] និងសេចក្តីត្រូវការរបស់នាង ។ ទ្រង់បានជួបស្រ្តីដែលនាងបានចាប់ផ្ដើមដោយការនិយាយអំពីអ្វីមួយដែលស្រដៀងគ្នានឹងទឹក ។ ប្រសិនបើទ្រង់ឈប់ជជែកត្រង់នោះ វានឹងជាការជួបដ៏វិជ្ជមានមួយ ។ ប៉ុន្ដែវានឹងមិនមានលទ្ធផលឲ្យនាងទៅក្រុងដើម្បីប្រកាសថា « ចូរមកមើល … តើអ្នកនោះមិនមែនជាព្រះគ្រីស្ទទេឬអី ? » [ យ៉ូហាន ៤:២៩ ] ។ តាមរយៈការសន្ទនានោះ នាងបានស្គាល់ព្រះយេស៊ូវគ្រីស្ទបន្ដិចម្ដងៗ ហើយមិនថាអតីតកាលនាងយ៉ាងណាទេ នាងបានក្លាយជាឧបករណ៍នៃពន្លឺ ដែលបញ្ចាំងផ្លូវឲ្យមនុស្សដទៃមើលឃើញផ្លូវ ។
( បូនី អេច ខ័រឌុន « That They May See » Ensign ឬ Liahona ខែ ឧសភា ឆ្នាំ ២០២០ ទំព័រ ៧៩ )
សកម្មភាពរៀនសូត្របន្ថែម
ទស្សនវិស័យដែលបានផ្លាស់ប្តូររបស់ស្ត្រីរូបនោះ
សូមអញ្ជើញសិស្សឲ្យកត់សម្គាល់ពាក្យ ដែលស្ត្រីសាសន៍សាម៉ារីបានប្រើដើម្បីសំដៅទៅលើព្រះអង្គសង្គ្រោះនៅក្នុង យ៉ូហាន ៤:៩, ១១, ១៩, ២៩ ។ ដោយផ្អែកលើពាក្យទាំងនេះ សូមពិភាក្សាអំពីរបៀបដែលការយល់ដឹងរបស់ស្ត្រីរូបនោះអំពីទ្រង់បានផ្លាស់ប្តូរ ។
។; « ឯអាហារខ្ញុំ គឺត្រង់ដែលខ្ញុំធ្វើតាមព្រះហឫទ័យនៃព្រះ ដែលចាត់ឲ្យខ្ញុំមក »
ពួកសាវកបាននៅក្នុងទីក្រុងទិញអាហារក្នុងអំឡុងពេលប្រាស្រ័យទាក់ទងរបស់ព្រះអង្គសង្រ្គោះជាមួយស្ត្រីនៅឯមាត់អណ្តូង ។ នៅពេលពួកគេត្រឡប់មកវិញ នោះពួកគេបានថ្វាយអាហារខ្លះដល់ព្រះយេស៊ូវ ( សូមមើល យ៉ូហាន ៤:៣១ ) ។សូមឲ្យសិស្សអាន យ៉ូហាន ៤:៣២–៣៤ ដោយរកមើលពីអ្វីដែលព្រះអង្គសង្រ្កោះបានផ្ដោតលើ ជំនួសឲ្យការសោយអាហារនោះ ។ សូមពិចារណាពិភាក្សាអំពីអ្វីដែលខគម្ពីរទាំងនេះបង្រៀនអំពីព្រះយេស៊ូវគ្រីស្ទ សេចក្ដីស្រឡាញ់របស់ទ្រង់ចំពោះបុត្រាបុត្រីរបស់ព្រះវរបិតាសួគ៌ទាំងអស់ និងការផ្តោតព្រះទ័យរបស់ទ្រង់លើការជួយយើងម្នាក់ៗឲ្យរីកចម្រើន ។
។; វាលស្រែ « បានក្រហមល្មមច្រូតហើយ »
គំរូរបស់ស្ត្រីសាសន៍សាម៉ារីនៅក្នុង យ៉ូហាន ៤:២៨–២៩, ៣៩–៤២ និងព្រះបន្ទូលរបស់ព្រះយេស៊ូវគ្រីស្ទនៅក្នុង យ៉ូហាន ៤:៣៥ អាចត្រូវបានប្រើ ដើម្បីដឹកនាំការពិភាក្សាអំពីការចែករំលែកដំណឹងល្អបាន ។សូមពិចារណាបង្ហាញរូបភាពស្រូវសាលី ដែលអាចច្រូតកាត់បាន ហើយពន្យល់ថា នៅពេលគ្រាប់ធញ្ញជាតិទុំអាចច្រូតកាត់បាន នោះវាច្រើនតែត្រូវបានគេពិពណ៌នាថា « ក្រហម » ។ សំណួរខាងក្រោមនេះអាចត្រូវបានប្រើជាផ្នែកមួយនៃការពិភាក្សា ៖
-
តើអ្នកគិតថា អ្វីទៅដែលធ្វើឲ្យស្ត្រីម្នាក់នេះមានចិត្តអន្ទះសាយ៉ាងខ្លាំងចង់ចែករំលែកទីបន្ទាល់របស់គាត់ជាមួយអ្នកដទៃ ? តើអ្នកអាចធ្វើតាមគំរូរបស់នាងបានយ៉ាងដូចម្ដេច ?
-
តើអ្នកគិតថា តើព្រះអង្គសង្គ្រោះកំពុងតែបង្រៀនពួកសាវករបស់ទ្រង់អំពីអ្វី នៅពេលដែលទ្រង់មានបន្ទូលថា ស្រែ « បានក្រហមល្មមច្រូតហើយ » ? ( យ៉ូហាន ៤:៣៥ ) ។
-
តើវាលស្រែជុំវិញអ្នកក្រហមល្មមច្រូតយ៉ាងដូចម្តេច ?