The angel Gabriel (Noah) appearing to Mary and declaring to her that she would become the mother of Jesus Christ. Mary is depicted seated on a round stone ledge. The ledge borders a tree and flowers. The angel Gabriel is depicted wearing white robes. A stone wall and stairways are in the background. There are flowers in the foreground. Luke 1:26-38
Miadto si anghel Gabriel kang Maria aron ipahibalo ang paghimugso ni Jesukristo. Gipamatud-an niya nga “alang sa Dios walay dili mahimo” (Lucas 1:37). Ang matinuohong tubag ni Maria makatabang kanimo nga makat-on kon unsaon pagtubag ngadto sa kabubut-on sa Ginoo uban sa mas dakong pagsalig diha Kaniya.
Pagdapit sa mga estudyante nga molihok. Makakat-on ang mga estudyante samtang aktibo silang mosalmot sa proseso sa pagkat-on ug pagsunod sa ebanghelyo. Samtang nagtudlo ka, pangita og mga paagi aron makasalmot ang mga estudyante diha sa kasinatian sa pagkat-on. Samtang molihok sila diha sa hugot nga pagtuo, ang mga estudyante mahimong mas makabig ngadto sa Manluluwas ug sa Iyang ebanghelyo.
Pag-andam sa estudyante: Dapita ang mga estudyante sa pagpamalandong sa mosunod nga pangutana:
Unsa ang imong nahibaloan mahitungod sa Langitnong Amahan ug ni Jesukristo nga nakatabang kanimo sa paghatag sa imong pagsalig diha Kanila?
Posible nga mga Kalihokan sa Pagkat-on
Dapita ang mga estudyante sa pagtubag sa mosunod nga pangutana. Ikonsiderar ang pagdapit sa mga estudyante nga isulat diha sa pisara ang ilang mga tubag.
Kinsa ang imong masulti nga pinakamaimpluwensya nga mga babaye sa imong kinabuhi?
Pagpakita og hulagway ni Maria, sama sa anaa sa sinugdanan sa leksiyon.
Niini nga leksiyon, makakat-on ka og dugang mahitungod kang Maria, ang inahan ni Jesukristo.
Sa imong hunahuna, nganong ikonsiderar man si Maria nga usa sa mga pinakadako og impluwensya nga babaye sa kasaysayan sa kalibotan?
Gitagna ang kinabuhi ug misyon ni Maria sa daghang mga tuig sa wala pa siya nahimugso. Tun-i ang mosunod nga mga propesiya mahitungod kang Maria, nga mangita kon unsa ang gitudlo niini kanimo mahitungod kaniya.
Unsa man ang imong nakat-onan mahitungod kang Maria gikan niini nga mga kasulatan?
Pasiuna sa Ebanghelyo ni Lucas
Ang asoy ni Maria sa pagkahibalo nga siya ang mahimong inahan ni Jesukristo nakarekord sa Ebanghelyo ni Lucas.
Ipaila-ila sa mga estudyante ang Ebanghelyo ni Lucas. Ang usa ka paagi sa pagbuhat niini mao ang pagsumada sa mosunod nga parapo.
Mahimong makatabang usab kon ipaambit ang pipila sa impormasyon sa “Komentaryo ug Background nga Impormasyon” nga seksiyon sa ubos sa ulohan nga “Nganong tun-an man ang Ebanghelyo ni Lucas?”
Si Lucas usa ka mananambal (tan-awa sa Mga Taga-Colosas 4:14) ug “usa ka mensahero ni Jesukristo” ( Hubad ni Joseph Smith, Lucas 1:1 [sa Lucas 1:1, footnote a]). Daghang mga panghitabo gikan sa kinabuhi sa Manluluwas ang makita lamang sa Ebanghelyo ni Lucas, lakip ang pagpahibalo sa anghel kang Maria nga siya ang mahimong inahan sa Anak sa Dios. Kini nga panghitabo nailhan nga Anunsiyasyon.
Samtang nagtuon ka niini nga asoy ug sa matinud-anong ehemplo ni Maria, hatagi og pagtagad ang unsay imong nakat-onan ug ang mga espirituhanong pag-aghat nga imong nadawat.
Si anghel Gabriel nagpakita ni Maria
Basaha ang Lucas 1:26–37 , nga mangita sa mga detalye mahitungod sa pagpahibalo sa anghel ngadto kang Maria.
Mahimo usab nimong tan-awon ang video nga “An Angel Foretells Christ’s Birth to Mary” (4:07), nga makita sa ChurchofJesusChrist.org, samtang nagsunod ka sa imong mga kasulatan.
Unsa nga mga detalye gikan sa pagpahibalo ang nakadani kanimo?
Unsa ang imong mga pangutana mahitungod sa imong gibasa?
Ang usa ka kamatuoran nga mahimo nimong namatikdan gikan niini nga asoy mao ang alang sa Dios walay dili mahimo.Si Presidente Russell M. Nelson nagpaambit og usa sa mga paagi nga magamit nimo kini nga kamatuoran:
Imahe
Official portrait of President Russell M. Nelson taken January 2018
Kamo hangyoon sa pagdawat og mga mahagitong buluhaton ug mahimong instrumento sa mga kamot sa Ginoo. Ug Siya makapahimo kaninyo nga makakab-ot sa imposible.
(Russell M. Nelson, “Pagkahimo nga Tinuod nga mga Milenyal” [tibuok kalibotan nga debosyonal para sa mga young adult, Ene. 10, 2016], broadcasts.ChurchofJesusChrist.org.)
Ikonsiderar ang pagsulat diha sa pisara sa mga tubag sa mga estudyante sa una sa mosunod nga mga pangutana. Kon gikinahanglan, tabangi sila sa paghunahuna og daghang lain-laing paagi sa pagtubag niini nga pangutana, lakip ang pagbuntog sa dili maayong mga pamatasan o mga sala, pagkamabination, pagpaambit sa ebanghelyo sa uban, pagtuman sa mga responsibilidad sa Simbahan, pag-alagad sa usa ka misyon, ug uban pang mga paagi.
Unsa kaha ang gihangyo sa Ginoo nga ipabuhat kanimo nga morag imposible?
Ngano kaha nga kining mga butanga usahay morag imposibleng makab-ot?
Usahay kon mag-atubang kita og mga buluhaton nga morag imposibleng makab-ot, mahimong makatabang ang pagtan-aw sa mga ehemplo sa uban nga matinud-anong misanong sa ilang kaugalingong lisod nga sitwasyon.
Basaha ang Lucas 1:38 , ug pangitaa kon giunsa pagsanong ni Maria pagkahuman nga makahibalo nga siya ang mahimong inahan ni Jesus.
Unsa ang natabang kanimo sa pagsanong ni Maria sa pagsabot mahitungod kaniya?
Sa imong hunahuna, unsa nga mga kamatuoran ang makatabang sa usa ka tawo sa pagsalig sa Ginoo sama sa gibuhat ni Maria, bisan pa kon morag imposible ang usa ka butang nga gipabuhat sa Ginoo?
Kon makatabang sa mga estudyante ang pagtuon sa dugang pang mga ehemplo sa mga tawo nga misanong nga adunay hugot nga pagtuo sa ilang mga morag imposible nga sitwasyon, ikonsiderar ang paghatag og panahon para sa mga estudyante aron makita ang ehemplo diha sa mga kasulatan. Mahimong makatabang kon idirekta sila ngadto sa mga asoy sama sa pagkuha ni Nephi sa mga tumbaga nga palid (tan-awa sa 1 Nephi 3–4), gibahin ni Moises ang Pula nga Dagat (tan-awa sa Exodo 14:10–31), o laing asoy sa mga kasulatan.
Ipakita o hatagi og kopya ang mga estudyante sa sunod nga bahin sa pamahayag ni Presidente Nelson.
Hunahunaa ang gihangyo sa Ginoo nga ipabuhat kanimo nga morag imposible. Samtang nagbasa ka og dugang gikan sa pamahayag ni Presidente Nelson, pangita og partikular nga mga butang nga mabuhat nimo aron tabangan ka nga makab-ot ang imposible:
Imahe
Official portrait of President Russell M. Nelson taken January 2018
Unsaon ninyo pagkab-ot ang imposible? Pinaagi sa pagbuhat sa bisan unsa nga gikinahanglan sa paglig-on sa imong hugot nga pagtuo kang Jesukristo pinaagi sa pagpalambo sa imong pagsabot sa doktrina nga gitudlo sa Iyang gipahiuli nga Simbahan ug pinaagi sa walay puas nga pagtinguha sa kamatuoran. … Kon kamo hangyoon sa pagbuhat sa imposibleng mga butang, makadawat kamo sa buluhaton uban sa hugot nga pagtuo ug pagkamapadayunon ug malipayong mobuhat sa tanan nga anaa ubos sa inyong gahum sa pagtuman sa mga katuyoan sa Ginoo.
Kamo adunay mga adlaw nga mawad-an gayod sa kadasig. Busa, pag-ampo alang sa kaisog nga dili moundang!
(Russell M. Nelson, “Pagkahimo nga Tinuod nga mga Milenyal” [tibuok kalibotan nga debosyonal para sa mga young adult, Ene. 10, 2016], broadcasts.ChurchofJesusChrist.org.)
Dapita ang mga estudyante sa pagrekord sa ilang mga tubag sa mosunod nga mga pangutana diha sa ilang mga journal sa pagtuon. Padayon nga ipakita ang kinutlo ni Presidente Nelson samtang nagsulat sila aron makatan-aw sila niini. Human nga nakabaton ang mga estudyante og igong panahon sa pagsulat, dapita ang pipila ka boluntaryo sa pagpakigbahin sa ilang mga tubag diha sa klase.
Unsa ang usa ka aksiyon gikan sa pamahayag ni Presidente Nelson nga gusto nimo nga mas mabuhat og maayo?
Sa imong hunahuna, sa unsang paagi nga makatabang kanimo ang pagpausbaw niini nga aspeto sa pagkab-ot sa butang nga morag imposible sa imong kinabuhi?
Komentaryo ug Background nga Impormasyon
Nganong tun-an man ang Ebanghelyo ni Lucas?
Ang pipila sa mga labing nailhan nga sugilanon sa pagka-Kristiyano talagsaon diha sa Ebanghelyo ni Lucas: ang mga sitwasyon mahitungod sa paghimugso ni Juan nga Magbubunyag (tan-awa sa Lucas 1:5–25, 57–80); ang tradisyonal nga saysay sa Pasko (tan-awa sa Lucas 2:1–20); ang sugilanon ni Jesus isip 12 anyos nga batang lalaki sa templo (tan-awa sa Lucas 2:41–52); mga sambingay sama sa maayong Samaryanhon (tan-awa sa Lucas 10:30–37), ang anak nga nawala (tan-awa sa Lucas 15:11–32), ang dato ug si Lazaro (tan-awa sa Lucas 16:19–31); ang sugilanon sa napulo ka sanglahon (tan-awa sa Lucas 17:11–19); ug ang asoy sa nabanhaw nga Ginoo nga naglakaw tapad sa Iyang mga disipulo sa dalan padulong sa Emmaus (tan-awa sa Lucas 24:13–32).
Ang uban pang mga talagsaon nga panghitabo mao ang paglakip ni Lucas sa mga pagtulon-an ni Juan nga Magbubunyag nga dili makita sa uban pang mga Ebanghelyo (tan-awa sa Lucas 3:10–14); ang iyang paghatag og gibug-aton sa pagkamainampoon ni Jesukristo (tan-awa sa Lucas 3:21 ; 5:16 ; 9:18, 28–29 ; 11:1); ug iyang paglakip sa pagtawag, pagbansay, ug mga buluhaton sa misyonaryo sa Seventy (tan-awa sa Lucas 10:1–22). Dugang pa niini, si Lucas mao lamang ang tagsulat sa Ebanghelyo nga nagrekord nga ang Manluluwas mipaagas sa Iyang dugo didto sa Getsemani ug nga usa ka anghel nangalagad ngadto Kaniya (tan-awa sa Lucas 22:43–44).
Si Propeta Joseph Smith (1805–44) mitudlo mahitungod sa kailhanan ni anghel Gabriel:
Imahe
Half-length frontal portrait of the Prophet Joseph Smith, Jr. Joseph’s head is turned to the side in a three-quarter view, right hand on hip and his left hand holds sheets of papers. He is depicted wearing a dark brown suit and a white shirt and tie.
Si Noe … mao si Gabriel; nagbarog siya nga adunay awtoridad sunod ni Adan diha sa Priesthood; gitawag siya sa Dios niini nga katungdanan, ug mao ang amahan sa tanang buhi sa iyang panahon, ug ngadto kaniya gihatag ang kamandoan.
Unsa ang kahulogan nga si Maria “kaslonon kang … Jose”?
Sa karaang Israel, sa higayon nga mauyonan na ang kaminyoon, ang kasal maglangkob og duha ka yugto: pamalaye [betrothal] (nga gitawag usab og pagka-kaslonon [espousal]; tan-awa sa Mateo 1:18) ug usa ka seremonya sa kasal. Bisan ang pagka-kaslonon sa mga managtiayon [betrothed couple] sa legal nga paagi giisip nga bana ug asawa (tan-awa sa Deuteronomio 22:23–24), tali sa panahon sa pagka-kaslonon ug sa seremonya sa kasal, usa ka higpit nga lagda sa kaputli ang gipatuman (tan-awa sa Mateo 1:18–25 ; tan-awa usab sa Manwal sa Estudyante sa Bag-ong Tugon[2014], 13).
Unsay atong nahibaloan mahitungod sa milagrosong pagmabdos ni Maria?
Sa dihang nangutana si Maria kon sa unsang paagi siya mahimong inahan ni Jesus, “nga wala man koy bana” ( Lucas 1:34), gipahibalo lang siya ni Gabriel nga pagakunsaran siya sa Espiritu Santo ug nga ang iyang anak mahimong Anak sa Dios (tan-awa sa Lucas 1:35). Ang ubang mga kasulatan nga nagpasabot ngadto sa pagpanamkon kang Jesukristo naghatag usab og gibug-aton nga Siya ang Anak sa Dios pero wala mopadayag kon sa unsang paagi nahitabo kini nga milagro (tan-awa sa Mateo 1:18–20 ; 1 Nephi 11:14–15, 18–21 ; Alma 7:10).
. Ang mga panalangin sa Dios moabot sa Iyang gitakda nga panahon ug sa Iyang paagi
Hangyoa ang mga estudyante sa pagpamalandong og usa ka panalangin o tubag gikan sa Dios nga ilang gihulat o gipangandoy.
Awhaga ang mga estudyante nga tun-an ang asoy ni Zacarias ug Elisabet sa Lucas 1:5–25 , nga mangita og mga leksiyon nga ilang makat-onan mahitungod sa tukmang panahon sa Ginoo.
Pagkahuman nga matun-an na sa mga estudyante kini nga mga bersikulo, dapita sila sa pagpakigbahin kon unsay ilang nakat-onan. Ikonsiderar ang paggamit og mga pangutana sama sa mosunod aron mapalambo ang panaghisgotan:
Sa imong hunahuna, unsa ang nakat-onan ni Zacarias ug Elisabet mahitungod sa Ginoo pinaagi sa ilang kasinatian nga gihulagway niini nga mga bersikulo?
Unsa ang imong nakat-onan gikan niini nga mga asoy mahitungod sa kon unsay imong mabuhat samtang naghulat ka sa panalangin o tubag gikan sa Dios?
Unsa ang ubang mga ehemplo mahitungod sa pagsalig diha sa kabubut-on ug tukmang panahon sa Ginoo ang imong mahunahunaan gikan sa imong kaugalingong kinabuhi o gikan sa mga asoy diha sa mga kasulatan?
Aduna bay mga panahon sa imong kinabuhi nga ang Ginoo mitubag og pag-ampo pero dili sa paagi o tukmang panahon nga imong gipaabot?
Usa ka ehemplo sa panahon karon mahitungod sa pagtabang sa Ginoo sa usa ka tawo nga makab-ot ang imposible
Aron tabangan ang mga estudyante nga makakita og paghulagway sa panahon karon nga walay imposible sa Dios, ikonsiderar ang pagpakita sa video nga “Sweet Power of Prayer” (code sa oras nga 4:14 hangtod sa 8:38), nga anaa sa ChurchofJesusChrist.org. Niini nga video, gisaysay ni Presidente Russell M. Nelson ang kasinatian sa dihang gipadayag sa Dios kon unsaon pag-ayo ang kasingkasing sa usa ka pasyente atol sa operasyon.
