Mateo 1:1–17

Si Jesus mao ang Gisaad nga Mesiyas

Si Mateo, kinsa nailhan usab isip si Levi, mao ang tigsulat sa unang Ebanghelyo sa Bag-ong Tugon. Ang usa sa iyang mga katuyoan sa pagsulat mao ang pagpakita nga gituman ni Jesus ang mga propesiya sa Daang Tugon mahitungod sa Mesiyas. Niini nga leksiyon, makahibalo ka mahitungod kang Jesukristo isip mao ang gisaad nga Mesiyas ug mas mobati og pagdayeg Kaniya.

Pag-andam para sa klase. Kon moadto ang mga estudyante sa klase nga andam, nagdapit sila sa Espiritu Santo nga tudloan sila ug anaa sila sa mas maayong posisyon aron tabangan nga makakat-on ang uban pang mga estudyante. Mahimo nimong tabangan ang mga estudyante nga moadto nga andam para sa klase sa lain-laing mga paagi. Tinguhaa nga ipaabot ang mga imbitasyon sa mga estudyante nga makatabang sa pag-andam sa ilang mga hunahuna ug mga kasingkasing nga makakat-on pinaagi sa Espiritu Santo.

Pag-andam sa estudyante: Dapita ang mga estudyante nga moadto sa klase nga nakahunahuna na kon nganong importante kanila si Jesukristo. Mahimo usab silang mangutana sa pamilya o mga higala kon unsa ang ilang gibati mahitungod sa Manluluwas.

Posible nga mga Kalihokan sa Pagkat-on

Nganong importante kanimo si Jesukristo

Pagpakita og litrato ni Jesukristo, sama sa anaa sa sinugdanan sa leksiyon.

Sa atong panahon, “adunay daghang tawo dinhi sa yuta nga gamay ra kaayo og nahibaloan ni Jesukristo” (Neil L. Andersen, “Kita Naghisgot Kang Kristo,” Liahona, Nob. 2020, 88).

• Sa imong hunahuna, nganong aduna may daghang tawo sa kalibotan nga gamay ra kaayo og nahibaloan mahitungod kang Jesukristo?

Hunahunaa nga ikaw adunay usa ka minuto aron isulti sa usa ka tawo nga dili pamilyar kang Jesukristo ang mahitungod kon kinsa ang Manluluwas ug nganong importante Siya kanimo. Isulat ang “Jesukristo” sa tunga sa usa ka papel o diha sa imong journal sa pagtuon. Paliboti ang Iyang ngalan og importanteng mga detalye nga gusto nimong ipaambit sulod niadtong 60 ka segundo. Ikonsiderar ang pagdugang og uban pang mga detalye sa imong papel sa tibuok leksiyon.

Dapita ang pipila ka mga boluntaryo nga ipaambit ang ilang gibutang sa ilang papel. Kon nakompleto na sa mga estudyante ang kalihokan sa pag-andam, ikonsiderar usab ang pagpa-report kanila sa ilang nahibaloan mahitungod kon nganong importante si Jesukristo sa ilang mga higala o pamilya.

Mahimo nimong tan-awon ang video nga “Who Is Jesus Christ? A 60-Second Overview” (1:22), nga anaa sa ChurchofJesusChrist.org. Samtang nagtan-aw ka, hunahunaa kon nganong importante gihapon si Jesukristo sa kalibotan karon, bisan pa niadtong mga tawo nga wala makaila Kaniya.

Mipamatuod si Mateo nga si Jesukristo mao ang Mesiyas

Motabang sa pagpaila-ila sa Ebanghelyo ni Mateo ngadto sa mga estudyante pinaagi sa pagpaambit sa mosunod nga impormasyon.

Tungod kay adunay daghang tawo sa kalibotan karon nga wala pa nakasabot sa pagkaimportante ni Jesukristo, daghang tawo nga nagpuyo sa panahon sa Manluluwas nga wala usab makahibalo sa Iyang pagkaimportante.

Usa si Mateo sa Napulog Duha ka Apostoles ni Jesukristo (tan-awa sa Mateo 10:2–4) ug usa ka saksi sa daghang panghitabo nga iyang gihulagway gikan sa kinabuhi sa Manluluwas. Gisulat niya ang Ebanghelyo ni Mateo aron tabangan ang mga tawo, ilabi na ang mga Judeo nga wala motuo sa Manluluwas, nga makaila ni Jesukristo kon kinsa Siya. Labing gihatagan og gibug-aton ni Mateo ang kamatuoran nga si Jesukristo mao ang gisaad nga Mesiyas pinaagi sa kanunay nga pagtuki sa mga karaan nga propesiya mahitungod sa Mesiyas nga gituman ni Jesukristo.

Gisugdan ni Mateo ang iyang asoy pinaagi sa pagrekord sa kasaysayan sa pamilya ni Jesus. Naglakip siya og importanteng mga tawo ug mga detalye (tan-awa sa Mateo 1:1–17). Basaha ang Mateo 1:16 , nga nangita sa hugpong sa pulong nga “Jesus, nga gitawag og Kristo.” Ikonsiderar ang paglinya sa ubos niana nga hugpong sa pulong sa imong mga kasulatan.

• Unsa ang imong nahibaloan mahitungod sa kahulogan sa titulo nga “Kristo”?

Ang pulong sa Hebreohanon para sa “Kristo” mao ang “Mesiyas.” Basaha ang nasulat diha sa Bible Dictionary [Diksyonaryo sa Biblia] “ Mesiyas ” aron makahibalo pa og dugang mahitungod sa kahulogan niini nga titulo ug kon nganong daghang Judeo ang wala midawat ni Jesus isip ang Kristo.

• Unsa ang imong makat-onan mahitungod sa misyon sa Manluluwas pinaagi sa pagsabot sa Iyang mga titulo nga “Kristo” ug “Mesiyas”?

Kaniadto, gidihogan ang mga tawo isip pag-andam sa pagbuhat og mga espesyal nga buluhaton. Ang Ebanghelyo ni Mateo puno og mga ehemplo sa pagtuman ni Jesukristo sa karaan nga mga propesiya sa unsay gidihog nga Iyang buhaton. Pangita og duha o tulo niini nga mga ehemplo sa imong mga kasulatan (tan-awa ang mosunod nga listahan). Hunahunaa kon nganong gipadayag sa Langitnong Amahan ang mga detalye mahitungod kon unsa ang buhaton ni Kristo sa daghang mga tuig sa wala pa moabot si Kristo.

Ipakita ang mosunod nga listahan aron makita sa mga estudyante ang mga propesiya ug ang katumanan niini.

Mga Propesiya mahitungod sa Mesiyas sa Daang Tugon	Katumanan pinaagi ni Jesukristo
Ang Mesiyas usa ka kaliwat ni Abraham ug ni David (tan-awa sa Jeremias 23:5–6 ; Genesis 22:18).	Mateo 1:1, 6, 17
Matawo ang Mesiyas sa usa ka birhen (tan-awa sa Isaias 7:14 ; Alma 7:10).	Mateo 1:21–23
Matawo ang Mesiyas sa Betlehem (tan-awa sa Miqueas 5:2).	Mateo 2:4–6
Maggikan ang Mesiyas sa Nazaret (tan-awa sa 1 Nephi 11:13).	Mateo 2:23
Ayohon sa Mesiyas ang masakiton (tan-awa sa Isaias 53:4 ; Mosiah 3:5).	Mateo 8:16–17
Magtudlo ang Mesiyas gamit ang mga sambingay (tan-awa sa Salmo 78:2).	Mateo 13:35
Mosulod ang Mesiyas sa Jerusalem sakay sa usa ka asno (tan-awa sa Zacarias 9:9).	Mateo 21:1–7

Si Jesukristo nagpamatuod nga Siya mao ang Mesiyas

Adunay laing katumanan sa usa ka propesiya sa Daang Tugon nga nakarekord sa Lucas 4:16–21 . Niadtong mibisita si Jesus sa Iyang yutang gidak-an sa Nazaret, miadto Siya sa sinagoga (simbahan) ug nagbasa gikan sa basahon ni Isaias og usa ka propesiya mahitungod sa balaanong misyon sa Mesiyas. Pagkahuman sa pagbasa, misulti si Jesus nga Siya ang Mesiyas pinaagi sa pagsaysay nga natuman na ang propesiya ni Isaias.

Basaha ang Isaias 61:1–2 , nga mangita kon unsa ang gipanagna ni Isaias nga buhaton sa Mesiyas. Markahi ang mga pulong o mga hugpong sa pulong nga gibati nimo nga nagpakita nga mihaom si Jesus sa mga paghulagway nga girekord ni Isaias.

Mahimo usab nimong tan-awon ang video nga “Jesus Declares He Is the Messiah” gikan sa code sa oras nga 0:00 hangtod sa 2:05. Kini nga video anaa sa ChurchofJesusChrist.org.

• Unsa nga mga pulong o mga hugpong sa pulong gikan sa Isaias 61:1–2 ang mga ebidensya para kanimo nga si Jesukristo mao ang gitagna nga Mesiyas?

• Giunsa pagtuman sa Manluluwas ang bisan unsa niini nga mga propesiya sa imong kinabuhi o sa kinabuhi sa tawo nga imong nailhan?

Pagdugang og mga detalye mahitungod kang Jesukristo sa panid sa papel nga gisugdan nimo sa pagbuhat sa sinugdanan sa leksiyon. Tubagi ang mosunod nga mga pangutana aron matabangan ka sa paghunahuna sa mga detalye nga idugang.

• Unsay imong nakat-onan mahitungod ni Jesukristo gikan niini nga mga propesiya mahitungod sa Mesiyas ug sa katumanan niini?

• Unsa ang buhaton ni Jesukristo sa pag-anhi sa yuta? Nganong importanteng masabtan ang Iyang misyon?

• Nganong importante kanimo si Jesukristo?

Hatagi ang mga estudyante og oportunidad sa pagpakigbahin kon unsay ilang nakat-onan mahitungod sa Mesiyas. Mahimo silang mogahin og usa o duha ka minuto aron ipaambit ang pipila sa mga detalye nga ilang gidugang sa ilang mga papel ug maghatag og pagpamatuod mahitungod ni Jesukristo.

Komentaryo ug Background nga Impormasyon

Nganong importante pa man gihapon si Jesukristo karon?

Si Elder Neil L. Andersen sa Korum sa Napulog Duha ka Apostoles mipaambit sa mosunod nga pagpamatuod mahitungod ni Jesukristo:

Sama sa bitoon nga naggiya sa tin-aw, ngitngit nga kalangitan, si Jesukristo midan-ag sa atong dalan. Siya mianhi sa yuta diha sa kabos nga pasungan. Siya nagpuyo og perpekto nga kinabuhi. Siya miayo sa mga masakiton ug mibuhi sa mga patay. Siya higala sa mga biniyaan. Siya mitudlo nato sa pagbuhat og maayo, sa pagsunod, ug sa paghigugma sa usag usa. Siya gilansang sa krus, halangdong nabanhaw paglabay sa tulo ka adlaw, nagtugot nato ug niadtong atong gimahal nga mabuhi lapas sa lubnganan. Uban sa Iyang dili matandi nga kalooy ug grasya, Siya midala diha Kaniya sa atong mga sala ug sa atong pag-antos, naghatag og kapasayloan kon kita maghinulsol ug kalinaw diha sa mga unos sa kinabuhi. Kita nahigugma Kaniya. Kita nagsimba Kaniya. Kita nagsunod Kaniya. Siya mao ang angkla sa atong mga kalag.

(Neil L. Andersen, “Kita Naghisgot Kang Kristo,” Liahona, Nob. 2020, 88)

Nganong importante man nga si Jesuskristo usa ka kaliwat ni David?

Si Elder Bruce R. McConkie (1915–85) sa Korum sa Napulog Duha ka Apostoles mipasabot:

Walay laing konsepto ang anaa sa mga hunahuna sa mga Judeo sa panahon ni Jesus kay sa gituohan sa tanan nga ang ilang Mesiyas mao ang Anak ni David. … Nangita sila og temporal nga tigluwas kinsa mokuha sa yugo sa pagkaulipon gikan sa Romano ug himoong gawasanon pag-usab ang Israel. Nangita sila og magmamando kinsa mopahiuli niana nga himaya ug sa tibuok kalibotan nga impluwensya ug kabantog nga matagamtaman kon ang Anak ni Jesse maglingkod sa trono sa Israel.

(Bruce R. McConkie, The Promised Messiah [1978], 188)

Kinsa ang mga babaye nga gilakip ni Mateo sa genealogy ni Kristo?

“Si Tamar naggikan sa Adulam sa teritoryo sa mga taga-Canaan (tan-awa sa Genesis 38); si Rahab taga-Canaan sa Jerico (tan-awa sa Josue 2:1–7); si Ruth taga-Moab sa wala pa makabig sa Judaismo (tan-awa sa Ruth 1:4); ug si Batseba mao ang asawa ni Urias, usa ka Hitihanon (tan-awa sa 2 Samuel 11:3). Busa, ang tanang upat [ka mga babaye] mahimong dili mga Israelite o nakig-uban sa dili mga Israelite” (Manwal sa Estudyante sa Bag-ong Tugon [2018], 13). Ang paglakip niini nga mga babaye sa kasaysayan sa kagikan [genealogy] ni Jesukristo makatudlo kanato nga naglihok ang Dios sa tanang tawo ug pinaagi sa mga wala damha nga paagi.

Pamatuod sab kini nga “ang personal nga pagkamatarong wala mag-agad sa pag-angkon og ‘hingpit’ nga kaliwat, kay ang kaliwat ni Jesukristo dili hingpit. [Ug] ang paglakip sa mga babaye sa [kasaysayan sa pamilya] sa Manluluwas nagpakita og importante nga kamatuoran nga ang mga lalaki ug mga babaye managsama sa mga mata sa Dios” (Manual sa Estudyante sa Bag-ong Tugon, 13).

Dugang nga Kalihokan sa Pagkat-on

Pagsabot sa pagkaimportante ni Jesukristo

Ihatag sa mga estudyante ang mosunod nga sitwasyon ug mga pangutana:

Nakig-istorya ka sa usa ka higala, nga miingon kanimo nga: “Wala ako nakasabot kon nganong taas kaayo ang tan-aw sa pipila ka tawo kang Jesukristo. Adunay daghan kaayong maayong tawo sa kalibotan; wala nako nakita ang punto sa pagpataas kang Jesus kay sa uban.”

• Unsay imong mahimong inisyal nga tubag sa pamahayag sa imong higala?

• Sa imong hunahuna, unsa kaha ang wala masabti sa imong higala mahitungod kang Jesukristo?