Mary visiting her cousin Elisabeth, who is also expecting a child.
Samtang nagmabdos kang Jesus, mibisita si Maria sa iyang ig-agaw nga si Elisabet ug nagmalipayon kauban niya sa pagkamaayo sa Dios. Kini nga leksiyon maghatag kanimo og mga oportunidad aron sa pag-ila sa pagkamaayo sa Dios ug sa paghalad sa imong mga pagdayeg para niini.
Pag-andam sa estudyante: Awhaga ang mga estudyante nga motambong sa klase nga andam sa pagpaambit og linya gikan sa usa ka himno nga naghisgot sa pagkamaayo sa Dios.
Posible nga mga Kalihokan sa Pagkat-on
Sa imong hunahuna, nganong mokanta man kita og mga himno mahitungod sa Langitnong Amahan ug kang Jesukristo isip kabahin sa atong pagdayeg Kanila?
Unsa ang himno o linya gikan sa usa ka himno nga naghisgot sa Ilang kaayo?
Kon manginahanglan og tabang ang mga estudyante, ikonsiderar ang paglista og pipila ka mga himno nga mabasa nila, ug awhaga sila nga mangita og hugpong sa pulong nga naghisgot sa pagkamaayo sa Dios. Dapita ang mga estudyante sa pagpakigbahin sa unsay ilang nakaplagan.
Pagtagana og minuto aron maghunahuna mahitungod sa kon unsay imong gibati mahitungod sa Langitnong Amahan ug kang Jesukristo. Pamalandongi ang mga rason nga kinahanglan nimo Silang daygon ug unsa ka sagad nimo gipadayag ang imong mga pagbati mahitungod Kanila sa pipila ka paagi.
Niini nga leksiyon, makabaton ka og oportunidad nga maghunahuna pa og dugang mahitungod sa kon ngano ug sa unsang paagi nimo mahimong daygon ang Dios ug magmalipayon sa kinabuhi ug misyon ni Jesukristo.
Nagmalipayon si Maria ug Elisabet sa pagkamaayo sa Dios.
Samtang mabdos si Maria kang Jesus, mibisita siya kang Elisabet, ang iyang mas maguwang nga ig-agaw kansang pagmabdos usa sab ka milagro. Sa pag-abot ni Maria, ang anak ni Elisabet, nga mahimong si Juan nga Magbubunyag “milukso sa kalipay ang bata nga gisabak [ni Elisabet]” ( Lucas 1:44). Dinhi nagsugod ang panagsultihanay taliwala ni Maria ug Elisabet diin nagsadya ug gidayeg ni Maria ang Dios.
Ikonsiderar ang pagdapit sa mga estudyante nga mobasa mismo sa sunod nga grupo sa mga bersikulo, nga mangita og mga butang nga may kalabotan nila.
Basaha sa Lucas 1:46–55 . Samtang nagtuon ka sa mga pulong ni Maria, hunong ug pamalandongi ang kahulogan sa mga partikular nga pulong o hugpong sa mga pulong. Ang paghunong ug pagpamalandong mag-awhag og inspirasyon gikan sa Espiritu Santo aron matabangan ka nga mas masabtan og maayo ang mga kasulatan. Pananglitan, mahimo kang mohunong sa “ubos” o “sulugoon” sa bersikulo 48 . Kini nga mga pulong makahatag og pagtulon-an sa kamapaubsanon ug balaang pagtahod ni Maria ngadto sa Dios. Ang mga pulong niini nga bersikulo makatabang kanimo nga makita nga nakaila ug nahigugma ang Dios sa Iyang mga anak bisan pa sa ilang mga sitwasyon. Kon makatabang, ikonsiderar ang pagpangita sa kahulogan sa mga pulong nga wala nimo masabti gamit ang diksyonaryo o ang Giya ngadto sa mga Kasulatan, nga anaa sa ChurchofJesusChrist.org.
Sa unsa nga mga pulong ka mihunong aron maghunahuna niini? Unsay imong nakat-onan?
Sa unsa nga mga pulong o hugpong sa mga pulong nga ikaw aduna pay mga pangutana?
Tabangi ang mga estudyante nga mobati nga komportable sa pagpaambit sa ilang nakit-an samtang nagdapit usab kanila nga mangayo og tabang aron masabtan ang lisod nga pulong o hugpong sa mga pulong. Pananglitan, kon adunay mga pangutana ang mga estudyante mahitungod sa pulong nga “kahadlok” sa Lucas 1:50 , ikonsiderar ang pagpangita niini diha sa Giya ngadto sa mga Kasulatan.Mahimong makatabang kini sa mga estudyante nga masabtan nga “ang pagkahadlok sa Dios mao ang pagbati og balaan nga pagtah[o]d ug kataha alang Kaniya ug sa pagsunod sa Iyang mga sugo” (Giya ngadto sa mga Kasulatan, “ Kahadlok ,” scriptures.ChurchofJesusChrist.org).
Unsa nga mga kamatuoran mahitungod sa Dios ang imong nakat-onan gikan sa pagpamatuod ni Maria?
Ang mga estudyante mahimong motino og daghang kamatuoran sa mga bersikulo nga ilang gitun-an, lakip na ang pipila sa mosunod:
Mahimo kitang magmalipayon sa pagkahibalo nga aduna kitay Manluluwas ( Lucas 1:47)
Gamhanan ang Ginoo ug makabuhat og dagkong mga butang ( Lucas 1:49)
Maloloy-on ang Dios sa mga tawo nga mopasidungog ug mosunod Kaniya ( Lucas 1:50)
Ipaubos sa Dios ang mapahitas-on ug ipataas ang mapaubsanon ( Lucas 1:52)
Kon kita gigutom sa espirituhanong paagi, busgon kita sa Ginoo ( Lucas 1:53)
Ikonsiderar ang pagdapit sa mga estudyante nga isulat sa pisara ang mga kamatuoran nga ilang nakat-onan gikan sa mga pagdayeg ni Maria.
Mahimo kitang magmalipayon sa pagkamaayo sa Dios.
Ang usa ka kamatuoran nga atong makat-onan gikan sa kasinatian ni Maria mao nga samtang nagkonsiderar kita sa impluwensya sa Dios sa atong mga kinabuhi, mahimo kitang magmalipayon.
Sa imong hunahuna, nganong makatabang man kanimo nga mobati og kalipay ang pag-ila sa mga panalangin sa Dios sa imong kinabuhi?
Si Elder Dale G. Renlund sa Korum sa Napulog Duha ka Apostoles nagpaambit kon sa unsang paagi nga nakapanalangin kaniya ang paghinumdom sa pagkamaayo sa Dios.
Imahe
Official portrait of Elder Dale G. Renlund of the Quorum of the Twelve Apostles, January 2016.
Samtang akong gipamalandongan ang mga gasa gikan sa atong Langitnong Amahan ug ni Jesukristo, akong nahibaloan ang Ilang walay kinut[o]bang gugma ug ang Ilang dili matugkad nga kamanggiloy-on alang sa tanan nga anak sa Langitnong Amahan [tan-awa sa 2 Nephi 26:33 ]. Kini nga kahibalo miusab kanako, ug kini usab makausab kaninyo.
Tabangi ang mga estudyante sa pagpamalandong sa ilang mga panalangin ug mga rason para sa pagpahayag og gugma ngadto sa Dios. Hatagi ang mga estudyante og panahon aron maghunahuna og mga makahuluganong paagi sa pagdayeg sa Langitnong Amahan ug kang Jesukristo ug irekord kini sa ilang mga journal sa pagtuon.
Kompletoha ang mosunod nga mga lakang aron matabangan ka sa pag-ila sa mga panalangin sa Langitnong Amahan ug sa pagdayeg Kaniya para sa Iyang pagkamaayo.
Lakang 1:
Ipakita ang mosunod nga mga pangutana o basaha kini og kusog, nga maghatag sa mga estudyante og panahon para sa pagpamalandong.
Pamalandongi ang imong mga tubag sa mosunod nga mga pangutana.
Unsa ang pipila ka panalangin gikan sa Langitnong Amahan nga mapasalamaton kaayo ka?
Unsa ang natabang niini nga mga panalangin nga makasabot ka mahitungod sa Langitnong Amahan ug ni Jesukristo?
Kanus-a ka mibati og kalipay tungod sa pag-ila sa mga panalangin gikan sa Dios para kanimo o sa tawo nga imong nailhan?
Unsa nga sugilanon o bersikulo sa kasulatan ang nakatabang kanimo aron ganahan nga modayeg sa Dios?
Lakang 2:Pilia kon unsaon nimo pagdayeg ang Dios. Ania ang pipila ka ideya nga kapilian nimo:
Pagsulat og balak o kanta.
Pagdrowing og litrato.
Paghalad og pag-ampo sa pagpasalamat.
Ipaambit ang imong pagpamatuod ngadto sa usa ka tawo.
Pagsulat diha sa personal nga journal.
Ipaambit ang imong mga gibati mahitungod sa Dios sa social media.
Mahimo usab kang maghunahuna og imong kaugalingong ideya. Kon makapili na ka, sugdi ang pagbuhat niini. Kon dili posible nga magsugod sa pagkakaron, pagsulat og detalyadong plano kon unsa ang imong buhaton. Pananglitan, kon gusto nimong mohalad og pag-ampo sa pagpasalamat, mahimo nimong isulat kon kanus-a ug asa ka mag-ampo ug kon unsa ang imong pasalamatan. Mahimo nimong ipaambit ang imong mga ideya sa usa ka ginikanan o lider sa Simbahan nga makapahinumdom kanimo sa pagbuhat sa imong plano.
Hatagi ang mga estudyante og panahon sa pagsugod sa pagbuhat sa ilang mga plano. Kon posible, mahimong ipaambit sa mga estudyante ang ilang mga kasinatian sa pagtapos sa klase o sa umaabot nga leksiyon.
Komentaryo ug Background nga Impormasyon
Lucas 1:46–55 . Nganong gidayeg man ni Maria ang Ginoo?
Ang mga bersikulo 46–55 sa Lucas 1 tradisyonal nga nailhan nga Kanta ni Maria. Kini nga mga pagdayeg naglambigit sa paghimugso ni Jesukristo sa balaang kasaysayan sa Israel. Ang mga pulong nagsaulog sa kalooy sa Ginoo nga sa makausa pa nagtinguha sa pagpanalangin ug pagpasidungog sa Iyang katawhan—ilabi na niadtong “mga timawa” ( Lucas 1:52).
Lucas 1:53 . Giunsa pagbusog sa Ginoo ang “gigutom sa maayong mga butang”?
Si Elder Jeffrey R. Holland sa Korum sa Napulog Duha ka Apostoles nagtudlo mahitungod sa pagdapit sa Manluluwas sa pagduol ngadto Kaniya ug magbusog:
Imahe
Official Portrait of Elder Jeffrey R. Holland. Photographed January 2018.
Nag-ampo ako karong buntaga nga ang tanang gigutom ug giuhaw, ug usahay naglatagaw, makadungog niini nga pagdapit gikan Kaniya nga mao ang Pan sa Kinabuhi, ang Tinubdan sa Buhi nga Tubig, ang Maayong Magbalantay natong tanan, ang Anak sa Dios: “Duol kamo kanako, kamong tanan nga gikapuyan ug gibug-atan sa inyong gipas-an, … ug makapahulay ang inyong mga kalag” [ Mateo 11:28–29 ]. Tinuod nga iyang busgon “ang gigutom sa maayong mga butang,” ingon sa nasaksihan sa iyang kaugalingong inahan nga si Maria [ Lucas 1:53 ]. Dali, ug pagkumbira sa lamesa sa Ginoo nga akong gipamatud-an nga Iyang tinuod ug buhi nga Simbahan, nga gipangulohan sa usa ka tinuod ug buhi nga propeta.
(Jeffrey R. Holland, “He Hath Filled the Hungry with Good Things,” Ensign, Nob. 1997, 66)
Unsa ang mahitabo kon hinumdoman nato ang pagkamaayo sa Dios?
Gitudlo ni Elder Dean M. Davies sa Seventy ang mosunod mahitungod sa kon unsa ang mahitabo kon ilhon nato kon giunsa kita sa pagpanalangin sa Dios:
Imahe
Official Portrait of Bishop Dean M. Davies. Photographed in March 2017.
Kada adlaw, apan ilabi na sa adlawng Igpapahulay, aduna kitay talagsaon nga oportunidad sa pagsinati sa katingalahan ug pagdayeg sa langit ug mohalad sa atong mga pagdayeg sa Dios alang sa Iyang kamaayo ug naghingapin nga kalooy. …
Kon kita magsimba, ang atong mga kasingkasing modayeg sa atong bulahang Dios sa buntag, hapon ug gabii.
Kita makanunayong mobalaan ug motahud Kaniya—sa atong mga meetinghouse, mga panimalay, mga templo, ug sa tanan natong paghago.
Kon magsimba kita, atong ibukas ang atong mga kasingkasing sa makaayo nga gahum sa Pag-ula ni Jesukristo.
Ang atong kinabuhi mahimong timaan ug pahayag sa atong pagsimba.
Dugang pa sa pagbasa sa mga pulong sa pagdayeg gikan ni Maria, ang inahan ni Jesus, ikonsiderar ang pagdapit sa mga estudyante nga makakat-on gikan sa mga pulong nga gisulti ni Zacharias, ang amahan ni Juan nga Magbubunyag. Mahimong basahon sa mga estudyante ang Lucas 1:68–79 , nga mangita kon giunsa pagdayeg ni Zacarias ang Dios. Mahimong basahon sa pipila sa klase ang mga pulong ni Maria samtang basahon sa uban ang mga pulong ni Zacarias. Mahimo dayong ipaambit sa mga estudyante sa usag usa kon unsa ang ilang nakat-onan.
“O Come, O Come, Emmanuel”
Ang mensahe sa kanta nga “O Come, O Come, Emmanuel”mao nga angay nga magmalipayon ang Israel sa pag-abot ni Jesukristo aron luwason ang Iyang katawhan. Ikonsiderar ang pagpakita o paghatag sa lyrics sa kanta ug pagpaminaw sa pangmusikang pagtugtog. Mahimong ipatugtog sa usa ka estudyante ang kanta sa pangmusikang instrumento, o mahimong tan-awon sa klase ang video sama sa “O Come, O Come, Emmanuel (The Piano Guys)” (5:27), nga anaa sa ChurchofJesusChrist.org. Dapita ang mga estudyante nga pamalandongan ang mga rason nga magmalipayon kita nga mianhi si Jesukristo sa kalibotan.
