លូកា ១:៣៩–៧៩

មានសេចក្តីរីករាយ ក៏ពោលសរសើរដល់ព្រះ

អំឡុងពេលមានគភ៌ព្រះយេស៊ូវ ម៉ារាបានទៅជួបបងប្អូនជីដូនមួយរបស់នាង ឈ្មោះអេលីសាបិត ហើយមានសេចក្តីរីករាយជាមួយនឹងនាងក្នុងសេចក្តីល្អរបស់ព្រះ ។ មេរៀននេះនឹងផ្តល់ឱកាសឲ្យសិស្សស្គាល់សេចក្ដីល្អរបស់ព្រះ និងពោលសរសើរសេចក្ដីល្អនោះ ។

ការរៀបចំរបស់សិស្ស ៖ សូមអញ្ជើញសិស្សឲ្យមករៀន ដោយត្រៀមខ្លួនដើម្បីចែករំលែកឃ្លាមួយពីទំនុកតម្កើងមួយ ដែលបង្ហាញពីសេចក្ដីល្អរបស់ព្រះ ។

សកម្មភាពរៀនសូត្រដែលអាចមាន

• ហេតុអ្វីអ្នកគិតថា យើងច្រៀងទំនុកតម្កើងអំពីព្រះវរបិតាសួគ៌ និងព្រះយេស៊ូវគ្រីស្ទ ដែលជាផ្នែកមួយនៃការថ្វាយបង្គំរបស់យើងដល់ទ្រង់ទាំងទ្វេ ?

• តើទំនុកតម្កើង ឬឃ្លាមួយណាចេញពីទំនុកតម្កើង ដែលបង្ហាញពីសេចក្ដីល្អរបស់ទ្រង់ទាំងទ្វេ ?

ប្រសិនបើសិស្សត្រូវការជំនួយ សូមពិចារណារាយទំនុកតម្កើងពីរបីបទដែលពួកគេអាចអាន ហើយលើកទឹកចិត្តពួកគេឲ្យរកមើលឃ្លាដែលបង្ហាញពីសេចក្តីល្អរបស់ទ្រង់ ។ សូមឲ្យសិស្សចែកចាយនូវអ្វីដែលពួកគេបានរកឃើញ ។

សូមចំណាយពេលបន្តិចដើម្បីគិតពីអារម្មណ៍របស់អ្នកចំពោះព្រះវរបិតាសួគ៌ និងព្រះយេស៊ូវគ្រីស្ទ ។ សូមសញ្ជឹងគិតពីហេតុផលដែលអ្នកត្រូវពោលសរសើរទ្រង់ទាំងទ្វេ និងភាពញឹកញាប់ដែលអ្នកបង្ហាញអារម្មណ៍របស់អ្នកអំពីទ្រង់ទាំងទ្វេ ។

នៅក្នុងមេរៀននេះ អ្នកនឹងមានឱកាសគិតកាន់តែច្បាស់អំពីមូលហេតុ និងវិធីដែលអ្នកអាចពោលសរសើរព្រះ ហើយរីករាយនឹងព្រះជន្ម និងបេសកកម្មរបស់ព្រះយេស៊ូវគ្រីស្ទ ។

ម៉ារា និងអេលីសាបិត រីករាយនឹងសេចក្ដីល្អរបស់ព្រះជាមួយគ្នា

ខណៈពេល ម៉ារា មានគភ៌ព្រះយេស៊ូវ នាងបានទៅលេង អេលីសាបិត ដែលជាបងជីដូនមួយរបស់នាងដែលមានផ្ទៃពោះ ប្រកបដោយអព្ភូតហេតុដែរ ។ នៅពេល ម៉ារា បានមកដល់ កូនរបស់ អេលីសាបិត ដែលនឹងក្លាយជា យ៉ូហាន បាទីស្ទ « នៅក្នុងពោះ [ របស់ អេលីសាបិត ] ក៏បង្រះដោយសេចក្តីអំណរ » ( លូកា ១:៤៤ ) ។ អព្ភូតហេតុនេះបានបង្កើតជាការសន្ទនារវាង ម៉ារា និងអេលីសាបិត ដែលម៉ារាបានរីករាយពោលសរសើរដល់ព្រះ ។

សូមពិចារណាអញ្ជើញសិស្សឲ្យអានក្រុមខគម្ពីរបន្ទាប់ទៀតដោយខ្លួនឯងផ្ទាល់ ដោយរកមើលអ្វីដែលអាចទាក់ទងនឹងពួកគេ ។

សូមអាន លូកា ១:៤៦–៥៥ ។ នៅពេលអ្នកសិក្សាពាក្យសម្ដីរបស់ ម៉ារា សូមផ្អាក និងគិតពិចារណាពីអត្ថន័យនៃពាក្យ ឬឃ្លាជាក់លាក់ទាំងឡាយ ។ ការផ្អាក និងការសញ្ជឹងគិតពិចារណាអាចអញ្ជើញការបំផុសគំនិតពីព្រះវិញ្ញាណបរិសុទ្ធ ដើម្បីជួយអ្នកឲ្យយល់ពីបទគម្ពីរកាន់តែស៊ីជម្រៅ ។ ឧទាហរណ៍ អ្នកអាចផ្អាកនៅពាក្យ « ទាប » ឬ « បាវបម្រើ » នៅក្នុង ខទី ៤៨ ។ ពាក្យទាំងនេះអាចផ្តល់នូវការយល់ដឹងអំពីការបន្ទាបខ្លួន និងការគោរពរបស់ ម៉ារា ចំពោះព្រះ ។ ពាក្យនៅក្នុងខគម្ពីរនេះអាចជួយអ្នកឲ្យឃើញថា ព្រះស្គាល់ និងស្រឡាញ់បុត្រាបុត្រីរបស់ទ្រង់ដោយមិនគិតពីស្ថានភាពរបស់ពួកគេឡើយ ។ ប្រសិនបើវាមានអត្ថប្រយោជន៍ សូមពិចារណារកមើលអត្ថន័យនៃពាក្យដែលអ្នកមិនយល់ ដោយប្រើវចនានុក្រម ឬសេចក្តីណែនាំដល់បទគម្ពីរទាំងឡាយ ដែលមាននៅលើ ChurchofJesusChrist.org ។

• តើពាក្យណាដែលអ្នកឈប់ដើម្បីគិតអំពីវា ? តើអ្នកបានរៀនអ្វីខ្លះ ?

• តើពាក្យ ឬឃ្លាមួយណាដែលអ្នកនៅតែមិនយល់នោះ ?

សូមជួយសិស្សឲ្យមានអារម្មណ៍កក់ក្តៅក្នុងការចែករំលែកនូវអ្វីដែលពួកគេបានរកឃើញ ខណៈពេលអញ្ជើញពួកគេឲ្យសូមជំនួយដើម្បីយល់ពីពាក្យ ឬឃ្លាដែលពិបាកៗ ។ ឧទាហរណ៍ ប្រសិនបើសិស្សមានសំណួរអំពីពាក្យ « កោតខ្លាច » នៅក្នុង លូកា ១:៥០ សូមពិចារណារកមើលពាក្យនេះនៅក្នុងសេចក្តីណែនាំដល់បទគម្ពីរទាំងឡាយ ។ការណ៍នេះអាចជួយសិស្សឲ្យយល់ថា « ខ្លាចព្រះគឺមានចិត្តគោរពកោតក្រែង និងស្ងើចស្ញែងដល់ទ្រង់ ហើយគោរពតាមបញ្ញត្តិទាំងឡាយរបស់ទ្រង់ » ( សេចក្ដីណែនាំដល់បទគម្ពីរទាំងឡាយ « កោតខ្លាច, សេចក្ដីកោតខ្លាច » នៅលើគេហទំព័រ scriptures.ChurchofJesusChrist.org ) ។

• តើសេចក្តីពិតអ្វីខ្លះអំពីព្រះដែលអ្នករៀនពីទីបន្ទាល់របស់ម៉ារា ?

សិស្សអាចកំណត់នូវសេចក្តីពិតជាច្រើននៅក្នុងខគម្ពីរដែលពួកគេបានសិក្សានេះ រួមទាំងចំណុចមួយចំនួនដូចខាងក្រោម ៖

យើងអាចរីករាយបានដោយដឹងថា យើងមានព្រះអង្គសង្រ្គោះ ( លូកា ១:៤៧ )

ព្រះអម្ចាស់មានព្រះចេស្តា ហើយទ្រង់អាចធ្វើការណ៍យ៉ាងល្អវិសេស ( លូកា ១:៤៩ )

ព្រះមានសេចក្តីមេត្តាករុណាដល់គ្រប់ទាំងតំណមនុស្ស ហើយគេកោតខ្លាចទ្រង់ ( លូកា ១:៥០ )

ព្រះធ្វើឲ្យមនុស្សដែលមានអំនួតបន្ទាបខ្លួន និងលើកស្ទួយមនុស្សរាបសាឡើង ( លូកា ១:៥២ )

នៅពេលយើងស្រេកឃ្លានខាងវិញ្ញាណ នោះព្រះអម្ចាស់អាចចម្អែតយើងបាន ( លូកា ១:៥៣ )

ព្រះបំពេញការសន្យារបស់ទ្រង់ ( លូកា ១:៥៤ )

សូមពិចារណាអញ្ជើញសិស្សឲ្យសរសេរនៅលើក្តារខៀន នូវសេចក្ដីពិតដែលពួកគេបានរៀនពីការកោតសរសើររបស់ម៉ារា ។

យើងអាចរីករាយនៅក្នុងសេចក្ដីល្អរបស់ព្រះ

សេចក្ដីពិតមួយដែលយើងអាចរៀនពីបទពិសោធន៍របស់ ម៉ារា គឺថា នៅពេលយើងពិចារណាពីឥទ្ធិពលរបស់ព្រះក្នុងជីវិតយើង នោះយើងអាចរីករាយបាន ។

• ហេតុអ្វីបានជាអ្នកគិតថា ការទទួលស្គាល់ព្រះពររបស់ព្រះក្នុងជីវិតរបស់អ្នកអាចជួយឲ្យអ្នកមានអំណរ ?

អែលឌើរ ឌែល ជី រេនឡាន់ នៃកូរ៉ុមនៃពួកសាវកដប់ពីរនាក់ បានចែករំលែកពីរបៀបដែលការចងចាំសេចក្ដីល្អរបស់ព្រះបានប្រទានពរដល់លោក ។

កាលខ្ញុំពិចារណាពីអំណោយទានមកពីព្រះវរបិតាសួគ៌ និងព្រះយេស៊ូវគ្រីស្ទរបស់យើង ខ្ញុំបានដឹងពីសេចក្ដីស្រឡាញ់ដ៏និរន្ដរ៍របស់ទ្រង់ ព្រមទាំងសេចក្ដីមេត្តាករុណាដ៏មិនអាចយល់បានរបស់ទ្រង់សម្រាប់បុត្រាបុត្រីរបស់ព្រះវរបិតាសួគ៌ទាំងអស់ [ សូមមើល នីហ្វៃទី២ ២៦:៣៣ ] ។ ចំណេះដឹងនេះបានផ្លាស់ប្ដូរខ្ញុំ ហើយវានឹងផ្លាស់ប្ដូរបងប្អូនផងដែរ ។

( ឌែល ជី រេនឡាន់ « Consider the Goodness and Greatness of God » Ensign ឬ Liahona ខែ ឧសភា ឆ្នាំ ២០២០ ទំព័រ ៤៤ )

សូមជួយសិស្សឲ្យសញ្ជឹងគិតពីពរជ័យ និងហេតុផលរបស់ពួកគេសម្រាប់ការបង្ហាញសេចក្តីស្រឡាញ់ចំពោះព្រះ ។ សូមទុកពេលឲ្យសិស្សគិតពីរបៀបដ៏មានអត្ថន័យដើម្បីពោលពាក្យសរសើរព្រះវរបិតាសួគ៌ និងព្រះយេស៊ូវគ្រីស្ទ ហើយកត់ត្រាទុកនៅក្នុងសៀវភៅកំណត់ហេតុការសិក្សារបស់ពួកគេ ។

សូមបំពេញជំហានខាងក្រោមដើម្បីជួយអ្នកឲ្យស្គាល់ពីព្រះពររបស់ព្រះវរបិតាសួគ៌ និងពោលពាក្យសរសើរទ្រង់ចំពោះសេចក្ដីល្អរបស់ទ្រង់ ។

ជំហានទី ១ ៖

សូមបង្ហាញសំណួរខាងក្រោម ឬអានឲ្យឮៗ ហើយផ្តល់ពេលវេលាឲ្យសិស្សសញ្ជឹងគិត ។

សូមពិចារណាពីចម្លើយរបស់អ្នកចំពោះសំណួរខាងក្រោម ។

• តើពរជ័យអ្វីខ្លះពីព្រះវរបិតាសួគ៌ដែលអ្នកមានអំណរគុណបំផុត ?

• តើពរជ័យទាំងនេះជួយឲ្យអ្នកយល់ពីព្រះវរបិតាសួគ៌ និងព្រះយេស៊ូវគ្រីស្ទអ្វីខ្លះ ?

• តើនៅពេលណាដែលអ្នកមានអារម្មណ៍រីករាយ ដោយសារតែការស្គាល់ពីពរជ័យរបស់ព្រះសម្រាប់អ្នក ឬនរណាម្នាក់ដែលអ្នកស្គាល់ ?

• តើដំណើររឿង ឬខគម្ពីរណាខ្លះដែលជួយអ្នកឲ្យចង់ពោលសរសើរព្រះ ?

ជំហានទី ២ ៖ សូមជ្រើសរើសរបៀបដែលអ្នកនឹងពោលសរសើរព្រះ ។ នេះគឺជាគំនិតមួយចំនួនដែលអ្នកអាចជ្រើសរើសបាន ៖

• និពន្ធកំណាព្យ ឬចម្រៀង ។

• គូររូបភាព ។

• ថ្វាយការអធិស្ឋានដោយការដឹងគុណ ។

• ថ្លែងទីបន្ទាល់របស់អ្នកទៅកាន់នរណាម្នាក់ ។

• សរសេរនៅក្នុងសៀវភៅកំណត់ហេតុផ្ទាល់ខ្លួន ។

• ចែករំលែកអារម្មណ៍របស់អ្នកអំពីព្រះនៅលើប្រព័ន្ធផ្សព្វផ្សាយសង្គម ។

អ្នកក៏អាចប្រើគំនិតផ្ទាល់ខ្លួនរបស់អ្នកផងដែរ ។ នៅពេលដែលអ្នកបានធ្វើការជ្រើសរើសរួចហើយ សូមចាប់ផ្តើមធ្វើសកម្មភាព ។ ប្រសិនបើមិនអាចចាប់ផ្តើមឥឡូវនេះទេ សូមសរសេរផែនការលម្អិតនៃអ្វីដែលអ្នកនឹងធ្វើ ។ ឧទាហរណ៍ ប្រសិនបើអ្នកចង់ថ្វាយការអធិស្ឋាននៃអំណរគុណ នោះអ្នកអាចសរសេរពីពេលវេលា និងទីកន្លែងដែលអ្នកនឹងអធិស្ឋាន និងអ្វីដែលអ្នកអាចថ្លែងអំណរគុណ ។ អ្នកអាចចែកចាយគំនិតរបស់អ្នកជាមួយឪពុក ឬម្តាយ ឬថ្នាក់ដឹកនាំក្នុងសាសនាចក្រដែលអាចរំឭកអ្នកឲ្យអនុវត្តផែនការរបស់អ្នកបាន ។

សូមទុកពេលឲ្យសិស្សចាប់ផ្តើមអនុវត្តផែនការរបស់ពួកគេ ។ ប្រសិនបើអាចធ្វើទៅបាន សិស្សអាចចែករំលែកបទពិសោធន៍របស់ពួកគេនៅចុងបញ្ចប់នៃមេរៀននេះ ឬមេរៀនបន្ទាប់ ។

វិចារណកថា និង ព័ត៌មានសាច់រឿង

លូកា ១:៤៦–៥៥

។; ហេតុអ្វី ម៉ារា ពោលសរសើរព្រះអម្ចាស់ ?

ខទី ៤៦–៥៥ នៃគម្ពីរ លូកា ១ ត្រូវបានស្គាល់តាំងពីបុរាណថាជាបទចម្រៀងរបស់ ម៉ារា ។ ការពោលសរសើរតម្កើងទាំងនេះផ្សារភ្ជាប់ការប្រសូតរបស់ព្រះយេស៊ូវគ្រីស្ទជាមួយអតីតកាលដ៏ពិសិដ្ឋរបស់អ៊ីស្រាអែល ។ ពាក្យទាំងនេះអបអរដល់សេចក្តីមេត្តាករុណារបស់ព្រះអម្ចាស់ម្តងហើយម្តងទៀត ដើម្បីឈោងទៅប្រទានពរ និងលើកតម្កើងប្រជាជនរបស់ទ្រង់—ជាពិសេសអស់អ្នកដែល « រាបសា » ( លូកា ១:៥២ ) ។

លូកា ១:៥៣

។; តើព្រះចម្អែត « មនុស្សស្រេកឃ្លានដោយសេចក្ដីល្អ » យ៉ាងដូចម្ដេច ?

អែលឌើរ ជេហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបង្រៀនអំពីការអញ្ជើញរបស់ព្រះអង្គសង្គ្រោះឲ្យមករកទ្រង់ ហើយបានចម្អែតដោយ ៖

ខ្ញុំសូមអធិស្ឋាននៅព្រឹកនេះថា អស់អ្នកដែលស្រេកឃ្លាន ហើយពេលខ្លះវង្វេង នឹងឮការអញ្ជើញនេះពីទ្រង់ដែលជានំបុ័ងនៃជីវិត ជាប្រភពទឹកនៃជីវិត ជាអ្នកគង្វាលល្អរបស់យើងទាំងអស់គ្នា ជាព្រះរាជបុត្រានៃព្រះ ៖ « អស់អ្នកដែលនឿយហត់ និងមានបន្ទុកធ្ងន់អើយ ចូរមករកខ្ញុំ ! … នោះអ្នករាល់គ្នានឹងរកបានសេចក្ដីសម្រាកសម្រាប់ព្រលឹងរបស់អ្នករាល់គ្នា » [ ម៉ាថាយ ១១:២៨–២៩ ] ។ ប្រាកដណាស់ ទ្រង់បានចម្អែតដល់ « មនុស្សស្រេកឃ្លានដោយសេចក្ដីល្អ » ដូចដែលម៉ារាជាមាតាផ្ទាល់របស់ទ្រង់បានថ្លែងទីបន្ទាល់ [ លូកា ១:៥៣ ] ។ ខ្ញុំសូមថ្លែងទីបន្ទាល់ថា ការអញ្ជើញមក ហើយបរិភោគនៅតុរបស់ព្រះអម្ចាស់ដែលជាសាសនាចក្រពិត និងសកម្មរបស់ទ្រង់ ត្រូវការដឹកនាំដោយព្យាការីពិត និងកំពុងនៅរស់ ។

( ជែហ្វ្រី អ័រ ហូឡិន « He Hath Filled the Hungry with Good Things » Ensign ខែ វិច្ឆិកា ឆ្នាំ ១៩៩៨ ទំព័រ ៦៦ )

តើមានអ្វីអាចកើតឡើង នៅពេលយើងចងចាំដល់សេចក្ដីល្អរបស់ព្រះ ?

អែលឌើរ ឌីន អិម ដេវីស នៃពួកចិតសិបនាក់បានបង្រៀនដូចខាងក្រោមនេះអំពីអ្វីដែលនឹងកើតឡើង នៅពេលយើងស្គាល់ពីរបៀបដែលព្រះកំពុងប្រទានពរដល់យើង ៖

រៀងរាល់ថ្ងៃ ជាពិសេសនៅថ្ងៃឈប់សម្រាក យើងមានឱកាសដ៏ពិសេសដើម្បីដកពិសោធន៍នូវភាពអស្ចារ្យនៃស្ថានសួគ៌ ហើយថ្វាយការសរសើររបស់យើងចំពោះព្រះសម្រាប់ព្រះទ័យសប្បុរស និងសេចក្ដីមេត្តាករុណាដ៏ធំធេងរបស់ទ្រង់ ។ …

កាលយើងថ្វាយបង្គំ ចិត្តយើងសរសើរតម្កើងព្រះទាំងថ្ងៃទាំងយប់ ។

យើងគោរពទ្រង់ជាបន្តបន្ទាប់—នៅក្នុងសាលាប្រជុំ ផ្ទះ ព្រះវិហារបរិសុទ្ធ និងរាល់កិច្ចការរបស់យើង ។

នៅពេលយើងថ្វាយបង្គំ យើងបើកដួងចិត្តរបស់យើងចំពោះអំណាចនៃការព្យាបាលនៃដង្វាយធួនរបស់ព្រះយេស៊ូវគ្រីស្ទ ។

ជីវិតយើងក្លាយជាភស្តុតាង និងការស្តែងឲ្យឃើញនៃការថ្វាយបង្គំរបស់យើង ។

( ឌីន អិម ដេវីស « The Blessings of Worship » Ensign ឬ Liahona ខែ វិច្ឆិកា ឆ្នាំ ២០១៦ ទំព័រ ៩៥–៩៥ ) ។

សកម្មភាពរៀនសូត្របន្ថែម

សាការីបានសរសើរតម្កើងព្រះ

ក្រៅពីការអានពាក្យសរសើររបស់ម៉ារាដែលជាមាតារបស់ព្រះយេស៊ូវ សូមពិចារណាអញ្ជើញសិស្សឲ្យរៀនសូត្រពីពាក្យសម្ដីរបស់សាការី ដែលជាឪពុករបស់យ៉ូហាន បាទីស្ទ ។ សិស្សអាចអាន លូកា ១:៦៨–៧៩ ដោយរកមើលរបៀបដែលសាការីបានសរសើរតម្កើងព្រះ ។ សិស្សមួយចំនួនអាចអានពាក្យសម្ដីរបស់ម៉ារា រីឯសិស្សផ្សេងទៀតអានពាក្យសម្ដីរបស់សាការី ។ បន្ទាប់មក សិស្សអាចចែកចាយពីអ្វីដែលពួកគេបានរៀនជាមួយគ្នាបាន ។

« O Come, O Come, Emmanuel » ( សូមមក សូមមក អេម៉ាញូអែល )

សារលិខិតនៃបទចម្រៀង « O Come, O Come, Emmanuel »គឺថារាស្រ្តនៃអ៊ីស្រាអែលគួរតែរីករាយនឹងព្រះយេស៊ូវគ្រីស្ទ ដែលយាងមកដើម្បីជួយសង្គ្រោះប្រជារាស្ត្ររបស់ទ្រង់ ។ សូមពិចារណាចាក់ស្ដាប់ ឬផ្តល់ទំនុកបទចម្រៀងនេះ ហើយស្តាប់ការបកស្រាយតន្ត្រី ។ ប្រហែលជាសិស្សអាចចាក់បទចម្រៀងនេះនៅលើឧបករណ៍តន្រ្តីបាន ឬសិស្សក្នុងថ្នាក់អាចមើលវីដេអូដូចជា « O Come, O Come, Emmanuel (The Piano Guys) » ( ៥:២៧ ) ដែលមាននៅលើគេហទំព័រ ChurchofJesusChrist.org ។ សូមអញ្ជើញសិស្សឲ្យសញ្ជឹងគិតពីមូលហេតុដែលយើងរីករាយ ពេលព្រះយេស៊ូវគ្រីស្ទយាងមកផែនដី ។