The painting depicts the Good Samaritan administering to the beaten and injured man stripped of his clothing. A camel rests behind to the right. The scene takes place in a rocky desert setting reminiscent of the Holy Land.
Sa dihang adunay abogado nga nangutana kang Jesus, “Kinsa ang akong silingan?” (Lucas 10:29), mitubag ang Manluluwas pinaagi sa paghatag sa sambingay sa maayong Samaryanhon. Matabangan ka niini nga leksiyon sa pagsunod sa ehemplo ni Jesus sa paghigugma sa silingan.
Pagmarka ug pagbuhat og mubo nga mga sulat diha sa mga kasulatan. Si Elder Richard G. Scott sa Korum sa Napulog Duha ka Apostoles (1928–2015) midapit sa kabatan-onan nga “[markahan] ang importante nga mga kasulatan … ug balik-balika kini sa pagbasa” (“Alang sa Kalinaw sa Panimalay,” Liahona, Mayo 2013, 30). Pangita og mga oportunidad aron dapiton ang mga estudyante nga magmarka ug magbuhat og mubo nga mga sulat diha sa ilang mga kasulatan. Awhaga sila nga buhaton kini sa paagi nga maalamon para nila imbes nga tudloan sila nga buhaton kini sa partikular nga mga paagi.
Pag-andam sa estudyante: Dapita ang mga estudyante nga basahon ang Lucas 10:30–35, nga mangita kon asa nila makita ang mga kinaiya ni Jesukristo niini nga sambingay. Awhaga usab sila nga pangitaon kon asa nila makita ang ilang mga kaugalingon sa sambingay.
Posible nga mga Kalihokan sa Pagkat-on
Lagmit nga makabenepisyo ang mga estudyante gikan sa pagbuhat og labaw sa usa ka sesyon sa klase aron tun-an ang sambingay sa maayong Samaryanhon.
Adunay dugang nga mga kalihokan sa pagkat-on sa “Dugang nga mga Kalihokan sa Pagkat-on” nga seksiyon sa leksiyon.
Para sa mosunod nga kalihokan, dapita ang mga estudyante nga irekord sa ilang mga journal sa pagtuon ang ilang mga tubag sa mosunod nga mga pangutana. Ikonsiderar ang pagpaambit og personal nga kasinatian ug pagdapit og pipila ka boluntaryo nga ipaambit usab ang ilang mga kasinatian.
Pagtabang niadtong nanginahanglan
Paghunahuna og panahon nga adunay tawo nga mitabang kanimo sa dihang nanginahanglan ka og tabang.
Ngano kaha nga gitabangan man ka niining tawhana?
Unsa ang imong gibati tungod sa gibuhat niining tawhana?
Pamalandongi kon unsa kalagmit nga motabang ka sa usa ka tawo nga nanginahanglan ug nganong lagmit o dili lagmit nga motabang ka kanila. Samtang nagtuon ka, pangitaa ang mga kamatuoran nga imong nakat-onan mahitungod kang Jesukristo nga makadugang sa imong tinguha nga tabangan kadtong nanginahanglan.
Usa ka sambingay
Usa ka adlaw samtang nagtudlo si Jesukristo, gipangutana Siya sa usa ka abogado kon unsa ang kinahanglan niyang buhaton aron makadawat og kinabuhing dayon. Gitudlo sa Manluluwas nga aron makabaton og kinabuhing dayon, kinahanglan natong higugmaon ang Dios sa atong tibuok nga mga kasingkasing ug higugmaon ang atong silingan sama sa atong mga kaugalingon (tan-awa sa Lucas 10:27). Unya nangutana ang abogado og laing pangutana.
Basaha ang Lucas 10:29, ug ikonsiderar ang pagmarka sa pangutana nga gisukna sa abogado kang Jesus.
Unsaon man nimo pagtubag ang pangutana sa abogado?
Gitubag ni Jesus ang pangutana sa abogado pinaagi sa pagsulti og sambingay nga nailhan isip ang sambingay sa maayong Samaryanhon. Samtang gitun-an nimo kini nga sambingay, hinumdomi nga ang mga Samaryanhon ug mga Judeo kasagarang nagbiay-biay sa usag usa ug kasagarang gilikayan ang pakiglambigit sa usag usa. Ang usa ka rason nga gikonsiderar sa mga Judeo ang mga Samaryanhon nga dili maayo tungod kay ang mga Samaryanhon adunay parte nga Judeo ug adunay parte nga hentil ug gisagol nila ang duha ka mga gituohan nga relihiyon.
Pagtan-aw sa Manluluwas diha sa sambingay
Tan-awa ang sambingay sa maayong Samaryanhon diha sa Lucas 10:30–35 .
Samtang nagtuon ka niini nga sambingay, hunahunaa kon sa unsang paagi nga ang Samaryanhon nagsimbolo kang Jesukristo.
Ikonsiderar ang pagpakita og hulagway ni Jesukristo sa dili pa isukna ang mosunod nga pangutana:
Unsay atong makat-onan mahitungod ni Jesukristo gikan niini nga sambingay? (Ikonsiderar ang paglista sa imong mga tubag niini nga pangutana diha sa imong journal sa pagtuon.)
Si Elder Neil L. Andersen sa Korum sa Napulog Duha ka Apostoles mitudlo:
Imahe
Official portrait of Elder Neil L. Andersen of the Quorum of the Twelve Apostles, 2010, August.
Ang Manluluwas mao ang atong Maayo nga Samaryanhon, nga gipadala “sa pag-ayo sa masulob-ong kasingkasing” [ Lucas 4:18 ; tan-awa usab sa Isaias 61:1 ]. Moduol Siya kanato samtang moagi ra ang uban. Uban sa kalooy, ibutang Niya ang Iyang makaayo nga tambal sa atong mga samad ug bugkusan kini. Siya moagak kanato. Siya nagpakabana kanato.
(Neil L. Andersen, “Nasamdan,” Liahona, Nob. 2018, 85)
Unsa ang pipila ka mga pananglitan sa mga kasulatan bahin sa Manluluwas nga nagbuhat sa unsay gihulagway ni Elder Andersen?
Kanus-a ang Manluluwas nahimong sama sa maayong Samaryanhon alang kanimo?
Ikonsiderar ang pagpaambit og personal nga kasinatian diin giila nimo ang kalooy sa Manluluwas ug pagkaandam nga tabangan ang tanang naangol sa espirituhanong paagi.
Pagsunod sa ehemplo ni Jesukristo
Pagkahuman sa paghatag sa sambingay sa maayong Samaryanhon, si Jesukristo, ang hanas nga magtutudlo, nangutana sa abogado kon unsa ang iyang nakat-onan ug giawhag ang abogado nga molihok. Basaha ang Lucas 10:36–37 , nga mangita sa pag-awhag sa Manluluwas ngadto sa abogado.
Unsaon nimo paggamit ang pag-awhag sa Manluluwas sa imong kaugalingong kinabuhi?
Unsa ang gitudlo kanimo niini nga pag-awhag mahitungod sa mga pagbati sa Manluluwas para sa tanang mga anak sa Langitnong Amahan?
Aduna kitay daghang mga oportunidad aron sundon ang tambag sa Manluluwas nga “lakaw, ug buhata ang sama sa iyang gibuhat” ( Lucas 10:37) diha sa daghang nagkalain-laing mga lugar nga atong nahimutangan, sama sa balay, eskuwelahan, online, sa atong ward o branch, ug taliwala sa mga estranghero.
Ikonsiderar ang pagbahin sa klase ngadto sa gagmay nga mga grupo aron hisgotan ang mosunod nga mga pangutana. Pagtagana sa kada grupo og usa o labaw pang mga sitwasyon nga nakalista sa miaging parapo [paragraph] nga pokusan samtang gitubagan nila kini nga mga pangutana.
Unsang pipila ka partikular nga paagi nga makasunod ka sa ehemplo sa Manluluwas sa pagpakita og paghigugma sa imong silingan niini nga sitwasyon?
Unsa ang makapalisod sa pagpakita og paghigugma sa imong silingan niini nga sitwasyon?
Kon naglisod ang usa ka tawo sa pagpakita og paghigugma sa ilang silingan niini nga sitwasyon, unsa ang matudlo nimo kanila mahitungod kang Jesukristo nga lagmit nga makatabang?
Pagkahuman sa pagtapos sa mga estudyante sa ilang panaghisgotan, pag-awhag og mga boluntaryo gikan sa kada grupo aron ipaambit ang pipila sa ilang mga tubag.
Dapita ang mga estudyante nga maghunahuna sa kon unsa ang ilang nakat-onan niini nga leksiyon. Ikonsiderar ang paghatag kanila og panahon aron isulat ang ilang mga hunahuna ug mga impresyon diha sa ilang mga journal sa pagtuon. Ikonsiderar usab ang paghatag sa mga estudyante og oportunidad nga ipaambit sa unsay ilang gibati nga nadasig sa pagbuhat tungod sa ilang nakat-onan karong adlawa.
Unsa man ang butang nga gibati nimo nga nadasig sa pagbuhat isip resulta sa imong nakat-onan karong adlawa?
Komentaryo ug Background nga Impormasyon
Sa unsang paagi nga ang sambingay sa maayong Samaryanhon usa ka simbolo sa atong panaw sa kinabuhi?
Si Elder Gerrit W. Gong sa Korum sa Napulog Duha ka Apostoles mitudlo:
Imahe
Official Portrait of Gerrit W. Gong. Photographed in 2018.
Sa atong abogon nga mga dalan paingon sa Jericho, kita gidagmalan, gisamaran, ug gibiyaan diha sa kasakit.
Bisan kon kinahanglan kita nga magtinabangay sa usag usa, kasagaran motipas kita sa pikas bahin sa dalan, tungod sa bisan unsa nga rason.
Hinoon, uban sa kalooy, ang Maayong Samaryanhon mohunong ug mohunad sa atong mga samad gamit ang bino ug lana. Mga simbolo sa sakramento ug sa ubang mga ordinansa, ang bino ug lana mopunting kanato ngadto sa espirituhanong pagkaayo diha ni Jesukristo. Ang Maayong Samaryanhon nagpasakay kanato sa Iyang kaugalingong asno o, sa pipila ka asoy sa stained-glass, nagpas-an kanato sa Iyang mga abaga. Siya nagdala kanato sa balay abotanan, nga mahimong magrepresentar sa Iyang Simbahan. Sa Balay Abotanan, ang Maayong Samaryanhon nag-ingon, “Atimana siya; … inig balik nako dinhi, bayran ko ikaw sa imong magasto” [ Lucas 10:35 ]. Ang Maayong Samaryanhon, usa ka simbolo sa atong Manluluwas, nagsaad nga mobalik, niining higayona diha sa kaharianon ug himaya.
Nganong migamit man ang Manluluwas og Samaryanhon imbes nga Judeo isip ang tawo nga mitabang sa nasamdan nga tawo?
Si Presidente M. Russell Ballard sa Korum sa Napulog Duha ka Apostoles mipasabot:
Imahe
Official portrait of President M. Russell Ballard of the Quorum of the Twelve Apostles, 2004.
Adunay dakong panagbingkil tali sa mga Judeo ug sa mga Samaryanhon sa panahon ni Kristo. Ubos sa normal nga mga kahimtang, kining duha ka grupo kasagaran naglikay sa pakig-uban sa usag usa. Maayo unta gihapon kadto nga sambingay sa pagtudlo kon ang tawo nga nabiktima sa mga kawatan naluwas sa usa ka igsoon nga Judeo.
Ang iyang gituyo nga paggamit sa mga Judeo ug mga Samaryanhon klarong nagtudlo nga kitang tanan mga silingan ug angay kitang maghigugmaay, magtinahoray, magrespetohay, ug magserbisyo sa usag usa bisan pa man sa atong hilabihan nga mga panaglahi—lakip sa relihiyon, politikanhon, ug kultural nga mga panaglahi.
(M. Russell Ballard, “Doctrine of Inclusion,” Ensign o Liahona, Nob. 2001, 36)
Unsa ang angay nakong buhaton kon adunay mga oportunidad sa pagtabang sa ubang tawo sa dili mga panahon sa kasayon?
Si Presidente M. Russell Ballard, Akting nga Presidente sa Korum sa Napulog Duha ka Apostoles, mitudlo:
Imahe
Official portrait of President M. Russell Ballard of the Quorum of the Twelve Apostles, 2004.
Ang mga oportunidad sa pagserbisyo sa uban sa makahuluganong mga paagi, sama sa atong gipakigsaaran nga buhaton, panagsa ra moabot sa mga panahon sa kakomportable. Pero walay espiritwal nga gahom kon mobuhat lamang kita og butang diha sa kasayon. Moabot ang gahom samtang nagtuman kita sa atong mga pakigsaad.
(M. Russell Ballard, “Like a Flame Unquenchable,” Ensign, Mayo 1999, 86)
Si Presidente Thomas S. Monson (1927–2018) nagpahinumdom kanato:
Imahe
Official portrait of President Thomas S. Monson, 2008.
Ayaw himoang mas importante ang sulbarunon nga problema kay sa tawo nga angay nga higugmaon.
(Thomas S. Monson, “Pagpangita og Kalipay Panahon sa Panaw,” Liahona, Nob. 2008, 86)
Dugang nga mga Kalihokan sa Pagkat-on
Mga pagkapareho tali sa sambingay sa maayong Samaryanhon ug sa plano sa kaluwasan
Dapita ang mga estudyante nga basahon ang Lucas 10:30–35 , nga mangita kon sa unsang paagi nga ang maayong Samaryanhon mahimong nagsimbolo sa plano sa kaluwasan. Ang pipila ka mga simbolo naglakip sa mosunod:
Pagnaog gikan sa Jerusalem: pagbiya sa premortal nga kinabuhi ug pag-anhi sa yuta
Usa ka tawo: kita
Samaryanhon: Jesukristo
Paglakaw sa dalan padulong sa Jerico: kini nga mortal nga panaw
Dapita ang mga estudyante nga hisgotan kon unsa nga mga leksiyon ang gitudlo sa sambingay mahitungod sa pagkamortal ug pagbalik ngadto sa Amahan. Pagsukna og follow-up nga mga pangutana sama niini: Unsa ang pipila ka mga paagi nga mahimo kitang nasamdan sa espirituhanong paagi sa atong panahon dinhi sa yuta? Unsa ang imong kasinatian sa Manluluwas nga gibugkosan ang imong mga samad?
Pagtuon sa sambingay gikan sa mga panglantaw sa pari ug Levita
Ikonsiderar ang pagdapit sa mga estudyante nga tun-an ang sambingay gikan sa mga panglantaw sa pari ug sa Levita. Dapita sila nga maghunahuna mahitungod sa pipila sa posibleng mga rason kon nganong wala mohunong ang pari ug ang Levita aron tabangan ang tawo nga nanginahanglan.
Hangyoa ang mga estudyante nga ikompara kini nga posibleng mga rason sa ilang mga kaugalingong tubag sa mga oportunidad sa pagpangalagad. Dapita ang mga estudyante nga pamalandongan kon unsaon nila pagbuntog ang ilang kaugalingong mga babag sa paghigugma ug pagpangalagad sa ilang silingan.
Pagkat-on samtang moadto kita sa balay abotanan sa Ginoo (Simbahan)
Si Elder Gerrit W. Gong sa Korum sa Napulog Duha ka Apostoles nagkompara sa balay abotanan gikan sa sambingay sa maayong Samaryanhon ngadto sa Simbahan sa Ginoo (tan-awa sa “Lawak sa Balay Abotanan,” Liahona, Mayo 2021, 24–25). Gisugyot niya nga makakat-on kita og importante nga mga leksiyon mahitungod sa atong mga kaugalingon ug ni Jesukristo kon kita moadto sa Iyang balay abotanan. Ikonsiderar ang pagpili ug pagdapit sa mga estudyante nga tun-an ang mga bahin niini nga pamahayag aron makahibalo pa og dugang mahitungod sa kon sa unsang paagi sila makatabang sa ubang tawo nga masinati ang pag-ayo nga gitanyag sa Manluluwas pinaagi sa pagdapit kanila ngadto sa Iyang Simbahan.
