Ang Sambingay mahitungod sa Sulugoon nga Wala Mopasaylo
Imahe
Scenes from an outdoor market, money changer’s table with coin trays. Outtakes include coins in pan of a balance scale, clay lamps that are lit on a ledge, and some chickens.
Isip tubag sa pangutana nga gisukna ni Pedro mahitungod sa pagpasaylo, gitudlo ni Jesukristo ang sambingay mahitungod sa sulugoon nga wala mopasaylo. Makatabang kini nga leksiyon kanimo nga mahimong mas mahisama sa Langitnong Amahan ug ni Jesukristo samtang naningkamot ka nga pasayloon ang ubang tawo.
Pagpaambit og tinuod nga mga istorya ug mga asoy. Aron makatabang nga madugangan ang interes sa mga estudyante sa usa ka leksiyon, ikonsiderar ang pagpaambit og tinuod nga mga istorya o mga asoy gikan sa mga kinabuhi sa mga propeta ug sa kasaysayan sa Simbahan ingon man sa mga pakigpulong gikan sa kinatibuk-ang komperensiya, mga magasin sa Simbahan, o imong kaugalingong kinabuhi. Kini nga mga istorya makalig-on sa hugot nga pagtuo sa mga estudyante diha sa ebanghelyo ni Jesukristo pinaagi sa pagtabang kanila nga makasabot sa ebanghelyo pinaagi sa mga kasinatian sa ubang tawo.
Pag-andam sa estudyante: Sa usa ka tudling sa kasulatan sa doktrinal nga kahanas, gipahayag sa Ginoo, “Kamo gikinahanglan nga mopasaylo sa tanan nga mga tawo” ( Doktrina ug mga Pakigsaad 64:10). Dapita ang mga estudyante nga pamalandongan kon nganong gimandoan man kita ni Jesukristo nga mopasaylo sa usag usa. Lagmit nga maayo usab nga dapiton ang mga estudyante nga basahon ang Doktrina ug mga Pakigsaad 64:9–11 ug pamalandongan ang mensahe sa Ginoo niadto nga mga bersikulo.
Posible nga mga Kalihokan sa Pagkat-on
Sa kinatibuk-an niini nga leksiyon, pagpabiling sensitibo sa mga estudyante nga lagmit nga naglisod sa pagpasaylo sa usa ka tawo nga nakapasakit kanila. Ikonsiderar ang paggamit sa pipila sa mga pamahayag nga anaa sa seksiyon nga “Komentaryo ug Background nga Impormasyon” nga lagmit nga makatabang para sa mga estudyante nga nag-atubang sa mao nga mga sitwasyon.
“Pasayloon mo ba ako?”
Sa panahon sa Ikaduhang Gubat sa Kalibotan, ang usa ka babaye nga ginganlan og Corrie ten Boom nag-antos sulod sa pipila ka buwan didto sa sulod sa kampo sa Nazi sa Ravensbrück, Germany. Namatay didto ang iyang igsoong babaye nga si Betsie. Pagkahuman sa gubat, namahayag si Corrie sa usa ka grupo sa mga tawo mahitungod sa pagpasaylo sa Dios. Si Bishop Keith B. McMullin, kanhi sakop sa Presiding Bishopric, naghulagway sa nahitabo pagkahuman sa iyang pamahayag. Samtang nagbasa ka, paghunahuna og mga paagi nga lagmit nga pilion nga reaksyon ni Corrie.
Imahe
Final official portrait of Elder Keith B. McMullin of the Presiding Bishopric, 1996. Released at the April 2012 general conference.
Usa ka tawo miduol kaniya. Nakaila siya kaniya nga usa sa dagmalan kaayo nga guwardiya sa kampo. “Ikaw naghisgot og Ravensbruck sa imong pagpamulong,” siya miingon. “Usa ako ka guwardiya didto. … Apan sukad nianang higayona, … nahimo na ako nga Kristiyano.” Mipasabot siya nga nagtinguha siya sa kapasayloan sa Dios tungod sa pagpangdagmal nga iyang nabuhat. Siya mitunol sa iyang kamot og nangutana, “Pasayloon mo ba ako?” [Corrie ten Boom, Tramp for the Lord (1974), 56].
(Keith B. McMullin, “Ang Atong Dalan sa Katungdanan,” Liahona, Mayo 2010, 13)
Unsa nga mga hunahuna ang lagmit nga nahunahunaan ni Corrie niadtong higayona?
Nganong lisod man ang pagpasaylo sa ubang tawo?
Basaha ang Mateo 18:21–22 aron mahibaloan kon giunsa pagtubag ni Jesus ang pangutana nga gisukna ni Pedro mahitungod sa pagpasaylo.
Unsaon man ninyo sa pagpasabot ang gitudlo ni Jesus kang Pedro?
Ngano kaha nga gisugo man kita sa Ginoo nga mahimong mapasayloon nga mga tawo?
Bisan pa kon adunay daghang importante nga baroganan nga may kalabotan sa pagpasaylo, nagpokus kini nga leksiyon sa atong tinguha sa pagpasaylo sa ubang tawo sama sa pagpasaylo ni Jesukristo kanato. Base sa mga tubag sa mga estudyante sa sunod nga pangutana, ikonsiderar ang pagpahiangay sa leksiyon aron matubag ang ilang mga panginahanglan.
Unsa nga mga pangutana ang aduna ka mahitungod sa sugo sa Manluluwas nga pasayloon nato ang ubang tawo?
Pamalandongi ang imong gibati mahitungod sa pagpasaylo. Aduna bay usa ka tawo nga naglisod ka sa pagpasaylo? Sa imong journal sa pagtuon, isulat kon sa unsang paagi mapanalanginan ang imong kinabuhi kon makapasaylo ka niadtong nakapasilo kanimo. Ikonsiderar usab ang pagrekord kon sa unsang paagi nga lahi ang imong kinabuhi kon wala ka naningkamot sa pagpasaylo sa ubang tawo.Samtang nagtuon ka og sambingay nga gipaambit sa Ginoo kang Pedro, pangitaa kon sa unsang paagi nga ang pagkaandam sa Ginoo sa pagpasaylo kanato makapalig-on sa imong abilidad sa pagpasaylo sa ubang tawo.
Ang sambingay mahitungod sa sulugoon nga wala mopasaylo
Basaha ang Mateo 18:23–27 , nga mangita kon giunsa pagtratar sa hari diha sa sambingay ang nakautang kaniya. Importante nga mahibaloan nga dili mabayrang utang ang 10,000 ka talanton [talent]. Kinahanglang magtrabaho ang pobreng trabahador sa panahon ni Jesus og labaw sa 250,000 ka tuig aron mokita nianang dako nga kantidad (tan-awa ang sinulat ni Jay A. Parry ug Donald W. Parry, Understanding the Parables of Jesus Christ [2006], 95).
Ngano kaha nga migamit man si Jesukristo og dili mabayrang utang aron itudlo kini nga sambingay?
Basaha ang uban pang bahin sa sambingay sa Mateo 18:28–35 , nga mangita kon sa unsang paagi nato angay nga trataron ang usag usa ug ngano. Makatabang nga mahibaloan nga ang 100 ka denario mokabat sa “tulo ka buwan nga suweldo sa pobreng trabahador” ( bersikulo 28).
Unsa ang imong nakat-onan mahitungod sa pagpasaylo gikan niini nga sambingay?
Nganong importante man nga masabtan kon unsa ka dako nga kaluoy ang gihatag sa Manluluwas kanato?
Ang usa ka kamatuoran nga makat-onan nato gikan niini nga sambingay mao nga makasunod kita sa ehemplo ni Jesukristo pinaagi sa pagpasaylo sa ubang tawo sama sa Iyang pagpasaylo kanato.
Gihatagan og gibug-aton sa Ginoo ang importansiya sa pagpasaylo sa ubang tawo sa atong dispensasyon. Basaha ang Doktrina ug mga Pakigsaad 64:9–11 , nga mangita sa mga pagtulon-an sa Ginoo mahitungod sa pagpasaylo.
Base sa imong nakat-onan karon, ngano kaha nga gisugo kita sa Ginoo nga pasayloon ang tanang tawo?
Makatabang kanato si Jesukristo sa pagpasaylo sa ubang tawo
Usahay lisod ang paghatag og pasaylo sa ubang tawo. Pero sa tabang sa Manluluwas, posible ang tanang mga butang.
Samtang nagbasa ka sa kataposan sa istorya ni Bishop McMullin mahitungod kang Corrie nga nag-atubang sa iyang kanhi guwardiya sa prisohan, tan-awa kon giunsa paghatag sa Manluluwas kaniya og kalig-on sa pagpasaylo.
Mahimo nimong tan-awon ang video nga “Ang Atong Dalan sa Katungdanan,” nga anaa sa ChurchofJesusChrist.org, gikan sa code sa oras nga 2:16 hangtod sa 3:26.
Imahe
Final official portrait of Elder Keith B. McMullin of the Presiding Bishopric, 1996. Released at the April 2012 general conference.
“Dili unta daghang mga gutlo ang iyang pagbarog didto—kamot gitunol—pero para kanako ingon og pipila ka oras samtang ako nanglimbasog sa labing malisud nga butang nga akong mabuhat.
“… Ang mensahe nga ang Dios mopasaylo adunay … kondisyon: nga atong pasayloon kadtong nakapasakit kanato. …
“… ‘Tabangi ko!’ Ako nag-ampo sa hilom. ‘Akong maalsa ang akong kamot. Ako makahimo niana. Ihatag kanako kana nga pagbati.’
“… Sa kalit lang, nga walay paghunahuna, akong gitunol ang akong kamot ngadto sa kamot nga gitunol diri kanako. Sa dihang gibuhat nako, usa ka dili katuohang butang ang nahitabo. Ang kainit nagsugod sa akong abaga, mikatay paubos sa akong [bukton], midagayday sa nag-abot namong mga kamot. Ug dayon kining makaayo nga kainit ingon og misanap sa akong tibuok nga pagkatawo, nagdala og luha sa akong mga mata.
“‘Gipasaylo ko ikaw, igsoon!’ Mihilak ako. ‘Uban sa tibuok kong kasingkasing.’
“Taud-taod nga naglamanohay ang among mga kamot, ang kanhi guwardiya ug ang kanhi binilanggo. Wala pa ako makasinati og gugma sa Dios nga hilabihan ka kusog, nga sama niadto nga akong nasinati” [Corrie ten Boom, Tramp for the Lord (1974), 54–55].
(Keith B. McMullin, “Ang Atong Dalan sa Katungdanan,” Liahona, Mayo 2010, 13)
Unsa ang imong nakat-onan gikan sa kasinatian ni Corrie nga makatabang kanimo sa pagpasaylo kon lisod kini?
Unsa ang imong nakat-onan gikan sa imong kaugalingong kinabuhi, sa mga kinabuhi sa ubang tawo, o sa mga kasulatan mahitungod sa kon unsaon pagpasaylo ang ubang tawo kon lisod kini?
Ang usa ka butang nga makatabang kanato samtang nagtuon kita sa mga kasulatan mao ang pagkat-on gikan niini ug dayon pagtinguha nga mapalambo ang mga kinaiya ni Jesukristo. Ang Mateo 18:21–35 usa sa daghang mga tudling sa kasulatan nga nagpakita sa mapasayloong kinaiyahan sa Manluluwas ug sa hustisya usab sa Dios kon pilion nato nga dili mopasaylo. Hunahunaa kon unsa ang imong mabuhat aron mahimong mas mapasayloong tawo sama ni Jesukristo. Unsaon nimo pagdapit sa Manluluwas nga tabangan ka?
Komentaryo ug Background nga Impormasyon
Mateo 18:24 . Unsa ka dakong kuwarta ang 10,000 ka talanton?
Si Elder Jeffrey R. Holland sa Korum sa Napulog Duha ka Apostoles mitudlo:
Imahe
Official Portrait of Elder Jeffrey R. Holland. Photographed January 2018.
Adunay managlahing opinyon tali sa mga eskolar kabahin sa bili sa salapi nga gihisgutan dinhi—ug pasensya na nga kwarta sa U.S. ang hisgutan—apan aron sayon ang pagkwenta, kon ang mas gamay, wala mapasaylo nga 100 ka denario nga utang, maingon ta, $100 sa kasamtangang panahon, niana ang 10,000 ka talanton nga utang nga dali kaayong gipasaylo moabut na og $1 billion—o sobra pa!
Isip personal nga utang, dako kaayo kana nga numero—hingpit nga lapas sa atong panabut. (Walay makapamalit og ingon niana ka dako!) Hinoon, alang sa katuyoan niini nga sambingay, gidahuman nga dili kini matukib; gidahuman nga lapas kini sa atong abilidad sa pagsabut, gawas pa nga lapas kini sa atong abilidad sa pagbayad. Kana tungod kay dili kini istorya kabahin sa duha ka ulipon nga naglalis sa Bag-ong Tugon. Istorya kini kabahin kanato, ang napukan nga tawhanong pamilya—ang tanan mga mortal nga utangan, malapason, ug binilanggo. Ang matag usa kanato utangan, ug ang hukom mao ang pagkabilanggo sa matag usa kanato. Ug didto kitang tanan magpabilin unta kon dili pa tungod sa grasya sa atong Hari, kinsa mipalingkawas kanato tungod kay Siya nahigugma kanato ug “[mi]bati og kalooy ngari kana[to]” [ Doktrina ug mga Pakigsaad 121:4 ].
Ang pagbati ba og kasakit tungod sa unsay gibuhat ngari kanako nagpasabot ba nga wala pa nako mapasaylo ang usa ka tawo?
Si Elder Jeffrey R. Holland sa Korum sa Napulog Duha ka Apostoles mitudlo:
Imahe
Official Portrait of Elder Jeffrey R. Holland. Photographed January 2018.
Hinoon, importante kini, alang sa pipila kaninyo nga nagsinati sa tinuod nga kasakit nga maghunahuna nga wala [si Jesukristo] mag-ingon. Wala Siya mag-ingon, “Kamo wala tuguti nga mobati og tinuod nga kasakit o tinuod nga kaguol gikan sa [maka]pusgay nga mga kasinatian nga imong naangkon gikan sa uban.”
(Jeffrey R. Holland, “Ang Pagpangalagad sa Pagpasig-uli,” Liahona, Nob. 2018, 79)
Si Elder David E. Sorensen sa Seventy nagtudlo og importante nga kamatuoran mahitungod sa sugo nga mopasaylo.
Imahe
Unofficial portrait of Elder David E. Sorensen of the Presidency of the Seventy, 2004. DO NOT USE.
Buot nakong ipatin-aw nga ang pagpasaylo sa mga sala dili gay[o]d ikalibog nga kini nagtugod sa dautan. … Bisan tuod kita kinahanglan mopasaylo sa usa ka silingan kinsa nakapasakit kanato, kinahanglan kita maningkamot nga makatabang nga malikayan ang maong pagpasakit nga masubli.
(David E. Sorensen, “Ang Pagpasaylo Makapausab sa Kaligutgot ngadto sa Gugma,” Liahona, Mayo 2003, 12)
Unsa ang buot ipasabot sa Manluluwas sa dihang gisultihan Niya si Pedro nga pasayloon ang ubang tawo “kondili kapitoan ka pito”? ( Mateo 18:22)
Si Elder Lynn G. Robbins, kanhi sakop sa Kapangulohan sa Seventy, mipasabot:
Imahe
Former Official Portrait of Elder Lynn G. Robbins. Photographed March 2017. Replaced October 2019 (with Telescope ID: 2298123)
Ang Manluluwas misulti gay[o]d ni Pedro nga dili mag-ihap—sa dili pag-establisar og kinutuban sa pagpasaylo. …
Klaro kaayo nga, ang Manluluwas wala mag-establisar og pinakataas nga kinutuban nga 490. Kana matandi sa pag-ingon nga ang pag-ambit sa sakramento adunay kinutuban nga 490, ug dayon sa ika-491 nga higayon ang langitnong awditor motabang sa paghusay ug moingon, “Pasayloa ko ang imong kard sa paghinulsol na-expire na—gikan karon ug sa unahan, mag-inusara ka na.”
Ang Ginoo migamit sa math nga kapitoan pil-on og kapito isip usa ka simbolo sa Iyang walay kinutuban nga Pag-ula, ang Iyang walay utlanan nga gugma, ug ang Iyang walay katapusan nga grasya. “Oo, ug ingon sa kanunay nga ang akong mga katawhan maghinulsol Ako mopasaylo kanila sa ilang mga kalapasan batok kanako” [ Mosiah 26:30 ; emphasis gidugang].
(Lynn G. Robbins, “Kon Dili Kapitoan Ka Pito,” Liahona, Mayo 2018, 23)
