Lucas 10:38–42

Pagsentro sa Atong mga Kinabuhi diha kang Jesukristo

Sa dihang nagtudlo si Jesus sa balay ni Marta, nakabaton Siya og oportunidad nga magtudlo mahitungod sa importansiya sa paghimong prayoridad sa Iyang mga pagtulon-an diha sa atong mga kinabuhi. Matabangan ka niini nga leksiyon sa pagtuki sa mga kapilian ug mga kalihokan nga makatabang kanimo nga himuong sentro sa imong kinabuhi si Jesukristo ug ang Iyang ebanghelyo.

Pag-andam sa estudyante: Dapita ang mga estudyante nga magbuhat og listahan sa mga kalihokan nga gibuhat nila sa usa ka adlaw sa wala pa kini nga leksiyon ug dad-on ang ilang listahan nganha sa klase.

Posible nga mga Kalihokan sa Pagkat-on

Mga Prayoridad

Ikonsiderar ang pagdala sa klase og usa ka sudlanan ug mga bato nga lain-lain ang gidak-on. Siguroha nga magdala og mas daghang mga bato kay sa masulod sa sudlanan. Dapita ang usa estudyante nga sulayan sa pagbutang og daghang mga bato kutob sa masulod sa sudlanan. Isukna ang mosunod nga pangutana: “Kon girepresenta niini nga mga bato ang posible nga mga kalihokan nga mabuhat nato sa usa ka adlaw, unsaon pagkompara niini nga leksiyon nga gigamitan og butang nganha sa atong mga kinabuhi?”

Sa kada adlaw magbuhat kita og daghang mga desisyon mahitungod sa kon unsaon paggamit ang atong oras.

Si Presidente Dallin H. Oaks sa Unang Kapangulohan mitudlo:

Kasagaran kanato gilauman nga makabuhat og daghang mga butang kaysa sa atong mahimo. … Nag-atubang kita og daghang mga kapilian sa kon unsay atong buhaton sa atong oras ug ubang mga kapanguhaan.

(Dallin H. Oaks, “Maayo, Mas Maayo, Labing Maayo,” Liahona, Nob. 2007, 104)

Kon nakompleto sa mga estudyante ang gisugyot nga kalihokan sa pag-andam, dapita sila nga tan-awon ang listahan nga ilang gihimo.

Paghunahuna mahitungod sa kon unsa sa mosunod nga mga pamahayag ang naghulagway kanimo (mahimo kang mopili og labaw sa usa).

1. Naggahin ako og oras para sa mga espirituwal ug temporal nga kalihokan.

2. Gusto nako nga mosunod sa Manluluwas pero sa kasagarang gibati nga busy kaayo sa uban pang mga buluhaton.

3. Ang akong kinabuhi nakasentro diha kang Jesukristo.

4. Dili ako interesado sa paggahin og oras aron mas mahiduol kang Jesukristo.

Sa panahon niini nga leksiyon, makakat-on ka mahitungod sa asoy sa kasulatan nga nagtudlo sa importansiya sa pagbutang kang Jesukristo sa sentro sa atong mga kinabuhi. Paghatag og pagtagad sa mga pag-aghat gikan sa Espiritu Santo nga makatabang kanimo sa pagsabot kon unsaon paghimo kang Jesukristo nga imong pinakataas nga prayoridad.

Ang Manluluwas nagtudlo kang Maria ug Marta

Sa dihang miadto ang Manluluwas sa Betania, mibisita Siya sa balay sa usa ka babaye nga ginganlan og Marta, usa ka matinud-anon ug mahalaron nga disipulo.

Basaha ang Lucas 10:38–42 , nga maghatag og pagtagad sa kon unsa ang imong makat-onan gikan sa ehemplo ug mga pulong sa Manluluwas. Tingali makatabang nga masabtan nga ang pulong nga nagkapuliki nagpasabot nga nabalaka o naglisod.

• Unsa ang gitudlo niini nga asoy kanimo mahitungod kang Jesukristo ug sa Iyang mga tinguha para kanato?

• Sa unsa nga paagi nga ang gipili ni Maria angay para niini nga sitwasyon?

Ang usa ka kamatuoran nga atong makat-onan gikan niini nga asoy mao nga ang mga kapilian nga mas makapahiduol kanato kang Jesukristo kinahanglang hatagan og pinakataas nga prayoridad sa atong mga kinabuhi.

• Ngano kaha nga gusto sa Langitnong Amahan nga ibutang nato ang Iyang Anak nga si Jesukristo sa sentro sa atong mga kinabuhi?

Imbes mangalagad si Maria sa ubang tawo, gipili niya nga makakat-on gikan kang Jesukristo, nga mao ang pinakaimportanteng butang nga mabuhat niya niadto nga panahon (tan-awa sa Lucas 10:42).

Si Presidente Dallin H. Oaks mipasabot kon sa unsang paagi nga kita nag-atubang sa parehong mga kapilian:

Tungod lamang kay ang usa ka butang maayo kini dili igo nga rason sa pagbuhat niini. Ang gidaghanon sa maayong mga butang nga atong mahimo sobra kadaghan kay sa panahon nga magamit sa pagbuhat niini. Pipila sa mga butang mas maayo kay sa maayo, ug kini mao ang mga butang nga nagkinahanglan nga unang hatagan og pagtagad sa atong kinabuhi.

(Dallin H. Oaks, “Maayo, Mas Maayo, Labing Maayo,” Liahona, Nob. 2007, 104)

Ikonsiderar ang paghimo og duha ka kolum nga listahan sa pisara nga adunay mga ulohan nga Dili Kaayo Importante ug Mas Importante. Unya isulat ang mga tubag sa mga estudyante sa mosunod nga mga pangutana diha sa ubos sa tukma nga kolum.

• Unsa ang pipila sa dili kaayo importante nga mga butang sa imong kinabuhi nga makabalda kanimo gikan kang Jesukristo?

• Unsa ang pipila ka kapilian nga mabuhat nimo nga mas makapahiduol kanimo kang Jesukristo?

• Unsa ang makatabang kanimo aron himoon nga imong pinakataas nga prayoridad ang pinakaimportante nga mga kapilian?

Kon gihimo ang kalihokan nga naggamit og bato diha sa leksiyon, mahimong dapiton ang mga estudyante nga isulat sa mga bato ang pipila sa mga kalihokan nga gilista sa pisara. Mahimo silang magsulat og mga kalihokan nga mas nakapahiduol kanila kang Jesukristo diha sa pinakadagkong mga bato ug ang dili kaayo importante nga mga kalihokan diha sa igo-igo o gagmay nga mga bato. Mahimong ipraktis sa mga estudyante ang pagbutang una sa mas dagkong mga bato sa sudlanan, ug magpadayon sa mas gagmay nga mga bato hangtod nga wala nay espasyo ang sudlanan.

• Unsa nga mga panalangin ang imong nasinati pinaagi sa pagbuhat og mga paningkamot aron isentro ang imong kinabuhi diha kang Jesukristo?

Paghimo og plano

Kon naghimo na ang pipila ka estudyante og listahan sa ilang mga inadlaw nga kalihokan sa pag-andam para sa klase, ipahiangay kini nga mga instruksiyon.

Pagbuhat og listahan sa imong kasagarang inadlaw nga mga kalihokan, ug tukia kon unsa nga mga kalihokan ang nakatabang kanimo nga mas mahiduol sa Manluluwas. Paghunahuna og bisan unsang butang nga lagmit nga imong idugang o tangtangon base sa imong nakat-onan ug gibati karong adlawa. Pagbuhat og partikular nga plano sa kon unsa ang imong buhaton aron mas masentro ang imong kinabuhi diha sa Manluluwas.

Ikonsiderar ang pagdapit og mga boluntaryo nga magpaambit sa ilang plano. Pangita og mga paagi sa pagdayeg sa mga estudyante sa mga butang nga ilang gibuhat aron magpokus sa Manluluwas. Pagpaambit og pagpamatuod mahitungod sa mga panalangin nga moabot tungod sa pagsentro sa atong mga kinabuhi diha sa Manluluwas.

Komentaryo ug Background nga Impormasyon

Giunsa pagsulay ni Satanas nga pugngan kita sa paggamit sa atong oras sa maalamong paagi?

Si Presidente Steven W. Owen, kanhi Kinatibuk-ang Presidente sa Young Men, mipahayag:

Ang kaaway mosulay sa pagdani kaninyo nga wala kinahanglana ang espiritwal nga pag-alima o, sa mas maliputon nga paagi, nga kini makahulat ra. Siya ang agalon sa pagbalda ug tigpasiugda sa pag-unya-unya. Siya modani kanimo ngadto sa mga butang nga ingon og dinalian, pero sa pagkatinuod, dili ingon ka importante. Gusto siya nga mahimo kang “malibog ug nagkapuliki sa daghang mga butang” nga imong gibaliwala ang “usa ka butang [nga] gikinahanglan” [ Lucas 10:41–42 ].

(Steven W. Owen, “Magmatinud-anon, Dili ang Kawalay Pagtuo,” Liahona, Nob. 2019, 13)

Si Elder Richard G. Scott (1928–2015) sa Korum sa Napulog Duha ka Apostoles mipahayag:

Aduna bay daghan kaayong makadani ug makalingaw nga mga butang nga buhaton o daghan kaayong mga hagit nga midat-og kanimo nga lisod nga magpabiling nakapokus sa kon unsa ang importante? Kon ang mga butang sa kalibotan mosulod sa hunahuna sa usa ka tawo, kasagaran gayod nga hatagan og pinakataas nga prayoridad ang mga sayop nga butang. Unya sayon ra nga kalimtan ang importante nga katuyoan sa kinabuhi. Si Satanas adunay gamhanan nga himan nga gamiton batok sa maayo nga mga tawo. Kini mao ang pagbalda. Iyang pun-on ang kinabuhi sa maayo nga mga tawo og “maanindot nga mga butang” aron wala nay luna para sa mahinungdanong mga butang. Wala ka ba nakamatikod nga nasakpan niana nga lit-ag?

(Richard G. Scott, “First Things First,” Ensign, Mayo 2001, 7)

Unsa ang pipila ka peligro sa paghukom sa mga pagpili sa laing tawo?

Si Presidente Bonnie D. Parkin, kanhi Kinatibuk-ang Presidente sa Relief Society, mipahayag:

Sulod sa paghangyo ni Marta og tabang mao ang wala gisulti pero klaro nga paghukom: “Sakto ko; sayop siya.”

Mohukom ba kita sa usag usa? Mosaway ba kita sa usag usa tungod sa indibidwal nga mga kapilian, nga naghunahuna nga mas nakahibalo kita, nga sa pagkatinuod wala nato masabti ang talagsaon nga sitwasyon sa laing tawo o indibidwal nga inspirasyon? … Ang mao nga mga paghukom … mokuha sa atong maayong bahin, ang putli nga gugma ni Kristo.

Dili usab nato makita kanang maayong bahin kon ikompara nato ang atong mga kaugalingon sa ubang tawo. Mas nindot ang iyang buhok, mas tambok ang akong mga bitiis, mas talentado ang iyang mga anak, o mas produktibo ang iyang hardin—mga igsoon, nakahibalo na kamo sa angay buhaton. Dili gayod kita makabuhat niana. Dili nato mahimong tugotan ang atong mga kaugalingon nga mobati nga dili paigo pinaagi sa pagpokus sa kon kinsa ang dili kita imbes nga kon kinsa kita!

(Bonnie D. Parkin, “Pagpili sa Gugmang Putli: Nianang Maayong Bahin,”Liahona, Nob. 2003, 105)

Unsaon man nako pagpili tali sa duha ka kapilian nga walay makita nga dili maayo?

Si Presidente Dallin H. Oaks sa Unang Kapangulohan mipahayag:

Samtang atong hunahunaon ang daghang mga kapilian, kinahanglan atong hinumduman nga kini dili igo nga ang usa ka butang maayo. Ang ubang mga kapilian mas maayo, ug ang uban pa gay[o]d labing maayo. …

Hunahunaa giunsa nato paggamit ang atong oras diha sa mga pagpili nga atong gihimo sa pagtan-aw og telebisyon, pagdula og mga video game, pag-surf sa Internet, o pagbasa og mga basahon o mga magasin. Siyempre maayo ang pagtan-aw og nindot nga salida o sa pagkuha og makalingaw nga impormasyon. Apan dili tanan niana nga klase takus sa bahin sa atong kinabuhi nga atong gihatag sa pagkuha niini. Ang ubang mga butang mas maayo, ug ang uban pinakamaayo. …

… Kinahanglan atong ipalabay ang ubang maayo nga mga butang aron sa pagpili sa uban nga mas maayo o labing maayo tungod kay kini nag-ugmad og hugot nga pagtuo kang Ginoong Jesukristo ug naglig-on sa atong mga pamilya.

(Dallin H. Oaks, “Maayo, Mas Maayo, Labing Maayo,” Liahona, Nob. 2007, 104–5, 107)

Dugang nga Kalihokan sa Pagkat-on

Pagpangita og sayop sa mga pagpili sa ubang tawo

Gikorihian sa Manluluwas si Marta sa dihang nakakita siya og sayop sa mga lihok ni Maria. Ikonsiderar ang pagtabang sa mga estudyante nga masabtan nga dili nato angay nga ipatuman sa ubang tawo ang atong kaugalingong mga panglantaw sa pagsunod sa Ginoo (tan-awa ang “Unsa ang pipila ka peligro sa paghukom sa mga pagpili sa laing tawo?” sa seksiyon nga “Komentaryo ug Background nga Impormasyon”).

Kini nga kalihokan kinahanglang sugdan pinaagi sa pagsukna sa usa sa mosunod nga mga pangutana: Gisaway na ba ka tungod sa pagpili nga imong gibuhat? Posible bang mopili ang duha ka tawo og lain-laing mga kalihokan nga parehong madawat sa Ginoo?