Pagrebyo sa Doktrinal nga Kahanas 6

Sabta ug Ipasabot

Ang usa ka katuyoan sa doktrinal nga kahanas mao ang pagtabang kanimo nga masabtan ang mga pagtulon-an sa Manluluwas nga anaa sa mga tudling sa doktrinal nga kahanas ug mapasabot kini sa imong kaugalingong mga pulong. Makahatag kini nga leksiyon kanimo og oportunidad aron mapalawom ang imong pagsabot ug ipasabot ang mga kamatuoran mahitungod sa usa o dugang pa sa mga tudling sa doktrinal nga kahanas gikan sa Bag-ong Tugon.

Pag-andam sa estudyante: Dapita ang mga estudyante nga magtuki og kahanas sa pagtuon sa kasulatan o estratehiya nga maayo para kanila ug maghunahuna mahitungod sa kon nganong mapuslanon kanila kini nga kahanas o estratehiya.

Posible nga mga Kalihokan sa Pagkat-on

Lagmit nga kinahanglang magtudlo og leksiyon sa tudling sa doktrinal nga kahanas isip puli niini nga leksiyon sa pagrebyo. Tan-awa ang eskedyul kon kanus-a itudlo ang leksiyon nga gihatag sa direktor sa lugar o rehiyon o koordinitor aron masiguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.

Pagsabot sa mga kasulatan

Sa dili pa sugdan ang panaghisgotan, ikonsiderar ang pag-awhag sa mga estudyante nga magtagana og pipila ka minuto sa pagdula og simpleng dula, sama sa tic-tac-toe o bato-bato-pik, kauban ang tawo nga naglingkod sa ilang tapad. Pagkahuman sa dula, pangutan-a ang mga estudyante kon unsang mga estratehiya ang ilang gigamit ug nganong importante ang estratehiya kon magdula. Unya ipasabot nga adunay mga istratehiya usab nga magamit nato aron matabangan kita nga mas masabtan ang mga kasulatan.

Dapita ang mga estudyante nga magpaambit og mga ideya gikan sa gisugyot nga kalihokan sa pag-andam sa estudyante. Ikonsiderar ang paglista sa ilang mga tubag diha sa pisara.

• Unsa ang pipila ka estratehiya nga imong gigamit o magamit aron mas masabtan ang mga kasulatan?

• Ngano kaha nga importante nga magtagana og panahon aron mas masabtan ang mga pagtulon-an sa Dios nga anaa sa mga kasulatan?

Niini nga leksiyon, makabaton ka og oportunidad nga mogamit og simpleng estratehiya aron mapalawoman ang imong pagsabot sa usa o labaw pang mga tudling sa doktrinal nga kahanas gikan sa Bag-ong Tugon. Makabaton usab ka og mga oportunidad nga ipasabot sa ubang tawo ang mga kamatuoran gikan sa tudling nga imong gipili.

Ang mosunod mao ang usa ka listahan sa mga tudling sa doktrinal nga kahanas gikan sa unang katunga sa Bag-ong Tugon.

Ipakita ang mosunod nga handout aron matan-aw kini sa mga estudyante sa kinatibuk-an sa leksiyon.

Pakisayran sa Kasulatan	Mahinungdanong Hugpong sa mga Pulong sa Kasulatan
Lucas 2:10–12	“Kay karong gabhiona, natawo sa lungsod ni David ang inyong Manluluwas, ang Kristo nga Ginoo.”
Juan 3:5	“Walay makasulod sa gingharian sa Dios gawas kon matawo siya pinaagi sa tubig ug sa Espiritu.”
Juan 3:16	“Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak.”
Mateo 5:14–16	“Ipadan-ag ang inyong kahayag atubangan sa mga tawo.”
Mateo 11:28–30	“Duol kamo kanako, kamong tanan nga gikapuyan ug gibug-atan sa inyong gipas-an ug papahulayon ko kamo.”
Mateo 16:15–19	Si Jesus miingon, “Hatagan ko ikaw sa mga yawe sa gingharian.”
Juan 7:17	“Ang buot magbuhat sa gisugo sa Dios mahibalo kon ang akong gitudlo gikan ba sa Dios.”
Mateo 22:36–39	“Higugmaa ang Ginoo nga imong Dios. … Higugmaa ang imong isigkatawo.”
Lucas 22:19–20	Si Jesukristo nagsugo, moambit sa sakramento “aron paghandom kanako.”
Juan 17:3	“Ug kini mao ang kinabuhing dayon: nga ang mga tawo moila kanimo nga mao ang bugtong matuod nga Dios ug kang Jesukristo nga imong gipadala.”
Lucas 24:36–39	“Kay ang espiritu walay unod ug mga bukog sama sa nakita ninyo nga ania kanako.”

Palawoman ang imong pagsabot

Matabangan ka sa mosunod nga estratehiya nga mapalawoman ang imong pagsabot sa tudling sa doktrinal nga kahanas.

Ang magasin nga Alang sa Kalig-on sa mga Kabatan-onan kasagarang naglakip og kalihokan sa pagtuon sa kasulatan nga gitawag og “Pagtulun-an human sa usa ka Pagtulun-an,” diin gipasabot o gituki ang daghang mahinungdanong pulong o hugpong sa mga pulong gikan sa tudling sa kasulatan. Aron makakita og pananglitan sa kalihokan nga “Pagtulun-an human sa usa ka Pagtulun-an”, tan-awa sa “Ayaw Kahadlok,” Alang sa Kalig-on sa mga Kabatan-onan, Peb. 2021, 32.

Paghimo og imong kaugalingong panid sa “Pagtulun-an human sa usa ka Pagtulun-an” para sa usa sa mga tudling sa doktrinal nga kahanas gikan sa unang katunga sa Bag-ong Tugon. Ikonsiderar ang paggamit og mga suplay sa sining aron matabangan ka sa paghimo niini nga panid sa nindot nga paagi. Gamita ang mosunod nga mga instruksiyon aron matabangan ka sa paghimo sa imong panid:

1. Sa blangkong papel, isulat ang mga pulong sa tudling sa kasulatan nga imong gipili.

2. Pagpili og dili mominos sa lima ka pulong o hugpong sa mga pulong gikan niana nga tudling sa kasulatan nga gusto nimong pokusan.

3. Pangita og mga kahulogan, mga pagpasabot, mga pananglitan, may kalabotan nga mga kasulatan, o mga pamahayag sa mga lider sa Simbahan nga makatabang sa pagpalawom sa imong pagsabot sa mga pulong o hugpong sa mga pulong nga imong gipili. Ilista kini diha sa papel.

4. Paglakip og dili mominos sa usa ka parapo [paragraph] bisan asa sa imong panid nga nagpasabot kon unsa ang natabang niini nga tudling kanimo nga masabtan ang mahitungod kang Jesukristo, Iyang Simbahan, o Iyang misyon sa pagluwas kanato.

Kon adunay panahon, balika kini nga kalihokan gamit ang laing tudling sa doktrinal nga kahanas gikan sa listahan.

Ipaambit ang imong gihimo

Dapita ang mga estudyante nga ipaambit ang ilang mga gihimo kauban sa ilang kapares o diha sa gamay nga grupo ug ipasabot kon unsa ang ilang nakat-onan mahitungod sa tudling nga ilang gipili nga pokusan. Ang andam nga mga estudyante mahimong magpaambit sa ilang mga gihimo sa tibuok nga klase.