Mateo 18; Lucas 10

Kinatibuk-ang Pagpasabot

Gitudlo ni Jesukristo nga Siya ug ang atong Langitnong Amahan adunay gugma ug pagpakabana para sa tanan. Nagtudlo Siya og duha ka sambingay nga makatabang kanato sa pagsabot sa Ilang gugma ug makakat-on sa pagtratar sa uban sama sa Ilang buhaton. Ang sambingay sa sulugoon nga wala mopasaylo nagpahinumdom kanato nga magpabiling maloloy-on sa ubang tawo, sama nga maloloy-on ang Dios kanato. Ang sambingay sa maayong Samaryanhon makatabang kanato sa pagsunod sa ehemplo sa Manluluwas sa paghigugma sa silingan. Gitudloan usab Niya si Marta ug Maria mahitungod sa kaimportante sa pagsentro sa atong mga kinabuhi diha Kaniya.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.

Mateo 18:11–14

Katuyoan sa leksiyon: Tinguha niini nga leksiyon nga tabangan ka nga mabati nga maloloy-on ang Langitnong Amahan ug si Jesukristo ug nagtinguha sa pagluwas sa kada nahisalaag nga kalag.

Pag-andam sa estudyante: Dapita ang mga estudyante nga motambong sa klase nga andam nga magpaambit og mga asoy sa kasulatan nga nagpakita sa gugma sa Dios para sa mga tawo nga nahisalaag sa espirituhanong paagi.

Sugyot sa pagtudlo pinaagi sa videoconference: Aron sugdan ang leksiyon, ikonsiderar ang paggamit og online nga survey tool aron awhagon ang mga estudyante nga motubag sa pangutana mahitungod sa kon unsa ang gibati sa Langitnong Amahan ug ni Jesukristo para sa mga tawo nga nakasala.

Mateo 18:21–35

Katuyoan sa leksiyon: Makatabang kini nga leksiyon sa mga estudyante nga mahimong mas mahisama sa Langitnong Amahan ug ni Jesukristo samtang naningkamot sila nga pasayloon ang ubang tawo.

Pag-andam sa estudyante: Sa tudling sa doktrinal nga kahanas, gipahayag sa Ginoo, “kamo gikinahanglan nga mopasaylo sa tanan nga mga tawo.” ( Doktrina ug mga Pakigsaad 64:10). Dapita ang mga estudyante nga pamalandongan kon nganong gimandoan man kita ni Jesukristo nga mopasaylo sa usag usa. Lagmit nga maayo usab nga dapiton ang mga estudyante nga basahon ang Doktrina ug mga Pakigsaad 64:9–11 ug pamalandongan ang mensahe sa Ginoo niadto nga mga bersikulo.

Video: “Ang Atong Dalan sa Katungdanan” (11:10; tan-awa gikan sa code sa oras nga 2:16 hangtod sa 3:25)

Sugyot sa pagtudlo pinaagi sa videoconference: Aron sugdan ang leksiyon, ikonsiderar ang pagpakita sa mosunod nga kasulatan aron pamalandongan sa mga estudyante: “Ako, ang Ginoo, mopasaylo kinsa Ako mopasaylo, apan kamo gikinahanglan nga mopasaylo sa tanan nga mga tawo.” ( Doktrina ug mga Pakigsaad 64:10). Pagkahuman nga makabaton ang mga estudyante og panahon aron mamalandong, awhaga sila nga ipaambit kon nganong panalangin sa atong mga kinabuhi kini nga sugo. Awhaga usab sila nga ipaambit kon nganong lisod usahay nga tumanon kini.

Lucas 10:25–37

Katuyoan sa leksiyon: Tinguha niini nga leksiyon nga tabangan ang mga estudyante nga makasunod sa ehemplo sa Manluluwas nga higugmaon ang silingan.

Pag-andam sa estudyante: Dapita ang mga estudyante nga basahon ang Lucas 10:30–35 , ug pangitaon kon asa nila makita ang mga kinaiya ni Jesukristo niini nga sambingay. Awhaga usab sila nga pangitaon kon asa nila makita ang ilang mga kaugalingon sa sambingay.

Sugyot sa pagtudlo pinaagi sa videoconference: Sa panahon sa bahin sa leksiyon diin hisgotan sa mga estudyante ang mga pangutana nga may kalabotan sa paghigugma sa atong silingan sa lain-laing mga sitwasyon, ikonsiderar ang paggamit sa mga breakout room. Itagana sa kada grupo ang usa sa mga sitwasyon nga nakalista sa leksiyon, ug hatagi ang mga grupo og panahon aron hisgotan ang tulo ka pangutana samtang naghunahuna sila mahitungod sa sitwasyon nga gisangon kanila.

Lucas 10:38–42

Katuyoan sa leksiyon: Matabangan niini nga leksiyon ang mga estudyante sa pagtuki sa mga kapilian ug mga kalihokan nga makatabang kanila nga himoong sentro sa ilang mga kinabuhi si Jesukristo.

Pag-andam sa estudyante: Dapita ang mga estudyante nga magbuhat og listahan sa mga kalihokan nga gibuhat nila sa usa ka adlaw sa wala pa kini nga leksiyon ug dad-on ang ilang listahan sa klase.

Mga Materyal sa Leksiyon nga Gigamitan og Butang: Usa ka sudlanan ug mas daghang mga bato nga lain-lain ang gidak-on kay sa masigo sa sudlanan.

Rebyo sa Doktrinal nga Kahanas 6Katuyoan sa leksiyon: Mahatagan ang mga estudyante og mga oportunidad aron mapalawom ang ilang pagsabot ug mapasabot ang mga kamatuoran mahitungod sa usa o dugang pa sa mga tudling sa kasulatan sa doktrinal nga kahanas gikan sa Bag-ong Tugon.

Pahinumdom: Lagmit nga kinahanglang magtudlo og leksiyon sa tudling sa doktrinal nga kahanas isip puli niini nga leksiyon sa pagrebyo. Tan-awa ang eskedyul kon kanus-a itudlo ang leksiyon nga gihatag sa direktor sa lugar o rehiyon o koordinitor aron masiguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.

Pag-andam sa estudyante: Dapita ang mga estudyante nga magtuki og kahanas sa pagtuon sa kasulatan o estratehiya nga maayo para kanila ug maghunahuna mahitungod sa kon nganong mapuslanon kanila kini nga kahanas o estratehiya.

Handout: Pag-andam nga ipakita ang listahan sa mga tudling sa kasulatan sa doktrinal nga kahanas ug ang kauban nga mahinungdanong mga hugpong sa mga pulong sa kasulatan niini o ihatag kini sa mga estudyante isip handout.
Mga Materyal: Siguroha nga ang mga estudyante adunay mga gamit sa pagsulat ug mga journal sa pagtuon o mga piraso sa papel nga gamiton sa mga kalihokan sa leksiyon.

Sugyot sa pagtudlo pinaagi sa videoconference: Ang mga estudyante mahimong opsiyonal nga maghimo og digital nga page nga “Pagtul[o]n-an human sa usa ka Pagtul[o]n-an” o visual nga representasyon sa tudling sa kasulatan sa doktrinal nga kahanas. Mahimong ipaambit sa mga estudyante ang ilang screen aron ipakita ug ipasabot ang ilang gihimo ngadto sa klase.