Luka 2:1–39; Mataio 2:1–12

Molimau i le Faaola

O leoleo mamoe, le Au Makoi, Simeona, ma Ana o uluai molimau i le Faaola. A o e aoao e uiga i o latou aafiaga, e mafai ona e atiae se naunauga e saili ma tuputupu ae ma olioli i lau lava molimau ia Iesu Keriso.

Tapenaga a tagata aoga: Valaaulia tagata aoga e mafaufau loloto i fesili nei: O le a le malosi o lou talitonu e mafai ona e molimau ia Iesu Keriso? E mafai faapefea ona e faamalosia lau molimau e uiga i le Faaola?

Gaoioiga e Mafai ona Fai e Aoao Mai Ai

E molimau le Agaga Paia ia Iesu Keriso

Mafaufau e amata le vasega i i le usuina o le viiga “O Loo Soifua Lou Faaola” (Viiga, nu. 72). Atonu foi e aoga le faasoa atu o se molimau patino i le Faaola.

Mafaufau e uiga i fesili nei:

• O le a le molimau?

Afai e faigata i tagata aoga ona faamatala mai poo le a le molimau, mafaufau e faaaoga le faamatalaga mai le Autu o le Talalelei i le vaega o “Tala ma Faamatalaga o Talaaga”.

• O le a se mea e mafai ona e faia e maua ai ma faamalosia ai se molimau?

• O le iloaina o nisi taimi e mafai ona fesoasoani isi tagata ia te oe e faatupuina se molimau, aisea e le mafai ai e ou matua, o ou tei po o uo ona avatu ia te oe se molimau?

E oo mai se molimau pe a faamautu e le Agaga Paia le upumoni i le e saili ma le faamaoni. Aua le lotovaivai pe afai e tuai ona maua lau molimau. A o faaauau ona e sailia ma le faamaoni se molimau, o le a tali atu le Alii ia te oe i Lona lava taimi ma le auala.

Afai e aoga i tagata aoga, mafaufau e talanoaina mo sina taimi pe faapefea ona molimauina e le Agaga Paia. O mau ia e mafai ona fesoasoani: Ioane 14:26 ; 16:13 ; Mataupu Faavae ma Feagaiga 6:23 ; 8:2-3 .

Faitau le Ioane 15:26 ma le saunoaga a Peresitene Russell M. Nelson, ma vaavaai mo mea o loo aoao mai ai e uiga i se molimau ia Iesu Keriso.

O le upumoni aupito sili ona taua o le a molimau atu e le Agaga Paia ia te oe e faapea o Iesu o le Keriso, le Alo o le Atua soifua.

Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o leLiahona, Me 2018, 96)

Mafaufau loloto i fesili nei, ma mafaufau e tusi ou mafaufauga i lau api talaaga o suesuega:

Faamanatu i tagata aoga o fesili nei na fesiligia i latou ae lei amataina lenei lesona. Tuu atu ia i latou sina taimi e mafaufau ai i a latou tali. Mafaufau e talanoaina le fesili lona lua.

• Aisea e te manatu ai o le upumoni aupito sili lea ona taua o le a molimau atu e le Agaga Paia ia te oe?

• E faapefea ona e faamalosia lau molimau i le Faaola?

I le lesona lenei, o le a e aoao ai e uiga i molimau o le fanau mai o le Faaola. Ao e suesue i o latou tala, vaai pe na faapefea ona iloa e nei molimau le Faaola ma po o a mea na latou fai i molimau na latou maua. Mafaufau i lenei upumoni a’o e su’esu’e: O la’u molimau ia Iesu Keriso e auala mai le molimau a le Agaga Paia.

Mafaufau e tusi le upumoni lenei i le laupapa ma valaaulia tamaiti aoga e tusi i a latou apitalaaga o suesuega.

Simeona ma Ana

I le valu aso talu ona maea le soifua mai o Iesu, sa ave e Maria ma Iosefa le pepe o Iesu i le malumalu e tusa ai ma tulafono a tagata Iutaia (tagai i le Esoto 13:2). Sa iloa e Simeona ma Ana, sa iai i le malumalu, le pepe o Iesu o lo laua Faaola.

Faitau le Luka 2:25–33, 36–38, ma vaavaai mo se faamaoniga sa fesoasoani le Agaga Paia ia Simeona ma Ana ia maua se molimau ia Iesu Keriso. O le fasifuaitau “sa faatalitali atu o ia i le faamafanafanaina o Isaraelu” i le fuaiupu 25 e faasino i le faatalitali atu mo le Mesia e afio mai.

• Na faapefea ona fesoasoani le Agaga Paia ia Simeona ia maua se molimau ia Keriso?

• O le a le mea sa faia e Ana na fesoasoani ia te ia ia maua se molimau i le Alii?

• O le a se mea e mafai ona e aoao mai ia Simeona ma Ana e mafai ona fesoasoani ia te oe e saili, faateleina, ma olioli fiafia i lau lava molimau ia Iesu Keriso?

Mafaufau e vaevae tagata aoga i ni vaega toalaiti ma atofa i vaega taitasi se se tasi o gaoioiga nei.

E le gata ia Simeona ma Ana, e foliga mai na maua foi e leoleo mamoe ma le Au Makoi se molimau ia Iesu Keriso. E mafai ona tatou aoao mai i a latou faataitaiga o le mauaina o se molimau i le Faaola, e mafai ai ona tosinaina i tatou. Afai e te fia aoao atili i le faasoa atu o lau molimau, suesue i leoleo mamoe i le Gaoioiga A. Afai e te manao e faaleleia lau tapua’iga ma mafaufau i meaalofa e mafai ona e tuu atu i le Alii, ona suesue lea i le Au Makoi i le Gaoioiga E.

Gaoioiga A: O Leoleo Mamoe (Luka 2:15–20)--Faasoa atu o lau molimau

I le po sa soifua mai ai le Faaola i Peteleema, sa leoleoina e le au leoleo mamoe a latou lafu i fanua i le taulaga. Sa tu atu le agelu i o latou luma ma sa faalauiloa atu le soifua mai o Iesu Keriso, ma sa aumai ai “le tala e olioli tele” mo “le nuu uma” ( Luka 2:10).

Faitau le Luka 2:15-20, ma vaavaai pe na faapefea ona tali atu le au leoleo mamoe i le feau a le agelu. E mafai foi ona outou matamata i le ata “Ua A’oa’o Le Au Leoleo Mamoe i le Fanau Mai a Keriso” (2:50), o loo maua i le ChurchofJesusChrist.org.

• O le a sou manatu aisea na faasoa atu ai e le au leoleo mamoe i isi a latou molimau i le Alii?

• O le a se mea e mafai ona tatou aoao mai i lenei tala e uiga i le mea na tupu pe a e maua lau lava molimau ia Iesu Keiso?

• O le a se taimi na e manao ai e faasoa atu i isi lau molimau ia Iesu Keriso ma Lana talalelei? Faasoa atu sou aafiaga ina ua faasoa atu lau molimau.

Gaoioiga E: O Le Au Makoi (Mataio 2:1–12)--Faaleleia o lau tapua’iga

Sa saili e le Au Makoi le Faaola mai le taimi o Lona soifua mai seia o’o ina ua tamaitiiti aio Ia (taga’i i le Mataio 2:1-2).

Faitau le Mataio 2:9-11, ma vaavaai po o le a le mea sa faia e le Au Makoi ina ua latou maua le Faaola. E mafai foi ona tou matamata i le ata “Ua Saili Iesu e Le Au Makoi” mai le taimi 2:58 i le 4:37. O loo maua lenei vitio i le ChurchofJesusChrist.org.

• O a ni mea e mafai ona e aoaoina mai le faataitaiga a le Au Makoi?

• O faapefea ona tosina e lau molimau ia Iesu Keriso lou manao e tapuai ia te Ia?

• Sa ofo atu e le Au Makoi meaalofa e tapuai atu ai i le Iesu talavou. O a ni auala e mafai ona e tapuai atu ai i le Faaola?

O lau lava molimau

Mafaufau i uunaiga ma lagona sa e maua mai le Agaga Paia i lenei lesona. Ao faaauau pea ona e suesue i le soifuaga o le Faaola e pei ona tusia i le Feagaiga Fou, mataitu pe faapefea ona molimau atu le Agaga Paia ia te oe e uiga ia Iesu Keriso.

E tele auala e mafai e tagata aoga ona faasoa atu a latou molimau ia Iesu Keriso. E le tatau ona lagona e tagata aoga le faamalosia e faasoa atu ae e tatau ona lagona o loo valaaulia. O nisi nei o auala e mafai ona faasoa atu ai tagata aoga.

Faasoa atu lau molimau i le Faaola o Iesu Keriso po o mea e te iloa e uiga ia te Ia. E mafai ona e faasoa atu lau molimau i le Alii i auala e tele. Mo se faataitaiga, e mafai ona e tuu i luga lau molimau ma se ata o le Faaola i ala o faasalalauga lautele, faasoa atu lau molimau i se sauniga molimau, pe tusi lau molimau i se kopi o le Tusi a Mamona ma avatu i se uo po o se tasi o lou aiga.

Tala ma Faamatalaga o Talaaga

O le a le molimau?

O le molimau o se mau faaleagaga lea e tuuina mai e le Agaga Paia. O le faavae o se molimau o le malamalama lea o loo soifua le Tama Faalelagi ma e alofa i Ana fanau; o loo soifua Iesu Keriso, o Ia o le Alo o le Atua, ma na Ia faataunuuina le Togiola e le iu; o Iosefa Samita o le perofeta a le Atua na valaaulia e toefuatai mai le talalelei; o Le Ekalesia a Iesu Keriso o le Au Paia o Aso e Gata Ai o le Ekalesia moni a le Faaola i le lalolagi; ma o loo taitaiina le Ekalesia e se perofeta soifua i aso nei. Faatasi ai ma lenei faavae, e tupu se molimau e aofia ai mataupu faavae uma o le talalelei.

(Autu Faavae o le Talalelei, “Molimau,” topics.ChurchofJesusChrist.org)

E faapefea ona tosina i tatou i se molimau ia Iesu Keriso?

Sa faamatala mai e Peresitene Henry B. Eyring o le Au Peresitene Sili e ala e molimau ai le Agaga Paia ia Keriso:

O le Agaga Paia lea e molimau mai o Iesu Keriso o le Alo Pele o se Tama Faalelagi o le e alofa ia i tatou ma finagalo ia tatou maua le ola e faavavau faatasi ma Ia i ni aiga. E oo lava i le amataga o lena molimau, tatou te lagonaina se manao ia auauna atu ia te Ia ma ia tausi i Ana poloaiga. A tatou tumau i le faia o lena mea, tatou te maua ia meaalofa a le Agaga Paia e aumaia ia i tatou le mana i la tatou auaunaga. O le a oo ina tatou iloa manino atili le aao o le Atua, i le manino tele lea e i ai le taimi e le gata tatou te manatuaina o Ia, ae o le a tatou alolofa foi ia te Ia ma, e ala i le mana o le Togiola, tatou te avea ai e faapei o Ia.

(Henry B. Eyring, “E! Ia Manatua, Ia Manatua Lava,” Ensign po o le Liahona, Nov. 2007, 68–69.)

O a meaalofa e mafai ona e ofo atu ia Iesu Keriso?

Na aoao mai Peresitene Russell M. Nelson:

O le meaalofa aupito sili e mafai ona e tuuina atu i le Alii o le tausia lea o oe lava ia le pisia mai le lalolagi, ma agavaa e auai atu i Lona maota paia. O Lana meaalofa ia te oe o le filemu ma le saogalemu o le iloa ua e agavaa e feiloai ia te Ia, pe a oo mai lena taimi.

(Russell M. Nelson, “O Le Lumanai o le Ekalesia: Sauniaina o le Lalolagi mo le Afio Faalua Mai o le Faaola,”Ensignpo o le Liahona, Apelila 2020, 15)

Na aoao mai Elder Dieter F. Uchtdorf o le Korama a Aposetolo e Toasefululua:

O tatou, e pei o le au Makoi i aso anamua, e tatau ona tatou saili I le Keriso ma tuu atu i Ona luma le meaalofa aupito sili ona taua: o le loto momomo ma le agaga salamo. E tatau ona tatou ofo atu ia te Ia lo tatou alofa. E tatau ona tatou avatu lo tatou naunautaiga e tauave i o tatou lava luga Lona suafa ma savavali i le ala o le so’o. E tatau ona tatou folafola atu e manatua pea o Ia, e mulimuli i Lana faataitaiga, ma faia mea lelei (taga’i i le Mataupu Faavae ma Feagaiga 20:77, 79 ; Galuega 10:38).E le mafai ona tatou ofo atu ia te Ia le meaalofa o le atoatoa i mea uma aua o le meaalofa lena e le oo i ai lo tatou malosi—o le mea sili mo le taimi nei. Ae finagalo o Ia tatou te aumaia o ni meaalofa a tatou taumafaiga silisili e savavali i ala na Ia saunia ma aoao mai.

(Dieter F. Uchtdorf, “Meaalofa Faamaoni o le Kerisimasi,” New Era, Tes. 2018, 3)

Aisea na ofo atu ai e Maria manutagi po’o lupe i le malumalu?

O le tulafono a Mose ua tautino ai le lē mama o fafine pe a uma ona fanau. Ina ia mama, e tatau i se tina fou ona tuuina atu se tamai mamoe i le malumalu e fai ma taulaga mu, ma se lupe po o se manutagi (tagai Levitiko 12:5–6). “Afai foi na te le maua se tamai mamoe, ia aumai e ia le uluga manutagi,[manutagi] po o tamai lupe e lua” (Levitiko 12:8). O le tuuina e Maria o le uluga manutagi po o lupe ae le o se tamai mamoe, o se faamaoniga na soifua mai Iesu Keriso i se tina e itiiti ni oa faaletino na i ai.

Galuega Faaopoopo e Aoao Mai Ai

E pei o le Au Makoi, e mafai ona tatou ofo atu meaalofa i le Faaola

A uma ona talanoaina le Au Makoi, valaaulia tagata aoga e mafaufau e uiga i meaalofa e mafai ona latou ofo atu i le Faaola. Mafaufau e faasoa atu saunoaga a Peresitene Nelson ma Elder Uchtdorf o loo e aofia ai i le vaega o “Tala ma Faamatalaga o Talaaga” o lenei lesona.