Lucas 23:33–46; Juan 19:26–30

Ang Kalooy sa Manluluwas didto sa Krus

Ang mga butang nga gisulti ni Jesus samtang Siya anaa sa krus nagpakita sa Iyang kinaiya ug balaan nga mga hiyas. Sa inyong pagtuon, paningkamot nga mapalambo ang inyong tinguha nga mas mahimong sama kang Jesukristo samtang kamo nagkat-on gikan sa Iyang ehemplo sa Iyang pagkalansang sa krus.

Pag-ugmad og pagbati nga may katuyoan. Ang pagbaton og hiniusang katuyoan nga klaro sa mga magtutudlo ug mga estudyante makadugang sa hugot nga pagtuo ug makahatag og direksiyon ug kahulugan sa kasinatian diha sa lawak klasehanan.

Pagpangandam sa estudyante: Dapita ang mga estudyante sa pagtambong nga andam mopaambit bahin sa usa ka tawo nga ilang nailhan kinsa nagpakita og kapuangod [compassion] o kalooy bisan nakasinati og lisod nga mga hagit.

Posible nga mga Kalihokan sa Pagkat-on

Pag-atiman sa uban

Pamalandungi ang mosunod nga mga pangutana:Kanunay ba kamong nagpakita og kalooy ngadto sa uban? Ngano o nganong dili?

Sa inyong journal sa pagtuon, ilista ang mga sitwasyon diin lagmit lisod alang kaninyo ang pag-atiman sa mga kabalaka ug kaayohan sa uban. Ipasabot nganong kadto nga mga sitwasyon makapalisod kaninyo sa pagbuhat sa ingon.

Imbis nga ilista kining mga sitwasyon sa ilang journal, mahimong ilista sa mga estudyante ang ilang mga tubag sa pisara. Isip alternatibo, ang usa ka estudyante mahimong mobarog diha sa pisara isip usa ka tigsulat samtang ang klase adunay duha ka minuto sa paglista og ingon kadaghan nga mga tubag kutob sa ilang mahimo ug magpasabot sa ilang mga tubag human nila malista kini.

Ikonsiderar ang pagtubag sa mosunod nga pag-aghat [prompt] diha sa inyong journal sa pagtuon:

• Sa unsang paagi mahimong mas maayo ang inyong kinabuhi kon magpakita kamo og kalooy sa uban bisan kon anaa kamo sa lisod nga mga kahimtang?

Niini nga leksiyon aduna kamoy kahigayonan sa pagtuon sa ehemplo sa Manluluwas sa pagtabang sa uban bisan sa panahon sa Iyang masakit nga kasinatian sa krus. Sa inyong pagtuon sa ehemplo sa Manluluwas, pangita sa giya sa Espiritu Santo aron matabangan kamo nga magtinguha nga mas mahisama Kaniya.

Ang mga kasinatian sa wala pa ug panahon sa Paglansang sa Krus

Hinumdomi ang mga kasinatian sa Manluluwas sa wala pa ug panahon sa Iyang Pagkalansang sa Krus:

Mahimong awhagon ang mga estudyante sa paghinumdom sa mosunod nga mga detalye kay sa sultihan lang sila. Mahimong mapuslanon ang pagpakita og mga litrato sa pipila o tanan sa mosunod nga mga hitabo.

• Siya nag-antos alang sa mga sala sa kalibotan didto sa Getsemani (tan-awa sa Lucas 22:39–44).

• Siya gibudhian ni Hudas ug gibiyaan sa Iyang Apostoles (tan-awa sa Marcos 14:43–50).

• Siya gitaral, gilatos, ug gilud-an sa mga lider sa Judio (tan-awa sa Mateo 26:57–68).

• Siya gipangutana sa duha nila ni Pilato ug ni Herodes ug gibiaybiay ni Herodes ug sa iyang mga sundalo ( Lucas 23:1–24).

• Siya grabe nga gikulata ug gibunalan sa mga Romanong sundalo (tan-awa sa Mateo 27:26–31).

• Iyang gidala ang Iyang krus sa pila ka bahin paingon sa Golgota (tan-awa sa John 19:16–17).

• Gilansangan ang Iyang mga kamot ug mga tiil ug gilansang sa krus taliwala sa duha ka mga kawatan (tan-awa sa Lucas 23:33 ; tan-awa usab sa Juan 20:25).

• Siya nagbitay sa krus (tan-awa sa Mateo 27:45–50 ; Marcos 15:25).

Paghunahuna mahitungod sa unsang paagi kini nga mga hitabo nakaapekto sa inyong pagbati ngadto sa Manluluwas ug unsa ang Iyang gilahutay alang kaninyo.Basaha ang mosunod nga mga tudling, nga naglakip og mga pamahayag sa Manluluwas samtang Siya anaa sa krus. Ilha ang mga kamatuoran mahitungod kang Jesukristo gikan sa Iyang mga pamahayag, ug ilista kini diha sa inyong journal sa pagtuon.

I-display ang mosunod nga mga tabang kontekstwal ug mga tudling sa kasulatan:

Lucas 23:33–34 . Ang Manluluwas misulti niini nga mga pulong mahitungod sa mga sundalo nga naglansang Kaniya (tan-awa sa Hubad ni Joseph Smith niini nga bersikulo sa Lucas 23:34 , Mga Tabang sa Pagtuon ).

Lucas 23:39–43 . Kini nga mga bersikulo nagrekord unsa ang gisulti sa mga kawatan nga gilansang uban sa Manluluwas ug giunsa pagtubag sa Manluluwas. (Timan-i nga ang Propeta Joseph Smith nagtudlo nga kon ang Manluluwas nagpasabot niini nga kawatan nga mouban kaniya sa paraiso, Siya nagtudlo kaniya nga “Ako magauban kanimo sa kalibotan sa mga espiritu ug motudlo kanimo o motubag sa imong mga pangutana” [“Discourse, 11 Hunyo 1843–A, sumala sa Gitaho ni Wilford Woodruff,” 44, josephsmithpapers.org]).

Juan 19:26–27 . Kini nga mga bersikulo nagrekord unsa ang gisulti sa Manluluwas ngadto sa Iyang inahan, si Maria, ug sa Apostol nga si Juan.

Dapita ang mga estudyante sa pagpakigbahin sa unsay ilang gisulat. Mahimong sundan sa pagpangutana sama sa usa sa ubos:

• Unsa man ang inyong nakat-onan mahitungod kang Jesukristo nga labing makahuluganon kaninyo? Ngano man?

Samtang mipakigbahin ang mga estudyante, ikonsiderar ang pagsulat sa ilang mga tubag diha sa pisara. Ang mga estudyante lagmit mosulti og mga baroganan sama sa mosunod:

Atong masunod ang ehemplo ni Jesukristo pinaagi sa pagpili nga mopasaylo sa mga tawo nga dili maayo ang pagtratar kanato. Atong masunod ang ehemplo ni Jesukristo pinaagi sa pagpili nga motabang sa uban bisan og kita mismo anaa sa panginahanglan.

• Sa unsang mga paagi ninyo gustong mahisama sa Manluluwas? Ngano man?

Ang Manluluwas wala lang maghunahuna mahitungod sa Romanong mga sundalo, sa mga kawatan, ug sa Iyang inahan samtang anaa sa krus. Si Presidente Russell M. Nelson nagtudlo og usa ka dugang nga paagi nga ang Manluluwas nagtutok sa uban samtang Siya anaa sa pag-antos.

Sama diha sa tanang butang, si Jesukristo mao ang atong labing halangdong ehemplo, ‘nga tungod sa kalipay nga gibutang sa iyang atubangan miant[o]s sa krus’ [ Mga Hebreohanon 12:2 ]. Hunahunaa kana! Aron Iyang malahutay ang pinakasakit nga kasinatian nga nalahutay sukad dinhi sa yuta, ang atong Manluluwas nagtutok sa kalipay!

Ug unsa man ang kalipay nga giandam diha sa Iyang atubangan? Siguradong naglakip kini sa kalipay sa paglimpyo, pag-ayo, ug paglig-on kanato; sa kalipay gumikan sa pagbayad sa mga sala sa tanan kinsa maghinulsol; sa kalipay sa paghimong posible alang kaninyo ug kanako nga makauli—limpyo ug tak[o]s—aron nga mopuyo uban sa atong Langitnong mga Ginikanan ug mga pamilya.

(Russell M. Nelson, “Hingpit nga Kalipay ug Espirituhanon nga Pagsugakod,” Liahona Nob. 2016, 82-83).

• Unsa ang gitutokan sa Manluluwas samtang nag-antos Siya alang kanato?

• Unsa ang gitudlo ni Presidente Nelson ninyo mahitungod sa mga tinguha sa Manluluwas alang kaninyo?

Pamalandong sa makadiyot ang kamatuoran nga samtang ang Manluluwas anaa sa krus, Siya nagtutok kaninyo ug sa kalipay sa pagtabang ninyo nga mobalik sa Langitnong Amahan.

• Unsa nga kalainan ang mahimo niini diha sa inyong kinabuhi aron masabtan kini nga kamatuoran? Ngano nga kining kahibalo makahimo og kalainan sa inyong kinabuhi?

Awhaga ang mga estudyante sa paghinumdom sa ilang mga hunahuna ug mga pagbati gikan sa ilang pagpangandam sa klase.

• Kanus-a kamo nakatabang og usa ka tawo samtang kamo nakasinati og hagit, o kanus-a nga ang usa ka tawo mibuhat niini kaninyo?

Kon makatabang ang pagtaw-aw og usa ka ehemplo, tan-awa ang “Maghigugmaay sa Usag Usa sama nga Siya Nahigugma Kanato,” anaa makita sa ChurchofJesusChrist.org, gikan sa time code 3:22 hangtod 7:54. Maghigugmaay sa Usag Usa sama nga Siya Nahigugma Kanato

Tinguhaa ang inspirasyon sa Espiritu Santo pinaagi sa pagpamalandong sa ehemplo sa Manluluwas ug unsa ang inyong nabati karon. Ilha ang mga paagi nga kamo mas mahimong mahisama ni Jesukristo diha sa pagpakita og gugma ug kalooy sa uban bisan sa panahon sa inyong kaugalingong mga hagit. Dayon isulat kini nga mga paagi diha sa inyong journal sa pagtuon. Irebyo ang lista nga inyong nahimo, ug maampoong mopili og usa sa mga paagi nga mas mahimong mahisama kang Jesukristo. Ilha kini diha sa inyong entry sa journal. Pag-ampo ug pangita og mga oportunidad sa pagpadayon niini nga buhat.

Dasiga ang andam nga mga estudyante sa pagpaambit unsa ang ilang planong buhaton aron mosunod sa ehemplo sa Manluluwas. Mahimong mopaambit og may kalabotan nga sugilanong personal o pagpamatuod aron pagtapos sa klase.

“Natapos na”

Human mag-antos og daghang mga oras didto sa krus, ang Manluluwas misulti sa Iyang kataposang mga pulong.

Basaha ang Juan 19:28–30 ug Lucas 23:46 . Markahi ang kataposang mga pamahayag sa Manluluwas sa mortalidad.

• Unsa ang matabang kanato niini nga mga pulong nga masabtan ang mahitungod sa Manluluwas ug sa Iyang misyon?

Sama sa Manluluwas, makompleto nato unsa ang gusto sa Amahan alang sa atong kinabuhi. Hinumdomi kini samtang kamo magtinguha sa pagsunod sa unsa ang inyong nahukman nga buhaton karon.

Komentaryo ug Background nga Impormasyon

Juan 19:27 . Unsa ang atong makat-onan gikan sa pamahayag sa Manluluwas nga “Siya ang imong inahan”?

Makasunod kita sa ehemplo ni Jesukristo samtang kita maningkamot nga moila, mohigugma, ug moatiman sa atong mga inahan. Si Elder Jeffrey R. Holland sa Korum sa Napulog Duha ka Apostoles naghatag og pasidungog sa matarong nga mga inahan ug gitandi ang ilang gugma ngadto sa gugma sa Manluluwas.

Tan-awa ang “Tan-awa ang Imong Inahan,” nga naa sa ChurchofJesusChrist.org, gikan sa time code 0:20 hangtod 2:53.

Sa unsang paagi ang pagtabang sa uban bisan kon kita nanlimbasog makahulma kon kinsa kita nga mamahimo?

Si Elder David A. Bednar sa Korum sa Napulog Duha ka Apostoles mitudlo:

Ang kinaiya mapadayag … pinaagi sa gahom sa pag-ila sa pag-antos sa ubang tawo samtang kita mismo anaa sa pag-antos; sa katakos nga mahibaloan ang kagutom sa uban samtang kita gigutom; ug pinaagi sa gahom sa pagtabang ug pagpakita og kalooy sa espirituhanong pag-antos sa uban samtang kita mismo naa taliwala sa atong kaugalingong espirituhanon nga pag-antos. Sa ingon, ang kinaiya mapakita pinaagi sa pagtan-aw ug pagtabang sa uban kon ugaling mosukmat man ang kinaiyanhon natong pagkatawo ug atong reaksiyon nga kaugalingon ra ang hunahunaon. Kon kana nga kapasidad mao gayod ang sukod sa moral nga kinaiya, nan ang Manluluwas sa kalibotan maoy hingpit nga ehemplo sa ingon nga pagkamakanunayon ug pagkamanggiloy-ong kinaiya.

(David A. Bednar, “The Character of Christ [Ang Kinaiya ni Kristo]” [Brigham Young University–Idaho nga debosyonal, Ene. 25, 2003], byui.edu)

Unsa nga mga panalangin ang moabot samtang kita moserbisyo sa uban sa dihang ang mga butang lisod alang kanato?

Si Presidente Henry B. Eyring sa Unang Kapangulohan mitudlo:

Kinahanglan gay[o]d kitang motimaan sa kalisdanan sa uban ug mosulay sa pagtabang. Kana lisod gayod kaayo kon kita mismo grabe nga gisulayan. Apan atong madiskobrihan samtang moalsa kita sa palas-anon sa laing tawo, bisan gamay lang, nga ang atong likod malig-on ug makabantay kita og kahayag diha sa kangitngit.

(Henry B. Eyring, “Nasulayan, Napamatud-an, ug Nahashasan,” Liahona, Nob. 2020, 98)

Dugang nga Kalihokan sa Pagkat-on

Juan 19:30 . “Natapos na”

Aron matabangan ang mga estudyante sa pagpamalandong unsa ang ilang nakat-onan mahitungod sa unsa ang nabuhat sa Manluluwas alang kanila didto sa Getsemani ug didto sa krus, awhaga sila sa pagrebyo sa pamahayag sa Manluluwas nga “Natapos na” ( Juan 19:30). Kini nga pamahayag mahimong isulat sa pisara, ug mahimo kining kopyahon sa mga estudyante sa ilang journal sa pagtuon. Dayon palibot niini nga hugpong sa mga pulong mahimo nilang isulat ang tanan nga “natapos” sa Manluluwas alang kanila. Mahimo dayon silang awhagon sa paghunahuna mahitungod sa unsa ang ilang buhaton sa mga nabuhat Niya alang kanila.