Pagrebyo sa Doktrinal nga Kahanas 11
Pagsabot ug Paggamit
Kini nga leksiyon mahimong makatabang ninyo sa pagrebyo sa mga kamatuoran nga makita sa mga tudling sa doktrinal nga kahanas ug mahimong makatabang ninyo sa pagbansay sa paggamit niini nga mga kamatuoran sa nagkalain-laing mga kahimtang.
Paglambigit sa mga estudyante sa pagkat-on. Ang mga estudyante nga aktibong moapil sa kasinatian sa pagkat-on mas lagmit makahinumdom unsa ang ilang nakat-onan. Awhaga ang mga estudyante nga moapil sa mga kalihokan nga naglakip og pisikal nga paglihok ug interaksiyon sa mga tawo ug sa mga butang sa ilang palibot.
Pagpangandam sa estudyante: Kon mahimo, hatagi ang mga estudyante og usa ka kopya sa handout nga naglakip niini nga leksiyon. Awhaga sila sa pagrebyo sa mga pakisayran sa kasulatan sa doktrinal nga kahanas ug nag-unang mga hugpong sa mga pulong. Usab, hangyoa sila nga maghunahuna og mga sitwasyon diin ang mga kamatuoran nga nakita niining mga tudling sa doktrinal nga kahanas mahimong makatabang.
Posible nga mga Kalihokan sa Pagkat-on
Ang tudling sa doktrinal nga kahanas nga leksiyon kinahanglang matudlo isip puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor sa lugar o rehiyon o koordinitor aron masiguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.
Pagribyo sa mga tudling sa doktrinal nga kahanas
Paggahin og gamay nga panahon sa pagribyo sa mga tudling sa doktrinal nga kahanas diha sa Bag-ong Tugon. Hain man ang inyong nahibaloan pag-ayo? Hain man ang dili kaayo pamilyar ninyo?
-
Unsa ang pipila ka kamatuoran nga gitudlo niini nga mga tudling nga labing makahuluganon kaninyo?
Kon ang mga estudyante makabenepisyo gikan sa pagrebyo sa mga pakisayran sa kasulatan sa doktrinal nga kahanas ug sa nag-unang mga hugpong sa pulong, mahimong buhaton ang bisan asa o tanan niining mosunod nga mga kalihokan:
Timan-i: Panahon sa maong mga kalihokan, mahimong makatabang ang pag-awhag sa mga estudyante nga mobuhat nga magpares. Mahimong ipares ang mga estudyante nga nanginahanglan og tabang ngadto sa mga estudyante nga andam ug mahimong makatabang kanila.
1. I-display ang mga pakisayran sa kasulatan sa kilid sa pisara ug ang nag-unang mga hugpong sa mga pulong, nga nalista nga wala mahan-ay, sa pikas nga kilid. Awhaga ang mga estudyante sa paglantaw pila ka mga pakisayran ug nag-unang mga hugpong sa mga pulong ang ilang masakto sa pagpares. Dapita sila sa paggamit sa ilang mga kasulatan aron tan-awon kon sakto ba ilang nabuhat.
2. Pagpakita og usa ka bahin sa nag-unang hugpong sa mga pulong, ug awhaga ang mga estudyante nga kompletohon kini ug ihatag ang pakisayran.
3. Sugdi pagbasa ang nag-unang hugpong sa mga pulong sa hinayhinay, usa ka pulong sa matag usa ka higayon. Sa dihang ang mga estudyante makahunahuna nga kahibalo sila sa gipasabot nga tudling sa doktrinal nga kahanas, mahimo nilang ablihan ang maong tudling diha sa ilang mga kasulatan.
|
Pakisayran sa Kasulatan |
Mahinungdanong Hugpong sa mga Pulong sa Kasulatan |
|
“Kay karong gabhiona, natawo sa lungsod ni David ang inyong Manluluwas, ang Kristo nga Ginoo.” | |
|
“Walay makasulod sa gingharian sa Dios gawas kon matawo siya pinaagi sa tubig ug sa Espiritu.” | |
|
“Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak.” | |
|
“Ipadan-ag ang inyong kahayag atubangan sa mga tawo.” | |
|
“Duol kamo kanako, kamong tanan nga gikapuyan ug gibug-atan sa inyong gipas-an ug papahulayon ko kamo.” | |
|
Si Jesus miingon, “Ihatag ko kanimo ang mga yawe sa gingharian sa langit.” | |
|
“Ang buot magbuhat sa gisugo sa Dios mahibalo kon ang akong gitudlo gikan ba sa Dios.” | |
|
“Higugmaa ang Ginoo nga imong Dios. … Higugmaa ang imong isigkatawo.” | |
|
Si Jesukristo nagsugo, moambit sa sakramento “aron paghandom kanako.” | |
|
“Ug kini mao ang kinabuhing dayon: nga ang mga tawo moila kanimo nga mao ang bugtong matuod nga Dios ug kang Jesukristo nga imong gipadala.” | |
|
“Kay ang espiritu walay unod ug mga bukog sama sa nakita ninyo nga ania kanako.” |
Usa ka paagi aron makahinumdom sa mga kamatuoran diha sa mga kasulatan mao ang pagkonektar niini sa matag-adlaw nga mga butang. Pagpili og duha ka mga tudling sa kasulatan sa doktrinal nga kahanas, ug irebyo ang mahinungdanong hugpong sa mga pulong nga nalambigit sa matag usa. Dayon buhata ang mosunod sa matag usa sa mga tudling:
-
Pagdrowing o pagkuha og hulagway sa usa ka butang nga pamati ninyo may kalabotan sa mahinungdanong hugpong sa mga pulong sa maong tudling. (Sama pananglit, alang sa Mateo 5:14–16 , mahimo kang magdrowing o magkuha og litrato sa suga).
-
Pagsulat og mubo nga pagpasabot kon giunsa sa butang pagkonektar ngadto sa kamatuoran nga gitudlo diha sa tudling.
Pagkonektar sa mga kamatuoran ngadto sa atong mga kinabuhi
Si Elder David A. Bednar sa Korum sa Napulog duha ka apostoles mitudlo og usa ka kamatuoran nga makatabang kanato sa paggamit sa mga tudling sa doktrinal nga kahanas. Iyang gitudlo nga ang mga baroganan sa ebanghelyo “[mohatag og ] bililhong panglantaw sa mahangt[o]rong kamatuoran samtang atong gisinati ang lainlaing mga kahimtang, mga hagit, mga desisyon, ug mga kasinatian sa pagkamortal” (“Ang Mga Bar[o]ganan sa Akong Ebanghelyo,”Liahona, Mayo 2021, 124). Ang mga baroganan nga makita sa mga tudling sa doktrinal nga kahanas makatabang kanato sa pagkahibalo unsaon pagtubag sa daghang sitwasyon nga moabot sa atong mga kinabuhi.
Alang sa mosunod nga kalihokan, mahimong mosulat ang mga estudyante og sitwasyon sa atubang sa papel ug ang tudling sa kasulatan sa doktrinal nga kahanas ug pagpasabot sa likod.
Ihulagway ang usa ka sitwasyon diin ang usa ka tawo mahimong mogamit og usa ka kamatuoran gikan sa tudling sa doktrinal nga kahanas nga inyong gipili. Ipasabot unsaon nga ang paggamit sa kamatuoran mahimong makatabang sa tawo nga makadawat sa tabang sa Manluluwas.
Mahimong kolektahon ang mga senaryo sa mga estudyante ug basahon kini diha sa klase. Kini magtugot sa mga estudyante nga makadungog sa mga ideya sa ilang mga klasmeyt ug makita nga daghang nagkalainlaing mga kamatuoran ang mahimong magamit sa usa ka sitwasyon.
Usa ka kapilian aron mapataas ang pagsalmot sa estudyante mao ang pagbasa og senaryo ug pag-awhag sa mga estudyante (indibidwal o sa ginagmay nga mga grupo) nga mosulat og pakisayran sa doktrinal nga kahanas ug mahinungdanong hugpong sa mga pulong nga sa ilang hunahuna makatabang sa tawo sa maong senaryo. Kon ang estudyante o grupo makaila sa nagkalain-laing kamatuoran kay sa usa nga gisulat sa orihinal nga estudyante, awhaga sila sa pagpasabot sa unsang paagi nga kanang kamatuoran makatabang usab.
Pagpamalandong sa mga kamatuoran sa Manluluwas
Pamalandong sa mga tudling sa kasulatan sa doktrinal nga kahanas ug mahinungdanong hugpong sa mga pulong nga gitudlo panahon sa unang tunga sa tuig (tan-awa sa tsart nga mitungha sayo pa sa leksiyon).
Pagsulat og mubo nga sulat sa usa ka tawo nga hapit na magsugod sa seminaryo ug wala makahibalo mahitungod sa mga tudling sa doktrinal nga kahanas. Ipasabot sa ilaha sa unsang paaagi makatabang kini nga mga tudling kanila nga mas makahibalo sa Manluluwas ug makahatag nila og mga tubag sa mga pangutana ug mga hagit nga lagmit motumaw sa ilang mga kinabuhi. Mahimong mopaambit og ehemplo sa dihang ikaw o imong kaila napanalanginan pinaagi sa pagkahibalo ug paghinumdom sa mga kamatuoran nga gitudlo sa Manluluwas sa mga tudling sa doktrinal nga kahanas.
Dugang nga mga Kalihokan sa Pagkat-on
Pagdrama-drama [role-play]
Presidente Joy D. Jones, kinsa nag-alagad isip Kinatibuk-ang Presidente sa Primary, miingon nga ang pag-role play “makapalig-on sa mga bata nga maandam sa usa ka mahagiton nga kahimtang” (“Mahinungdanon nga mga Pag-istoryahay,” Liahona, Mayo 2021, 13). Mahimong awhagon ang mga estudyante nga ilhon ang sitwasyon diin ang usa ka kamatuoran gikan sa tudling sa doktrinal nga kahanas mahimong makatabang. Dayon mahimo nilang i-role play ang pagtubag sa maong sitwasyon gamit ang kamatuoran gikan sa tudling sa doktrinal nga kahanas.