Mateo 27:24–66; Marcos 15:15–38
Samtang ang Manluluwas nakasinati og grabe nga kasakit diha sa pagbitay sa krus, gitamay Siya sa mga kaaway ug giingnan Siya nga luwason ang Iyang kaugalingon gikan sa pagpasakit. Apan Siya matinud-anon nga milahutay, mipadayon sa Iyang pag-antos alang kanato. Kini nga leksiyon mahimong makatabang nimo nga mas makasabot ug magmapasalamaton sa pag-antos ug kamatayon sa Manluluwas didto sa krus isip importanteng bahin sa Iyang Pag-ula.
Pagtudlo pinaagi sa Espiritu. Ang Pagtudlo pinaagi sa Espiritu magsugod og mahunahunaon nga pagpangandam sa leksiyon. Mainampoong tun-an ang mga kasulatan ug ang kurikulum, ug sunda ang giya sa Espiritu Santo aron sa pagpahiangay sa kurikulum ngadto sa mga panginahanglan sa mga estudyante. Dugang pa niana, paningkamot nga bukas sa pagdawat ug pagsunod sa mga impresyon gikan sa Espiritu samtang nagtudlo, bisan kon kini magpasabot nga motipas gikan sa outline sa leksiyon.
Pagpangandam sa estudyante: Dapita ang mga estudyante sa pagbasa sa Mateo 27:35-50 o sa pamahayag ni Bishop Gérald Caussé gikan niini nga leksiyon. Awhaga sila nga motambong nga andam nga mopaambit unsa ang kahulugan niini sa ilaha nga ang Manluluwas personal nga nagpakamatay alang kanila.
Posible nga mga Kalihokan sa Pagkat-on
Si Jesukristo mihatag sa Iyang kinabuhi alang kanato
Niini nga leksiyon inyong tun-an ang mahitungod sa kamatayon ni Jesukristo. Paggahin og higayon sa pagpamalandong unsa ang inyong nahibaloan mahitungod sa kamatayon sa Manluluwas ug unsa ang inyong nabati mahitungod niini. Motuo ba kamo nga Siya namatay aron sa pagluwas kaninyo? Kon mao, sa unsang paagi nga kamo makapakita sa inyong kamapasalamaton alang sa Iyang sakripisyo? Sa inyong pagtuon, tinguhaa ang giya sa Espiritu Santo aron matabangan kamo sa pagtubag niining mga pangutana.
Ang Pagpalansang ni Jesukristo
Human ang Manluluwas gitaral sa mga Judio ug dayon ni Herodes ug Pilato, brutal Siya nga gibunalan ug gidala sa Golgota (nailhan usab nga Kalbaryo) aron ilansang sa krus.
Ikonsiderar ang pagmarka sa hugpong sa mga pulong “Unya gilansang nila siya sa krus” diha sa Mateo 27:35 . Basaha ang Giya ngadto sa mga Kasulatan ubos sa “Paglansang diha sa Krus” aron makita unsa ang nalakip niini nga buhat.
Mahimong basahon ang mosunod nga mga kasulatan og kusog uban sa mga estudyante nga nagsunod. Ang mga estudyante nga makahimo niini mahimong awhagon sa pagtabang sa pagbasa og kusog.
Basaha ang mosunod nga mga bersikulo mahitungod sa Paglansang sa Krus sa Manluluwas. Markahi ang mga detalye nga pamati nimo importante.
-
Mateo 27:27–31 . Ang Romanong mga sundalo nagbugalbugal sa Manluluwas.
-
Mateo 27:35–44 . Ang Manluluwas gibugalbugalan diha sa krus.
-
Mateo 27:45–46, 50 . Ang Manluluwas nag-antos ug namatay diha sa krus. Timan-i: Si Jesus gilansang sa “ikatulong oras” (alas 9:00 sa buntag.; tan-awa Marcos 15:25). “Ang ika-unom nga oras” nagpasabot sa alas 12:00 sa udto, “ang ika-siyam nga oras” nagpasabot sa alas 3:00 sa hapon.
Si Elder Jeffrey R. Holland sa Korum sa Napulog Duha ka Apostoles nagpasabot nganong ang Manluluwas nangutana, “Dios ko, Dios Ko, nganong gibiyaan mo ako?” (Mateo 27:46).
Sa bug-os nga pagsalig sa akong kalag ako mopamatuod nga … ang perpekto nga Amahan wala mobiya sa Iyang Anak niana nga oras. Sa pagkatinuod, personal nako kini nga pagtuo nga sa tanang mortal nga pangalagad ni Kristo ang Amahan wala pa gay[o]d sukad mahimong suod kaayo sa Iyang Anak kay sa niadtong kinasakitan nga katap[o]sang gutlo sa pag-ant[o]s. Bisan pa, … ang Amahan sa mubong higayon mitangtang gikan kang Jesus sa kahupayan sa Iyang Espiritu, mitangtang sa Iyang personal nga presens[i]ya. Kadto gikinahanglan, sa pagkatinuod mao kadto ang sentro sa kamahinungdanon sa Pag-ula, nga kining perpekto nga Anak kinsa wala gay[o]d makapamulong og dautan, wala makabuhat og sayop, wala makahikap og mga hugaw nga butang, kinahanglang masay[o]d kon unsay bation sa ubang tawhanong kaliwat—kitang tanan—kon kita makabuhat sa ingon nga mga sala. Aron mahimo ang Iyang Pag-ula nga walay katap[o]san ug mahangt[o]ron, kinahanglan Siyang motagamtam kon unsay bation sa pagkamatay dili lamang sa pisikal apan usab sa espirituhanong paagi, aron mabatyagan unsay bation kon ang balaang Espiritu mobiya, unsay bation kon siya gitalikdan sa hingpit, kapait ug kawalay paglaum nga pag-inusara.
(Jeffrey R. Holland, “Walay Bisan Usa nga Nakig-uban Kaniya,” Liahona, Mayo 2009, 87–88)
-
Unsa ang natabang ni Elder Holland aron nga mas makasabot kamo bahin sa Langitnong Amahan ug ni Jesukristo?
-
Unsay nakapadani kaayo kaninyo kabahin ni Jesukristo gikan niini nga mga panghitabo? Ngano man?
Mga Cross-Reference
Ang Manluluwas adunay gahom sa pagluwas sa Iyang kaugalingon gikan sa pagpakaulaw ug brutal nga pagpasakit nga kasinatian didto sa krus (tan-awa sa Mateo 26:52–54), apan wala Niya buhata.
Basaha ang labing menos tulo sa mosunod nga mga kasulatan aron madiskobre ngano. Ikonsiderar ang paghimo og tsart sama sa mosunod aron mahan-ay ang imong mga hunahuna ug mga pagbati. Mahimo usab ninyo nga i-link o i-cross-reference kini nga mga tudling ngadto sa Mateo 27:26 o maghimo og ilhanan [tag] uban niini nga mga pakisayran nga adunay ulohan nga imong gusto.
Ikonsiderar ang pagdrowing sa mosunod nga tsart diha sa pisara. Awhaga ang mga estudyante nga mobuhat nga mag pares ug sa ginagmay nga mga grupo aron mopuno niini.
|
Nganong ang Manluluwas mitugot sa pagpalansang sa krus |
Ang mga panalangin nga madawat nato tungod sa Iyang pagbuhat |
Doktrina ug mga Pakigsaad 35:2
Doktrina ug mga Pakigsaad 76:40–42
-
Hain nga mga tudling ang labing makahuluganon kanimo? Ngano man?
-
Unsa ang imong nakat-onan mahitungod kon nganong ang Manluluwas andam magpalansang sa krus alang kanato?
-
Asa sa mga panalangin nga nalista niining mga kasulatan diin ikaw labing mapasalamaton? Ngano man?
Importante nga masabtan nga isip kabahin sa Iyang Pag-ula, si Jesukristo gilansang sa krus alang sa mga sala sa kalibotan. Ang pag-antos nga gisugdan sa Manluluwas didto sa Tanaman sa Getsemani nakompleto didto sa krus sa Golgota. Kon ang Manluluwas wala nagpakamatay alang sa atong mga sala, dili kita makabalik ngadto sa atong Amahan sa Langit.
-
Unsaon ninyo pagpasabot sa usa ka tawo giunsa nga ang Paglansang sa Krus sa Manluluwas kabahin sa Iyang Pag-ula? Unsaon ninyo pagpasabot nganong makahuluganon man kini kaninyo?
Si Bishop Gérald Caussé mipasabot giunsa nga ang Pag-ula sa Manluluwas nahimong personal alang sa matag usa kanato.
Bisan kon kini walay kinutuban ug malukpanon, ang pag-ula sa Ginoo sa talagsaong paagi personal ug hinasa nga gasa, nga moangay sa matag usa kanato. Sama sa pagdapit ni Jesus sa matag usa sa Nephite nga mga disipulo nga mobati sa Iyang mga samad, namatay Siya alang sa matag usa kanato, sa personal nga paagi, sama nga kamo o ako ra ang tawo sa yuta. Iyang gipadangat kanato ang personal nga pagdapit nga moduol Kaniya ug mogamit sa talagsaong mga panalangin sa Iyang Pag-ula.
(Gérald Caussé, “Usa ka Buhi nga Saksi sa Buhi nga Kristo,” Liahona, Mayo 2020, 40)
-
Nganong inyo mang nabati nga importante nga maila ang personal nga kinaiyahan sa Pag-ula sa Manluluwas?
Mahimong ipatukar ang mga himno mahitungod sa pag-antos sa Manluluwas ug Paglansang sa Krus sama sa “Gamhanan Ka” (Mga Himno, nu. 45) o “Didto sa Krus sa Kalbaryo” (Mga Himno, nu. 113) samtang ang mga estudyante nagkompleto sa mosunod nga kalihokan. Isip alternatibo sa pagsulat og entry sa journal, mahimong mosulat ang mga estudyante og sulat sa ilang umaabot nga kaugalingon isip tubag sa mga konsepto niini nga kalihokan.
Aron matabangan kamo nga mabati ug mahinumdom sa personal nga kinaiyahan sa Pag-ula sa Manluluwas alang kaninyo, pagsulat og entry sa journal. Ikosiderar ang pag-apil sa mosunod:
-
Mga panalangin nga inyong madawat tungod sa pag-antos sa Manluluwas ug kamatayon didto sa krus alang kaninyo
-
Unsa ang kahulugan alang kaninyo nga Siya personal nga nagpakamatay alang kaninyo
-
Mga hunahuna ug mga impresyon nga imong nadawat gikan sa Espiritu Santo
Human sa igong panahon, hatagi ang mga estudyante og higayon sa pagpaambit sa ilang mga entry sa journal. Mahimong mopaambit og pagpamatuod sa Paglansang sa Krus ni Jesukristo ug ang importansiya niini isip kabahin sa Iyang Pag-ula.
Komentaryo ug Background nga Impormasyon
Unsa ang importante mahitungod sa lugar ug oras sa Paglansang sa Krus sa Manluluwas?
Si Presidente Russell M. Nelson mipasabot:
Ang ikaduhang hugna sa Iyang Pag-ula nagmalamp[o]son didto sa krus. …
Si Pilato nagdala sa Kordero sa Dios aron ilansang sa krus sa samang oras ang mga Nating karnero sa duol giandam alang sa pagsakripisyo. (Tan-awa sa Juan 19:13–14 .)
Ang Paglansang nahitabo sa usa ka bungtod nga gitawag og Golgotha (Griyego) o Kalbaryo (Latin) nagpasab[o]t nga “ang kalabera.” Ang kalabera nagsimbolo og kamatayon. Sa usa ka dapit nga sama niini, ang maulaong sakripisyo nakompleto. Diha sa krus, ang Manluluwas sa kalib[o]tan gibayaw sa kamatayon sa labing dakong posible nga kahulugan—ang pagkaamgo ug pagkatinuod sa gah[o]m sa Ginoo ibabaw sa kamatayon.
(Russell M. Nelson, “Why This Holy Land?,” Ensign,Dis. 1989, 18–19)
Nganong wala man luwasa ni Jesukristo ang Iyang kaugalingon?
Si Elder Ronald A. Rasband sa Korum sa Napulog Duha ka Apostoles mipasabot:
“Kanaog sa krus,” ang pundok sa mga dili tumutuo mibiay-biay Kaniya didto sa Kalbaryo [Mateo 27:40]. Makahimo unta Siya didto og usa ka milagro. Apan nakahibalo Siya sa kataposan gikan sa sinugdanan, ug Siya nagtinguha nga magmatinud-anon sa plano sa Iyang Amahan. Kana nga ehemplo kinahanglan nga dili mawala diha kanato.
(Ronald A. Rasband, “Tan-awa! Ako Mao ang usa ka Dios sa mga Milagro,” Liahona, Mayo 2021, 111)
Pila ka mga tawo ang naapektohan pinaagi sa pag-antos sa Manluluwas ug Paglansang sa Krus?
Si Elder Quentin L. Cook sa Korum sa Napulog Duha ka Apostoles mipasabot:
Ang Manluluwas … [nag]antos sa dili mahulagway nga kasakit didto sa Getsemani ug sa krus aron mahingpit ang Iyang pag-ula. … Gibuhat Niya kini alang sa matag lalaki ug babaye nga gilalang o ilalang sa Dios.
(Quentin L. Cook, “Ang Mahangt[o]rong mga Butang nga Nahitabo Kada Adlaw,” Liahona, Nob. 2017, 52)
Unsa kaha ang nasinati sa Manluluwas didto sa krus?
Si Elder James E. Talmage (1862–1933) sa Korum sa Napulog Duha ka Apostoles mipasabot:
Ingon og, nga dugang sa makahadlok nga pag-ant[o]s sa paglansang, ang panghingutas didto sa Getsemani nahisg[o]tan pag-usab, mas midako pa lapas sa tawhanong gah[o]m sa paglahutay. Nianang labing mapainit nga takna ang himatyon nga Kristo nag-inusara, nag-inusara sa labing mapait nga kamatuoran. Aron ang labing dakong sakripisyo sa anak matuman sa tibuok kahingpitan niini, ang Amahan ingon og mihunong sa suporta sa Iyang Presens[i]ya, gisalig ngadto sa Manluluwas sa mga tawo ang himaya sa kompleto nga kadaugan batok sa mga gah[o]m sa sala ug sa kamatayon.
(Jesus the Christ [1916], 661)
Si Elder Bruce R. McConkie (1915–85) sa Korum sa Napulog Duha ka Apostoles sa gihapon mitudlo:
Dayon ang kalangitan midag-om. Ang kangitngit mitabon sa yuta sulod sa tulo ka oras, sama usab nga nahitabo diha sa mga Nephite. Adunay kusog nga unos, sama nga ang Dios mismo sa kinaiyahan naghingutas.
Ug sa tinuoray siya naghingutas gay[o]d, samtang siya nagbitay sa krus sulod sa misunod pang tulo ka oras, gikan sa udto hangt[o]d sa alas 3:00 sa hapon,ang tanang walay katap[o]sang paghingutas ug walay kaluoy nga kasakit sa Getsemani nahitabo pag-usab.
(Bruce R. McConkie, “Ang Makalimpyo nga Gah[o]m diha sa Getsemani,” Liahona, Abril 2011, 18.)
Dugang nga mga Kalihokan sa Pagkat-on
Hilom nga leksiyon
Mahimong makatabang ang pagpahiangay unsaon pagpresenta niini nga leksiyon. Usa ka ehemplo mao ang pagbaton og “hilom nga leksiyon,” diin ang mga pamahayag, mga kasulatan, mga bidyo, ug mga pangutana i-display ug ang mga estudyante hilom nga magsulat sa ilang mga tubag, mga hunahuna, ug mga pagbati sa ilang mga journal sa pagtuon. Paggahin og panahon sa kataposan sa klase alang sa mga estudyante aron maghisgot unsa ang ilang nakat-onan ug nabati.
Ang kamatayon ni Jesus nagtuman sa panagna
Mahimong itandi sa mga estudyante ang mga panghitabo sa kamatayon sa Manluluwas ngadto sa mga panagna nga gihatag sa naunang mga propeta. Ang mga bersikulo naglangkob sa Salmo 22:1, 7–8, 16, 18 ; Salmo 34:20 ; Salmo 69:21 ; Isaias 50:6 ; 53:3–7 ; 53:12 ; Zacarias 12:10 ; 13:6 ; 1 Nephi 11:33 ; 19:9–14 ; ug 2 Nephi 6:9 . Mahimo dayon nilang ipaambit giunsa pagkatuman sa mga panagna. Kini mahimong makapalig-on sa pagsabot sa mga estudyante sa pulong sa Dios ingon man sa ilang pagtuo nga ang Dios nakahibalo sa kataposan gikan sa sinugdanan.