Mateo 27; Marcos 15; Lucas 23; Juan 19

Kinatibuk-ang Pagpasabot

Human si Jesus gidakop ug bakak nga gitaral atubangan sa mga lider sa Judio, Siya gidala aron itaral atubangan ni Pilato. Samtang Siya nakasinati og tumang kasakit sa pagbitay gikan sa krus, gibiaybiay Siya sa mga kaaway ug giingnan Siya nga luwason ang Iyang kaugalingon gikan sa pagpasakit, apan Iya kining gilahutay sa matinuoron nga paagi. Human sa Iyang kamatayon, ang Iyang mga disipulo naningkamot pag-ayo aron makuha ang Iyang lawas ug maampingong giandam kini alang sa paglubong.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.

Juan 18:33–40; Lucas 23:8–11

Tumong sa leksiyon: Kini nga leksiyon mahimong makatabang sa mga estudyante nga mas makat-on mahitungod sa kinaiya sa Manluluwas ug unsaon nila pagsunod sa Iyang ehemplo.

Pagpangandam sa estudyante: Awhaga ang mga estudyante sa pagpamalandong sa kinaiya ni Jesukristo ug sa paghunahuna mahitungod sa Iyang mga hiyas nga gusto nilang hingpit nga mapalambo. Awhaga ang mga estudyante nga motambong sa klase nga andam mopaambit og labing menos usa sa mga kinaiya ni Jesukristo ug nganong ilang nabati nga ang maong kinaiya maayong maangkon.

Sugyot sa pagtudlo sa videoconference: Aron maila kon hain sa mga istorya sa pagtaral sa Manluluwas ang basahon sa mga estudyante, awhaga sila nga ipataas ang usa hangtod sa upat ka mga tudlo sa ilang kamot ug ipakita sa klase. Dayon i-display ang lain-laing mga istorya nga ginumerohan og usa hangtod sa upat. Awhaga ang mga estudyante nga mobasa sa istorya nga kaparehas sa numero sa mga tudlo nga ilang gipataas.

Mateo 27:24–66; Marcos 15:15–38

Tumong sa leksiyon: Kini nga leksiyon mahimong makatabang sa mga estudyante nga mas makasabot ug magmapasalamaton sa pag-antos ug kamatayon sa Manluluwas diha sa krus isip usa ka importanteng bahin sa Iyang Pag-ula.

Pagpangandam sa estudyante: Dapita ang mga estudyante sa pagbasa sa Mateo 27:35-50 o sa pamahayag ni Bishop Gérald Caussé gikan niini nga leksiyon. Awhaga sila nga motambong nga andam nga mopaambit unsa ang kahulugan niini sa ilaha nga ang Manluluwas personal nga nagpakamatay alang kanila.

Sugyot sa pagtudlo sa videoconference: Ikonsiderar ang pagpakita og mga hulagway ug mga pamahayag ug pagpatan-aw sa mga bidyo aron matabangan ang mga tigkat-on kinsa dali makat-on kon may makita [visual learners] nga mga materyal. Usab, aron mahimo kining leksiyon nga mas abunda sa media, mahimong magdownload og himno mahitungod sa Pag-ula sa Manluluwas gikan sa ChurchofJesusChrist.org ug ipatukar kini samtang ang mga estudyante naghimo sa kataposang kalihokan.

Lucas 23:33–46; Juan 19:26–30

Tumong sa leksiyon: Kini nga leksiyon gituyo aron sa pagtabang sa mga estudyante nga maghunahuna mahitungod sa unsa ang ilang makat-onan gikan sa ehemplo sa Manluluwas panahon sa Iyang Pagkalansang sa Krus ug giunsa niini pag-impluwensiya ang ilang mga pagbati ug tinguha nga mas mahimong mahisama Kaniya.

Pagpangandam sa estudyante: Dapita ang mga estudyante nga motambong nga andam mopaambit mahitungod sa usa ka tawo nga ilang nailhan kinsa nagpakita og kapuangod [compassion] ug kalooy bisan samtang nakasinati og lisod nga mga hagit.

Mga hulagway nga i-display: Mga litrato sa nagkalain-laing mga hitabo sa kataposang adlaw sa mortal nga kinabuhi sa Manluluwas—sama sa Iyang pag-antos didto sa Getsemani, ang pagtaral sa mga lider sa Judio, ang pagtaral ni Pilato ug Herodes, ang pagbunal, ug ang Paglansang sa Krus—kon tinguhaon
Bidyo: “Maghigugmaay sa Usag Usa sama nga Siya Nahigugma Kanato” (9:43; tan-awa gikan sa time code 3:22 hangtod 7:54)

Sugyot sa videoconference nga pagtudlo: Ikonsiderar ang pag-share sa imong screen isip usa ka whiteboard. Ang mga estudyante mahimong mag-type sa mga kamatuoran nga ilang nakat-onan mahitungod kang Jesukristo sa tibook leksiyon diha sa whiteboard. Unya inig ka taud-taud niana nga leksiyon, mahimo usab nilang ilista ang mga paagi nga sila mas mahimong sama ni Jesukristo.

Mateo 27:50–66; Marcos 15:39–47; Lucas 23:46–56; Juan 19:38–42

Tumong sa leksiyon: Kini nga leksiyon gituyo sa pagtabang sa mga estudyante nga makasabot ug makapamalandong sa unsa ang nabuhat ni Jesukristo alang kanila ug unsa ang ilang mabuhat aron makapakita og pagpasidungog ug pagpasalamat Kaniya.

Pagpangandam sa estudyante: Awhaga ang mga estudyante sa pagpamalandong unsa ang nabuhat sa Manluluwas alang kanila ug sa paglista og mga paagi diin ilang mapakita ang ilang pagmahal alang Kaniya.

Aytem: Usa ka litrato sa minahal sa kinabuhi nga mipanaw na o, kon anaa, ang obitwaryo o usa ka program gikan sa paglubong
Mga Hulagway: Usa ka yanong dayagram sa templo sa Jerusalem sa Bag-ong Tugon ngadto sa pisara; mga hulagway sa lubnganan, mira, ug mga pahumot

Sugyot sa pagtudlo sa videoconference: Mahimong mag-awhag og usa o duha ka estudyante nga mag-andam aron mopaambit unsay gusto nila nga mahinumdoman mahitungod sa minahal nga mipanaw na ug giunsa nila sila paghigugma ug pagpasidungog.

Pagrebyo sa Doktrinal nga Kahanas 11

Tumong sa leksiyon: Kini nga leksiyon makatabang sa mga estudyante sa pagrebyo sa mga kamatuoran nga ilang nakit-an sa mga tudling sa kasulatan sa doktrinal nga kahanas ug makatabang nila sa pagbansay sa paggamit niining mga kamatuoran sa lain-lain nga mga kahimtang.

Pagpangandam sa estudyante: Kon mahimo, hatagi ang mga estudyante og usa ka kopya sa handout nga naglakip niini nga leksiyon. Awhaga sila sa pagrebyo sa mga pakisayran sa kasulatan sa doktrinal nga kahanas ug nag-unang mga hugpong sa mga pulong. Usab, hangyoa sila nga maghunahuna og mga sitwasyon diin ang mga kamatuoran nga nakita niining mga tudling sa doktrinal nga kahanas mahimong makatabang.

Tsart: Ang tsart sa doktrinal nga kahanas i-display sa pisara o ngadto sa handout
Materyal alang sa mga estudyante: Papel alang sa pagsulat

Sugyot sa pagtudlo sa videoconference: Human makasulat ang tanang estudyante og sitwasyon sa usa ka papel, pagpili og usa ka estudyante nga mopakita sa iyahang sulat ngadto sa klase. Mahimong makatabang ang pag-awhag sa klase sa pagpili og speaker view sa ilang videoconference nga software (dili gallery view) aron mas klarong makita ang gisulat sa estudyante. Dayon ang mga estudyante mahimong motubag og tudling sa doktrinal nga kahanas nga mahimong makatabang og usa ka tawo niana nga sitwasyon. Dayon ang maong estudyante mopili og lain pang estudyante nga modisplay sa iyang sitwasyon, ug ipadayon ang samang proseso.