hulagway sa babaye nga nagpahid sa mga tiil ni Jesus
Nanihapon si Jesus sa balay sa usa ka Pariseo nga ginganlan og Simon. Adunay misulod nga babaye nga gikonsiderar ni Simon nga “makasasala” ug “mihilak siya ug nahumod sa iyang mga luha ang mga tiil [sa Manluluwas],” gipahiran niya kini sa iyang buhok, “ug gihagkan, ug gibuboan sa … pahumot” (Lucas 7:37–39). Isip tubag sa mga hunahuna ni Simon, nagpaambit ang Manluluwas og sambingay mahitungod sa pagpasaylo ug gugma. Tinguha niini nga leksiyon nga tabangan ka sa paggamit sa hugot nga pagtuo diha kang Jesukristo ug paghinulsol sa imong mga sala.
Pagpamalandong. Dapita ang mga estudyante nga pamalandongan ang ilang nakat-onan. Ang pagpamalandong nagpasabot nga lawom nga paghunahuna mahitungod sa usa ka butang ug mahimong mapausbaw kini pinaagi sa pag-ampo. Samtang ang mga estudyante nagkat-on sa pagpamalandong, ang Espiritu sa kasagaran magpadayag og kamatuoran ngadto kanila ug magtudlo kanila kon unsaon nila nga mas mahimong sama ni Jesukristo.
Pag-andam sa estudyante: Dapita ang mga estudyante sa pagbasa sa Lucas 7:36–50 ug sa pagtambong nga andam sa pagpaambit sa ilang mga tubag sa mosunod nga mga pangutana nga makita diha sa Dali, Sunod Kanako—Alang sa mga Indibidwal ug mga Pamilya:Bag-ong Tugon 2023: “Pamalandongi kon sa unsang paagi nga kamo nahisama sa babaye nga gihulagway diha sa Lucas 7:36–50 . Kanus-a ka nakasinati sa kalumo ug kalooy nga gipakita sa Manluluwas ngadto kaniya? Unsa ang imong nakat-onan gikan sa iyang ehemplo sa hugot nga pagtuo, gugma, ug pagkamapaubsanon?” (“Pebrero 27–Marso 5. Mateo 8; Marcos 2–4; Lucas 7: ‘Imong Pagtuo Nagluwas Kanimo’”).
Posible nga mga Kalihokan sa Pagkat-on
Ang direksyon nga atong padulngan
Ipakita ang mosunod nga paghulagway ug kauban nga mga pangutana.
Imahe
Pagpakita og duha ka stick figure, ang usa nagpaingon ni Kristo, ang usa nagpalayo ni Kristo
Unsa ang imong namatikdan mahitungod sa mga tawo niini nga diagram?
Unsa kaha ang gisugyot sa ilang distansya gikan sa Manluluwas ug sa direksyon nga ilang giatubang mahitungod sa ilang relasyon ngadto Kaniya?
Paghunahuna kadali mahitungod kon asa nimo lagmit nga ibutang ang imong kaugalingon niini nga diagram ug kon unsa nga direksyon ka mag-atubang.Si Elder Larry R. Lawrence, kanhi sakop sa Seventy, mipasabot:
Imahe
Opisyal nga Litrato ni Elder Larry R. Lawrence. Gilitratohan niadtong Marso 2017.
Ang Langitnong Amahan nahibalo sa atong balaang potensyal. Magmaya siya sa matag higayon nga magpadayon kita. Para Niya, ang atong direksyon mas importante kay sa atong gipaspason.
(Larry R. Lawrence, “Unsa Pa May Akong Kulang?,” Liahona, Nob. 2015, 35)
Sa imong hunahuna nganong ang espirituhanong direksyon nga atong giatubang mas importante man kay sa atong gipaspason?
Ang Ginoo malipay gayod kon magbuhat kita og mga paningkamot sa paghinulsol (tan-awa sa Lucas 15:7; Doktrina ug mga Pakigsaad 18:13). Ang usa ka paagi sa paghulagway sa paghinulsol mao ang pagbiya gikan sa sala ug pagbalik ngadto sa Dios (tan-awa sa Giya ngadto sa mga Kasulatan, “Hinulsol, Paghinulsol,” scriptures.ChurchofJesusChrist.org). Samtang nagtuon ka, paghatag og pagtagad sa mga pag-aghat sa Espiritu nga makatabang kanimo sa pagbiya gikan sa sala ug pagbalik ngadto sa Manluluwas.
Si Jesus nagkaon diha sa balay ni Simon nga Pariseo
Dapita ang mga estudyante nga hunahunaon ang ilang mga tubag sa mga pangutana nga gihangyo kanila nga pamalandongan isip kabahin sa kalihokan sa pag-andam sa estudyante.
Ang Lucas 7 naglangkob og asoy kabahin ni Jesus nga nagkaon diha sa balay sa usa ka Pariseo nga ginganlan og Simon. Samtang kauban ni Jesus si Simon, giduol Siya sa usa ka babaye nga adunay reputasyon nga usa ka makasasala (tan-awa sa Lucas 7:37, 39).
Basaha ang Lucas 7:36–39, ug pangitaa kon unsa ang nahitabo sa dihang miduol ang babaye kang Jesus atol niini nga kumbira.
Unsa ang imong namatikdan mahitungod kang Simon? mahitungod sa babaye?
Natagna ni Jesus ang mga gihunahuna ni Simon ug nagpaambit og sambingay. Basaha ang Lucas 7:40–43, ug pangitaa kon unsa ang gitudlo sa Manluluwas kang Simon pinaagi niini nga sambingay. Lagmit nga makatabang nga mahibaloan nga ang usa ka denaryo mao ang kantidad sa kwarta nga kasagarang ibayad sa trabahador sa usa ka adlaw (tan-awa sa bersikulo 41 ).
Unsa kaha ang natabang niini nga sambingay ni Simon aron makasabot mahitungod sa iyang kaugalingong panginahanglan og pasaylo?
Sa panahon sa Manluluwas nabatasan na nga pasidunggan sa tagbalay ang iyang inila nga mga bisita pinaagi sa paghatag og mga buhat sa pagkamabination sama sa paghalok kanila agi og pag-abiabi, paghatag og tubig aron hugasan ang ilang mga tiil, ug pagdihog og lana sa ilang mga ulo (tan-awa sa James E. Talmage, Jesus the Christ[1916], 261). Sama sa nakarekord sa Lucas 7:44–46, gituki sa Manluluwas nga wala gitanyag ni Simon kini nga mga pagtahod ngadto kang Jesus, samtang ang babaye naningkamot og maayo aron ipakita ang iyang gugma ug pagpasalamat para Kaniya.
Unsa sa imong hunahuna ang nasabtan niini nga babaye mahitungod kang Jesus nga lagmit wala masabti ni Simon?
Unsa nga ebidensya ang imong nakita nga naghinulsol ang babaye, o mibiya gikan sa iyang mga sala ug mibalik ngadto sa Manluluwas?
Basaha ang Lucas 7:47–50, ug pangitaa kon nganong gipasaylo sa Ginoo kini nga babaye sa iyang mga sala.
Unsa ang imong mga hunahuna o mga pagbati mahitungod sa Manluluwas samtang gitun-an nimo kini nga asoy?
Unsa nga mga kamatuoran ang imong nakat-onan gikan niini nga asoy?
Ang mga estudyante mahimong moila og lain-laing mga kamatuoran gikan niini nga asoy, lakip na ang mosunod: Samtang gipasaylo kita sa atong mga sala, mas molawom ang atong gugma para sa Manluluwas. Kon kita mogamit sa atong hugot nga pagtuo diha ni Jesukristo ug maghinulsol sa atong mga sala, madawat nato ang Iyang pagpasaylo.
Si Elder Dale G. Renlund sa Korum sa Napulog Duha ka Apostoles mipaambit og mga pagtulon-an nga may kalabotan sa asoy nga girekord diha sa Lucas 7.
Opisyal nga litrato ni Elder Dale G. Renlund sa Korum sa Napulog Duha ka Apostoles, Enero 2016.
Kon mas duol kita ni Jesukristo sa mga hunahuna ug mga katuyoan sa atong kasingkasing, mas masabtan nato ang Iyang inosenteng pag-antos, mas mapasalamaton kita sa grasya ug pagpasaylo, ug mas gusto nato nga maghinulsol ug mahimong sama Kaniya. Ang atong hingpit nga distansya gikan sa Langitnong Amahan ug ni Jesukristo importante, apan ang direksiyon nga atong padulngan mas importante. Ang Dios mas mahimuot sa mahinulsulong makasasala nga naningkamot nga mapaduol ngadto Kaniya kay sa mga nagpakatarong sa kaugalingon, tigpangita og sayop nga mga indibidwal kinsa, sama sa mga Pariseo ug mga escriba sa karaan, wala makaamgo nga kinahanglan gayod nilang maghinulsol.
(Dale G. Renlund, “Nga Ako Unta Makadala sa Tanan nga mga Tawo ngari Kanako,” Liahona, Mayo 2016, 40)
Unsa nga mga pulong o hugpong sa mga pulong niini nga pamahayag ang nakapausbaw sa imong pagsabot sa bag-ohay nimong gitun-an diha sa Lucas 7?
Unsa nga mga kasinatian ang nakatabang kanimo nga mobati og mas dakong gugma ug pagdayeg para sa Manluluwas ug sa kaluoy nga Iyang gitanyag?
Paghimo og plano
Hatagi ang mga estudyante og panahon sa pagtubag sa mosunod nga mga pangutana diha sa ilang mga journal sa pagtuon.
Hinumdomi nga ang paghinulsol dili usa ka panghitabo o para lamang sa dagkong mga sala. Ang paghinulsol usa ka proseso, ug naghinulsol kita sa bisan unsang higayon nga magbuhat kita og paningkamot nga mas mahiduol sa Ginoo ug mobiya gikan sa daotan.
Tan-awa pag-usab ang hulagway sa Manluluwas ug ang diagram nga adunay mga stick figure, ug hunahunaa ang imong relasyon kang Jesukristo ug kon asa nga direksyon ka nagpadulong. Pagbuhat og plano aron mas mapalawom ang imong gugma para sa Manluluwas pinaagi sa paghinulsol kada adlaw. Kompletoha ang mosunod nga pagpraktis sa lahi nga panid sa papel aron mapabilin nimo kini nga pribado. Lagmit nga makabaton ka og oportunidad nga mag-follow up bahin niini nga kasinatian sa umaabot nga leksiyon.
Ang leksiyon nga “Sukda ang Imong Nakat-onan” nga mosunod sa mga leksiyon diha sa Mateo 8–13; Marcos 2–5; ug Lucas 7, 9, 11 nagpasabot niini nga plano ug nagdapit sa mga estudyante nga pamalandongan ang ilang pag-uswag.
Unsa ang usa ka butang nga kinahanglan nimong undangon sa pagbuhat aron mas mahiduol sa Manluluwas? Unsaon man nimo sa pag-undang?
Unsa ang usa ka butang nga kinahanglan nimong sugdan sa pagbuhat aron mas mahiduol sa Manluluwas? Unsaon man nimo sa pagsugod?
Komentaryo ug Background nga Impormasyon
Kang kinsa man ko nahisama dinhi niini nga asoy: ni Simon o sa babaye?
Si Presidente Dieter F. Uchtdorf, kanhi sakop sa Unang Kapangulohan, miingon:
Imahe
Opisyal nga litrato ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga litrato niadtong 2008 nga gipuli sa litrato nga gikuha niadtong 2004.
Hain niining duha ka tawo kita labing nahisama?
Nahisama ba kita ni Simon? Kompyansa ug komportable ba kita sa atong maayo nga mga buhat, nagsalig sa atong pagkamatarong? Kita ba kaha may gamay nga pagkawalay pailob niadtong wala mosunod sa atong mga sumbanan? Mekanikal ba ang atong lihok, naglihok nga wala maghunahuna, nagtambong sa atong mga miting, nanghoy-ab sa klase sa Doktrina sa Ebanghelyo, nagtan-aw sa atong mga cell phone sa panahon sa serbisyo sa sakramento?
O kita parehas ba niini nga babaye, kinsa naghunahuna nga siya hingpit ug walay paglaom nga nawala tungod sa sala?
Kita ba dako og paghigugma?
Kita ba nakasabot sa atong pagka-utangan ngadto sa atong Langitnong Amahan ug nangamuyo sa tibuok natong mga kalag alang sa grasya sa Dios?
Kon kita moluhod sa pag-ampo, kini mao ba ang paghinumdom sa labing nindot sa atong kaugalingong pagkamatarong, o pagkumpisal ba kini sa atong mga sayop, pagpangamuyo ba kini para sa kalooy sa Dios, ug paghilak ba sa pagpasalamat alang sa nindot nga plano sa katubsanan?
Ang kaluwasan dili makuha pinaagi sa pagkamasulundon; kini gipalit pinaagi sa dugo sa Anak sa Dios [tan-awa sa Mga Buhat 20:28].
(Dieter F. Uchtdorf, “Ang Gasa sa Grasya,” Liahona, Mayo 2015, 109)
Nangong importante man nga maghinulsol matag adlaw?
Si Presidente Russell M. Nelson mipasabot:
Imahe
Opisyal nga litrato ni Presidente Russell M. Nelson nga gikuha niadtong Enero 2018
Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo.
(Russell M. Nelson, “Kita Makabuhat og Mas Maayo pa ug Mahimong Mas Maayo” Liahona, Mayo 2019, 67).
Dugang nga mga Kalihokan sa Pagkat-on
Ipulipuli ang pag-andam sa estudyante ug ang sinugdanan sa leksiyon
Sa dili pa itudlo ang leksiyon, ikonsiderar ang pagdapit sa mga estudyante nga maghunahuna mahitungod sa labing mabination nga butang nga gibuhat sa usa ka tawo para kanila. Dapita sila nga maghunahuna mahitungod sa kon unsa ang ilang gibati ngadto niining tawhana ug unsa ang ilang gibuhat aron ipakita ang ilang pagpasalamat. Mahimo usab nilang hangyoon ang mga sakop sa pamilya o mga higala nga magpaambit og mga kasinatian. Mahimong ipaambit sa mga estudyante kini nga mga kasinatian sa sinugdanan sa leksiyon aron makatabang kanila nga mabati ang importansya sa kamatuoran nga samtang gipasaylo kita sa atong mga sala, mas molawom ang atong gugma para sa Manluluwas.
Mga kasulatan aron mapalawman ang pagsabot sa mga estudyante
Aron matabangan ang mga estudyante nga mas masabtan ang kamatuoran nga samtang gipasaylo kita sa atong mga sala, ang atong gugma alang sa Manluluwas mas molawom, mahimo silang hangyoon nga tun-an ang pipila o ang tanang mosunod nga mga kasulatan: Mga Taga-Roma 2:4 ; Mga Taga-Roma 5:8 ; 1 Juan 4:19 ; Enos 1:1–11 ; ug Mosiah 27:23–37 .
