Marcos 2:1–12

Giayo ni Jesus ang Usa ka Paralitiko

Si Jesukristo nagtan-aw sa usa ka tawo nga naghigda sa yuta sa Iyang atubangan. Ang tawo giputos sa usa ka habol ug nag-antos sa pagkaparalitiko. Ang masakiton nga tawo gitunton sa mga higala agi sa lungag sa atop sa paglaom nga ayohon. Si Kristo gihulagway nga mikab-ot sa Iyang mga kamot ngadto sa tawo. Ang pipila sa apostoles o mga disipulo kauban ni Kristo.

Gipakita ni Jesus ang Iyang abilidad sa pag-ayo sa tawo sa pisikal ug espirituwal pinaagi sa pag-ayo sa usa ka tawo nga paralitiko (paralisado) ug pagpasaylo sa iyang mga sala. Makatabang kini nga leksiyon sa pagdugang sa imong pagsabot nga mahimong ayohon sa Manluluwas ang tanang matang sa mga sakit.

Pag-andam sa estudyante: Dapita ang mga estudyante nga maghunahuna og usa ka higayon sa dihang ang usa ka tawo nga ilang nailhan nakadawat og gikinahanglang panalangin gikan sa Dios. Sa unsang paagi nga nakaapekto ang panalangin niining tawhana ngadto sa ubang tawo, sama sa mga higala ug mga sakop sa pamilya? Awhaga ang mga estudyante sa paghunahuna kon unsa ang ilang nakat-onan pinaagi sa pagtan-aw kon unsa ang gibuhat sa Manluluwas para nianang tawhana.

Posible nga mga Kalihokan sa Pagkat-on

Unsa ang imong andam nga buhaton?

Para sa mosunod nga sitwasyon, ikonsiderar ang pagdugang og partikular nga mga detalye aron mas moapil ang mga estudyante. Kini nga mga detalye tingali mahitungod sa unsa ang sakit, kon kanus-a angay nga mahitabo ang pagtambal, o kon unsa ang kinahanglanon para sa pagtambal.

Hunahunaa nga ang usa ka tawo nga imong gihigugma nag-antos sa makamatay nga sakit nga nanginahanglan og espesyal nga pagtambal ug aduna lamang usa ka doktor nga makaluwas kaniya. Unsa ang andam nimong buhaton aron makapangayo og tabang? Unsa ang imong buhaton kon puno na ang eskedyul sa doktor o nagpuyo ang doktor sa laing nasod?

Lagmit nga andam ang mga tawo sa pagbuhat sa bisan unsang butang aron makabaton og kaayohan alang sa ilang kaugalingon o sa ilang mga minahal sa kinabuhi. Bisan pa kon ang pisikal nga sakit sa kasagaran mahimong matambalan sa hanas nga mga propesyonal, adunay espirituwal nga mga sakit nga mahimong hingpit lamang nga maayo pinaagi ni Jesukristo. Ilista diha sa imong journal sa pagtuon kon unsa ang pipila niini sigon sa imong gituohan.

Samtang nagtuon ka niini nga leksiyon, pamalandongi kon unsa ang imong mabuhat aron matabangan ang mga minahal sa kinabuhi ug ang imong kaugalingon nga moduol ngadto kang Kristo aron makadawat og tabang nga Siya lamang ang makahatag.

“Usa ka tawo nga paralitiko”

Ang kahanas nga makatabang kanimo sa pagkat-on og dugang samtang gitun-an nimo ang mga asoy sa kasulatan mao ang pagbasa gikan sa panglantaw sa lain-laing mga karakter sa sugilanon. Samtang gibuhat nimo kini, hunong matag karon ug unya aron sulayan sa paghunahuna kon unsa ang lagmit nga gibati o gihunahuna nianang tawhana diha sa lain-laing mga punto sa sugilanon.

Aron ipraktis kini nga kahanas sa pagtuon, pagpili og usa sa mosunod nga mga tawo nga tutokan samtang tun-an nimo kini nga asoy mahitungod kang Jesus nga nagtudlo didto sa Capernaum:

Aron tabangan ang mga estudyante nga makakat-on gikan sa daghang mga punto sa panglantaw, ikonsiderar ang pagbahin kanila sa mga grupo nga adunay tulo ka sakop ug pag-awhag sa kada estudyante sa grupo nga tutokan ang laing tawo sa sugilanon.

Usa ka paralisado nga tawo (“usa ka paralitiko” nga gigamit dinhi niini nga asoy nagpasabot nga siya paralisado)
Usa sa upat ka tawo nga mialsa sa paralisadong tawo
Usa sa mga tawo sa balay nga naminaw kang Jesus

Basaha ang Marcos 2:1–3, nga maghunahuna nga ikaw ang tawo nga gipili nimong tutokan.

Ikonsiderar ang pag-awhag sa mga estudyante nga tubagon ang mosunod nga mga pangutana diha sa ilang mga grupo nga adunay tulo ka sakop.

Sa imong hunahuna, unsa nga mga pagsulay, kon aduna man, ang lagmit nga giatubang niining tawhana?
Unsa sa imong gihunahuna ang nakita, nadungog, gihunahuna, ug gibati niining tawhana?
Unsa kaha ang gilaoman niining tawhana nga madawat gikan sa ilang panahon kauban si Jesukristo?

Basaha ang Marcos 2:4, mangita kon unsa ang gibuhat niadtong mialsa sa tawo aron maduol siya kang Jesukristo.

2:57

Pagdapit og dili mominos tulo ka estudyante, usa para sa kada tawo sa sugilanon, nga tubagon og kusog ang mosunod nga mga pangutana.

Unsa sa imong hunahuna ang gihunahuna ug gibati sa tawo nga imong gipili niining panahona diha sa sugilanon? Ngano man?
Unsa sa imong hunahuna ang ilang gidahom nga buhaton o isulti ni Jesus?

Basaha ang Marcos 2:5 aron mahibaloan kon unsa ang gisulti ni Jesus ngadto sa tawo.

Dapita ang mga estudyante sa pagtubag sa mosunod nga pangutana diha sa ilang mga grupo nga adunay tulo ka sakop.

Ngano kaha nga ang mga pulong sa Manluluwas sa bersikulo 5 nakapakurat man sa tawo nga imong gitutokan?

Ang pipila sa mga tawo nga anaa niini nga panahon misukitsukit sa pagkatinuod sa awtoridad sa Manluluwas sa pagpasaylo sa mga sala. Basaha ang Marcos 2:6–12, ug pangitaa kon unsa ang gibuhat sa Manluluwas aron ipakita ang Iyang awtoridad sa pagpasaylo. Ang hugpong sa pulong nga “Anak sa tawo” sa bersikulo 10 nagpasabot kang Jesukristo nga Anak sa “Tawo sa Pagkabalaan,” nga mao ang Dios nga Amahan (tan-awa sa Moises 6:57).

2:57

Hunahunaa ang tawo nga imong gitutokan diha sa asoy. Unsaon nimo paghulagway sa reaksyon niining tawhana sa gisulti ug gibuhat sa Manluluwas?
Unsa ang imong nakat-onan mahitungod sa Manluluwas samtang nagtutok ka sa usa ka partikular nga tawo diha sa sugilanon?

Ang gahom ni Jesukristo sa pag-ayo

Ang usa ka kamatuoran nga lagmit naila nimo samtang imong gitun-an kini nga asoy mao nga si Jesukristo adunay gahom aron ayohon kita sa pisikal ug espirituwal nga paagi.

Si Presidente Dieter F. Uchtdorf, kanhi sakop sa Unang Kapangulohan, mipamatuod sa gahom sa Manluluwas sa pag-ayo sa espirituwal nga balatian.

Usahay ang espirituwal nga balatian maoy bunga sa mga sala o emosyonal nga mga samad. …

Bisan ang pinakalawom nga espiritwal nga mga samad—oo, bisan kadtong daw walay pagkaayo—mamaayo.

Mahal kong mga higala, ang makaayo nga gahom ni Jesukristo anaa sa atong panahon.

Ang makaayo nga paghikap sa Manluluwas makausab og mga kinabuhi sa atong panahon sama sa Iyang panahon. Kon may pagtuo kita, gunitan Niya ang atong mga kamot, pun-on sa langitnong kahayag ang atong mga kalag, ug sultihan kita sa bulahang mga pulong, “Tindog, dad-a ang imong gihigdaan, ug lakaw.” [Juan 5:8 ].

(Dieter F. Uchtdorf, “Mga Tighupot sa Langitnong Kahayag,” Liahona, Nob. 2017, 78)

Unsa ang mga ehemplo sa espirituwal nga mga samad nga mahimong ayohon sa Manluluwas?

Ikonsiderar ang pagsulat diha sa pisara Si Jesukristo lamang ang hingpit nga makaayo________ug dapita ang mga estudyante sa pagsumpay diha sa blangko.

Sa unsang paagi kini nakapanalangin sa imong kinabuhi ang pagkahibalo nga mahimong ayohon Niya ang espirituwal nga mga samad?

Pamalandongi ang mosunod nga mga pangutana nga may kalabotan niini nga kamatuoran. Ikonsiderar ang pagrekord sa imong mga hunahuna diha sa imong journal sa pagtuon.

Aduna bay bisan unsang espirituwal nga samad sa imong kinabuhi nga kinahanglang ayohon?
Unsaon nimo pagtinguha sa makaayo nga gahom ni Jesukristo?
Aduna ba kay nailhang laing tawo nga nanginahanglan sa makaayo nga gahom ni Jesukristo? Unsa man ang imong mahimo aron tabangan sila nga makagamit niini?

Pagpamatuod bahin sa gugma ni Jesukristo para sa kada usa kanato ug sa Iyang gahom aron ayohon kita.

Ipaambit ang unsay imong nakat-onan

Samtang nagtuon ka sa uban pang mga asoy sa mga kasulatan karong tuiga, ikonsiderar ang paggamit sa kahanas sa pagtutok sa partikular nga mga karakter. Lagmit nga makatabang ang pagbasa sa tudling sa daghang higayon, pagpamalandong sa kada higayon kon unsa ang lagmit nga nakat-onan sa lain-laing mga tawo diha sa sugilanon.

Hunahunaa nga ang tawo nga imong gitutokan samtang gitun-an nimo kini nga asoy gustong mohulagway ngadto sa usa ka higala kon unsa ang ilang nasaksihan ug gibati nianang adlawa. Pagtagana og panahon aron isulat diha sa imong journal sa pagtuon kon giunsa nimo paghulagway kanila nga nagsaysay sa kasinatian sa detalyadong paagi. Ilakip kon unsa ang imong gihunahuna nga ilang nakat-onan ug gibati mahitungod kang Jesukristo.

Komentaryo ug Background nga Impormasyon

Ang akong hugot nga pagtuo makaimpluwensya ba sa akong mga minahal?

Si Elder Chi Hong (Sam) Wong sa Seventy mitudlo:

Akong ipaambit ang usa pa ka tinago nga bahandi nga naa niining istorya sa kasulatan. Naa kini sa bersikulo 5: “Sa pagkakita ni Jesus sa ilang pagsalig” (emphasis gidugang). Wala ko kabantay niini sa nangagi—ilang pagsalig. Ang atong hiniusang pagsalig makaapekto usab sa kaayohan sa uban.

Kinsang mga tawhana kadtong gihisgotan ni Jesus? Maglakip kini sa upat nga midala sa paralitiko, ang tawo mismo, ang mga tawo nga nag-ampo para niya, ug tanang naminaw didto sa pagsangyaw ni Jesus ug miabiba sa tago alang sa umaabot nga milagro. Naglakip usab kini sa kapikas, ginikanan, anak , misyonaryo, presidente sa korum, presidente sa Relief Society, bishop, ug higala nga anaa sa layo. Makatabang kita `sa usag usa. Kinahanglang aktibo kita sa pagluwas sa nanginahanglan.

(Chi Hong [Sam] Wong, “Magkahiusa sa Pagluwas,” Liahona, Nob. 2014, 16)

Unsa ang gipamatud-an ni Jesus ngadto sa mga eskriba pinaagi sa pisikal nga pag-ayo sa tawo?

Si Elder Bruce R. McConkie (1915–85) sa Korum sa Napulog Duha ka Apostoles mipasabot:

Si Jesus ug ang “mga doktor sa balaod” nga anaa didto nasayod nga walay usa gawas sa Dios ang makapasaylo sa mga sala. Busa, isip usa ka direkta ug mahinuklogong pagsaksi nga ang gahom sa Dios anaa diha kaniya, … gibuhat ni Jesus ang unsay dili mabuhat sa nagpakaaron-ingnon—iyang gipamatud-an ang iyang balaan nga gahom pinaagi sa pag-ayo sa gipasaylo nga tawo. Sa iyang pangutana, “Nagkinahanglan ba og mas dakong gahom ang pagpasaylo sa mga sala kay sa pag-ayo sa masakiton ug pagpalakaw?” adunay usa lamang ka tubag! Usa lamang sila; siya nga makabuhat sa usa, makabuhat sa lain.

(Bruce R. McConkie, Doctrinal New Testament Commentary [1973], 1:177–78)

Dugang nga mga Kalihokan sa Pagkat-on

Pagdala sa uban ngadto sa Manluluwas

Ikonsiderar ang pagdapit sa mga estudyante nga sundon ang ehemplo sa upat ka tawo nga determinado sa pagdala sa paralisadong tawo ngadto kang Kristo. Dapita sila nga hunahunaon ang partikular nga mga minahal sa kinabuhi nga nanginahanglan og tabang sa pagduol ngadto sa Manluluwas ug magbuhat og plano aron tabangan sila. Mahimo nilang ikonsiderar ang paglakip sa uban diha sa ilang plano, sama sa tawo nga paralitiko nga gitabangan sa sobra sa usa ka tawo. Ang pamahayag ni Elder Wong sa seksiyon nga “Komentaryo ug Background nga Impormasyon” niini nga leksiyon (o sa iyang tibuok nga pakigpulong) makatabang sa mga estudyante sa pagsabot sa importansya sa paghiusa sa ilang hugot nga pagtuo ngadto sa uban.