Mateo 8; Lucas 7:11–17

Ang Milagrosong Gahom ni Jesukristo

Ang usa sa mga paagi nga gipakita ni Jesus ang Iyang gahom mao ang pinaagi sa milagrosong mga pag-ayo, nga naglakip sa pagbuhi gikan sa pagkamatay sa anak nga lalaki sa usa ka biyuda. Tinguha niini nga leksiyon nga palig-onon ang imong hugot nga pagtuo diha sa gahom ni Jesukristo sa paghimo og mga milagro sa atong panahon ug sa imong kinabuhi.

Paggamit sa kurikulom. Samtang mag-andam ka sa kada leksiyon ug magtuon sa hut-ong sa kasulatan [scripture block], rebyoha usab ang kurikulum sa mainampoong paagi. Kon imo kining buhaton, ang Espiritu Santo makatabang kanimo sa pagpahiangay sa leksiyon ngadto sa mga panginahanglan sa imong mga estudyante. Mahimo nimong gamiton ang tanan o ang pipila sa mga sugyot sa pagtudlo para sa usa ka hut-ong sa kasulatan, o mahimo nimong ipahiangay ang gisugyot nga mga ideya sumala sa mga panginahanglan ug mga kahimtang sa imong klase.

Pag-andam sa estudyante: Dapita ang mga estudyante nga mangutana sa mga sakop sa pamilya o mga higala kon unsang mga panghitabo sa ilang kinabuhi ug sa Simbahan ang gikonsiderar nila nga mga milagro. Pahinumdomi ang mga estudyante nga bisan pa kon makapaukyab ang pipila ka milagro, ang uban mas dili masabtan.

Posible nga mga Kalihokan sa Pagkat-on

Mga milagro

Ikonsiderar ang pagsulat sa mosunod nga kahulogan diha sa pisara ug pagpakita og mga hulagway sa pipila ka milagrosong mga panghitabo diha sa mga kasulatan (tan-awa ang kauban nga mga hulagway).

Ang milagro “usa ka talagsaon nga panghitabo nga nahimo pinaagi sa gahom sa Dios. … Ang hugot nga pagtuo gikinahanglan aron sa pagpakita sa mga milagro” (Giya sa mga Kasulatan, “ Milagro,” scriptures.ChurchofJesusChrist.org).

• Unsa ang pipila sa imong paboritong mga milagro nga nakarekord diha sa mga kasulatan? Ngano man?

• Unsay imong nakat-onan mahitungod ni Jesukristo gikan niini nga mga milagro?

Kon itugot sa mga kahimtang, ang mga estudyante nga wala magbuhat sa kalihokan sa pag-andam sa estudyante sa wala pa ang klase mahimong dapiton nga mo-text sa usa ka sakop sa pamilya o higala aron mangutana kon unsa nga mga panghitabo ang gikonsiderar nila nga mga milagro. Mahimong ipaambit sa mga estudyante kini nga mga tubag duol sa kataposan sa leksiyon.

Sa panahon sa kinabuhi sa Manluluwas, naghimo Siya og daghang mga milagro. Samtang magtuon ka sa pipila niini dinhi niini nga leksiyon ug sa tibuok semana, pamalandongi kon unsaon nimo pagtubag ang mosunod nga mga pangutana:

• Unsay imong nasabtan mahitungod sa mga milagro?

• Unsang mga pangutana ang aduna ka mahitungod niini?

• Unsa nga (mga) milagro ang gipanghinaot nimo nga buhaton sa Dios sa imong kinabuhi?

Mahimo nimong irekord ang imong mga tubag diha sa imong journal sa pagtuon. Pangita og mga tubag sa imong mga pangutana karong semanaha samtang magtuon ka sa mga milagro nga gihimo ni Jesukristo.

Unsa ang gitudlo kanato niini nga mga milagro mahitungod ni Jesukristo?

Ang usa ka kahanas sa pagtuon sa kasulatan nga makatabang kanimo nga mas makaila ni Jesukristo mao ang pagtan-aw lapas pa sa unsay Iyang gibuhat ug mainampoong mamalandong kon unsa ang gipadayag sa Iyang mga aksiyon mahitungod sa Iyang kinaiya. Samtang magbasa ka, ikonsiderar ang pagpangutana sama sa “Unsa ang akong nakat-onan mahitungod sa mga motibo, mga prayoridad, ug mga hiyas sa Manluluwas gikan sa unsa ang Iyang gibuhat ug gisulti?”

Basaha ang Lucas 7:11–17, nga mangita sa mga detalye sa sugilanon nga nagtudlo kanimo mahitungod kang Jesukristo. Sama pananglitan, paghatag og pagtagad sa kon unsa ang matabang sa bersikulo 13 kanimo nga masabtan kon nganong gibuhat Niya kini nga milagro.

• Unsa ang imong nakat-onan mahitungod sa mga motibo, mga prayoridad, ug mga hiyas sa Manluluwas gikan sa Iyang gibuhat o gisulti samtang gihimo Niya kini nga milagro?

• Sa unsang paagi nga makatabang kanimo ang imong nakat-onan sa pagkakaron sa imong kinabuhi?

Si Jesus naghimo og daghan nga mga milagro

Pagpili og usa o daghan pa sa mosunod nga mga milagro aron tun-an. Ipadayon ang paghatag og pagtagad sa kon unsa ang imong nakat-onan mahitungod sa Manluluwas gikan niini nga mga asoy.

Ikonsiderar ang pagpakita sa mosunod nga mga hulagway ug mga pakisayran sa kasulatan. Itudlo ang kada hulagway samtang gibasa og kusog ang mubo nga paghulagway nga nagtuki niini. Unya bahina ang klase diha sa mga grupo nga adunay tulo ka sakop. Sangoni ang kada sakop sa grupo og laing asoy nga tun-an, ug dapita ang mga estudyante nga ipaambit nganha sa ilang grupo ang mga detalye sa asoy nga ilang gibasa.

Mateo 8:1–4 ; Marcos 1:40–42 Si Jesus miayo sa usa ka sanlahon. Ang sanlahon gilikayan sa katilingban tungod kay ang sanla usa ka sakit kaayo, makatakod, ug usahay makamatay nga balatian. Ang kadaghanan sa mga tawo molikay sa pagduol o paghikap kaniya.

Mateo 8:5–8, 13 Giayo ni Jesus ang sulugoon sa usa ka opisyal nga Romanhon. Ang senturyon usa ka magmamando nga opisyal sa mokabat sa 100 ka tawo sa Romanhong militar. Daghang mga Judeo sa panahon ni Jesus ang nasuko sa mga sundalo nga Romanhon tungod sa mga kalainan sa relihiyon ug tungod kay girepresentar nila ang nasod nga misakop kanila.

Marcos 5:1–13, 18–20 Gihinginlan ni Jesus ang mga yawa sa sulod sa usa ka tawo nga nagpuyo sa mga lubnganan. Adunay tawo nga nagpuyo sa mga lubnganan, nga nagsinggit-singgit ug nagpasakit sa iyang kaugalingon. Sa dihang ang mga tawo sa lugar dili makagapos kaniya sa mga kadena, milikay sila kaniya, ug nag-inusara siya sa mga lubnganan.

Dapita ang mga estudyante nga hisgotan sa ilang mga grupo ang mga pangutana sama sa mosunod nga nakatabang kanila sa pagtutok sa Manluluwas kay sa milagrosong panghitabo lamang. Siguroha nga nasabtan sa mga estudyante nga ang mga milagro ni Jesukristo nagpakita sa Iyang gugma ug kalooy para kanato.

• Unsa ang imong nakat-onan mahitungod sa mga motibo, mga prayoridad, ug mga hiyas sa Manluluwas gikan sa Iyang gibuhat o gisulti samtang gihimo Niya kini nga milagro?

• Sa unsang paagi nga makatabang kanimo ang imong nakat-onan sa pagkakaron sa imong kinabuhi?

• Unsa ang mahimo nimong buhaton kon manginahanglan ka sa tabang sa Manluluwas?

Mga milagro sa atong panahon

Naghunahuna ba ka kon nagbuhat pa ba gihapon ang Manluluwas og mga milagro karon? Samtang daghang mga tawo ang wala makasinati sa pipila sa dramatik nga mga milagro nga nakarekord sa mga kasulatan, sama sa pagbahin sa Pulang Dagat o ang pagbuhi sa patay, importante nga hinumdoman nga ang mga milagro nahitabo gihapon karon. Ang Manluluwas mipahayag, “Ako mao ang Dios sa mga milagro; ug Ako mopakita ngadto sa kalibotan nga Ako sama sa kagahapon, sa karon, ug sa kahangtoran” ( 2 Nephi 27:23).

Si Presidente Dallin H. Oaks sa Unang Kapangulohan mitudlo:

Daghang mga milagro ang nahitabo matag adlaw diha sa buhat sa atong Simbahan ug diha sa mga kinabuhi sa atong mga miyembro. Daghan kaninyo ang nakasaksi og mga milagro, tingali sobra pa kay sa inyong mahunahunaan.

(Dallin H. Oaks, “Miracles,” Ensign, Hunyo 2001, 6)

• Unsa ang imong mga hunahuna o mga pangutana mahitungod niini nga pamahayag ni Presidente Oaks?

Sa dili pa mangutana sa mosunod nga mga pangutana, ikonsiderar ang pagpahinumdom sa mga estudyante bahin sa sugyot sa pag-andam sa estudyante o pagdapit kanila nga susihon kon adunay mga tubag gikan sa mga sakop sa pamilya o mga higala nga ilang gi-text sa sinugdanan sa leksiyon. Pahimangnoi sila nga dili magpaambit og mga detalye nga lagmit nga personal kaayo o balaan.

• Unsa ang pipila ka mga milagro nga gibuhat sa Manluluwas isip bahin sa Pagpahiuli ug pinaagi sa buhat sa Iyang Simbahan?

• Unsa nga mga milagro ang nakita nimo o sa imong mga minahal diha sa inyong kinabuhi?

• Unsa ang gipadayag niining personal nga mga milagro mahitungod sa Langitnong Amahan ug ni Jesukristo?

Ikonsiderar ang pagdapit sa mga estudyante nga maghunahuna mahitungod sa unsang paagi nga ang ilang pagsabot sa mga milagro napalambo atol niini nga leksiyon. Dapita usab ang mga estudyante nga maghatag og pagtagad sa milagrosong impluwensya sa Ginoo diha sa ilang kinabuhi. Awhaga sila nga magtinguha og inspirasyon gikan sa Espiritu Santo aron tabangan sila nga makakaplag og mga tubag sa mga pangutana nga aduna gihapon sila mahitungod sa mga milagro.

Komentaryo ug Background nga Impormasyon

Unsa ang kataposan nga milagro?

Si Presidente Dallin H. Oaks sa Unang Kapangulohan mitudlo:

Nakaapekto sa daghang mga tawo ang pipila ka milagro. Ang maong kataposan nga milagro mao ang Pag-ula ni Jesukristo—ang Iyang kadaogan sa pisikal ug espirituwal nga kamatayon para sa tanang katawhan. Walay milagro nga mas molabaw pa o mas halangdon.

(Dallin H. Oaks, “Miracles,” Ensign, Hunyo 2001, 9)

Ang dramatik nga mga milagro sama niadtong narekord diha sa mga kasulatan nahitabo ba gihapon karon?

Usa ka ehemplo sa talagsaong milagro karong panahona gipaambit ni Presidente Gordon B. Hinckley (1910–2008):

Gipangutana ko kon mobisita ba ako sa usa ka babaye sa ospital kansang mga doktor misulti kaniya nga mabuta siya ug mawala ang iyang panan-aw sulod sa usa ka semana. Nangutana siya kon mangalagad ba kami kaniya ug gibuhat namo kini, ug gisulti niya nga milagroso siyang naayo. … Miingon ako kaniya, “Wala ko miluwas sa imong panan-aw. Siyempre, ang Ginoo ang nagluwas sa imong panan-aw. Pasalamati Siya ug pagpabiling mapasalamaton Kaniya.”

(Teachings of Gordon B. Hinckley [1997], 343)

Ngano nga ang mga tawo dili man makadawat sa matag milagro nga ilang gitinguha uban sa hugot nga pagtuo diha ni Jesukristo?

Si Presidente Dallin H. Oaks sa Unang Kapangulohan miingon:

Ang mga milagro dili kay igo lang nga pangayuon. … Ang kabubut-on sa Ginoo kanunay nga mopatigbabaw. Ang pagkapari sa Ginoo dili mahimong gamiton aron mahimo ang usa ka milagro nga sukwahi sa kabubut-on sa Ginoo. Kinahanglan usab natong hinumdoman nga bisan kon mahitabo ang usa ka milagro, dili kini mahitabo sa gitinguha nato nga panahon. Ang mga pagpadayag nagtudlo nga ang milagrosong mga kasinatian mahitabo “diha sa iyang kaugalingon nga higayon, ug sa iyang kaugalingon nga paagi” ( D&P 88:68).

(Dallin H. Oaks, “Miracles,” Ensign, Hunyo 2001, 9)

Ngano nga ang mga yawa sa asoy diha sa Marcos 5:11–13 nagtinguha nga mosulod sa baboy?

Si Propeta Joseph Smith (1805–44) mipasabot:

Kita mianhi dinhi sa yuta aron kita makaangkon og lawas ug dad-on kini nga putli sa atubangan sa Dios sa celestial nga gingharian. Ang dakong baroganan sa ebanghelyo naglangkob sa pag-angkon og usa ka lawas. Ang yawa walay lawas, ug kini mao ang iyang silot. Siya ganahan kon siya makaangkon og tabernakulo sa tawo, ug sa diha nga gihinginlan sa Manluluwas siya mihangyo sa pag-adto sa panon sa mga baboy, nagpakita nga mipili siya sa lawas sa baboy kay sa wala. Ang tanang mga tawo kinsa adunay mga lawas adunay gahom niadtong wala.

(Mga Pagtulun-an sa mga Presidente sa Simbahan: Joseph Smith [2007], 252)

Mas daghan pa ba nga mga milagro ang mahitabo sa dili pa mobalik ang Manluluwas?

Si Presidente Russell M. Nelson mipamatuod:

Ang atong Manluluwas ug Manunubos, si Jesukristo, mohimo sa uban Niyang labing gamhanan nga mga buhat karon ug sa higayon nga Siya mobalik na pag-usab. Makakita kita og milagrosong timailhan nga ang Dios Amahan ug ang Iyang Anak, si Jesukristo, maoy magdumala niini nga Simbahan sa kahalangdon ug himaya.

(Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96)

Dugang nga mga Kalihokan sa Pagkat-on

Si Jesukristo mao ug magpadayon nga usa ka Dios sa mga milagro

Aron matabangan ang mga estudyante nga makita nga nahitabo gihapon ang mga milagro, ikonsiderar ang pagdapit kanila nga tun-an ang Mormon 9:11–21 . Dapita sila nga mangita og mga tubag sa mosunod:

• Unsa ang pipila sa mga milagro ni Jesukristo nga gituki ni Moroni niini nga mga bersikulo?

• Unsa nga tambag ang gihatag ni Moroni niadtong wala motuo sa mga milagro?

• Nganong moundang man ang Dios sa pagbuhat og mga milagro taliwala sa Iyang katawhan?

Pagsalikway sa daotan nga mga espiritu

Human sa pagkat-on nga ang Manluluwas adunay gahom sa pagsalikway sa daotan nga mga espiritu, mahimong basahon sa mga estudyante ang panagna ni Hari Benjamin sa Mosiah 3:5–6 . Dapita sila sa paghisgot kon unsa ang buot ipasabot nga ang Manluluwas mahimong “mosalikway sa mga yawa, o daotan nga mga espiritu diin nagpuyo diha sa mga kasingkasing sa mga katawhan” ( bersikulo 6). Dapita sila sa pagpamalandong kon aduna bay bisan unsang butang nga nakapugong kanila sa espirituhanong paagi nga gusto nilang tangtangon gikan sa ilang kaugalingong kasingkasing. Pagpamatuod bahin sa abilidad sa Manluluwas sa pagtangtang sa daotang mga tinguha gikan sa atong kasingkasing samtang kita modangop ngadto Kaniya diha sa hugot nga pagtuo.