Mateo 8; Marcos 2–4; Lucas 7

Kinatibuk-ang Pagpasabot

Nagpakita si Jesus og dakong gahom ug kaluoy pinaagi sa mga milagro nga Iyang gibuhat, lakip ang pagbanhaw sa anak nga lalaki sa biyuda gikan sa mga patay ug pag-ayo sa usa ka tawo nga paralisado. Gipakalma usab Niya ang unos sa Dagat sa Galilea ug gipasaylo ang mga sala sa usa ka babaye nga nagpakita sa iyang pagpasalamat pinaagi sa paghugas ug pagdihog sa Iyang mga tiil.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya sa kon unsa ang lagmit nga kinahanglanon aron makaandam daan para sa matag leksiyon.

Mateo 8; Lucas 7:11–17

Katuyoan sa leksiyon: Tinguha niini nga leksiyon nga tabangan ang mga estudyante nga palig-onon ang ilang pagtuo sa gahom ni Jesukristo sa pagbuhat og mga milagro sa atong panahon ug sa ilang mga kinabuhi.

Pag-andam sa estudyante: Awhaga ang mga estudyante nga mangutana sa mga miyembro sa pamilya o mga higala kung unsang mga panghitabo sa ilang mga kinabuhi ug sa Simbahan ang gikonsiderar nila nga mga milagro. Pahinumdomi sila nga bisan pa kon dramatiko ang pipila ka milagro, mas maliputon ang uban.

Sugyot sa pagtudlo pinaagi sa videoconference: Ikonsiderar ang pagbutang sa mga estudyante sa mga breakout room aron hatagan sila og oportunidad nga ipaambit ang pipila sa mga milagro nga ilang giandam nga ipaambit atol sa kalihokan sa pag-andam sa estudyante.

Marcos 2:1–12

Katuyoan sa leksiyon: Kini nga leksiyon makatabang sa mga estudyante nga madugangan ang ilang panabot nga makaayo ang Manluluwas sa tanang mga matang sa pagkaluya sa lawas.

Pag-andam sa estudyante: Awhaga ang mga estudyante nga maghunahuna sa kasinatian diin ang usa ka tawo nga ilang nailhan nakadawat og gikinahanglang panalangin gikan sa Manluluwas. Sa unsang paagi nakaapekto ang panalangin niining tawhana sa ubang tawo, sama sa mga higala ug mga miyembro sa pamilya? Awhaga ang mga estudyante sa paghunahuna kon unsa ang ilang nakat-onan pinaagi sa pagtan-aw kon unsa ang gibuhat sa Manluluwas para nianang tawhana.

Lucas 7:36–50

Katuyoan sa leksiyon: Matabangan niini nga leksiyon ang mga estudyante sa paggamit sa ilang hugot nga pagtuo kang Jesukristo ug paghinulsol sa ilang mga sala.

Pag-andam sa estudyante: Dapita ang mga estudyante nga basahon ang Lucas 7:36–50 ug hunahunaon kini nga mga pangutana gikan sa Dali, Sunod Kanako—Alang sa mga Indibidwal ug mga Pamilya]: Bag-ong Tugon 2023:“Pamalandongi kung sa unsang paagi nga sama ka sa babaye nga gihulagway sa Lucas 7:36–50. Kanus-a nimo nasinati ang kalumo ug kaluoy nga gipakita sa Manluluwas kaniya? Unsa ang imong nakat-onan gikan sa iyang ehemplo sa hugot nga pagtuo, gugma, ug pagkamapaubsanon?” (“Pebrero 27–Marso 5. Mateo 8; Marcos 2–4; Lucas 7: ‘Naluwas Siya Tungod sa Iyang Pagtuo’”).

Hulagway: Pag-andam nga ipakita ang hulagway nga nakita sa sinugdanan sa leksiyon.

Sugyot sa pagtudlo pinaagi sa videoconference: Samtang gibasa ang mga bersikulo sa Lucas 7 , ipa-“Gallery View” ang imong screen aron makita nimo ang tibuok nga klase. Awhaga ang estudyante nga mibasa sa miaging bersikulo nga human sa pagbasa motudlo sa usa ka partikular nga direksyon. Ang bisan kinsang estudyante nga gitudlo diha sa imong screen mahimong hangyuon sa pagbasa sa sunod nga bersikulo.

Mateo 8:23–27; Marcos 4:35–41

Katuyoan sa leksiyon: Matabangan niini nga leksiyon ang mga estudyante nga madawat ang kalinaw ug pagkakalma sa Manluluwas sa panahon sa mga panlimbasog nga ilang nasinati.

Pag-andam sa estudyante: Awhaga ang mga estudyante nga kumpletohon ang kalihokan sa “Mateo 8:23–27; Marcos 4:35–41: Adunay gahom si Jesukristo nga magdala og kalinaw sa taliwala sa mga unos sa kinabuhi,” nga anaa sa Dali, Sunod Kanako—Alang sa mga Indibidwal ug mga Pamilya: Bag-ong Tugon 2023. Awhaga ang mga estudyante nga moanha nga andam nga magpaambit og mga panglantaw. Mahimo nilang hangyoon ang mga miyembro sa pamilya o mga higala nga mosalmot kauban nila niini nga kalihokan.

Mga materyal para sa mga estudyante: Siguroha nga ang mga estudyante adunay mga gamit sa pagsulat ug journal sa pagtuon o papel nga gamiton sa panahon sa kalihokan sa paghulagway diha sa hunahuna.

Sugyot sa pagtudlo pinaagi sa videoconference: Awhaga ang mga estudyante nga ipakita sa camera ang mga hulagway nga ilang gidrowing aron makita nila ang mga drowing sa usag usa. Dapita ang pipila ka estudyante sa pagpasabot ngadto sa klase kung unsa ang ilang gidrowing.

Pagrebyo sa Doktrinal nga Kahanas 2

Katuyoan sa leksiyon: Tinguha niini nga leksiyon nga tabangan ang mga estudyante sa pagmemorya sa mga pakisayran sa kasulatan ug mga importanteng hugpong sa mga pulong sa kasulatan para sa pipila ka tudling sa doktrinal nga kahanas sa Bag-ong Tugon.

Pahinumdom: Lagmit nga kinahanglang magtudlo og leksiyon sa usa ka tudling sa doktrinal nga kahanas isip puli niini nga leksiyon sa pagrebyo. Tan-awa ang iskedyul sa gipaspason nga gihatag sa direktor sa lugar o rehiyon o koordinitor aron masiguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

Pag-andam sa estudyante: Awhaga ang mga estudyante nga pamalandongan kon sa unsang paagi ang pagkahibalo sa mga pakisayran sa kasulatan ug kon unsa ang gitudlo niini makatabang kanila sa ilang mga kinabuhi.

Handout: Pag-andam nga ipakita ang listahan sa mga tudling sa doktrinal nga kahanas ug ang kauban nga mga importanteng tudling sa kasulatan niini, o ihatag kini sa mga estudyante isip handout.
Mga materyal para sa mga estudyante: Siguroha nga ang mga estudyante adunay mga gamit sa pagsulat, journal sa pagtuon, ug papel nga gamiton sa kalihokan sa mga kard sa memorya.

Sugyot sa pagtudlo pinaagi sa videoconference:Ikonsiderar ang paggamit og mga online nga dula nga mahimong magtugot sa mga estudyante nga mosalmot nga magkauban. Mahimong mogamit og pipila ka lain-laing online nga tool aron itukma ang importanteng hugpong sa mga pulong sa pakisayran sa kasulatan, o mahimong magbuhat ang mga estudyante og mga kalihokan sa pagtubag sa blangko.