Sukda ang Imong Nakat-onan 2

Mateo 3–7; Lucas 3–6; Marcos 1; Juan 2–4

Tinguha niini nga leksiyon nga tabangan ka sa pagsusi sa mga tumong nga imong gitakda, kon unsa ang imong nakat-onan, ug ang personal nga pag-usbaw nga imong nasinati atol sa imong pagtuon sa Bag-ong Tugon karong tuiga.

Pag-andam sa estudyante: Dapita ang mga estudyante nga maghunahuna sa ilang mga paningkamot sa pagpakigbatok ug pagbuntog sa tintasyon pinaagi sa hugot nga pagtuo diha kang Jesukristo.

Posible nga mga Kalihokan sa Pagkat-on

Pagsunod kang Jesukristo

Ang imong nakat-onan gikan sa Bag-ong Tugon diha sa seminary giplano aron sa pagtabang kanimo nga mas hingpit nga moduol kang Jesukristo ug mahimong Iyang disipulo, o Iyang sumusunod. Buhata ang usa sa mosunod nga tulo ka kalihokan, samtang mangita sa mga panalangin nga moabot kon sundon nato ang Manluluwas pinaagi sa pagbuhat sa Iyang mga pagtulon-an. Unya tubaga ang duha ka pangutana nga mosunod.

Pagdesisyon kon unsa sa mosunod nga tulo ka kalihokan ang lagmit nga labing epektibo para sa klase, ug dapita ang mga estudyante nga buhaton kana nga kalihokan. Siguroha nga magbilin og igong panahon para sa ubang bahin sa leksiyon.

1. Kantaha o paminawa ang kanta sa Primary nga “Ang Tawong Maalam ug ang Tawong Walay Kaalam” (Songbook sa mga Bata, 132), ug basaha ang Mateo 7:24-27.

2. Sa usa ka pirasong papel o diha sa imong journal sa pagtuon, pagdrowing og yano nga representasyon sa mga pagtulon-an sa Manluluwas diha sa Mateo 7:24–27.

3. Gamit ang mga bloke o mga tasa, pagtukod og yano nga balay o istruktura sa lig-on nga pundasyon, sama sa sawog o desk o lamesa. Unya pagtukod og laing yano nga istruktura sa dili kaayo lig-on nga pundasyon, sama sa higdaanan, gipilo nga habol, o unlan. Gamita ang imong mga kamot aron iduot ang gibutangan sa kada istruktura, ug obserbahi kon unsa ang mahitabo. Basaha ang Mateo 7:24–27, nga mangita sa mga pagkapareho tali niini nga kalihokan ug sa sambingay sa Manluluwas.

• Unsa ang imong nakat-onan gikan niini nga kalihokan?

• Unsa nga mga panalangin ang atong madawat kon buhaton nato ang mga pagtulon-an sa Manluluwas?

Hunahunaa ang pag-usbaw nga imong nasinati samtang nagtuon ka ug naningkamot nga gamiton ang mga pagtulon-an sa Manluluwas gikan sa Bag-ong Tugon karong tuiga. Tubaga ang usa o labaw pa sa mosunod nga mga pangutana:

• Unsa ang pipila ka mga pagtulon-an ni Jesukristo nga imong gitun-an nga espesyal nga makahuluganon kanimo?

• Sa unsang mga paagi nga mas nahiduol ka sa Manluluwas samtang imong gitun-an ang Iyang mga pulong?

• Unsa ang pipila ka mga pagtulon-an nga imong gitun-an karong tuiga nga imong nagamit sa imong kinabuhi? Unsa nga mga panalangin ang imong nasinati isip resulta?

Motabang kanimo kini nga leksiyon sa pagsukod sa pipila ka paagi nga imong gitukod ang imong kinabuhi sa bato ni Jesukristo aron masugakod nimo ang mga pagsulay nga mahimong moabot.

Ang ubang bahin niini nga leksiyon magtuki sa mosunod nga mga leksiyon:

• Mateo 3:1–12; Marcos 1:1–8

• Lucas 3:7–14

• Mateo 4:1–11, Bahin 1

• Mateo 4:1–11, Bahin 2

• Juan 3:1–8

• Mateo 6:1–18

Kon ang mga pagpahiangay niini nga mga leksiyon gihimo, o kon wala gitudlo kini nga mga leksiyon, lagmit nga kinahanglang ipahiangay ang mosunod nga mga kalihokan.

Ipasabot ang kaimportante sa paghinulsol, bunyag, ug kompirmasyon

Ikonsiderar ang pag-awhag sa mga estudyante nga buhaton ang mosunod nga kalihokan isip usa ka drama-drama [role play] nga magkapares o diha sa gagmay nga mga grupo.

Ang mosunod nga kalihokan makatabang kanimo sa pagtimbang-timbang kon unsa ka maayo ang imong pagsabot ug pagpasabot sa doktrina sa Manluluwas mahitungod sa paghinulsol, bunyag, ug pagpakompirma. Ikonsiderar ang mosunod nga duha ka pamahayag, ug pagsulat og tubag sa kada usa aron makatabang sa pagsulbad sa gipahayag nga kabalaka. Paggamit og dili mominos usa ka kasulatan gikan sa imong bag-ohay lang nga pagtuon. Lagmit nga makatabang ang mga pakisayran sa kasulatan diha sa parentheses. Ayaw pagduhaduha sa paglakip og bisan unsang personal nga mga kasinatian o pagpamatuod.

1. Ako usa ka maayo nga tawo. Nganong mabalaka man ko mahitungod sa paghinulsol nga wala man ko nagbuhat og dagkong mga sala? (Tan-awa sa Mateo 3:1–8 ; Lucas 3:7–14 .)

2. Mituo ko ni Jesukristo, apan sa akong hunahuna dili na kinahanglan nga mabunyagan ug makompirmahan ko aron makabalik sa pagpuyo kauban sa Dios. (Tan-awa sa Marcos 1:1–9 ; Juan 3:5 ; 2 Nephi 31:5–12, 17–18.)

Samtang gipaambit sa mga estudyante ang ilang mga tubag, timbang-timbanga kon unsa ka maayo ang ilang pagsabot sa doktrina sa paghinulsol, bunyag, ug pagpakompirma. Kon gikinahanglan, hangyoa ang pipila ka estudyante nga morag nakasabot pag-ayo sa doktrina nga ipaambit ang ilang mga pagpasabot, ug ang mga pakisayran sa kasulatan nga ilang gigamit, ngadto sa tibuok klase.

Sukda ang imong abilidad sa pagpakigbisog ug pagbuntog sa daotan pinaagi sa hugot nga pagtuo diha ni Jesukristo

Bag-ohay lang nimong gitun-an ang mahitungod sa pagbuntog sa Manluluwas sa mga tintasyon ug nakabaton ka og oportunidad nga magbuhat og plano aron sundon ang Iyang ehemplo ug mosalig Kaniya samtang giatubang nimo ang imong kaugalingong mga tintasyon. (Lagmit nga makatabang kon rebyohon ang Mateo 4:1–11 ug ang imong gisulat diha sa imong journal sa pagtuon para niana nga leksiyon.)

Aron tabangan ka sa pagtimbang-timbang kon giunsa nimo paggamit ang imong nakat-onan, pagtagana og pipila ka minuto aron pamalandongan ang imong mga paningkamot nga sundon ang ehemplo sa Manluluwas ug mosalig Kaniya sa pagbuntog sa tintasyon. (Kini lagmit nga naglakip sa mga kasulatan nga gisulayan nimo sa paghinumdom o pagmemorya.) Hunahunaa kon unsa ang imong nakat-onan gikan sa imong kasinatian samtang gikonsiderar nimo ang mosunod nga sitwasyon:

Hunahunaa nga adunay usa ka higala nga naglisod sa pagbuntog sa tintasyon sa pagtan-aw sa pornograpiya. Misulay siya sa pagtangtang sa tintasyon pinaagi sa dili paggamit sa internet kon mag-inusara siya ug dili magdala sa iyang cellphone sa iyang kuwarto sa gabii. Nakasinati siya og pipila ka dakong kalamposan sulod sa pipila ka adlaw pero napildi sa tintasyon pagkahuman niini. Nasuko siya sa iyang kaugalingon nga nabuhat niya ang paglikay sa pornograpiya sulod sa pipila pa ka adlaw sa wala pa napildi pag-usab. Nanginahanglan siya og pipila ka dugang pang mga ideya ug tabang aron makagamit sa gahom sa Manluluwas aron mabuntog kini nga tintasyon.

Ikonsiderar ang pagbuhat sa mosunod nga kalihokan isip usa ka klase. Hangyoa ang usa ka estudyante nga magpaambit og butang nga makatabang nga ilang masulti ngadto niini nga higala. Unya dapita kana nga estudyante nga mopili og laing sakop sa klase aron magpaambit og hunahuna nga mahimong makatabang. Mahimong ipadayon sa mga estudyante ang pagtawag sa usag usa aron magpaambit, o ang tagsa-tagsa mahimong moisa sa ilang mga kamot aron mosalmot. Kon gikinahanglan, ipaambit sa klase kon unsa ang lagmit nga isulti o bation sa higala isip tubag.

Dili ilakip og paambit ang imong kaugalingong partikular nga mga tintasyon, pagsulat og mubo nga sulat ngadto sa imong higala. Ilakip ang duha o labaw pa sa mosunod diha sa imong tubag:

• butang nga imong gibuhat aron modangop ngadto sa Ginoo nga nakatabang kanimo sa pagbuntog sa tintasyon

• unsa ang imong nahibaloan mahitungod kang Jesukristo nga mahimong makatabang sa imong higala nga mobati nga gihigugma ug magmadasigon sa pagpadayon sa pagbuntog sa tintasyon

• unsa ang imong irekomenda nga buhaton sa imong higala aron masunod ang ehemplo sa Manluluwas ug mosalig Kaniya sa pagbuntog sa tintasyon

• unsa nga mga kalamposan ug mga pagsulay ang lagmit nga masinati sa imong higala sa umaabot ug tambag sa kon unsaon pagsalig sa Ginoo samtang gisulbad niya kini

Ikonsiderar kon sa unsang paagi nga lagmit makatabang kanimo kini nga kalihokan sa personal nga paagi. Unsa ang gusto nimong buhaton aron padayon nga pakigbatokan ug mabuntog ang tintasyon gamit ang kalig-on diha kang Jesukristo? Kon gibati nimo nga dili madasigon o naglibog, ikonsiderar ang pag-ampo mahitungod sa imong mga kabalaka ug mga gibati. Lagmit nga makatabang usab kon makig-istorya sa usa ka ginikanan o bishop. Ayaw pagpakawala sa paglaom samtang naningkamot ka sa pagtukod sa imong kinabuhi diha sa Manluluwas ug sa Iyang mga pagtulon-an.

Pamalandongi ang imong tinguha nga sinserong mosimba ug mosunod sa Dios

Ang usa ka kataposang baroganan nga pamalandongan mao ang imong tinguha nga sinserong mosimba sa Dios ug mosunod ni Jesukristo. Sa miaging leksiyon, nakat-onan nimo nga kon magbuhat kita og matarong nga mga buhat aron mahimuot ang Langitnong Amahan, nan hatagan Niya kita og ganti sa dayag nga paagi (tan-awa ang Mateo 6:1–6; 16–18). Samtang imong gitun-an kini nga kamatuoran, tingali nakasulat ka og tsart nga sama niini:

Unsa ang tulo ka maayong buhat nga imong nabuhat sa miaging semana? (Paglista og usa kada laray.)	Unsa ang imong mga rason sa pagbuhat niini?	Unsay imong gibati pagkahuman nimo sa pagbuhat niining “mga maayong buhat”?

Ikonsiderar ang pagdugang ngadto sa tsart og usa o duha ka maayong buhat nga imong nabuhat sukad niadto nga leksiyon ug tubaga ang follow-up nga mga pangutana diha sa tsart. Pamalandongi kon nabuhat ba nimo nga mas sinserong nagtutok sa Dios.

• Kon gibati sa usa ka tawo nga naglisod sila sa pagbuhat og maayong mga buhat aron mahimuot ang Dios, unsa nga tambag ang imong ihatag kanila?

Paminaw og maayo sa mga tubag sa mga estudyante. Sunda ang giya sa Espiritu Santo sa pagdugang og tambag, mga kasinatian, ug pagpamatuod.