Mateo 6:1–18

Ang Manluluwas Mitudlo sa Iyang mga Disipulo sa Pagbuhat og Matarong nga mga Buhat

Gipadayon ni Jesus ang Iyang Wali sa Bukid, nga nagtudlo nga kinahanglan kitang magbuhat og maayo nga mga buhat aron malipay ang atong Langitnong Amahan ug dili aron makakuha og pagtagad gikan sa uban. Niini nga leksiyon, makabaton ka og oportunidad nga timbang-timbangon ang imong mga motibo sa pagbuhat og maayo nga mga buhat ug magdesisyon kon sa unsang paagi nimo gustong mousbaw.

Pagkahibalo ug pagsabot sa doktrina ni Kristo. Tabangi ang mga estudyante nga “mahibalo ug makasabot” sa doktrina ni Kristo. Ang pagkahibalo ug pagsabot mao “ang kahibalo sa hunahuna ug sa kasingkasing.” Kon ang Espiritu mosaksi sa kamatuoran sa baroganan sa ebanghelyo, ang mga estudyante lagmit nga mas “mobati sa kamatuoran niana nga baroganan ug mosugod nga mas klarong makakita, mas kusganong magtinguha, ug sa ingon mas hingpit nga makasabot diha sa ilang mga kasingkasing sa mga kahimoan niana nga baruganan sa ilang kinabuhi.” (Kim B. Clark, “Lawom nga Pagkat-on ug Hingpit nga Kalipay diha sa Ginoo” [pakigpulong nga gihatag sa tinuig nga pagbansay nga pagsibya sa Seminaries and Institutes of Religion, Hunyo 13, 2017])

Pag-andam sa estudyante: Dapita ang mga estudyante nga hunahunaon ang mahitungod sa ilang mga motibo alang sa ilang mga aksiyon atol sa 24 ka oras sa wala pa ang klase.

Posible nga mga Kalihokan sa Pagkat-on

Pahinumdom: Ang Pag-ampo sa Ginoo ug ang kauban nga mga tudling (Mateo 6:9–15) itudlo sa sunod nga leksiyon nga magtutok sa Lucas 11 .

Atong mga motibo

Hunahunaa ang mahitungod sa mosunod nga pamahayag: Giayo ni Gustavo ang koral sa iyang silingan.

Ikonsiderar ang pagdrowing diha sa pisara og stick figure nga naghawid og martilyo. Isulat ang pamahayag diha sa pisara duol sa stick figure.

• Unsa ang imong hunahuna mahitungod ni Gustavo?

Papasa ang tuldok sa tumoy sa “Giayo ni Gustavo ang koral sa iyang silingan,” ug isulat ang tungod kay … sa tumoy sa pamahayag. Hangyoa ang mga estudyante nga kompletohon ang pamahayag gamit ang lain-laing mga rason kon ngano kaha nga giayo man ni Gustavo ang koral. Ang mga tubag lagmit nga naglakip sa hugpong sa mga pulong sama sa “buotan siya,” “misalmot siya sa proyekto sa serbisyo nga gipatambongan kaniya sa iyang inahan,” “gusto niyang modayeg kaniya ang anak nga babaye sa iyang silingan,” “dili siya gustong moanha sa iyang nataran ang iro sa iyang silingan,” ug “naguba niya ang koral tungod sa kasuko ug gipaayo kini niya sa iyang amahan.”

• Nganong importante man ang atong mga motibo?

Mabasa nato diha sa Mateo 6 nga gipadayon sa Manluluwas ang Iyang Wali sa Bukid ug gitudlo ang mahitungod sa mga motibo alang sa pagbuhat og maayo nga mga buhat. Aron matabangan ka sa paghunahuna mahitungod sa mga rason nga nagbuhat ka og maayo sama sa pagpangalagad, pagserbisyo sa uban, pag-ampo, ug pagtambong sa seminary, buhata ang mosunod nga kalihokan.

Paghimo og tsart nga adunay tulo ka kolum diha sa imong journal sa pagtuon. Pagsulat sa ibabaw sa tsart sigon sa mosunod:

Ipakita ang mosunod nga tsart diha sa pisara. Dapita ang mga estudyante nga isulat sa ilang mga tsart ang ilang mga tubag sa mga pangutana diha sa ibabaw sa tsart.

Unsa ang tulo ka maayong buhat nga imong nabuhat sa miaging semana? (Paglista og usa kada laray.)	Unsa ang imong mga rason sa pagbuhat niini?	Unsay imong gibati human nimo nabuhat kining maayong mga buhat?

Basaha ang Mateo 6:1–6, 16–18, nga mangita kon unsa ang gitudlo sa Manluluwas mahitungod sa atong mga motibo alang sa atong matarong nga mga buhat.

• Unsaon ninyo sa pag-summarize sa unsay gitudlo sa Manluluwas?

Dapita ang mga estudyante nga i-summarize ang unsay ilang gibasa ug mangutana og bisan unsang pangutana nga lagmit nga aduna sila. Samtang nag-summarize ang mga estudyante, mahimong mopahayag sila og mga baroganan nga pareho sa mosunod: Kon magbuhat kita og matarong nga mga buhat aron malipay ang Langitnong Amahan, nan dayag Niya kitang hatagan og ganti. Kon magbuhat kita og matarong nga mga buhat aron makita sa ubang mga tawo, dili kita makadawat og langitnong mga panalangin alang sa atong mga paningkamot. Dapita ang andam nga mga estudyante nga isulat sa pisara ang mga baroganan nga ilang nakit-an.

Importante nga masabtan nga ang pampublikong pag-ampo dili sayop tungod lamang kay wala kini gibuhat sa “tago” ( Mateo 6:6). Ang pag-ampo ug uban pang mga relihiyosong buhat mahimong buhaton diha sa publiko kon buhaton kini nga adunay sinseridad, debosyon, ug tinguha nga himayaon ang Dios. Tinuod usab kini kalabot sa pagpuasa. Ang hugpong sa mga pulong nga “ipakita nga nagsubo” ug “gipasundayag nila ang gutom nilang panagway” sa Mateo 6:16 nagpasabot sa mga indibidwal sa panahon ni Jesus nga nagpasundayag sa ilang pagpuasa aron makakuha og pagtagad para sa ilang kaugalingon.

• Sa imong hunahuna, nganong nagpakabana man gayod ang Ginoo sa atong mga motibo, bisan pa kon nagbuhat kita og maayong mga buhat?

Tan-awa og balik ang imong tsart ug ikompara ang imong mga rason alang sa maayong mga buhat nga imong nabuhat ngadto sa unsay gitudlo sa Manluluwas sigon sa girekord diha sa Mateo 6 .

• Sa imong hunahuna nganong kinahanglan man ka nga “maningkamot nga mangalagad para sa mga rason nga pinakataas ug pinakamaayo”? (Dallin H. Oaks, “Why Do We Serve?” Ensign, Nob. 1984, 13).

• Kon adunay tawo nga naglisod sa pagbuhat para sa eksaktong mga rason, unsa ang irekomenda nimo nga ilang buhaton?

Si Presidente Dieter F. Uchtdorf, kanhi sa Unang Kapangulohan, mitudlo mahitungod sa mga motibo sa Manluluwas sa pagbuhat sa Iyang mga buluhaton.

Ang labing talagsaon, labing makahimo, labing malamposon nga tawo nga sukad nakalakaw niini nga yuta mao usab ang labing mapaubsanon. Gihimo niya ang pipila sa Iyang labing dalaygon nga pag-alagad sa pribadong mga panahon, nga diyutay ra ang nagtan-aw, kinsa Iyang gihangyo nga “dili isugilon kang bisan kinsa” ang Iyang gipanghimo [tan-awa sa Lucas 8:56]. Dihang dunay mitawag Kaniya og “maayo,” Iya dayon nga gitipas ang komplimento, miinsister nga ang Dios lamang ang tinuod nga maayo [tan-awa sa Marcos 10:17–18]. Klaro nga ang pagdayeg sa kalibotan dili mahinungdanon ngadto Kaniya; ang bugtong Niya nga katuyoan mao ang pag-alagad sa Iyang Amahan ug “[pag]buhat kanunay sa mga butang nga makapahimuot kaniya” [ Juan 8:29 ]. Buhaton nato ang maayo sa pagsunod sa ehemplo sa Agalon.

(Dieter F. Uchtdorf, “Sa Pagkahimong Matuod,” Liahona, Mayo 2015, 83)

Paghunahuna og mga ehemplo nga nagpakita sa mga motibo sa Manluluwas sa pagbuhat sa Iyang buhat.

• Unsa ang nakapadani kanimo mahitungod niini nga mga ehemplo?

• Sa unsang paagi kini nga mga ehemplo nakadugang sa imong pagsabot sa gugma sa Manluluwas ug nganong Siya miula para sa atong mga sala?

Ipakita ang mosunod nga mga pangutana, ug dapita ang mga estudyante sa pagtubag niini diha sa ilang mga journal sa pagtuon.

• Unsa ang imong gibati mahitungod sa imong mga motibo sa pagbuhat og maayong mga buhat?

• Sa unsang mga paagi nga ang imong mga motibo sa pagbuhat og maayong mga buhat makaimpluwensya sa imong relasyon sa Langitnong Amahan?

• Unsay usa ka butang ang mabuhat nimo sa pagsunod sa ehemplo sa Manluluwas sa pagbuhat og maayong mga buhat?

Pagdapit og pipila ka andam nga mga estudyante aron ipaambit ang ilang gisulat o gibati. Sultihi ang mga estudyante nga sa umaabot nga leksiyon makabaton sila og oportunidad sa pagsukod kon sa unsang paagi nga ang ilang mga motibo sa pagbuhat og maayong mga buhat nausab sukad nga ilang gitun-an kini nga leksiyon. Ikonsiderar ang pagpamatuod bahin sa mga baroganan nga gitudlo niini nga leksiyon.

Komentaryo ug Background nga Impormasyon

Unsa ang eksaktong mga rason alang sa atong pagpangalagad?

Si Presidente Dallin H. Oaks sa Unang Kapangulohan mitudlo mahitungod sa eksaktong mga rason sa pagpangalagad:

Si propeta Moroni mitudlo nga kon ikredito para sa maayo ang atong mga buhat, kinahanglan kining buhaton para sa eksaktong mga rason. Kon ang tawo “mohalad og usa ka gasa, o mag-ampo ngadto sa Dios, gawas nga siya mohimo niini inubanan sa tinuod nga katuyoan kini dili makahatag kaniya og kaayohan.

“Kay tan-awa, kini dili iphon ngadto kaniya alang sa pagkamatarong.” ( Moro. 7:6–7 .) …

… Ang atong pagserbisyo kinahanglang para sa gugma sa Dios ug sa gugma sa isigkatawo imbes nga para sa personal nga kaayohan o bisan unsang laing mas ubos nga motibo.

(Dallin H. Oaks, “Why Do We Serve?” Ensign, Nob. 1984, 12, 14)

Sa unsang paagi nga ang pagpamatuod kang Jesukristo ug sa Iyang ebanghelyo makadasig nato sa paghimo og maayo nga mga buhat?

Si Elder Dieter F. Uchtdorf sa Korum sa Napulog Duha ka Apostoles mitudlo mahitungod sa “labing kusganong makadasig nga pwersa sa atong mga kinabuhi”:

Ang atong mga tinguha ug mga hunahuna sa kataposan makaimpluwensiya sa atong mga lihok. Ang pagpamatuod sa katinuod sa gipahiuli nga ebanghelyo ni Jesukristo mao ang labing kusganong makapadasig nga pwersa sa atong mga kinabuhi. Si Jesus mibalik-balik sa pagpasabot sa gahom sa maayong mga hunahuna ug hustong mga tinguha: “Paghunahuna ngari kanako sa matag hunahuna; ayaw pagduhaduha, ayaw kahadlok” ( D&P 6:36).

… Ang atong pagpamatuod makapadasig kanato sa pagpuyo sa matarong nga paagi, ug ang matarong nga pagpuyo makapahimo sa atong pagpamatuod nga mas molig-on. …

… Ang pagpamatuod nagdasig kanato sa pagpili sa matarong sa tanang mga higayon ug diha sa tanang mga kahimtang. Nagdasig kini kanato nga mas mapaduol ngadto sa Dios, nga magtugot Kaniya nga mas mapaduol ngari kanato (tan-awa sa Santiago 4:8).

(Dieter F. Uchtdorf, “Ang Gahom sa Personal nga Pagpamatuod,” Liahona, Nob. 2006, 38, 39)

Dugang nga mga Kalihokan sa Pagkat-on

Usa ka alternatibo nga pagsugod sa leksiyon

Sa dili pa mosulod ang mga estudyante sa lawak-klasehanan, ikonsiderar ang pagsulat diha sa pisara niini nga pangutana: “Unsa ang pipila ka rason nga ang mga tawo mangalagad sa uban?” Dapita ang mga estudyante nga isulat diha sa pisara ang ilang mga tubag. Unya ipahan-ay ang ilang mga rason sa pagpangalagad sa uban gikan sa pinakamaayo ngadto sa pinaka-dili maayo. Ikonsiderar ang pagpangutana kanila niini nga mga pangutana: “Unsa nga butang ang bag-ohay nimong gibuhat nga maayo? Unsa ang imong motibo sa pagbuhat niini?”

Pagdugang ngadto sa lista sa balaanong mga kinaiya

Sa miaging leksiyon, ang mga estudyante lagmit nakasugod og usa ka entry sa journal nga nagsugod sa “Mateo 5–7 : Mahimo akong mas mahisama sa Langitnong Amahan ug ni Jesukristo pinaagi sa …” Ikonsiderar ang pagdapit kanila nga dugangan kini nga entry sa journal og bisan unsang mga panabot nga ilang nakuha gikan sa leksiyon karong adlawa.