Mateo 6:19–34

“Unaha Ninyo Pagpangita ang Gingharian sa Dios”

Isip kabahin sa Wali sa Bukid, gitudloan ni Jesukristo ang Iyang mga disipulo nga “unahon … [pagtukod] ang gingharian sa Dios” (Mateo 6:33). Niini nga leksiyon, makabaton ka og oportunidad nga pamalandongan ug ipaambit ang importansiya sa pag-una sa Dios sa imong kinabuhi.

Pag-andam sa estudyante: Dapita ang mga estudyante nga pamalandongan kon unsaon kaha nila sa pagpaambit sa uban ang importansiya ug mga panalangin sa pag-una sa Dios sa ilang kinabuhi.

Posible nga mga Kalihokan sa Pagkat-on

Ang Manluluwas nagtudlo sa Iyang mga disipulo nga “unahon … pagpangita ang gingharian sa Dios”

Basaha ang mosunod nga mga sitwasyon sa tinuod nga kinabuhi:

• Usa ka batan-ong lalaki sa California, USA, usa ka talentadong surfer, pero naka-eskedyul ang seminary sa parehong oras sa pagpraktis para sa iyang surf team sa high school.

• Usa ka batan-ong babaye sa Brazil gidapit nga magpahigayon og lugar sa pagpasidungog sa pagsaulog sa ika-15 nga adlaw nga natawhan sa iyang higala, pero kinahanglan siyang magsul-ob og sinina nga wala mahiuyon sa iyang mga sumbanan.

• Usa ka batan-ong lalaki sa New Zealand nga usa ka talentadong rugby player nga gitagna nga makadawat og tanyag nga magdula isip propesyonal, pero anaa siya sa edad nga moserbisyo og full-time nga misyon.

Kini mga ehemplo sa mga sitwasyon diin mahimong mopili ang mga batan-on nga unahon ang Dios sa ilang kinabuhi, bisan pa kon dili kini sayon.

• Unsa nga mga pangutana o mga kabalaka ang lagmit nga aduna ang kabatan-onan niini nga mga sitwasyon mahitungod sa pag-una sa Dios sa ilang kinabuhi?

• Unsa nga mga pangutana o mga kabalaka ang lagmit nga aduna ka ug ang imong mga higala mahitungod sa pag-una sa Dios sa inyong kinabuhi?

Samtang magtuon ka niini nga leksiyon, hangyoa ang Ginoo nga tabangan ka nga matubag ang imong mga kabalaka ug mobati sa kaimportante sa pag-una Kaniya. Tun-i ang usa sa mosunod nga mga grupo sa mga bersikulo. Tinguhaa ang giya sa Espiritu Santo aron tabangan ka sa pagkaplag ug pagsabot sa mga kamatuoran nga gitudlo sa Manluluwas nga makatabang kanimo sa pag-una sa Dios sa imong kinabuhi.

Mahimong mopili ang mga estudyante kon unsang han-ay sa mga bersikulo ang ilang tun-an, o mahimo silang sangonan sa Opsiyon A o Opsiyon B. Tingali makatabang kon ipakita ang mosunod nga mga opsiyon diha sa pisara.

Opsiyon A: Mateo 6:19–24. Niini nga mga bersikulo, gigamit sa Manluluwas ang pulong nga mga bahandi aron ipasabot unsa ang labing gihatagan nato og bili, ug mata aron pagsimbolo sa atong panglantaw o gitutokan sa kinabuhi. Giklaro diha sa Hubad ni Joseph Smith unsa ang gitudlo sa Ginoo diha sa bersikulo 22, “Kon ang atong mga mata bug-os ngadto sa himaya sa Dios, ang atong tibuok nga mga lawas mapuno sa kahayag” (Hubad ni Joseph Smith, Mateo 6:22 [sa Apendiks sa Hubad ni Joseph Smith]; tan-awa usab sa Doktrina ug mga Pakigsaad 88:67). Usab, tingali makatabang kon hinumdoman nga ang pulong nga mammon nagpasabot sa pagkakalibotanon o mga bahandi.

Opsiyon B: Mateo 6:25–34. Giklaro diha sa Hubad ni Joseph Smith niini nga mga bersikulo nga ang Ginoo nakig-istorya sa Iyang Apostoles mahitungod sa ilang responsibilidad nga “moadto … sa kalibotan … [magtudlo sa] katawhan” (Hubad ni Joseph Smith, Mateo 6:25–26 [sa Apendiks sa Hubad ni Joseph Smith]). Linain ang panudlo sa Ginoo sa Napulog Duha ka Apostoles niini nga panahon, pero magamit usab kanato ang baroganan nga Iyang gitudlo. Tan-awa ang mga ehemplo kon giunsa pag-atiman sa Dios ang Iyang mga linalang, lakip nato. Samtang magtuon ka, paghatag og espesyal nga pagtagad sa bersikulo 33: ang Hubad ni Joseph Smith niini nga bersikulo nagsugod sa, “Busa, ayaw pangita sa mga butang niini nga kalibotan apan paninguha kamo sa pagtukod og una sa gingharian sa Dios” (Hubad ni Joseph Smith, Mateo 6:38 [sa Apendiks sa Hubad ni Joseph Smith]).

• Samtang nagbasa ka sa mga pulong sa Manluluwas ug midapit sa giya sa Espiritu Santo, unsa ang imong nakaplagan nga makahuloganon kanimo? Nganong makahuloganon man kini?

Dapita ang pipila ka mga estudyante sa pagpakigbahin sa unsay ilang nakaplagan. Ikonsiderar ang pagsulat diha sa pisara sa bisan unsang baroganan nga ilang gihisgotan. Kon ang mga estudyante dili sagad nga magpaambit og mga baroganan, ikonsiderar ang pagpangutana, “Unsaon nimo pag-summarize ang usa sa mga kamatuoran nga gitudlo sa Manluluwas?”

Nagtudlo ang Manluluwas og tinuod nga mga baroganan dinhi niini nga mga bersikulo, lakip na ang dili nato parehong maalagaran ang Dios ug ang salapi (o pagkakalibotanon) ug kon tinguhaon nato og una ang pagtukod sa gingharian sa Dios, niana Siya mopanalangin kanato sa unsay Iyang nahibaloan nga atong gikinahanglan.

• Unsa ang imong nahibaloan mahitungod sa Langitnong Amahan ug ni Jesukristo nga makapadasig kanimo nga unahon Sila sa imong kinabuhi?

Mga batan-on nga miuna sa Dios

• Kanus-a nimo giuna ang Dios sa imong kinabuhi?

• Unsa nga mga panalangin ang imong nakita isip resulta sa imong desisyon?

Pag-awhag sa uban nga unahon ang Dios

Pagtagana og panahon sa paghunahuna kon sa unsang paagi nga magamit nimo ang mga pagtulon-an sa Manluluwas nga unahon ang Dios sa imong kinabuhi. Ipadayon ang pagtinguha og inspirasyon gikan sa Espiritu Santo samtang nagkompleto ka niini nga leksiyon.

Hunahunaa nga ang inyong kapangulohan sa stake o district midapit sa imong korum o klase nga magbuhat og video aron tabangan ang kabatan-onan sa imong lugar nga madasig sa pag-una sa Dios sa ilang kinabuhi. Nagplano ang kapangulohan nga ipakita ang video sa usa ka kalihokan para sa kabatan-onan.

Mahimong planohon sa mga estudyante ang video sa tagsa-tagsa o diha sa gagmay nga mga grupo. Kon ang pagplano og video walay kalabotan sa imong mga estudyante, mahimo silang magplano og usa ka pakigpulong o leksiyon bahin sa pag-una sa Dios sa ilang kinabuhi.

Paghimo og detalyadong outline para sa imong video. (Dili ka kinahanglang magrekord og video; kinahanglan lamang kang magbuhat og plano.) Ilakip ang mosunod sa imong outline:

• Labing minos usa ka kamatuoran ang gitudlo sa Manluluwas diha sa Mateo 6 ug usa ka pagpasabot kon sa unsang paagi nga kini makatabang sa kabatan-onan sa pag-una sa Dios sa ilang kinabuhi.

• Usa ka ehemplo sa karong panahona sa usa ka tawo nga giuna ang Dios sa ilang kinabuhi. Kini nga ehemplo mahimong personal nga kasinatian o kasinatian sa usa ka tawo nga imong nailhan. Pagsulat og yano nga summary sa ehemplo.

Paglakip usab og usa o labaw pa sa mosunod sa imong outline:

• Usa ka pamahayag sa lider sa Simbahan

• Mga hulagway o mga biswal nga mahimo nimong ilakip ug kon kanus-a nimo kini ilakip

• Imong personal nga pagpamatuod

Human sa igong panahon, dapita ang mga estudyante nga ipakigbahin sa klase kon unsay ilang ilakip sa ilang video. Samtang nagpakigbahin sila, ikonsiderar ang pagpangutana og follow-up nga mga pangutana sama sa mosunod: “Nganong nakadesisyon man ka nga magpokus niana nga hugpong sa mga pulong o kamatuoran?” “Nganong nakadesisyon man ka nga gamiton kana nga sugilanon o kasinatian?” “Sa imong hunahuna, nganong makatabang man kana sa kabatan-onan sa panahon karon?”

Ikonsiderar ang pagtan-aw og balik sa mga kabalaka o mga pangutana nga gipadayag sa mga estudyante sa sinugdanan sa leksiyon. Pangutan-a ang mga estudyante, “Sa unsang paagi makatabang sa pagsulbad niini nga mga kabalaka ang imong nakat-onan?”

Mahimo nimong ipaambit sa pamilya ug mga higala ang imong plano para sa usa ka video. Ang maayong panahon sa pagbuhat niini lagmit sa higayon nga hisgotan kini nga hilisgotan kauban ang imong pamilya diha sa inyong pagtuon sa Dali, Sunod Kanako.

Kon aduna kay abilidad, ikonsiderar ang pagbuhat sa imong video ug pagpaambit niini sa ubang mga tawo.

Komentaryo ug Background nga Impormasyon

Unsa nga mga panalangin ang atong madawat kon unahon nato ang Dios sa atong kinabuhi?

Si Presidente Ezra Taft Benson (1899–1994) mitudlo:

Kinahanglan nga ibutang nato ang Dios diha sa kinaunahan sa tanang butang sa atong kinabuhi. …

Kon atong unahon ang Dios, ang tanang ubang butang mapahimutang sa tukma nilang dapit o mawala kini sa atong kinabuhi. Ang atong gugma sa Ginoo modumala sa mga tinguha sa atong pagbati, sa mga gipangayo sa atong panahon, sa mga interes nga atong gitinguha, ug sa han-ay sa atong mga prayoridad.

(Ezra Taft Benson, “The Great Commandment—Love the Lord,” Ensign, Mayo 1988, 4)

Si Presidente Russell M. Nelson mitudlo:

Andam ba kamo nga tugotan ang Dios nga maoy mahimong labing importante nga impluwensya sa inyong kinabuhi? …

Hunahunaa kon sa unsang paagi ang ingon nga kaandam makapanalangin kaninyo. …

Kon kamo adunay sinsero nga mga pangutana mahitungod sa ebanghelyo o sa Simbahan, samtang mopili kamo nga ipatigbabaw ang Dios labaw sa tanan, giyahan kamo nga makakita ug makasabot sa hingpit, mahangturon nga mga kamatuoran nga mogiya sa imong kinabuhi ug motabang kaninyo nga magpabiling lig-on diha sa dalan sa pakigsaad.

Kon mag-atubang kamo og tintasyon—bisan kon ang tintasyon moabot samtang kamo gikapoy o mibati nga nag-inusara o wala masabti—hunahunaa ang kaisog nga inyong makuha samtang mopili kamo nga ipatigbabaw ang Dios labaw sa tanan diha sa inyong kinabuhi ug samtang mohangyo kamo Kaniya sa paglig-on kaninyo. …

… Samtang mopili kamo nga ipatigbabaw ang Dios labaw sa tanan diha sa inyong kinabuhi, inyong masinati mismo sa inyong kaugalingon nga ang atong Dios “usa ka Dios sa mga milagro” [ Mormon 9:11 ].

(Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 94, 95)

Unsay gipasabot sa Manluluwas sa dihang miingon Siya, “Ayaw kabalaka unsay inyong kan-on ug imnon aron kamo mabuhi” ug “Ayaw kabalak-i ang mosunod nga adlaw”?

Unsay ipasabot sa Manluluwas sa dihang miingon Siya, “Ayaw na pun-i ang suliran sa matag adlaw”?

Unsa ang siko [cubit]? (Mateo 6:27)

Ang siko [cubit] mao “ang naandan nga sukdanan sa gitas-on diha sa mga Hebreohanon; sa sinugdanan ang gilay-on gikan sa siko ngadto sa tumoy sa mga tudlo … [mga] 21½ ka pulgada sa panahon sa atong Ginoo” (Giya ngadto sa mga Kasulatan, “Siko ”).

Dugang nga Kalihokan sa Pagkat-on

Pagbantay sa dili tinuod nga mga propeta

Ikonsiderar ang paghangyo sa mga estudyante nga magpaambit og mga ehemplo sa mga ideya nga sa kasagaran gidawat sa kalibotan pero supak sa plano sa Langitnong Amahan. Ipasabot nga ang dili tinuod nga mga propeta mao ang mga indibidwal o mga grupo nga nagpasiugda og mga ideya nga supak sa plano sa Langitnong Amahan ug nagsulay sa pagguba sa hugot nga pagtuo ug mga pagpamatuod diha kang Jesukristo. Basaha ang Mateo 7:15–20 ug hisgoti ang mga pagtulon-an sa Manluluwas bahin sa pag-ila sa dili tinuod nga mga propeta ug kon nganong importante kini nga mga pagtulon-an sa atong panahon. Lagmit nga makatabang ang mosunod nga pamahayag ni Presidente Dallin H. Oaks sa Unang Kapangulohan:

“Si Satanas matinguhaon sa paglibog sa atong hunahuna o sa pagpahisalaag kanato sa importante nga mga butang. … Mihatag ang Manluluwas … kanato niini nga pagsulay aron sa pagtabang kanato nga mopili sa kamatuoran gikan sa lain-laing pagtulon-an nga tingali makalibog kanato: “Kamo makaila kanila pinaagi sa ilang mga bunga,” Siya mitudlo ( 3 Nephi 14:16). … Busa, kinahanglang motan-aw kita sa mga resulta—“ang mga bunga”—sa mga baroganan nga gitudlo ug sa mga tawo nga nagtudlo niini. Mao kana ang labing maayong tubag sa daghan sa mga pagsupak nga atong nadunggan batok sa Simbahan ug sa doktrina ug mga polisiya ug pagpangulo niini. Sunda ang pagsulay nga gitudlo sa Manluluwas. Tan-aw sa mga bunga—sa mga resulta.

(Dallin H. Oaks, “Ang Melchizedek nga Pagkapari ug ang Mga Yawe,” Liahona, Mayo 2020, 71).