Mitudlo ang Manluluwas sa Iyang mga Disipulo sa Paghukom sa Matarong nga Paagi
Imahe
Si Jesukristo naglingkod sa usa ka bato diha sa baybayon sa Galilea. Daghang tawo ang nagpundok libot kaniya. Ang mga tawo naminaw ni Kristo nga nagsangyaw. (Marcos 4:1) (Lucas 5:1)
Sa Iyang Wali sa Bukid, gitudloan ni Jesukristo ang Iyang mga disipulo sa paghukom sa matarong nga paagi. Niini nga leksiyon, makabaton ka og oportunidad nga makakat-on mahitungod sa paghimo og matarong nga mga paghukom.
Pag-andam sa estudyante: Dapita ang mga estudyante nga pamalandongan kon unsa ang ilang nahibaloan mahitungod sa mga paghukom nga kinahanglan nilang buhaton ug kadtong kinahanglan silang mag-amping nga dili mabuhat. Awhaga sila sa paghunahuna sa mga pangutana nga aduna sila mahitungod sa paghukom.
Posible nga mga Kalihokan sa Pagkat-on
Kita kinahanglang mohukom sa matarong nga paagi
Basaha ang mosunod nga mga sitwasyon isip usa ka klase, ug dapita ang mga estudyante nga hunahunaon ang mahitungod sa matang sa mga paghukom nga lagmit nga buhaton sa usa ka tawo sa matag sitwasyon. Ikonsiderar ang pag-usab sa mga sitwasyon aron himoon kini nga mas may kalabotan ngadto sa mga estudyante.
Adunay usa ka tawo nga miimbitar kanimo sa usa ka party diin daghang tin-edyer ang mogamit og mga butang nga supak sa Pulong sa Kaalam.
Adunay usa ka tawo nga nagpuyo sigon sa laing mga sumbanan kay sa imo gusto nga mahimo nimong suod nga higala.
Usa ka miyembro sa imong ward nagbuhat og lain-laing mga kalihokan sa Igpapahulay kay sa gibuhat sa imong pamilya.
Nahibaloan nimo nga ang usa ka higala adunay naandang buluhaton nga motan-aw og pornograpiya.
Sa kinatibuk-an niini nga leksiyon, makakat-on ka mahitungod sa paghukom sa matarong nga paagi. Makabaton ka og oportunidad nga susihon pag-usab ang imong mga hunahuna mahitungod niini nga mga sitwasyon ug gamiton ang imong nakat-onan.
Unsa nga mga pangutana ang aduna ka mahitungod sa paghukom?
Samtang magtuon ka sa leksiyon karong adlawa, hunahunaa ang mahitungod sa unsay imong gibati bahin sa paghukom, ug paminaw sa mga pag-aghat sa Espiritu Santo. Irekord ang mga panghunahuna nga nakadugang sa imong pagsabot mahitungod sa mga pagtulon-an sa Manluluwas bahin sa paghukom. Basaha ang Mateo 7:1 . Kini nga bersikulo sa kasagaran masaypan og sabot nga gitudlo sa Manluluwas nga dili gayod kita maghukom. Karon basaha ang Hubad ni Joseph Smith niini nga bersikulo (sa Apendiks sa Hubad ni Joseph Smith).
Sa unsang paagi nadugangan sa Hubad ni Joseph Smith ang imong pagsabot bahin sa kon unsa ang gitudlo sa Manluluwas mahitungod sa paghukom?
Unsa sa imong hunahuna ang kahulogan sa matarong nga paghukom?
Basaha ang mosunod nga pamahayag:
Ikonsiderar ang pagpakita sa mosunod nga pamahayag aron makasunod ang mga estudyante samtang naay mobasa niini og kusog.
Ang paghukom usa ka importanteng paggamit sa atong kabubut-on ug nagkinahanglan og dakong pag-amping, ilabi na kon mohukom kita sa ubang mga tawo. Ang tanan natong mga paghukom kinahanglang magiyahan sa matarong nga mga sumbanan. Ang Dios lamang, nga nakahibalo sa kasingkasing sa kada tawo, ang makabuhat og kataposang mga paghukom sa mga indibidwal.
Usahay magtuo ang mga tawo nga sayop ang paghukom sa ubang mga tawo sa bisan unsang paagi. Samtang tinuod nga dili kita angay nga mopanghimaraot sa ubang tawo o hukman sila sa dili matarong nga paagi, kinahanglan nga mohimo kita og mga paghukom sa mga ideya, mga sitwasyon, ug sa mga tawo sa tibuok natong kinabuhi. …
… Kutob sa atong mahimo, kinahanglang hukman nato ang mga kahimtang sa mga tawo kay sa hukman ang mga tawo mismo. Kon mahimo, kinahanglan natong likayan ang paghimo og mga paghukom hangtod nga makabaton kita og igo nga kahibalo sa tinuod nga mga panghitabo. Ug kinahanglan kitang kanunay nga sensitibo sa Espiritu Santo, nga makagiya sa atong mga desisyon.
Unsa nga mga pulong o hugpong sa mga pulong niini nga pamahayag ang nakatabang kanimo sa pagsabot sa matarong nga paghukom?
Kita kinahanglang dili motutok sa mga sayop sa uban
Imahe
Kamot nga nagkupot og liso sa mustasa.
Imahe
Usa ka karaang kahoy nga oak nga natumba o poste nga gilitratohan diha sa puti nga background. (vert)
Basaha ang Mateo 7:2–5, nga mangita sa uban pang mga pagtulon-an mahitungod sa paghukom. Sa bersikulo 3, gipasabot sa Manluluwas ang sunggat sa kahoy isip puling ug ang dakong bahin sa kahoy isip troso.
Ikonsiderar ang pagpakita sa mga estudyante sa gilakip nga mga hulagway sa puling ug sa troso.
Isip alternatibo, pagdala og sunggat sa kahoy (o laing gamay nga butang) ug usa ka dakong piraso sa kahoy (o laing dakong butang). Pagdapit og duha ka estudyante nga ipakita kini nga sambingay pinaagi sa pagpagunit sa kada usa sa usa niini nga mga butang sa atubangan sa ilang mga mata.
Nganong lisod man para sa usa ka tawo nga adunay troso sa ilang mata nga magtangtang og puling gikan sa mata sa laing tawo?
Unsa sa imong hunahuna ang gitudlo sa Manluluwas pinaagi sa analohiya sa troso ug sa puling?
Mahimong ilhon sa mga estudyante ang pipila sa mosunod nga mga baroganan:
Ang paagi sa atong paghukom sa uban makaapekto sa paagi nga kita pagahukman sa Manluluwas.
Kon atong tutokan ang pagtan-aw ug paghinulsol sa kaugalingon natong mga sala ug mga kahuyang, niana ingon og dili na kita makahukom sa uban sa dili matarong nga paagi.
Pagkahuman nato sa paghinulsol sa atong kaugalingong mga sala, mas makatabang kita sa uban.
Samtang ang mga estudyante maghisgot niini o sa uban pang mga baroganan, isulat kini diha sa pisara gamit ang mga pulong sa mga estudyante.
Nganong importante man nga atong hinumdoman kini nga mga pagtulon-an?
Unsay imong makat-onan kabahin ni Jesukristo gikan niini nga mga pagtulon-an?
Nganong usahay lisod man ang pagpakabuhi sigon sa mga pagtulon-an ni Kristo mahitungod sa paghukom?
Unsaon man nimo pagdapit sa tabang sa imong Amahan sa Langit, pinaagi ni Jesukristo, nga tabangan ka sa paggamit niini nga mga baroganan sa imong kinabuhi?
Praktisa ang paggamit sa mga baroganan sa matarong nga paghukom
Pagpili og usa sa mga sitwasyon gikan sa sinugdanan sa leksiyon, o paghunahuna og parehong sitwasyon.
Ikonsiderar ang pagbahin sa mga estudyante ngadto sa managpares o diha sa gagmay nga mga grupo para niini nga kalihokan. Bisitaha kadali ang kada grupo, mosalmot sa ilang mga pakighisgot kon gikinahanglan.
Unsa nga sitwasyon ang imong gipili?
Unsa nga matarong nga mga paghukom ang kinahanglan nimong buhaton mahitungod niini nga sitwasyon?
Unsa nga mga paghukom nga kinahanglan kang mag-amping nga dili buhaton?
Nagsunod sa mga pagtulon-an sa Manluluwas, sa unsang paagi nga ikaw mahimong patas ug maloloy-on sa mga paghukom nga imong buhaton?
Sa unsang paagi lagmit nga makatabang ang paghinumdom sa imong kaugalingong mga sala ug mga kahuyang niini nga matang sa sitwasyon?
Pagdapit og mga moboluntaryo sa pagpakigbahin sa ilang mga komento. Paminaw og maayo sa mga tubag sa mga estudyante sa pagtimbang-timbang kon unsa ka maayo ang ilang nakat-onan.
Usahay, mohunahuna ang mga tawo nga ang mga pagtulon-an sa Manluluwas diha sa Mateo 7:1–5 nagpasabot nga dili gayod kita mohimo og mga paghukom. Giklaro ni Presidente Dallin H. Oaks sa Unang Kapangulohan nga adunay pipila ka matang sa mga paghukom nga gidasig kita sa pagbuhat:
Imahe
Opisyal nga Litrato ni Presidente Dallin H. Oaks nga gikuha niadtong Marso 2018.
Adunay duha ka matang sa paghukom: kataposang mga paghukom, nga gidili nga atong himoon, ug ang makiangayon nga mga paghukom, nga gimando nga atong himoon, pero diha sa matarong nga mga baroganan. …
… Ikonsiderar nato ang pipila ka mga baroganan o mga sangkap nga moresulta sa “matarong nga paghukom.”
Una, ang matarong nga paghukom kinahanglan, sa kahulogan, makiangayon. Malikayan niini ang pagpahayag nga ang usa ka tawo gihatagan og kasigurohan sa kahimayaan o sa pagsulti sa tawo nga padulong na gayod siya sa kalayo sa impiyerno. …
Ikaduha, ang matarong nga paghukom magiyahan sa Espiritu sa Ginoo, dili pinaagi sa kasuko, panimalos, kasina, o sa kaugalingong interes. …
Ikatulo, aron mahimong matarong, ang makiangayon nga paghukom kinahanglan nga nasulod sa atong pagkatinugyanan. Kinahanglan nga dili kita magdahom nga mopahayag ug mobuhat sa mga paghukom nga dili atong personal nga mga responsibilidad. …
Ikaupat, kinahanglan nga atong, kon mahimo, likayan ang paghukom hangtod nga makabaton kita og igo nga kahibalo sa tinuod nga mga panghitabo. …
Ang ikalima nga baroganan sa usa ka matarong nga makiangayon nga paghukom mao nga kon mahimo likayan nato ang paghukom sa mga tawo ug mohukom lang sa mga sitwasyon.
(Dallin H. Oaks, “‘Judge Not’ and Judging,” Ensign, Ago. 1999, 7, 9–11)
Dapita ang mga estudyante sa pagpamalandong sa ilang mga tubag sa unang pangutana. Ang uban pang mga pangutana nga mosunod mahimong hisgotan isip usa ka klase o mahimong motubag ang mga estudyante niini nga mga pangutana diha sa journal sa pagtuon.
Unsa nga mga paghukom ang angay nakong buhaton, ug unsa ang angay ako nga mag-amping nga dili buhaton?
Unsa ang imong nakat-onan niini nga leksiyon mahitungod sa matarong nga paghukom? Sa unsang paagi nga ang imong nakat-onan makatabang kanimo nga mas tan-awon ang uban ug ang imong kaugalingon sama sa pagtan-aw sa Manluluwas?
Sa unsang paagi nga natubag ang imong mga pangutana mahitungod sa paghukom? Kon ikaw adunay wala matubag nga mga pangutana, pasalig nga ipadayon ang imong pagtuon ug magtinguha og mga tubag gikan sa Espiritu Santo.
Unsa ang makatabang kanimo nga mahimong dili kaayo mahukmanon sa uban sa imong kinabuhi?
Ikonsiderar ang pagpamatuod bahin sa matarong nga paghukom.
Komentaryo ug Background nga Impormasyon
Unsa ang pagtan-aw sa Dios sa Iyang mga anak?
Si Presidente Russell M. Nelson mitudlo nga kitang tanan managsama sa panan-aw sa atong Langitnong Amahan:
Imahe
Opisyal nga litrato ni Presidente Russell M. Nelson nga gikuha niadtong Enero 2018
Ang matag usa kanato adunay balaanong potensiyal tungod kay ang matag usa anak sa Dios. Ang matag usa managsama diha sa Iyang panan-aw. Ang mga implikasyon niini nga kamatuoran lawom kaayo. Mga kaigsoonan, palihog paminaw og maayo sa unsay akong isulti. Ang Dios wala magmahal sa usa ka kaliwat nga labaw kay sa lain. Ang Iyang doktrina mahitungod niini klaro. Siya nagdapit sa tanan nga moduol ngadto Kaniya, “itom ug puti, ulipon ug gawasnon, lalaki ug babaye.” [2 Nephi 26:33 ].
Sa unsang paagi nga ang pagpalambo og Kristohanon nga mga kinaiya makaapekto sa paagi sa imong paghukom?
Si Elder Dale G. Renlund sa Korum sa Napulog Duha ka Apostoles mitudlo mahitungod sa pagkahimong sama kang Kristo, nga makatabang kanato sa matarong nga paghukom.
Imahe
Opisyal nga litrato ni Elder Dale G. Renlund sa Korum sa Napulog Duha ka Apostoles, Enero 2016.
Aron mahimong sama ni Kristo, ang usa ka tawo ganahan sa kalooy. Ang mga tawo nga ganahan og kalooy dili mahukmanon, sila mopakita og kapuangod alang sa uban, ilabi na niadtong kinsa wala kaayo mapanalangini, sila manggihatagon, mabination, ug madungganon. Kini nga mga indibidwal motagad sa tanan uban sa gugma ug pagsabot, bisan pa sa mga panaglahi sama sa kaliwat, sekso, giapilan nga relihiyon, sekswal nga oryentasyon, ekonomikanhong kahimtang diha sa katilingban, ug mga kalainan sa tribo, sa pamilya, o sa nasod. Kini gipulihan sa Kristohanong gugma.