Jesus Christ on a ship with some of His Apostles. Christ has His arms extended as He calms a storm at sea. The Apostles are looking at Christ as He performs the miracle. (Matthew 8:23-27 Mark 4:35-41 Luke 8:22-25.)
“Magtutudlo, wala ka ba mabalaka nga hapit na man kita malunod?” mituaw ang mga disipulo ngadto sa Manluluwas samtang gikuso-kuso sa mga balod ug hangin ang ilang gamay nga sakayan (tan-awa sa Marcos 4:37–38). Sa mga panahon nga walay paglaom, lagmit nga desperado kita sa tabang ug kuwestiyonon ang pagpakabana sa Manluluwas kanato. Bisan unsa ka desperado ang atong sitwasyon, adunay abilidad ug gahom si Jesukristo nga pagaanon ang atong mga gipas-an, tangtangon ang atong mga problema, ug moingon kanato, “Hilom, hunong” (Marcos 4:39). Tinguha niini nga leksiyon nga tabangan ka nga madawat ang kalinaw ug pagkakalma sa Ginoo sa panahon sa mga problema nga imong nasinati.
Dasiga ang mga estudyante nga ihulagway diha sa ilang hunahuna ang mga panghitabo gikan sa mga kasulatan. Ang paghulagway diha sa hunahuna mahitabo samtang ang mga estudyante maghunahuna sa mga panghitabo nga narekord diha sa mga kasulatan. Ang paghunahuna niining mga panghitabo makatabang nga mahimong mas klaro ug tinuod ang mga istorya sa kasulatan ngadto kanila.
Pag-andam sa estudyante: Awhaga ang mga estudyante nga kumpletohon ang kalihokan gikan sa outline sa Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 para sa Pebrero 27–Marso 5 sa “Mateo 8:23–27; Marcos 4:35–41: Adunay gahom si Jesukristo nga magdala og kalinaw taliwala sa mga unos sa kinabuhi” ug andam nga magpaambit og mga pagtulon-an. Mahimong mohangyo ang mga estudyante sa mga miyembro sa pamilya o mga higala nga mosalmot kauban nila niini nga kalihokan.
Mga Posible nga Kalihokan sa Pagkat-on
Unsay imong mga kahadlok?
Ipakita ang mosunod nga pamahayag ug mga pangutana aron makita sa mga estudyante inig sulod nila sa klase.
Adunay mga panahon sa atong mga kinabuhi nga lagmit bation nato nga anaa kita sa taliwala sa nagkuso-kuso nga unos. Usahay kini nga mga unos sa kinabuhi mahimong maghatag kanato og kahadlok.
Nagpaambit si Elder Ronald A. Rasband sa Korum sa Napulog Duha ka Apostoles og mga pananglitan sa mga kahadlok nga usahay aduna kita. Ikonsiderar ang mga parehong kahadlok nga lagmit nga aduna ka.
Imahe
Official Portrait (as of June 2016) of Elder Ronald A. Rasband of the Quorum of the Twelve Apostles.
Ang atong mga single adult mahadlok nga mohimo og mga pasalig sama sa pagminyo. Ang mga bag-ong minyo … mahadlok nga magkaanak ngadto sa nagkada[o]tan nga kalib[o]tan. Ang mga misyonaryo adunay gikahadlokan nga daghang mga butang, ilabina sa pagduol og dili mga kaila. Ang mga biyuda mahadlok nga magpadayon nga mag-inusara. Ang mga tin-edyer mahadlok nga dili dawaton; ang mga estudyante sa grade school mahadlok sa ilang unang adlaw sa eskuwelahan; ang mga estudyante sa unibersidad mahadlok nga mokuha og pasulit [test]. Mahadlok kita sa kapakyasan, pagsalikway, kasagmuyo, ug sa wala mahibaloi. Mahadlok kita sa mga bagyo, mga linog, ug mga sunog nga moguba sa yuta ug sa atong kinabuhi. Mahadlok kita nga dili mapilian, ug sa laing bahin mahadlok kita nga mapilian. Mahadlok kita nga dili kaayo maayo; mahadlok kita nga dili panalanginan sa Ginoo. Mahadlok kita og kausaban, ug ang atong mga kahadlok modako ngadto sa kalisang.
(Ronald A. Rasband, “Ayaw Kabalaka,” Liahona, Nob. 2018, 18)
Tubaga ang mosunod nga mga pangutana diha sa imong journal sa pagtuon.
Mahimong tubagon sa mga estudyante ang mosunod nga mga pangutana diha sa anonymous nga poll. Ikonsiderar ang paggamit sa ilang mga tubag aron mahibaloan kung unsaon paggiya sa kasinatian sa pagkakat-on.
Unsa nga mga kahadlok ang aduna ka nga pareho sa gihisgotan ni Elder Rasband?
Sa unsa nga paagi lagmit makaapekto kini nga mga kahadlok sa imong hugot nga pagtuo? Ngano man?
Unsa ang imong mabuhat aron madawat ang tabang sa Manluluwas sa pagbuntog niini nga mga kahadlok?
Samtang magtuon ka karon, pangitaa ang mga kamatuoran nga makatabang kanimo sa pagdawat sa kalinaw sa Ginoo aron matabangan kang mapakalma ang imong mga kahadlok.
Makahadlok nga kasinatian
Ang paghulagway diha sa hunahuna sa mga panghitabo sa mga kasulatan usa ka kahanas sa pagtuon nga hingpit nga makadugang sa gahom ug pagkaepektibo sa imong pagtuon. Tun-i ang Marcos 4:35–38 , ug sulayi sa paghulagway diha sa imong hunahuna ang kasinatian sa mga disipulo nga nakarekord niini nga mga bersikulo.
Pagdrowing og simpleng hulagway sa eksena gikan sa Marcos 4:35–38 sa imong journal sa pagtuon. Paglakip og bisan unsa nga mga detalye nga gibati nimo nga mapuslanon. Gamiton nimo kini nga hulagway sa tibuok leksiyon aron makumpara kini nga sugilanon sa imong kaugalingong kinabuhi. Hunahunaa ang pagsukna sa imong kaugalingon sa mosunod nga mga pangutana samtang nagdrowing ka:
Ikonsiderar ang paggamit sa sugyot sa magtutudlo para niini nga leksiyon pinaagi sa pagsukna sa mosunod nga mga pangutana. Makatabang kini sa mga estudyante sa paghulagway diha sa ilang hunahuna ang sugilanon sa Marcos 4:35–38 .
Unsa kaha ang hitsura sa sakayan?
Unsa kaha ang gibuhat sa mga disipulo samtang gikuso-kuso sa mga balod ang sakayan?
Unsa kaha ang hitsura ug pamati sa unos?
Ikonsiderar kon sa unsang paagi lagmit nga gisimbolo sa mga panghitabo nga gihulagway niini nga asoy ang mga panghitabo nga nahitabo, kasamtangang nahitabo, o lagmit nga mahitabo sa imong kinabuhi.Sa tapad sa lain-laing mga bahin sa drowing nga imong gihimo, isulat ang mga aspeto sa imong kinabuhi nga mahimong irepresenta pinaagi sa mga elemento niini nga asoy sa kasulatan. Pananglitan, lagmit nga girepresenta sa sakayan ang mga butang nga maoy hinungdan nga ang Manluluwas padayon nga nakauban nimo. Ang mga balod o unos lagmit nga nagrepresenta sa mga tintasyon o mga pagsulay nga imong nasinati nga nagbahad nga buntugon ka.
Unsa nga mga emosyon ang lagmit nga gibati sa mga disipulo nga gibati usab nimo?
Kanus-a kaha bation sa usa ka tawo nga natulog ang Manluluwas sa panahon sa mga unos sa ilang kinabuhi? Ngano man?
Samtang gikompleto sa mga estudyante ang ilang mga hulagway, awhaga sila nga ipaambit ang ilang gidrowing sa usa ka kapares o sa klase.
Awhaga ang mga estudyante nga hinumdoman ang mga pangutana nga ilang gitun-an gikan sa Dali, Sunod Kanako isip pangandam para niini nga leksiyon.
Basaha pag-usab ang Marcos 4:38 , ug ilha ang pangutana nga gisukna sa mga disipulo.
Unsa nga mga kamatuoran mahitungod sa Manluluwas ang lagmit nga nakalimtan nila sa panahon sa unos?
Tun-i ang Marcos 4:39–41 , ug pangitaa ang imong nakat-onan mahitungod sa kinaiya ug karakter ni Jesukristo.
Paminaw pag-ayo sa mga tubag sa estudyante sa mosunod nga mga pangutana, ug isulat ang mga tubag sa pisara. Ikonsiderar ang pagsukna og follow-up nga mga pangutana, sama sa “Nganong importante man nga masabtan kana?”
Unsay imong nakat-onan mahitungod sa kinaiya ug karakter ni Jesukristo?
Unsa nga mga kamatuoran ang makat-onan nato gikan niini nga asoy mahitungod sa abilidad sa Manluluwas nga mapakalma ang mga unos sa atong kaugalingong kinabuhi?
Gikan niini nga sugilanon, makita nato nga samtang nagtinguha kita sa tabang sa Manluluwas sa panahon sa mga unos sa kinabuhi, makahatag Siya kanato og kalinaw ug pagkakalma.Ikonsiderar ang pagsulat sa imong mga kasulatan ug diha sa imong drowing niini nga kamatuoran ug bisan unsang uban pang imong nakita.
Tan-awa ang “Peace in Christ” (4:09), ug hunahunaa ang mga higayon nga gihatagan ka sa Manluluwas og kalinaw taliwala sa mga unos sa imong kinabuhi.
Unsa nga mga hunahuna ug mga pagbati ang imong naangkon samtang naminaw ka niini nga kanta?
Kanus-a ka gihatagan sa Manluluwas og kalinaw ug pagkakalma atol sa panahon sa “unos sa kinabuhi”?
Tan-awa ang imong drowing ug ang mga tawag [label] niini. Pagdugang karon og drowing sa imong kaugalingon sa imong hulagway nga nagpakita kung giunsa nimo pag-atubang ang mga unos sa imong kinabuhi. Pananglitan, naghawid ka ba sa kilid sa sakayan tungod sa kahadlok? O nagtindog ka ba duol sa Manluluwas, nga puno sa kalinaw?
Sa ubos sa imong ilustrasyon, irekord kung nganong gidrowing nimo ang imong kaugalingon sa paagi nga imong gibuhat. Unya hunahunaa ang mahitungod sa piho nga mga aksyon nga gibati nimo nga gusto sa Ginoo nga imong buhaton aron madawat o padayon nga madawat ang Iyang tabang. Sa leksiyon sa umaabot, lagmit nga makabaton ka og oportunidad nga tan-awon pag-usab ang imong ilustrasyon ug hunahunaa kon nakakaplag ka og mas dakong kalinaw diha sa Manluluwas.
Lagmit nga makatabang kon awhagon ang mga estudyante nga bantayan ang ilang hulagway. Ang leksiyon nga “Susiha ang Imong Pagkakat-on 3” nagpasabot og balik niini nga kalihokan.
Komentaryo ug Background nga Impormasyon
Ngano kaha nga nahitabo ang dakong unos sa gamay nga linaw?
Ang Dagat sa Galilea … nahimutang sa Jordan Rift Valley sa hapit 700 ka piye sa ubos sa lebel sa dagat ug nalibotan og tag-as nga bungtod sa kasadpan, sa norte, ug sa sidlakan. Posibling mohuros ang hangin paubos sa kasadpang lugsungan ug momugna og kalit, grabe nga bagyo inubanan sa makalilisang nga mga balod niining daw gamay nga linaw.
(Manwal sa Estudyante sa Bag-ong Tugon[2018], 181)
Nganong mihatag si Jesus og malumo nga pahinumdom sa mga disipulo tungod sa pagka-walay pagtuo?
Si Presidente Howard W. Hunter (1907–95) mipaambit:
Imahe
Howard W. Hunter
Tanan kita nakakita og kalit nga mga unos sa atong kinabuhi. Ang pipila niini, bisan temporaryo sama niining anaa sa Dagat sa Galilea, posibleng mabangis ug makahadlok ug malagmit nga makadaot. Isip mga indibidwal, mga pamilya, komunidad, mga nasod, gani isip usa ka simbahan, kita adunay kalit nga unos diin kita makapangutana sa usa ka paagi o sa lahi, “Magtutudlo, wala ka ba mabalaka nga hapit na man kita malunod?” Ug sa usa ka paagi o sa lahi kanunay kitang makadungog dihang linaw na human sa unos, “Nganong nalisang man kamo? Wala ba kamoy pagsalig?”
Walay usa nato ang gustong moingon nga kita walay hugot nga pagtuo, pero nagtuo ko nga ang malumo nga pahinumdom sa Ginoo dinhi haom gayud kaayo. Kining halangdon nga Jehovah, kinsa atong giingon nga atong gisaligan ug kansang pangalan atong gidala, mao siya kinsa nag-ingon, “Motungha ang usa ka wanang nga magbahin sa katubigan.” ( Gen. 1:6 .) Ug siya gihapon ang nag-ingon nga, “Matingob sa usa lamang ka dapit ang tubig ubos sa langit aron motungha ang yutang mala.” ( Gen. 1:9 .) Dugang pa, siya ang mibahin sa Pulang Dagat, naghimo sa mga Israelihanon nga moagi latas sa mamala nga yuta. (Tan-awa sa Ex. 14:21–22 .) Klaro gayod nga dili ikatingala nga mahimo ra niyang mandoan ang ubang elemento sa Dagat sa Galilea. Ug ang atong hugot nga pagtuo kinahanglang mopahinumdom kanato nga mahimo ra niyang pahunungon ang dagkong balod sa atong kinabuhi.
(Howard W. Hunter, “Master, the Tempest Is Raging,” Ensign, Nob. 1984, 33)
Sa unsang paagi nalambigit kanako kini nga sugilanon?
Si Sister Lisa L. Harkness, kanhi Unang Magtatambag sa Kinatibuk-ang Kapangulohan sa Primary, mipaambit:
Imahe
Lisa Harkness, Primary General Presidency First Counselor. Photo taken in April 2018. Official Portrait.
Adunay mortal nga kalagmitan, gani usa ka tintasyon, kon atong mabantayan ang atong kaugalingon taliwala sa mga pagsulay, mga kasamok, o mga kalisdanan nga motuaw, “Magtutudlo, wala ka ba mabalaka nga hapit na man ako malunod? Luwasa ako.” …
Mahunahuna lang nako nga ang mga disipulo ni Jesus nga diha sa sakayan nga gikusokuso sa unos, tungod sa panginahanglan, nagkapuliki sa pagtan-aw sa mga balod nga mihampak sa ilang tungtonganan ug naghabwa niini og tubig. Ako silang mahunahuna nga nagkupot sa mga layag ug nagsulay sa pagpabilin sa pagkontrolar sa ilang gamay nga sakayan. Ang ilang gitutokan mao ang mabuhi sa maong gutlo, ug ang ilang pangamuyo alang sa tabang hilabihan ka sinsero.
Daghan kanato walay kalainan sa atong panahon. … Sa mga panahon sa kagubot ang atong pagtuo morag mainat kon asa kutob ang atong paglahutay ug panab[o]t. Ang balik-balik nga kahadlok makabalda kanato, nga maoy hinungdan nga makalimot kita sa kamaayo sa Dios, sa ingon mopabilin sa atong panglantaw nga mubo ra ug walay tumong. Apan pinaagi niining lis[o]d nga mga gutlo sa atong panaw nga ang atong pagtuo dili lamang masulayan pero mapalig-on usab.
(Lisa L. Harkness, “Hilum, Hunong,” Liahona, Nob. 2020, 80–81)
Dugang nga mga Kalihokan sa Pagkat-on
Ideya sa pang-abli nga himno
Ikonsiderar ang pagkanta sa “Master, the Tempest Is Raging” (Mga Himno, no. 60) aron sugdan ang klase.
Kalihokan sa Basahon ni Mormon
Ikonsiderar ang pag-awhag sa mga estudyante nga pangitaon ang asoy sa mga panaw sa Jaredite sa Ether 6:1–12 aron makakita og mga kapareho taliwala sa mga Jaredite ug sa mga Apostoles sa panahon sa unos. Dasiga ang mga estudyante nga magpokus sa simbolismo sa kada asoy. Mahimong ilhon sa mga estudyante ang mga kamatuoran mahitungod sa Manluluwas ug mga baroganan nga makatabang kanila sa mga panaw ug mga unos sa kinabuhi.
