ម៉ាកុស ៩:១៤–២៩

« ខ្ញុំជឿហើយ លោកម្ចាស់អើយ សូមជួយចំពោះសេចក្តីណាដែលខ្ញុំមិនជឿផង »

ព្រះយេស៊ូវគ្រីស្ទបានយាងមកជួបមនុស្សមួយក្រុម ដែលសួរសំណួរដល់សិស្សរបស់ទ្រង់ ព្រោះពួកសិស្សមិនអាចដេញវិញ្ញាណអាក្រក់ចេញពីកូនប្រុសរបស់បុរសម្នាក់បានឡើយ ។ បន្ទាប់ពីបង្រៀនឪពុកនេះអំពីសេចក្ដីជំនឿហើយ ព្រះយេស៊ូវគ្រីស្ទបានប្រោសកូនប្រុសនោះ ។ មេរៀននេះនឹងជួយអ្នកឲ្យពិនិត្យមើលសេចក្ដីជំនឿរបស់អ្នកលើព្រះអម្ចាស់ ហើយស្វែងរកវិវរណៈអំពីរបៀបដែលអ្នកអាចពង្រឹងសេចក្ដីជំនឿបាន ។

ការរៀបចំរបស់សិស្ស ៖ សូមអញ្ជើញសិស្សឲ្យគិតអំពីបទពិសោធន៍ ដែលបានពង្រឹងសេចក្តីជំនឿរបស់ពួកគេលើព្រះយេស៊ូវគ្រីស្ទ ។ ពួកគេក៏អាចសួរមនុស្សផ្សេងទៀតអំពីបទពិសោធន៍នៃការស្ថាបនាសេចក្ដីជំនឿផ្ទាល់ខ្លួនរបស់ពួកគេផងដែរ ។

សកម្មភាពរៀនសូត្រដែលអាចមាន

បញ្ហាប្រឈមចំពោះសេចក្ដីជំនឿ

សូមស្រមៃថា អ្នកកំពុងតែជួបប្រទះនូវបញ្ហាប្រឈមដូចខាងក្រោម ៖

សូមពិចារណាបង្ហាញស្ថានភាពដូចខាងក្រោម ឬស្ថានភាពផ្សេងទៀតដែលពាក់ព័ន្ធនឹងសិស្ស ។

មានអារម្មណ៍ថាគេមិនស្វាគមន៍នៅព្រះវិហារជំងឺធ្លាក់ទឹកចិត្តសមាជិកគ្រួសារម្នាក់ចាកចេញពីសាសនាចក្រការស្លាប់របស់មិត្តម្នាក់

• តើបទពិសោធន៍ទាំងនេះអាចប៉ះពាល់ដល់ជំនឿ និងការទុកចិត្តរបស់នរណាម្នាក់ទៅលើព្រះយេស៊ូវគ្រីស្ទបានយ៉ាងដូចម្តេច ?

• តើបទពិសោធន៍ផ្សេងទៀតណាខ្លះ ដែលអាចសាកល្បងសេចក្ដីជំនឿរបស់ក្មេងជំទង់ម្នាក់លើព្រះគ្រីស្ទ ?

• តើបទពិសោធន៍អ្វីដែលអ្នក ឬអ្នកផ្សេងទៀតធ្លាប់មាន ដែលបានបង្ហាញអ្នក អំពីសារៈសំខាន់នៃការមានសេចក្ដីជំនឿដ៏រឹងមាំទៅលើព្រះយេស៊ូវគ្រីស្ទក្នុងអំឡុងគ្រាលំបាក ?

សូមពិចារណាផ្តល់នូវការវាយតម្លៃខ្លួនឯងខាងក្រោមនេះជាសំណៅចែកជូនសិស្ស ឬបង្ហាញវាដើម្បីឲ្យសិស្សប្រើ នៅពេលពួកគេកត់ត្រាចម្លើយរបស់ពួកគេនៅក្នុងសៀវភៅកំណត់ហេតុសិក្សារបស់ពួកគេ ។

សូមបំពេញការវាយតម្លៃខ្លួនឯងដូចខាងក្រោមនេះ ៖

សកម្មភាពគុណលក្ខណៈ ៖ សេចក្ដីជំនឿ

សូមជ្រើសរើសលេខដែលពិពណ៌នា ថា តើសេចក្តីថ្លែងការណ៍នីមួយៗអនុវត្តត្រូវចំពោះអ្នកបំផុតញឹកញាប់ប៉ុណ្ណា ។ សូមចងចាំថា ការលូតលាស់ខាងវិញ្ញាណគឺជាដំណើរការបន្តិចម្តងៗ ហើយគ្មាននរណាម្នាក់ល្អឥតខ្ចោះនោះទេ ។

១ = មិនត្រូវសោះ; ២ = ពេលខ្លះ; ៣ = ជាញឹកញាប់; ៤ = ស្ទើរតែគ្រប់ពេល; ៥ = ជានិច្ចកាល

________ ១ . ខ្ញុំជឿលើព្រះយេស៊ូវគ្រីស្ទ ហើយទទួលយកទ្រង់ថាជាព្រះអង្គសង្គ្រោះរបស់ខ្ញុំ ។ ( នីហ្វៃទី២ ២៥:២៩ )________ ២ . ខ្ញុំមានសេចក្តីជំនឿដែលចាំបាច់ ដើម្បីជួយធ្វើឲ្យរឿងល្អៗកើតឡើងនៅក្នុងជីវិតរបស់ខ្ញុំ ឬជីវិតរបស់អ្នកដទៃ ។ ( អេធើរ១២:១២ )________ ៣ . ខ្ញុំទុកចិត្តលើព្រះអង្គសង្គ្រោះល្មមគ្រប់គ្រាន់ដើម្បីទទួលយកឆន្ទៈរបស់ទ្រង់ ហើយធ្វើអ្វីដែលទ្រង់បង្គាប់ ។ ( នីហ្វៃទី១ ៣:៧ )

• សូមពិចារណាពីចំណុចដែលអ្នករឹងមាំ ។ តើបទពិសោធន៍អ្វីខ្លះដែលបានជួយអ្នកឲ្យរឹងមាំនៅក្នុងចំណុចទាំងនេះ ?

• តើអ្នកត្រូវពង្រឹងចំណុចមួយណា ?

« នោះសូមអាណិតមេត្តាជួយយើងខ្ញុំផង »

បន្ទាប់ពីបទពិសោធន៍របស់ទ្រង់ជាមួយ ពេត្រុស យ៉ាកុប និងយ៉ូហាន នៅលើភ្នំប្រែរូប នោះព្រះយេស៊ូវបានយាងមកជួបបុរសម្នាក់ ដែលចង់ឲ្យកូនប្រុសរបស់គាត់បានជាសះស្បើយពីវិញ្ញាណអាក្រក់ ។

សូមពិចារណាអាន ម៉ាកុស ៩:១៤–២២ និង ២៣–២៧ ជាថ្នាក់រួមគ្នា ដោយអញ្ជើញសិស្សម្នាក់ឲ្យអានព្រះបន្ទូលរបស់ព្រះអង្គសង្គ្រោះ ម្នាក់ទៀតអានសម្ដីរបស់ឪពុក និងម្នាក់ទៀតអានវគ្គដែលនៅសេសសល់ជាអ្នកនិទានកថា ។ ( វាអាចមានប្រយោជន៍ក្នុងការបែងចែកផ្នែកទាំងនេះ ហើយអញ្ជើញសិស្សឲ្យកំណត់ជួរអានរៀងៗខ្លួន មុនចាប់ផ្ដើមបង្រៀន ) ។ សិស្សក៏អាចប្រើវិធីសាស្រ្តនេះដើម្បីអានជាក្រុមដែលមានគ្នាបីនាក់ផងដែរ ។

ជាជម្រើសក្នុងការអានខគម្ពីរទាំងនេះ សូមពិចារណាបង្ហាញវីដេអូរបស់អែលឌើរ ជែហ្វ្រី អ័រ ហូឡិន ដែលតំណាលអំពីដំណើររឿងនេះនៅក្នុង « Lord, I Believe » ដែលមាននៅលើគេហទំព័រ ChurchofJesusChrist.org ចាប់ពីម៉ោងកូដលេខ ០:០០ ដល់ម៉ោង ៣:៣៣ ។

សូមអាន ម៉ាកុស ៩:១៤–២២ ដោយរកមើលស្ថានភាពលំបាកដែលឪពុក និងកូននេះបានប្រឈម ។

• តើអ្នកគិតថា ឪពុករូបនេះមានអារម្មណ៍យ៉ាងណា នៅពេលដែលពួកសិស្សរបស់ព្រះអង្គសង្គ្រោះមិនអាចប្រោសកូនប្រុសរបស់គាត់ឲ្យជាសះស្បើយបាននោះ ?

សូមប្រុងប្រយ័ត្នចំពោះការសូមឲ្យសិស្សឆ្លើយផ្ទាល់មាត់ចំពោះសំណួរបន្ទាប់ ។ ការឆ្លើយតបអាចមានលក្ខណៈផ្ទាល់ខ្លួនយ៉ាងខ្លាំង រហូតដល់មិនគួរចែកចាយនោះទេ ។

• តើមានពេលណាដែលអ្នក ឬនរណាម្នាក់ដែលអ្នកស្គាល់ មានហេតុផលដើម្បីទូលទៅកាន់ព្រះអម្ចាស់ថា « នោះសូមអាណិតមេត្តាជួយយើងខ្ញុំផង ? »

• តើអ្នកដឹងអ្វីខ្លះចេញពីបទពិសោធន៍របស់អ្នក អំពីព្រះទ័យរបស់ព្រះអម្ចាស់ក្នុងការបង្ហាញសេចក្ដីអាណិតមេត្តា ?

• ហេតុអ្វីព្រះយេស៊ូវគ្រីស្ទអាចមានសេចក្ដីអាណិតមេត្តាដល់យើងម្នាក់ៗ ?

សូមអាន ម៉ាកុស ៩:២៣–២៧ ដើម្បីមើលថាមានអ្វីកើតឡើងបន្ទាប់ទៀត ។ សូមពិចារណាសម្គាល់ពាក្យ ឃ្លា ឬសេចក្តីពិតណា ដែលអ្នកមានអារម្មណ៍ថាសំខាន់ដើម្បីចងចាំ ។

• តើព្រះអង្គសង្គ្រោះបានប្រាប់អ្វីដល់ឪពុករូបនេះ នៅពេលគាត់សូមជំនួយ ?

• តើអ្នកចាប់អារម្មណ៍លើអ្វីខ្លះ អំពីការឆ្លើយតបរបស់ឪពុករូបនេះទៅកាន់ព្រះអង្គសង្គ្រោះនៅក្នុង ខទី ២៤ ?

• តើអ្នកមានបទពិសោធន៍អ្វីខ្លះ ដែលជួយអ្នកឲ្យនិយាយថា « ខ្ញុំជឿហើយ លោកម្ចាស់អើយ » ?

អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានគូសបញ្ជាក់ពីសារៈសំខាន់នៃសេចក្ដីពិត ដែលយើងអាចរៀនចេញពីដំណើររឿងនេះបាន ។

ពេលប្រឈមនឹងឧបសគ្គនៃជំនឿ ឪពុករូបនោះពង្រឹងកម្លាំងគាត់មុន ហើយបន្ទាប់មក ទទួលស្គាល់ភាពខ្វះចន្លោះរបស់គាត់ ។ ការប្រកាសផ្ដើមដំបូងរបស់គាត់ គឺវិជ្ជមាន ហើយគ្មានការស្ទាក់ស្ទើរ ៖ « ខ្ញុំជឿហើយ លោកម្ចាស់អើយ » ។ ខ្ញុំចង់និយាយទៅអ្នកទាំងអស់ ដែលចង់បានជំនឿបន្ថែមទៀត ថាចូរចងចាំពីបុរសរូបនេះ ! ក្នុងគ្រានៃការភ័យខ្លាច ឬសង្ស័យ ឬមានបញ្ហា ចូរតោងជាប់នូវជំនឿដែលអ្នកមានរួចហើយ សូម្បីតែជំនឿនោះនៅមានកម្រិតក្ដី ។ … ចូរតោងឲ្យជាប់ទៅនឹងអ្វីដែលអ្នកដឹងរួចហើយ ហើយឈររឹងមាំរហូតដល់បានចំណេះដឹងបន្ថែម ។ …

… ពេលការសង្ស័យ ឬការលំបាកមកដល់ ចូរកុំខ្លាចនឹងសុំជំនួយ ។ … ព្រះនឹងបញ្ជូនជំនួយទៅទាំងសង្ខាងនៃវាំងនន ដើម្បីពង្រឹងជំនឿយើងជានិច្ច ។

( ជែហ្វ្រី អ័រ ហូឡិន « Lord, I Believe » Ensign ឬ Liahona ខែ ឧសភា ឆ្នាំ ២០១៣ ទំព័រ ៩៣–៩៤ )

• តើយើងអាចរៀនអ្វីខ្លះចេញពីដំណើររឿងព្រះគម្ពីរនេះ និងការបង្រៀនរបស់អែលឌើរ ហូឡិន ?

សេចក្ដីពិតមួយដែលយើងរៀនមកពីដំណើររឿងនេះ គឺថា នៅពេលយើងជ្រើសរើសជឿលើព្រះវរបិតាសួគ៌ ហើយស្វែងរកជំនួយពីទ្រង់តាមរយៈការអធិស្ឋាន នោះទ្រង់នឹងជួយយើងឲ្យពង្រឹងសេចក្ដីជំនឿរបស់យើងទៅលើព្រះយេស៊ូវគ្រីស្ទ ។

• តើអ្នកគិតថា វាមានន័យយ៉ាងដូចម្តេចដើម្បី « តោងជាប់នូវជំនឿដែលអ្នកមានរួចហើយ » និង « តោងឲ្យជាប់ទៅនឹងអ្វីដែលអ្នកដឹងរួចហើយ » ?

វិធីមួយដើម្បី « តោងជាប់នូវជំនឿដែលអ្នកមានរួចហើយ » និង « តោងឲ្យជាប់ទៅនឹងអ្វីដែលអ្នកដឹងរួចហើយ » គឺត្រូវចងចាំ និងពឹងផ្អែកលើបទពិសោធន៍ពីមុនៗ ដែលបានពង្រឹងសេចក្ដីជំនឿរបស់អ្នក ។ អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានបរិយាយបទពិសោធន៍ទាំងនេះ ៖

ទន្ទឹមនឹងការណែនាំដ៏សុខសាន្ដ ដែលយើងបានទទួលពីព្រះវិញ្ញាណបរិសុទ្ធ ពីមួយគ្រាទៅមួយគ្រា ព្រះដ៏ប្រកបដោយអានុភាព បានអះអាងដល់យើងម្នាក់ៗដោយផ្ទាល់ថា ទ្រង់ស្គាល់យើង ហើយស្រឡាញ់យើង ហើយទ្រង់នឹងប្រទានពរជាក់លាក់ និងបើកចំហដល់យើង ។ …

… នៅពេលមានការលំបាក ការសង្ស័យផ្ទាល់ខ្លួន ឬការបាក់ទឹកចិត្តធ្វើឲ្យផ្លូវយើងងងឹត … អនុស្សាវរីយខាងវិញ្ញាណដ៏មានអត្ថន័យ [ ទាំងនេះ ] … គឺដូចជាសិលាដែលមានពន្លឺ ដែលជួយបំភ្លឺផ្លូវខាងមុខ ដោយធានាប្រាប់យើងថា ព្រះស្គាល់យើង ស្រឡាញ់យើង និងបានបញ្ជូនព្រះរាជបុត្រាទ្រង់ គឺព្រះយេស៊ូវគ្រីស្ទឲ្យមកជួយយើងត្រឡប់ទៅផ្ទះវិញ ។

( នែល អិល អាន់ឌើរសិន « Spiritually Defining Memories » Ensign ឬ Liahona ខែ ឧសភា ឆ្នាំ ២០២០ ទំព័រ ១៩, ២១ )

នៅក្នុងសៀវភៅកំណត់ហេតុការសិក្សារបស់អ្នក ឬនៅលើក្រដាសមួយសន្លឹក សូមគូសស្នាមដៃម្ខាងរបស់អ្នក ។ នៅពាក់កណ្តាលនៃការគូសស្នាមនេះ សូមសរសេរឃ្លាថា « ខ្ញុំជឿហើយ លោកម្ចាស់អើយ » ដើម្បីតំណាងឲ្យការកាន់ខ្ជាប់នូវអ្វីដែលអ្នកបានដឹងរួចហើយ ។ នៅជុំវិញឃ្លានេះ សូមសរសេរមូលហេតុលម្អិតសង្ខេបៗដែលអ្នកដឹង ឬជឿថា « ព្រះស្គាល់ [ អ្នក ] ស្រឡាញ់ [ អ្នក ] និងបានបញ្ជូនព្រះរាជបុត្រាទ្រង់ គឺព្រះយេស៊ូវគ្រីស្ទឲ្យមកជួយ [ អ្នក ] ឲ្យមកជួយយើងត្រឡប់ទៅផ្ទះវិញ » ។

ជំនួសឲ្យការដាមតាមស្នាមដៃរបស់ពួកគេ សិស្សអាចកត់ត្រានៅក្នុងសៀវភៅកំណត់ហេតុរបស់ពួកគេ នូវមូលហេតុដែលពួកគេជឿលើព្រះវរបិតាសួគ៌ និងព្រះយេស៊ូវគ្រីស្ទ ។ ពួកគេអាចរួមបញ្ចូលបទពិសោធន៍ខាងវិញ្ញាណដែលពួកគេមាន ។ សូមពិចារណាអញ្ជើញសិស្សឲ្យចែករំលែកនូវអ្វីដែលពួកគេបានសរសេរ បើសមរម្យ និងចម្លើយរបស់ពួកគេចំពោះសំណួរខាងក្រោមនេះ ។

• តើការចងចាំដល់បទពិសោធន៍ដែលព្រះបានប្រទានដល់អ្នករួចហើយ និងមេរៀនដែលទ្រង់បានបង្រៀនអ្នករួចហើយ អាចជួយពង្រឹងដល់អ្នកនៅក្នុងគ្រាលំបាកបានយ៉ាងដូចម្ដេច ?

សូមសញ្ជឹងគិតអំពីអ្វីដែលអ្នកនឹងធ្វើបាន ឬនឹងបន្តធ្វើ ដើម្បីអញ្ជើញឲ្យមានបទពិសោធន៍ ដែលជួយអ្នកឲ្យដឹងថាព្រះស្គាល់អ្នក ហើយស្រឡាញ់អ្នក ។

សូមពិចារណាបញ្ចប់ដោយការធ្វើទីបន្ទាល់ ឬការអញ្ជើញសិស្សម្នាក់ឲ្យមកថ្លែងទីបន្ទាល់ អំពីរបៀបដែលព្រះអង្គសង្គ្រោះពង្រឹងយើងនៅក្នុងការពុះពាររបស់យើង និងប្រទានរង្វាន់ដល់ការខិតខំដ៏ស្មោះត្រង់ណាមួយដើម្បីទុកចិត្តលើទ្រង់ ។

វិចារណកថា និង ព័ត៌មានសាច់រឿង

ម៉ាកុស ៩:២៩ ។ តើព្រះអង្គសង្រ្គោះចង់មានន័យអ្វី នៅពេលទ្រង់មានបន្ទូលថា « ដែលនឹងដេញអារក្សបែបយ៉ាងនេះបាន នោះគឺដោយសារតែអធិស្ឋាន ហើយនិងតមទេ » ?

ការតមអាហារ និងការអធិស្ឋានអាចអញ្ជើញឲ្យមានអំណាចខាងវិញ្ញាណកាន់តែច្រើនមកពីព្រះអម្ចាស់ ។ បញ្ហាប្រឈមមួយចំនួន ដូចជានៅពេលដែលពួកសាវកព្យាយាមបណ្តេញវិញ្ញាណអាក្រក់ចេញ អាចតម្រូវឲ្យមានអំណាចដ៏អស្ចារ្យជាងនេះ ។ ប្រធាន រ័សុល អិម ណិលសុន បានបង្រៀនថា « អំណាចដ៏ផ្អែមល្ហែមនៃការអធិស្ឋាន អាចត្រូវបានពង្រឹងដោយការតមអាហារ … នៅពេលសមស្របទៅនឹងតម្រូវការជាក់លាក់មួយ » ( « Sweet Power of Prayer » Ensign ឬ Liahona ខែ ឧសភា ឆ្នាំ ២០០៣ ទំព័រ ៧ ) ។

តើខ្ញុំអាចរៀនបន្ថែមទៀតអំពីសេចក្ដីជំនឿ និងការសង្ស័យនៅឯណា ?

អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់ បានបង្រៀនសេចក្ដីពិតបន្ថែមទៀតអំពីការពង្រឹងសេចក្ដីជំនឿ និងការដោះស្រាយមន្ទិលសង្ស័យ ។ ដើម្បីស្តាប់សេចក្ដីពិតបន្ថែមទាំងនេះមួយចំនួន សូមពិចារណាមើលវីដេអូ « Lord, I Believe » ពីលេខកូដម៉ោង ៥:៥៧ ដល់ ១០:២៨ ។

សកម្មភាពរៀនសូត្របន្ថែម

ជម្រើសដើម្បីចាប់ផ្តើមមេរៀន

ជំនួសឲ្យការពិភាក្សាអំពីស្ថានភាពដែលបានសរសេរនៅដើមមេរៀន សូមពិចារណាបង្ហាញដើមដំបូងនៃវីដេអូ « Faith Journey: When Parents Get Divorced » ពីលេខកូដម៉ោង ០:០០ ដល់ ០:២០ ឬវីដេអូ « Faith Crisis: What Do We Do When We Feel Nothing ? » ពីលេខកូដម៉ោង ០:០០ ដល់ ២:១៥ ។ វីដេអូទាំងនេះមាននៅលើគេហទំព័រ ChurchofJesusChrist.org ។ ក្រោយមក សិស្សអាចបញ្ចប់ការមើលវីដេអូមុននឹងបញ្ចប់សកម្មភាពដាមតាមស្នាមដៃនោះ ។

ការអធិស្ឋាន និង ការតមអាហារ

វិធីមួយផ្សេងទៀតដើម្បីលើកទឹកចិត្តសិស្សឲ្យពង្រឹងសេចក្ដីជំនឿរបស់ពួកគេទៅលើព្រះយេស៊ូវគ្រីស្ទ មាននៅក្នុង ម៉ាកុស ៩:២៨–២៩ ។ ព្រះអង្គសង្គ្រោះបានចង្អុលបង្ហាញនៅក្នុង ខទី ២៩ ថា ពួកសិស្សរបស់ទ្រង់មិនអាចបណ្ដេញអារក្សបាន ដោយសារពួកគេខ្វះសេចក្ដីជំនឿ ។ សូមពិចារណាអញ្ជើញសិស្សឲ្យសិក្សាខគម្ពីរទាំងនេះ ដោយរកមើលគោលការណ៍មួយដែលស្រដៀងទៅនឹងចំណុចដូចតទៅនេះ ៖ យើងអាចបង្កើនសេចក្ដីជំនឿរបស់យើងទៅលើព្រះយេស៊ូវគ្រីស្ទ តាមរយៈការអធិស្ឋាន និងការតមអាហារ ។ សិស្សអាចពិភាក្សាអំពីមូលហេតុ ដែលព្រះអម្ចាស់ប្រទានពរជ័យមួយចំនួន ដោយសារតែការអធិស្ឋាន និងការតមអាហារ ។ សេចក្តីថ្លែងការណ៍អំពីការអធិស្ឋាន និងការតមអាហារនៅក្នុង « វិចារណកថា និង ព័ត៌មានសាច់រឿង » ក៏អាចប្រើជាផ្នែកមួយនៃការពិភាក្សានេះផងដែរ ។