ម៉ាថាយ ១៨:១១–១៤

សេចក្ដីមេត្តាករុណារបស់ព្រះវរបិតាសួគ៌ និងព្រះយេស៊ូវគ្រីស្ទ

ព្រះយេស៊ូវគ្រីស្ទបានបង្រៀនថា ទ្រង់ និងព្រះវរបិតាសួគ៌របស់យើងមានសេចក្ដីស្រឡាញ់ និងព្រះទ័យខ្វល់ខ្វាយចំពោះមនុស្សគ្រប់រូប ។ មេរៀននេះមានបំណងដើម្បីជួយអ្នកឲ្យមានអារម្មណ៍ថា ព្រះវរបិតាសួគ៌ និងព្រះយេស៊ូវគ្រីស្ទមានព្រះទ័យមេត្តាករុណា និងប្រាថ្នាចង់ជួយសង្គ្រោះព្រលឹងដែលវង្វេងទាំងអស់ ។

ការផ្តោតលើគុណលក្ខណៈ និងបុគ្គលិកលក្ខណៈរបស់ព្រះអង្គសង្គ្រោះ ។ សូមប្រើព្រះគម្ពីរមិនត្រឹមតែដើម្បីបង្រៀនពីអ្វីដែលព្រះយេស៊ូវគ្រីស្ទបានធ្វើនោះទេ ប៉ុន្តែក៏ដើម្បីបញ្ជាក់ពីគុណលក្ខណៈ និងបុគ្គលិកលក្ខណៈដ៏ទេវភាពរបស់ទ្រង់ផងដែរ ។ ការណ៍នេះនឹងអញ្ជើញព្រះវិញ្ញាណបរិសុទ្ធឲ្យធ្វើជាសាក្សីអំពីទ្រង់ ដោយជួយសិស្សឲ្យយល់កាន់តែច្បាស់ថា ទ្រង់ជានរណា ហើយមានបំណងប្រាថ្នាចង់ក្លាយដូចជាទ្រង់ ។

ការរៀបចំរបស់សិស្ស ៖ សូមអញ្ជើញសិស្សឲ្យមកកាន់ថ្នាក់រៀន ដោយបានត្រៀមខ្លួនដើម្បីចែករំលែកដំណើររឿងព្រះគម្ពីរ ដែលបង្ហាញពីសេចក្តីស្រឡាញ់របស់ព្រះចំពោះអ្នកដែលវង្វេងខាងវិញ្ញាណ ។

សកម្មភាពរៀនសូត្រដែលអាចមាន

និស្ស័យរបស់ព្រះវរបិតាសួគ៌ និងព្រះយេស៊ូវគ្រីស្ទ

ដើម្បីជួយសិស្សឲ្យមានអារម្មណ៍ស្រួលក្នុងការឆ្លើយសំណួរខាងក្រោមដោយស្មោះត្រង់ សូមពិចារណាអញ្ជើញពួកគេឲ្យសរសេរនៅលើក្រដាសតូចមួយនូវលេខចម្លើយដែលពួកគេបានជ្រើសរើស ( ដោយមិនត្រូវដាក់ឈ្មោះរបស់ពួកគេឡើយ ) ។ សូមពិចារណាប្រមូលក្រដាស ហើយចែកចាយលទ្ធផលជាមួយសិស្សក្នុងថ្នាក់ ។

• តើប្រយោគខាងក្រោមមួយណា ដែលអ្នកគិតថាពិពណ៌នាបានល្អបំផុតអំពីទឹកព្រះទ័យរបស់ព្រះវរបិតាសួគ៌ និងព្រះយេស៊ូវគ្រីស្ទចំពោះអ្នកដែលមានអំពើបាប ?

1. វាជាការខកព្រះទ័យដែលទ្រង់ទាំងទ្វេត្រូវអភ័យទោសឲ្យមនុស្សមានបាប ប៉ុន្តែទ្រង់ទាំងទ្វេនឹងអភ័យទោសឲ្យ ប្រសិនបើយើងប្រែចិត្តដោយស្មោះ ។

2. ទ្រង់ទាំងទ្វេសព្វព្រះទ័យឲ្យយើងប្រែចិត្ត ដើម្បីទ្រង់អាចអភ័យទោសឲ្យយើងបាន ប៉ុន្តែទ្រង់សប្បាយព្រះទ័យនឹងអ្វីក៏ដោយដែលយើងជ្រើសរើស ។

3. ទ្រង់ទាំងទ្វេមានព្រះទ័យរីករាយយ៉ាងខ្លាំងក្នុងការអភ័យទោសដល់មនុស្សមានបាប ដែលបានប្រែចិត្ត ។

• តើការយល់ដឹងរបស់មនុស្សម្នាក់អំពីនិស្ស័យនៃព្រះវរបិតាសួគ៌ និងព្រះយេស៊ូវគ្រីស្ទមានឥទ្ធិពលលើជម្រើសរបស់ពួកគេយ៉ាងដូចម្តេច ?

នៅពេលអ្នកសិក្សាមេរៀននេះ សូមពិចារណាអំពីអ្វីដែលអ្នករៀនអំពីនិស្ស័យរបស់ព្រះវរបិតាសួគ៌ និងព្រះយេស៊ូវគ្រីស្ទ និងរបៀបដែលចំណេះដឹងនេះអាចជះឥទ្ធិពលដល់ជីវិតរបស់អ្នកបាន ។បន្ទាប់ពីបានបង្រៀនសិស្សរបស់ទ្រង់ថា តើអំពើបាបមួយធ្វើឲ្យបុត្រាបុត្រីរបស់ព្រះអាក់អន់ចិត្ត ឬឈឺចាប់ធ្ងន់ធ្ងរប៉ុណ្ណាហើយនោះ ព្រះអង្គសង្គ្រោះបានសម្តែងនូវព្រះទ័យមេត្តាករុណារបស់ទ្រង់ដើម្បីជួយសង្រ្គោះ « អ្នកណាដែលបាត់បង់ ហើយដើម្បីនឹងហៅមនុស្សមានបាបឲ្យប្រែចិត្ត » ( ការបកប្រែដោយ យ៉ូសែប ស្ម៊ីធ ម៉ាថាយ ១៨:១១ [ នៅក្នុង ម៉ាថាយ ១៨:១១ ] ) ។

សូមអាន ម៉ាថាយ ១៨:១១–១៤ ដោយរកមើលថាតើព្រះវរបិតាសួគ៌ និងព្រះយេស៊ូវគ្រីស្ទមានអារម្មណ៍យ៉ាងណាចំពោះអ្នកដែលវង្វេងខាងវិញ្ញាណ ។

• តើពាក្យ ឬឃ្លាអ្វីខ្លះនៅក្នុងខគម្ពីរទាំងនេះ ដែលជួយអ្នកឲ្យយល់កាន់តែច្បាស់អំពីនិស្ស័យរបស់ព្រះវរបិតាសួគ៌ និងព្រះយេស៊ូវគ្រីស្ទ ?

• តើមនុស្សវង្វេងខាងវិញ្ញាណតាមវិធីខុសៗគ្នាណាខ្លះ ?

សេចក្តីពិតមួយដែលយើងអាចរៀនចេញពីខគម្ពីរទាំងនេះគឺថា ព្រះវរបិតាសួគ៌ និងព្រះយេស៊ូវគ្រីស្ទមានព្រះទ័យមេត្តាករុណា និងប្រាថ្នាចង់ជួយសង្រ្គោះអ្នកទាំងឡាយណាដែលវង្វេងខាងវិញ្ញាណ ។

ប្រធាន ឌៀថើរ អេហ្វ អុជដូហ្វ ដែលកាលនោះនៅក្នុងគណៈប្រធានទីមួយបានពន្យល់ ៖

ជាយូរយារមកហើយ រឿងប្រៀបប្រដូច [ ចៀមដែលវង្វេង ] នេះត្រូវបានយល់ថា ជាបទបញ្ញត្តិមួយឲ្យយើងនាំចៀមវង្វេងនោះត្រឡប់មកវិញ ហើយជួយជនដែលវង្វេងផ្លូវ ។ កាលការគិតបែបនេះគឺជារឿងដ៏សមរម្យ ហើយល្អ ខ្ញុំងឿងឆ្ងល់ថាមានអ្វីលើសពីនេះទៀតទេ ។

តើវាអាចទៅរួចដែរទេថា ព្រះរាជបំណងដ៏សំខាន់បំផុតរបស់ព្រះយេស៊ូវគឺដើម្បីបង្រៀនអំពីកិច្ចការនៃអ្នកគង្វាលល្អ ?

តើវាអាចទៅរួចដែរទេថា ទ្រង់កំពុងថ្លែងទីបន្ទាល់ពីសេចក្ដីស្រឡាញ់របស់ព្រះចំពោះកូនចៅដ៏ចចេសរឹងរូស ? …

វាមិនសំខាន់ថាតើបងប្អូនបានវង្វេងដោយរបៀបណានោះទេ—មិនថាដោយសារតែការជ្រើសរើសដែលខ្វះការពិចារណា ឬដោយសារកាលៈទេសៈដែលបងប្អូនមិនអាចគ្រប់គ្រងបាននោះទេ ។ …

ដោយសារទ្រង់ស្រឡាញ់ នោះទ្រង់នឹងស្វែងរកបងប្អូន ។ ទ្រង់នឹងដាក់បងប្អូននៅលើស្មាទ្រង់ដោយអំណរ ។ ហើយនៅពេលទ្រង់នាំបងប្អូនត្រឡប់មកផ្ទះ នោះទ្រង់នឹងមានបន្ទូលទៅមនុស្សគ្រប់គ្នាថា « សូមអរសប្បាយជាមួយនឹងខ្ញុំ ដ្បិតចៀមខ្ញុំដែលបាត់ នោះឃើញវិញហើយ » [ លូកា ១៥:៦ ] ។

( ឌៀថើរ អេហ្វ អុជដូហ្វ « He Will Place You on His Shoulders and Carry You Home » Ensign ឬ Liahona ខែ ឧសភា ឆ្នាំ ២០១៦ ទំព័រ ១០២ )

• ហេតុអ្វីបានជាអ្នកគិតថា ព្រះយេស៊ូវគ្រីស្ទសព្វព្រះទ័យឲ្យយើងដឹងថាទ្រង់ និងព្រះវរបិតាសួគ៌យើង មានសេចក្តីមេត្តាករុណាខ្លាំងប៉ុណ្ណា ?

• តើការយល់ដឹងអំពីនិស្ស័យនៃសេចក្ដីមេត្តាករុណារបស់ទ្រង់ទាំងទ្វេអាចជួយអ្នកបានយ៉ាងដូចម្តេច ចំពោះកាលៈទេសៈជីវិតរបស់អ្នកឥឡូវនេះ ?

ភស្តុតាងអំពីនិស្ស័យនៃសេចក្ដីមេត្តាករុណារបស់ព្រះវរបិតាសួគ៌ និងព្រះយេស៊ូវគ្រីស្ទ

មានវិធីជាច្រើនដើម្បីជួយសិស្សឲ្យឃើញនូវភស្តុតាងថា តើព្រះមានមេត្តាករុណា និងការអភ័យទោសយ៉ាងដូចម្តេច ។ សូមជ្រើសរើសវិធីសាស្រ្តដែលសមស្របបំផុតសម្រាប់សិស្ស ។ ខាងក្រោមនេះគឺជាគំនិតមួយចំនួនដែលអាចមានប្រយោជន៍ ។

វិធីមួយដែលយើងអាចពង្រឹងទីបន្ទាល់របស់យើងអំពីគោលការណ៍ដំណឹងល្អបាន គឺការស្វែងរកឧទាហរណ៍ជាក់ស្តែងដែលបង្ហាញពីសេចក្ដីពិតពេញលេញនៃគោលការណ៍ទាំងនោះ ។ នៅពេលអ្នកឃើញភស្តុតាងនៃគោលការណ៍ដំណឹងល្អនៅក្នុងជីវិតរបស់អ្នកដទៃ នោះព្រះវិញ្ញាណបរិសុទ្ធអាចជួយអ្នកឲ្យមានអារម្មណ៍នៃសេចក្តីសង្ឃឹម និងភាពជឿជាក់ថា គោលការណ៍ទាំងនោះនឹងផ្ដល់ពរជ័យដល់ជីវិតអ្នកផងដែរ ។ ការផ្តល់យោបល់ខាងក្រោមនេះអាចជួយអ្នកឲ្យឃើញនូវឧទាហរណ៍ជាក់ស្តែងនៃសេចក្តីពិតដែលថា ព្រះវរបិតាសួគ៌ និងព្រះយេស៊ូវគ្រីស្ទមានព្រះទ័យមេត្តាករុណា និងប្រាថ្នាចង់ជួយសង្រ្គោះអ្នកដែលវង្វេងខាងវិញ្ញាណ ។

សម្រាប់សកម្មភាពដូចខាងក្រោមនេះ សូមពិចារណាអញ្ជើញសិស្សឲ្យធ្វើការជាក្រុមតូចៗ ។ បន្ទាប់ពីសិស្សស្រាវជ្រាវព្រះគម្ពីរហើយ សិស្សម្នាក់ពីក្រុមនីមួយៗអាចសរសេរនៅលើក្តារខៀននូវឧទាហរណ៍ដែលពួកគេបានរកឃើញ ។ ប្រសិនបើសិស្សបានចូលរួមក្នុងសកម្មភាពរៀបចំរបស់សិស្ស នោះពួកគេអាចត្រូវបានអញ្ជើញឲ្យប្រើបទគម្ពីរខ្លះៗ ដែលពួកគេបានរកឃើញជាផ្នែកនៃសកម្មភាពនេះ ។

សូមស្រាវជ្រាវបទគម្ពីរទាំងឡាយរកដំណើររឿងដែលបង្ហាញថា តើព្រះវរបិតាសួគ៌ និងព្រះយេស៊ូវគ្រីស្ទមានការអភ័យទោសនិងសេចក្ដីមេត្តាករុណាយ៉ាងណាដែរ ។ ប្រសិនបើអ្នកត្រូវការជំនួយ សូមពិចារណាសិក្សាពីដំណើររឿងបទគម្ពីរមួយ ឬទាំងពីរដូចតទៅនេះ ៖ យ៉ូហាន ៨:១–១១ ; អាលម៉ា ៣៦:៦–២១ ។

សូមជ្រើសរើសឧទាហរណ៍ខ្លះដែលសិស្សបានសរសេរនៅលើក្ដារខៀន ហើយពិភាក្សាវាជាថ្នាក់ ។ សូមជួយឲ្យសិស្សយល់ថា ដូចដែលព្រះបានសម្ដែងសេចក្តីមេត្តាករុណាដល់មនុស្សពីបុរាណ នោះទ្រង់ក៏នឹងសម្ដែងសេចក្តីមេត្តាករុណាដល់ពួកយើងដូចគ្នាដែរ ។

បន្ទាប់មក សូមប្រើវីដេអូមួយខាងក្រោមនេះ ដើម្បីបង្ហាញបន្ថែមទៀតអំពីនិស្ស័យនៃសេចក្ដីមេត្តាករុណារបស់ព្រះវរបិតាសួគ៌ និងព្រះយេស៊ូវគ្រីស្ទ ។

អ្នកក៏អាចមើលវីដេអូមួយ ឬទាំងពីរខាងក្រោមនេះផងដែរ ៖ « The Savior Wants to Forgive » ( ៥:៥០ ) និង « Principles of Peace: Repentance #PrinceofPeace » ( ២:៥៧ ) ដែលមាននៅគេហទំព័រ ChurchofJesusChrist.org ។ វីដេអូទាំងនេះបង្ហាញពីឧទាហរណ៍ អំពីរបៀបដែលព្រះយេស៊ូវគ្រីស្ទឈោងទៅជួយដោយសេចក្ដីមេត្តាករុណា និងការអភ័យទោសដល់អ្នកដែលវង្វេងខាងវិញ្ញាណនៅសម័យរបស់យើង ។

The Savior Wants to Forgive

A former addict and repeat convict shares his experiences with the Savior’s ability and willingness to forgive him again and again, even when he felt undeserving.

Principles of Peace: Repentance #PrinceofPeace

Thanks to the sacrifice of Jesus Christ, we all have the ability to repent—to be free from the guilt and burden of our past sins. Learn how Melody put her past behind her with Jesus’s help and was able to find peace in her new life. 

• តើអ្នកមានអារម្មណ៍ថា ព្រះអម្ចាស់សព្វព្រះទ័យឲ្យអ្នករៀនអ្វីខ្លះ ចេញពីឧទាហរណ៍ដែលអ្នកបានជ្រើសរើសនេះ ?

• តើអ្នកបានកត់សម្គាល់ឃើញព្រះអង្គសង្គ្រោះបង្ហាញសេចក្ដីមេត្តាករុណា ហើយស្វែងរកអ្នកដែលវង្វេងតាមរបៀបណាខ្លះ ?

ការរកមើលឧទាហរណ៍នៃគោលការណ៍ដំណឹងល្អនៅក្នុងជីវិតផ្ទាល់ខ្លួនរបស់អ្នក និងនៅក្នុងជីវិតរបស់មនុស្សដែលអ្នកស្គាល់ អាចជាវិធីដ៏មានឥទ្ធិពលពិសេសមួយ ដើម្បីជួយអ្នកឲ្យមានអារម្មណ៍ថា វាជាការពិត ។

ប្រសិនបើសិស្សត្រូវបានអញ្ជើញឲ្យចែកចាយចម្លើយដូចខាងក្រោមនេះឮៗ សូមលើកទឹកចិត្តពួកគេកុំឲ្យប្រាប់ឈ្មោះ ឬព័ត៌មានលម្អិតនានា ដែលជារឿងផ្ទាល់ខ្លួនរបស់ពួកគេខ្លាំងពេកអី ។

ដោយមិនប្រាប់ពីព័ត៌មានលម្អិត ឬឈ្មោះផ្ទាល់ខ្លួន សូមពិពណ៌នាអំពីនរណាម្នាក់ដែលអ្នកស្គាល់ពីជីវិតរបស់គាត់ ដែលជាភស្តុតាងបង្ហាញថា ព្រះវរបិតាសួគ៌ និងព្រះយេស៊ូវគ្រីស្ទមានព្រះទ័យមេត្តាករុណា ហើយស្វែងរកអ្នកដែលវង្វេងនៅសម័យរបស់យើង ។សូមពិចារណាពីរបៀបដែលឧទាហរណ៍ទាំងនេះជួយពង្រឹងទីបន្ទាល់របស់អ្នក អំពីនិស្ស័យនៃសេចក្ដីមេត្តាករុណារបស់ព្រះវរបិតាសួគ៌ និងព្រះយេស៊ូវគ្រីស្ទ ។ សូមគិតអំពីមូលហេតុដែលវាសំខាន់សម្រាប់អ្នក ដើម្បីដឹងរឿងនេះអំពីទ្រង់ទាំងទ្វេ ។

វិចារណកថា និង ព័ត៌មានសាច់រឿង

តើចៀមដែលវង្វេងនៅក្នុង ម៉ាថាយ ១៨:១២–១៣ ជានរណា ?

អេសាយបានពន្យល់ថា « យើង ទាំងអស់គ្នា បានទាសចេញដូចជាចៀម គឺយើងបានបែរ ចេញ ទៅតាមផ្លូវយើងរៀងខ្លួន » ( អេសាយ ៥៣:៦ ; បានបន្ថែមការគូសបញ្ជាក់ ) ។ ដូច្នេះ ចៀមដែលវង្វេងដែលត្រូវការជួយសង្គ្រោះដោយអ្នកគង្វាលល្អ តំណាងឲ្យយើងម្នាក់ៗ ។

តើព្រះវរបិតាសួគ៌មានព្រះទ័យយ៉ាងណា ចំពោះអស់អ្នកដែលកំពុងព្យាយាមដើរតាមទ្រង់ ប៉ុន្តែដែលដួលម្តងហើយម្តងទៀតនោះ ?

ប្រធាន ឌៀថើរ អេហ្វ អុជដូហ្វ អតីតក្នុងគណៈប្រធានទីមួយ បានជួយឆ្លើយសំណួរនេះ ។ អ្នកអាចចង់មើលវីដេអូ « Four Titles » ដែលមាននៅលើគេហទំព័រ ChurchofJesusChrist.org ចាប់ពីលេខកូដម៉ោង ៣:០៧ ដល់ ៤:៤៩ ។

ងារទាំងបួន

ខ្ញុំចង់លើកឡើងនូវងារបួនយ៉ាង … ដែលអាចជួយយើងឲ្យស្គាល់ពីតួនាទីយើងម្នាក់ៗក្នុងផែនការអស់កល្បរបស់ព្រះ និង សក្ដានុពលយើងក្នុងនាមជាអ្នកកាន់បព្វជិតភាព ។

//media.ldscdn.org/webvtt/general-conference/april-2013-general-conference/2013-04-3040-president-dieter-f-uchtdorf-en.vtt

យើងទាំងអស់គ្នាធ្លាប់ឃើញក្មេងរៀនដើរ ។ គាត់បោះជំហានខ្លីៗទាំងឃ្លីងឃ្លោង ។ គាត់ដួល ។ តើយើងស្ដីបន្ទោសការខិតខំបែបនេះឬ ? ប្រាកដជាពុំមែនហើយ ។ តើឪពុកនឹងដាក់ទោសក្មេងដែលជំពប់ជើងដួលអ្វីខ្លះ ? យើងលើកទឹកចិត្ត យើងអបអរ ហើយយើងសរសើរ ដោយសារជំហានខ្លីៗនោះហើយ ទើបធ្វើឲ្យក្មេងប្រែក្លាយដូចជាឪពុកម្ដាយខ្លួន ។

ឥឡូវ បងប្អូនប្រុស បើប្រៀបនឹងភាពឥតខ្ចោះនៃព្រះ យើងជាមនុស្សមិនខុសពីក្មេងដែលចេះដើរតេះតះនោះទេ ។ តែព្រះវរបិតាសួគ៌ជាទីស្រឡាញ់នៃយើងចង់ឲ្យយើងប្រែក្លាយដូចជាទ្រង់ ហើយបងប្អូនប្រុសជាទីស្រឡាញ់ នោះគួរតែជាគោលដៅដ៏អស់កល្បរបស់យើងផងដែរ ។ ព្រះជ្រាបថា យើងមិនអាចទៅដល់ទីនោះភ្លាមៗបានឡើយ តែដោយមួយជំហានម្ដងៗ ។

ខ្ញុំមិនជឿលើព្រះដែលដាក់ច្បាប់ និងបញ្ញត្តិសម្រាប់តែធ្វើឲ្យយើងបរាជ័យ ដើម្បីទ្រង់អាចដាក់ទោសយើងនោះឡើយ ។ ខ្ញុំជឿលើព្រះវរបិតាសួគ៌ដែលស្រឡាញ់ ហើយបារម្ភ ហើយដែលរីករាយគ្រប់កិច្ចខិតខំរបស់យើងដើម្បីរីកចម្រើន ហើយដើរឆ្ពោះទៅរកទ្រង់ ។ សូម្បីតែពេលយើងដួល ទ្រង់ជំរុញយើងកុំឲ្យបាក់ទឹកចិត្ត—កុំឲ្យចុះចាញ់ ឬគេចពីការទទួលខុសត្រូវយើង—តែត្រូវក្លាហាន ស្វែងរកក្ដីជំនឿយើង ហើយបន្តព្យាយាមទៀត ។

( ឌៀថើរ អេហ្វ អុជដូហ្វ « Four Titles » Ensign ឬ Liahona ខែ ឧសភា ឆ្នាំ ២០១៣ ទំព័រ ៥៨ )

ដោយសារព្រះស្រឡាញ់យើងដល់ម្លឹង តើយើងពិតជាត្រូវខិតខំរក្សាព្រះបញ្ញត្តិរបស់ទ្រង់ដើម្បីត្រូវបានសង្រ្គោះឬ ?

ប្រធាន ដាល្លិន អេក អូក នៃគណៈប្រធានទីមួយបានបង្រៀន ៖

អ្នកខ្លះហាក់ដូចជាឲ្យតម្លៃចំពោះសេចក្តីស្រឡាញ់របស់ព្រះ ព្រោះតែក្តីសង្ឃឹមថា សេចក្តីស្រឡាញ់ដ៏ធំធេង និងគ្មានលក្ខខណ្ឌរបស់ទ្រង់ នឹងជួយដោះសារឲ្យពួកគេដោយសេចក្តីអាណិតមេត្តាថា ពួកគេមិនចាំបាច់គោរពច្បាប់របស់ទ្រង់ឡើយ ។ …

ប្រសិនបើមនុស្សម្នាក់យល់ដឹងពីការបង្រៀនរបស់ព្រះយេស៊ូវ នោះគាត់ ឬនាងមិនអាចសន្និដ្ឋានដោយសមហេតុផលថា ព្រះវរបិតាសួគ៌ជាទីស្រឡាញ់របស់យើង ឬព្រះរាជបុត្រាដ៏ទេវភាពរបស់ទ្រង់ជឿថា សេចក្តីស្រឡាញ់របស់ទ្រង់ទាំងទ្វេអាចលើសជំនួសព្រះបញ្ញត្តិរបស់ទ្រង់ទាំងទ្វេនោះទេ ។ …

ព្រះយេស៊ូវបានបង្រៀនថា « មិនមែនអស់អ្នកណាដែលគ្រាន់តែនិយាយមកខ្ញុំថា ឱព្រះអម្ចាស់ៗអើយ ដែលនឹងចូលទៅក្នុងនគរស្ថានសួគ៌នោះទេ គឺជាអស់អ្នកដែលធ្វើតាមព្រះហឫទ័យនៃព្រះវរបិតា ដែលគង់នៅស្ថានសួគ៌វិញទេតើ » ( ម៉ាថាយ ៧:២១ ) ។

( ដាល្លិន អេក អូក « Love and Law » Ensign ឬ Liahona ខែ វិច្ឆិកា ឆ្នាំ ២០០៩ ទំព័រ ២៦ ២៨ )

សកម្មភាពរៀនសូត្របន្ថែម

ម៉ាថាយ ១៨:១ ។ « តើអ្នកណាធំជាងគេនៅក្នុងនគរស្ថានសួគ៌ ? »

សូមសរសេរសំណួរខាងលើនៅលើក្ដារខៀន ហើយអញ្ជើញសិស្សឲ្យគិតពីវិធីផ្សេងៗដែលសំណួរនេះអាចត្រូវបានឆ្លើយតប ។ បន្ទាប់មក សូមអញ្ជើញពួកគេឲ្យស្រមៃមើលនូវអ្វី ដែលព្រះអង្គសង្គ្រោះបានធ្វើនៅក្នុង ម៉ាថាយ ១៨:២ មុនពេលទ្រង់មានបន្ទូលឆ្លើយសំណួរនោះ ។ សូមសួរសិស្សនូវអ្វីដែលពួកគេអាចរៀនបាន តាមរយៈចម្លើយដែលព្រះអង្គសង្គ្រោះមិនបានមានបន្ទូលឆ្លើយនឹងសំណួរនេះ ។

សូមអញ្ជើញសិស្សអាន ម៉ាថាយ ១៨:៣–៤ ហើយពិភាក្សាអំពីគុណលក្ខណៈដូចជាព្រះគ្រីស្ទ ដែលកូនក្មេងមាន ។ ជាញឹកញាប់ តើយើងឃើញអ្វីខ្លះនៅក្នុងកុមារ ដែលអាចរំឭកយើងអំពីព្រះយេស៊ូវគ្រីស្ទ ? តើការក្លាយជាដូចកូនក្មេង អាចជួយយើងរៀបចំខ្លួនឲ្យបានល្អប្រសើរ ដើម្បីចូលនគរស្ថានសួគ៌ដោយរបៀបណា ? សូមពិចារណាអញ្ជើញសិស្សភ្ជាប់ ម៉ាថាយ ១៨:១–៤ ជាមួយនឹង ម៉ូសាយ ៣:១៩ ហើយពិភាក្សាអំពីអ្វីដែលខគម្ពីរនេះបន្ថែមដល់ការយល់ដឹងរបស់ពួកគេ ។

សូមអញ្ជើញពួកគេឲ្យធ្វើការអធិស្ឋាន ដើម្បីអភិវឌ្ឍគុណលក្ខណៈដូចព្រះគ្រីស្ទ ដែលពួកគេបានឃើញតាមរយៈគំរូរបស់កុមារ ។