ការរំឭកចំណេះចំណានខាងគោលលទ្ធិ ៦

ស្វែងយល់ និងពន្យល់

គោលបំណងមួយនៃចំណេះចំណានខាងគោលលទ្ធិ គឺដើម្បីជួយអ្នកឲ្យយល់ពីការបង្រៀនរបស់ព្រះអង្គសង្គ្រោះ ដែលមាននៅក្នុងវគ្គបទគម្ពីរចំណេះចំណានខាងគោលលទ្ធិ ហើយអាចពន្យល់វាជាពាក្យសម្ដីផ្ទាល់របស់អ្នក ។ មេរៀននេះនឹងផ្តល់ឱកាសឲ្យអ្នកពង្រីកការយល់ដឹងរបស់អ្នក និងពន្យល់ពីសេចក្ដីពិតអំពីវគ្គបទគម្ពីរចំណេះចំណានខាងគោលលទ្ធិមួយ ឬច្រើនចេញពីព្រះគម្ពីរសញ្ញាថ្មី ។

ការរៀបចំរបស់សិស្ស ៖ សូមអញ្ជើញសិស្សឲ្យស្គាល់ពីជំនាញ ឬយុទ្ធសាស្រ្តសិក្សាព្រះគម្ពីរដែលមានប្រសិទ្ធភាពសម្រាប់ពួកគេ ហើយគិតអំពីមូលហេតុដែលជំនាញ ឬយុទ្ធសាស្ត្រនេះមានប្រយោជន៍សម្រាប់ពួកគេ ។

សកម្មភាពរៀនសូត្រដែលអាចមាន

មេរៀនវគ្គបទគម្ពីរចំណេះចំណានខាងគោលលទ្ធិ អាចចាំបាច់ត្រូវបង្រៀនជំនួសមេរៀនរំឭកនេះ ។ សូមមើលតារាងកាលវិភាគដែលនាយកតំបន់ ឬអ្នកសម្របសម្រួលប្រចាំភូមិភាគផ្តល់ឲ្យដើម្បីធានាឲ្យបានថាមេរៀនចំណេះចំណានខាងគោលលទ្ធិនីមួយៗនឹងត្រូវបានបង្រៀននៅពេលដែលថ្នាក់សិក្ខាសាលាកំពុងសិក្សា ។

ការស្វែងយល់ពីព្រះគម្ពីរ

មុនពេលចាប់ផ្តើមការពិភាក្សា សូមពិចារណាអញ្ជើញសិស្សឲ្យចំណាយពេលមួយ ឬពីរនាទីដើម្បីលេងល្បែងសាមញ្ញៗមួយដូចជា លេងគូសទ្រ័រ ឬប៉ាវស៊ីងស៊ុង ជាមួយមនុស្សដែលអង្គុយក្បែរពួកគេ ។ បន្ទាប់ពីការលែងចប់ សូមសួរសិស្សថា តើពួកគេប្រើយុទ្ធសាស្ត្រអ្វី ហើយហេតុអ្វីយុទ្ធសាស្ត្រសំខាន់នៅពេលលេងហ្គេម ? បន្ទាប់មក សូមពន្យល់ថាក៏មានយុទ្ធសាស្រ្តដែលយើងអាចប្រើ ដើម្បីជួយយើងឲ្យយល់ច្បាស់ពីព្រះគម្ពីរផងដែរ ។

សូមអញ្ជើញសិស្សឲ្យចែករំលែកការយល់ដឹងពីសកម្មភាពរៀបចំរបស់សិស្ស ដែលបានណែនាំមក ។ សូមពិចារណាសរសេរចម្លើយរបស់ពួកគេនៅលើក្ដារខៀន ។

• តើយុទ្ធសាស្រ្តអ្វីខ្លះដែលអ្នកបានប្រើ ឬអាចប្រើបាន ដើម្បីស្វែងយល់ពីព្រះគម្ពីរឲ្យបានកាន់តែច្បាស់ ?

• ហេតុអ្វីបានជាអ្នកគិតថា វាសំខាន់ដើម្បីចំណាយពេលស្វែងយល់ពីការបង្រៀនរបស់ព្រះ ដែលមាននៅក្នុងព្រះគម្ពីរ ?

នៅក្នុងមេរៀននេះ អ្នកនឹងមានឱកាសប្រើយុទ្ធសាស្រ្តដ៏សាមញ្ញមួយ ដើម្បីធ្វើឲ្យការយល់ដឹងរបស់អ្នកអំពីវគ្គបទគម្ពីរចំណេះចំណានខាងគោលលទ្ធិមួយ ឬច្រើនចេញពីព្រះគម្ពីរសញ្ញាថ្មីកាន់តែច្បាស់ជាងមុន ។ អ្នកក៏នឹងមានឱកាសពន្យល់ដល់អ្នកដទៃនូវសេចក្ដីពិត ចេញពីវគ្គបទគម្ពីរដែលអ្នកជ្រើសរើសផងដែរ ។

ខាងក្រោមនេះគឺជាបញ្ជីនៃវគ្គបទគម្ពីរចំណេះចំណានខាងគោលលទ្ធិ ចេញពីពាក់កណ្តាលដំបូងនៃព្រះគម្ពីរសញ្ញាថ្មី ។

សូមបង្ហាញឯកសារចែកជូនខាងក្រោមនេះ ដើម្បីឲ្យសិស្សអាចយោងទៅឯកសារនេះពេញមួយមេរៀន ។

សេចក្ដីយោងបទគម្ពីរ	ឃ្លាបទគម្ពីរគន្លឹះ
លូកា ២:១០–១២	« ដ្បិតនៅថ្ងៃនេះ មានព្រះអង្គសង្គ្រោះ ១ អង្គ ប្រសូតដល់អ្នករាល់គ្នានៅក្រុងហ្លួងដាវីឌ គឺជាព្រះគ្រីស្ទដ៏ជាព្រះអម្ចាស់ » ។
យ៉ូហាន ៣:៥	« បើមិនបានកើតអំពីទឹក ហើយអំពីព្រះវិញ្ញាណ នោះគ្មានអ្នកណាអាចនឹងចូលទៅក្នុងនគរព្រះបានទេ » ។
យ៉ូហាន ៣:១៦	« ដ្បិតព្រះទ្រង់ស្រឡាញ់មនុស្សលោកដល់ម្ល៉េះ បានជាទ្រង់ប្រទានព្រះរាជបុត្រាទ្រង់តែ១ » ។
ម៉ាថាយ ៥:១៤–១៦	« ចូរឲ្យពន្លឺរបស់អ្នករាល់គ្នាបានភ្លឺនៅមុខមនុស្សលោកយ៉ាងនោះដែរ » ។
ម៉ាថាយ ១១:២៨–៣០	« អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក » ។
ម៉ាថាយ ១៦:១៥–១៩	ព្រះយេស៊ូវបានមានបន្ទូលថា « ខ្ញុំនឹងឲ្យកូនសោនៃនគរស្ថានសួគ៌ដល់អ្នក » ។
យ៉ូហាន ៧:១៧	« បើអ្នកណាចង់ធ្វើតាមព្រះហឫទ័យទ្រង់ នោះនឹងបានដឹងថាសេចក្តីបង្រៀននេះមកពីព្រះ » ។
ម៉ាថាយ ២២:៣៦–៣៩	« ត្រូវឲ្យស្រឡាញ់ព្រះអម្ចាស់ជាព្រះនៃឯង ។ … ត្រូវឲ្យស្រឡាញ់អ្នកជិតខាងដូចខ្លួនឯង » ។
លូកា ២២:១៩–២០	ព្រះយេស៊ូវគ្រីស្ទបានបង្គាប់ថា ចូរទទួលទានសាក្រាម៉ង់ « ដើម្បីរំឭកពីខ្ញុំចុះ » ។
យ៉ូហាន ១៧:៣	« នេះជាជីវិតដ៏នៅអស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែ១ និងព្រះយេស៊ូវគ្រីស្ទ » ។
លូកា ២៤:៣៦–៣៩	« ដ្បិតខ្មោចគ្មានសាច់ឬឆ្អឹង ដូចជាឃើញខ្ញុំនេះទេ » ។

ពង្រីកការយល់ដឹងរបស់អ្នក

យុទ្ធសាស្ត្រខាងក្រោមនេះអាចជួយអ្នកឲ្យយល់កាន់តែស៊ីជម្រៅអំពីវគ្គបទគម្ពីរចំណេះចំណានខាងគោលលទ្ធិ ។

ជារឿយៗ ទស្សនាវដ្តី ដើម្បីកម្លាំងនៃយុវជន មានរួមបញ្ចូលនូវសកម្មភាពសិក្សាព្រះគម្ពីរមួយ ដែលមានឈ្មោះថា « មួយបន្ទាត់ម្ដងៗ » ដែលក្នុងនោះពាក្យ ឬឃ្លាគន្លឹះមួយចំនួនតូចនៃវគ្គបទគម្ពីរត្រូវបានគេពន្យល់ ឬកំណត់យ៉ាងច្បាស់ ។ ដើម្បីមើលឧទាហរណ៏នៃសកម្មភាព « មួយបន្ទាត់ម្ដងៗ » សូមមើល « Fear Not » ដើម្បីកម្លាំងនៃយុវជន ខែ កុម្ភៈ ឆ្នាំ ២០២១ ទំព័រ ៣២ ។

សូមបង្កើតទំព័រ « មួយបន្ទាត់ម្ដងៗ » ផ្ទាល់ខ្លួនរបស់អ្នកសម្រាប់វគ្គបទគម្ពីរចំណេះចំណានខាងគោលលទ្ធិមួយ ចេញពីពាក់កណ្តាលដំបូងនៃព្រះគម្ពីរសញ្ញាថ្មី ។ សូមពិចារណាប្រើសម្ភារគំនូរសិល្បៈ ដើម្បីជួយអ្នកឲ្យបង្កើតទំព័រនេះតាមរបៀបមួយដែលមើលទៅទាក់ទាញ ។ សូមប្រើការណែនាំខាងក្រោមនេះ ដើម្បីជួយអ្នកឲ្យបង្កើតទំព័ររបស់អ្នក ៖

1. នៅលើក្រដាសទទេមួយ សូមសរសេរពាក្យនៃវគ្គបទគម្ពីរដែលអ្នកបានជ្រើសរើស ។

2. សូមជ្រើសរើសពាក្យ ឬឃ្លាយ៉ាងហោចណាស់ប្រាំ ចេញពីវគ្គបទគម្ពីរនោះដែលអ្នកចង់ផ្តោតលើ ។

3. សូមស្វែងរកនិយមន័យ ការពន្យល់ ឧទាហរណ៍នានា បទគម្ពីរដែលទាក់ទង ឬសេចក្តីថ្លែងការណ៍ដោយថ្នាក់ដឹកនាំសាសនាចក្រ ដែលអាចជួយឲ្យអ្នកយល់កាន់តែច្បាស់អំពីពាក្យ ឬឃ្លាដែលអ្នកបានជ្រើសរើសនោះ ។ សូមសរសេរអ្វីទាំងនេះនៅលើក្រដាស ។

4. សូមរួមបញ្ចូលយ៉ាងហោចណាស់មួយកថាខណ្ឌនៅកន្លែងណាមួយនៅលើទំព័ររបស់អ្នក ដែលពន្យល់ពីអ្វីដែលវគ្គបទគម្ពីរនេះជួយអ្នកឲ្យយល់អំពីព្រះយេស៊ូវគ្រីស្ទ សាសនាចក្ររបស់ទ្រង់ ឬបេសកកម្មរបស់ទ្រង់ដើម្បីសង្គ្រោះយើង ។

ប្រសិនបើពេលវេលាអនុញ្ញាត សូមធ្វើសកម្មភាពនេះឡើងវិញជាមួយវគ្គបទគម្ពីរចំណេះចំណានខាងគោលលទ្ធិមួយទៀតចេញពីបញ្ជីនោះ ។

ចែកចាយការបង្កើតរបស់អ្នក

សូមអញ្ជើញសិស្សឲ្យចែកចាយការបង្កើតរបស់ពួកគេជាមួយដៃគូ ឬក្រុមតូច ហើយពន្យល់ពីអ្វីដែលពួកគេបានរៀនមកពីវគ្គ ដែលពួកគេបានជ្រើសរើសដើម្បីផ្តោតលើនោះ ។ សិស្សដែលស្ម័គ្រចិត្ត អាចចែកចាយការបង្កើតរបស់ពួកគេជាមួយថ្នាក់ទាំងមូល ។