លូកា ១០:២៥–៣៧

សាសន៍សាម៉ារីចិត្តល្អ

The painting depicts the Good Samaritan administering to the beaten and injured man stripped of his clothing. A camel rests behind to the right. The scene takes place in a rocky desert setting reminiscent of the Holy Land.

នៅពេលអ្នកប្រាជ្ញច្បាប់ម្នាក់បានទូលសួរព្រះយេស៊ូវថា « តើអ្នកណាជាអ្នកជិតខាងខ្ញុំ ? » ( លូកា ១០:២៩ ) ព្រះអង្គសង្គ្រោះបានឆ្លើយតបដោយប្រទានពាក្យប្រៀបប្រដូចអំពីសាសន៍សាម៉ារីចិត្តល្អ ។ មេរៀននេះអាចជួយអ្នកឲ្យធ្វើតាមគំរូរបស់ព្រះយេស៊ូវអំពីការស្រឡាញ់អ្នកជិតខាងរបស់ខ្លួន ។

ការគូសចំណាំ និងការកត់ចំណាំនៅក្នុងព្រះគម្ពីរ ។ អែលឌើរ រីឆាដ ជី ស្កត ក្នុងកូរ៉ុមនៃពួកសាវកដប់ពីរនាក់ ( ឆ្នាំ ១៩២៨–២០១៥ ) បានអញ្ជើញយុវជនឲ្យ « គូសចំណាំបទគម្ពីរសំខាន់ៗ … ហើយយោងទៅការគូសចំណាំនោះជាញឹកញាប់ » ( « For Peace at Home » Ensign ឬ Liahona ខែ ឧសភា ឆ្នាំ ២០១៣ ទំព័រ ៣០ ) ។ សូមរកមើលឱកាសដើម្បីអញ្ជើញសិស្សឲ្យគូសចំណាំ និងកត់ចំណាំនៅក្នុងព្រះគម្ពីររបស់ពួកគេ ។ សូមលើកទឹកចិត្តពួកគេឲ្យធ្វើតាមវិធីដែលពួកគេស្រួលយល់ ជាជាងណែនាំពួកគេឲ្យធ្វើតាមវិធីជាក់លាក់ណាមួយ ។

ការរៀបចំរបស់សិស្ស ៖ សូមអញ្ជើញសិស្សឲ្យអាន លូកា ១០:៣០–៣៥ ដោយរកមើលកន្លែងដែលពួកគេឃើញព្រះយេស៊ូវគ្រីស្ទនៅក្នុងពាក្យប្រៀបប្រដូចនេះ ។ សូមឲ្យពួកគេរកមើលកន្លែងដែលពួកគេឃើញខ្លួនឯងនៅក្នុងពាក្យប្រៀបប្រដូចនេះផងដែរ ។

សកម្មភាពរៀនសូត្រដែលអាចមាន

សិស្សអាចទទួលបានអត្ថប្រយោជន៍ពីការរៀនច្រើនជាងមួយថ្នាក់ ដើម្បីសិក្សាពាក្យប្រៀបប្រដូចអំពីសាសន៍សាម៉ារីចិត្តល្អនេះ ។

សកម្មភាពរៀនសូត្របន្ថែមមាននៅក្នុងផ្នែក « សកម្មភាពរៀនសូត្របន្ថែម » នៃមេរៀននេះ ។

ចំពោះសកម្មភាពដូចខាងក្រោម សូមអញ្ជើញសិស្សឲ្យកត់ត្រានៅក្នុងកំណត់ហេតុការសិក្សារបស់ពួកគេ នូវចម្លើយរបស់ពួកគេចំពោះសំណួរខាងក្រោម ។ សូមពិចារណាចែករំលែកបទពិសោធន៍ផ្ទាល់ខ្លួន និងអញ្ជើញអ្នកស្ម័គ្រចិត្តពីរបីនាក់ឲ្យចែករំលែកបទពិសោធន៍របស់ពួកគេផងដែរ ។

ការជួយអ្នកទាំងឡាយដែលខ្វះខាត

សូមគិតអំពីពេលវេលាដែលមាននរណាម្នាក់ជួយអ្នក នៅពេលអ្នកត្រូវការជំនួយ ។

• តើអ្នកគិតថា ហេតុអ្វីបានជាមនុស្សនេះជួយដល់អ្នក ?

• តើអ្នកមានអារម្មណ៍យ៉ាងណាដែរ ដោយសារតែអ្វីដែលមនុស្សម្នាក់នេះបានធ្វើ ?

សូមសញ្ជឹងគិតថា តើអ្នកទំនងជាអាចជួយនរណាម្នាក់ដែលត្រូវការជំនួយឬអត់ ហើយហេតុអ្វីអ្នកអាច ឬមិនអាចជួយពួកគេបាន ។ នៅពេលអ្នកសិក្សា សូមរកមើលសេចក្តីពិតដែលអ្នករៀនអំពីព្រះយេស៊ូវគ្រីស្ទដែលអាចបង្កើនបំណងប្រាថ្នារបស់អ្នក ដើម្បីជួយដល់អ្នកដែលត្រូវការជំនួយ ។

ពាក្យប្រៀបប្រដូចមួយ

ថ្ងៃមួយនៅពេលដែលព្រះយេស៊ូវគ្រីស្ទកំពុងបង្រៀន នោះមានអ្នកប្រាជ្ញច្បាប់ម្នាក់បានទូលសួរទ្រង់ពីអ្វីដែលគាត់ត្រូវធ្វើ ដើម្បីទទួលបានជីវិតដ៏នៅអស់កល្បជានិច្ច ។ ព្រះអង្គសង្គ្រោះបានបង្រៀនថា ដើម្បីទទួលបានជីវិតដ៏នៅអស់កល្បជានិច្ច យើងត្រូវស្រឡាញ់ព្រះឲ្យអស់ពីចិត្ត ហើយស្រឡាញ់អ្នកជិតខាងដូចខ្លួនយើងដែរ ( សូមមើល លូកា ១០:២៧ ) ។ បន្ទាប់មក អ្នកប្រាជ្ញច្បាប់បានទូលសួរសំណួរមួយទៀត ។

សូមអាន លូកា ១០:២៩ និងពិចារណាគូសចំណាំសំណួរដែលអ្នកប្រាជ្ញច្បាប់នោះបានទូលសួរព្រះយេស៊ូវ ។

• តើអ្នកនឹងឆ្លើយសំណួរអ្នកប្រាជ្ញច្បាប់យ៉ាងដូចម្ដេច ?

ព្រះយេស៊ូវបានឆ្លើយតបទៅនឹងសំណួររបស់អ្នកប្រាជ្ញច្បាប់រូបនោះ ដោយបានតំណាលពីពាក្យប្រៀបប្រដូចមួយ ដែលគេស្គាល់ថាជាពាក្យប្រៀបប្រដូចអំពីសាសន៍សាម៉ារីចិត្តល្អ ។ នៅពេលអ្នកសិក្សាពាក្យប្រៀប្រដូចនេះ សូមចងចាំថា ជាទូទៅសាសន៍សាម៉ារី និងសាសន៍យូដាស្អប់គ្នាទៅវិញទៅមក ហើយជារឿយៗ ពួកគេជៀសវាងមិនចង់ទាក់ទងគ្នាទេ ។ មូលហេតុមួយដែលសាសន៍យូដាចាត់ទុកថាសាសន៍សាម៉ារីមិនអាចទទួលយកបាន គឺដោយសារតែសាសន៍សាម៉ារីគឺជាសាសន៍យូដាមួយផ្នែក និងជាសាសន៍ដទៃមួយផ្នែក ហើយពួកគេលាយបញ្ចូលគ្នានូវជំនឿសាសនាទាំងពីរ ។

ការឃើញព្រះអង្គសង្គ្រោះនៅក្នុងពាក្យប្រៀបប្រដូច

សូមអានពាក្យប្រៀបប្រដូចអំពីសាសន៍សាម៉ារីចិត្តល្អនៅក្នុង លូកា ១០:៣០–៣៥ ។ អ្នកក៏អាចមើលវីដេអូ « Parable of the Good Samaritan » ( ៥:១១ ) បានផងដែរ នៅពេលអ្នកអានតាមក្នុងព្រះគម្ពីររបស់អ្នក ។ វីដេអូនេះមាននៅលើគេហទំព័រ ChurchofJesusChrist.org ។

នៅពេលអ្នកសិក្សាពាក្យប្រៀបប្រដូចនេះ សូមគិតអំពីរបៀបដែលសាសន៍សាម៉ារីរូបនេះគឺជានិមិត្តរូបនៃព្រះយេស៊ូវគ្រីស្ទ ។

សូមពិចារណាបង្ហាញរូបភាពនៃព្រះយេស៊ូវគ្រីស្ទ មុននឹងសួរសំណួរខាងក្រោម ៖

• តើយើងអាចរៀនអ្វីខ្លះអំពីព្រះយេស៊ូវគ្រីស្ទចេញពីពាក្យប្រៀបប្រដូចនេះ ? ( សូមពិចារណាសរសេរចម្លើយតបរបស់អ្នកចំពោះសំណួរនេះ នៅក្នុងសៀវភៅកំណត់ហេតុការសិក្សារបស់អ្នក ) ។

អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖

Official portrait of Elder Neil L. Andersen of the Quorum of the Twelve Apostles, 2010, August.

ព្រះអង្គសង្គ្រោះគឺជាសាសន៍សាម៉ារីដ៏សប្បុរសរបស់យើង ដែលត្រូវបានចាត់មក « ដើម្បីនឹងប្រោសមនុស្សដែលមានចិត្តសង្រេង » [ លូកា ៤:១៨ ; សូមមើលផងដែរ អេសាយ ៦១:១ ] ។ ទ្រង់យាងមករកយើង នៅពេលមនុស្សដទៃដើរហួសទៅ ។ ដោយមានការអាណិតអាសូរ ទ្រង់លាបប្រទាលមុខសះនៅលើរបួសយើង ហើយផ្សះឲ្យជា ។ ទ្រង់បីយើងឡើង ។ ទ្រង់ថែទាំយើង ។

( នែល អិល អាន់ឌើរសិន « Wounded » Ensign ឬ Liahona ខែ វិច្ឆិកា ឆ្នាំ ២០១៨ ទំព័រ ៨៥ )

• តើមានឧទាហរណ៍ណាខ្លះនៅក្នុងព្រះគម្ពីរ ដែលបង្ហាញពីអ្វីដែលព្រះអង្គសង្គ្រោះបានធ្វើ ដូចដែលអែលឌើរ អាន់ឌើរសិន បានពិពណ៌នាមក ?

• តើនៅពេលណាដែលព្រះអង្គសង្គ្រោះប្រៀបដូចជាសាសន៍សាម៉ារីចិត្តល្អសម្រាប់អ្នក ?

សូមពិចារណាចែករំលែកបទពិសោធន៍ផ្ទាល់ខ្លួន ដែលអ្នកបានស្គាល់ពីសេចក្ដីមេត្តាករុណា និងឆន្ទៈរបស់ព្រះអង្គសង្គ្រោះក្នុងការជួយដល់អ្នកដែលរងរបួសខាងវិញ្ញាណ ។

ការធ្វើតាមគំរូរបស់ព្រះយេស៊ូវគ្រីស្ទ

បន្ទាប់ពីបានលើកឧទាហរណ៍អំពីសាសន៍សាម៉ារីចិត្តល្អហើយ នោះព្រះយេស៊ូវគ្រីស្ទ ដែលជាគ្រូបង្រៀនដ៏ចំណាន បានសួរអ្នកប្រាជ្ញច្បាប់នូវអ្វីដែលគាត់បានរៀន ហើយបានអញ្ជើញអ្នកប្រាជ្ញច្បាប់នោះឲ្យអនុវត្តតាម ។ សូមអាន លូកា ១០:៣៦–៣៧ ដោយរកមើលការអញ្ជើញរបស់ព្រះអង្គសង្គ្រោះចំពោះអ្នកប្រាជ្ញច្បាប់ម្នាក់នេះ ។

• តើអ្នកអាចអនុវត្តការអញ្ជើញរបស់ព្រះអង្គសង្គ្រោះនេះ នៅក្នុងជីវិតរបស់អ្នកយ៉ាងដូចម្តេច ?

• តើការអញ្ជើញនេះបង្រៀនអ្នកអ្វីខ្លះ អំពីព្រះទ័យរបស់ព្រះអង្គសង្គ្រោះ ចំពោះបុត្រាបុត្រី ទាំងអស់របស់ព្រះវរបិតាសួគ៌ ?

យើងមានឱកាសជាច្រើន ដើម្បីធ្វើតាមដំបូន្មានរបស់ព្រះអង្គសង្គ្រោះដើម្បី « ទៅចុះ ចូរអ្នកប្រព្រឹត្តបែបយ៉ាងដូច្នោះដែរ » ( លូកា ១០:៣៧ ) នៅក្នុងស្ថានភាពផ្សេងៗគ្នាជាច្រើន ដែលយើងឃើញថាខ្លួនឯងកំពុងស្ថិតនៅ ដូចជានៅផ្ទះ នៅសាលា តាមអនឡាញ នៅក្នុងវួដ ឬសាខារបស់យើង និងក្នុងចំណោមមនុស្សដទៃ ។

សូមពិចារណាបំបែកសិស្សជាក្រុមតូចៗដើម្បីពិភាក្សាពីសំណួរខាងក្រោម ។ សូមចាត់តាំងក្រុមនីមួយៗឲ្យផ្ដោតលើស្ថានភាពមួយ ឬច្រើន ដូចដែលបានសរសេរទុកនៅក្នុងកថាខណ្ឌមុន នៅពេលពួកគេឆ្លើយសំណួរទាំងនេះ ។

• តើមានវិធីជាក់លាក់ណាខ្លះ ដែលអ្នកអាចធ្វើតាមគំរូរបស់ព្រះអង្គសង្គ្រោះ ដើម្បីបង្ហាញសេចក្ដីស្រឡាញ់ចំពោះអ្នកជិតខាងរបស់អ្នកនៅក្នុងស្ថានភាពនេះ ?

• តើអ្វីដែលអាចធ្វើឲ្យពិបាកក្នុងការបង្ហាញសេចក្តីស្រឡាញ់ចំពោះអ្នកជិតខាងរបស់អ្នកនៅក្នុងស្ថានភាពនេះ ?

• ប្រសិនបើមនុស្សម្នាក់ពិបាកបង្ហាញសេចក្តីស្រឡាញ់ចំពោះអ្នកជិតខាងរបស់ពួកគេនៅក្នុងស្ថានភាពនេះ តើអ្នកអាចបង្រៀនពួកគេអ្វីខ្លះ អំពីព្រះយេស៊ូវគ្រីស្ទដែលប្រហែលជាអាចជួយពួកគេបាន ?

បន្ទាប់ពីសិស្សបានបញ្ចប់ការពិភាក្សារបស់ពួកគេហើយ សូមអញ្ជើញអ្នកស្ម័គ្រចិត្តមកពីក្រុមនីមួយៗឲ្យឡើងចែករំលែកចម្លើយរបស់ពួកគេខ្លះៗ ។

សូមអញ្ជើញសិស្សឲ្យគិតអំពីអ្វីដែលពួកគេបានរៀននៅក្នុងមេរៀននេះ ។ សូមពិចារណាផ្តល់ពេលវេលាឲ្យពួកគេសរសេរគំនិត និងចំណាប់អារម្មណ៍របស់ពួកគេទុកនៅក្នុងសៀវភៅកំណត់ហេតុការសិក្សារបស់ពួកគេ ។ សូមពិចារណាផ្តល់ឱកាសឲ្យសិស្សចែកចាយនូវអ្វី ដែលពួកគេមានអារម្មណ៍ថាបានបំផុសគំនិតឲ្យធ្វើ ដោយសារតែអ្វីដែលពួកគេបានសិក្សានៅថ្ងៃនេះផងដែរ ។

• តើមានអ្វីខ្លះដែលអ្នកបានមានអារម្មណ៍បំផុសគំនិតឲ្យធ្វើ ចេញពីលទ្ធផលនៃអ្វីដែលអ្នកបានរៀននៅថ្ងៃនេះ ?

វិចារណកថា និង ព័ត៌មានសាច់រឿង

តើពាក្យប្រៀបប្រដូចអំពីសាសន៍សាម៉ារីចិត្តល្អគឺជានិមិត្តរូបនៃដំណើររបស់យើងក្នុងជីវិតនេះយ៉ាងដូចម្តេច ?

អែលឌើរ ហ្គែរីត ដបុលយូ ហ្គង ក្នុងកូរ៉ុមនៃពួកសាវកដប់ពីរនាក់បានបង្រៀន ៖

Official Portrait of Gerrit W. Gong. Photographed in 2018.

នៅលើផ្លូវដ៏ស្មុគស្មាញរបស់យើងទៅកាន់ក្រុងយេរីខូរ យើងត្រូវគេវាយប្រហារ រងរបួស ហើយទុកឲ្យឈឺចាប់ ។

ទោះបីជាយើងត្រូវជួយគ្នាក៏ដោយ ក៏ជាញឹកញាប់យើងឆ្លងទៅផ្លូវផ្សេង ដោយហេតុផលណាមួយ ។

តែដោយក្តីអាណិតអាសូរ នោះសាសន៍សាម៉ារីចិត្តល្អបានឈប់ ហើយរុំរបួសឲ្យយើងដោយប្រើស្រា និងប្រេង ។ និមិត្តរូបនៃពិធីសាក្រាម៉ង់ និងពិធីបរិសុទ្ធដទៃទៀត ស្រា និងប្រេង ចង្អុលយើងទៅកាន់ការព្យាបាលខាងវិញ្ញាណនៅក្នុងព្រះយេស៊ូវគ្រីស្ទ ។ សាសន៍សាម៉ារីចិត្តល្អលើកយើងដាក់លើសត្វលារបស់ទ្រង់ ឬដូចក្នុងដំណើររឿងផ្ទាំងគំនូរនៅលើកញ្ចក់នេះ ទ្រង់លីយើងលើស្មាទ្រង់ ។ ទ្រង់នាំយើងទៅកាន់ផ្ទះសំណាក់ ដែលអាចតំណាងឲ្យសាសនាចក្ររបស់ទ្រង់ ។ នៅផ្ទះសំណាក់នោះ សាសន៍សាម៉ារីចិត្តល្អបាននិយាយថា « សូមមើលថែគាត់ …នោះដល់ខ្ញុំមកវិញ ខ្ញុំនឹងសងអ្នក » [ លូកា ១០:៣៥ ] ។ ជានិមិត្តរូបអំពីព្រះអង្គសង្គ្រោះរបស់យើង សាសន៍សាម៉ារីចិត្តល្អសន្យាថានឹងត្រឡប់មកវិញ លើកនេះមកវិញដោយព្រះចេស្តា និងសិរីរុងរឿង ។

( ហ្គែរីត ដបុលយូ ហ្គង « Room in the Inn » Liahona ខែ ឧសភា ឆ្នាំ ២០២១ ទំព័រ ២៤–២៥ )

ហេតុអ្វីព្រះអង្គសង្គ្រោះប្រើសាសន៍សាម៉ារី មិនប្រើសាសន៍យូដាឲ្យធ្វើជាអ្នកជួយបុរសដែលរងរបួសនោះ ?

ប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានពន្យល់ ៖

Official portrait of President M. Russell Ballard of the Quorum of the Twelve Apostles, 2004.

រវាងពួកសាសន៍យូដា និងពួកសាសន៍សាម៉ារីនៅក្នុងជំនាន់របស់ព្រះយេស៊ូវគ្រីស្ទគឺមាននូវសេចក្ដីស្អប់ខ្ពើមយ៉ាងខ្លាំង ។ ក្នុងកាលៈទេសៈធម្មតា ក្រុមទាំងពីរនេះបានចៀសវាងការសេពគប់គ្នា ។ វានៅតែជាពាក្យប្រៀបប្រដូចដ៏ល្អមួយ ដែលអាចបង្រៀនបានដដែល ប្រសិនបើបុរសដែលធ្លាក់ចូលទៅក្នុងចំណោមក្រុមចោរនោះ ត្រូវបានបងប្រុសសាសន៍យូដាជួយសង្គ្រោះ ។

ចេតនារបស់ទ្រង់ក្នុងការលើកយកពួកសាសន៍យូដា និងពួកសាសន៍សាម៉ារីមកប្រើនេះ បង្រៀនយ៉ាងច្បាស់ថា យើងគ្រប់រូបគឺជាអ្នកជិតខាងនឹងគ្នា ហើយថាយើងគួរស្រឡាញ់ ឲ្យតម្លៃ គោរព ហើយបម្រើដល់គ្នាទៅវិញទៅមក មិនថាយើងមានភាពខុសគ្នាខ្លាំងប៉ុណ្ណាឡើយ—រួមបញ្ចូលទាំងភាពខុសគ្នាខាងសាសនា នយោបាយ និងវប្បធម៌ផងដែរ ។

( អិម រ័សុល បាឡឺដ « Doctrine of Inclusion » Ensign ឬ Liahona ខែ វិច្ឆិកា ឆ្នាំ ២០០១ ទំព័រ ៣៦ )

តើខ្ញុំគួរធ្វើដូចម្តេច នៅពេលឱកាសដើម្បីជួយអ្នកដទៃកើតឡើងក្នុងគ្រាដែលមិនអំណោយផល ?

ប្រធាន អិម រ័សុល បាឡឺដ ដែលជាប្រធានស្តីទីនៅក្នុងកូរ៉ុមនៃពួកសាវកដប់ពីរនាក់បានបង្រៀន ៖

Official portrait of President M. Russell Ballard of the Quorum of the Twelve Apostles, 2004.

ឱកាសដើម្បីបម្រើអ្នកដទៃតាមរបៀបដ៏មានអត្ថន័យ ដូចដែលយើងបានធ្វើសេចក្តីសន្យាថានឹងធ្វើនោះ កម្រកើតមាននៅពេលវេលាអំណោយផលណាស់ ។ ប៉ុន្តែគ្មានអំណាចខាងវិញ្ញាណក្នុងការរស់នៅដោយភាពងាយស្រួលទេ ។ អំណាចកើតឡើងនៅពេលយើងកាន់តាមសេចក្តីសញ្ញារបស់យើង ។

( អិម រ័សុល បាឡឺដ « Like a Flame Unquenchable » Ensign ខែ ឧសភា ឆ្នាំ ១៩៩៩ ទំព័រ ៨៦ )

ប្រធាន ថូម៉ាស អេស ម៉នសុន ( ឆ្នាំ ១៩២៧–២០១៨ ) បានរំឭកយើង ៖

Official portrait of President Thomas S. Monson, 2008.

សូមកុំបណ្តោយឲ្យបញ្ហាដែលត្រូវដោះស្រាយបាន មានសារៈសំខាន់ជាងមនុស្សដែលអ្នកត្រូវស្រឡាញ់ឲ្យសោះ ។

( ថូម៉ាស អេស ម៉នសុន « Finding Joy in the Journey » Ensign ឬ Liahona ខែ វិច្ឆិកា ឆ្នាំ ២០០៨ ទំព័រ ៨៦ )

សកម្មភាពរៀនសូត្របន្ថែម

ភាពស្របគ្នារវាងពាក្យប្រៀបប្រដូចអំពីសាសន៍សាម៉ារីចិត្តល្អ និងផែនការនៃសេចក្ដីសង្គ្រោះ

សូមអញ្ជើញសិស្សឲ្យអាន លូកា ១០:៣០–៣៥ ដោយរកមើលថា តើពាក្យប្រៀបប្រដូចអំពីសាសន៍សាម៉ារីចិត្តល្អអាចជានិមិត្តរូបនៃផែនការនៃសេចក្តីសង្គ្រោះបានយ៉ាងដូចម្តេច ។ និមិត្តសញ្ញាមួយចំនួន រួមមានដូចខាងក្រោម ៖

ការចេញពីក្រុងយេរូសាឡិម ៖ ការចាកចេញពីជីវិតមុនឆាកជីវិតនេះ និងការមកកាន់ផែនដី

បុរសជាក់លាក់ ៖ ពួកយើង

សាសន៍សាម៉ារី ៖ ព្រះយេស៊ូវគ្រីស្ទ

ការធ្វើដំណើរតាមផ្លូវទៅកាន់ក្រុងយេរីខូ ៖ ដំណើរជីវិតរមែងស្លាប់នេះ

សូមអញ្ជើញសិស្សឲ្យពិភាក្សាអំពីមេរៀនអ្វីខ្លះ ដែលពាក្យប្រៀបប្រដូចបង្រៀនអំពីជីវិតរមែងស្លាប់ និងការវិលត្រឡប់ទៅរកព្រះវរបិតាវិញ ។ សូមសួរសំណួរតាមដានដូចជា ៖ តើមានវិធីណាខ្លះ ដែលធ្វើឲ្យយើងមានរបួសខាងវិញ្ញាណក្នុងអំឡុងពេលដែលយើងនៅលើផែនដី ? តើអ្នកធ្លាប់មានបទពិសោធន៍ព្រះអង្គសង្គ្រោះរុំរបួសឲ្យអ្នកតាមរបៀបណាដែរ ?

ចំពោះគំនិតផ្សេងទៀតអំពីវិធី ដែលពាក្យប្រៀបប្រដូចនេះអាចជានិមិត្តរូបនៃផែនការនៃសេចក្តីសង្គ្រោះ សូមមើល ចន ដបុលយូ វែល « The Good Samaritan: Forgotten Symbols » Ensign ខែ កុម្ភៈ ឆ្នាំ ២០០៧ ទំព័រ ៤០–៤៧ ។

សូមសិក្សាពាក្យប្រៀបប្រដូចនេះចេញពីទស្សនវិស័យរបស់សង្ឃ និងពួកលេវី

សូមពិចារណាអញ្ជើញសិស្សឲ្យសិក្សាពាក្យប្រៀបប្រដូចនេះចេញពីទស្សនវិស័យរបស់សង្ឃ និងពួកលេវី ។ សូមអញ្ជើញពួកគេឲ្យគិតអំពីមូលហេតុដែលអាចទៅរួចខ្លះ ដែលពួកសង្ឃ និងពួកលេវីមិនព្រមឈប់ ហើយជួយបុរសដែលខ្វះខាតនោះ ។

សូមឲ្យសិស្សប្រៀបធៀបហេតុផលដែលអាចមានទាំងនេះ ទៅនឹងការឆ្លើយតបផ្ទាល់របស់ពួកគេចំពោះឱកាសទាំងឡាយដើម្បីបម្រើ ។ សូមអញ្ជើញសិស្សឲ្យសញ្ជឹងគិតពីរបៀប ដែលពួកគេអាចជម្នះលើឧបសគ្គផ្ទាល់ខ្លួនដើម្បីស្រឡាញ់ និងបម្រើអ្នកជិតខាងរបស់ពួកគេ ។

ការរៀនសូត្រនៅពេលយើងមកដល់ផ្ទះសំណាក់របស់ព្រះអម្ចាស់ ( សាសនាចក្រ )

អែលឌើរ ហ្គែរីត ដបុលយូ ហ្គង ក្នុងកូរ៉ុមនៃពួកសាវកដប់ពីរនាក់បានប្រៀបធៀបផ្ទះសំណាក់នៅក្នុងពាក្យប្រៀបប្រដូចអំពីសាសន៍សាម៉ារីចិត្តល្អ ទៅនឹងសាសនាចក្ររបស់ព្រះអម្ចាស់ ( សូមមើល « Room in the Inn » Liahona ខែ ឧសភា ឆ្នាំ ២០២១ ទំព័រ ២៤–២៥ ) ។ លោកបានផ្តល់យោបល់ថា យើងអាចរៀនមេរៀនសំខាន់ៗអំពីខ្លួនយើង និងព្រះយេស៊ូវគ្រីស្ទ នៅពេលយើងមកដល់ផ្ទះសំណាក់របស់ទ្រង់ ។ សូមពិចារណាជ្រើសរើស និងអញ្ជើញសិស្សឲ្យសិក្សាផ្នែកខ្លះនៃសុន្ទរកថានេះ ដើម្បីស្វែងយល់បន្ថែមអំពីរបៀបដែលពួកគេអាចជួយអ្នកដទៃឲ្យទទួលបាននូវការព្យាបាល ដែលព្រះអង្គសង្គ្រោះប្រទានឲ្យដោយការអញ្ជើញពួកគេឲ្យមកសាសនាចក្ររបស់ទ្រង់ ។