ម៉ាថាយ ១៩:១–១២

អាពាហ៍ពិពាហ៍គឺត្រូវបានតែងតាំងមកពីព្រះ

ព្រះយេស៊ូវគ្រីស្ទបានឆ្លើយសំណួរ ហើយបង្រៀនសេចក្ដីពិតអំពីអាពាហ៍ពិពាហ៍ និងការលែងលះ ។ មេរៀននេះអាចជួយអ្នកឲ្យយល់ពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទបានប្រទានវិធីមួយ ដើម្បីជួយអ្នកឲ្យមានអាពាហ៍ពិពាហ៍ដ៏រីករាយ និងនៅអស់កល្បជានិច្ចនៅថ្ងៃអនាគតរបស់អ្នក ។

ការស្គាល់សិស្សរបស់អ្នក ។ នៅពេលអ្នកស្គាល់សិស្សម្នាក់ៗ នោះអ្នកនឹងរៀបចំមេរៀនបានកាន់តែប្រសើរ ហើយយល់ពីពួកគេម្នាក់ៗ ។ សូមពិចារណាជាមុនថា តើសេចក្តីថ្លែងការណ៍ ឬប្រធានបទណា ដែលអាចប៉ះពាល់សិស្សមួយចំនួន ។ នៅពេលអ្នកបង្រៀនគោលលទ្ធិពិត សូមខិតខំបង្រៀនដោយសេចក្ដីស្រឡាញ់ និងការយកចិត្តទុកដាក់ចំពោះសិស្សម្នាក់ៗ ។

ការរៀបចំរបស់សិស្ស ៖ សូមអញ្ជើញសិស្សឲ្យគិតអំពីអ្វីដែលពួកគេអាចធ្វើបាននាពេលឥឡូវនេះ ដើម្បីរៀបចំសម្រាប់អាពាហ៍ពិពាហ៍ដ៏រីករាយមួយ ។ សូមលើកទឹកចិត្តពួកគេឲ្យស្វែងរកដំបូន្មានពីនរណាម្នាក់ដែលពួកគេស្គាល់ ដែលមានអាពាហ៍ពិពាហ៍ដ៏រីករាយ និងសុចរិត ។

សកម្មភាពរៀនសូត្រដែលអាចមាន

អាពាហ៍ពិពាហ៍គឺជាផ្នែកមួយនៃផែនការរបស់ព្រះ

សូមយករង្វង់កង់មួយមកថ្នាក់រៀន ឬបង្ហាញរូបភាពកង់ ហើយសួរសំណួរដូចខាងក្រោមនេះ ។ ( វត្ថុណាក៏ដោយដែលមានចំណុចកណ្តាលដែលសំខាន់ចំពោះមុខងាររបស់វាអាចយកមកប្រើបាន ) ។

• តើនឹងមានអ្វីកើតឡើងចំពោះកង់នេះ ប្រសិនបើដុំកង់ ( ចំណុចកណ្តាលរបស់កង់ ) ត្រូវបានដកចេញនោះ ?

សូមអានកថាខណ្ឌទីមួយនៃ « ក្រុមគ្រួសារ ៖ ការប្រកាសដល់ពិភពលោក » ( នៅលើគេហទំព័រ ChurchofJesusChrist.org ) ដោយស្វែងរកអ្វីដែលសំខាន់ចំពោះផែនការនៃសេចក្ដីសង្គ្រោះរបស់ព្រះវរបិតាសួគ៌ ។

យើងជាគណៈប្រធានទីមួយ និងក្រុមប្រឹក្សានៃពួកសាវកដប់ពីរនាក់នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ សូមប្រកាសជាឱឡារិកថា អាពាហ៍ពិពាហ៍រវាងបុរស និងស្ត្រី គឺត្រូវបានតែងតាំងឡើងដោយព្រះ ហើយថាគ្រួសារជាផ្នែកដ៏សំខាន់មួយនៅក្នុងផែនការរបស់ព្រះដ៏បង្កបង្កើតសម្រាប់គោលដៅដ៏នៅអស់កល្បជានិច្ចនៃកូនចៅរបស់ទ្រង់ ។

( « ក្រុមគ្រួសារ ៖ ការប្រកាសដល់ពិភពលោក » នៅលើគេហទំព័រ ChurchofJesusChrist.org )

• តើតួនាទីរបស់ក្រុមគ្រួសារនៅក្នុងផែនការរបស់ព្រះអាចប្រៀបធៀបទៅនឹងដុំកង់មួយដោយរបៀបណា ?

• តើអ្នកគិតថា វាមានន័យដូចម្ដេចដែលថាអាពាហ៍ពិពាហ៍គឺត្រូវ « បានតែងតាំងមកពីព្រះ » ?

• តើឃ្លាខាងក្រោមនេះមួយណា ដែលពិពណ៌នាអំពីអារម្មណ៍បច្ចុប្បន្នរបស់អ្នកចំពោះអាពាហ៍ពិពាហ៍ ? ( សូមជ្រើសរើសរាល់ចម្លើយដែលត្រឹមត្រូវ ) ។

សូមពិចារណាបង្ហាញជម្រើសខាងក្រោមនេះ ឬប្រើឧបករណ៍ស្ទង់មតិនៅលើអ៊ីនអឺណិត ដើម្បីឲ្យសិស្សជ្រើសរើសចម្លើយ ( ទាំងឡាយ ) របស់ពួកគេ ។

• រំភើប—« ខ្ញុំទន្ទឹងរង់ចាំដល់ពេលវេលាដែលនឹងមកដល់ » ។

• ភ័យណាស់—« តើខ្ញុំនឹងរកឃើញដៃគូដ៏នៅអស់កល្បដែរឬទេ ? »

• បារម្ភ—« ខ្ញុំឃើញអាពាហ៍ពិពាហ៍អភ័ព្វ និងការលែងលះច្រើនពេក » ។

• ច្របូកច្របល់—« មានមតិផ្សេងគ្នាជាច្រើនអំពីអាពាហ៍ពិពាហ៍ » ។

សូមទុកពេលខ្លះឲ្យសិស្សចែកចាយគំនិត និងអារម្មណ៍របស់ពួកគេអំពីអាពាហ៍ពិពាហ៍ ។ ការដឹងពីអារម្មណ៍របស់ពួកគេ អាចនាំទៅរកការសម្របមេរៀនឲ្យកាន់តែមានប្រសិទ្ធភាព ។

អាពាហ៍ពិពាហ៍មានន័យថាអស់កល្បជានិច្ច

នៅសម័យព្រះគម្ពីរសញ្ញាថ្មី មនុស្សមួយចំនួនបានប្រកែកថា ក្រឹត្យវិន័យរបស់ម៉ូសេបានគាំទ្រដល់ការលែងលះ ដោយសារហេតុផលតូចតាច ឬអាត្មានិយមក៏ដោយ ។ ព្រះអង្គសង្គ្រោះបានបង្រៀនសេចក្ដីពិតសំខាន់ៗអំពីអាពាហ៍ពិពាហ៍ ដើម្បីឆ្លើយតបនឹងសំណួរពីសំណាក់ពួកផារិស៊ីអំពីការលែងលះ ។ នៅពេលអ្នកសិក្សាពីការបង្រៀនរបស់ទ្រង់ សូមសញ្ជឹងគិតពីរបៀបដែលអ្នកអាចទុកចិត្តលើការបង្រៀនរបស់ព្រះអង្គសង្គ្រោះអំពីអាពាហ៍ពិពាហ៍ ទោះបីជាវាខុសពីអ្វីដែលពិភពលោកបង្រៀនក៏ដោយ ។

សូមអាន ម៉ាថាយ ១៩:៣–៨ ។ សូមគូសចំណាំពាក្យ ឬឃ្លាដែលបង្ហាញពីរបៀបដែលព្រះអម្ចាស់ទតមើលទៅអាពាហ៍ពិពាហ៍ ។ សូមកត់ចំណាំថា « លែងប្រពន្ធ » នៅក្នុងខគម្ពីរទាំងនេះមានន័យថា ការលែងលះ ឯ « ពង្រាត់មនុស្ស » មានន័យថាបែកពីគ្នា ហើយ « ពីដើមមក » មានន័យថា ដូចដែលត្រូវបានបង្កើតឡើងដោយព្រះនៅពេលបង្កើតពិភពលោកនេះ ។

• តើសេចក្ដីពិតអ្វីខ្លះដែលព្រះយេស៊ូវគ្រីស្ទបានបង្រៀនអំពីអាពាហ៍ពិពាហ៍ និងការលែងលះ ដែលអ្នកប្រាថ្នាចង់ឲ្យមនុស្សកាន់តែច្រើនក្នុងពិភពលោកនេះបានយល់ ? ហេតុអ្វីទៅ ?

• តើឃ្លាជាក់លាក់អ្វីខ្លះនៅក្នុងវគ្គបទគម្ពីរនេះ ដែលជួយអ្នកឲ្យយល់ពីអ្វីដែលព្រះយេស៊ូវបានបង្រៀន ?

• ប្រសិនបើអ្នកអាចសួរសំណួរព្រះអង្គសង្គ្រោះអំពីអាពាហ៍ពិពាហ៍ និងគ្រួសារ ដូចមនុស្សបានធ្វើនៅក្នុង ម៉ាថាយ ១៩ តើអ្នកចង់ដឹងអ្វីខ្លះ ?

សូមពិចារណាសរសេរលើក្ដារខៀននូវសំណួរមួយចំនួនដែលសិស្សមាន ។

សេចក្តីពិតមួយដែលយើងអាចរៀនមកពីការបង្រៀនរបស់ព្រះអង្គសង្គ្រោះគឺថា អាពាហ៍ពិពាហ៍រវាងបុរសម្នាក់ និង ស្ត្រីម្នាក់ គឺជាទំនាក់ទំនងដ៏ពិសិដ្ឋមួយដែលព្រះបានបង្កើតឡើង ហើយមានន័យថាស្ថិតស្ថេរជារៀងរហូត ។

• តើសេចក្ដីពិតនេះអាចជួយឆ្លើយសំណួរខ្លះរបស់អ្នក ឬសំណួរដែលមនុស្សផ្សេងទៀតក្នុងពិភពលោកមានអំពីអាពាហ៍ពិពាហ៍យ៉ាងដូចម្ដេច ?

ព្រះវរបិតាសួគ៌សព្វព្រះទ័យឲ្យអាពាហ៍ពិពាហ៍ស្ថិតស្ថេរជារៀងរហូត ។ ខណៈពេលដែលការលែងលះគឺជារឿងធម្មតានៅក្នុងពិភពលោកសព្វថ្ងៃនេះនោះប្រធាន ដាល្លិន អេក អូក បានបង្រៀនថា « សម្រាប់បញ្ហាអាពាហ៍ពិពាហ៍ភាគច្រើន ដំណោះស្រាយមិនមែនជាការលែងលះទេ ប៉ុន្តែជាការប្រែចិត្តទៅវិញទេ » ( « Divorce » Ensign ឬ Liahona ខែ ឧសភា ឆ្នាំ ២០០៧ ទំព័រ ៧១ ) ។ ព្រះវរបិតាសួគ៌របស់យើងបានធ្វើឲ្យអាពាហ៍ពិពាហ៍អាចនៅអស់កល្បជានិច្ចបាន ហើយធ្វើឲ្យគូស្វាមីភរិយាមានសុភមង្គល និងពេញលេញ នៅពេលពួកគេខិតខំរក្សាសេចក្ដីសញ្ញារបស់ពួកគេ រស់នៅតាមការបង្រៀនរបស់ព្រះអង្គសង្គ្រោះ និងអនុវត្តតាមគោលការណ៍នៃការប្រែចិត្តជាទៀងទាត់ ។ ជាអកុសល ពេលខ្លះការលែងលះគឺចាំបាច់ ។ ដូចដែលប្រធាន ហ្គរដុន ប៊ី ហ៊ិងគ្លី ( ឆ្នាំ ១៩១០–២០០៨ ) បានពន្យល់ថា « វាប្រហែលជាមានមូលហេតុស្របច្បាប់ម្ដងហើយម្ដងទៀតសម្រាប់ការលែងលះ » ( « What God Hath Joined Together » Ensign ខែ ឧសភា ឆ្នាំ ១៩៩១ ទំព័រ ៧៤ ) ។ ខណៈពេលដែលយើងគួរតែគេចពីការវិនិច្ឆ័យលើការសម្រេចចិត្តរបស់អ្នកដទៃ នោះយើងម្នាក់ៗអាចរៀបចំខ្លួនយើងឲ្យបានកាន់តែប្រសើរឡើងសម្រាប់អាពាហ៍ពិពាហ៍នាពេលអនាគត ដែលនឹងស្ថិតស្ថេរជារៀងរហូតបាន តាមរយៈការទុកចិត្តលើព្រះវរបិតាសួគ៌ និងព្រះរាជបុត្រារបស់ទ្រង់ ហើយរៀនធ្វើតាមទ្រង់ទាំងទ្វេដោយអស់ពីចិត្តរបស់យើង ។

• តើអ្នករៀនបានអ្វីខ្លះអំពីព្រះវរបិតាសួគ៌ ដោយដឹងថាទ្រង់សព្វព្រះទ័យឲ្យអាពាហ៍ពិពាហ៍ស្ថិតស្ថេរជារៀងរហូត ?

សូមជ្រើសរើសសកម្មភាពដែលនៅសេសសល់ណាមួយ ដែលមានប្រយោជន៍បំផុតសម្រាប់សិស្សសមស្របតាមពេលវេលាដែលមាន ។

សូមប្រើធនធានមួយចំនួនខាងក្រោម ដើម្បីស្វែងរកសេចក្ដីពិតបន្ថែមទៀត ដែលជួយឆ្លើយសំណួរដែលអ្នក ឬមនុស្សដទៃទៀតអាចមានអំពីអាពាហ៍ពិពាហ៍ ។ សូមសញ្ជឹងគិតពីរបៀបដែលចំណេះដឹងរបស់អ្នកអំពីផែនការនៃសេចក្តីសង្គ្រោះជួយឆ្លើយសំណួរខ្លះៗបាន ។ សូមរៀចំខ្លួនចែកចាយអ្វីដែលអ្នកបានរៀនសូត្រ ។

សូមពិចារណាផ្តល់ដល់សិស្សនូវធនធានបន្ថែមមួយចំនួន ដែលមាននៅក្នុងផ្នែក « វិចារណកថា និង ព័ត៌មានសាច់រឿង » នៃមេរៀននេះ ។ សិស្សអាចធ្វើការជាមួយដៃគូ ឬជាក្រុមតូចមួយសម្រាប់សកម្មភាពនេះ ។

• « ក្រុមគ្រួសារ ៖ ការប្រកាសដល់ពិភពលោក »

• វគ្គចំណេះចំណានខាងគោលលទ្ធិដូចតទៅនេះ ៖ លោកុប្បត្តិ ២:២៤ ; កូរិនថូស ទី១ ១១:១១ ; អាលម៉ា ៣៩:៩ ; គោលលទ្ធិ និង សេចក្តីសញ្ញា ៤៩:១៥–១៧ ; ១៣១:១–៤

• សុន្ទរកថាសន្និសីទទូទៅ ឬវីដេអូសាសនាចក្រដែលបង្រៀនអំពីអាពាហ៍ពិពាហ៍ ( ស្វែងរកនៅលើគេហទំព័រ ChurchofJesusChrist.org ឬនៅក្នុងលិបិក្រមប្រធានបទនៃច្បាប់សន្និសីទទូទៅក្នុង Liahona )

• ដៃគូស្នេហាដែលអាចជឿទុកចិត្តបានដែលរៀបការដោយសុភមង្គល ដែលអ្នកអាចទាក់ទងទៅបានក្នុងអំឡុងពេលរៀនមេរៀននេះ

បន្ទាប់ពីសិស្សមានពេលខ្លះដើម្បីសិក្សាហើយ សូមអញ្ជើញពួកគេឲ្យចែកចាយអ្វីដែលពួកគេបានរៀនតាមរបៀបមួយ ដែលអនុញ្ញាតឲ្យពួកគេស្ដាប់ឮសេចក្ដីពិតជាច្រើន ។ ជាឧទាហរណ៍ សិស្សអាចដើរជុំវិញបន្ទប់ដោយចែកចាយអ្វីដែលពួកគេបានរៀនជាមួយនឹងមិត្តរួមថ្នាក់ ឲ្យបានច្រើនតាមតែអាចធ្វើទៅបានក្នុងរយៈពេលវេលាដែលបានកំណត់ ។

ការរៀនពីគំរូដ៏សុចរិត

ប៉ុលបានចង្អុលទៅសេចក្ដីស្រឡាញ់របស់ព្រះអង្គសង្គ្រោះសម្រាប់សាសនាចក្រ ថាជាឧទាហរណ៍នៃសេចក្ដីស្រឡាញ់ដែលគួរមាននៅក្នុងចំណងអាពាហ៍ពិពាហ៍ ។ សូមអាន អេភេសូរ ៥:២៥ ហើយស្រមៃមើលថា តើអាពាហ៍ពិពាហ៍នឹងទៅជាយ៉ាងណា ប្រសិនបើស្វាមី និងភរិយាយកចិត្តទុកដាក់ចំពោះគ្នាទៅវិញទៅមកតាមរបៀបដែលព្រះអង្គសង្គ្រោះយកចិត្តទុកដាក់ចំពោះសមាជិកនៃសាសនាចក្ររបស់ទ្រង់នោះ ។

ការផ្តោតទៅលើគំរូនៃអ្នកដែលមានអាពាហ៍ពិពាហ៍សុចរិតអាចពង្រឹងសេចក្ដីជំនឿរបស់យើងថា ព្រះនឹងផ្តល់ពរជ័យនេះដល់អស់អ្នកដែលស្វែងរកវាដោយស្មោះត្រង់ បើទោះបីជាអ្នកខ្លះត្រូវរង់ចាំពរជ័យនេះរហូតដល់បន្ទាប់ពីជីវិតរមែងស្លាប់របស់ពួកគេក៏ដោយ ។

សូមពិចារណាអញ្ជើញស្វាមីភរិយាមួយគូពីស្តេកឲ្យជួយបង្រៀនមេរៀននេះ ឆ្លើយសំណួរ ឬថ្លែងទីបន្ទាល់អំពីអំណរដែលកើតឡើងតាមរយៈការធ្វើតាមការបង្រៀនរបស់ព្រះយេស៊ូវគ្រីស្ទនៅក្នុងចំណងអាពាហ៍ពិពាហ៍របស់ពួកគេ ។

អ្នកប្រហែលជាចង់មើលវីដេអូ « Expressions of Love » ( ៣:២៦ ) ដែលមាននៅលើគេហទំព័រ ChurchofJesusChrist.org ដោយរកមើលសេចក្តីអំណរដែលអាចកើតមានតាមរយៈអាពាហ៍ពិពាហ៍ដ៏សុចរិត និងពេញដោយសេចក្តីស្រឡាញ់ ។

• តើនរណាជាគំរូដល់អ្នកក្នុងការបង្កើតអាពាហ៍ពិពាហ៍ដ៏រីករាយ និងសុចរិត ? តើគុណលក្ខណៈដូចជាព្រះគ្រីស្ទអ្វីខ្លះ ដែលបានជួយពួកគេឲ្យបង្កើតឲ្យមានអាពាហ៍ពិពាហ៍ដែលពួកគេរីករាយពេញចិត្តនោះ ?

• ហេតុអ្វីបានជាវាសំខាន់សម្រាប់អ្នកដើម្បីរៀបចំនាពេលឥឡូវនេះសម្រាប់អាពាហ៍ពិពាហ៍នាពេលអនាគតរបស់អ្នក ?

សូមពិចារណាចែកចាយឧទាហរណ៍នៃអាពាហ៍ពិពាហ៍ដ៏រីករាយ ហើយអញ្ជើញសិស្សឲ្យចែកចាយនូវអ្វីដែលពួកគេបានរៀន តាមរយៈការអញ្ជើញនៅក្នុងការរៀបចំរបស់សិស្សសម្រាប់មេរៀននេះ ។

សូមសញ្ជឹងគិតពីអ្វីដែលអ្នកបានរៀននៅក្នុងមេរៀននេះ អំពីតួនាទីនៃអាពាហ៍ពិពាហ៍នៅក្នុងផែនការរបស់ព្រះ និងពីអារម្មណ៍របស់អ្នក នៅពេលអ្នកទន្ទឹងរង់ចាំអនាគតរបស់អ្នក ។

• តើអ្នកនឹងធ្វើអ្វីខ្លះនាពេលនេះ ដើម្បីរៀបចំខ្លួនអ្នកសម្រាប់អាពាហ៍ពិពាហ៍ដ៏នៅអស់កល្បជានិច្ចមួយ ?

• តើអ្នកអាចធ្វើអ្វីខ្លះ ដើម្បីទទួលបានជំនួយពីព្រះអង្គសង្គ្រោះដើម្បីរៀបចំខ្លួន ?

វិចារណកថា និង ព័ត៌មានសាច់រឿង

តើមានអ្វីកើតឡើងចំពោះមនុស្សស្មោះត្រង់ ដែលមិនមានឱកាសរៀបអាពាហ៍ពិពាហ៍ដ៏នៅអស់កល្បជានិច្ចក្នុងជីវិតនេះ ?

អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានថ្លែង ៖

បងប្អូនមួយចំនួនបានបដិសេធពរជ័យនៃអាពាហ៍ពិពាហ៍ដោយមូលហេតុជាច្រើន រួមទាំងការខ្វះការរំពឹងទុកស័ក្ដិសម ការស្រឡាញ់ភេទដូចគ្នា ពិការភាពខាងរូបកាយ និងខាងសតិអារម្មណ៍ ឬការខ្លាចនឹងភាពបរាជ័យ ដែលគ្របបាំងសេចក្ដីជំនឿមួយរយៈពេល ។ …

… ដោយទំនុកចិត្ត យើងថ្លែងទីបន្ទាល់ថា ដង្វាយធួននៃព្រះយេស៊ូវគ្រីស្ទ បានរំពឹងរង់ចាំជាមុន ហើយនៅទីបំផុត នឹងបង់សងរាល់ការខូចខាត និងការខ្វះខាត និងការបាត់បង់ទាំងអស់ចំពោះអ្នកទាំងឡាយដែលងាកទៅរកទ្រង់ ។ គ្មាននរណាម្នាក់ត្រូវបានតាំងជាមុនដើម្បីទទួលតិចជាងនូវអ្វីៗទាំងអស់ដែលព្រះបិតាមានសម្រាប់កូនចៅរបស់ទ្រង់ឡើយ ។

( ឌី ថត គ្រីស្តូហ្វឺសិន « Why Marriage, Why Family » Ensign ឬ Liahona ខែ ឧសភា ឆ្នាំ ២០១៥ ទំព័រ ៥២ )

តើព្រះអម្ចាស់បានបង្រៀនអ្វីខ្លះ អំពីការដាក់អាពាហ៍ពិពាហ៍ភេទដូចគ្នាឲ្យស្របច្បាប់ ?

ប្រធាន រ័សុល អិម ណិលសុន បានបង្រៀន ៖

ក្នុងនាមជាសមាជិកសាសនាចក្រ យើងគោរពច្បាប់នៃដែនដី ហើយធ្វើតាមច្បាប់ទាំងនោះ រួមទាំងអាពាហ៍ពិពាហ៍ស៊ីវិលផងដែរ ។ សេចក្ដីពិតគឺថា ទោះជាយ៉ាងណាក៏ដោយ តាំងពីដើមមក—តាំងពីដើមមក—អាពាហ៍ពិពាហ៍ត្រូវបានតាំងឡើងដោយព្រះ ! ហើយរហូតមកដល់សព្វថ្ងៃនេះ អាពាហ៍ពិពាហ៍រវាងបុរសម្នាក់ និងស្រ្តីម្នាក់ត្រូវបានកំណត់ដោយទ្រង់ ។ ព្រះពុំបានផ្លាស់ប្ដូរនិយមន័យ របស់ទ្រង់ អំពីអាពាហ៍ពិពាហ៍នោះទេ ។

( រ័សុល អិម ណិលសុន « The Love and Laws of God » [ ការប្រជុំធម្មនិដ្ឋានសាកលវិទ្យាល័យ ព្រិកហាំ យ៉ង់ ថ្ងៃទី ១៧ ខែ កញ្ញា ឆ្នាំ ២០១៩ ] នៅលើគេហទំព័រ speeches.byu.edu )

តើខ្ញុំអាចធ្វើអ្វីបាននៅពេលនេះ ដើម្បីជួយខ្ញុំឲ្យរកឃើញស្វាមី ឬភរិយាដ៏ល្អម្នាក់ នៅពេលដែលវេលាល្អមកដល់នោះ ?

ប្រធាន ថាត អរ ខាលីស្ទើរ អតីតប្រធានសាលាថ្ងៃអាទិត្យទូទៅ បានចែកចាយវិធីមួយដែលអាចធ្វើទៅបានដើម្បីឆ្លើយសំណួរនេះ ជាមួយនឹងអ្វីមួយដែលម្ដាយរបស់លោកបានបង្រៀនលោក នៅពេលលោកមានអាយុប្រហែល ១៧ ឆ្នាំ ៖

គាត់បាននិយាយថា « ថាត តើកូនកំពុងទូលសុំព្រះអម្ចាស់ឲ្យជួយកូនរកបានភរិយាដ៏ល្អម្នាក់ឬ ? »

… ខ្ញុំបានឆ្លើយតបថា « ទេ » គាត់ក៏បានតបថា « មែនហើយ កូនគួរអធិស្ឋានសុំបែបនោះ ព្រោះអី វាជាការសម្រេចចិត្តយ៉ាងសំខាន់បំផុត ដែលកូននឹងធ្វើក្នុងជីវិត » ។ ពាក្យសម្ដីទាំងនោះបានជ្រួតជ្រាបក្នុងដួងចិត្តខ្ញុំ យ៉ាងជ្រៅ ដូច្នេះហើយក្នុងរយៈពេលប្រាំមួយឆ្នាំក្រោយ ខ្ញុំបានអធិស្ឋានសុំព្រះឲ្យជួយខ្ញុំរកបានភរិយាដ៏ល្អម្នាក់ ។ ហើយ មើលចុះ ទ្រង់បានឆ្លើយតបនឹងការអធិស្ឋាននោះ ។

( ថាត អរ ខាលីស្ទើរ « Parents: The Prime Gospel Teachers of Their Children » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ៣៣ )

ម៉ាថាយ ១៩:៩ ។ តើវាមិនអីទេឬ បើរៀបការម្ដងទៀតក្រោយការលែងលះ ?

ប្រធាន ដាល្លិន អេក អូក នៃគណៈប្រធានទីមួយបានថ្លែង ៖

ប្រភេទនៃអាពាហ៍ពិពាហ៍ដែលតម្រូវឲ្យមានការលើកតម្កើងឡើង—ដ៏នៅអស់កល្បជានិច្ចនៅក្នុងពេលវេលា និងមានលក្ខណៈដូចជាព្រះនៅក្នុងគុណភាព—មិនមែនគិតអំពីការលែងលះនោះទេ ។ … [ ប៉ុន្តែ ] ដោយសារតែ « ចិត្ត [ របស់យើងរាល់គ្នា ] រឹងរបឹង » [ ម៉ាថាយ ១៩:៨ ] នោះព្រះអម្ចាស់មិនបានបង្គាប់ឲ្យមានផលវិបាកនៃបទដ្ឋានសេឡេស្ទាលនោះទេនាពេលថ្មីៗនេះ ។ ទ្រង់អនុញ្ញាតឲ្យមនុស្សដែលលែងលះគ្នារៀបការម្ដងទៀតបាន តែពុំត្រូវប្រឡូកប្រឡាក់នៃភាពអសីលធម៌ ដែលបានបញ្ជាក់នៅក្នុងក្រឹត្យវិន័យជាន់ខ្ពស់នោះទេ ។

( ដាល្លិន អេក អូក « Divorce » Ensign ឬ Liahona ខែ ឧសភា ឆ្នាំ ២០០៧ ទំព័រ ៧០ )

តើសេចក្ដីជំនឿរបស់ខ្ញុំទៅលើព្រះអង្គសង្គ្រោះអាចជួយខ្ញុំបានយ៉ាងដូចម្ដេច នៅពេលខ្ញុំស្វែងរកដៃគូដ៏នៅអស់កល្បនោះ ?

អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖

សូមជឿថា សេចក្ដីជំនឿរបស់អ្នកមាន សារៈសំខាន់ ជាខ្លាំងចំពោះស្នេហារបស់អ្នក ព្រោះវាពិតជាសំខាន់មែន ។ វាគឺជាគ្រោះថ្នាក់ខាងវិញ្ញាណ នៅពេលយើងគិតថា សេចក្ដីជំនឿ និងការដើរលេងជាគូគឺជារឿងពីរដាច់ពីគ្នានៅក្នុងជីវិតនៃភាពជាសិស្សរបស់អ្នក ។ ឬអាចនិយាយជាវិជ្ជមានជាងនេះទៅទៀតថា ព្រះយេស៊ូវគ្រីស្ទ ដែលជាពន្លឺនៃលោកិយ គឺជាចង្កៀងតែមួយគត់ដែលអ្នកអាចមើលឃើញផ្លូវនៃសេចក្ដីស្រឡាញ់ និងសុភមង្គលដ៏ជោគជ័យសម្រាប់អ្នក និង សម្រាប់គូស្នេហ៍របស់អ្នក ។

( ជែហ្វ្រី អ័រ ហូឡិន « How Do I Love Thee? » [ ការប្រជុំធម្មនិដ្ឋានសាកលវិទ្យាល័យ ព្រិកហាំ យ៉ង់ ថ្ងៃទី ១៥ ខែ កុម្ភៈ ឆ្នាំ ២០០០ ] នៅលើគេហទំព័រ speeches.byu.edu )