ម៉ាថាយ ២១:១២–១៦

ព្រះយេស៊ូវសម្អាតព្រះវិហារបរិសុទ្ធ

ខណៈនៅក្រុងយេរូសាឡិមក្នុងអំឡុងសប្តាហ៍ចុងក្រោយនៃព្រះជន្មរបស់ទ្រង់ ព្រះយេស៊ូវបានសម្អាតព្រះវិហារបរិសុទ្ធជាលើកទីពីរ ហើយបានប្រោសអស់អ្នកដែលមកឯទ្រង់ ។ មេរៀននេះនឹងជួយអ្នកឲ្យមានអារម្មណ៍ថាមានបំណងប្រាថ្នាកាន់តែខ្លាំងឡើងក្នុងការចាត់ទុកព្រះវិហារបរិសុទ្ធជាកន្លែងពិសិដ្ឋមួយដែលអ្នកអាចទទួលអារម្មណ៍ពីសេចក្ដីស្រឡាញ់របស់ព្រះអង្គសង្គ្រោះ និងពង្រឹងសេចក្ដីជំនឿរបស់អ្នកលើទ្រង់បាន ។

ការជួយសិស្សឲ្យបំពេញតួនាទីរបស់ពួកគេ ។ នៅពេលអ្នករៀបចំមេរៀននីមួយៗសូមបន្តផ្តោតលើតួនាទីសិស្សរបស់អ្នកក្នុងការរៀនសូត្រផ្ទាល់ខ្លួនរបស់ពួកគេ ។ ជាជាងគ្រាន់តែសួរថា « តើខ្ញុំនឹងធ្វើអ្វីក្នុងថ្នាក់ថ្ងៃនេះ ? » ឬ « តើខ្ញុំនឹងបង្រៀនអ្វីដល់សិស្សរបស់ខ្ញុំ ? » អ្នកក៏អាចសួរខ្លួនឯងនូវសំណួរដូចជា « តើសិស្សអាចធ្វើអ្វីខ្លះ ដើម្បីចូលមកជិតព្រះអង្គសង្គ្រោះ ? » ហើយ « តើសិស្សនឹងធ្វើអ្វីខ្លះនៅក្នុងមេរៀនថ្ងៃនេះ ដើម្បីអញ្ជើញព្រះវិញ្ញាណបរិសុទ្ធឲ្យបង្រៀនពួកគេ ? »

ការរៀបចំរបស់សិស្ស ៖ សូមអញ្ជើញសិស្សឲ្យសញ្ជឹងគិតអំពីការទៅលេងព្រះវិហារបរិសុទ្ធថ្មីៗបំផុតរបស់ពួកគេ ។ ប្រសិនបើពួកគេមិនធ្លាប់ទៅព្រះវិហារបរិសុទ្ធទេ នោះសូមអញ្ជើញពួកគេឲ្យសញ្ជឹងគិតថា ការទៅព្រះវិហារបរិសុទ្ធមានលក្ខណៈបែបណា ។

សកម្មភាពរៀនសូត្រដែលអាចមាន

ព្រះយេស៊ូវសម្អាតព្រះវិហារបរិសុទ្ធ

ក្នុងអំឡុងពេលប្រជុំធម្មនិដ្ឋាន សូមច្រៀងបទចម្រៀងមួយបទអំពីព្រះវិហារបរិសុទ្ធ ដូចជាបទ « ខ្ញុំចូលចិត្តមើលព្រះវិហារបរិសុទ្ធ » ( សៀវភៅចម្រៀងកុមារ ទំព័រ ៩៩ ) ។ សូមពិចារណាពីការបង្ហាញរូបភាពនៃព្រះវិហារបរិសុទ្ធក្នុងតំបន់របស់អ្នកហើយអញ្ជើញសិស្សឲ្យចែកចាយអារម្មណ៍របស់ពួកគេអំពីព្រះវិហារបរិសុទ្ធ ។ រូបភាពព្រះវិហារបរិសុទ្ធអាចរកបាននៅគេហទំព័រtemples.ChurchofJesusChrist.org ។;

ព្រះយេស៊ូវបានទៅក្រុងយេរូសាឡិមដើម្បីប្រារព្ធពិធីបុណ្យរំលង ហើយបានយាងទៅព្រះវិហារបរិសុទ្ធ ។ អ្នកថ្វាយបង្គំដែលមកពីក្រុងយេរូសាឡិមត្រូវប្តូរប្រាក់របស់ពួកគេជារូបិយប័ណ្ណ ដែលអាចប្រើប្រាស់បាននៅព្រះវិហារបរិសុទ្ធនោះ ដើម្បីទិញសត្វធ្វើយញ្ញបូជាដែលនឹងធ្វើឡើងតំណាងឲ្យពួកគេដោយពួកសង្ឃ ។ ទោះជាអាជីវកម្មនេះគឺជារឿងចាំបាច់ ហើយបម្រើឲ្យគោលបំណងល្អយ៉ាងណាក្ដី ប៉ុន្តែការជួញដូរនៅឯព្រះវិហារបរិសុទ្ធ គឺមិនមានការគោរព និង មិនមានគារវភាពនោះទេ ។ ព្រះយេស៊ូវបានឆ្លើយតបទៅនឹងអ្វីដែលទ្រង់បានសង្កេតឃើញនៅក្នុងព្រះវិហារបរិសុទ្ធក្នុងឱកាសពីរផ្សេងគ្នា ៖ ម្តងនៅជិតការចាប់ផ្តើមនៃការងារបម្រើរបស់ទ្រង់ ( សូមមើល យ៉ូហាន ២:១៣–១៦ ) និងម្តងទៀតក្នុងសប្តាហ៍ចុងក្រោយនៃព្រះជន្មរបស់ទ្រង់ ( សូមមើល ម៉ាថាយ ២១:១២–១៣ ) ។

សូមអានវគ្គបទគម្ពីរមួយ ឬទាំងពីរខាងក្រោមនេះ ដោយរកមើលពីរបៀបដែលព្រះអង្គសង្គ្រោះបានឆ្លើយតបនឹងអ្វីដែលទ្រង់បានទតឃើញនៅក្នុង ព្រះវិហារបរិសុទ្ធ ។ អ្នកក៏គួរមើលវីដេអូ « Jesus Cleanses the Temple » ( ១:៥៤ ) ដែលមាននៅលើគេហទំព័រ ChurchofJesusChrist.org ផងដែរ ។ វីដេអូនេះបង្ហាញពីដំណើររឿងនៅក្នុង យ៉ូហាន ២ ។

• យ៉ូហាន ២:១៣–១៦

• ម៉ាថាយ ២១:១២–១៣

• តើអ្នកបានរៀនអ្វីខ្លះ មកពីការអានដំណើររឿងទាំងពីរនេះ អំពីព្រះទ័យរបស់ព្រះអង្គសង្គ្រោះចំពោះព្រះវិហារបរិសុទ្ធ ?

• ហេតុអ្វីបានជាអ្នកគិតថា ព្រះអង្គសង្គ្រោះបានឆ្លើយតបដូច្នេះចំពោះអ្វីដែលកំពុងកើតឡើងនៅក្នុងព្រះវិហារបរិសុទ្ធ ?

• តើសេចក្ដីពិតអ្វីខ្លះដែលអ្នកបានរៀនមកពីព្រះបន្ទូល និងព្រះសកម្មភាពរបស់ព្រះអង្គសង្គ្រោះនៅក្នុងព្រះវិហារបរិសុទ្ធ ?

សូមអញ្ជើញសិស្សឲ្យសរសេរសេចក្ដីពិតមួយ ដែលពួកគេបានសម្គាល់ឃើញនៅលើក្ដារខៀន ។ ពួកគេប្រហែលជាបានរកឃើញសេចក្ដីពិតមួយ ដែលស្រដៀងនឹងសេចក្ដីពិតដូចតទៅនេះ ៖ ព្រះវិហារបរិសុទ្ធជាដំណាក់របស់ព្រះ និងជាកន្លែងដ៏ពិសិដ្ឋមួយ ។

ប្រធាន រ័សុល អិម ណិលសុន បានបង្រៀនអំពីលក្ខណៈដ៏ពិសិដ្ឋនៃដំណាក់របស់ព្រះអម្ចាស់ ៖

ព្រះវិហារបរិសុទ្ធគឺជាដំណាក់របស់ព្រះអម្ចាស់ ។ មូលដ្ឋានសម្រាប់រាល់ពិធីបរិសុទ្ធនិងសេចក្ដីសញ្ញានៃព្រះវិហារបរិសុទ្ធ—ដែលជាចំណុចសំខាន់នៃផែនការនៃសេចក្ដីសង្គ្រោះ—គឺជាដង្វាយធួនរបស់ព្រះយេស៊ូវគ្រីស្ទ ។ រាល់សកម្មភាព រាល់មេរៀន ទាំងអស់ដែលយើងធ្វើនៅក្នុងសាសនាចក្រ គឺសំដៅទៅលើព្រះអម្ចាស់ និងព្រះរាជដំណាក់ដ៏បរិសុទ្ធរបស់ទ្រង់ ។ …

… ព្រះប្រោសលោះរបស់យើងទាមទារឲ្យព្រះវិហារបរិសុទ្ធរបស់ទ្រង់ត្រូវបានការពារពីការប្រមាថមើលងាយ ។ គ្មានរបស់មិនស្អាតណាអាចចូលទៅក្នុងដំណាក់ដ៏បរិសុទ្ធរបស់ទ្រង់បានឡើយ ។ អស់អ្នកដែលបានរៀបចំខ្លួនបានល្អ សូមស្វាគមន៍ ។

( រ័សុល អិម ណិលសុន « Personal Preparation for Temple Blessings » Ensign ខែ ឧសភា ឆ្នាំ ២០០១ ទំព័រ ៣២–៣៣ )

• តើសេចក្ដីថ្លែងការណ៍របស់ប្រធាន ណិលសុន ជួយយើងឲ្យយល់កាន់តែច្បាស់អំពីអាកប្បកិរិយារបស់ព្រះអង្គសង្គ្រោះចំពោះ ព្រះវិហារបរិសុទ្ធយ៉ាងដូចម្ដេច ?

• ហេតុអ្វីអ្នកគិតថា ព្រះអម្ចាស់តម្រូវឲ្យយើងត្រូវមានភាពស័ក្តិសមដើម្បីចូលទៅក្នុងព្រះវិហារបរិសុទ្ធរបស់ទ្រង់ ?

សូមចែកចាយបទពិសោធន៍ផ្ទាល់ខ្លួនអំពីលក្ខណៈដ៏ពិសិដ្ឋនៃព្រះវិហារបរិសុទ្ធ ។ សូមអញ្ជើញសិស្សពីរបីនាក់ឲ្យចែកចាយបទពិសោធន៍របស់ពួកគេ ។ សូមរំឭកសិស្សកុំឲ្យចែកចាយបទពិសោធន៍ដែលសម្ងាត់ ឬរឿងឯកជនពេក ។

សូមពិចារណាសេចក្ដីថ្លែងការណ៍ខាងក្រោមដោយ អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ ហើយសូមសញ្ជឹងគិតថា តើព្រះអម្ចាស់សព្វព្រះទ័យឲ្យអ្នកធ្វើអ្វី ។ អ្នកគួរតែមើលវីដេអូ « Exceeding Great and Precious Promises » ដែលមាននៅលើគេហទំព័រ ChurchofJesusChrist.org ចាប់ពីលេខកូដម៉ោង ១០:០៨ ដល់ ១១:១៧ ឬអានសម្រង់ខាងក្រោមនេះ ។

ព្រះវិហារបរិសុទ្ធគឺជាកន្លែងថ្វាយបង្គំដ៏បរិសុទ្ធបំផុត ជាងកន្លែងណាៗទៀតទាំងអស់ ។ ព្រះវិហារបរិសុទ្ធគឺពិតជាដំណាក់នៃព្រះអម្ចាស់ ជា កន្លែងពិសិដ្ឋ ដែលញែកចេញជាពិសេសសម្រាប់ថ្វាយបង្គំព្រះ និងសម្រាប់ទទួល ហើយចងចាំពីសេចក្តីសន្យាដ៏ធំបំផុត ហើយវិសេសរបស់ទ្រង់ផង ។

… ការផ្តោតសំខាន់នៃការថ្វាយបង្គំនៅព្រះវិហារបរិសុទ្ធគឺ ការចូលរួមនៅក្នុងពិធីបរិសុទ្ធ និងការរៀន ការទទួល និងការចងចាំសេចក្តីសញ្ញា ។ នៅក្នុងព្រះវិហារបរិសុទ្ធ យើងគិត ប្រព្រឹត្តហើយស្លៀកពាក់តាមរបៀបមួយផ្សេងពីកន្លែងផ្សេងទៀតដែលយើងទៅ ។

គោលបំណងដ៏សំខាន់នៃព្រះវិហារបរិសុទ្ធគឺដើម្បីលើកកម្ពស់ចក្ខុវិស័យរបស់យើងពីរឿងខាងលោកិយទៅរកពរជ័យដ៏នៅអស់កល្បជានិច្ច ។

( ដេវីឌ អេ បែដណា « Exceeding Great and Precious Promises » Ensign ឬ Liahona ខែ វិច្ឆិកា ឆ្នាំ ២០១៧ ទំព័រ ៩២ )

សូមពិចារណាអញ្ជើញសិស្សឲ្យឆ្លុះបញ្ចាំងពីចម្លើយរបស់ពួកគេចំពោះសំណួរខាងក្រោម ហើយថែមទាំងកត់ត្រាគំនិតខ្លះរបស់ពួកគេនៅក្នុងសៀវភៅកំណត់ហេតុរបស់ពួកគេផងដែរ ។

• តើអ្នកមានអារម្មណ៍ថា ព្រះអម្ចាស់សព្វព្រះទ័យឲ្យអ្នកដឹង ទទួលអារម្មណ៍ ឬធ្វើអ្វីខ្លះ ដោយសារតែអ្វីដែលអ្នកបានរៀននៅក្នុងមេរៀននេះ អំពីលក្ខណៈពិសិដ្ឋនៃព្រះវិហារបរិសុទ្ធ ?

ព្រះយេស៊ូវប្រោសមនុស្សខ្វាក់ និងខ្វិនឲ្យជា

សូមអាន ម៉ាថាយ ២១:១៤ ដោយស្វែងរកអ្វីដែលព្រះអង្គសង្គ្រោះបានធ្វើនៅក្នុងព្រះវិហារបរិសុទ្ធ បន្ទាប់ពីទ្រង់បានសម្អាតព្រះវិហារបរិសុទ្ធជាលើកទីពីរហើយ ។ ពាក្យ « ខ្វិន » សំដៅលើបុគ្គលពិការ ឬដើរមិនរួច ។

សូមកត់ចំណាំពីរបៀបដែលព្រះអង្គសង្គ្រោះបានប្រោសអ្នកដើរតាមដ៏ស្មោះត្រង់របស់ទ្រង់មួយចំនួននៅក្បែរព្រះវិហារបរិសុទ្ធ ។

• តើការព្យាបាលប្រភេទណាទៀតដែលយើងបានទទួលបទពិសោធន៍ តាមរយៈការអនុវត្តសេចក្ដីជំនឿទៅលើទ្រង់ និងតាមរយៈការធ្វើកិច្ចការព្រះវិហារបរិសុទ្ធរបស់យើង ?

អែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់ បានពន្យល់អំពីការព្យាបាលដែលយើងអាចទទួលបាន នៅពេលយើងចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ ។ សូមមើលវីដេអូខាងក្រោមនេះ ដែលមាននៅលើគេហទំព័រ ChurchofJesusChrist.org ចាប់ពីលេខកូដម៉ោង ៣:៤៩ ដល់ ៤:០៩ ឬអានសម្រង់អត្ថបទខាងក្រោម ។

នៅពេលយើងចូលរួមនៅក្នុងកិច្ចការពង្សប្រវត្តិ និងព្រះវិហារបរិសុទ្ធនាពេលបច្ចុប្បន្ននេះ នោះយើងក៏ស័ក្ដិសមដើម្បីទទួលពរជ័យនៃ « ការព្យាបាល » ដែលបានសន្យាដោយពួកព្យាការី និងពួកសាវកដែរ ។ ពរជ័យទាំងនេះក៏អស្ចារ្យបំផុតផងដែរ ដោយសារតែវិសាលភាព និងលក្ខណៈពិសេសព្រមទាំងលទ្ធផលនៅក្នុងជីវិតរមែងស្លាប់នៃពរជ័យទាំងនេះ ។

( ឌែល ជី រិនឡាន់ « Family History and Temple Work: Sealing and Healing » Ensign ឬ Liahona ខែ ឧសភា ឆ្នាំ ២០១៨ ទំព័រ ៤៧ )

សូមពិចារណាចែកចាយបទពិសោធន៍ផ្ទាល់ខ្លួនមួយទាក់ទងនឹងការស្វែងរកការព្យាបាលនៅក្នុងព្រះវិហារបរិសុទ្ធ ។

• តើអ្នកគិតថា ការថ្វាយបង្គំនៅក្នុងព្រះវិហារបរិសុទ្ធអាចជួយយើងឲ្យជាសះស្បើយពីរបួសខាងវិញ្ញាណ និងអារម្មណ៍របស់យើងយ៉ាងដូចម្ដេច ?

វិចារណកថា និង ព័ត៌មានសាច់រឿង

ម៉ាថាយ ២១:១៣ ។ ហេតុអ្វីបានជាព្រះយេស៊ូវមានបន្ទូលថា ប្រជាជនបានចាត់ទុកព្រះវិហារបរិសុទ្ធជា « រោងចោរ » ទៅវិញ ?

ឃ្លាថា « រោងចោរ » ចង់មានន័យថា ពួកអ្នកប្ដូរប្រាក់ និងពាណិជ្ជករគិតតែពីចង់បានប្រាក់ចំណេញជាជាងការថ្វាយបង្គំព្រះ និងការជួយមនុស្សដទៃទៀតឲ្យថ្វាយបង្គំ ។

តើព្រះយេស៊ូវខ្ញាល់ឬ ពេលទ្រង់សម្អាតព្រះវិហារបរិសុទ្ធ ?

ប្រធាន ហ្គរដុន ប៊ី ហ៊ីងគ្លី ( ឆ្នាំ ១៩១០–២០០៨ ) បានបង្រៀនអំពីការសម្អាតព្រះវិហារបរិសុទ្ធរបស់ព្រះអង្គសង្គ្រោះ ។ សូមមើលវីដេអូខាងក្រោម ដែលមាននៅលើគេហទំព័រ ChurchofJesusChrist.org ចាប់ពីលេខកូដម៉ោង ១១:០៧ ដល់ ១១:៣៥ ឬអានសម្រង់ខាងក្រោមនេះ ។

ក្នុងកាលៈទេសៈមួយចំនួន ការខឹងសម្បារគឺជារឿងត្រឹមត្រូវ ។ ព្រះគម្ពីរប្រាប់យើងថាព្រះយេស៊ូវបានបណ្ដេញអ្នកប្តូរប្រាក់ចេញពីព្រះវិហារ ដោយទ្រង់មានបន្ទូលថា « ដំណាក់យើងត្រូវហៅថា ជាទីសម្រាប់អធិស្ឋាន តែអ្នករាល់គ្នាបានយកធ្វើជារោងចោរវិញ » ( ម៉ាថាយ ២១:១៣ ) ។ ប៉ុន្តែទោះជាយ៉ាងណា ព្រះបន្ទូលទាំងនេះគឺដូចជាការស្តីបន្ទោស ច្រើនជាងជាកំហឹងដែលមិនអាចគ្រប់គ្រងបាន ។

( ហ្គរដុន ប៊ី ហ៊ិងគ្លី « Slow to Anger » Ensign ឬ Liahona ខែ វិច្ឆិកា ឆ្នាំ ២០០៧ ទំព័រ ៦៦ )

សកម្មភាពរៀនសូត្របន្ថែម

ការទស្សនាព្រះវិហារបរិសុទ្ធតាមអ៊ីនធឺណិត

បង្ហាញវីដេអូនេះសម្រាប់ការទស្សនាតាមអ៊ីនធឺណិត អំពីព្រះវិហារបរិសុទ្ធទីក្រុងរ៉ូមប្រទេសអ៊ីតាលី ដើម្បីរៀនសូត្របន្ថែមអំពីព្រះវិហារបរិសុទ្ធ និងអ្វីដែលយើងធ្វើនៅក្នុងព្រះវិហារបរិសុទ្ធទាំងនោះ ។ សកម្មភាពនេះអាចជាជម្រើសមួយដើម្បីចាប់ផ្តើមមេរៀន ។

ការព្យាបាលតាមរយៈកិច្ចការពង្សប្រវត្តិ និងព្រះវិហារបរិសុទ្ធ

បង្ហាញវីដេអូនេះអំពីរបៀបដែលអ្នកប្រឹក្សាយោបល់ខាងព្រះវិហារបរិសុទ្ធ និងពង្សប្រវត្តិបានដកពិសោធន៍ពរជ័យដែលបានសន្យាក្នុងការព្យាបាលសម្រាប់បងស្រីម្នាក់ដែលគាត់បានជួយក្នុងកិច្ចការពង្សប្រវត្តិ ។ បន្ទាប់ពីមើលហើយ សូមអញ្ជើញសិស្សឲ្យចែកចាយបទពិសោធន៍របស់ពួកគេក្នុងការស្វែងរកឈ្មោះសមាជិកគ្រួសារ និងយកឈ្មោះទាំងនោះទៅព្រះវិហារបរិសុទ្ធ ។

សូមពិចារណាចែកចាយការដកស្រង់ចេញពីអត្ថបទ « Miracles of Healing through Temple Ordinances » ( Ensign ខែ កញ្ញា ឆ្នាំ ២០២០ ទំព័រ ៤៣–៤៧ ) ដោយ ស៊ីស្ទើរ រ៉េណា អ៊ី អាប៊ើតូ នៃគណៈប្រធានសមាគមសង្គ្រោះទូទៅ ។

ការសម្អាតព្រះវិហារបរិសុទ្ធរបស់យើងផ្ទាល់

សាវកប៉ុលប្រៀបធៀបរូបកាយរបស់យើងទៅនឹង « វិហារនៃព្រះវិញ្ញាណបរិសុទ្ធ » ( សូមមើល កូរិនថូស ទី១ ៦:១៩ ) ។ សិស្សអាចពិចារណាពីរបៀបដែលពួកគេអាចសម្អាតព្រះវិហារបរិសុទ្ធផ្ទាល់ខ្លួនរបស់ពួកគេ ដែលសំដៅទៅលើរូបកាយរបស់ពួកគេ ដោយមានការគោរព និងភាពបន្ទាន់ដូចដែលព្រះយេស៊ូវបានធ្វើ នៅពេលទ្រង់បានសម្អាតព្រះវិហារបរិសុទ្ធនៅក្រុងយេរូសាឡិមដែរ ។ សិស្សអាចពិនិត្យមើលកូនសៀវភៅ ដើម្បីកម្លាំងនៃយុវជន ហើយពិចារណាអំពីអ្វីដែលពួកគេអាចត្រូវកម្ចាត់ចេញពីជីវិតរបស់ពួកគេដើម្បីបានកាន់តែបរិសុទ្ធ ហើយរីករាយនឹងភាពជាដៃគូនៃព្រះវិញ្ញាណបរិសុទ្ធ ។ សិស្សក៏បានត្រូវលើកទឹកចិត្តឲ្យដាក់គោលដៅខាងវិញ្ញាណផងដែរ ដែលជាផ្នែកមួយនៃកម្មវិធីកុមារ និងយុវជន ដែលនឹងជួយពួកគេឲ្យ « តម្កើងព្រះនៅក្នុងរូបកាយ [ របស់ពួកគេ ] » ( កូរិនថូស ទី១ ៦:២០ ) ។

គេហទំព័រ Temples.churchofjesuschrist.org

សូមអញ្ជើញសិស្សឲ្យចូលមើលគេហទំព័រនេះ ដើម្បីស្វែងរកចម្លើយចំពោះសំណួររបស់ពួកគេអំពីព្រះវិហារបរិសុទ្ធ ។ សកម្មភាពនេះអាចត្រូវបានប្រើប្រាស់នៅចុងបញ្ចប់នៃមេរៀននេះ ។ សិស្សក៏ត្រូវបានលើកទឹកចិត្តឲ្យចូលមើលគេហទំព័រនេះដោយខ្លួនឯងផងដែរ ។ សូមប្រាកដថាសរសេរតំណភ្ជាប់នេះដាក់នៅលើក្តារខៀន ។