Матай 23
Аврагч хоёр нүүрт байдлыг буруушаав
Аврагч мөнх бус амьдрал дахь тохинууллынхаа сүүлчийн долоо хоногийн туршид хуулийн багш нар болон фарисайчуудын хоёр нүүрт байдлыг буруушаав. Энэ хичээл нь танд хоёр нүүр гаргахаас зайлсхийж, Есүс Христийн даруухан дагалдагч болоход тусална.
Судруудын хам сэдвийг ойлгох. Шинэ Гэрээний цаг үеийн соёл, ёс заншлын талаар суралцах нь Шинэ Гэрээг илүү сайн ойлгоход суралцагчдад тусална. Судруудын хам сэдвийг ойлгох нь сүнслэгээр өдөөгдсөн зохиогчдын захиасыг ойлгоход суралцагчдыг бэлтгэнэ.
Суралцагчийн бэлтгэл: Суралцагчдыг бусдад үйлчлэхдээ Аврагчийг чин сэтгэлээсээ, цэвэр ариун хүсэл эрмэлзлээр дагахыг хичээдэг хүмүүсийн талаар бодоход урь.
Боломжит суралцах үйл ажиллагаа
Хэрэв хоёр нүүрт байдлын талаарх Аврагчийн сургаалын оронд Түүний бидэнд өгдөг хамгаалалтын талаар судлах нь суралцагчдад илүү тустай гэж үзвэл, “Нэмэлт суралцах үйл ажиллагаа” хэсэг дээрх Матай 23:37 -д зориулсан үйл ажиллагааг заах талаар бодож үз.
Хоёр нүүрт байдал гэж юу вэ?
Доторх нь харагддаггүй гурван аяга бэлд. Эхний аяганы гадна талыг, хоёр дахь аяганы дотор талыг бохирдуулаад, гурав дахь аягыг цэврээр нь үлдээ. Аягануудыг харуулаад, аль аяганаас уухыг ангийнхнаас асуу. Нэг суралцагчийг аягануудын доторхыг шинжээд, аль аяганаас уумаар байгаагаа тайлбарлахад урь.
-
Бохир аяга нь хоёр нүүрт хүмүүсийг ямар байдлаар төлөөлж болох вэ?
Суралцагчид хоёр нүүр гаргадаг зангийн талаар ярилцаж байхдаа сэтгэл доторхоо өнгийн харж, өөрсдөд дээрээ төвлөрөх хэрэгтэй. Суралцагчдыг бусад хүний хоёр нүүр гаргадаг занг дурдахыг хоригло.
Хоёр нүүртэн гэдэг нь “жүжигчин” гэсэн утгатай грек хэлнээс орчуулагдсан үг бөгөөд дүр эсгэдэг, юмыг хэтрүүлэн ярьдаг эсвэл өөрийнхөө үйлдэлд үнэнч тууштай байж чаддаггүй хүнийг хэлнэ. Энэ нь “ерөнхийдөө шашин шүтлэггүй атлаа шүтлэгтэй мэт царай гаргадаг хүнийг хэлдэг” [Bible Dictionary, “Hypocrite” ]. Энэ нь шашин шүтдэг атлаа шүтдэггүй мэт царай гаргадаг хүнийг бас хэлж болно.
Та Матай 23 -ыг судлахдаа, хоёр нүүр гаргахаас зайлсхийж, Есүс Христтэй илүү адил болоход туслах үнэнүүдийг хайж ол.
Аврагч Өөрийн мөнх бус амьдрал дахь тохинууллын сүүлчийн долоо хоногийн туршид эцсийн захиасныхаа нэг хэсэг болгож, олон нийтийн өмнө хуулийн багш нар болон фарисайчуудын хоёр нүүрт байдлыг буруушаасан байна. Тэрээр хуулийн багш нар болон фарисайчуудыг “Мосегийн сууринд [суусан]” ( Матай 23:2) хэмээн онцолсон бөгөөд энэ нь тэд сургаалыг зааж, хуулийг зохицуулж, тайлбарлах эрх мэдэл бүхий байр суурийг эзэлж байсан гэсэн утгатай юм. Тэд өөрсдийгөө синагог дахь хэнээс ч илүү үнэ цэнтэйд тооцож байв.
Матай 23:3–7 -г уншаад, хуулийн багш нар болон фарисайчууд хэрхэн хоёр нүүр гаргаж буй талаар Аврагч юу гэж хэлсэн болохыг олж мэд. Уншихаасаа өмнө “сахиус” ( 5-р шүлэг) гэдэг нь иудейчүүдийн магнай ба зүүн гартаа ороож зүүдэг жижиг арьсан хайрцаг байсан гэдгийг мэдэж авах нь тустай байж магадгүй. Тэдгээр сахиус дотор Хуучин Гэрээний судруудын зарим нэг шүлгийг агуулсан жижигхэн илгэн цаасан хуй байдаг байжээ. Иудейчүүд Бурханы зарлигуудыг дагах ёстойг өөрсдөдөө сануулах үүднээс сахиус зүүдэг байв.
Уншсаныхаа дараа та ChurchofJesusChrist.org дээрх “Сахиуснууд” (1:06) видеог үзэж болох юм.
-
5-р шүлэгт дурдсанаар, хуулийн багш нар болон фарисайчууд яагаад өөрсдийн магнайн болон гарын сахиусаа өргөсгөж, “унжлагаа уртасгасан” бэ?
Их Эзэн магнайн болон гарын сахиус зүүсэн хүмүүсийг бус харин тэдгээрийг хуурамчаар хэрэглэдэг эсвэл хүмүүст харагдуулах гэж юм уу өөрсдийгөө илүү чухал харагдуулах гэж тэдгээрийг томсгосон хүмүүсийг буруушааж байсан юм.
-
Бусдад харагдахын тулд Бурханыг тахин шүтэхэд ямар аюулууд гарч болох вэ?
-
Та Бурхан танаас яагаад Өөрийг нь чин сэтгэлээсээ, зөв зүйтэй зорилгоор тахин шүтээсэй хэмээн хүсдэг гэж бодож байна вэ?
Аврагч хуулийн багш нар болон фарисайчуудын зан авирыг дуурайхгүй байхыг хүмүүст сануулаад зогсохгүй, тэдэнд өөрсдөд нь шууд хэлсэн байна. Тэрээр тэдний хоёр нүүрт байдлыг илтгэн харуулсан хэд хэдэн золгүй явдлын талаар шүлэглэн өгүүлжээ ( Матай 23:13–33 -ыг үзнэ үү). Золгүй явдал гэж зовлон зүдгүүр, гай зовлон, уй гашууг хэлж байна.
Матай 23:23–28 -ыг уншаад, Аврагч хуулийн багш нар болон фарисайчуудад юу гэж хэлсэн болохыг олж мэд.
-
Эдгээр шүлэг нь хоёр нүүрт байдлын талаарх таны ойлголтыг хэрхэн нэмэгдүүлж байна вэ?
Хоёр нүүрт байдлын нэг асуудал нь биднийг Тэнгэрлэг Эцэг, Есүс Христ хоёртой жинхэнээсээ адил болоход саад болдог явдал гэдгийг ойлгоход суралцагчдад тусал. Бид хоёр нүүр гаргах үедээ өөрсдийгөө жинхэнээсээ хэн болж байгаагаас илүүтэй бусдад хэрхэн харагдаж байгаа дээр илүү их төвлөрдөг.
-
Сайн мэдээний дагуу амьдрахаар хичээх үедээ алдаа гаргаснаар хоёр нүүртэн болох вий гэж санаа зовж буй хэн нэгэнд та юу гэж хэлэх байсан бэ?
Дээрх асуултад хариулахад нь суралцагчдад туслалцаа хэрэгтэй бол “Тайлбар ба нөхцөл байдлын талаарх мэдээлэл” хэсэг дээрх ахлагч Жэффри Р.Холландын мэдэгдлийг хуваалц.
Бид хоёр нүүрт байдлаас хэрхэн зайлсхийж, бас тэдгээрийг даван туулж чадах вэ?
Хуулийн багш нар болон фарисайчуудтай харьцуулахад Аврагч хэзээ ч хоёр нүүр гаргаж байгаагүй. Тэрээр хүмүүст бүх хүн Бурханы хүүхдүүд бөгөөд Түүний мэлмийн өмнө эрх тэгш тул өөрсдийгөө бусдаас дээгүүрт үзэж болохгүй хэмээн заасан байна. Тэрээр Тэнгэрлэг Эцэг бол бидний Бүтээгч, Тэр Өөрөө буюу Христ бол Эцэгээс илгээгдсэн бөгөөд амь өгдөг бидний жинхэнэ Багш гэдгийг гэрчилжээ (Иосеф Смитийн Орчуулга, Матай 23:6-г үзнэ үү [ Матай 23:9 дээр, зүүлт тайлбар a]; Матай 23:8–10).
Матай 23:11–12 -ыг уншаад, бидэнд хоёр нүүрт байдлыг даван туулж, зайлсхийхэд туслах сургаалуудыг олж мэд. 12-р шүлэг дээр өргөмжлөгдөх гэдэг нь өргөгдөх гэсэн утгатай бөгөөд номхруулагдах гэдэг нь дорд үзэгдэх, доромжлогдох эсвэл бага хүндлэгдэх гэсэн утгатай.
-
Эдгээр шүлэгт Есүс Христ бидэнд ямар зарчмыг зааж байна гэж та бодож байна вэ?
Аврагч хэрэв бид даруу байж, бусдад үйлчилбэл Их Эзэн биднийг өргөх болно хэмээн заажээ. Тэр бидэнд Өөртэй нь илүү адил болоход туслах бөгөөд зарлигуудыг нь дуулгавартай дагаж, жинхэнээсээ наманчилбал Бурхан селестиел хаант улсад бидэнд өргөмжлөл олгох болно.
-
Есүс Христ даруу төлөв байж, бусдад үйлчилж, хоёр нүүрт байдлаас зайлсхийх жишээг хэрхэн үзүүлж байна вэ?
-
Даруу төлөв байж, бусдад үйлчлэх нь хэрхэн танд хоёр нүүрт байдлаас зайлсхийж, Аврагчтай илүү адил болоход туслах вэ?
Дараах мэдэгдлүүдийг харуулаад, аль нь тэднийг хамгийн сайн тодорхойлж буй талаар эргэцүүлэн бодоход суралцагчдыг урь. Тунгаан бодож байхдаа Сүнсний удирдамжийг эрэлхийлэхэд суралцагчдыг уриал. Тэнгэрлэг Эцэг, Есүс Христ хоёр тэднийг хайрладаг бөгөөд хоёр нүүрт байдлыг даван туулахад нь тэдэнд туслахыг хүсдэг гэдгийг сануул. Суралцагчид санаа бодлоо судлах тэмдэглэлдээ бичиж тэмдэглэж болно.
-
Би өөрөөсөө өөр нэгэн болох гэж дүр эсгэдэг.
-
Би бусдад харагдахын тулд сайн зүйлс хийдэг.
-
Би ихэвчлэн өөрийгөө бусдаас илүү дээр гэж боддог.
-
Хэдийгээр би алдаа гаргадаг боловч сайн мэдээний дагуу амьдрахаар чин сэтгэлээсээ хичээдэг.
-
Би бусдад үйлчлэхийг хичээдэг бөгөөд бусдад хүлээн зөвшөөрөгдөх гэж хөөцөлдөхгүйгээр сайн зүйлс хийдэг.
-
Би даруу байхыг хичээдэг ба өөрийгөө бусдаас дээгүүр гэж үздэггүй.
Та сайжруулж болох талуудаа тодорхойлохдоо Ариун Сүнсний удирдамжийг эрэлхийл. Тэнгэрлэг Эцэг, Есүс Христ хоёр таныг хайрладаг бөгөөд сайн мэдээний дагуу амьдрах чин сэтгэлийн аливаа хүчин чармайлтыг тань олж хардаг болохыг санагтун. Таныг Тэнгэрлэг Эцэгээс тусламж хүсэх үед Тэрээр танд аливаа сул тал эсвэл хоёр нүүрт байдлаа даван туулахад тусална.
Тайлбар ба нөхцөл байдлын талаарх мэдээлэл
Аврагч хоёр нүүртэй хуулийн багш нар болон фарисайчуудыг хэрхэн онцлон авч үзсэн бэ?
“Сэрэмжлүүлгийн дуу хоолой” илтгэлдээ Арван хоёр Төлөөлөгчийн Чуулгын ахлагч Д. Тодд Кристоффэрсон Есүс хуулийн багш нар болон фарисайчуудын хоёр нүүр гаргадаг байдлыг хэрхэн буруушаасан талаар заажээ (Ensign, May 2017, 108–111 эсвэл 2017 оны 4-р сарын Ерөнхий чуулган, 97–101).
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F4e%2Fb6%2F4eb6d49208c83f73c18655ce5e2abc17da99b5db%2F4eb6d49208c83f73c18655ce5e2abc17da99b5db.jpeg/full/!250,/0/default)
Би сайн мэдээний дагуу амьдрахаар хичээх үедээ алдаа гаргавал хоёр нүүртэн болох уу?
Арван хоёр Төлөөлөгчийн Чуулгын ахлагч Жэффри Р.Холланд ийн заасан.
ЗурагOfficial Portrait of Elder Jeffrey R. Holland. Photographed January 2018.Ах, эгч нар аа, бидний хүн нэг бүр одоо байгаагаасаа илүү сайнаар Христтэй адил амьдрахаар тэмүүлдэг. Хэрэв бид үүнийгээ шударгаар хүлээн зөвшөөрвөл хоёр нүүртнүүд болохгүй. Бид бол эгэл хүмүүс.
(Жэффри Р.Холланд, “Тиймээс та нар эцэст нь төгс бай,” Ensign, Nov. 2017, 42 эсвэл 2017 оны 10-р сарын Ерөнхий чуулган, 30)
Нэмэлт суралцах үйл ажиллагаа
Хичээлийг эхлүүлэх өөр арга
Дараах нөхцөл байдал тус бүр дээр үүсэж болзошгүй асуудлуудад үнэлгээ хийхэд суралцагчдад тусал. (Хэрэв хүсвэл, суралцагчдад илүү хамааралтай байж болох орон нутгийн ёс заншил, уламжлалуудыг тусгасан байдлаар нөхцөл байдлуудыг тохируулан өөрчлөхийг бодож үз.)
-
Сүмийн цуглаанд явдаг боловч Бурханыг тахин шүтэхээсээ илүү бусдад хэрхэн харагдах дээрээ илүү анхаардаг хэн нэгэн хүн
-
Сүмийн удирдагчдыг сонгож баталсан боловч дараа нь тэдний шийдвэрүүдийг шүүмжилдэг гишүүн
-
Өөрийнхөө давуу талыг хэтрүүлэн харуулсан материалыг олон нийтийн мэдээллийн хэрэгсэл дээр нийтэлдэг хүн
Суралцагчдыг эдгээр нөхцөл байдлыг үнэлснийхээ дараа хоёр нүүртэн гэж хэн болохыг тайлбарлаад, эдгээр жишээ хоёр нүүрт байдлын жишээ хэрхэн болж чадахыг дүрслэн хэлж чадах эсэхийг хар. Дараа нь Матай 23 -ыг судалж эхэл.
Потемкины тосгон ба хоёр нүүрт байдал
Тэргүүн Зөвлөлийн нэгдүгээр зөвлөхөөр үйлчилж байхдаа ерөнхийлөгч Дийтр Ф. Угдорф хоёр нүүрт байдлын аюулын талаар заахын тулд Потемкины тосгоны жишээг ашиглажээ. ChurchofJesusChrist.org дээр байгаа “Жинхэнэ байх нь” видеог цагийн код 0:00-оос 4:59 хүртэл үзэх талаар бодож үз. Суралцагчид дараа нь хоёр нүүрт байдлын талаар олж мэдсэн зүйлсээ болон үүнээс хэрхэн зайлсхийх талаар хуваалцаж болно.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F2a%2F2e%2F2a2e5f777ca371569f0104d841e4be727c019b22%2F2a2e5f777ca371569f0104d841e4be727c019b22.jpeg/full/!250,/0/default)
Maтай 23:37 . “Тахиа дэгдээхэйнүүдээ далавчин дороо бөөгнүүлдэг шиг”
Матай 23:34–39 дээр, Аврагч Иерусалимын оршин суугчдад бошиглогчдыг хөөж гаргасан тул та нар орхигдож хоцорно хэмээн сануулсан.
Тахианы болон дэгдээхэйнүүдийн зураг харуулаад, “Тахиа дэгдээхэйгээ хэрхэн хамгаалдаг вэ?” гэж асуух талаар бодож үз.
Суралцагчдыг Матай 23:37–39 -ийг уншаад, Иерусалимын хүмүүс тахиа дэгдээхэйнүүдээ цуглуулдгийн адилаар тэднийг цуглуулахын тулд гаргасан Есүсийн хүчин чармайлтад хэрхэн хариулсан болохыг олж мэд.
Есүс Мормоны Номон дахь хүмүүст үүнтэй адил захиас хэлжээ. Бошиглогчдыг хөөж гаргасан хүмүүс Есүсийг нас барсны дараа сүйрч үгүй болов ( 3 Нифай 9:1–12 -ыг үзнэ үү). Дараа нь Гэтэлгэгч энэрэл хайраа үзүүлсэн хүмүүст урилгаа илгээсэн байна.
Суралцагчдыг 3 Нифай 9:13–14 ; 10:4–6 -г уншаад, Аврагчийн урилгыг олж мэдэхэд урь.
Дараахтай адил асуултуудыг тавих талаар бодож үз.
-
Эдгээр шүлэг Аврагчийн талаар танд юу зааж байна вэ?
-
Аврагч биднийг ямар ямар арга замаар цуглуулж, хамгаалж, аварч чадах вэ?
-
Бошиглогчдыг дагах нь Аврагчийн хамгаалалтыг хүлээн авах нэг арга гэж та яагаад бодож байна вэ?
-
Та түүний халамж, хамгаалалтыг хүлээн авсан хэвээр байхын тулд Аврагч руу очиж цугларахын тулд юу хийх вэ?
-
Эдгээр шүлэг Есүс Христийн талаарх таны үзэл бодолд хэрхэн нөлөөлөх вэ?