Mateo 28; Lucas 24; Juan 20

Mga Saksi ng Nabuhay na Mag-uling Tagapagligtas

Nagpakita si Jesucristo sa maraming tao at grupo pagkatapos ng Kanyang Pagkabuhay na Mag-uli. Ang lesson na ito ay makatutulong na mapalakas ang iyong patotoo na ang Tagapagligtas ay buhay habang pinag-aaralan mo ang mga karanasan ng ilan sa mga saksing ito.

Pagbabahagi ng mga patotoo tungkol kay Jesucristo. Maghanap ng mga pagkakataong magbahagi ng mga patotoo tungkol kay Jesucristo, kabilang ang mga patotoo ng mga apostol at propeta. Mag-aanyaya ito sa Espiritu Santo na patotohanan ang katotohanan.

Paghahanda ng estudyante: Ipabasa sa mga estudyante ang Eter 12:5–9 na nasasaisip ang tanong na ito: Paano mo malalaman na si Jesucristo ay buhay gayong hindi mo Siya nakikita?

Mga Posibleng Aktibidad sa Pag-aaral

Naniniwala kahit hindi nakikita

Tiyaking maglaan ng sapat na oras para makapagpatotoo ang mga estudyante tungkol kay Jesucristo hanggang sa katapusan ng lesson.

Tingnan ang sumusunod na larawan ng nabuhay na mag-uling Tagapagligtas na lumalabas mula sa libingan. Isulat sa iyong study journal kung ano ang maaari mong ibahagi sa isang taong nag-aalinlangan na nangyari ang napakahalagang pangyayaring ito. Anong mga salaysay sa banal na kasulatan tungkol sa Pagkabuhay na Mag-uli ng Tagapagligtas ang maibabahagi mo sa kanya?

• Sa iyong palagay, bakit mahalaga sa Panginoon na magkaroon ang bawat isa sa atin ng sarili nating patotoo na Siya ay buhay?

Pagnilayan ang iyong patotoo na si Jesucristo ay buhay at kung paano ka pagpapalain sa pamamagitan ng pagpapalakas ng patotoong ito. Ang pag-aaral ng mga salita ng mga taong nakaaalam na buhay ang Tagapagligtas ay magpapalakas sa ating pananampalataya na totoong Siya ay buhay kahit nagdududa ang iba sa paligid natin. Sa iyong pag-aaral ngayon, isipin ang mga pahiwatig mula sa Espiritu Santo na nagpapatibay sa katotohanan ng mga salaysay na ito sa iyong puso at isipan.

Mga saksi ng Bagong Tipan

Pag-aralan ang kahit isa sa mga sumusunod na salaysay sa Bagong Tipan tungkol sa mga taong nakakita sa nabuhay na mag-uling Tagapagligtas. Pagkatapos ay isulat ang iyong mga sagot sa dalawang tanong na kasunod nito at ang anumang iba pang mga ideya at impresyon na maaaring dumating sa iyo.

Maaari mong ilagay ang mga larawan na kumakatawan sa sumusunod na apat na salaysay, pati na ang mga kaugnay na reperensyang banal na kasulatan, sa iba’t ibang lugar sa silid. Sabihin sa mga estudyante na puntahan ang bawat lugar na iyon nang mag-isa o nang magkakasama sa maliliit na grupo at pag-aralan ang mga katugmang salaysay.

Bilang alternatibo, batay sa mga pangangailangan ng mga estudyante, ang mga estudyante ay maaaring gumugol ng mas maraming oras sa pag-aaral nang malalim ng isa sa mga sumusunod na salaysay sa halip na pag-aralan sandali ang lahat ng apat na salaysay. Ang ilang ideya sa pag-aaral ng mga salaysay na ito ay matatagpuan sa bahaging “Mga Karagdagang Aktibidad sa Pag-aaral” ng lesson.

1. Matatapat na kababaihan: Mateo 28:1–10

2. Dalawang disipulo sa daan patungong Emaus: Lucas 24:13–35

3. Maria Magdalena: Juan 20:11–18

4. Tomas: John 20:24–29

• Ano ang natutuhan mo na magpapalakas sa iyong pananampalataya na si Jesucristo ay buhay?

• Ano ang natutuhan mo tungkol sa Tagapagligtas mula sa Kanyang pakikipag-ugnayan sa taong ito o sa mga taong ito?

Iba pang mga saksi sa mga banal na kasulatan

Ang iyong patotoo tungkol sa Tagapagligtas ay lalong mapalalakas sa pamamagitan ng pag-aaral ng tungkol sa mga karagdagang saksi sa iba pang mga banal na kasulatan. Pag-aralan ang kahit isa sa mga sumusunod na scripture passage. Pagkatapos ay isulat ang iyong mga sagot sa dalawang tanong na kasunod nito at ang anumang iba pang mga ideya at impresyon na maaaring dumating sa iyo.

Pansinin na bawat isa sa mga scripture passage na ito ay naglalaman ng isang doctrinal mastery scripture passage. Maaari mong sabihin sa mga estudyante na markahan sa naiibang paraan ang mga scripture passage na ito para madali nila itong mahanap.

1. Mga tao sa sinaunang Amerika hindi kalaunan pagkatapos ng Pagkabuhay na Mag-uli ng Tagapagligtas: 3 Nephi 11:8–17

2. Joseph Smith at Sidney Rigdon: Doktrina at mga Tipan 76:19–24

• Paano mapapalakas ng nabasa mo ang iyong paniniwala na buhay si Jesucristo?

• Anong mga karagdagang ideya tungkol kay Jesucristo ang natamo mo?

Mga makabagong saksi

Ang isa pang mahalagang paraan para mapalakas ang iyong patotoo na buhay si Jesucristo ay sa pamamagitan ng pag-aaral ng mga patotoo ng makabagong “mga natatanging saksi ng pangalan ni Cristo sa buong daigdig” ( Doktrina at mga Tipan 107:23), ang inordenang mga Apostol sa ating panahon.

Maaari mong palitan ang alinman sa mga sumusunod na pahayag ng mga patotoo ng iba pang mga buhay na Apostol.

Maaari mong panoorin ang video na “Magsiparito sa Akin” (mula sa time code na 16:18 hanggang 16:47), na makukuha sa SimbahanniJesucristo.org. O basahin ang mga pahayag nina Pangulong Eyring at Elder Holland, dalawang makabagong saksi ni Jesucristo.

Itinuro ni Pangulong Henry B. Eyring ng Unang Panguluhan:

Ako ay saksi sa Pagkabuhay na Mag-uli ng Panginoon na parang naroon ako nang gabing iyon kasama ang dalawang disipulo sa bahay sa nayon ng Emaus. Alam kong Siya ay buhay tulad nang alam ni Joseph Smith nang makita niya ang Ama at ang Anak sa liwanag ng maaliwalas na umaga sa kakahuyan sa Palmyra.

Ito ang totoong Simbahan ni Jesucristo.

(Henry B. Eyring, “Magsiparito sa Akin,” Ensign o Liahona, Mayo 2013, 25)

Pinatotohanan ni Elder Jeffrey R. Holland ng Korum ng Labindalawang Apostol:

Pinatototohanan ko na si Jesucristo ang [literal at] buhay na Anak ng ating tunay na Diyos. … Nagpapatotoo ako na Siya ay talagang nabuhay na mag-uli mula sa libingan, at matapos umakyat sa Kanyang Ama upang makumpleto ang proseso ng Pagkabuhay na Mag-uli na iyon, ay nagpakita Siya, nang paulit-ulit, sa daan-daang disipulo sa Lumang Daigdig at sa Bago. Alam ko na Siya ang Banal ng Israel, ang Mesiyas na balang-araw ay paparitong muli sa kaluwalhatian, upang maghari sa lupa bilang Panginoon ng mga panginoon at Hari ng mga hari.

(Jeffrey R. Holland, “Ang Iisang Dios na Tunay, at Siyang Kanyang Sinugo, Sa Makatuwid Baga’y si Jesucristo,” Ensign o Liahona, Nob. 2007, 42)

• Sa iyong palagay, bakit tayo binigyan ng Tagapagligtas ng mga makabagong saksi bilang karagdagan sa Kanyang mga sinaunang saksi?

Ang iyong patotoo

Basahin ang Juan 20:29 , at hanapin ang mga katotohanang itinuro ni Jesucristo kay Tomas tungkol sa pagkakaroon ng patotoo.

• Ano ang itinuturo sa iyo ng banal na kasulatang ito tungkol sa pagkakaroon mo ng patotoo tungkol kay Jesucristo?

Ang isang katotohanan na matututuhan natin mula sa mga turo ng Tagapagligtas sa talatang ito ay pinagpapala tayo sa pagpiling maniwala na si Jesucristo ay buhay kahit hindi natin Siya nakikita.

Gamitin ang natitirang oras ng lesson para mabigyan ang mga estudyante ng pagkakataong magpatotoo tungkol sa buhay na Tagapagligtas. Pumili mula sa mga sumusunod na iminungkahing tanong, o gumamit ng iba pang mga pamamaraan para matulungan ang mga estudyante na pagnilayan at ibahagi ang kanilang patotoo.

Maaari mong anyayahan ang mga estudyante na isulat ang kanilang patotoo sa kanilang study journal o ipakanta sa buong klase ang isang himno bago ibahagi nang malakas ang kanilang patotoo.

Idagdag ang iyong personal na patotoo tungkol sa Tagapagligtas sa mga pinag-aralan ninyo ngayon. Bilang isang paraan ng paggawa nito, maaari mong isulat ang mga sagot sa mga tanong na tulad ng mga sumusunod sa iyong study journal.

• Anong katibayan ang nakita mo sa iyong buhay at sa buhay ng iba na si Jesucristo ay buhay?

• Kailan mo nadama ang Espiritu Santo na nagpapatotoo sa iyo na buhay si Jesucristo?

• Ano ang maipapayo mo sa isang taong hindi pa nakatitiyak kung naniniwala siya na buhay ang Tagapagligtas?

Komentaryo at Pinagmulang Impormasyon

Bakit may mga sugat mula sa Pagpapako sa Krus sa nabuhay na mag-uling katawan ni Jesus?

Isinulat ni Elder Jeffrey R. Holland ng Korum ng Labindalawang Apostol:

Bagama’t sa pamamagitan ng kapangyarihan ng Pagkabuhay na Mag-uli na magagawa—at walang dudang magaganap balang araw—na lubusang mapagaling at mapawi ang mga sugat na likha ng pagpapako sa krus, gayon pa man, pinili ni Cristo na panatilihin ang mga sugat na ito dahil sa isang layunin, kabilang na ang pagparito niya sa mga huling araw kung kailan ipakikita niya ang mga markang iyon at ipahahayag na siya ay sinugatan “sa bahay ng [kanyang] mga kaibigan” [ Zacarias 13:6 ; D at T 45:52 ].

Ang mga sugat sa kanyang mga kamay, paa, at tagiliran ay mga tanda na may masasakit na pangyayari sa buhay na ito kahit pa sa mga dalisay at perpekto, mga tanda na ang kapighatian ay hindi katibayan na hindi tayo mahal ng Diyos. Ito ay katotohanang mahalaga at puno ng pag-asa na ang sugatang si Cristo ang sasagip sa atin.

(Jeffrey R. Holland, Christ and the New Covenant [1997], 258–59)

Juan 20:17 . Ano ang ibig sabihin ng Tagapagligtas nang sabihin niya kay Maria Magdalena na “huwag [Siyang] hawakan”?

Ipinaliwanag ni Elder Bruce R. McConkie (1915–85) ng Korum ng Labindalawang Apostol:

Binangit sa King James Version na sinabi ni Jesus na “Huwag mo akong hipuin.” Sinabi naman sa Joseph Smith Translation na “Huwag mo akong hawakan.” Mababasa sa iba’t ibang pagsasalin ng scripture passage mula sa Griyego ang “Huwag kang kumapit sa akin” o “Huwag mo akong hawakan.” Ang ilang kahulugan ay nagsasabing “Huwag kang kumapit sa akin kailanman” o “Huwag mo akong hawakan kailanman.” Ang iba ay nagsasabing itigil na ang paghawak o pagkapit sa kanya, na nagpapahiwatig na nakahawak na sa kanya si Maria. May matibay na dahilan para isiping ganito ang sinabi ng Nabuhay na Muling Panginoon kay Maria: “Hindi mo na ako maaaring hawakan, dahil ako ay aakyat na sa aking Ama.”

(Bruce R. McConkie, The Mortal Messiah: From Bethlehem to Calvary [1981], 4:264)

Mga Karagdagang Aktibidad sa Pag-aaral

Alternatibong simula sa lesson

Para masimulan ang lesson, maaari mong sabihin sa isang estudyante na ibahagi ang pangalan ng isang taong kilala niya pero hindi pa nakikilala ng klase at ng titser. Pagkatapos ay magkunwaring nagdududa na may ganitong tao. Itanong sa estudyante ang tulad ng mga sumusunod: Mayroon bang sinuman sa klaseng ito na magpapatunay na may ganitong tao? Kung marami sa amin ang hindi sumasang-ayon sa sinabi mo sa amin, magsisimula ka bang magduda na may ganitong tao?

Pagkatapos ay sabihin sa mga estudyante na pag-isipan kung paano sila tutugon sa isang taong nag-aalinlangan na mayroong Jesucristo.

Daan Patungong Emaus

Kung ang pag-uukol ng mas maraming oras sa tala sa Lucas 24:13–35 ay makatutulong sa mga estudyante, maaari mong itanong ang mga sumusunod:

• Bakit gagamitin ng Tagapagligtas ang mga banal na kasulatan para tulungan ang mga disipulo na mas maunawaan ang Kanyang misyon?

• Anong mga banal na kasulatan ang maaari mong gamitin para tulungan ang isang kaibigan na mas maunawaan ang misyon ng Tagapagligtas?

• Paano inilarawan ng mga disipulo ang kanilang nadarama, tulad ng nakatala sa talata 32 ? Ano ang naging dahilan para madama ng mga disipulo ang ganito? Paano mo ilalarawan ang mga pahiwatig na natanggap mo mula sa Espiritu Santo?

• Bakit mahalaga na nakilala ng mga disipulo ang Tagapagligtas “nang pagputul-putulin niya ang tinapay”? ( talata 35). Paano ito maaaring iangkop sa ating buhay?

Pagpiling maniwala

Sabihin sa mga estudyante na basahin ang Juan 20:1–8 , at alamin ang ginawa ni Juan matapos marinig ang naranasan ni Maria Magdalena. (Pansinin na tinukoy ni Juan ang kanyang sarili bilang “isa pang alagad” sa buong scripture passage na ito.)

Sabihin sa mga estudyante na ikumpara ang reaksyon ni Juan na nakatala sa Juan 20:8 sa pahayag ni Tomas na nakatala sa Juan 20:24–25 . Pagkatapos ay itanong ang mga sumusunod:

• Ano ang ilang bagay na pinaniniwalaan mo nang hindi ka na nangangailangan ng pisikal na katibayan?

• Sa paanong mga paraan ka napagpala sa pagpiling maniwala kahit walang pisikal na katibayan? (Tingnan sa Juan 20:29 .)

• Paano mo mapalalakas ang iyong pananampalataya sa mga totoong bagay na hindi mo pa nakikita? (Tingnan sa Alma 32:16–21 ; Eter 12:6 .)