I-assess ang Iyong Pagkatuto 6

Mateo 26–28; Marcos 14–16; Lucas 22–24; Juan 13–21

Layunin ng lesson na ito na tulungan kang suriin ang mga mithiing itinakda mo at ang pansariling pag-unlad na naranasan mo sa iyong pag-aaral ng Bagong Tipan.

Gumamit ng iba’t ibang pamamaraan sa pagtuturo. Madalas na mas nakikibahagi ang mga estudyante kapag gumagamit ang mga titser ng iba’t ibang pamamaraan sa pagtuturo. Maging handang sumubok ng mga bagong pamamaraan at gumawa ng mga pagbabago sa oras ng lesson kung nawawalan ng interes ang mga estudyante o kung tila hindi nakatutulong ang aktibidad para makamtan ng mga estudyante ang mga ninanais na resulta.

Paghahanda ng estudyante: Sabihin sa mga estudyante na pagnilayan ang kanilang karanasan sa pag-aaral ng unang kalahati ng Bagong Tipan at ang ministeryo ni Jesucristo. Hikayatin ang mga estudyante na pumasok sa klase na may naihandang isang bagay na natutuhan o nadama nila mula sa apat naEbanghelyo (Mateo, Marcos, Lucas, at Juan) na mahalaga sa kanila.

Mga Posibleng Aktibidad sa Pag-aaral

Layunin ng lesson na ito na tulungan ang mga estudyante na i-assess ang mga mithiing itinakda nila, ang kanilang kakayahang ipaliwanag ang mga turo sa Bagong Tipan, o kung paano nagbabago ang kanilang saloobin, hangarin, at kakayahang ipamuhay ang ebanghelyo. Ang pag-aaral ng klase sa Mateo 26–28; Marcos 14–16; Lucas 22–24; Juan 13–21 ay maaaring nakapagbigay-diin sa mga katotohanang wala sa mga sumusunod na aktibidad. Kung gayon, maaaring iangkop ang mga aktibidad upang maisama ang mga katotohanang iyon.

Ibigin mo ang Diyos ng iyong buong puso

Kung nagkaroon ng pagkakataon ang mga estudyante na pagnilayan ang kanilang pagmamahal sa Diyos habang pinag-aaralan nila ang Mateo 22 at Juan 14:15 , makatutulong ang aktibidad na ito sa mga estudyante na i-assess kung paano nila napalago at napaibayo ang kanilang pagmamahal sa Diyos.

Magdrowing ng isang puso sa pisara. Anyayahan ang isang handang estudyante na magbahagi ng isang bagay na natutuhan o nadama niya tungkol kay Jesucristo na nagpaibayo ng kanyang pagmamahal sa Kanya. Hikayatin ang unang estudyante na pumili ng pangalawang estudyante na magbabahagi ng iba pang bagay na gusto niya tungkol sa Tagapagligtas. Ipagpatuloy ang aktibidad na ito na pumipili ang mga estudyante ng mga karagdagang estudyante hanggang sa magkaroon ang lahat ng estudyante ng pagkakataong magbahagi. Ilista ang mga sagot ng mga estudyante tungkol sa kanilang pagmamahal kay Jesucristo sa loob o sa paligid ng puso sa pisara.

Maaaring kailanganin ng mga estudyante ng oras upang pag-isipan ang kanilang mga sagot sa mga sumusunod na tanong. Sabihin sa mga estudyante na isulat ang kanilang mga sagot, at pagkatapos ay sabihin sa mga handang estudyante na magbahagi.

• Paano ka nahikayat na sikaping lubos pang mahalin ang Ama sa Langit at si Jesucristo dahil sa natutuhan mo tungkol sa Kanilang pagmamahal sa iyo?

• Paano nakatulong ang pag-unawa mo sa Kanilang pagmamahal sa iyo para mapag-ibayo mo ang iyong pagmamahal sa ibang tao?

Alalahanin na itinuro ng Tagapagligtas na nagpapakita tayo ng pagmamahal sa Kanya sa pamamagitan ng pagsunod sa mga kautusan (tingnan sa Juan 14:15). Si Jesucristo ay nagpakita ng perpektong halimbawa ng pagmamahal sa Ama sa Langit sa pamamagitan ng pagsunod sa lahat ng kautusan (tingnan sa Juan 14:31).

Nang pinag-aralan mo ang Juan 14:15 , maaaring isinulat mo sa iyong journal ang iyong mga hangarin na sundin ang mga kautusan at ang iyong mga layunin, o ang iyong mga dahilan, sa paggawa nito. Kung gayon, rebyuhin ang isinulat mo.

Bigyan ng oras ang mga estudyante na pag-isipan ang mga sumusunod na tanong. Maaaring hindi naaangkop na sabihin sa mga estudyante na magbahagi ng mga partikular na sagot. Gayunpaman, maaaring sabihin sa mga estudyante na magbahagi ng mga pangkalahatang ideya na may kaugnayan sa mga tanong.

• Ano ang nadarama mo tungkol sa iyong mga kasalukuyang hangarin at layunin na sundin ang mga kautusan upang maipakita ang iyong pagmamahal sa Ama sa Langit at kay Jesucristo? Ihambing ang iyong mga hangarin at layunin ngayon sa mga hangarin at layunin mo noong simula ng taon.

• Anong mga pagbabago ang napansin mo sa iyong pagmamahal sa Ama sa Langit at kay Jesucristo nang pag-aralan mo ang Bagong Tipan? Kung may napansin kang anumang pagbabago, ano sa palagay mo ang naging dahilan ng mga pagbabagong ito?

• Mayroon bang anumang karagdagang pagbabago na sa palagay mo ay kailangan mong gawin upang maipakita o mapag-ibayo ang iyong pagmamahal sa Ama sa Langit at kay Jesucristo?

Ang Pagbabayad-sala ni Jesucristo: Ano kaya ang mangyayari sa buhay mo kung wala Ito?

Ang layunin ng aktibidad na ito ay bigyan ang mga estudyante ng pagkakataong suriin ang kanilang nauunawaan at pangangailangan sa Pagbabayad-sala ni Jesucristo.

Maaari kang magpakita ng isang larawan na tulad ng sumusunod habang pinag-iisipan ng mga estudyante ang kanilang mga sagot. Ang paggamit ng mga larawan sa klase ay makatutulong para sa mga estudyante na maituon ang kanilang isipan.

Isipin kung ano ang natutuhan mo tungkol sa nagbabayad-salang sakripisyo ni Jesucristo mula sa Bagong Tipan. Pag-isipan sandali kung ano ang personal na kahulugan sa iyo ni Jesucristo at ng Kanyang nagbabayad-salang sakripisyo. Isipin kung ano ang mangyayari sa buhay mo kung wala ang mga ito.

Ngayong naglaan ka na ng oras upang magnilay, itala ang ilan sa iyong mga saloobin sa pamamagitan ng pagsagot sa mga sumusunod na tanong. Magsama ng mga makabuluhang detalye sa iyong mga sagot, at magsama ng mga scripture passage tungkol sa sakripisyo ni Jesucristo na nakaapekto sa iyo.

• Paano mag-iiba ang iyong buhay kung hindi nagdusa ang Tagapagligtas para sa iyo sa Getsemani at hindi Siya namatay para sa iyo sa krus sa Kalbaryo?

• Paano mag-iiba ang iyong buhay kung hindi nadaig ni Jesucristo ang kamatayan sa pamamagitan ng Kanyang maluwalhating Pagkabuhay na Mag-uli?

• Ano ang mangyayari sa plano ng kaligtasan ng Ama sa Langit kung wala ang nagbabayad-salang sakripisyo ni Jesucristo?

Pagkatapos ng sapat na oras, sabihin sa mga handang estudyante na ibahagi ang kanilang mga sagot sa mga tanong sa itaas. Maaari mong ibahagi ang sumusunod na sipi o ipanood ang video na “Dahil sa Kanya” (2:33) upang mas matulungan ang mga estudyante na madama at maunawaan na kailangan nila si Jesucristo. Maaaring naipinanood na ang video na ito sa lesson na “Mateo 1:18–25; Lucas 1:26–35.” Pagkatapos ng video, maaaring isulat sa pisara ang pariralang Dahil sa Kanya…, at maaaring sabihin sa mga estudyante na kumpletuhin ang parirala gamit ang sagot na makabuluhan sa kanila. Maaaring ibahagi ang sumusunod na pahayag ni Pangulong Ballard upang matulungan ang mga estudyante na maunawaan na kailangan nila ang Pagbabayad-sala ng Tagapagligtas.

Itinuro ni Pangulong M. Russell Ballard, Gumaganap na Pangulo ng Korum ng Labindalawang Apostol:

Salamat at magiting na isinagawa ni Jesucristo ang sakripisyong ito sa sinaunang Jerusalem. … Si Jesus ay kusang nagdusa nang sa gayon lahat tayo’y magkaroon ng oportunidad na mahugasan at maging malinis—dahil sa ating pananampalataya sa kanya, pagsisisi sa ating mga kasalanan, pagkabinyag sa wastong awtoridad ng priesthood, sa pagtanggap sa nakadadalisay na kaloob na Espiritu Santo sa pamamagitan ng kumpirmasyon, at pagtanggap sa lahat ng iba pang mahahalagang ordenansa. Kung walang Pagbabayad-sala ng Panginoon, hindi natin matatanggap ang kahit isa sa mga biyayang ito, at hindi tayo magiging karapat-dapat at handang bumalik upang makapiling ang Diyos.

(M. Russell Ballard, “Ang Pagbabayad-sala at ang Kahalagahan ng Isang Kaluluwa,” Ensign o Liahona, Mayo 2004, 85)

Pagbabahagi ng mabuting balita tungkol kay Jesucristo

Ginawa ang sumusunod na aktibidad upang tulungan ang mga estudyante na marebyu at maibuod ang kanilang karanasan sa pag-aaral ng apat na Ebanghelyo.

Ngayong napagnilayan mo na ang kahalagahan ng nagbabayad-salang sakripisyo ni Jesucristo, basahin ang sumusunod na pahayag ni Pangulong Russell M. Nelson.

Ang ibig sabihin ng katagang ebanghelyo ay “mabuting balita.” Ang mabuting balita ay ang Panginoong Jesucristo at ang Kanyang mensahe ng kaligtasan. Itinulad ni Jesus ang ebanghelyo sa Kanyang misyon at ministeryo sa mortalidad.

(Russell M. Nelson, “Matatandang Misyonero at ang Ebanghelyo,” Ensign o Liahona, Nob. 2004, 81)

Maaaring may mga katulad na halimbawa ng mga post na ginawa sa Gospel Living app na maaaring ipakita sa mga estudyante upang matulungan silang magsimulang gumawa ng sarili nilang post.

Anong mabuting balita ang gusto mong ibahagi sa iba tungkol kay Jesucristo at sa Kanyang banal na misyon? Ipagpalagay na naglulunsad ang Simbahan ng isang kampanya sa social media upang ipalaganap ang kamalayan tungkol sa buhay at mga turo ni Jesucristo na nakatala sa apat na Ebanghelyo. Humihiling ang Simbahan ng mga post sa social media para sa kampanya.

Sumulat ng maikling post na nagpapaliwanag sa iyong mabuting balita tungkol kay Jesucristo. Mag-isip ng isang bagay na natutuhan mo mula sa Mga Ebanghelyo (Mateo, Marcos, Lucas, at Juan) na espesyal sa iyo at nakatulong sa iyo na mas mapalapit kay Jesucristo. Halimbawa, maaari kang pumili ng isang bagay na itinuro ni Jesus, isang himalang ginawa Niya, isang talinghaga, isang kuwento kung paano Siya nakisalamuha sa iba, isang katangiang ipinakita Niya, o isang bahagi ng Kanyang nagbabayad-salang sakripisyo, kamatayan, at Pagkabuhay na Mag-uli. Kung komportable kang gawin, maaari mong i-post ang iyong magandang balita sa social media o ibahagi ito sa ibang tao. Isama ang mga sumusunod na detalye sa iyong post:

• Gumawa ng headline o pamagat para sa iyong post.

• Ipaliwanag kung paano naging makabuluhan sa iyo ang mabuting balita ng Tagapagligtas at kung paano ito nakatulong sa iyo na mas mapalapit sa Kanya.

• Magsama ng isang partikular na scripture passage mula sa Mga Ebanghelyo (Mateo, Marcos, Lucas, o Juan).

• Isama ang iyong patotoo at kung paano makatutulong sa iba ang mabuting balitang ito.

Maaari kang mag-anyaya ng ilang handang estudyante na ibahagi sa klase ang kanilang mga post.