Մատթեոս 3.13-17, Մաս 2

Երկնային Հայրը, Հիսուս Քրիստոսը և Սուրբ Հոգին

Երկնային Հայրը, Հիսուս Քրիստոսը և Սուրբ Հոգին՝ բոլորն էլ ներկա էին Հիսուս Քրիստոսի մկրտությանը: Այս դասը կարող է օգնել ձեզ խորացնել ձեր հասկացողությունը Աստվածագլխի անդամներից յուրաքանչյուրի մասին, ինչը կարող է ազդեցություն ունենալ ձեր կյանքի ընտությունների վրա:

Ճանաչել ուսանողի ներկայիս ընկալումը Յուրաքանչյուր ուսանող դասարան է բերում իր եզակի փորձառությունները, գիտելիքները, ընկալումն ու տեսանկյունը: Փորձեք բացահայտել տվյալ վարդապետության, սկզբունքի կամ հասկացության ներկայիս ընկալումը ուսանողի կողմից, ապա եղանակներ փնտրել՝ նրանց ուսման գործընթացի միջով ուղղորդելու համար:

Ուսանողի պատրաստում. Խնդրեք ուսանողներին պատրաստ գալ դասարան, որպեսզի պատմեն, թե ինչ գիտեն Աստվածագլխի մասին, և կիսվեն իրենց հարցերով:

Հնարավոր ուսումնական վարժություններ

Ի՞նչն է օգնում Վերջին Օրերի Սրբերի Եկեղեցու երիտասարդներին դիմակայել դժվարություններին

Ուսանողների կողմից հետևյալ հարցերի քննարկման ընթացքում կարող եք ցուցադրել հետևյալ հայտարարությունը:

Կարդացեք Առաջին Նախագահությունից Նախագահ Դիտեր Ֆ․ Ուխդորֆի հետևյալ հայտարարությունը․

Պարբերականի հոդվածը վերնագրված էր՝ «Մորմոն դեռահասները ավելի լավ են դիմակայում. ուսումնասիրությունը ցույց տվեց, որ նրանք գերազանցում են իրենց հասակակիցներին՝ պատանեկան ընկճախտին դիմակայելու գործում»: Այդ հոդվածը եզրակացնում է, որ «Մորմոնները հնարավորինս խուսափում են ռիսկային վարքագծից, լավ են սովորում դպրոցում և դրական վերաբերմունք ունեն ապագայի հանդեպ»: Այդ ուսումնասիրության ժամանակ հարցազրույց վարող հետազոտողներից մեկն ասել է․ «Մեր ուսումնասիրած գրեթե բոլոր անվանակարգերում առկա էր մեկ օրինաչափություն՝ մորմոններն առաջին տեղում էին»:

(Դալլին Հ. Օուքս, «Ծնողները և երեխաները», Ensign կամ Լիահոնա, նոյեմբեր 2018, 62)

• Ձեր կարծիքով, Վերջին Օրերի Սրբերի Եկեղեցու երիտասարդներն ինչո՞ւ են այսքան լավ դիմակայում դժվարություններին:

Մտածեք ձեր անձնական փորձառության մասին:

Առաջարկեք ուսանողներին գնահատել իրենց հետևյալ սանդղակով.

• Ձեր կարծիքով, որքանո՞վ է ձեզ համապատասխանում հարցազրույց անցած երիտասարդների նկարագրությունը:

1. Այն ճիշտ է նկարագրում ինձ:

2. Այն մասամբ է նկարագրում ինձ:

3. Այն չի համապատասխանում իմ նկարագրին:

Նախագահ Օուքսը նշում է, որ իր կարծիքով, պատճառներից մեկը, թե Հիսուս Քրիստոսի Վերջին Օրերի Սրբերի Եկեղեցու երիտասարդներն ինչու են այսքան պատրաստ՝ դիմակայելու մարտահրավերներին, փրկության ծրագրի նրանց ընկալումն է և Աստծո հետ հարաբերությունների նրանց իմացությունը (տես «Ծնողները և երեխաները», 62): Մեկ այլ առիթով նա ուսուցանել է.

Քանի որ մենք ունենք ճշմարտությունը Աստվածագլխի և Նրանց հետ մեր հարաբերության, կյանքի նպատակի, մեր հավերժական ճակատագրի բնույթի մասին, մենք ունենք լավագույն ճանապարհի քարտեզը և հավաստիացում՝ այս մահկանացու կյանքում մեր ուղևորության համար:

(Դալլին Հ. Օուքս, «Աստվածագլուխը և Փրկության ծրագիրը», Ensign կամ Լիահոնա, մայիս 2017, 103)

• Ձեր կարծիքով, այս ճշմարտությունների ընկալումն ինչո՞ւ է օգնում Վերջին Օրերի Սրբերի Եկեղեցու պատանիներին խուսափել ռիսկային վարքագծից, լավ սովորել դպրոցում և դրական վերաբերմունք ունենալ ապագայի հանդեպ:

• Նույնիսկ Վերջին Օրերի Սրբերի Եկեղեցու երիտասարդների շրջանում ի՞նչ խոչընդոտներ են դժվարացնում ճանաչել Երկնային Հորը և Հիսուս Քրիստոսին՝ Սուրբ Հոգու զորության միջոցով:

Մտածեք այն մասին, թե ինչ գիտեք և ինչ եք հասկանում Աստվածագլխի դերերի և Երկրային Հոր ու Հիսուս Քրիստոսի՝ ձեր հանդեպ ունեցած սիրո մասին: Այս դասի ժամանակ դուք հնարավորություն կունենաք ավելին իմանալ Երկնային Հոր, Հիսուս Քրիստոսի և Սուրբ Հոգու մասին, ապա խորհել, թե Նրանց մասին սովորելով, ինչպես կօգնեք ձեզ ձեր կյանքում:

Սուրբ գրություններն ուսուցանում են Աստվածագլխի մասին

Կարող եք առաջարկել ուսանողներին կիսվել, թե ինչ են պատրաստել դասի համար՝ խնդրելով նրանց գրի առնել իրենց իմացածը Աստվածագլխի մասին, և որքան խորն են նրանց գիտելիքները:

Վերցրեք մաքուր թերթիկ և այն երեք սյունակների բաժանեք՝ անվանելով դրանք «Երկնային Հայր», «Հիսուս Քրիստոս» և «Սուրբ Հոգի»:Յուրաքանչյուր սյունակի մեջ գրեք մեկ կամ երկու ճշմարտություն, որ գիտեք Աստվածագլխի այս անդամի մասին: Ներառեք կարճ բացատրություն, թե ինչպես իմացաք յուրաքանչյուր ճշմարտությունը կամ ինչու եք հավատում դրան: Դասի ընթացքում սյունակներում նշեք, թե ինչ սովորեցիք Աստվածագլխի յուրաքանչյուր անդամի մասին:

Այս վարժությունը կարելի է կատարել նաև դասարանով՝ երեք սյունակները գրատախտակին գրելով: Կարող եք առաջարկել ուսանողներին դասի ընթացքում մոտենալ գրատախտակին և ավելացնել տարբեր գաղափարներ:

Սուրբ գրություններում կա մի հատված, որտեղ մենք կարող ենք ավելին իմանալ Աստվածագլխի մասին. երբ Հիսուս Քրիստոսը մկրտվեց Հովհաննես Մկրտիչի կողմից:

Ցուցադրեք Հիսուս Քրիստոսի մկրտության նկարը:

Հետևյալ ավետարանական պատմություններից մեկում կամ մի քանիսում կարդացեք Հիսուս Քրիստոսի մկրտության մասին՝ փնտրելով, թե ինչ կարող եք իմանալ Աստվածագլխի յուրաքանչյուր անդամի մասին:

Ուսանողները կարող են բացահայտել հետևյալ ճշմարտությունները. Աստվածագլուխը երեք առանձին էակներ են, Հիսուս Քրիստոսը ենթարկվում է Հոր կամքին, Հիսուս Քրիստոսը կատարում է ամեն արդարությունը, Երկնային Հայրը և Սուրբ Հոգին վկայություն են բերում Հիսուս Քրիստոսի մասին, Սուրբ Հոգին հաստատում է արարողությունները, Երկնային Հայրը գոհ է, որ հնազանդվում ենք Իրեն

• Մատթեոս 3.13–17

• Մարկոս 1.9-11

• Ղուկաս 3.21-22

• Ի՞նչ եք սովորել Աստվածագլխի յուրաքանչյուր անդամի մասին:

Ուշադիր լսեք, երբ ուսանողները կիսվեն, ապա օգտագործեք հետևյալ տեղեկությունների որոշ մասը կամ ամբողջ ծավալը՝ օգնելով նրանց ավելի լավ հասկանալ Աստվածագլուխը:

Այս հատվածներն օգնում են մեզ հասկանալ, որ Աստվածագլխի յուրաքանչյուր անդամ առանձին էակ է և կարևոր դեր է կատարում մեր կյանքում: Օրինակ՝ Փրկիչը մեզ օրինակ ծառայեց, թե ինչպես կատարել Հոր կամքը: Երբ Աստված գոհ էր Հիսուս Քրիստոսից Նրա մկրտության ժամանակ, Նա ցույց տվեց, որ Ինքը սիրող Երկնային Հայր է, ով երջանիկ է, երբ մենք հնազանդ ենք իրեն:

• Ե՞րբ եք զգացել, որ Երկնային Հայրը գոհ է ձեզանից ինչ-որ մի բան անելու համար: Նրա գոհ լինելու մասին իմացությունն ինչպե՞ս ազդեց ձեզ վրա։

Որոշ ուսանողներ կարող են ի սկզբանե մտածել, թե իրենք երբևէ չեն արել որևէ բան, որը կարող է գոհացնել Երկնային Հորը: Դա կարող է օգնել նրանց ավելի ուշադիր մտածել այս հարցերի մասին և ուշադրություն դարձնել իրենց հարցերին ու զգացմունքներին: Բացահայտելով այն պահերը, երբ նրանք սեր, ուրախություն, խաղաղություն կամ բարություն են զգացել (Սուրբ Հոգուց եկող զգացմունքները), ուսանողները կկարողանան տեսնել այն պահերը, երբ Երկնային Հայրը երջանիկ էր իրենց գործողություններով (տես Գաղատացիս 5.22):

Մարգարե Ջոզեֆ Սմիթը (1805–44) բացատրել է, որ Սուրբ Հոգին չի հայտնվել աղավնու տեսքով։ Փոխարենը աղավնին նշան էր, որ Սուրբ Հոգին ներկա էր այդ իրադարձությանը։ Ջոզեֆ Սմիթն ուսուցանել է. «Սուրբ Հոգին չի կարող վերափոխվել աղավնու. այլ աղավնու նշան էր տրվել Հովհաննեսին՝ գործի ճշմարտության վկայության համար» (Եկեղեցու Նախագահների ուսմունքները [2007], 81):

• Ե՞րբ է Սուրբ Հոգին ճշմարտություն վկայել ձեզ:

• Ի՞նչ հարցեր ունեք Աստվածագլխի մասին:

Օգտագործեք այս կամ այլ մատչելի տարբերակներ, որոնք լավագույնս կհամապատասխանեն ուսանողների կարիքներին: Որևէ տարբերակ ընտրելու փոխարեն օգտակար կլինի նաև դասարանով ուսումնասիրել կամ տեսանյութեր դիտել:

Ընտրեք հետևյալ տարբերակներից մեկը կամ մի քանիսը, որպեսզի օգնեք նրանց պատասխաններ գտնել Աստվածագլխի վերաբերող ձեր հարցերին: Ուսումնասիրելիս փնտրեք նաև, թե Աստվածագլխի ընկալումն ինչպես կարող է անհատապես օրհնել ձեզ:

1. Սուրբ գրություններում փնտրեք լրացուցիչ գաղափարներ: Կարող եք փնտրել « Աստված, Աստվածագլուխ » Սուրբ գրքերի ուղեցույցում կամ « Աստվածագլուխ »՝ Թեմատիկ ուղեցույցում:

2. Ուսումնասիրեք մարգարեների և առաքյալների ուսմունքները Աստվածագլխի մասին: Օրինակ՝ կարող եք կարդալ Դալին Հ. Օուքսի «Աստվածագլուխը և փրկության ծրագիրը», Ensign կամ Լիահոնա, մայիս 2017, 100–103) կամ Ջեֆրի Ռ. Հոլլանդի «Իմանալով Աստվածագլուխը» (Ensign կամ Լիահոնա, հունվար 2016, 32-39):

3. Դիտեք «Ի՞նչ է Աստվածագլուխը» (7:03) կամ «Աստվածագլուխ՝ Նա ինձ գիտի» (3:01): Երկուսն էլ կարող եք գտնել ChurchofJesusChrist.org կայքում:

• Ո՞ր սուրբ գրությունները կամ ուսմունքներն են օգնել ձեզ ավելի շատ բան իմանալ Աստվածագլխի մասին: Ի՞նչ եք սովորել։

• Ինչպե՞ս կարող է այս գիտելիքը օրհնել ձեր հարաբերությունները Նրանց հետ:

Պատկերացրեք, որ ձեզ հարցազրույցի են հրավիրել դասի սկզբում քննարկված հոդվածին հաջորդող հոդվածի վերաբերյալ: Բազմաթիվ մարդիկ են գրել խմբագրին և ցանկանում են իմանալ, թե ինչու են Վերջին Օրերի Սրբերի Եկեղեցու երիտասարդներն ավելի լավ դիմակայում պատանեկան ընկճախտին: Դուք հնարավորություն ունեք կիսվել, թե Աստվածագլխի յուրաքանչյուր անդամ ինչպե՞ս է օգնել ձեզ Իրենց անհատական, բայց փոխկապակցված դերերով: Օրինակ՝ դուք կարող եք փորձառություններ ունենալ, երբ Երկնային Հայրը պատասխանում է ձեր աղոթքներին, երբ Հիսուս Քրիստոսը տանջվում է ձեր մեղքերի համար կամ, երբ Սուրբ Հոգին ձեզ ճշմարտություն է վկայում: Ծրագրեք ձեր արձագանքը՝ պատասխանելով հետևյալ հարցերին:

• Աստվածագլխի յուրաքանչյուր անդամ ինչպե՞ս է օգնել ձեզ դիմակայել պատանեկան կյանքի դժվարություններին:

• Ինչպիսի՞ փորձառություններ են օգնել ձեզ ավելի լավ ճանաչել Աստվածագլխի տարբեր անդամներին:

• Ի՞նչ խորհուրդ կտայիք, որ ուրիշներն անեն Երկնային Հոր, Հիսուս Քրիստոսի և Սուրբ Հոգու օրհնությունները ստանալու համար:

Մի քանի ուսանողների խնդրեք կիսվել հարցերից մեկին տված իրենց պատասխանով: Կիսվեք ձեր անձնական վկայությամբ, թե իմանալով և հասկանալով Աստվածագլուխը, ինչպե՞ս եք օգնում ձեզ ձեր կյանքում:

Բացատրական և պատմական տեղեկություն

Ինչո՞ւ են սուրբ գրություններն ասում, որ Հայրը, Որդին և Սուրբ Հոգին «միասնական են», եթե նրանք երեք տարբեր և առանձին Էակներ են

Տասներկու Առաքյալների Քվորումից Երեց Ջեֆրի Ռ. Հոլլանդը բացատրել է.

Մենք հավատում ենք, որ Նրանք մեկ են մարդկային ընտանիքի փրկության համար գործելակերպով, մեթոդներով և պարտավորություններով: Մենք հավատում ենք, որ Նրանք լցված են ողորմության և սիրո, արդարության և շնորհի, համբերության, ներողամտության և փրկագնման նույն աստվածային զգացումով: Կարծում եմ, ճիշտ կլինի ասել` մենք հավատում ենք, որ նրանք մեկ են` ամեն մի էական և հավերժական հատկանիշով, բացի հավատալուց, որ Նրանք երեք անձնավորություններ են` միավորված մեկ էության մեջ, Երրորդության մի հասկացություն, որը երբեք չի ուսուցանվել սուրբ գրքերում, որովհետև այն ճիշտ չէ։…

Մենք հայտարարում ենք, որ սուրբ գրություններից ակնհայտ է, որ Հայրը, Որդին և Սուրբ Հոգին առանձին անձնավորություններ են, երեք աստվածային էակներ, հաշվի առնելով այնպիսի անհերքելի օրինակներ, ինչպիսիք են՝ Փրկիչի մեծ Միջնորդական Աղոթքը … [տես Հովհաննես 17 ] … , Նրա մկրտությունը Հովհաննեսի կողմից [տես Մատթեոս 3.13–17 , Մարկոս 1.9–11 , Ղուկաս 3.21–22 ], Կերպարանափոխության Սարի վրա Նրա փորձառությունը [տես Մարկոս 9.7 , Ղուկաս 9.35 ] և Ստեփանոսի նահատակությունը [տես Գործք Առաքելոց 7.55–56 ], որոնք միայն չորս օրինակներ են:

(Ջեֆրի Ռ. Հոլլանդ, «Միակ ճշմարիտ Աստված և Հիսուս Քրիստոս, որին Նա ուղարկեց», Ensign կամ Լիահոնա, նոյեմբեր 2007, 40-41)

Մատթեոս 3.16

: Արդյո՞ք Սուրբ Հոգին աղավնու կերպարանքով հայտնվեց:

Մարգարե Ջոզեֆ Սմիթը (1805–44) բացատրել է.

Աղավնու նշանը հաստատվել է աշխարհի ստեղծումից առաջ՝ որպես Սուրբ Հոգու ներկայության վկայություն, իսկ դևը չի կարող գալ աղավնու նշանով։ Սուրբ Հոգին անձնավորություն է և անձի տեսք ունի։ Այն իրեն չի ամփոփում աղավնու տեսքի մեջ, այլ արտահայտվում է աղավնու նշանով։ Սուրբ Հոգին չի կարող վերափոխվել աղավնու. այլ աղավնու նշան էր տրվել Հովհաննեսին՝ գործի ճշմարտության վկայության համար, քանի որ աղավնին ճշմարտության և անմեղության խորհրդանիշն է կամ նշանը:

(Եկեղեցու Նախագահների ուսմունքները. Ջոզեֆ Սմիթ [2007], 81)

Օժանդակ ուսումնական վարժություն

Ուսանողի այլընտրանքային պատրաստում

Խնդրեք ուսանողներին հիշել մի օրինակ, երբ Երկնային Հայրը, Հիսուս Քրիստոսը և Սուրբ Հոգին միասնական նպատակ ունեն, սակայն տարբեր դերեր են կատարում: (Օրինակ՝ մենք աղոթում ենք Երկնային Հորը Հիսուս Քրիստոսի անունով և Սուրբ Հոգին օգնում է մեզ ճանաչել մեր աղոթքների պատասխանները):