Seminelí
Mātiu 5; Luke 6

Mātiu 5; Luke 6

Vakai Fakalūkufuá

Ke kamata’i ʻa e Malanga ʻi he Moʻungá, naʻe akoʻi ʻe he Fakamoʻuí ʻa e founga ʻe lava ke fiefia ai ʻa e kakaí. Naʻá Ne akoʻi mai ʻe lava ke faitāpuekina ʻe heʻetau ngaahi sīpinga māʻoniʻoní ʻa e niʻihi kehé. Naʻá Ne fakahinohinoʻi ʻEne kau ākongá ke nau hoko ko ha faʻifaʻitakiʻanga ki he niʻihi kehé ʻaki ʻenau muimui kiate Iá. Naʻá Ne akoʻi ʻa e founga naʻá Ne haʻu ai ke fakakakato ʻa e fono ʻa Mōsesé, pea naʻá Ne fakafeʻiloaki ʻa e fono māʻolunga ange ʻo e ongoongoleleí. Naʻá Ne fakaafeʻi e taha kotoa ke hoko ʻo haohaoa he ʻoku haohaoa ʻa e Tamai Hēvaní.

Mātiu 5:1–12

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau ʻiloʻi ʻa e ngaahi ʻulungaanga faka-Kalaisí pea faʻu ha palani ke fakatupulaki ia ʻi heʻenau fekumi ki he fiefiá mo e haohaoá.

  • Teuteu ʻa e tokotaha akó: Fakaafeʻi e kau akó ke fili ha taha ʻo e ngaahi ʻulungaanga ʻi he Mātiu 5:1–12 te nau fie ʻilo lahi ange ki ai. Kole ange ke nau ako hono ʻuhingá pea mo fakakaukau ki he founga ʻe lava ke tataki ai ʻe he ʻulungaanga ko iá ki he fiefiá.

  • Fokotuʻu ki hono fakahoko ha ako ʻo fakafou ‘i he konifelenisi vitioó: ʻOku ʻi ai ha polokalama konifelenisi vitiō ʻe niʻihi ʻoku kau ai ha ngāue palakipoe hinehina ʻe lava ke fakaʻaongaʻi ʻe he kau akó ke taipe pe tohi ai. Kapau ʻoku maʻu ʻa e ngāue ko iá, fakakaukau ke fakaafeʻi ʻa e kau akó ke nau kumi ʻa e Ngaahi Monūʻiá ʻi he Mātiu 5:1–12 pea hiki ʻa e meʻa ʻoku nau maʻú ʻi he palakipoe hinehiná. Te nau lava leva ʻo tānaki atu ha ngaahi fakaʻuhinga ʻo e ngaahi foʻi leá ʻi heʻenau maʻu iá.

Mātiu 5:13–16

Taumuʻa ʻo e lēsoní: ʻE tokoniʻi ʻe he lēsoni ko ʻení ʻa e kau akó ke nau vakaiʻi ʻenau ngaahi ngāué mo e tōʻonga fakakaukaú ke fakahaaʻi lelei ange ʻa e maama ʻo Sīsū Kalaisí.

  • Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi fehuʻi ko ʻení: Ko hai ʻi hoʻo moʻuí ko ha sīpinga ʻo e moʻui faka-Kalaisí ʻi he leá mo e ngāué? Ko e hā e meʻa ʻoku nau fakahoko ke fakahaaʻi ai ‘a e maama mo e ʻofa ʻa e ʻOtuá? ʻOku uesia fēfē nai koe mo e niʻihi kehé ʻe heʻenau ngaahi ngāué?

  • Ngaahi meʻa: Māsima mo ha meʻakai ke ʻai ki ai ‘a e māsimá; ha sioʻata mo ha peni fakaʻilonga mōmoa

Fakataukei Fakatokāteliné: Mātiu 5:14–16

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau fakaʻaongaʻi ʻa e ngaahi tefitoʻi moʻoni ʻo hono maʻu ʻo e poto fakalaumālié ke hoko ko ha faʻifaʻitakiʻanga ki he niʻihi kehé pea toe ofi ange ai ki he Fakamoʻuí.

  • Teuteu ʻa e tokotaha akó: Fakaafeʻi e kau akó ke nau fakakaukau ki ha taha ʻi heʻenau moʻuí ʻoku hoko ko ha faʻifaʻitakiʻanga lelei kiate kinautolu. Hili iá pea ʻai ke nau fakakaukau ke telefoni ki he tokotahá ni pe faʻu ha kiʻi tohi ke fakahaaʻi ʻaki ʻenau houngaʻiá.

  • Ngaahi meʻa: Ngaahi naunau ke tā ʻe he kau akó ha fakatātā (pepa, peni vahevahe lanu kehekehe, kala, mo e alā meʻa pehē)

  • Fokotuʻu ki hono fakahoko ʻo e ako fakafou ‘i he konifelenisi vitioó: Teuteu ke fakaʻaliʻali e ngaahi meʻa ʻe fie maʻu ke vakai ki ai e kau akó, hangē ko e ngaahi tefitoʻi moʻoni ʻe tolu ki hono maʻu e ʻilo fakalaumālié mo e tūkungá. Fakaʻaongaʻi ʻa e ngāue fevahevaheʻaki-fakavitioó, pe fakaʻaliʻali ʻa e ngaahi meʻa ko ʻení ʻi he fepōtalanoaʻakí.

Mātiu 5:17–47

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke nau moʻui ʻaki e fono māʻolunga ange ʻa Kalaisí kae lava ke nau hoko ʻo hangē ko e Tamai Hēvaní.

  • Teuteu ʻa e tokotaha akó: Fakaafeʻi e kau akó ke nau lotua ke akoʻi kinautolu ʻe he Laumālié ʻi he seminelí. ʻE lava foki ke fakaafeʻi e kau akó ke nau lotua ʻenau kau faiakó mo e kaungāakó.

  • Meʻa: Ko ha fakatātā ʻo ha meʻa kuo ʻosi fakaleleiʻi—ko ha telefoni, meʻa ngāue, ko ha konga ʻo ha vala, mo e ngaahi alā meʻa peheé

  • Vitiō: “Tokangaʻi Hoʻo Laká” (2:36)

  • Fokotuʻu ki hono fakahoko e ako fakafou ‘i he konifelenisi vitioó: Kapau ʻoku fakalongolongo pe ngali manavasiʻi ʻa e kau akó fekauʻaki mo hono tali ʻo e ngaahi fehuʻí pe vahevahe ʻa e ngaahi fakakaukaú, fakakaukau ke fakaafeʻi kinautolu ke nau tali ʻo fakaʻaongaʻi ʻa e ngāue fepōtalanoaʻakí.

Mātiu 5:48

Taumuʻa ʻo e lēsoní: ʻE tokoni e lēsoni ko ʻení ke mahino ki he kau akó e fekau ʻa e Fakamoʻuí “ke haohaoa ʻakimoutolu he ʻoku haohaoa ʻa [ʻetau] Tamai ʻoku ʻi he langí” ( Mātiu 5:48).

  • Teuteu ʻa e tokotaha akó:Fakaafeʻi e kau akó ke nau ʻomi hanau ngaahi laʻitā ʻi heʻenau kei iīkí ki he kalasí. ʻE lelei ange ke fakahoko ʻeni ʻi ha uike ʻe taha kimuʻa ʻaki e tokoni ‘a e mātuʻá.

  • Meʻa ke fakaʻaliʻali:Ko e ngaahi fakamatala meia Palesiteni Russell M. Nelson, ʻEletā Jeffrey R. Holland, mo ʻEletā Gerrit W. Gong ke ako e kau akó ʻi ha fanga kiʻi kulupu iiki

  • Fokotuʻu ki hono fakahoko ʻo e ako fakafou ‘i he konifelenisi vitioó: Fakakaukau ke fakaafeʻi e kau akó ke nau ngāue ʻi he fanga kiʻi lokí ke aleaʻi e ngaahi fakamatala fakaepalōfita ʻoku fakakau ʻi he lēsoní. Fakapapauʻi ke vahe ha taki fakakulupu pea tomuʻa ʻoange ha ngaahi fakahinohino mahino koeʻuhí ke lava ʻe he kau akó ʻo kamata ʻenau fealēleaʻakí ʻi he vave tahá.