ម៉ាថាយ ៦:១៩–៣៤
« ចូរស្វែងរកនគរនៃព្រះជាមុនសិន »
ជាផ្នែកមួយនៃបទបង្រៀននៅលើភ្នំ ព្រះយេស៊ូវគ្រីស្ទបានបង្រៀនពួកសិស្សរបស់ទ្រង់ឲ្យ « ស្វែងរក [ ដើម្បីស្ថាបនា ] … នគរនៃព្រះជាមុនសិន » ( ម៉ាថាយ ៦:៣៣ ) ។ នៅក្នុងមេរៀននេះ អ្នកនឹងមានឱកាសសញ្ជឹងគិត និងចែកចាយសារៈសំខាន់នៃការដាក់ព្រះជាចម្បងនៅក្នុងជីវិតរបស់អ្នក ។
ការរៀបចំសិស្ស ៖ សូមអញ្ជើញសិស្សឲ្យសញ្ជឹងគិតពីរបៀប ដែលពួកគេអាចចែកចាយជាមួយនឹងអ្នកដទៃនូវសារៈសំខាន់ និងពរជ័យនៃការដាក់ព្រះជាចម្បងនៅក្នុងជីវិតរបស់ពួកគេ ។
សកម្មភាពរៀនសូត្រដែលអាចមាន
ព្រះអង្គសង្គ្រោះបានបង្រៀនពួកសិស្សរបស់ទ្រង់ឲ្យ « ស្វែងរកនគរនៃព្រះ … ជាមុនសិន »
សូមអានស្ថានភាពនៃជីវិតពិតដូចខាងក្រោម ៖
-
យុវជនម្នាក់នៅរដ្ឋកាលីហ្វ័រញ៉ា សហរដ្ឋអាមេរិក គឺជាអ្នកពូកែខាងជិះក្ដាររអិលលើទឹក ប៉ុន្តែថ្នាក់សិក្ខាសាលាត្រូវបានកំណត់ពេលវេលាដូចគ្នានឹងការហាត់សម្រាប់ក្រុមក្ដាររអិលលើទឹកនៅវិទ្យាល័យរបស់គាត់ ។
-
នារីវ័យក្មេងម្នាក់នៅក្នុងប្រទេសប្រេស៊ីល ត្រូវបានគេអញ្ជើញឲ្យចូលរួមជាកិត្តិយសនៅឯពិធីខួបកំណើតគម្រប់ខួប ១៥ ឆ្នាំ នៃមិត្តរបស់នាង ប៉ុន្តែនាងត្រូវគេតម្រូវឲ្យស្លៀកសម្លៀកបំពាក់ដែលមិនស្របតាមបទដ្ឋានរបស់នាង ។
-
យុវជនម្នាក់នៅប្រទេសនូវែលសេឡង់គឺជាកីឡាករបាល់ឱបដ៏មានទេពកោសល្យមា្នក់ដែលគិតថា គេនឹងទទួលយកគាត់ជាអ្នកលេងអាជីព ប៉ុន្តែគាត់មានអាយុគ្រប់គ្រាន់ដើម្បីទៅបម្រើបេសកកម្មពេញម៉ោង ។
ទាំងនេះជាឧទាហរណ៍នៃស្ថានភាពដែលយុវវ័យអាចជ្រើសរើសយកព្រះជាចម្បងនៅក្នុងជីវិតរបស់ពួកគេ ទោះបីវាមិនងាយស្រួលក៏ដោយ ។
-
តើសំណួរ ឬកង្វល់អ្វីខ្លះដែលយុវវ័យនៅក្នុងស្ថានភាពទាំងនេះអាចមាន អំពីការដាក់ព្រះជាចម្បងនៅក្នុងជីវិតរបស់ពួកគេ ?
-
តើអ្នក និងមិត្តភក្តិរបស់អ្នកអាចមានសំណួរ ឬកង្វល់អ្វីខ្លះអំពីការដាក់ព្រះជាចម្បងនៅក្នុងជីវិតរបស់អ្នក ?
នៅពេលអ្នកសិក្សាមេរៀននេះ សូមទូលទៅព្រះអម្ចាស់ឲ្យជួយអ្នកដោះស្រាយកង្វល់របស់អ្នក ហើយទទួលអារម្មណ៍ពីសារៈសំខាន់នៃការដាក់ទ្រង់ជាចម្បង ។ សូមសិក្សាបណ្តុំខគម្ពីរដូចតទៅនេះ ។ សូមស្វែងរកការណែនាំពីព្រះវិញ្ញាណបរិសុទ្ធ ដើម្បីជួយអ្នកឲ្យស្វែងរក និងយល់ពីសេចក្តីពិត ដែលព្រះអង្គសង្គ្រោះបានបង្រៀន ដែលអាចជួយអ្នកឲ្យដាក់ព្រះជាចម្បងនៅក្នុងជីវិតរបស់អ្នក ។
សិស្សអាចជ្រើសរើសបណ្ដុំខគម្ពីរណាមួយដែលពួកគេចង់សិក្សា ឬពួកគេអាចត្រូវបានចាត់ឲ្យសិក្សាជម្រើស ក ឬ ជម្រើស ខ ។ វាអាចមានគុណប្រយោជន៍ក្នុងការបង្ហាញជម្រើសខាងក្រោមនៅលើក្តារខៀន ។
ជម្រើស ក ៖ ម៉ាថាយ ៦:១៩–២៤ ។ នៅក្នុងខគម្ពីរទាំងនេះ ព្រះអង្គសង្រ្គោះបានប្រើពាក្យ ទ្រព្យសម្បត្តិ មានន័យថា អ្វីដែលយើងឲ្យតម្លៃខ្លាំង និង ភ្នែក ជានិមិត្តរូបនៃចក្ខុវិស័យ ឬការផ្តោតអារម្មណ៍របស់យើងនៅក្នុងជីវិត ។ ការបកប្រែដោយ យ៉ូសែប ស៊្មីធ បានបញ្ជាក់ច្បាស់ពីអ្វីដែលព្រះអម្ចាស់បានបង្រៀននៅក្នុង ខទី ២២ ថា « បើសិនជាភ្នែករបស់យើងស្មោះស្ម័គ្រទាំងស្រុងទៅចំពោះ សិរីល្អនៃព្រះ នោះរូបកាយយើងទាំងមូលនឹងបានពោរពេញទៅដោយពន្លឺ » ( ការបកប្រែដោយ យ៉ូសែប ស៊្មីធ ម៉ាថាយ ៦:២២ [ នៅក្នុង ម៉ាថាយ ៦:២២, ] សូមមើលផងដែរ គោលលទ្ធិ និងសេចក្តី សញ្ញា ៨៨:៦៧ ) ។ ដូចគ្នានេះផងដែរ វាអាចមានប្រយោជន៍ក្នុងការកត់សម្គាល់ថាពាក្យ ទ្រព្យសម្បត្តិ សំដៅទៅលើភាពជាលោកីយ៍ ឬភាពមានបាន ( សូមមើល ម៉ាថាយ ៦:២៤ ) ។
ជម្រើស ខ ៖ ម៉ាថាយ ៦:២៥–៣៤ ។ ការបកប្រែដោយ យ៉ូសែប ស៊្មីធ នៃខគម្ពីរទាំងនេះបញ្ជាក់ច្បាស់ថា ព្រះអម្ចាស់កំពុងតែមានបន្ទូលទៅកាន់ពួកសាវករបស់ទ្រង់ អំពីការទទួលខុសត្រូវរបស់ពួកគេដើម្បី « ចូល … ទៅក្នុងពិភពលោក … បង្រៀនប្រជាជន » ( ការបកប្រែដោយយ៉ូសែបស្ម៊ីធ ម៉ាថាយ ៦:២៥–២៦ [ នៅក្នុង Bible appendix] ) ។ ការណែនាំរបស់ព្រះអម្ចាស់គឺជាក់លាក់ចំពោះសាវកទាំងដប់ពីរនាក់នៅពេលនេះ ប៉ុន្តែគោលការណ៍ដែលទ្រង់បានបង្រៀនក៏អនុវត្តចំពោះយើងផងដែរ ។ សូមកត់សម្គាល់គំរូអំពីរបៀបដែលព្រះថែរក្សាការបង្កបង្កើតរបស់ទ្រង់ រួមទាំងយើងផងដែរ ។ នៅពេលអ្នកសិក្សា សូមយកចិត្តទុកដាក់លើ ខទី ៣៣ ៖ ការបកប្រែដោយ យ៉ូសែប ស្ម៊ីធ នៃខនេះចាប់ផ្តើមថា « ហេតុដូច្នោះហើយ ចូរកុំស្វែងរកអ្វីៗនៃលោកិយនេះឡើយ ប៉ុន្តែចូរអ្នកស្វែងរកដើម្បីកសាងនគរព្រះ » ( ការបកប្រែដោយយ៉ូសែបស្ម៊ីធ ម៉ាថាយ ៦:៣៨ [ នៅក្នុង Bible Appendix ] ) ។
-
ពេលអ្នកអានបន្ទូលរបស់ព្រះអង្គសង្គ្រោះ ហើយអញ្ជើញការដឹកនាំពីព្រះវិញ្ញាណបរិសុទ្ធ តើអ្នករកឃើញអ្វីខ្លះដែលមានន័យសម្រាប់អ្នក ? ហេតុអ្វីវាមានអត្ថន័យ ?
សូមអញ្ជើញសិស្សបីបួននាក់ឲ្យចែកចាយអ្វីដែលពួកគេបានរកឃើញ ។ សូមពិចារណាសរសេរលើក្តារខៀននូវគោលការណ៍ដែលពួកគេបានលើកឡើង ។ ប្រសិនបើសិស្សមិនចែកចាយគោលការណ៍ដោយធម្មតាទេ សូមពិចារណាសួរថា « តើអ្នកនឹងសង្ខេបសេចក្តីពិតមួយ ដែលព្រះអង្គសង្គ្រោះបានបង្រៀនដោយរបៀបណា ? »
ព្រះអង្គសង្គ្រោះបានបង្រៀនគោលការណ៍ពិតនៅក្នុងខគម្ពីរទាំងនេះ រួមមានគោលការណ៍ដែលថា យើងមិនអាចបម្រើព្រះផង និងទ្រព្យសម្បត្តិផង ( ឬលោកិយ ) បានទេ ហើយថា ប្រសិនបើយើងស្វែងរកដើម្បីកសាងនគរព្រះជាមុនសិន នោះទ្រង់នឹងប្រទានពរដល់យើងនូវអ្វីដែលទ្រង់ជ្រាបថាយើងត្រូវការ ។
-
តើអ្នកដឹងអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ដែលនឹងជំរុញចិត្តអ្នកឲ្យដាក់ទ្រង់ទាំងទ្វេជាចម្បងនៅក្នុងជីវិតរបស់អ្នក ?
យុវវ័យដែលដាក់ព្រះជាមុន
ប្រសិនបើអាច សូមមើលវីដេអូមួយក្នុងចំណោមវីដេអូខាងក្រោម អំពីយុវវ័យដែលដាក់ព្រះជាចម្បង ។ វីដេអូទាំងឡាយត្រូវនឹងស្ថានភាពនៅដើមមេរៀននេះ ។ ( វីដេអូទាំងអស់មាននៅលើគេហទំព័រ ChurchofJesusChrist.org ) ។
« No Regrets » ( ៥:៣៨ ) ៖ យុវជនដែលជិះក្ដាររអិលលើទឹក ។
« Virtuous Young Women » ( ៣:៥០ ) ៖ យុវនារីដែលត្រូវបានគេស្នើសុំឲ្យស្លៀកសម្លៀកបំពាក់មិនសមរម្យ ។
« Your Day for a Mission » ( ៣:៣១ ) ៖ យុវជនដែលលេងបាល់ឱប ។
-
តើអ្នកចូលចិត្តអ្វីខ្លះអំពីវីដេអូនេះ ? តើអ្នកបានរៀនអ្វីខ្លះអំពីការដាក់ព្រះជាចម្បង ?
-
តើអ្នកបានដាក់ព្រះជាចម្បងក្នុងជីវិតរបស់អ្នកនៅពេលណា ?
-
តើពរជ័យអ្វីខ្លះដែលអ្នកបានឃើញ ជាលទ្ធផលនៃការសម្រេចចិត្តរបស់អ្នក ?
សូមមើលទឹកចិត្តអ្នកដទៃឲ្យដាក់ព្រះជាចម្បង
សូមចំណាយពេលបន្តិចដើម្បីគិតអំពីរបៀបដែលការបង្រៀនរបស់ព្រះអង្គសង្គ្រោះ ឲ្យដាក់ព្រះជាចម្បងក្នុងជីវិតរបស់អ្នក អនុវត្តចំពោះអ្នក ។ សូមបន្តស្វែងរកការបំផុសគំនិតពីព្រះវិញ្ញាណបរិសុទ្ធ នៅពេលអ្នកបញ្ចប់មេរៀននេះ ។
សូមស្រមៃថា គណៈប្រធានស្តេក ឬគណៈប្រធានមណ្ឌលរបស់អ្នកបានអញ្ជើញកូរ៉ុម ឬថ្នាក់របស់អ្នកឲ្យបង្កើតវីដេអូមួយ ដើម្បីជួយយុវជនក្នុងតំបន់របស់អ្នកឲ្យទទួលអារម្មណ៍ជំរុញចិត្តឲ្យដាក់ព្រះជាចម្បងក្នុងជីវិតរបស់ពួកគេ ។ គណៈប្រធានគ្រោងនឹងបង្ហាញវីដេអូនេះនៅក្នុងព្រឹត្តិការណ៍យុវវ័យមួយ ។
សិស្សអាចដាក់គម្រោងធ្វើវីដេអូនេះរៀងៗខ្លួន ឬជាក្រុមតូចៗ ។ ប្រសិនបើការគ្រោងវីដេអូនេះមិនទាក់ទងនឹងសិស្សរបស់អ្នកទេ នោះពួកគេអាចគ្រោងការនិយាយ ឬមេរៀនមួយស្តីពីការដាក់ព្រះជាចម្បងនៅក្នុងជីវិតរបស់ពួកគេ ។
សូមបង្កើតគ្រោងលម្អិតសម្រាប់វីដេអូអ្នក ។ ( អ្នកមិនចាំបាច់ថតវីដេអូទេ អ្នកគ្រាន់តែត្រូវរៀបចំផែនការប៉ុណ្ណោះ ) ។ សូមរួមបញ្ចូលចំណុចខាងក្រោមនៅក្នុងគម្រោងរបស់អ្នក ៖
-
យ៉ាងហោចណាស់មានសេចក្តីពិតមួយ ដែលព្រះអង្គសង្គ្រោះបានបង្រៀននៅក្នុង ម៉ាថាយ ៦ និងការពន្យល់ពីរបៀបដែលវាអាចជួយយុវវ័យ ឲ្យដាក់ព្រះជាចម្បងនៅក្នុងជីវិតរបស់ពួកគេ ។
-
ឧទាហរណ៍ពីមនុស្សសម័យថ្មីដែលគេដាក់ព្រះជាចម្បងនៅក្នុងជីវិតរបស់ពួកគេ ។ ឧទាហរណ៍នេះអាចជាបទពិសោធន៍ផ្ទាល់ខ្លួន ឬបទពិសោធន៍របស់នរណាម្នាក់ដែលអ្នកស្គាល់ ។ សូមសរសេរឧទាហរណ៍សង្ខេបសាមញ្ញមួយ ។
សូមដាក់បញ្ចូលគម្រោងខាងក្រោមនេះមួយ ឬច្រើននៅក្នុងគម្រោងរបស់អ្នក ៖
-
សេចក្តីថ្លែងការណ៍របស់ថ្នាក់ដឹកនាំសាសនាចក្រ
-
រូបភាព ឬការបង្ហាញឲ្យឃើញ ដែលអ្នកអាចនឹងដាក់បញ្ចូល និងពេលវេលាដែលអ្នកដាក់បញ្ចូលវា
-
ទីបន្ទាល់ផ្ទាល់ខ្លួនរបស់អ្នក
បន្ទាប់ពីមានពេលគ្រប់គ្រាន់ហើយ សូមអញ្ជើញសិស្សឲ្យចែកចាយជាមួយសិស្សក្នុងថ្នាក់ នូវអ្វីដែលពួកគេនឹងបញ្ចូលនៅក្នុងវីដេអូរបស់ពួកគេ ។ នៅពេលពួកគេចែកចាយ សូមពិចារណាសួរសំណួរតាមដានដូចតទៅនេះ ៖ « ហេតុអ្វីអ្នកសម្រេចចិត្តផ្តោតលើឃ្លា ឬសេចក្តីពិតនោះ ? » « ហេតុអ្វីអ្នកសម្រេចចិត្តប្រើរឿងរ៉ាវ ឬបទពិសោធន៍នោះ ? » « ហេតុអ្វីអ្នកគិតថា វាអាចជួយយុវវ័យនៅសព្វថ្ងៃនេះបាន ? »
សូមពិចារណាយោងទៅកង្វល់ ឬសំណួរដែលសិស្សបានលើកឡើងនៅដើមមេរៀន ។ សូមសួរសិស្សថា « តើអ្វីដែលអ្នកបានរៀន អាចជួយដោះស្រាយនូវកង្វល់ទាំងនេះយ៉ាងដូចម្តេច ? »
អ្នកប្រហែលជាចង់ចែកចាយគម្រោងរបស់អ្នកសម្រាប់វីដេអូនេះជាមួយគ្រួសារ និងមិត្តភក្តិ ។ ពេលវេលាល្អដើម្បីធ្វើដូចនេះ អាចជាពេលពិភាក្សាពីប្រធានបទនេះជាមួយក្រុមគ្រួសាររបស់អ្នក នៅក្នុងការសិក្សា ចូរមកតាមខ្ញុំ របស់អ្នក ។
ប្រសិនបើអ្នកមានសមត្ថភាព សូមពិចារណាធ្វើវីដេអូរបស់អ្នក ហើយចែកចាយវាជាមួយអ្នកដទៃ ។
វិចារណកថា និង ព័ត៌មានសាច់រឿង
តើពរជ័យអ្វីដែលយើងទទួលនៅពេលយើងដាក់ព្រះជាចម្បងនៅក្នុងជីវិតរបស់យើង ?
ប្រធាន អ៊ែសរ៉ា ថាហ្វ ប៊ែនសឹន ( ឆ្នាំ ១៨៩៩–១៩៩៤ ) បានបង្រៀន ៖
យើងត្រូវតែដាក់ព្រះជាអាទិភាពនៅមុនអ្វីៗទាំងអស់នៅក្នុងជីវិតរបស់យើង ។ …
នៅពេលយើងដាក់ព្រះជាចម្បង នោះអ្វីៗទាំងអស់ផ្សេងទៀតចូលទៅក្នុងកន្លែងត្រឹមត្រូវរបស់វា ឬក៏ចេញពីជីវិតយើង ។ សេចក្ដីស្រឡាញ់របស់យើងចំពោះព្រះអម្ចាស់ ត្រូវបានបង្ហាញដោយមនោសញ្ចេតនារបស់យើង ដោយរបៀបដែលយើងចំណាយពេលវេលារបស់យើង ចំណូលចិត្តដែលយើងតាមរក និងលំដាប់លំដោយនៃអាទិភាពរបស់យើង ។
( អ៊ែសរ៉ា ថាហ្វ ប៊ែនសឹន « The Great Commandment—Love the Lord » Ensign ខែ ឧសភា ឆ្នាំ ១៩៨៨ ទំព័រ ៤ )
ប្រធាន រ័សុល អិម ណិលសុន បានបង្រៀន ៖
តើ បងប្អូន ស្ម័គ្រចិត្តទុកឲ្យព្រះមានឥទ្ធិពលដ៏ខ្លាំងបំផុតនៅក្នុងជីវិតរបស់បងប្អូនដែរឬទេ ? …
សូមគិតពិចារណាថា តើការស្ម័គ្រចិត្តបែបនោះអាចប្រទានពរជ័យដល់បងប្អូនប៉ុនណា ។ …
ប្រសិនបើបងប្អូនមានសំណួរដោយស្មោះអំពីដំណឹងល្អ ឬសាសនាចក្រនេះ កាលណាបងប្អូនជ្រើសរើសទុកឲ្យព្រះឈ្នះ នោះបងប្អូននឹងត្រូវបានដឹកនាំឲ្យទៅរកឃើញ និងយល់ពីសេចក្តីពិតដ៏នៅអស់កល្បជានិច្ចទាំងស្រុងដែលនឹងដឹកនាំជីវិតរបស់បងប្អូន ហើយជួយបងប្អូនឲ្យបន្តនៅរឹងមាំនៅលើផ្លូវនៃសេចក្តីសញ្ញា ។
នៅពេលបងប្អូនប្រឈមមុខនឹងការល្បួង—ទោះបីជាការល្បួងនោះកើតឡើងនៅពេលបងប្អូននឿយហត់ ឬមានអារម្មណ៍ឯកោ ឬយល់ច្រឡំក្ដី—សូមស្រមៃពីភាពក្លាហានដែលបងប្អូនអាចប្រមូលបាន នៅពេលបងប្អូនជ្រើសរើសទុកឲ្យព្រះឈ្នះនៅក្នុងជីវិតរបស់បងប្អូន និងនៅពេលបងប្អូនបួងសួងសូមទ្រង់ឲ្យពង្រឹងបងប្អូន ។ …
… នៅពេលបងប្អូនជ្រើសរើសទុកឲ្យព្រះឈ្នះក្នុងជីវិតរបស់បងប្អូន នោះបងប្អូននឹងដកពិសោធន៍ដោយខ្លួនឯងថា ព្រះរបស់យើងគឺជា « ព្រះនៃអព្ភូតហេតុ » [ មរមន ៩:១១ ] ។
( រ័សុល អិម ណិលសុន « Let God Prevail » Ensign ឬ Liahona ខែ វិច្ឆិកា ឆ្នាំ ២០២០ ទំព័រ ៩៤, ៩៥ )
តើព្រះអង្គសង្គ្រោះមានន័យដូចម្ដេច កាលទ្រង់មានបន្ទូលថា « កុំឲ្យខ្វល់ខ្វាយនឹងជីវិត » និង « កុំឲ្យខ្វល់ខ្វាយនឹងថ្ងៃស្អែកឡើយ ? » ( ម៉ាថាយ ១៦:២៣, ២៦ )
« ឃ្លាជាភាសាក្រិកដែលបានបកប្រែថា ‹ កុំឲ្យខ្វល់ខ្វាយនឹង › នៅក្នុង ម៉ាថាយ ៦:២៥, ៣៤ នៃកំណែស្ដេចជេមស៍ មានន័យថា មិនត្រូវបារម្ភ ឬព្រួយបារម្ភខ្លាំងពេកទេ » ( សៀវភៅសិក្សាព្រះគម្ពីរសញ្ញាថ្មីសម្រាប់សិស្ស [ សៀវភៅសិក្សាប្រព័ន្ធអប់រំសាសនាចក្រ ឆ្នាំ ២០១៤ ] ទំព័រ ២៩ ) ។
តើព្រះអង្គសង្គ្រោះមានន័យយ៉ាងណា នៅពេលទ្រង់មានព្រះបន្ទូលថា « សេចក្ដីលំបាកនៅថ្ងៃណា នោះគឺល្មមត្រឹមថ្ងៃនោះហើយ » ? ( ម៉ាថាយ ៦:៣៤ )
ឃ្លានេះមានន័យថា « កុំខ្ចីបញ្ហាពីថ្ងៃស្អែក—អ្នកមានបញ្ហាគ្រប់គ្រាន់ដើម្បីដោះស្រាយនៅថ្ងៃនេះហើយ » ( សៀវភៅសិក្សាព្រះគម្ពីរសញ្ញាថ្មីសម្រាប់សិស្ស ទំព័រ ២៩ ) ។
តើហត្ថជាអ្វី ? ( ម៉ាថាយ ៦:២៧ )
មួយហត្ថគឺជា « ឯកតានៃប្រវែងធម្មតាក្នុងភាសាហេព្រើរ ដើមឡើយគឺប្រវែងពីកែងដៃដល់ចុងម្រាមដៃ … [ ប្រហែល ] ២១ អ៊ីញកន្លះ នៅជំនាន់នៃព្រះអម្ចាស់របស់យើង » ( Bible Dictionary « Cubit » ) ។
សកម្មភាពរៀនសូត្របន្ថែម
សូមប្រយ័ត្នពីព្យាការីក្លែងក្លាយទាំងឡាយ
សូមពិចារណាសុំឲ្យសិស្សចែកចាយឧទាហរណ៍នៃគំនិត ដែលត្រូវបានពិភពលោកទទួលយក តែផ្ទុយពីផែនការរបស់ព្រះវរបិតាសួគ៌ ។ សូមពន្យល់ថា ព្យាការីក្លែងក្លាយគឺជាបុគ្គល ឬក្រុមដែលលើកស្ទួយគំនិតផ្ទុយពីផែនការរបស់ព្រះវរបិតាសួគ៌ និងជាអ្នកព្យាយាមបំផ្លាញសេចក្តីជំនឿ និងទីបន្ទាល់អំពីព្រះយេស៊ូវគ្រីស្ទ ។ សូមអាន ម៉ាថាយ ៧:១៥–២០ ហើយពិភាក្សាអំពីការបង្រៀនរបស់ព្រះអង្គសង្គ្រោះ អំពីការញែកឲ្យដឹងអំពីព្យាការីក្លែងក្លាយ និងមូលហេតុដែលការបង្រៀនទាំងនេះមានសារៈសំខាន់នៅជំនាន់របស់យើង ។ សេចក្តីថ្លែងការណ៍ខាងក្រោមដោយប្រធាន ដាល្លិន អេក អូក ក្នុងគណៈប្រធានទីមួយអាចមានប្រយោជន៍ ៖
« សាតាំងមានចិត្ដចង់បំភាន់គំនិតរបស់យើង ឬនាំយើងឲ្យវង្វេងអំពីរឿងសំខាន់ៗ ។ … ព្រះអង្គសង្គ្រោះ … បានប្រទានការសាកល្បងនេះដល់យើង ដើម្បីជួយយើងឲ្យជ្រើសរើសសេចក្ដីពិតពីក្នុងចំណោមការបង្រៀនខុសៗគ្នាជាច្រើន ដែលអាចបំភាន់យើង ទ្រង់បានបង្រៀនថា ៖ « អ្នករាល់គ្នានឹងស្គាល់គេបាន ដោយសារផលគេបង្កើត » ( នីហ្វៃទី៣ ១៤:១៦ ) ។ … ហេតុដូច្នេះហើយ យើងគួរតែមើលទៅលទ្ធផល—« ផលផ្លែ »—នៃគោលការណ៍ដែលបានបង្រៀន និងមនុស្សដែលបង្រៀនគោលការណ៍នោះ ។ នោះគឺជាចម្លើយដ៏ល្អបំផុតចំពោះការជំទាស់ជាច្រើន ដែលយើងបានឮទាស់នឹងសាសនាចក្រ និងគោលលទ្ធិ ព្រមទាំងគោលនយោបាយ និងភាពដឹកនាំនៃសាសនាចក្រ ។ សូមធ្វើតាមការសាកល្បងដែលព្រះអង្គសង្គ្រោះបានបង្រៀន ។ សូមមើលទៅផលផ្លែ—គឺលទ្ធផល ។
( ដាល្លិន អេក អូក « The Melchizedek Priesthood and the Keys » Ensign ឬ Liahona ខែ ឧសភា ឆ្នាំ ២០០២ ទំព័រ ៧១ ) ។