Filipianëve dhe Kolosianëve

Gjetja e Forcës te Jezu Krishti

Me çfarë problemesh ose sfidash përballesh ti dhe njerëzit përreth teje? Çfarë i bën të vështira këto sfida? A e pyet ndonjëherë veten nëse mund të marrësh ndihmën për të cilën ke nevojë për t’i mposhtur sfidat e tua? Pali u përball me shumë sfida të vështira në jetën e tij, duke përfshirë vite të tëra në arrest shtëpie në Romë. Ndërsa ishte në këto rrethana, ai u shkroi letra shenjtorëve në Filipi dhe Kolos dhe u mësoi atyre të drejtoheshin te Jezu Krishti për forcë. Ky mësim mund të të ndihmojë të kuptosh se nëpërmjet Jezu Krishtit mund të gjesh forcë për t’u përballur me sfidat e tua.

Ndihmesa që nxënësit të japin mësim. Ofrimi i mundësive që nxënësit të mësojnë njëri-tjetrin mund t’i ndihmojë ata t’i kuptojnë më mirë dhe t’i zbatojnë të vërtetat që mësojnë.

Përgatitja e nxënësve: Ftojini nxënësit të mësojnë përmendsh vargun te Filipianëve 4:13.

Veprimtari të Mundshme të të Mësuarit

Sfidat dhe problemet me të cilat përballen të rinjtë dhe të rejat

Merreni parasysh t’i vini nxënësit të shkruajnë në tabelë përgjigjet e tyre për pyetjen e parë më poshtë për referencë gjatë gjithë mësimit.

• Cilat janë disa nga problemet ose sfidat e zakonshme me të cilat përballen të rinjtë dhe të rejat në zonën tënde?

• Cilat prej këtyre problemeve ose sfidave mendoni se të rinjtë dhe të rejat nuk mund t’i mposhtin të vetëm? Përse?

Në ditarin tënd të studimit, përcakto sfidat dhe problemet e tua dhe shpjego se përse ato janë të vështira për ty. Përfshi edhe mendime rreth arsyes përse ke nevojë për ndihmë për t’i kapërcyer ato.

Në këtë mësim do të kesh mundësinë të përgatitësh dhe japësh një mësim të shkurtër duke përdorur letrat e Palit drejtuar filipianëve dhe kolosianëve. Ndërsa i studion këto letra, kërko për mënyrat se si fjalët e Palit mund të të ndihmojnë ty dhe të tjerët për t’u mbështetur te Jezu Krishti gjatë kohëve sfiduese.

Merrni parasysh të ftoni një student ta lexojë me zë të lartë ose përmbledhë paragrafin në vijim që ta ndihmojë klasën të kuptojë kontekstin e librave Filipianëve dhe Kolosianëve.

Apostulli Pal u përball me probleme dhe sfida të shumta. “Ndoshta filipianët dhe kolosianët ishin duke shkruar ndërkohë që Pali ishte arrestuar në Romë, por çuditërisht ishte pikërisht gjatë kësaj kohe të vështirë që Pali shkroi për ‘paq[en] e Perëndisë, që ia tejkalon çdo zgjuarësie’ ( Filipianëve 4:7). Këto dy letra janë vazhdimisht pozitive dhe optimiste, dhe përmbajnë disa nga mësimet më të qarta e më të sinqerta të Palit për Jezu Krishtin. Pali dha mësim se nëse jetojmë me besim dhe mirënjohje, Zoti mund ta çojë përpara kauzën e ungjillit nëpërmjet nesh – pavarësisht nga rrethanat në të cilat mund të gjendemi – dhe se duke ndërtuar mbi themelin e Jezu Krishtit mund ta shmangim përhumbjen pas filozofive dhe traditave të botës” (New Testament Student Manual [2014], f. 433 dhe Udhëzuesi për Shkrimet e Shenjta, “Filipianë(ve), Letër Drejtuar” dhe “Kolosianë(ve), Letër Drejtuar”, scriptures.ChurchofJesusChrist.org).

Nëse nxënësit u ftuan ta mësojnë përmendsh vargun te Filipianëve 4:13 si përgatitje për këtë mësim, ftojeni një ose më shumë nxënës ta thonë atë tani.

Lexo te Filipianëve 4:13, duke kërkuar atë që tregoi Pali për rëndësinë e Jezu Krishtit në jetën e tij.

• Si mendon ti, përse ky është një mësim i rëndësishëm për ta ditur?

Jezu Krishti mund të na ndihmojë me sfidat

Mendo për problemet dhe sfidat me të cilat përballen të rinjtë dhe të rejat në zonën tënde, si edhe për sfidat e tua. Përdor hapat A, B dhe C më poshtë për të përgatitur një mësim pesëminutësh. Përqendrohu tek ajo që mund të japësh mësim për Jezu Krishtin që mund të të ndihmojë ty dhe të tjerët t’i mposhtni sfidat.

Paraqitni përvijimin e mësimit në vijim dhe udhëzimet për t’i ndihmuar nxënësit të përgatitin mësimet e tyre. Ndërsa nxënësit punojnë, lëvizni nëpër dhomë dhe ndihmojini sipas nevojës. Jepuni atyre kohë të mjaftueshme për t’i përgatitur mësimet e tyre.

Nxënësit mund t’i përgatitin mësimet vetë ose të punojnë në dyshe për ta kryer veprimtarinë. Secili nxënës në një dyshe mund të studiojë gjysmën e fragmenteve të veta dhe më pas t’i diskutojë ato me partnerin e vet. Më pas dyshja mund ta përgatitë dhe japë mësimin bashkërisht.

A. Studio fragmentet vijuese, duke kërkuar të vërtetat që ndien se do të ishin të dobishme për ty dhe të tjerët:

Filipianëve 2:5–8; 3:20–21; 4:6–7

Kolosianëve 1:12–18; 3:1–2, 12–17, 23–24

B. Zgjidh një varg ose grup vargjesh dhe përcakto një të vërtetë që mund të japësh mësim për ungjillin e Shpëtimtarit. Për shembull, një e vërtetë që gjendet te Kolosianëve 1:12–14 është se Ati Qiellor dërgoi Birin e Tij që ne të mund të çlirohemi nga errësira dhe të marrim falje për mëkatin.

C. Përfshi një ose më shumë nga elementët vijues në mësimin tënd:

• Trego një përvojë që ke pasur personalisht ose që ka pasur dikush tjetër, që e ilustron të vërtetën. Ftojini ata të cilëve u jepni mësim, të tregojnë gjithashtu përvojat. Mund edhe të jepni shembuj ose të tregoni përvoja nga shkrimet e shenjta ose bisedat e konferencave të përgjithshme. Për shembull, përvojat që lidhen me të vërtetën e theksuar me ngjyrë të zezë më sipër, mund të përqendrohen te Shpëtimtari që fal dikë ose e çliron atë nga errësira.

• Gjeni referencat kryq të dobishme. Për shembull, për të vërtetën e theksuar me ngjyrë të zezë më sipër, mund të tregosh vargjet te Mosia 16:9 ose 2 Pjetër 2:9. Ftojini ata të cilëve u jepni mësim të kërkojnë referenca të tjera kryq duke përdorur burime të tilla si Udhëzuesi për Shkrimet e Shenjta.

• Gjeni një pohim të dobishëm nga një udhëheqës i Kishës. Për shembull, e vërteta e theksuar me ngjyrë të zezë ilustrohet në pohimin në vijim nga Motra Reina I. Aburto, e Presidencës së Përgjithshme të Shoqatës së Ndihmës:

“Nëse vazhdimisht jeni të rrethuar nga një ‘mjegull errësire’ [1 Nefi 8:23], drejtojuni Atit Qiellor. Asgjë nga ajo që keni përjetuar nuk mund ta ndryshojë të vërtetën e përjetshme, se ju jeni fëmija i Tij dhe se Ai ju do. Mos harroni se Krishti është Shpëtimtari e Shëlbuesi juaj dhe se Perëndia është Ati juaj. Ata na kuptojnë. Përfytyrojini Ata pranë jush, duke ju dëgjuar e duke ju dhënë përkrahje. ‘[Ata] do t’ju ngushëllojnë në pikëllimet tuaja’ [Jakob (LiM) 3:1]. Bëni gjithçka të mundeni dhe mirëbesoni te hiri shlyes i Zotit!”

(Reina I. Aburto, “N’Qoft Shi a Diell, Zot, me Mua Rri!” Ensign ose Liahona, nëntor 2019, f. 58)

Ftoni nxënës të gatshëm t’i japin mësim klasës. Përndryshe, ftoni grupe të vogla nxënësish t’ia japin njëri-tjetrit mësimet e veta.

Nxitini nxënësit të jenë të sinqertë dhe të bëjnë përpjekjet e tyre më të mira ndërsa japin dhe marrin mësim. Ftojini ata të kërkojnë ndihmë për sfidat e tyre ndërsa i dëgjojnë me kujdes mësimet e shokëve apo shoqeve të klasës.

Ndërsa japim dhe marrim mësim me anë të Shpirtit ne forcohemi (shih te Doktrina e Besëlidhje 50:22–23). Në ditarin tënd të studimit, shkruaje atë që mësove dhe ndjeve që mund të të ndihmojë të marrësh forcë nga Jezu Krishti ndërsa përballesh me sfidat e tua. Kërko ndihmën e Atit Qiellor nëpërmjet Frymës së Shenjtë për të vendosur se çfarë do të donte Ai që të bëje për të marrë forcën e Shpëtimtarit. Ndiqini nxitjet që merrni.

Nxitini nxënësit që t’ua japin mësimet e tyre familjarëve në shtëpi. Mund të jetë e dobishme t’u dërgoni prindërve një mesazh për t’i vënë në dijeni për këtë mësim, në mënyrë që ata të mund t’i nxitin nxënësit për t’i dhënë mësimet e tyre në shtëpi.

Komente dhe Informacion për Rrethanat

Filipianëve 2:12–13. A na mësoi Pali se duhet ta fitojmë vetë shpëtimin tonë?

Ndonëse veprimet që demonstrojnë besimin te Jezu Krishti janë thelbësore, është e rëndësishme të pranojmë se nuk është e mundur që ne “ta fitojmë” vetë shpëtimin (shih te 2 Nefi 2:8; Mosia 2:24; Alma 22:14). Vargu te Filipianëve 2:13 shpjegon se Perëndia punon me ne për të na ndihmuar të bëjmë gjëra që nuk mund t’i bëjmë vetë (shih tek Udhëzuesi për Shkrimet e Shenjta, “Hir”, scriptures.ChurchofJesusChrist.org). Kjo ndihmë dhe forcë shpesh quhet hiri i Shpëtimtarit dhe është si rrjedhojë fuqia me anë të së cilës Ai na shpëton (shih tek Filipianëve 2:8).

Shiko Plakun Dejll G. Renland, të Kuorumit të Të Dymbëdhjetëve në materialin filmik “Të Mbushur me Bekime” nga kodi kohor 00:00 deri në 05:39 për të mësuar më shumë rreth kësaj teme.

Filipianëve 4:13. Çfarë do të thotë që “unë mund të bëj gjithçka me anë të Krishtit”?

Motra Mishel D. Krejg, e Presidencës së Përgjithshme të Të Rejave, shpjegoi:

“Natyrisht, të gjithë ne nuk do ta arrijmë [plotësisht] potencialin tonë hyjnor dhe ka njëfarë të vërtete te përfundimi se të vetëm ne nuk jemi mjaftueshëm [të mirë]. Por lajmet e mira të ungjillit janë që, me anë të hirit të Perëndisë, ne jemi mjaftueshëm [të mirë]. Me ndihmën e Krishtit, ne mund të bëjmë gjithçka [Filipianëve 4:13]. Shkrimet e shenjta premtojnë se ne do të ‘gjejmë hir, për të pasur ndihmë në kohë nevoje’ [Hebrenjve 4:16].”

(Mishel D. Krejg, “Pakënaqësia e Shenjtë”, Ensign ose Liahona, nëntor 2018, f. 54)

Presidenti Dallin H. Ouks dha mësim:

“Duke folur për disa nga vetë sfidat e tij në vdekshmëri, Apostulli Pal shkroi: ‘Unë mund të bëj gjithçka me anë të Krishtit që më forcon’ (Filipianëve 4:13).

Dhe kështu ne shohim se, për shkak të Shlyerjes së Tij, Shpëtimtari ka fuqinë për të ndihmuar – për të dhënë ndihmesë – për çdo dhembje dhe hidhërim të vdekshëm. Nganjëherë fuqia e Tij shëron një lëngatë, por shkrimet e shenjta dhe përvojat tona na mësojnë se ndonjëherë Ai ndihmon ose na jep ndihmesë duke na dhënë forcën ose këmbënguljen për t’i duruar lëngatat tona.”

(Dallin H. Ouks, “Të Forcuar nga Shlyerja e Jezu Krishtit”, Ensign ose Liahona, nëntor 2015, f. 62)

Veprimtari Plotësuese të të Mësuarit

Filipianëve 2:12–13. Veprat, hiri dhe shpëtimi

Filipianëve 2:12–13 mund të jetë një fragment sfidues. Ftojini nxënësit t’i studiojnë ato me kujdes dhe të përcaktojnë atë që jep mësim Pali. Merrni parasysh t’i ftoni ata të studiojnë informacionin te pjesa “Komente dhe Informacion për Rrethanat” për Filipianëve 2:12–13 dhe hyrjen për këtë fragment tek Eja, Më Ndiq – Për Individët dhe Familjet: Dhiata e Re 2023. Kërkojuni të shpjegojnë se çfarë gjetën që i ndihmoi ta kuptonin më mirë doktrinën e rëndësishme të veprave, hirit dhe shpëtimit. Ftojini të tregojnë se si kjo njohuri e forcon besimin e tyre te Jezu Krishti dhe dashurinë e tyre për Të.

Kolosianëve 1:9–18. Rolet e Jezu Krishtit

Ftojini nxënësit të kërkojnë në këto vargje emrat, titujt dhe rolet e Jezu Krishtit. Nxënësit mund të ftohen të tregojnë shembuj nga shkrimet e shenjta, jeta vetjake ose jeta e atyre që njohin, në të cilat Shpëtimtari ka qenë shembull i këtyre emrave, roleve ose titujve. Ftojini nxënësit të tregojnë një rol që është më kuptimplotë për ta dhe se si ai ndikon te ndjenjat e tyre ndaj Jezu Krishtit.

Kolosianëve 2:6. Ecni në Krisht

Ftojini nxënësit të tregojnë atë që mendojnë se nënkupton togfjalëshi “ecni në [Krisht]” (Kolosianëve 2:6). Ftojini ata të studiojnë fragmentet në vijim, duke kërkuar kuptimin e togfjalëshit të ecësh në Krisht: Kolosianëve 1:9–18; Kolosianëve 2:6; Kolosianëve 3:1–11. Ata gjithashtu mund të studiojnë këtë pohim nga Presidenti Henri B. Ajring:

“Çfarë do të thotë të ecësh me Zotin? Ajo do të thotë të bësh atë çka Ai bën, të shërbesh në mënyrën siç Ai shërben. Ai e sakrifikoi rehatinë e Vet për të bekuar nevojtarët, ndaj kjo është çka ne përpiqemi të bëjmë. Ai dukej se u kushtonte vëmendje të veçantë njerëzve që i shpërfillën dhe madje i shmangën nga shoqëria, ndaj ne duhet të përpiqemi ta bëjmë këtë gjithashtu. Ai dëshmoi me guxim e megjithatë me dashuri për doktrinën e vërtetë që mori nga Ati i Tij, edhe nëse ishte e panjohur dhe kështu duhet të bëjmë edhe ne. Ai u tha të gjithëve: ‘Ejani tek unë’ (Mateu 11:28) dhe ne u themi të gjithëve: ‘Ejani tek Ai’.”

(Henri B. Ajring, “Ec me Mua”, Ensign ose Liahona, maj 2017, f. 84)

Ftojini nxënësit të tregojnë gjetjet e tyre dhe të kërkojnë ndihmën e Atit Qiellor për të bërë një plan për mënyrën se si ata mund të ecin plotësisht në Krisht.