វិវរណៈ ២១–២២

« ឯអ្នកណាដែលឈ្នះ នោះនឹងបានគ្រងសេចក្តីទាំងនេះទុកជាមរតក »

តើអ្នកអាចស្រមៃបានទេថា តើការរស់នៅជាមួយនឹងព្រះក្នុងនគរសេឡេស្ទាលនឹងមានលក្ខណៈយ៉ាងដូចម្តេច ? នៅក្នុងឈុតចុងក្រោយនៃវិវរណៈដ៏អស្ចារ្យរបស់លោក យ៉ូហានបានឃើញ « ស្ថានសួគ៌ថ្មី និងផែនដីថ្មី » និងទីក្រុងបរិសុទ្ធចុះមកពីស្ថានសួគ៌ ( សូមមើល វិវរណៈ ២១:១–២ ) ។ លោកបានថ្លែងទីបន្ទាល់ថា ព្រះ « នឹងគង់នៅជាមួយពួកគេ ហើយពួកគេនឹងក្លាយជារាស្ដ្ររបស់ទ្រង់ » ( វិវរណៈ ២១:៣ ) ។ មេរៀននេះមានគោលបំណងជួយអ្នកឲ្យយល់ថា ឱកាសដើម្បីរស់នៅជាមួយព្រះវរបិតាសួគ៌ និងព្រះយេស៊ូវគ្រីស្ទនៅក្នុងនគរសេឡេស្ទាល គឺមានតម្លៃសម្រាប់កិច្ចខិតខំប្រឹងប្រែងទាំងអស់របស់អ្នក ។

ការជួយសិស្សឲ្យស្គាល់ព្រះចេស្ដា សេចក្ដីមេត្តាករុណា និងឥទ្ធិពលរបស់ព្រះអម្ចាស់ ។ សូមជួយសិស្សឲ្យមើលឃើញព្រះហស្តរបស់ព្រះអម្ចាស់ក្នុងការប្រទានពរដល់មនុស្សទាំងអស់នៅក្នុងព្រះគម្ពីរ ។ នៅពេលពួកគេឃើញរឿងនេះ ពួកគេនឹងទទួលអារម្មណ៍បានកាន់តែប្រសើរអំពីសេចក្ដីស្រឡាញ់ ព្រះចេស្ដា និងសេចក្ដីមេត្តាករុណារបស់ព្រះអម្ចាស់នៅក្នុងកាលៈទេសៈផ្ទាល់ខ្លួនរបស់ពួកគេ ។

ការរៀបចំរបស់សិស្ស ៖ សូមអញ្ជើញសិស្សឲ្យសញ្ជឹងគិតអំពីលក្ខណៈនៃនគរសេឡេស្ទាល ហើយហេតុអ្វីបានជាពួកគេចង់ទទួលបាននគរនេះទុកជាមរតក ។

សកម្មភាពរៀនសូត្រដែលអាចមាន

លទ្ធផលចុងក្រោយ

សូមស្រមៃថា អ្នកគឺជាសមាជិកនៃក្រុមកីឡាមួយ ហើយអ្នកដឹងជាមុនថា ក្រុមរបស់អ្នកនឹងឈ្នះជាជើងឯកនៅចុងបញ្ចប់នៃរដូវកាលនេះ ។ ទោះជាយ៉ាងណាក៏ដោយ អ្នកមិនដឹងថា រដូវកាលនេះនឹងមានរយៈពេលយូរប៉ុណ្ណានោះទេ ហើយគ្រូបង្វឹករំពឹងថា កីឡាករទាំងអស់នឹងខិតខំប្រឹងប្រែងឲ្យអស់ពីសមត្ថភាពដើម្បីបន្តនៅក្នុងក្រុមនេះ ។

• តើចំណេះដឹងនេះអាចមានឥទ្ធិពលយ៉ាងណាលើរបៀបដែលអ្នកត្រៀមខ្លួន និងហ្វឹកហាត់ក្នុងការប្រកួតនីមួយៗ ? ហេតុអ្វីទៅ ?

• តើអ្នកនឹងមានប្រតិកម្មយ៉ាងណា ប្រសិនបើក្រុមរបស់អ្នកចាញ់ពីរបីប្រកួតជាប់ៗគ្នានោះ ? តើអ្នកអាចលើកទឹកចិត្តមិត្តរួមក្រុមរបស់អ្នកយ៉ាងដូចម្តេច បន្ទាប់ពីការចាញ់ទាំងនេះ ?

ឥឡូវនេះ សូមចំណាយពេលខ្លះ ដើម្បីគិតអំពីថ្ងៃចុងក្រោយ និងការយាងមកជាលើកទីពីរ ។

សូមផ្តល់ពេលវេលាឲ្យសិស្សសញ្ជឹងគិតពីសំណួរខាងក្រោមនេះ ។ សូមធ្វើតាមការបំផុសគំនិតនៃព្រះវិញ្ញាណ ដើម្បីកំណត់ថាតើវាមានប្រយោជន៍ដែរឬទេក្នុងការពិភាក្សាពីសំណួរទាំងនេះឲ្យឮៗនោះ ។

• តើអ្នកមានទំនុកចិត្តយ៉ាងណាថាភាពសុចរិតនឹងឈ្នះលើអំពើអាក្រក់នៅទីបំផុត ? តើអ្វីទៅដែលអាចជួយអ្នកឲ្យបង្កើនទំនុកចិត្តរបស់អ្នកបាន ?

• តើអ្នកមានអារម្មណ៍ថា ការធ្វើតាមព្រះអង្គសង្គ្រោះគឺស័ក្តិសមនឹងការខិតខំដ៏ខ្លាំងបំផុតរបស់អ្នកដែរឬទេ ? ហេតុអ្វីស័ក្ដិសម ឬហេតុអ្វីមិនស័ក្ដិសម ?

លទ្ធផលចុងក្រោយនៃការប្រយុទ្ធគ្នារវាងអំពើល្អ និងអំពើអាក្រក់ត្រូវបានបង្ហាញដោយព្រះតាមរយៈព្យាការីរបស់ទ្រង់ ៖ ភាគីរបស់ព្រះអម្ចាស់នឹងទទួលបានជ័យជម្នះ ។ ក្នុងអំឡុងពេលសហស្សវត្សរ៍ អារក្សសាតាំងនឹងត្រូវចងទុក ហើយព្រះយេស៊ូវគ្រីស្ទនឹងគ្រប់គ្រងលើផែនដីដោយសេចក្ដីសុខសាន្តរយៈពេលមួយពាន់ឆ្នាំ ( សូមមើល វិវរណៈ ២០:១–៤ ) ។ បន្ទាប់ពីមួយពាន់ឆ្នាំនេះ អារក្សសាតាំងនឹងត្រូវ « បោះទៅក្នុងបឹងភ្លើង ដែលឆេះដោយស្ពាន់ធ័រ » ជារៀងរហូត ហើយការជំនុំជម្រះចុងក្រោយនឹងកើតឡើង ( សូមមើល វិវរណៈ ២០:៧–១៥ ) ។ បន្ទាប់ពីការជំនុំជម្រះចុងក្រោយ អ្នកសុចរិត និងអ្នកស្មោះត្រង់នឹងទទួលជីវិតដ៏នៅអស់កល្បជានិច្ចនៅក្នុងនគរសេឡេស្ទាល ។

នៅពេលអ្នកសិក្សា វិវរណៈ ២១–២២ សូមស្វែងរកជំនួយពីព្រះវរបិតាសួគ៌ ដើម្បីបង្កើនបំណងប្រាថ្នារបស់អ្នកដើម្បីខិតខំឲ្យអស់ពីសមត្ថភាពនៅក្នុងការតស៊ូដើម្បីទទួលបានជីវិតដ៏នៅអស់កល្បជានិច្ច និងសិរីល្អសេឡេស្ទាល ។

ជាដើម ហើយជាចុង

ព្រឹត្តិការណ៍សំខាន់មួយ ដែលយ៉ូហានបានឃើញនៅក្នុងការនិមិត្តរបស់លោកគឺ ជ័យជម្នះរបស់ព្រះយេស៊ូវគ្រីស្ទលើអារក្សសាតាំងនៅចុងបញ្ចប់នៃពិភពលោកនេះ ។ នៅក្នុង វិវរណៈ ២១–២២ យ៉ូហានបានពិពណ៌នាអំពីជោគវាសនានៃអ្នកដែលបានប្រយុទ្ធជាមួយព្រះអង្គសង្គ្រោះ ដើម្បីកម្ចាត់អំពើទុច្ចរិតចោល ។

សូមអាន វិវរណៈ ២១:១–៧ ដោយស្វែងរកពរជ័យដែលព្រះនឹងប្រទានដល់អ្នកដែលស្មោះត្រង់ ។ អ្នកអាចនឹងចង់គូសសម្គាល់ឃ្លាទាំងឡាយ ដែលមានអត្ថន័យចំពោះអ្នក ។

ប្រសិនបើអ្នកចង់រៀនបន្ថែមទៀតអំពីក្រុងយេរូសាឡិមថ្មីដែលបានលើកឡើងនៅក្នុង ខទី ២ សូមពិចារណាមើលវានៅក្នុង សេចក្ដីណែនាំដល់បទគម្ពីរទាំងឡាយ ។

សូមកំណត់ចំណាំថា នៅក្នុង ខទី ២ ស្វាមីគឺជានិមិត្តរូបនៃព្រះអង្គសង្គ្រោះ ហើយកូនក្រមុំគឺជានិមិត្តរូបនៃសាសនាចក្រ ឬអ្នកដែលដើរតាមទ្រង់ដោយស្មោះត្រង់ ។

នៅក្នុង ខទី ៧ កូនប្រុស ឬកូនស្រីរបស់ព្រះគ្រីស្ទ គឺជាមនុស្សម្នាក់ដែលបានរក្សាសេចក្ដីសញ្ញារបស់ពួកគេជាមួយទ្រង់ ។

សូមពិចារណាបង្ហាញសំណួរខាងក្រោមនេះនៅលើក្ដារខៀន ។ សូមអញ្ជើញសិស្សដែលស្ម័គ្រចិត្តទាំងឡាយឲ្យចែកចាយការពន្យល់របស់ពួកគេជាមួយសិស្សក្នុងថ្នាក់ ។

• តើពរជ័យអ្វីខ្លះដែលព្រះនឹងប្រទានឲ្យអ្នកដែលស្មោះត្រង់ ដែលមានន័យបំផុតចំពោះអ្នក ? ហេតុអ្វីទៅ ?

• តើអ្នកបានរៀនសូត្រអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទចេញមកពីខគម្ពីរទាំងនេះ ? ហេតុអ្វីវាសំខាន់សម្រាប់អ្នកដើម្បីយល់ពីរឿងទាំងនេះអំពីទ្រង់ទាំងទ្វេ ?

នៅពេលសិស្សឆ្លើយ សូមពិចារណាសួរសំណួរដូចតទៅនេះ ៖ តើព្រះអង្គសង្គ្រោះ « ធ្វើទាំងអស់ឡើងជាថ្មី » តាមរបៀបណាខ្លះ ? ( វិវរណៈ ២១:៥ ) ។ តើទ្រង់ជា « ជាដើម ហើយជាចុង » យ៉ាងដូចម្ដេច ? ( វិវរណៈ ២១:៦ ) ។ តើវាមានន័យយ៉ាងណាដែលថា តាមរយៈព្រះយេស៊ូវគ្រីស្ទ យើងអាចយកឈ្នះ និង « គ្រងសេចក្តីទាំងនេះទុកជាមរតក » បាន ? ( វិវរណៈ ២១:៧ ) ។

ការទទួលបាននគរសេឡេស្ទាល

សូមអញ្ជើញសិស្សឲ្យចែកចាយសេចក្ដីពិតអំពីនគរសេឡេស្ទាល ដែលពួកគេរកឃើញនៅក្នុង វិវរណៈ ២១:១–៧ ។ សិស្សអាចសម្គាល់ឃើញនូវគោលការណ៍បីបួន ។ សូមពិចារណាសរសេរសេចក្ដីពិតទាំងឡាយ ដែលពួកគេបានលើកឡើងដាក់នៅលើក្ដារខៀន ។ សូមចំណាយពេលដើម្បីពិភាក្សាអំពីសេចក្ដីពិតមួយ ឬច្រើននៃសេចក្ដីពិតទាំងនេះ ។

សេចក្ដីពិតមួយចំនួនក្នុងចំណោមសេចក្ដីពិតជាច្រើនដែលបានបង្រៀននៅក្នុងខគម្ពីរទាំងនេះរួមមានដូចតទៅនេះ ៖ នៅក្នុងនគរសេឡេស្ទាល ព្រះនឹងគង់នៅជាមួយ និងសម្រាលទុក្ខដល់រាស្ដ្ររបស់ទ្រង់ ហើយពួកគេនឹងលែងជួបប្រទះនឹងសេចក្ដីស្លាប់ ទុក្ខព្រួយ ឬការឈឺចាប់ទៀតហើយ និង អស់អ្នកដែលយកឈ្នះលើការសាកល្បងនៃជីវិតរមែងស្លាប់ដោយស្មោះត្រង់ នឹងទទួលបានពរជ័យដ៏នៅអស់កល្បជានិច្ចនៅក្នុងនគរសេឡេស្ទាល ។

សូមពិចារណាបង្ហាញធនធាន និងសំណួរខាងក្រោម ឬផ្តល់ជាសំណៅចែកដល់សិស្ស ។ នៅពេលសិស្សសិក្សាធនធានទាំងនេះ និងឆ្លើយសំណួរ ចូរដឹងអំពីអ្នកដែលអាចនឹងត្រូវការជំនួយ ឬការណែនាំបន្ថែម ។

សូមស្រមៃថា មិត្តភក្តិរបស់អ្នកម្នាក់មិនគិតថា ការតស៊ូដើម្បីទទួលបាននគរសេឡេស្ទាលគឺសមនឹងអ្វីដែលយើងត្រូវធ្វើទាំងអស់នោះទេ ។

សូមរៀបចំការឆ្លើយតបខ្លីមួយ ដែលអ្នកអាចចែកចាយជាមួយមិត្តរបស់អ្នកបាន ដែលអាចជួយពួកគេឲ្យយល់ថា នគរសេឡេស្ទាលគឺសមនឹងការខិតខំប្រឹងប្រែងទាំងឡាយដែលយើងត្រូវធ្វើ ដើម្បីរស់នៅតាមដំណឹងល្អ ។ អ្នកប្រហែលជាចង់ប្រើធនធានមួយចំនួនខាងក្រោម ហើយឆ្លើយសំណួរខាងក្រោមដើម្បីជួយអ្នកឲ្យរៀបចំការឆ្លើយតបរបស់អ្នក ៖

អែលឌើរ អិល ថម ភែរី ( ឆ្នាំ ១៩២២–២០១៥ ) ក្នុងកូរ៉ុមនៃពួកសាវកដប់ពីរនាក់បានបង្រៀន ៖

ខ្ញុំជឿថា ប្រសិនយើងអាចបង្កើតនៅក្នុងគំនិតរបស់យើងនូវរូបភាពមួយដ៏ច្បាស់ ហើយពិតមួយស្ដីពីជីវិតដ៏នៅអស់កល្បជានិច្ច នោះយើងនឹងចាប់ផ្ដើមមានឥរិយាបថផ្សេង ។ យើងនឹងមិនចាំបាច់ត្រូវមានកម្លាំងចិត្ត ដើម្បីធ្វើកិច្ចការជាច្រើនដែលទាក់ទងនឹងការស៊ូទ្រាំដល់ទីបញ្ចប់ ដូចជា [ ការបម្រើ ] ការចូលរួមការប្រជុំរបស់យើង ការទៅព្រះវិហារបរិសុទ្ធ ការរស់នៅប្រកបដោយសីលធម៌ ការអធិស្ឋានរបស់យើង ឬការអានព្រះគម្ពីរជាដើមនោះទេ ។ យើងចង់ធ្វើរឿងទាំងអស់នេះ និងរឿងច្រើនទៀត ពីព្រោះយើងដឹងថា រឿងទាំងអស់នោះនឹងរៀបចំយើងដើម្បីទៅកន្លែងមួយដែលយើងប្រាថ្នាចង់ទៅ ។

( អិល ថម ភែរី « The Gospel of Jesus Christ » Ensign ឬ Liahona ខែ ឧសភា ឆ្នាំ ២០០៨ ទំព័រ ៤៤ )

វិវរណៈ ៧:១៣–១៧

វិវរណៈ ២១:២២–២៧

ម៉ូសាយ ២:៤១

គោលលទ្ធិ និង សេចក្តីសញ្ញា ៧៦:៥១–៥២, ៥៩–៦០, ៦៩–៧០

គោលលទ្ធិ និង សេចក្ដីសញ្ញា ១៣០:២

សំណួរមួយចំនួនខាងក្រោមអាចជួយដឹកនាំគំនិតរបស់អ្នកបាន នៅពេលអ្នកពិចារណាអំពីការឆ្លើយតបរបស់អ្នក ៖

• តើអ្វីទៅដែលធ្វើឲ្យអ្នករំភើបចិត្ត នៅពេលអ្នកគិតអំពីការរស់នៅក្នុងនគរសេឡេស្ទាល ?

• តើអ្នកបានរៀនអ្វីខ្លះអំពីព្រះអង្គសង្គ្រោះ ដែលជំរុញអ្នកឲ្យដើរតាមទ្រង់ ហើយខិតខំដើម្បីទទួលបាននគរសេឡេស្ទាល ?

• តើអ្នកធ្លាប់មានបទពិសោធន៍អ្វីខ្លះជាមួយព្រះវរបិតាសួគ៌ និងព្រះយេស៊ូវគ្រីស្ទ ដែលបង្កើនបំណងប្រាថ្នារបស់អ្នក ដើម្បីរស់នៅជាមួយទ្រង់ទាំងទ្វេម្តងទៀត ?

• តើសេចក្ដីស្រឡាញ់របស់ទ្រង់ទាំងទ្វេចំពោះអ្នក បានជួយអ្នកឲ្យមានអារម្មណ៍ថា នគរសេឡេស្ទាលគឺអាចសម្រេចបានដោយរបៀបណា ?

សូមអនុញ្ញាតឲ្យសិស្សចែកចាយជាមួយក្រុមតូចមួយ ឬជាមួយសិស្សក្នុងថ្នាក់រៀននូវអ្វីដែលពួកគេបានសរសេរ ។ វាអាចមានប្រយោជន៍ក្នុងការសួរសំណួរតាមដានដូចជា « ហេតុអ្វីបានជាពរជ័យនោះសំខាន់សម្រាប់អ្នក ? » « ហេតុអ្វីបានជាអ្នកគិតថា វាអាចលើកទឹកចិត្តមិត្តរបស់អ្នកឲ្យខិតខំប្រឹងប្រែងដើម្បីទទួលបាននគរសេឡេស្ទាល ? » ហើយ « តើអ្នកបានឮអ្វីខ្លះពីមិត្តរួមថ្នាក់ដែលមានអត្ថន័យចំពោះអ្នក ? »

សូមពិចារណារយៈពេលពីរបីនាទីអំពីសេចក្ដីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទ និងបំណងប្រាថ្នារបស់ទ្រង់ទាំងទ្វេសម្រាប់អ្នកដើម្បីទទួលបានជីវិតដ៏នៅអស់កល្បជានិច្ច ។ សូមគិតអំពីរបៀបដែលអ្នកអាចបង្ហាញការដឹងគុណរបស់អ្នកចំពោះសេចក្ដីមេត្តាករុណា និងព្រះគុណរបស់ទ្រង់ទាំងទ្វេ ។

បើពេលវេលាអំណោយផល សូមអញ្ជើញសិស្សឲ្យចែកចាយគំនិតរបស់ពួកគេ ។ សូមពិចារណាចែកចាយទីបន្ទាល់ផ្ទាល់ខ្លួនមួយអំពីសេចក្ដីពិតដែលបានបង្រៀននៅក្នុងមេរៀននេះ ។

វិចារណកថា និង ព័ត៌មានសាច់រឿង

សកម្មភាពរៀនសូត្របន្ថែម

តើទីក្រុងរបស់ព្រះនឹងមានលក្ខណៈយ៉ាងណា ?

សូមពិចារណាអញ្ជើញសិស្សឲ្យអាន វិវរណៈ ២១:១០–១១, ២៣–២៧ ។ បន្ទាប់ពីបានអានការពិពណ៌នាអំពីទីក្រុង និងមនុស្សដែលនឹងនៅទីនោះហើយ សូមពិភាក្សាអំពីសំណួរដូចជា « តើអ្វីដែលលេចធ្លោជាងគេសម្រាប់អ្នកនៅក្នុងខគម្ពីរទាំងនេះ ? » ឬ « តើអ្នកគិតថាការរស់នៅក្នុងទីក្រុងនោះនឹងមានលក្ខណៈយ៉ាងណា ? »

« ព្រះអម្ចាស់យេស៊ូវអើយ សូមយាងមក » ( វិវរណៈ ២២:២០ )

សូមពិចារណាអញ្ជើញសិស្សឲ្យអាន វិវរណៈ ២២:១២–១៤ ដោយគិតអំពីរបៀបដែលពាក្យទាំងនេះអាចអនុវត្តចំពោះពួកគេបាន ។

ជាការឆ្លើយតបទៅនឹងការប្រកាសចុងក្រោយរបស់ព្រះអង្គសង្គ្រោះ « អើ យើងមកជាឆាប់ » យ៉ូហានបានឆ្លើយតបជាមួយនឹងការអញ្ជើញនេះថា « ព្រះអម្ចាស់យេស៊ូវអើយ សូមយាងមក » ( វិវរណៈ ២២:២០ ) ។ យ៉ូហានកំពុងអង្វរព្រះអម្ចាស់ឲ្យត្រឡប់មកផែនដីវិញជាប្រញាប់ ។ សូមអញ្ជើញសិស្សឲ្យគិតអំពីមូលហេតុដែលពួកគេអាចនឹងចង់ឲ្យព្រះអង្គសង្គ្រោះ « មកជាឆាប់ » ។

ជម្រើសក្នុងការចាប់ផ្ដើមមេរៀន

សូមពិចារណាបង្ហាញវីដេអូនៃសារលិខិតរបស់ប្រធាន ឌៀថើរ អេហ្វ អុជដូហ្វ « Your Happily Ever After » ( ២០:៤៧ ) ដែលមាននៅលើគេហទំព័រ ChurchofJesusChrist.org ចាប់ពីលេខកូដម៉ោង ២:២៧ ដល់ ៣:៤០ ។ បន្ទាប់ពីមើលវីដេអូហើយ សូមអញ្ជើញសិស្សឲ្យពិភាក្សាអំពីអ្វីដែលតម្រូវឲ្យពួកគេធ្វើ ដើម្បីទទួលបានអំណោយទានដ៏អស្ចារ្យបំផុតរបស់ព្រះវរបិតាសួគ៌ ។