វិវរណៈ ១៥–១៩
« កូនចៀមនឹងឈ្នះគេ »
តើអ្នកគិតដល់អ្វីខ្លះ នៅពេលអ្នកគិតអំពីថ្ងៃចុងក្រោយដែលបានព្យាករទុកនោះ ? យ៉ូហាន ដែលជាអ្នកទទួលវិវរណៈបានគូររូបភាពដ៏រស់រវើកអំពីការបំផ្លិចបំផ្លាញ និងអំពើទុច្ចរិតដែលនឹងមានពាសពេញពិភពលោកនេះ ។ ប៉ុន្តែកាលៈទេសៈទាំងនេះនឹងមិននៅយូរឡើយ ។ ព្រះយេស៊ូវគ្រីស្ទ « នឹងឈ្នះគេ … ជាព្រះអម្ចាស់លើអស់ទាំងព្រះអម្ចាស់ ហើយជាស្តេចលើអស់ទាំងស្តេច » ( វិវរណៈ ១៧:១៤ ) ។ មេរៀននេះអាចជួយអ្នកឲ្យពឹងផ្អែកទៅលើព្រះយេស៊ូវគ្រីស្ទបានកាន់តែមានទំនុកចិត្តជាងមុន នៅពេលអ្នកប្រឈមមុខនឹងបញ្ហានៅថ្ងៃចុងក្រោយ ។
ការផ្តោតទៅលើព្រះវរបិតាសួគ៌ និងព្រះយេស៊ូវគ្រីស្ទ ។ គ្មានអ្វីដែលនឹងប្រទានពរដល់សិស្សជាងការមកស្គាល់ និងស្រឡាញ់ព្រះវរបិតាសួគ៌ និងព្រះយេស៊ូវគ្រីស្ទឡើយ ។ ពេលកំពុងរៀបចំ និងបង្រៀនមេរៀន សូមបន្តស្វែងរកការបំផុសគំនិតអំពីវិធីដើម្បីជួយពួកគេឲ្យធ្វើកិច្ចការនេះ ។
ការរៀបចំរបស់សិស្ស ៖ សូមអញ្ជើញសិស្សឲ្យសញ្ជឹងគិតអំពីអ្វីដែលពួកគេដឹងអំពីការសាកល្បងនៅថ្ងៃចុងក្រោយ និងហេតុផលដែលពួកគេអាចពឹងផ្អែកទៅលើព្រះយេស៊ូវគ្រីស្ទបាន ។
សកម្មភាពរៀនសូត្រដែលអាចមាន
គ្រោះកាច ការសាកល្បង និងសេចក្តីជំនឿលើព្រះអម្ចាស់
ជាផ្នែកមួយនៃការនិមិត្តរបស់យ៉ូហាន ព្រះអម្ចាស់បានបង្ហាញយ៉ូហានទេវតាប្រាំពីរអង្គ ដែលកំពុងចាក់ចេញនូវគ្រោះកាចផ្សេងៗមកលើមនុស្សអាក្រក់នៅថ្ងៃចុងក្រោយ ។ គ្រោះកាចទាំងនេះរួមមានដំបៅ ទឹកប្រែទៅជាឈាម អំណាចកម្ដៅជាខ្លាំង ភាពងងឹតសូន្យសុង សេចក្តីទុក្ខលំបាក ផ្គរលាន់ និងផ្លេកបន្ទោរ ការរញ្ជួយដី និងព្រិលយ៉ាងធំៗ ( សូមមើល វិវរណៈ ១៦ ) ។
សូមសញ្ជឹងគិតអំពីសំណួរខាងក្រោមនេះ ៖
-
តើអ្នកដឹងអ្វីទៀតអំពីការសាកល្បង និងអំពើទុច្ចរិតនៃថ្ងៃចុងក្រោយ ? តើអ្នកមានអារម្មណ៍យ៉ាងណាចំពោះការសាកល្បងទាំងនេះ ?
-
តើអ្នកមានទំនុកចិត្តយ៉ាងណាដែលថា ព្រះអម្ចាស់អាចជួយអ្នកឲ្យឆ្លងកាត់ការសាកល្បងទាំងឡាយដែលអ្នកអាចប្រឈមមុខ ? ហេតុអ្វីទៅ ?
មុនពេលយ៉ូហានបានសរសេរអំពីការបំផ្លិចបំផ្លាញ និងការសាកល្បងដែលនឹងញាំញីមនុស្សនៅលើផែនដីនៅថ្ងៃចុងក្រោយបង្អស់ លោកបានរៀបរាប់អំពីអ្វីផ្សេងទៀត ។ សូមអាន វិវរណៈ ១៥:២–៤ ហើយព្យាយាមស្រមៃពីអ្វីដែលយ៉ូហានបានឃើញ ។
វាអាចជួយដល់សិស្សបាន បើអ្នកប្រៀបធៀបអ្វីដែលយ៉ូហានបង្រៀនអំពី « សមុទ្រកែវ » នៅក្នុង ខទី ២ ទៅនឹងអ្វីដែលយ៉ូសែប ស្ម៊ីធ បង្រៀនអំពីវានៅក្នុង គោលលទ្ធិ និង សេចក្ដីសញ្ញា ១៣០:៦–៧ ។
-
ហេតុអ្វីបានជាវាអាចមានប្រយោជន៍ក្នុងការរៀនអំពីពួកបរិសុទ្ធដ៏ខ្ពង់ខ្ពស់ដែលរស់នៅក្នុងវត្តមានរបស់ព្រះ មុនពេលអានអំពីគ្រោះកាចដែលយ៉ូហានបានពិពណ៌នានោះ ?
នៅពេលអ្នកបន្តការសិក្សា សូមស្វែងរកការណែនាំពីព្រះវិញ្ញាណបរិសុទ្ធ ដើម្បីជួយអ្នកឲ្យដឹង និងយល់ថា អ្នកអាចងាកទៅរកព្រះអម្ចាស់ ដើម្បីទូលសូមជំនួយក្នុងអំឡុងពេលមានបញ្ហាប្រឈមនៅថ្ងៃចុងក្រោយបាន ។ ដើម្បីជួយអ្នកឲ្យយល់កាន់តែច្បាស់អំពីអ្វីដែលបង្រៀននៅក្នុងជំពូកនីមួយៗដែលអ្នកនឹងសិក្សា សូមពិចារណាអានចំណងជើងជំពូកទាំងឡាយ មុននឹងអានខគម្ពីរ ។
សូមពិចារណាចម្លង និងចែកចាយដល់សិស្សនូវសំណៅចែកខាងក្រោម ។ វាមិនមានបំណងឲ្យសិស្សបំពេញសកម្មភាពដែលបានស្នើទាំងអស់នោះទេ ។ សិស្សអាចត្រូវបានចាត់តាំងឲ្យបញ្ចប់សកម្មភាពនានា ឬពួកគេអាចជ្រើសរើសសកម្មភាពដែលពួកគេចាប់អារម្មណ៍បំផុតបាន ។ សិស្សអាចធ្វើការតែម្នាក់ឯង ឬជាក្រុមតូចៗ តាមតម្រូវការរៀនសូត្ររបស់ពួកគេ ។
នៅពេលសិស្សសិក្សា សូមពិចារណាដើរជុំវិញបន្ទប់ ដើម្បីអាចជួយសិស្សជាមួយខគម្ពីរ ឬសំណួរពិបាកៗ ។ សូមចាំថា យើងមិនដឹងពីការបកស្រាយទាំងអស់នៃអ្វីដែលយ៉ូហានបានឃើញនោះទេ ។ ខណៈពេលដើរជុំវិញបន្ទប់ សូមសិក្សាជាមួយសិស្ស ហើយពិចារណាសួរសំណួរដូចតទៅនេះ ៖ « ទោះបីជាយើងប្រហែលជាមិនយល់ពីព័ត៌មានលម្អិតទាំងអស់ក៏ដោយ ប៉ុន្តែតើអ្នកគិតថាអ្វីជាគំនិតទូទៅ ឬគោលការណ៍ទូទៅមួយដែល យ៉ូហានប្រហែលជាកំពុងព្យាយាមបង្ហាញនៅក្នុងខគម្ពីរទាំងនេះ ? » « តើអ្នកបានរៀនអ្វីទៀតនៅក្នុងគម្ពីរវិវរណៈ ដែលអាចជួយដល់សំណួរនេះបាន ? » សូមពិចារណាស្វែងរកព័ត៌មានបន្ថែមនៅក្នុងជំពូកទី ៥៥ និង ៥៦ នៃ សៀវភៅសិក្សាព្រះគម្ពីរសញ្ញាថ្មីសម្រាប់សិស្ស [ ឆ្នាំ ២០១៤ ] ។
ជម្រើស ក ៖ ទេវតា និងគ្រោះកាច
ការគិតអំពីគ្រោះកាចដែលយ៉ូហានបានឃើញក្នុង វិវរណៈ ១៦ អាចធ្វើឲ្យយើងព្រួយបារម្ភ ។ ទោះជាយ៉ាងណាក៏ដោយ ការបង្កើនសេចក្ដីជំនឿរបស់យើងទៅលើព្រះយេស៊ូវគ្រីស្ទ អាចជួយយើងឲ្យយកឈ្នះលើការព្រួយបារម្ភរបស់យើងបាន ។ វាជាការសំខាន់ក្នុងការកត់ចំណាំថា នៅពេលទេវតាបានចាក់គ្រោះកាចរបស់ទ្រង់ ទ្រង់បានថ្លែងទីបន្ទាល់អំពីបុគ្គលិកលក្ខណៈរបស់ព្រះអម្ចាស់ ។ ការដឹងអំពីបុគ្គលិកលក្ខណៈរបស់ទ្រង់អាចជួយយើងឲ្យបង្កើនសេចក្ដីជំនឿរបស់យើងទៅលើទ្រង់បាន ។
សូមអាន វិវរណៈ ១៦:៥, ៧ ដោយរកមើលរបៀបដែលពួកទេវតាពិពណ៌នាអំពីព្រះអម្ចាស់ និងការជំនុំជម្រះរបស់ទ្រង់ ។ សូមសរសេរនៅក្នុងពពុះសម្ដីខាងក្រោម នូវអ្វីដែលអ្នកមានអារម្មណ៍ថាទេវតាបានមានបន្ទូល ។
-
ហេតុអ្វីវាអាចមានប្រយោជន៍សម្រាប់យើង ក្នុងការយល់ពីបុគ្គលិកលក្ខណៈរបស់ព្រះអម្ចាស់ នៅពេលយើងរៀនអំពីការជំនុំជម្រះរបស់ទ្រង់ ?
-
តើនៅពេលណានៅក្នុងជីវិតរបស់អ្នក ដែលវាបានជួយអ្នកឲ្យយល់ពីលក្ខណៈរបស់ព្រះ ? តើការចងចាំពីបុគ្គលិកលក្ខណៈរបស់ព្រះយេស៊ូវគ្រីស្ទអាចជួយអ្នកឲ្យពឹងផ្អែកទៅលើទ្រង់យ៉ាងដូចម្ដេច ?
ជម្រើស ខ ៖ អំពើទុច្ចរិត និងព្រះចេស្ដារបស់ព្រះអង្គសង្គ្រោះ
សូមគិតអំពីឧទាហរណ៍ខ្លះនៃអំពើទុច្ចរិតក្នុងពិភពលោកនេះ និងពីរបៀបដែលវាមានឥទ្ធិពលលើយើង ។
-
ប្រសិនបើអ្នកត្រូវគិតអំពីនិមិត្តសញ្ញាមួយដើម្បីតំណាងឲ្យអំពើទុច្ចរិតនៃពិភពលោកនេះ តើវាជាអ្វី ? ហេតុអ្វីទៅ ?
-
ប្រសិនបើអ្នកត្រូវគិតពីនិមិត្តសញ្ញា ឬព្រះបរមងារដ៏គួរឲ្យគោរព ដើម្បីតំណាងឲ្យព្រះអង្គសង្គ្រោះ និងរបៀបដែលទ្រង់អាចជួយយើងឲ្យយកឈ្នះលើអំពើទុច្ចរិតនេះបាន តើវាជាអ្វី ? ហេតុអ្វីទៅ ?
សូមពុះទំព័រនៃសៀវភៅកំណត់ហេតុរបស់អ្នកជាពីរ ។ សូមអាន វិវរណៈ ១៧:៣–៧, ១៤ ដោយស្រមៃពីនិមិត្តសញ្ញាដែលយ៉ូហានបានប្រើនៅក្នុងខគម្ពីរទាំងនេះ ។ នៅផ្នែកម្ខាងនៃទំព័រដែលបានពុះជាពីរនៅក្នុងសៀវភៅកំណត់ហេតុរបស់អ្នក សូមសរសេរពាក្យគន្លឹះ ឬឃ្លាដែលប្រើដើម្បីពិពណ៌នាអំពីអំពើទុច្ចរិត ។ នៅផ្នែកម្ខាងទៀត សូមសរសេរនិមិត្តសញ្ញាដែលតំណាងឲ្យព្រះយេស៊ូវគ្រីស្ទ និងពួកសុចរិត ។ ពាក្យជំនួយខាងក្រោមអាចមានប្រយោជន៍ ៖
អំពើសហាយស្មន់ ( វិវរណៈ ១៧:៤ ) ៖ អំពើអសីលធម៌ខាងផ្លូវភេទ ។ វាក៏អាចជា « និមិត្តសញ្ញាសម្រាប់ការក្បត់សាសនា » ផងដែរ ( សេចក្ដីណែនាំដល់បទគម្ពីរទាំងឡាយ « អំពើកំផិត » នៅលើគេហទំព័រ scriptures.ChurchofJesusChrist.org )
ក្រុងបាប៊ីឡូន ( វិវរណៈ ១៧:៥ ) ៖ ជាឈ្មោះទីក្រុងមួយដែលល្បីខាងអំពើទុច្ចរិត ប្រើជានិមិត្តសញ្ញាសម្រាប់អំពើទុច្ចរិត និងភាពលោកិយ
ពួកស្រីសំផឹង ( វិវរណៈ ១៧:៥ ) ៖ បុគ្គលណាដែលប្រព្រឹត្តអំពើអសីលធម៌ខាងផ្លូវភេទដើម្បីប្រាក់ ឬការជួញដូរ
សេចក្តីអស្ចារ្យ ( វិវរណៈ ១៧:៦ ) ៖ ការភ្ញាក់ផ្អើល អព្ភូតហេតុ ( សូមមើល ខទី ៦ )
-
តើអ្នកបានរៀនអ្វីខ្លះពីនិមិត្តសញ្ញាដែលអ្នកបានអានទាំងនេះ ?
-
តើព្រះបរមងារអ្វីសម្រាប់ព្រះយេស៊ូវគ្រីស្ទនៅក្នុង ខទី ១៤ ជួយអ្នកឲ្យយល់អំពីទ្រង់ ?
-
តើអ្នកដឹងអ្វីខ្លះអំពីវិធីដែលកូនចៀម ឬព្រះយេស៊ូវគ្រីស្ទបានយកឈ្នះលើអំពើទុច្ចរិតទាំងអស់ ? ( សូមមើល សេចក្ដីណែនាំដល់បទគម្ពីរទាំងឡាយ « កូនចៀមនៃព្រះ » នៅលើគេហទំព័រ scriptures.ChurchofJesusChrist.org ) ។ តើការណ៍នេះមានន័យយ៉ាងណាចំពោះអ្នក ?
ជម្រើស គ ៖ អាពាហ៍ពិពាហ៍របស់កូនចៀម
-
តើមានហេតុផលអ្វីខ្លះ ដែលជាញឹកញាប់ក្រុមគ្រួសារប្រារព្ធនៅឯពិធីមង្គលការ ?
យ៉ូហាន បានប្រើរូបភាពនៃអាពាហ៍ពិពាហ៍ ដើម្បីបង្រៀនយើងអំពីថ្ងៃចុងក្រោយ ។ អាពាហ៍ពិពាហ៍ដែលលោកបានសរសេរនេះ គឺជានិមិត្តរូបនៃការយាងមកជាលើកទីពីររបស់ព្រះអង្គសង្គ្រោះ ។
ចូរគូររូបភាពសាមញ្ញមួយអំពីកូនក្រមុំ និងកូនកំលោះ ហើយសរសេរអ្វីដែលអ្នកបានរៀនអំពីកូនក្រមុំ និងកូនកំលោះ នៅពេលអ្នកសិក្សា ។
សូមអាន វិវរណៈ ១៩:៧–៩ ដើម្បីមើលពីរបៀបដែលព្រះអម្ចាស់លើកទឹកចិត្តយើងឲ្យទទួលអារម្មណ៍អំពីអាពាហ៍ពិពាហ៍នេះ ។ កូនក្រមុំនៅក្នុងខគម្ពីរទាំងនេះ គឺជានិមិត្តសញ្ញានៃសមាជិកសាសនាចក្ររបស់ព្រះអម្ចាស់ដែលកំពុងត្រៀមខ្លួន សម្រាប់ការយាងត្រឡប់មកវិញរបស់ព្រះគ្រីស្ទ ។
-
យោងតាម ខទី ៨ តើយើងត្រូវត្រៀមខ្លួនសម្រាប់អាពាហ៍ពិពាហ៍នេះយ៉ាងដូចម្តេច ? តើវាអាចមានន័យយ៉ាងណាសម្រាប់អ្នក ?
-
តើអាពាហ៍ពិពាហ៍ជានិមិត្តសញ្ញាសមរម្យសម្រាប់ទំនាក់ទំនងនៃសេចក្ដីសញ្ញារបស់យើងជាមួយព្រះយេស៊ូវគ្រីស្ទតាមរបៀបណាខ្លះ ?
-
តើការយាងមកវិញរបស់ព្រះអង្គសង្រ្គោះអាចក្លាយជាថ្ងៃដ៏រីករាយមួយសម្រាប់អ្នកដោយរបៀបណា ?
សូមអានខគម្ពីរខាងក្រោម ហើយគិតអំពីអ្វីដែលអ្នកអាចធ្វើបាន ដើម្បីត្រៀមខ្លួនសម្រាប់ពេលដែលព្រះយេស៊ូវគ្រីស្ទយាងមកម្តងទៀត ។ អ្នកប្រហែលជាចង់គូសសម្គាល់អ្វីដែលអ្នករកឃើញនៅក្នុងខគម្ពីររបស់អ្នក ឬសរសេរអំពីវាក្នុងសៀវភៅកំណត់ហេតុរបស់អ្នក ។
-
តើអ្នកមានអារម្មណ៍យ៉ាងណាចំពោះព្រះយេស៊ូវគ្រីស្ទ និងអ្វីដែលទ្រង់បានធ្វើ ដើម្បីត្រៀមខ្លួនអ្នកសម្រាប់ការយាងមកវិញរបស់ទ្រង់ ?
សូមឲ្យសិស្សចែកចាយអ្វីដែលពួកគេបានរៀន ជាពិសេសអំពីព្រះយេស៊ូវគ្រីស្ទ ។ ប្រសិនបើពួកគេមិនយល់ពីទិដ្ឋភាពនៃអ្វីដែលពួកគេបានសិក្សាទេនោះ សូមបញ្ជាក់ដល់ពួកគេជាថ្មីឡើងវិញ ហើយអញ្ជើញពួកគេឲ្យចែកចាយអ្វីដែលពួកគេបានរៀន ។ សូមលើកទឹកចិត្តសិស្សឲ្យបន្តសិក្សាព្រះគម្ពីរជារៀងរាល់ថ្ងៃ ហើយបង្កើតការទុកចិត្តទៅលើព្រះអង្គសង្គ្រោះរបស់ពួកគេ ។ សូមជួយពួកគេឲ្យឃើញថា និមិត្តសញ្ញា ព្រះបរមងារ និងបុគ្គលិកលក្ខណៈដែលពួកគេសិក្សានៅក្នុងព្រះគម្ពីរបង្ហាញថា ព្រះយេស៊ូវគ្រីស្ទអាចជួយយើងឲ្យយកឈ្នះលើអំពើទុច្ចរិតនៅថ្ងៃចុងក្រោយបង្អស់បាន ។
-
តើអ្នកចង់ចងចាំ ឬធ្វើអ្វីខ្លះ ?
-
តើអ្នកមានអារម្មណ៍យ៉ាងណាដែរ ដែលថាវាអាចជួយអ្នកក្នុងអំឡុងពេលនៃការសាកល្បងនៅថ្ងៃចុងក្រោយបាន ?
វិចារណកថា និង ព័ត៌មានសាច់រឿង
សកម្មភាពរៀនសូត្របន្ថែម
ការដាក់កម្រិតលើឥទ្ធិពលរបស់បាប៊ីឡូនមកលើយើង
ប្រសិនបើសិស្សនឹងទទួលបានអត្ថប្រយោជន៍ពីការសង្កត់ធ្ងន់កាន់តែខ្លាំងលើការយកឈ្នះលើបាប៊ីឡូន សូមពិចារណាប្រើសុន្ទរកថារបស់អែលឌើរ ដេវីឌ អរ ស្តូន នៃពួកចិតសិបនាក់ « Zion in the Midst of Babylon » Ensign ឬ Liahona ខែ ឧសភា ឆ្នាំ ២០០៦ ទំព័រ ៩០–៩៣ ។ ការប្រៀបធៀបរបស់លោកអំពីព្រះវិហារបរិសុទ្ធ ម៉ាន់ហាថាន អាចត្រូវបានប្រើប្រាស់ដើម្បីជួយសិស្សឲ្យស្គាល់ពីសារៈសំខាន់នៃការបង្កើនពេលវេលារបស់ពួកគេជាមួយព្រះអង្គសង្គ្រោះ ខណៈពេលដែលដាក់កំហិតលើឥទ្ធិពលរបស់បាប៊ីឡូនមកលើពួកគេ ។ សិស្សក៏អាចនឹងទទួលបានអត្ថប្រយោជន៍មកពីការសិក្សា និងការពិភាក្សាអំពីបទដ្ឋានរបស់ព្រះអម្ចាស់សម្រាប់ពួកគេនៅក្នុង ដើម្បីកម្លាំងនៃយុវជន ( កូនសៀវភៅ ឆ្នាំ ២០១១ ) ផងដែរ ។
វិវរណៈ ១៩:១០ ។ « ការធ្វើបន្ទាល់ពីព្រះយេស៊ូវ នោះហើយជាវិញ្ញាណនៃសេចក្តីទំនាយ »
សិស្សអាចនឹងទទួលបានអត្ថប្រយោជន៍ពីការយល់ពីអំណាចនៃទីបន្ទាល់អំពីព្រះយេស៊ូវគ្រីស្ទ ។ សូមអញ្ជើញសិស្សឲ្យអាន វិវរណៈ ១៩:១០ សម្រាប់និយមន័យនៃ « ការធ្វើបន្ទាល់ពីព្រះយេស៊ូវ » ។ សូមជួយសិស្សឲ្យស្វែងយល់ថា « វិញ្ញាណនៃសេចក្តីទំនាយ » ( ខទី ១០ ) សំដៅទៅលើអំណោយទាននៃវិវរណៈ និងការបំផុសគំនិតមកពីព្រះ ដែលអនុញ្ញាតឲ្យយើងទទួលបាន ហើយថ្លែងពីបន្ទូលរបស់ព្រះបាន ( សូមមើលសេចក្ដីណែនាំដល់បទគម្ពីរទាំងឡាយ « ព្យាករ, ការព្យាករណ៍ » នៅលើគេហទំព័រ scriptures.ChurchofJesusChrist.org ) ។ សូមអញ្ជើញសិស្សឲ្យពិចារណាអំពីរបៀបដែលពួកគេអាចផ្ដល់ពរជ័យដល់អ្នកដទៃ ហើយរៀបចំពិភពលោកសម្រាប់ការយាងមកជាលើកទីពីររបស់ព្រះយេស៊ូវគ្រីស្ទបាន តាមរយៈទីបន្ទាល់របស់ពួកគេអំពីព្រះយេស៊ូវគ្រីស្ទ ។
និមិត្តរូបនៃព្រះយេស៊ូវគ្រីស្ទនៅឯការយាងមកជាលើកទីពីររបស់ទ្រង់
ដើម្បីជួយសិស្សឲ្យដឹងអំពីការយាងមកជាលើកទីពីររបស់ព្រះយេស៊ូវគ្រីស្ទ សូមពិចារណាបង្ហាញរូបភាពខាងក្រោម ហើយអញ្ជើញសិស្សឲ្យអាន វិវរណៈ ១៩:១១–១៦ ។ សូមអញ្ជើញពួកគេឲ្យពិភាក្សាពីនិមិត្តសញ្ញាដែលពួកគេរកឃើញ ។
ជំនួយការសិក្សា និងបទគម្ពីរផ្សេងទៀតអាចជួយបង្ហាញអត្ថន័យនៃនិមិត្តសញ្ញានានា ។ ជាឧទាហរណ៍ ដើម្បីយល់កាន់តែច្បាស់អំពីមូលហេតុដែលដាវចេញពីព្រះឱស្ឋរបស់ព្រះយេស៊ូវគ្រីស្ទ ឬមូលហេតុដែលទ្រង់ « [ នឹង ] គ្រប់គ្រង … ដោយដំបងដែក » ( វិវរណៈ ១៩:១៥ ) សូមអាន គោលលទ្ធិ និង សេចក្ដីសញ្ញា ១១:២ និង នីហ្វៃទី១ ១១:២៥ ។