Roma 6

“Makakalakad sa Panibagong Buhay”

Ang pagsuko ng ating sarili sa Diyos ay hindi madali. Ngunit nangako si Jesucristo na sa pagtalikod natin sa ating dating makasalanang buhay, bibigyan Niya tayo ng bagong buhay, at babaguhin Niya ang ating likas na pagkatao upang maging higit na katulad Niya. Itinuro ni Pablo na sa pamamagitan ng ordenansa ng binyag, matatanggap natin ang nagpapabagong kapangyarihan ng Tagapagligtas na tutulong sa atin na “[makalakad] sa panibagong buhay” ( Roma 6:4). Ang lesson na ito ay makatutulong sa iyong maghangad ng pagbabago sa pamamagitan ni Jesucristo at mas matukoy kung kailan nangyayari ang mga pagbabagong iyon.

Pag-unawa sa mahihirap na salita at parirala. Habang pinag-aaralan ng mga estudyante ang mga banal na kasulatan, maaaring makakita sila ng mga salita at parirala na hindi pamilyar o mahirap maunawaan. Ituro sa mga estudyante na ang mga diksyunaryo, manwal ng estudyante, talababa, at pag-aaral ng mga banal na kasulatan ay kadalasang makatutulong sa kanila na maunawaan ang mahihirap na salita at nilalaman ng mga banal na kasulatan.

Paghahanda ng estudyante: Sabihin sa mga estudyante na alalahanin ang mga detalye tungkol sa kanilang binyag at magdala ng larawan kung mayroon sila nito. Maaaring sumulat ang ilang estudyante o kanilang mga magulang ng isang journal entry noong bininyagan ang mga estudyante. Maaaring interesado ang mga estudyante na basahin ang journal entry na iyon o kausapin ang kanilang mga magulang tungkol sa mga detalye ng kanilang binyag, kabilang na ang mga detalye na maaaring nalimutan na ng mga estudyante.

Mga Posibleng Aktibidad sa Pag-aaral

Maaari kang magbahagi ng mga detalye at larawan ng iyong binyag, at anyayahan ang mga estudyante na magbahagi rin.

• Ano ang naaalala mo sa iyong binyag?

• Paano ka espirituwal na nagbago mula nang mabinyagan ka?

Pag-isipan sandali ang iyong espirituwal na pag-unlad. Maaari mo ring itanong sa iyong sarili ang tulad nito, “Lumalakas ba ang aking pananampalataya at ugnayan sa Ama sa Langit at kay Jesucristo?” o “Paano nakakaapekto ang natutuhan ko tungkol sa aking Tagapagligtas sa aking pag-uugali at mga kilos?” Habang pinag-aaralan mo ang Roma 6 , pagnilayan kung nagiging mas katulad ka ng Tagapagligtas at kung paano ka Niya matutulungang magpatuloy na umunlad at maging higit na katulad Niya.

Ang binyag sa pamamagitan ng paglulubog sa tubig ay sumisimbolo sa kamatayan at pagkabuhay na mag-uli

Ang pag-aaral kung paano tukuyin at unawain ang mga simbolo sa mga banal na kasulatan ay isang mahalagang kasanayan. Ginamit ni Pablo ang simbolismo ng binyag sa pamamagitan ng paglulubog sa tubig upang tulungan ang mga Banal sa Roma na maunawaan na dapat nating talikuran ang ating dating makasalanang buhay upang mabago tayo ni Jesucristo at mabigyan Niya tayo ng bagong buhay sa pamamagitan ng Kanyang Pagbabayad-sala.

Basahin ang Roma 6:3–8 , at alamin ang mga simbolong makapagtuturo sa iyo ng higit pa tungkol sa Tagapagligtas. Makatutulong na malaman na mababasa sa Joseph Smith Translation ng talata 7 ang “Sapagkat siya na patay sa kasalanan ay pinalaya na mula sa kasalanan” .

• Ayon sa Roma 6:3–8 , ano ang sinisimbolo para sa atin ng paglusong, paglubog, at pag-ahon mula sa tubig sa binyag?

Itinuro ni Pangulong Russell M. Nelson:

Ang mahahalagang ordenansa ng ebanghelyo ay sumisimbolo sa Pagbabayad-sala. Ang pagbibinyag sa pamamagitan ng paglulubog sa tubig ay simbolo ng kamatayan, paglilibing, at Pagkabuhay na Mag-uli ng Tagapagligtas.

(Russell M. Nelson, “The Atonement,” Ensign, Nob. 1996, 35)

• Paano mo ibubuod ang Roma 6:4 bilang pahayag ng katotohanan?

Ang sumusunod ay isang paraan upang ibuod ang Roma 6:4 : Sa pamamagitan ni Jesucristo, maaari tayong magbago at “[makalakad] sa panibagong buhay.”

• Ano sa iyong palagay ang ibig sabihin ng “makakalakad sa panibagong buhay”? ( Roma 6:4).

• Kailan mo nadama na sa pamamagitan ng Tagapagligtas ay makakalakad ka sa panibagong buhay?

• Sa palagay mo, bakit nais ng Ama sa Langit at ni Jesucristo na lumakad tayo sa panibagong buhay?

Maaari kang magbahagi sa mga estudyante ng sarili mong karanasan. Maaari ding makatulong na ipaalala sa mga estudyante na huwag magbahagi ng mga dating kasalanan.

Tulad ng nakatala sa talata 5–6 , itinuro ni Pablo na sa pamamagitan ng tipan at ordenansa ng binyag, ang “ating dating pagkatao” o “katawang makasalanan” ay “kasama [ni Jesucristo na] ipinako sa krus” at “mawalan ng bisa, at upang tayo’y hindi na magpaalipin pa sa kasalanan.”

Tingnan ang bahaging “Mga Karagdagang Aktibidad sa Pag-aaral” ng lesson na ito para sa posibleng ideya sa pagtuturo tungkol sa pagtanggap ng kapangyarihan mula sa Diyos sa pamamagitan ng paggawa at pagtupad ng mga tipan. Isipin kung makikinabang ang mga estudyante sa paggawa nito.

Pag-isipan sandali ang mga kasalanan o kahinaang nagpapahirap sa iyo na gusto mong alisin sa iyong buhay. Babalikan mo ang mga saloobing ito kalaunan sa lesson na ito.

Anong mga pagbabago ang magagawa ko?

• Sa iyong palagay, anong mga uri ng mga pagbabago ang madaling gawin? Alin sa mga ito ang mahirap gawin?

Ginamit ni Pablo ang halimbawa ng pagdaig ng Tagapagligtas sa kamatayan at kasalanan upang ituro na madaraig din natin ang ating mga kasalanan sa pamamagitan Niya.Basahin ang Roma 6:9–14 , at alamin kung paano iniugnay ni Pablo ang kamatayan at Pagkabuhay na Mag-uli ni Cristo sa kung paano natin madaraig ang kasalanan.

Maaaring mahirap maunawaan ang mga isinulat ni Pablo, lalo na kapag maraming talata ang binabasa nang sunud-sunod nang hindi humihinto upang pag-aralang mabuti ang kanyang mensahe. Kung sapat ang bilang ng mga estudyante, maaari mong italaga ang bawat talata sa dalawa o tatlong estudyante upang basahin, talakayin, at ibuod gamit ang sarili nilang mga salita. Hikayatin silang gamitin ang mga tulong sa pag-aaral ng mga banal na kasulatan o hanapin ang mga kahulugan ng anumang mahihirap na salita o parirala. Pagkatapos ay sabihin sa mga grupo na ituro sa klase ang kanilang talata. Maaaring makatulong ang mga sumusunod na tanong sa ilan sa mga talata.

• Tulad ni Jesucristo na “[namatay] sa kasalanan nang minsanan” ( talata 10), minsan lamang tayo binibinyagan para sa kapatawaran ng ating mga kasalanan. Gayunpaman, maaari nating panibaguhin bawat linggo ang ating pangakong “[lumakad] sa panibagong buhay” ( talata 4) sa pamamagitan ng pagtanggap ng sakramento. Paano nakatutulong sa iyo ang lingguhang ordenansang ito para maipakita mo ang iyong pagmamahal sa Ama sa Langit at kay Jesucristo?

• Ano sa palagay mo ang ibig sabihin ni Pablo sa “gayundin naman kayo, ituring ninyong kayo’y tunay na mga patay na sa kasalanan, ngunit mga nabubuhay sa Diyos kay Cristo Jesus”? ( talata 11).

• Bakit maaaring piliin ng isang kabataan na sundin ang payo ni Pablo na nakatala sa talata 12 ? Anong mga pagpapala ang dumarating sa ganitong pamumuhay?

• Ang salitang mga bahagi sa talata 13 ay tumutukoy sa mga parte ng ating katawan. Paano mo magagamit ang iyong mga kamay, paa, ulo, at puso “bilang kasangkapan ng pagiging matuwid tungo sa Diyos”? ( talata 13).

• Mababasa sa Joseph Smith Translation ng unang bahagi ng talata 14 ang, “Sapagkat sa paggawa nito, ang kasalanan ay hindi makapaghahari sa inyo.” . Paano matatamo ang ipinangako sa talata14 sa pamamagitan ng pagsunod sa mga turong nakatala sa talata 11–13 ?

Bigyan ng oras ang mga estudyante na tahimik na pagnilayan ang mga kasalanang gusto nilang talikuran. Dahil sensitibo ang pagninilay na ito, hindi dapat ipatalakay sa klase ang saloobin ng mga estudyante.

Maaari kang mapalaya mula sa kasalanan

Basahin ang Roma 6:16–18, 22–23 , at alamin ang mga pagpapala ng paglalakad sa panibagong buhay.

• Paano inilarawan ni Pablo ang mga pagpapala ng paglalakad sa panibagong buhay?

• Habang patuloy mong pinagsisikapang madaig ang kasalanan sa pamamagitan ni Cristo, ano sa palagay mo ang magiging hitsura at pakiramdam ng panibagong buhay kay Jesucristo?

• Ano ang magagawa mo upang makalakad sa panibagong buhay simula ngayon?

Patotohanan ang hangarin at kapangyarihan ng Tagapagligtas na baguhin ang ating puso habang nagsisikap tayong lumakad sa panibagong buhay.

Komentaryo at Pinagmulang Impormasyon

Sa anong mga paraan ako maaaring magbago?

Itinuro ni Sister Becky Craven, dating Pangalawang Tagapayo sa Young Women General Presidency:

Bilang sukli sa Kanyang hindi matutumbasang kabayaran para sa bawat isa sa atin, hinihiling ng Panginoon sa atin ang pagbabago ng puso. Ang hinihiling Niyang pagbabago mula sa atin ay hindi para sa Kanyang kapakanan, kundi para sa atin. …

Matapos marinig ang mga salita ni Haring Benjamin, ang kanyang mga tao ay sumigaw at nagpahayag na ang kanilang mga puso ay nagbago, at nagwikang, “Dahil sa Espiritu ng Panginoong Makapangyarihan na gumawa ng malaking pagbabago sa amin, … kami ay wala nang hangarin pang gumawa ng masama, kundi ang patuloy na gumawa ng mabuti. [Mosias 5:2]. Hindi sinasabi sa mga banal na kasulatan na naging perpekto sila kaagad; sa halip, ang kanilang hangaring magbago ay naghikayat sa kanila na kumilos. Ang ibig sabihin ng pagbabago ng kanilang puso ay paghuhubad ng likas na tao at pagsunod sa Espiritu habang nagsisikap sila na maging higit na katulad ni Jesucristo.

(Becky Craven, “Panatilihin ang Pagbabago,” Ensign o Liahona, Nob. 2020, 58)

Mga Karagdagang Aktibidad sa Pag-aaral

Pananaw ng isang bagong binyag na miyembro

Kung may bagong binyag sa iyong klase, ward, o branch, anyayahan siyang ibahagi sa klase ang kanyang karanasan sa pagbabalik-loob at mga saloobin tungkol sa kanyang binyag. Tiyaking humingi ng pahintulot mula sa lokal na lider ng priesthood at sa area o region director o coordinator bago siya anyayahan.

Maaari ba akong magkasala ngayon, at magplanong magsisi kalaunan?

Itinuro ni Pablo na “lahat ay nagkasala, at hindi nakaabot sa kaluwalhatian ng Diyos” ( Roma 3:23). Nagpatotoo rin siya na dahil sa Pagbabayad-sala ni Jesucristo, “kung saan marami ang kasalanan, ay lalong dumarami ang biyaya” ( Roma 5:20). Pagkatapos ay retorikal niyang itinanong, “Magpapatuloy ba tayo sa pagkakasala upang ang biyaya ay sumagana?” ( Roma 6:1). Sinagot ni Pablo ang sarili niyang tanong na nakatala sa Roma 6:2 .

Sabihin sa mga estudyante na talakayin sa maliliit na grupo ang problema sa patuloy na pagkakasala habang nagpaplanong magsisi kalaunan. Bilang bahagi ng talakayang ito, maaari nilang sagutin ang ilan o ang lahat ng sumusunod na tanong:

• Ano ang nagagawa ng patuloy na pagkakasala sa ugnayan ng isang tao sa Ama sa Langit at kay Jesucristo?

• Sa anong mga paraan maaaring subukan ng isang kabataan na bigyang-katwiran ang pagkakasala ngayon habang nagpaplanong magsisi kalaunan?

• Ano ang mga panganib ng pagkakasala ngayon, nang nalalamang pinaplano mong magsisi kalaunan?

• Paano makatutulong sa atin ang tamang pag-unawa sa plano ng kaligtasan o sa ating banal na pagkatao at layunin na madaig ang tuksong sadyang magkasala ngayon at magsisi kalaunan?

Paano nakatutulong sa akin ang paggawa at pagtupad ng mga tipan sa Diyos na makatanggap ng “panibagong buhay”?

Ang mga turo ni Haring Benjamin sa Aklat ni Mormon ay naglalarawan ng mga paraan kung paano natin matutukoy ang “panibagong buhay” na itinuro ni Pablo sa Roma 6:4 . Pagkatapos ituro ni Haring Benjamin sa kanyang mga tao ang tungkol sa pagtubos mula sa kasalanan at kamatayan sa pamamagitan ni Jesucristo, tinanong niya kung naniniwala sila sa kanyang mga salita.

Sabihin sa mga estudyante na basahin ang Mosias 5:2, 5–8 , at alamin ang itinugon ng mga tao at ang itinuro sa kanila ni Haring Benjamin tungkol sa mga pagpapalang natatanggap natin mula sa Diyos sa pamamagitan ng paggawa at pagtupad ng ating mga tipan.

• Ano ang naging epekto sa mga tao ng kanilang pananampalataya sa nakatutubos na sakripisyo ni Cristo?

• Ano ang itinuro ni Haring Benjamin tungkol sa kung paano tayo tinutulungan ng mga tipan na tumanggap ng “panibagong buhay”? ( Roma 6:4).

Mabibigyan tayo ni Jesucristo ng bagong buhay at mapapalaya Niya tayo mula sa kasalanan